1-2. (a) Galla galla metuwaa genccidi deˈanaadan nuna aybi maaddana danddayii? Qonccissa. (b) Nuuni ha huuphe yohuwan ay beˈanee?

NENA gakkida paaciyaa hassayada, “Taani ta wolqqaana gidiyaakko hegaa genccana danddayikke” gaada qoppa eray? Nuuppe daroti hegaadan qoppi eroos. Neeni wolqqaama harggee sakkin woy ne siiqiyo uri hayqqin genccada aattennan aggakka. Neeni he paaciyaabaa qoppiyo wode, Yihoowa geeshsha ayyaanay neeyyo ‘ubbaappe aadhdhiya wolqqaa’ immido gishsha xallawu hegaa genccidoogaa akeekaasa.—2 Qor. 4:7-9.

² Ha iita alamiyaa qohuwaa eqettanawukka nuuyyo geeshsha ayyaanaa maadoy koshshees. (1 Yoh. 5:19) Qassi, nuuni “iita ayyaana wolqqatuura” baaxetana bessees. (Efi. 6:12) Ha meto ubban geeshsha ayyaanay nuna maaddana danddayiyo naaˈˈu ogeta nuuni haˈˈi tobbana. Yaatidi, nuuni geeshsha ayyaanaappe loytti goˈettanawu ay oottana danddayiyaakkokka beˈana.

3. Paaciyaa genccanaadan Yihooway nuna maaddiyo issi ogee aybee?

³ Paacciyaabay deˈishinkka nuuni oottana koshshiya ubbabaa oottanaadan nuuyyo wolqqaa woy minotettaa immiyoogan, Yihoowa geeshsha ayyaanay nuna maaddees. Kiitettida PHawuloosi paace gakkishinkka aggennan Yihoowawu haggaazidoy ‘Kiristtoosa wolqqan’ ammanettido gishshataassa gidiyoogaadan awu siyettiis. (2 Qor. 12:9) PHawuloosi misoonaawe oosuwawu naaˈˈantto biido wode, I sabbakiyoogan daro saatiyaa aattiyoogaa xalla gidennan, baassi koshshiyaabaa kunttanawukka minnidi oottiis. I Qoronttoosan Aqiilanne PHirisqqili son takkiis. Eti dunkkaaniyaa sikkoosona. PHawuloosa oosoykka etaagaa mala gidiyo gishshawu, I etaara amarida gallassaa oottiis. (Oos. 18:1-4) PHawuloosi ba oosuwaa oottanaadaaninne haggaazanaadan geeshsha ayyaanay ayyo wolqqaa immiis.

4. Naaˈˈantto Qoronttoosa 12:7b-9y yootiyoogaadan, PHawuloosa metoy aybee?

 ⁴ Naaˈˈantto Qoronttoosa 12:7b-9 nabbaba. Ha xiqisetun, PHawuloosi I baaxetiiddi deˈiyo, ‘agunttadan A caddi oyqqiyaabaa’ yootido wode woygana koyidee? Ne bollaa caddida agunttay kiyana xayikko, nena keehi sakkana. Hegaa gishshawu, PHawuloosi issi qommo wayssiya paacee bana gakkidoogaa yootiis. I he paacee “Seexaanaa kiitanchchai” ‘dechchiyoogaa’ woy qinxxalliyan baqqiyoogaa mala gidiyoogaa yootiis. PHawuloosa bollaa caddi oyqqida aguntta mala gidida he metuwaayyo gaasoy Seexaanaanne dayddanttata waayi gidana. Gidoppe attin, eti PHawuloosa metuwaa akeekido wode, hegee yaa iitanaadan malennan waayi aggana. Hegee issi uri agunttay bollan gelanaadan yaa naaqqiyoogaa mala. PHawuloosi waatidee?

