1-2. (a) Se a te mea e fesoasoani mai ke kufaki tatou i fakalavelave faiga‵ta i aso takitasi? Fakamatala mai. (e) Ne a mea ka sau‵tala tatou ki ei i te mataupu tenei?

“KAFAI au e mafaufau ki te fakalavelave ne fakafesagai mo au, e iloa ne au me ne seki mafai o kufaki ne au.” E mata, kai fai aka loa ne koe ne vaegā pati penā? Tokoukega o tatou ko oti ne fai penā. Kāti ne fai atu ne koe a pati konā mai tua o te taimi ne pokotia ei koe i se masaki matagā io me ko te mate o sou tino pele kae ne kufaki ne koe. Kae ne mafai fua ne koe o kufaki i te fakalavelave tenā i aso takitasi, ona ko te agaga tapu o Ieova telā ne maua ne koe mai i ei a te “malosi telā e sili atu i te malosi masani.”—2 Koli. 4:7-9.

² E fakalago‵lago foki tatou ki te agaga tapu ke fakafesagai atu ki fakamalosiga mai te lalolagi masei tenei. (1 Ioa. 5:19) E se gata i ei, e ‵tau o taua atu tatou ki “agaga ma‵sei.” (Efe. 6:12) Mai te mafau‵fau ki fakalavelave katoa konei, ka sau‵tala eiloa tatou ki auala e lua e fesoasoani mai ei te agaga tapu ki a tatou. Ka oti ko sau‵tala ei tatou ki mea e mafai ne tatou o fai ke maua katoatoa ne tatou a mea aoga mai te agaga tapu.

3. Se a te auala e tasi e fesoasoani mai ei a Ieova ke kufaki tatou i mea faiga‵ta?

³ A te agaga tapu o Ieova e fesoasoani mai ki a tatou e auala i te tukumaiga o te ‵mana io me ko te malosi, ke fakataunu ‵tou tiute faitalia a mea faiga‵ta. Ne mafaufau te apositolo ko Paulo me ne mafai ne ia o tumau i te galue faitalia ana fakalavelave, me ne fakalagolago a ia ki “te ‵mana o Keliso.” (2 Koli. 12:9) I te lua o ana malaga fakamisionale, ne seki galue malosi fua a Paulo i te galuega talai, kae ne ‵sala foki ne ia se galuega ‵togi ke ‵lago atu ki a ia i mea tau tupe. Ne nofo a ia i Kolinito i te fale o Akuila mo Pisila. A lāua ne tino faite faleie. Ona ko te mea ne masani o galue a Paulo i te faitega o faleie, ne galue sē tumau a ia i a lāua. (Galu. 18:1-4) Ne tuku atu ne te agaga tapu ki a Paulo a te malosi ke galue i tena galuega  ‵togi kae ke fakataunu foki a tena galuega talai.

4. E ‵tusa mo te 2 Kolinito 12:7e-9, se a te fakalavelave ne fakafesagai ki ei a Paulo?

⁴ Faitau te 2 Kolinito 12:7e-9. I fuaiupu konei, se a te mea ne fakauiga ki ei a Paulo i tena faiatuga me ne fakafesagai atu a ia ki ‘se mea makaikai o te foitino’? Kafai e isi se mea makaikai ne patele ki tou foitino, ka logo‵mae malosi eiloa koe. Tela la, ne fai mai a Paulo me ne fakafesagai a ia mo se fakalavelave faigata. Ne taku ne ia a te fakalavelave tenei e pelā “me se agelu a Satani” telā ne “laupāpā” faeloa ne ia tou tagata. Kāti ne seki māfua tonu mai i a Satani mo ana temoni a fakalavelave o Paulo, telā e fai pelā me se mea makaikai ki tena foitino. Kae i te taimi ne iloa ei ne agaga ma‵sei a te “mea makaikai” tenā, kāti ne ma‵nako malosi latou ke na fakalogo‵mae malosi aka loa ne latou a Paulo. Se a te mea ne fai ne Paulo?

