1-2. (a) Wetin de help us make we fit endure problem everyday? Explain. (b) Wetin we go talk about for this topic?

“ANYTIME wey I think about the problem wey I don face, I know say no be my power help me endure.” You don ever talk something like that before? Many of us don talk-am. Maybe you get one serious sickness or your person die, but you endure-am. When you think about wetin happen that time, you feel say you survive each day only because Jehovah use e holy spirit give you the power wey you need.​—2 Cor. 4:7-9.

² We still need holy spirit to help us fight this wicked world make e no affect us for bad way. (1 John 5:19) Apart from that one, we still need power to fight “wicked spirits.” (Eph. 6:12) So make we talk about two ways wey holy spirit fit help us face all this problem. Then we go talk about wetin we fit do so that we go get all the help wey we fit get from holy spirit.

3. When things no easy, wetin be one way wey Jehovah de help us endure?

³ Jehovah de use e holy spirit give us the power wey we need so that we go fit do everything wey we need to do, even if things no easy. Apostle Paul know say na because of “the power of Christ,” e fit continue to serve Jehovah. (2 Cor. 12:9) For the second time wey e travel go different-different place go preach, e no only work hard for the preaching work. E still do other work to get money make e fit support e self. Paul stay with Aquila and Priscilla for their house for the city of Corinth. The work wey Aquila and Priscilla de do na to use cloth or skin of animal make small-small house wey them de call tent. Paul de do the same business with them. So e de work with them for some days. (Acts 18:1-4) Na holy spirit give Paul power make e  fit do other work to support e self and to preach.

4. According to 2 Corinthians 12:7b-9, which problem Paul get?

⁴ Read 2 Corinthians 12:7b-9. For this verse them, wetin Paul mean when e talk say e get “chuku-chuku for body”? If chuku-chuku de chuk you for body, you no go feel serious pain? So Paul de talk say, e face some kind problem and this problem bring pain. E describe the problem as “angel of Satan,” and e say na so-so “slap” (“beating,” ftn.) e receive from the problem. This problem just be like say person de use chuku-chuku de chuk Paul, but maybe no be Satan or the demons give Paul this problem. Even with that one, when this wicked spirits see the problem, they ready to do everything so that Paul go feel the pain more-more. So wetin Paul do?

5. How Jehovah answer the prayer wey Paul pray?

⁵ Paul first want make God remove the problem. E talk say: ‘I beg the Lord Jehovah three times make e remove the problem.’ But even with the prayer, the problem still continue. This one mean say Jehovah no answer the prayer? No be so at all. E answer the prayer. Jehovah no remove the problem, but e give Paul the power to endure-am. Jehovah talk say: “I de give you complete power when you dey weak.” (2 Cor. 12:8, 9) And because of the help from God, Paul continue to get joy and peace of mind!​—Phil. 4:4-7.

6. (a) How Jehovah fit answer our prayer? (b) For the paragraph, which different-different promise for the Bible verse them give you power?

⁶ Like Paul, you don ever beg Jehovah before make e remove problem wey you get? Maybe you pray about-am plenty times but the problem no go, instead e worse. How the situation make you feel? You feel say Jehovah no dey happy with you? If na so, make you remember the example of Paul. Just the way Jehovah answer e prayer, Jehovah go still answer your own too! Na true say Jehovah fit no remove the problem. But e go use e holy spirit give you the power wey you need to endure the problem. (Ps. 61:3, 4) The problem fit ‘nack you for ground’ but Jehovah no go leave you.​—2 Cor. 4:8, 9; Phil. 4:13.

7-8. (a) How holy spirit be like wind? (b) How Peter describe the way holy spirit de work?

⁷ Which other way holy spirit de help us? We fit talk say holy spirit be like wind or breeze. And the problem wey we de face for this world fit be like heavy rain with thunder for sea. Even with heavy rain, boat for sea go fit use the breeze reach the place wey e de go. For the same way, holy spirit de help us continue to serve Jehovah until we reach Paradise wey God don promise.

⁸ As fisherman, apostle Peter know plenty things about how to drive boat for sea. So we no surprise say, when e de describe the way holy spirit de work, maybe e use word wey people de use when them de talk about to drive boat for sea. Peter talk say the things wey the prophets for Bible talk no be their own, but na God use holy spirit direct them. The Greek word wey they translate as “direct,” mean “to push something.”​—2 Pet. 1:21; ftn.

9. Wetin Peter want make people think about when e talk for Bible say holy spirit “push” or direct men?

⁹ Wetin Peter want make people think about when e talk for Bible say holy spirit “push” or direct men? For the book of Acts wey Luke write, e use one word like the one wey Peter use to describe boat wey wind de push ontop water. (Acts 27:15) One professor talk say, when Peter write for Bible say holy spirit “push” the Bible writers, the word wey e use go  make people think of boat ontop water as the boat de move. So Peter de talk say, just as breeze de push boat make e fit reach the place wey e de go, na so holy spirit direct the prophets and Bible writers make they fit do their work. The same professor still talk say, the Bible writers just be like boat wey person “open the cloth” wey they hang for up of the boat, for breeze to fit blow-am. This writers ready to do the work wey the spirit direct them to do. Jehovah do wetin e suppose to do. E give them the “breeze,” or holy spirit. And this Bible writers do wetin they suppose to do. They follow the direction wey the holy spirit de direct them go.

10-11. Which two things we need to do so that we go make sure say holy spirit de direct us? Give example.

¹⁰ The truth be say, Jehovah don stop to use e holy spirit today to make people write Bible books. But, Jehovah still de use e spirit de direct e servants. Jehovah still de do wetin e suppose to do. How we go fit make sure say the holy spirit de direct us? We must make sure say we de do wetin we suppose to do. How we go fit do that one?

