1-2. (a) Mbi bilenda kutu sadisa kukuenda ntuala kheti bo tumviokila mu ziphasi? Sudikisa. (b) Mbi tunkuiza mona mu dilongi adidi?

 “BO yinyindulanga mu mambu yiviokila, yimmonanga ti mu mangolo mami veka khanu yisa nunga ko.” Wumana yindudila phila ayoyi? Befu bawombo tumana yindudila buawu. Ḿba wumana tubila abobo, bo wuyindula buidi wubakila mangolo ma kunungina kimbevo kingolo voti lufua lu mutu wunzolanga. Bo wunyindula mambu amomo, ngie wumbakulanga ti phevi yinlongo yi Yave yawu yikuvana ‘mangolo malutidi’ muingi kununga mambu beni.—2 Kolinto 4:7-9.

² Befu mvitu tuntombanga phevi yinlongo yi Yave muingi kukindama mu zithotolo zi nza. (1 Yoane 5:19) Mvandi tuntombanga yawu muingi kunuana na ‘ziphevi zimbi.’ (Efeso 6:12) Mu kibila ki mambu moso amomo, diawu mu dilongi adidi tunkuiza muena ziphila ziwadi phevi yinlongo yilenda tusadisila kununga zithotolo beni. Bosi, tunkuiza mona mbi tufueti vanga muingi tuluta tambula phevi yinlongo yi Yave.

3. Phila mbi phevi yinlongo yilenda kutu sadisila kununga ziphasi?

³ Phila yimueka phevi yinlongo yitu sadisilanga yidi, mu kutuvana lulendo voti mangolo muingi kukieba biyeku bitu kheti tuidi mu kuviokila mu zithotolo. Mvuala Polo wutuba ti, wununga kusadila Yave kibila waba fiatilanga mu lulendo voti mangolo ma Klisto. (2 Kolinto 12:9) Bo kayenda mu khumbu yimuadi mu kisalu kiandi ki minsioni, nandi wusala beni, kubika to mu kisalu ki kusamuna vayi mvandi wusala muingi kabaka bu kuzingila. Nandi waba kalanga ku Kolinto, ku nzo Akila ayi Prisca baba vanganga nzo ngoto voti mavuala. Bo baba fisu yimueka, Polo waba botulanga thangu muingi kusala yawu. (Mavanga 18:1-4)  Phevi yinlongo yivana Polo mangolo ma kusala muingi kubaka bu kuzingila ayi yoyawu thangu kuvanga kisalu ki kusamuna.

4. Mvita mbi Polo kantubila mu 2 Kolinto 12:7b-9?

⁴ Tanga 2 Kolinto 12:7b-9. Mu matangu amama, Polo wutuba ti wuba ‘Nsongo voti Lusendi mu nsuni’. Mbi nandi kaba tomba kutuba? Boti widi lusendi mu nsuni, bukiedika ti khienzu yiwombo wummonanga. Polo waba tomba kutuba ti waba tovuka beni mu kibila ki mambu amomo. Nandi wufuanikisa ziphasi kaba viokila buka “mbasi yi Satana” waba kuntutanga zimbata thangu ka thangu. Masinsundula ko ti Satana ayi ziphevi ziandi zimbi bawu batuadisa ziphasi zi Polo. Vayi ḿba bo bamona ziphasi Polo kaba viokila, bawu baluta kumfietikisa, muingi kabuela kutovuka. Mbi Polo kavanga?

5. Buidi Yave katambudila minsambu mi Polo?

⁵ Polo waba tomba Yave kabotula mambu kaba viokila. Nandi wutuba: ‘Mu zikhumbu zitatu ndisambidila Mfumu [Yave] muingi kathatula mu mambu beni.’ Kheti buawu, mambu beni masa botuka ko. Bukiedika ti mawu mansundula ti Yave kasa kuwa ko minsambu miandi? Ndamba. Kheti Yave kasa botula ko mambu beni, vayi nandi wuvanga Polo mangolo muingi kakindama mu ziphasi beni. Yave wutuba: ‘Kibila mangolo mami manluta monikanga mu ngiewu mu thangu widi wulebakana.’ (2 Kolinto 12:8, 9) Mu lusalusu lu Nzambi, Polo wutatamana kusadila Yave mu mayangi ayi mu ndembama!—Filipi 4:4-7.