5. Yihooway PHawuloosa woosaa waati zaaridee?

⁵ Koyro, PHawuloosi aguntta malabaa Yihooway xayssanaadan koyiis. I, “Hegaa taappe shaakkana mala, taani Godaa heezzutoo woossaas” yaagiis. SHin, PHawuloosi woossikkonne, he caddi oyqqiya aguntta malabay xayibeenna. Hegaa giyoogee Yihooway PHawuloosa woosaa zaaribeenna giyoogee? Zaaribeenna giyoogaa gidenna. A woosaa I zaariis. Yihooway he metuwaa xayssana xayikkonne, PHawuloosi hegaa genccanaadan wolqqaa immiis. Yihooway, “Ta wolqqai daafuran polettees” yaagiis. (2 Qor. 12:8, 9) Xoossay maaddin, PHawuloosi ufayttidinne woppu giidi deˈiis!—Pili. 4:4-7.

6. (a) Yihooway nu woosaa waati zaarana danddayii? (b) Ha menttuwan deˈiya xiqisetuppe minttettiyaabaa ay demmadii?

⁶ PHawuloosaagaadan, Yihooway ne metuwaa xayssanaadan A woossa eray? Neeni hegaabaa darotoo wozanappe woossikkonne, he metoy waayi xayana, woy ubba yaa iitennan aggenna. Hegee Yihooway nenan ufayttibeenna gaada neeni hirgganaadan oottidee? Yaatikko, PHawuloosa hanotaa hassaya. Yihooway A woosaa zaaridoogaadan, I ne woosaakka zaaranaagee qoncce! Yihooway he metuwaa xayssennan aggana danddayees. SHin, I geeshsha ayyaanaa baggaara neeni he metuwaa genccanawu koshshiya wolqqaa immana. (Maz. 61:3, 4) Neeni kunddikkokka, Yihooway nena aggi bayenna.—2 Qor. 4:8, 9; Pili. 4:13.

7-8. (a) Geeshsha ayyaanay carkko mala gidiyoy ayba ogiyaanee? (b) PHeexiroosi geeshsha ayyaanay oottiyo ogiyaa waati qonccissidee?

⁷ Geeshsha ayyaanay nuna maaddiyo hara ogee aybee? Nuuni geeshsha ayyaanaa carkkuwaara geeddarssana danddayoos. Abban beetay denddikkonne, issi markkabee ba biyoosaa gakkanawu likke ginaara carkkiya carkkuwaa goˈettana danddayees. Hegaadan, Xoossay qaalaa gelido ooratta alamiyaa gelana gakkanawu nuuni metoy deˈishinkka Yihoowawu ubbatoo haggaazanaadan geeshsha ayyaanay maaddees.

⁸ Kiitettida PHeexiroosi moliyaa oyqqiyaagaa gidiyo gishshawu, wolwoluwaa laaggiyo meezee awu deˈees. I geeshsha ayyaanay oottiyo hanotaa wolwoluwaa laaggiyoogaara gattidi qonccissidoy hegaassa gidana. I hagaadan giis: “Hananabaa yootidobi ubbai geeshsha asati Geeshsha Ayyaanai kaalettin, Xoossaa qaalaa haasayidosonappe attin, asa sheniyan haasayettibeenna.” “Kaalettin” geetetti birshshettida Giriiketto qaalay “sugin biyoogaa” giyoogaa.—2 PHe. 1:21.