¹¹ Think about this example. If driver for boat want get help from the wind, e go need to do two things. Number one, e go need to put the boat for the direction wey the wind de blow go. After all, the boat no go fit move if the driver just park-am far from the place wey wind dey. Number two, e need to raise the cloth for the boat go up and open-am well. Na this cloth wind de blow so that the boat go fit move. The truth be say, even when wind de blow, the boat go only move go front if the cloth for the boat gather enough wind. For the same way, we go fit continue to serve Jehovah only if holy spirit help us. If we want make holy spirit help us, we must do two things. Number one, we must do the things wey the holy spirit direct servants of God make they do. Number two, we must do this things well with all our power. (Ps. 119:32) When we do  this two things, holy spirit go give us power so that we go fit continue to serve Jehovah well until we reach Paradise.

12. Wetin we want talk about now?

¹² So far, we don talk about two ways wey holy spirit de help us. Holy spirit de give us power and de help us continue to serve God well when we de face problem. Holy spirit still de help and direct us make we fit continue to do the work wey Jehovah want make we do, till we enter Paradise. Now, make we talk about four things wey we must do so that we go receive all the help wey we fit get from the holy spirit.

13. According to 2 Timothy 3:16, 17, wetin Bible fit do for us, but wetin we must do?

¹³ Number one, study Bible. (Read 2 Timothy 3:16, 17.) They translate one Greek word for this verse as “God use holy spirit direct.” But if you take this Greek word as e be, the meaning na “God breath out” something. This one mean say God use e spirit put the things wey e get for mind inside the mind of the people wey e use write Bible. When we read Bible and we think deep about the things wey we read, wetin God want make we do go enter our mind and heart. This things for Bible go make us change some things for our life so that we go make Jehovah glad. (Heb. 4:12) But if we want get all the help wey we fit get from holy spirit, we must always take time to study Bible. Apart from that one, we go think deep about the things wey we don read. Then, Bible go fit affect everything wey we de talk and do.

14. (a) Why we go fit talk say holy spirit dey our meeting? (b) Wetin go help us make we get all the help wey we fit get from holy spirit for our meeting?

¹⁴ Number two, worship God together with brothers and sisters. (Ps. 22:22) The spirit of Jehovah dey Christian meeting wey we de do. (Rev. 2:29) Why we fit talk like that? Na because when we dey for meeting with our brothers and sisters, we de pray for holy spirit, and we de sing songs to worship God. Apart from that one, we de listen to talk from Bible, and na brothers wey holy spirit don choose de handle-am. Na still holy spirit de help sisters to prepare and handle their part. But, if we want get all the help wey we fit get from holy spirit, we need to prepare go meeting so that we go give comment. When we do like that, we go ready to receive all the help wey we fit get from holy spirit for our meeting. We go just be like boat wey e cloth open well so that e go fit gather breeze to move.

15. How holy spirit de help us for our preaching work?

¹⁵ Number three, de preach. When we use Bible de preach and teach people, we de allow holy spirit to help us for our preaching work. (Rom. 15:18, 19) So if you want make holy spirit help you, you must always de preach and de use Bible anytime wey you fit. Make you de use the examples for our Life and Preaching Meeting Workbook about how to preach to people. This one na one way wey you fit make the way you de talk with people for preaching de better.

16. Wetin be the direct way wey we go fit really get holy spirit?

¹⁶ Number four, pray to Jehovah. (Matt. 7:7-11; Luke 11:13) The direct way wey we go fit really get holy spirit na to tell Jehovah for prayer say we want-am. Nothing go fit block our prayer make e no reach Jehovah or block holy spirit make e no reach us. Holy spirit go fit help us even when we dey prison. And Satan no go fit do anything make we no receive holy spirit from God. (Jas. 1:17) How we suppose to pray so that we go receive all the help  wey we fit receive from holy spirit? One story for the book of Luke go help us answer that question. We go learn about prayer for this story. Among the Bible books about the life of Jesus, na only the book of Luke get this story. Make we talk about-am. *

17. Wetin we learn from the story for Luke 11:5-9, 13 wey Jesus talk about?

¹⁷ Read Luke 11:5-9, 13. The story wey Jesus talk show us how we suppose to pray for holy spirit. For the story, the man get the thing wey e need “because e continue de ask.” Even though say night don reach, e no fear to ask e friend for help. (Luke 11:8) * Wetin Jesus teach us about prayer for this story? E say: “Continue to ask, and wuna go get-am; continue to find-am and wuna go see-am; continue to de knock and e go open.” So, wetin we learn? If we want make holy spirit help us, then we must continue to pray for-am.

18. According to the story wey Jesus talk, why we fit dey sure say Jehovah go give us e holy spirit?

¹⁸ This story wey Jesus talk still help us see why Jehovah go give us holy spirit. The man for the story want care for e visitor well. Even though the visitor come for night, the man feel say e need to find something wey the visitor go chop. But nothing dey house. Jesus talk say the neighbor give the man food because e no tire to beg for the food. Wetin Jesus want make we learn? If person wey they born with sin ready to help e neighbor because e no tire to beg, then we fit dey sure say our Father ready to help us if we no tire to ask for holy spirit! Jehovah na kind Father. So we believe say Jehovah go answer our prayer when we beg for holy spirit.​—Ps. 10:17; 66:19.

19. Why we dey sure say we go fit endure?

¹⁹ Even though say Satan no want tire to fight us, we go fit endure. Why? Na because holy spirit de help us for two ways. Number one, holy spirit de give us the power wey we need so that we go fit endure problem. Number two, holy spirit de give us power make we fit continue to serve Jehovah until we reach the new world. Make we use all our heart do everything wey we fit do to get all the help wey we fit get from holy spirit!