6. (a) Buidi Yave kalenda tambudila minsambu mitu? (b) Buidi 2 Kolinto 4:8, 9; Filipi 4:13 malenda tusadisila kubuela kindama?

⁶ Ngie mvaku wumana lomba buka Polo muingi Yave ka kubotula mu ziphasi waba viokila? Ḿba kheti mu minsambu beni miwombo ngie wuvanga, mambu beni masa mana ko—voti mabuelama—ayi ngie wutona kuyindula ti Yave wukufuemina! Boti mawu widi mu kuviokila, muna yindula kifuani ki Polo. Dedi bo Yave katambudila minsambu miandi, nandi mvandi wala tambudila minsambu miaku! Kheti Yave kasimmanisa ko ziphasi ziaku, vayi nandi wala kuvana pheve’andi yinlongo muingi yi kuvana mangolo wulenda kindimina mu mambu beni maphasi wumviokila. (Minkunga 61:3, 4) Ngie wulenda mana zingolo, vayi Yave kalendi kukuekula ko.—2 Kolinto 4:8, 9; Filipi 4:13.

7-8. (a) Mu phila mbi phevi yinlongo yididi buka phemu? (b) Buidi Petelo kasudikisila phila phevi yinlongo yinsadilanga?

⁷ Phila mbi yinkaka phevi yinlongo yilenda kutusadisila? Tulenda fuanikisa phevi yinlongo na phemu. Dedi bo phemu yinnunguninanga buatu bundiatilanga mu phemu nate buawu kuvitila va londo, buawu mvandi phevi yinlongo yitusadisilanga tutatamana kusadila Yave kheti bo tumviokila mu mambu ma phasi ayi mu kutukindisa nate tuala kota ku Nza yimona Nzambi kakanikisa.

⁸ Mvuala Petelo bo kaba nlobi nandi wuzaba buboti matedi kudiatisa buatu. Diawu muingi kutubila phila phevi yinlongo yintuadusuanga, nandi wusadila phila bantuadisilanga buatu, voti bandiatisilanga buawu. Nandi wusonika: “Bila mbikudulu yi yizilanga mu luzolo lu mutu ko vayi batu banlongo ba Nzambi bayoluka bu badiatusu kuidi pheve yinlongo.” Kikuma ki kingeleko ‘kutuadisa’ kinsundula ‘kudiatusu’.—2 Petelo 1:21.

9. Mbi biba mu mayindu ma Petelo bo kasadila kikuma ‘kudiatusu’ mu phemu?

⁹ Mbi biba mu mayindu ma Petelo bo kasadila kikuma ‘kudiatusu’ mu phemu? Dedi butubila nlonguki wumueka wu Kibibila, bo Petelo kasonika ti minsoniki mi Kibibila batuadusu, nandi wusadila kifuani ki mutu wundiatisa buatu. Luka nsoniki yi buku yi Mavanga,  wusadila kiokiawu kikuma ki kingeleko muingi kutubila buatu bannunguna kuidi phemu. (Mavanga 27:15) Diawu Petelo waba tomba kutuba ti, dedi bo buatu bundiatusuanga kuidi phemu muingi kutuka ko kankuenda, mimbikudi basonika Kibibila batuadusu mu phevi yinlongo muingi kununga kuvanga kiyeku kiawu. Nlongisi beni wube tuba: “Tulenda tuba ti mimbikudi bayalubula minledi miawu.” Yave wuvanga mandi mu kufila phevi’andi yinlongo, ayi minsoniki mi Kibibila mvawu bavanga mawu mu kulandakana zithuadusulu zi phevi yinlongo.

10-11. Mambu mbi muadi tufueti vanga muingi phevi yinlongo yitu tuadisa? Vana kifuani.

¹⁰ Bukiedika ti bubu, Yave kasiala ko be sadila phevi’andi yinlongo muingi kutuadisa batu kusonika Kibibila. Vayi Yave wukhidi vanga kisalu kiandi mu kusadila phevi’andi yinlongo muingi kutuadisa dikabu diandi. Diawu boti tutidi phevi yinlongo yi Yave yi tutuadisa, tufueti kukifiongunina boti tuidi mu kuvanga mangolo. Buidi?