5. Ne saga atu pefea a Ieova ki ‵talo a Paulo?

⁵ Muamua la, ne manako a Paulo ke ave kea‵tea a te “mea makaikai” tenā. E fai mai a ia: “Ne fakatagi atu au ki te Aliki [Ieova] fakatolu taimi e uiga ki te mea tenei . . . Ke ave kea‵tea mai i a au.” Kae faitalia loa a ‵talo a Paulo, ne tumau eiloa te fakalogo‵mae atu o te mea makaikai tenā ki tena foitino. E mata, e fakauiga i ei me ne seki tali ne Ieova a ‵talo a Paulo? E se penā eiloa. Ne tali ne ia. Ne seki ave kea‵tea ne Ieova a te fakalavelave, kae ne tuku atu eiloa ne ia a te malosi ki a Paulo ke kufaki i ei. Ne fai mai a Ieova: “Toku ‵mana e katoatoa ‵lei i taimi e vāivāi ei koe.” (2 Koli. 12:8, 9) Kae fakatasi mo te fesoasoani o te Atua, ne mafai eiloa o fakatumau ne Paulo a tena fiafia mo te filemu i tena loto!—Fili. 4:4-7.

6. (a) I te auala fea e tali mai ei ne Ieova a ‵tou ‵talo? (e) Ne a fakatalitonuga e maua i tusi fai‵tau konei kolā e fakamalosi atu ki a koe?

⁶ E pelā mo Paulo, e mata, kai fakamolemole atu koe ki a Ieova ke fakasao aka koe mai se fakalavelave? Faitalia au ‵talo kolā e fai atu mo te loto kātoa, kae koi tumau eiloa a fakalavelave—io me ko gasolo o na ma‵sei atu—e mata, ka manavase koe me ko se fiafia atu a Ieova ki a koe? Kafai e penā loa, masaua te fakaakoakoga a Paulo. E pelā loa mo Ieova telā ne tali ne ia ana ‵talo, e mautinoa eiloa me ka tali atu a Ia ki au ‵talo! Kāti e se ave kea‵tea ne Ieova a te fakalavelave. Kae e auala i te agaga tapu, ka tuku atu ne ia ki a koe te malosi e manakogina ke kufaki i mea faiga‵ta. (Sala. 61:3, 4) E mafai o “‵pei ‵tuki” koe ki lalo, kae ka se mafai lele ne Ieova o tuku tiaki koe.—2 Koli. 4:8, 9; Fili. 4:13.

7-8. (a) I te auala fea e fai ei a te agaga tapu e pelā me se matagi? (e) Ne fakamatala mai pefea ne Petelu a te galuega a te agaga tapu?

⁷ Kae se a te suā auala e fesoasoani mai ei te agaga tapu? E pelā loa mo te matagi tumau telā e agiagi i se moana sou, e fesoasoani mai te agaga tapu ke tumau tatou i te tavini atu ki a Ieova i loto i te vasa sousou tenei ke oko atu ki te lalolagi fou telā ne folafola mai ne te Atua.

⁸ E pelā me se tino faiika, ne masani ‵lei te apositolo ko Petelu ki te faimalaga. Tela la, e fetaui ‵lei eiloa ke fakamatala mai ne ia a te galuega a te agaga tapu mai te fakaaogaga ne ia o se tugapati telā e isi sena sokoga ki te faimalaga. Ne tusi mai a ia: “Ne seki tuku mai a valoaga i so se taimi i te loto eiloa o te tagata, kae ne fai‵pati mai a tāgata mai te Atua e auala i te takitakiga a te agaga tapu.”—2 Pe. 1:21.