9. PHeexiroosi asata geeshsha ayyaanay ‘kaalettidoogaa’ xaafido wode, I asay ay qoppanaadan koyidee?

⁹ PHeexiroosi kaalettiyoogaa giya qaalan yootido qofay aybee? Oosuwaa maxaafaa xaafida Luqaasi, carkkoy ‘efiyoosaa yeddi bayiyo’ markkabiyaa qonccissanawu, PHeexiroosi goˈettidoogaa mala Giriiketto qaalaa goˈettiis. (Oos. 27:15) PHeexiroosi Geeshsha Maxaafaa xaafidaageeta geeshsha ayyaanay ‘kaalettidoogaa’ xaafiyo wode, markkabiyaa laaguwaabaa asay qoppanaadan oottiya qaalaa goˈettidoogaa issi Geeshsha Maxaafaa eranchchay yootiis. Markkabee  biyoosaa gakkanaadan carkkoy sugiyoogaadan, Geeshsha Maxaafaa xaafeti xaafanaadan geeshsha ayyaanay kaalettidoogaa PHeexiroosi yootiis. Geeshsha Maxaafaa xaafeti ‘eta sharay xoqqu giido’ markkabe mala gidiyoogaakka he eranchchay yootiis. Geeshsha ayyaanay eti oottanaadan kaalettiyoobaa oottanawu giigetti uttidosona. Yihooway I oottana koshshiyaabaa oottiis. I ‘carkkuwaa’ woy geeshsha ayyaanaa immiis. Geeshsha Maxaafaa xaafeti eti oottanaadan imettida oosuwaa oottidosona. Eti he ayyaanaa kaaletuwaa kaallidosona.

10-11. Geeshsha ayyaanay nuna kaalettiyoogaa shaakki eranawu nuuni oottana koshshiya naaˈˈubati aybee? Leemisuwaa yoota.

¹⁰ Yihooway asay Geeshsha Maxaafaa xaafanaadan ha wodiyan ba geeshsha ayyaanaa goˈettenna. SHin, Yihooway haˈˈikka ba ashkkarata kaalettanawu ba geeshsha ayyaanaa goˈettees. Yihooway I oottana koshshiyaabaa haˈˈikka oottiiddi deˈees. Geeshsha ayyaanay nuna kaalettiiddi deˈiyoogaa nuuni waatidi shaakki erana danddayiyoo? Nuuni oottana koshshiyaabaa aggennan oottana bessees. Nuuni hegaa waati oottiyoo?

¹¹ Ha leemisuwaa qoppa. Markkabiyaa laaggiyaagee carkkoy bana maaddanaadan koyikko, I naaˈˈubaa oottana bessees. Koyro, I ba markkabiyaa carkkoy carkkiyo ginan essana koshshees. Qassi laaggiyaagee ba markkabiyaa carkkoy carkkiyo sohuwaappe haahuwan essidi aggiigikko, A markkabee sinttawu beenna. Naaˈˈantto, I ba sharata baassi danddayettida keenan aassi birshshidi xoqqu oottana koshshees. Carkkoy carkkishinkka, sharatun carkkoy kumana xayikko A markkabee sinttawu beenna. Hegaadan, nuuni Yihoowawu aggennan haggaazana danddayiyoy, geeshsha ayyaanaa maaduwaa demmiyoogaa xallaana. He ayyaanaappe goˈettanawu, nuuni naaˈˈubaa oottana bessees. Koyro, Xoossaa ayyaanay A ashkkarati oottanaadan kaalettiyoobaa nuuni oottana bessees. Naaˈˈantto, he oosota nuussi danddayettida keenan loytti oottana bessees. (Maz. 119:32) Nuuni hegaa oottiyo wode, Xoossay ehaana ooratta alamiyaa gelana gakkanaashin  aggennan Yihoowawu ammanettidi haggaazanaadan geeshsha ayyaanay nuussi wolqqaa immana.

12. Nuuni haˈˈi ay beˈanee?

¹² Hanno gakkanawu nuuni geeshsha ayyaanay nuna maaddiyo naaˈˈu ogeta tobbida. Geeshsha ayyaanay nuuyyo wolqqaa immees; qassi metoy deˈishinkka nuuni ammanettidi deˈanaadan maaddees. Nuuni oottanaadan Yihooway koyiyoonne merinaa deˈuwaa demissiya oosuwaa nu oottana mala, geeshsha ayyaanay nuna kaaletteesinne maaddees. Nuuni geeshsha ayyaanaappe loytti goˈettanawu haˈˈi oottana bessiyo oyddubata beˈana.