¹¹ Yindula mua nkadu matedi kifuani ki mutu wundiatisanga buatu. Muingi kabaka ndandu mu phemu, nandi kafueti vanga mambu muadi. Ditheti, nandi kafueti tula buatu buandi ku khonzu phemu yidi mu kuvemba. Kibila mutu wundiatisanga buatu na kutatuka khonzu yidi kuvemba phemu, buatu buandi bualasa kuenda ko ntuala. Dimuadi, nandi kafueti yalumuna minledi mi phemu. Kheti phemu yiwombo kumvanga, buatu buala kuenda to kuntuala boti minledi mi phemu midi mu kubuila phemu. Bobuawu mvandi, befu tuala nunga to kukuikama, mu lusalusu lu phevi yinlongo yi Yave. Muingi tubaka ndandu yi phevi yinlongo yi Yave, mambu muadi madi nkinza. Ditheti, tufueti ba vama phevi yinlongo yi Yave yidi. Mansundula ti tufueti vanga bisalu bintuadusuanga mu phevi yinlongo yi Nzambi. Dimuadi, tufueti kualubula minledi mitu mi phemu, mansundula kukivana mu ntima woso mu bisalu bi Nzambi. (Minkunga 119:32) Befu kuvanga mambu amomo phevi yinlongo yi Yave, yala kutu sadisa kukuenda  ntuala kheti mu mambu maphasi tumviokila nati kukota mu nza yimona yi Nzambi.

12. Mambu mbi tuentubila?

¹² Nati avava tuba mona phila wadi phevi yinlongo yitu sadisilanga. Yitheti, yawu yitu vananga mangolo ayi yitu sadisanga kutatamana bakuikama mu zithotolo. Yimuadi, phevi yinlongo yitu vanganga kukuenda ntuala ayi yitu sadisanga kutatamana mu nzila yintuadisanga luzingu lu mvu ka mvu. Tuentubila biuma binna, tufueti vanga muingi tuluta baka lusalusu lu phevi yinlongo.

13. Dedi bummonisina 2 Timoteo 3:16, 17, mambu mbi malenda monika bo tuntanga Kibibila? Vayi mbi tufueti vanga?

¹³ Ditheti, longuka diambu di Nzambi. (Tanga 2 Timoteo 3:16, 17.) Kikuma ki kingeleko basadila avava mu “lulendo lu Nzambi” kinsundula “Nzambi wufula.” Nzambi wusadila phevi’andi yinlongo muingi “kufula” voti kutula mayindu mandi kuidi batu basonika Kibibila. Bo tuntanga Kibibila ayi tunyindula mambu tuntanga, zithuadusulu zi Nzambi zinkotanga mu mayindu ayi mu ntim’itu. Ayi mambu beni, matu vanganga kubalula nzingulu’itu muingi kukuangidika Yave ayi kuvanga luzolo luandi. (Ebeleo 4:12) Vayi muingi tubaka ndandu yilutidi yi phevi yinlongo befu tufueti botula thangu muingi kulonguka diambu di Nzambi ayi kuyindula mambu tuntanga. Diambu di Nzambi diala balula phil’itu yi kuyindudila ayi yi kukolukila.

14. (a) Kibila mbi tulenda tubila ti phevi yinlongo yimbanga mu zikhutukunu? (b) Buidi tulenda landikinina zikhutukunu na minledi mitu miyalubuka?

¹⁴ Dimuadi, buongimina Nzambi mu zikhutukunu. (Minkunga 22:22) Phevi yinlongo yi Yave yimbanga mu zikhutukunu. (Nzaikusu 2:29) Kibila mbi tuntubila abobo? Kibila bo tuidi bakutakana na zikhomba zitu, befu tundindanga phevi yinlongo mu lusambulu, tunkuimbilanga minkunga mibongulu mu Diambu di Nzambi, ayi tunkuwanga manlongi ma Kibibila zikhomba zi babakala bantuadusu mu phevi yinlongo bamvanganga. Phevi yinlongo mvandi yinsadisanga zikhomba zi bakieto kukubika ayi kuvanga mbosonoso’awu mu lukutukunu. Vayi muingi phevi yinlongo yitu sadisa, tufueti kuendanga mu zikhutukunu bakubama muingi kuvana mimvutu. Befu kuvanga mawu, yidi buka befu tuma kualubula “minledi mitu.”