9. Se a te mea ne fakaataata ne Petelu i tena mafaufau i te taimi ne fakaaoga ei ne ia te tugapati “takitakiga”?

⁹ Se a te mea ne fakaataata ne Petelu i tena mafaufau e uiga ki te tugapati tenei “takitakiga”? Ne fakaaoga foki ne te tino telā ne tusi ne ia te tusi o Galuega ko Luka se tugapati Eleni tai ‵pau, ke fakamatala mai ei se vaka telā e “ave” ne te matagi. (Galu. 27:15) Tela la, i te taimi ne tusi atu a Petelu me i tino tusitala o te Tusi Tapu ne “takitakigina,” ne fakaaoga ne ia se “pati fakauiga telā e fakasino atu ki se vaka e faimalaga,” e pelā mo pati a se tino poto i te Tusi Tapu. A te ‵tonuga loa, ne fai mai a Petelu me e pelā mo te matagi tumau telā e ave ne ia te vaka ke oko atu ki te koga e tele ki ei, e penā foki a pelofeta mo  tino tusitala o te Tusi Tapu, ne takitakigina foki latou ne te agaga tapu ke fakataunu a te lotou galuega. Ne fai mai a te tino poto tenā, penei: “Ne sisi aka ne pelofeta a olotou lā i se auala fakatusa.” Ne fai eiloa te tusaga o Ieova. Ne tuku mai ne ia a “te matagi,” io me ko te agaga tapu. Ne fai eiloa ne tino tusitala o te Tusi Tapu a olotou tusaga. Ne ga‵lue latou e ‵tusa mo te takitakiga a te agaga tapu.

10-11. Ne a auala e lua e fakagalue i ei ne tatou a te takitakiga a te agaga tapu? Fakamatala mai.

¹⁰ E tonu, ko oti atu a te taimi ne fakaaoga i ei ne Ieova tena agaga tapu ke tusi ei a te Tusi Tapu. Kae koi fakaaoga eiloa ne ia i te taimi nei a tena agaga tapu ke takitaki ei ana tavini. Koi fai eiloa te tusaga o Ieova. E mafai pefea o maua ne tatou a mea aoga mai te agaga tapu o te Atua? E ‵tau o fakamautinoa aka ne tatou me e fai faeloa ‵tou tusaga. E fai pefea ne tatou te mea tenā?

¹¹ Mafaufau ki te fakaakoakoga tenei. Ke ave a te vaka ne te matagi, e ‵tau o fai ne te kauvaka a mea konei e lua. Muamua la, e ‵tau o faka‵tonu tena vaka ki te koga telā e agi mai i ei te matagi. Kae ka sē mafai o tele te vaka māfai e se faka‵tonu ne ia ki te koga e vau i ei a te matagi. Te lua, e manakogina ke sisi ne ia te la ke matala ‵lei ke mafai o agi ne te matagi. E tonu, faitalia loa me e agi te matagi, kae ka gasue fua tena vaka māfai e agi tena lā ne te matagi. I se auala tai ‵pau, ka mafai eiloa o tumau tatou i te tavini atu ki a Ieova māfai fua e maua ne tatou te fesoasoani o te agaga tapu. Ke maua a mea aoga mai te agaga tapu, e ‵tau mo tatou o fakagalue aka a auala e lua konei. Muamua la, e ‵tau o fai ne tatou a mea katoa kolā e fakatonu mai ne te agaga o te Atua ke fai ne ana tavini. Te lua, e ‵tau o “sisi aka ‵tou la” i se auala fakatusa mai te aofia katoatoa i polokalame faka-te-agaga konei e ‵tusa mo mea e mafai ne tatou o fai. (Sala. 119:32) Kafai e fakagalue ne tatou a auala konei, ka fesoasoani mai te agaga tapu ke kufaki tatou mo te fakamaoni faitalia a ‵tekemaiga mo fakalavelave, kae tumau i te sa‵sale i te auala ki te lalolagi fou a te Atua.

12. Ne a mea ka sau‵tala nei tatou ki ei?

¹² Tela la, ko oti ne sau‵tala tatou ki auala e lua e fesoasoani mai ei te agaga tapu. E tuku mai ne  te agaga tapu a te malosi ke tumau tatou i te fakamaoni faitalia me fe‵paki tatou mo mea faiga‵ta. E fakamalosi kae fesoasoani mai foki te agaga tapu ke tumau tatou i te auala ki te ola se-gata-mai. Nei la, ka sau‵tala tatou ki mea e fa e ‵tau o fai ne tatou ke maua katoatoa a mea aoga mai te agaga tapu.

13. E ‵tusa mo te 2 Timoteo 3:16, 17, se a te fesoasoani e maua ne tatou mai te Tusi Tapu, kae ne a mea e ‵tau o fai ne tatou?