13. Naaˈˈantto Ximootiyoosa 3:16, 17y yootiyoogaadan, Geeshsha Maxaafay nuna waati maaddana danddayii, qassi nuuni waatana bessii?

¹³ Koyro, Xoossaa Qaalaa xannaˈa. (2 Ximootiyoosa 3:16, 17 nabbaba.) “Xoossaa Ayyaanai de7ees” geetetti birshshettida Giriiketto qaalay “Xoossay shemppidoogaa” giyoogaa. Geeshsha Maxaafaa xaafiyaageetu qofan Xoossay ba qofaa wottanawu ba ayyaanaa goˈettiis. Nuuni Geeshsha Maxaafaa nabbabiyo wodenne nabbabidobaa wotti dentti qoppiyo wode, Xoossaa kaaletoy nu qofaaninne nu wozanan gelees. Hegee nuuni Yihoowa ufayssana mala nu deˈuwaa laammanaadan oottees. (Ibr. 4:12) Gidoppe attin, nuuni geeshsha ayyaanaappe loytti goˈettana mala Geeshsha Maxaafaa ubbatoo nabbabanawunne nabbabidobaa loyttidi wotti denttidi qoppanawu wodiyaa bazzana bessees. Yaatiyo wode nuuni haasayiyoobaaninne oottiyooban Xoossaa Qaalaa kaalloos.

14. (a) Nuuni geeshsha ayyaanay nu shiiqotun deˈees gaana danddayiyoy aybissee? (b) Nu shiiqotun geeshsha ayyaanaappe loytti goˈettanawu nuna aybi maaddanee?

¹⁴ Naaˈˈantto, haratuura issippe Xoossawu goynna. (Maz. 22:22) Gubaaˈiyaa shiiqotun hanettiyaabay ‘carkkoy carkkiyoogaa’ mala. Yihoowa ayyaanay shiiqotun deˈees. (Ajj. 2:29) Nuuni hegaadan giyoy aybissee? Ayssi giikko, nuuni nu ishanttuuranne michchonttuura shiiqiyo wode, geeshsha ayyaanaa demmanawu woossoos, Xoossaa Qaalay denddo gidido Kawotettaa mazamureta yexxoos, qassi geeshsha ayyaanan sunttettida ishantti Geeshsha Maxaafaa qofay deˈiyo haasayata haasayiyo wode siyoos. Qassi michchontti bantta kifiliyaa giigettanaadaaninne shiishshanaadan he geeshsha ayyaanay maaddees. SHin Geeshsha ayyaanaappe loytti goˈettanawu, nuuni shiiquwan oyshaa zaaranawu giigettana koshshees. Yaatiyoogan, nuuni shiiquwaa shiiqiyo wode, sharay birshshettido markkabiyaadan geeshsha ayyaanaappe goˈettanawu giigidaageeta gidoos.

15. Sabbakiyo wode geeshsha ayyaanay nuna waati maaddana danddayii?

¹⁵ Heezzantto, sabbaka. Nuuni sabbakiyoonne tamaarissiyo wode Geeshsha Maxaafaa goˈettikko, nu haggaazuwan geeshsha ayyaanay nuna maaddanaadan eeno goos. (Roo. 15:18, 19) SHin, Xoossaa ayyaanaappe loytta goˈettanawu, neeni ubbatoo sabbakananne danddayettida ubban Geeshsha Maxaafaa goˈettana bessees. Neeni sabbakiyo wode Deˈuwaanne Haggaazuwaa Xannaˈiyo Xuufiyan deˈiya, haasayissiyo qofaa goˈettiyoogee asaa kaseegaappe loytta haasayissana danddayiyo issi oge.