15. Buidi phevi yinlongo yitu sadisilanga mu kisalu ki kusamuna?

¹⁵ Dintatu, vanga kisalu ki kusamuna. Bo tunsadila Kibibila muingi kusamuna ayi kulonga, tuidi mu kubika phevi yinlongo yitu sadisa mu kisalu kitu. (Loma 15:18, 19) Vayi muingi tuluta baka ndandu mu lusalusu alolo, tufueti kukivana mu kisalu ki kusamuna ayi kusadilanga Kibibila khumbu zioso tuidi luaku. Kiuma kilenda kutu sadisa kuluta baka ndandu mu kisalu ki kusamuna kidi: Kusadila mbonosono yi masolo yikuizanga mu Nzingulu ayi Kisalu Kitu ki Buklisto.

16. Phila mbi yilutidi tulenda bakila phevi yinlongo?

¹⁶ Dinna, sambila kuidi Yave. (Matai 7:7-11; Luka 11:13) Phila yilutidi tulenda bakila phevi yinlongo yidi mu kudinda yawu kuidi Yave mu nsambu. Vasi ko kiuma kilenda tula nkaku muingi minsambu mitu mibika tuka kuidi Yave. Ayi vasi ko ni kiuma kilenda tula nkaku muingi phevi yinlongo yituka kuidi befu—ni bibaka bi buloku ni Satana kalendi kaka ko minsambu mitu. (Yakobi 1:17) Vayi buidi tufueti sambidila muingi kuluta baka lusalusu lu phevi yinlongo? Muingi tubaka mvutu, tuemmona kifuani kimueka kidi to mu buku yi Luka. b Kiawu kinkuiza tusadisa kubuela longuka matedi minsambu.

17. Mbi tulenda longuka mu kifuani kidi mu Luka 11:5-9, 13?

¹⁷ Tanga Luka 11:5-9, 13. Kifuani ki Yesu kimmonisa buidi tufueti sambidila muingi kudinda phevi yinlongo. Mu kifuani akioki, dibakala beni wubaka biuma kaba tomba ‘mu kibila ki lukuikumunu luandi.’ Theti va khati builu nandi kasa mona ko boma bu kudinda lusalusu kuidi nkundi’andi. (Tala tsudukusu yi lutangu lu Luka 11:8 Mubongulu Malongi madi mu Nzingulu ayi Kisalu Thuadusulu yi Lukutukunu yi Ngonda Yisambuadi, mvu 2018 tsielo 8) Mbi kifuani akioki kitu longa matedi minsambu? Yesu wutuba: ‘Lutatamana kulomba ayi luela tambula; lutatamana kutomba ayi luela bakula; lutatamana kukokuta ayi bela kuluzibudila.’ Mbi tulenda longuka? Boti tutidi kubaka lusalusu lu phevi yinlongo, tufueti tatamana kudinda yawu mu nsambu kuidi Yave.

18. Dedi bummonisina kifuani ki Yesu, kibila mbi tulenda bela lufiatu ti Yave wala tuvana phevi’andi yinlongo befu kundinda?

¹⁸ Kifuani ki Yesu mvandi kitusadisa kumona kibila mbi Yave kala tuvanina phevi’andi yinlongo. Dibakala bantubila mu kifuani beni, waba tomba kuyamba mboti nzenza. Bo kakhambu ba kikuvana nkundi’andi wuyiza va khati builu, diawu katomba kuvangila dioso diambu. Diawu Yesu katubila ti dibakala adiodi ditambula lusalusu mu kibila ki lukuikumunu luandi. Mbi Yesu kaba tomba kutu longa? Boti mutu wu masumu widi wukubama muingi kusadisa nkundi’andi wu kundinda lusalusu mu lukuikumunu, buna Tat’itu Yave, widi nkua mamboti, wulutidi beni phuila yi kusadisa baboso bankudinda phevi yinlongo mu lukuikumunu! Diawu tulenda ba lufiatu ti Yave wala tambudila minsambu mitu, befu kundinda phevi yinlongo.—Minkunga 10:17; 66:19.

19. Kibila mbi tuididi lufiatu ti tuala nunga zithotolo zi Satana?

¹⁹ Satana kavonganga ko mu kutu thota, vayi tulenda ba lufiatu ti befu tuala nunga. Mu kibila mbi? Kibila phevi yinlongo yitu sadisanga mu phila wadi. Yitheti, mu kutu vana mangolo muingi kununga zithotolo. Yimuadi, yawu yidi mangolo matu sadisanga kukuenda tuala mu kisalu ki Yave nati tuala kota mu nza yimona. Diawu tatamana kudinda lusalusu lu phevi yinlongo, muingi wubaka ndandu yilutidi mu yawu!