¹³ Muamua la, ke suke‵suke ki te Muna a te Atua. (Faitau te 2 Timoteo 3:16, 17.) A te pati Eleni telā ne ‵fuli ki te “māfua mai i te Atua” e fakauiga tonu eiloa “me ne manava mai ne te Atua.” Ne fakaaoga ne te Atua a tena agaga ke “tuku” atu ana mafaufauga ki tino tusitala o te Tusi Tapu. Kafai e fai‵tau tatou ki te Tusi Tapu kae mafaufau ‵loto ki ei, ka ‵goto a mafaufauga o te Atua ki ‵tou mafaufau mo ‵tou loto. E fakamalosi mai a mafaufauga fakaosofia konā ke ola tatou e ‵tusa mo te loto o te Atua. (Epe. 4:12) Kae ke maua katoatoa a mea aoga mai tena agaga tapu, e ‵tau o fakaavanoa ne tatou se taimi ke suke‵suke ki te Tusi Tapu i aso katoa kae mafaufau ‵loto e uiga ki ei. Kae ka fakamalosi ne te Muna a te Atua a te auala e fai‵pati ei tatou penā foki ‵tou faifaiga.

14. (a) Kaia e fai atu tatou me i ‵tou fakatasiga Kelisiano e fai pelā me se koga e “agi mai i ei te matagi tumau”? (e) I te auala fea e ‵kau katoatoa atu tatou ki fakatasiga pelā loa mo te “la o se vaka telā e matala ‵lei”?

¹⁴ Te lua, tapuaki fakatasi atu ki te Atua. (Sala. 22:22) I se auala fakatusa, e fai a ‵tou fakatasiga Kelisiano pelā me se koga “e agi mai i ei te matagi tumau.” Me i te agaga tapu o Ieova e nofo faeloa i ei. (Faka. 2:29) Kaia e mafai o fai atu tatou penā? Me kafai e maopoopo fakatasi tatou mo ‵tou taina Kelisiano mō tapuakiga, e ‵talo tatou mō te agaga tapu, e usu ne tatou a pese o te Malo kolā e fakavae ki te Muna a te Atua, kae fakalogo‵logo tatou ki lāuga kolā e fakavae ki te Tusi Tapu mai ‵tou taina kolā ne ‵tofi aka ne te agaga tapu. Kae ko te agaga foki loa tenā e fesoasoani atu ki tuagane ke fakatoka kae fai olotou tōfiga. Kae ke maua katoatoa ne tatou a mea aoga mai te agaga tapu, e ‵tau o fakatoka tatou ke fai ‵tou tali i fakatasiga. I te auala tenā, e ‵kau katoatoa atu tatou ki fakatasiga e pelā loa mo te “la o se vaka telā e matala ‵lei.”

15. I te auala fea e fesoasoani mai ei a te agaga tapu ki te ‵tou galuega talai?

¹⁵ Te tolu, ke ‵kau katoatoa atu ki te galuega talai. Kafai e fakaaoga ne tatou te Tusi Tapu i te galuega talai mo te faiga o akoakoga, ko talia ne tatou te fesoasoani o te agaga tapu i te ‵tou galuega talai. (Loma 15:18, 19) Kae ke maua katoatoa a mea aoga mai te agaga tapu o te Atua, e ‵tau o ‵kau faeloa tatou ki te galuega talai kae fakaaoga te Tusi Tapu māfai e ‵lei ke fai penā. Tasi o auala e mafai o magoi ei tau galuega talai, ko te fakaaoga ne koe a manatu fesoasoani mō sau‵talaga mai te ‵Tou Tusi mō Fakatasiga ko te ‵Tou Olaga Kelisiano mo te Galuega Talai.