16. Geeshsha ayyaanaa demmiyo sitta ogee aybee?

¹⁶ Oyddantto, Yihoowa woossa. (Maa. 7:7-11; Luq. 11:13) Yihoowa geeshsha ayyaanaa demmiyo aybippenne aadhdhiya sitta ogee, A immanaadan woossiyoogaa. Nu woosay Yihoowakko gakkennaadan diggana woy Xoossaa ayyaanaa nuuni demmennaadan teqqana danddayiyaabi aybinne baawa. Nuuni qashettikkokka geeshsha ayyaanay nuna maaddana danddayees; nuuni geeshsha ayyaanaa demmennaadan Seexaanay mule diggana danddayenna. (Yaaq. 1:17) Nuuni geeshsha ayyaanaappe loytti goˈettana mala waati woossana bessii? Hegaa zaaranawu, Luqaasa Wonggeliyaa  xallan deˈiya leemisuwaappe woosaabaa ane loytti pilggoos. *

17. Yesuusi Luqaasa 11:5-9, 13n yootido leemisuwaappe nuuni woosaa xeelliyaagan ay tamaarana danddayiyoo?

¹⁷ Luqaasa 11:5-9, 13 nabbaba. Nuuni geeshsha ayyaanaa demmanawu waati woossana bessiyaakko Yesuusi yootido leemisoy qonccissees. He leemisuwan, bitanee “oichchiiddi waissido” woy watiwatido gishshawu baassi koshshiyaabaa ekkiis. Wodee qamma bilahe gidikkonne, I ba laggee bana maaddanaadan oychchanawu yayyibeenna. * Ha leemisoy woosaabaa ay tamaarissiyoogaa Yesuusi yootidee? I hagaadan giis: “Woossite; intte ekkana. Koyite; intte demmana. Kare yiidi xeesite; intteyyo karee dooyettana.” Yaatin nuuni hagaappe tamaariyoobay aybee? Geeshsha ayyaanaa maaduwaa demmanawu, nuuni aggennan woossana bessees.

18. Yesuusa leemisuwaa maaran, Yihooway ba geeshsha ayyaanaa nuuyyo immanaagaa nuuni ammanettana danddayiyoy aybissee?

¹⁸ Yihooway nuussi geeshsha ayyaanaa immiyoy aybissakko akeekanaadankka Yesuusa leemisoy nuna maaddees. Leemisuwan odettida bitanee ba imattaa loytti mokkanawu koyiis. I qamma bilahe yiida imattawu qumaa immana koshshiyaabadan awu siyettiis; shin immanawu ayyo aybinne baawa. Bitanee watiwatidi oyttaa oychchido gishshawu A shooroy immidoogaa Yesuusi yootiis. Yesuusi tamaarissanawu koyidobay aybee? Nagaranchcha asi watiwatidi oychchiya ba shooruwaa maaddanawu eeno giikko, geeshsha ayyaanaa demmanawu aggennan oychchiyaageeta saluwan deˈiya keha Aaway hegaappe aaruwan maaddanaagaa ammanettoos! Yaatiyo gishshawu, nuuni geeshsha ayyaanaa demmanawu woossiyo wode, Yihooway nu woosaa zaaranaagaa ammanettoos.—Maz. 10:17; 66:19.

19. Nuuni genccana danddayiyoogaa ammanettana danddayiyoy aybissee?

¹⁹ Seexaanay nuna qohiyoogaa mule aggana xayikkonne, nuuni genccana danddayiyoogaa ammanettana danddayoos. Aybissi? Geeshsha ayyaanay nuna naaˈˈu ogiyan maaddiyo gishshataassa. Koyro, metuwaa genccanawu koshshiya wolqqaa nuussi geeshsha ayyaanay immees. Naaˈˈantto, geeshsha ayyaanay nuuni ooratta alamiyaa gelana gakkanawu aggennan Yihoowawu haggaazana mala maaddiya wolqqa. Geeshsha ayyaanaa maaduwaappe loytti goˈettanawu murttidaageeta gidoos!