1. ?Jehova i letem yumi blong mekem wanem?

JEHOVA i letem yumi fri blong jusum samting we yumi wantem mekem long laef. Hem i tijim yumi olsem wanem blong mekem ol gudfala desisen, mo hem i halpem yumi blong mekem ol desisen we i givhan long yumi, mo i mekem Hem i glad. (Sam. 119:173) Taem yumi folem ol advaes blong Baebol we yumi lanem, oltaem bambae yumi mekem ol gudfala desisen.—Hib. 5:14.

2. ?From wanem samtaem i had, taem yumi mekem wan desisen?

² Nating se yumi mekem wan gudfala desisen be samtaem i had blong finisim samting we yumi statem. Traem tingbaot ol eksampol ya: Wan yangfala brata i mekem desisen blong ridim ful Baebol. Long ol faswan wik, hem i folem gud program ya, be afta hem i stop. Wan sista i mekem desisen blong mekem fultaem paenia, be i had blong hem i jusum wan stret dei blong i statem. Ol elda long wan kongregesen oli agri blong visitim evriwan long kongregesen, be sam manis i pas we oli no mekem. Ol stori ya oli defdefren, be i gat wan samting we i sem mak. Oli no finisim desisen we oli mekem. Ol fas Kristin long Korin oli fesem sem problem ya. Makem samting we yumi save lanem long olgeta.

3. ?Wanem desisen we ol Kristin long Korin oli mekem, be wanem i hapen?

³ Samwe long yia 55 Kristin Taem, ol Kristin long Korin oli mekem wan impoten desisen. Oli harem nius se ol brata long Jerusalem mo long Judia oli gat sam hadtaem mo oli pua. Ale ol narafala kongregesen oli sakem sam mane blong givhan long olgeta. From we ol Kristin long Korin oli kaen mo oli glad blong givim samting, oli askem long Pol sipos olgeta tu oli save givhan. Nao Pol i sanem leta long kongregesen ya blong talem wanem we oli mas mekem, mo hem i putumap Taetas blong i lukaot long wok ya. (1 Kor. 16:1; 2 Kor. 8:6) Sam manis  afta, Pol i faenemaot se ol Kristin long Korin oli no mekem samting we oli statem. Taswe ol presen blong olgeta i no rere blong karem i go long Jerusalem wetem ol presen we ol narafala kongregesen oli givim.—2 Kor. 9:4, 5.

4. Folem 2 Korin 8:7, 10, 11, ?Pol i leftemap tingting blong ol Kristin long Korin blong oli mekem wanem?

⁴ Ol Kristin long Korin oli mekem wan gudfala desisen, mo Pol i talem gudfala toktok long olgeta from we oli soemaot strong bilif mo oli wantem givhan. Be hem i leftemap tingting blong olgeta tu blong oli finisim wok we oli statem. (Ridim 2 Korin 8:7, 10, 11.) Eksampol blong olgeta i tijim yumi se ol Kristin we oli gat strong bilif tu, oli save faenem i had blong finisim desisen we oli statem.

5. ?Wanem ol kwestin we bambae yumi ansarem?

⁵ Olsem ol Kristin long Korin, maet yumi faenem i had blong wok folem ol desisen blong yumi. ?From wanem? From we yumi sinman, yumi no kwik blong tekem aksen. O maet samting we yumi no tingbaot i hapen we i mekem se yumi no finisim desisen blong yumi. (Prija 9:11; Rom 7:18) ?Yumi mas mekem wanem sipos yumi wantem jenisim ol desisen we yumi mekem finis? ?Mo olsem wanem blong kamgud moa blong finisim desisen we yumi statem?

6. ?Wetaem maet yumi save jenisim wan desisen?

⁶ I gat sam desisen we yumi no save jenisim. Eksampol: Yumi no save jenisim desisen blong mekem wok blong Jehova, mo yumi no save jenisim desisen we yumi mekem taem yumi mared. (Mat. 16:24; 19:6) Be i gat sam desisen we yumi save jenisim. ?From wanem? From sam samting long laef i save jenis. ?Wanem sam samting we oli save givhan long yumi blong mekem wan gudfala desisen?