16. Se a te ‵toe auala tāua ke maua te agaga tapu?

¹⁶ Te fa, ke ‵talo ki a Ieova. (Mata. 7:7-11; Luka 11:13) E ‵tau o akai ‵tonu atu tatou ki a Ieova e auala i ‵talo, ko te mea ke maua ne tatou tena agaga tapu. E seai se mea e mafai o taofi ne ia ‵tou ‵talo kolā e fai atu ki a Ieova. Ke oko foki ki a Satani io me ko te falepuipui, e se mafai o taofi ne latou te agaga tapu o Ieova ke galue i loto i a tatou. (Iako. 1:17) I te auala fea e ‵tau o ‵talo atu ei tatou ko te mea ke maua katoatoa a mea aoga mai te agaga tapu? Ke tali aka, ke na suke‵suke faka‵lei nei tatou ki te mataupu e uiga ki ‵talo mai te mafaufau ki se tala fakatusa telā e maua fua i te Evagelia a Luka. *

17. Se a te akoakoga e uiga ki ‵talo e mafai o tauloto ne tatou mai te tala fakatusa a Iesu telā ne fakamau i te Luka 11:5-9, 13?

¹⁷ Faitau te Luka 11:5-9, 13. E fakaasi mai i te tala fakatusa a Iesu a te auala e ‵tau ei mo tatou o ‵talo atu mō te agaga tapu. I te tala  fakatusa, ne maua ne te tagata a mea kolā ne manako a ia ki ei “ona ko tena loto toa” o akai atu faeloa mō ne falaoa. Ne seki mataku tou tagata ke fakamolemole atu ki tena taugasoa mō se fesoasoani e tiga eiloa ko leva te po. (Ke onoono ki manatu mō sukesukega i te Luka 11:8.) Se a te akoakoga ne puke mai ne Iesu mai te tala fakatusa tenei e uiga ki ‵talo? Ne fai mai a ia: “Tumau i te fakamolemole atu, kae ka tuku mai ki a koutou; tumau i te salasala atu, kae ka maua ne koutou; tumau i te tukituki atu, kae ka ‵tala mai ki a koutou.” Tela la, se a te akoakoga mō tatou? Ke maua te fesoasoani, e ‵tau mo tatou o ‵talo atu faeloa mō te agaga tapu.

18. E ‵tusa mo te tala fakatusa a Iesu, kaia e mafai o loto tali‵tonu tatou me ka tuku mai ne Ieova a tena agaga tapu ki a tatou?

¹⁸ E fesoasoani mai foki a te tala fakatusa a Iesu ke lavea ne tatou a te pogai ka tuku mai ei ne Ieova a te agaga tapu ki a tatou. Ne manako a te tagata i te tala fakatusa ke fai pelā me se tino talimalo ‵lei. Ne mafaufau a ia me ne ‵tau mo ia o tuku atu a mea‵kai a tena mālō telā ne asi atu i te valuapo. Ne fai mai a Iesu me ne saga atu a te tuakoi ona ko te fakamolemole a te tagata loto toa telā ne akai atu faeloa mō ne falaoa. Se a te manatu ne faka‵mafa mai ne Iesu i konei? Kafai e mafai ne se tino sē ‵lei katoatoa o fesoasoani atu ki tena tuakoi, e mautinoa eiloa me ka sili atu te ‵tou Tamana faka-te-lagi i te fesoasoani atu ki a latou kolā e fakamolemole atu faeloa ki a ia mō te agaga tapu! Tela la, e mafai o ‵talo atu tatou mo te loto tali‵tonu, me ka tali fakavave mai eiloa a Ieova ki ‵tou fakamolemole ki a ia mō te agaga tapu.—Sala. 10:17; 66:19.

19. E mautinoa pefea me ka manumalo eiloa tatou?

¹⁹ E mafai o mautinoa i a tatou me e tiga eiloa a taumafaiga a Satani ke fakatakavale tatou, kae ka manumalo eiloa tatou. Kaia? Me e fesoasoani mai te agaga tapu ki a tatou i auala e lua. Muamua la, e tuku mai ne ia te malosi e manakogina ne tatou ke manumalo i mea faiga‵ta. Te lua, ko te malosi telā e fesoasoani mai ke ga‵sue tatou ki mua i te ‵tou taviniga ki a Ieova ke oko atu loa ki te lalolagi fou. Ke na fakaiku aka ke maua katoatoa ne tatou a te fesoasoani o te agaga tapu!