7. ?Yumi mas prea from wanem? ?Mo from wanem?

⁷ Prea blong askem waes. Jehova i pulum Jemes blong i raetem se: “Sipos wan long yufala i sot long waes, i gud hem i gohed blong askem long God, nao bambae hem i kasem from we God i glad blong givim samting long olgeta man.” (Jem. 1:5) Blong talem stret, yumi evriwan i “sot long waes.” Taswe, yumi mas lukluk i go long Jehova taem yumi mekem wan desisen, o taem yumi stap luklukbak long wan desisen we yumi bin mekem. Olsem nao, Jehova bambae i givhan long yumi blong mekem wan waes desisen.

8. ?Wanem kaen risej we yumi save mekem bifo we yumi mekem wan desisen?

⁸ Mekem risej. Lukaot advaes long Tok blong God, ridim ol buk we oganaesesen blong Jehova i wokem, mo toktok wetem wan man we yu save se bambae i givim gudfala advaes long yu. (Prov. 20:18) I impoten blong mekem olsem bifo we yu mekem desisen blong, faenem wan niufala wok, muv i go long wan narafala ples, mo jusum se bambae yu skul from wan wok we bambae i givhan long yu long wok blong prij.

9. ?Wanem gudfala samting i kamaot taem yumi no giaman long yumi wan?

⁹ Tingbaot risen from wanem yu mekem desisen ya. Ol risen biaen long ol desisen blong yumi oli impoten long Jehova. (Prov. 16:2) Hem i wantem se yumi tok tru long evri samting. Taswe, taem yumi mekem wan desisen, yumi no wantem giaman long yumi wan mo long ol narafala. Sipos risen biaen long desisen blong yumi i no stret, bambae i had blong holemtaet desisen we yumi mekem. Eksampol, wan yangfala brata i mekem desisen blong mekem wok blong paenia. Afta we taem i pas, hem i faenem i had blong kasem ol aoa we hem i mas kasem, mo i no moa glad long wok blong prij. Maet hem i ting se risen from wanem hem i paenia i blong mekem  Jehova i glad. Be maet stret risen hemia se, hem i wantem mekem papa mo mama blong hem i glad o maet wan narafala man.

10. ?Yumi mas mekem wanem blong yumi save jenisim laef blong yumi?

¹⁰ Traem tingbaot wan Baebol stadi we i mekem desisen blong i no moa smok. Fastaem, hem i wok had, mo blong wan o tu wik hem i no smok nating. Be biaen hem i smok bakegen. !Nating se i olsem, hem i winim slak fasin ya! Samting we i givhan long hem, hemia se hem i lavem Jehova mo i wantem mekem hem i glad.—Kol. 1:10; 3:23.

11. ?From wanem i gud blong makemaot klia samting we yu wantem mekem?

¹¹ Makemaot klia samting we yu wantem mekem. Taem yu makemaot klia samting we yu wantem, bambae i isi moa blong finisim wan samting we yu statem. Eksampol, maet yu mekem desisen blong ridim Baebol oltaem. Be sipos yu no mekem wan program, desisen ya i no save wok. * O maet ol elda blong wan kongregesen oli mekem desisen blong visitim ol brata mo sista long kongregesen ya, be i gat samtaem i pas we oli no mekem olsem we oli talem. Blong folem desisen blong olgeta, maet oli save askem ol kwestin olsem: “?Yumi save finis hu ya ol brata mo sista we i gud blong visitim olgeta? ?Yumi makem wan stret taem finis blong visitim olgeta?”

12. ?Maet yumi nidim blong mekem wanem? ?Mo from wanem?

¹² Save samting we yu naf blong mekem. Yumi evriwan i no gat i naf taem, samting, mo paoa blong mekem evri samting we yumi wantem mekem. Taswe yumi mas save samting we yumi naf blong mekem. Samtaem, yu save jenisim wan desisen we yu luk se yu no naf blong finisim. (Prija 3:6) ?Be olsem wanem sipos yu luklukbak long desisen ya, jenisim smol, mo yu ting se yu save finisim? Hemia faef rod we i save givhan long yu blong finisim desisen blong yu.

13. ?Olsem wanem yu save kasem paoa we yu nidim blong wok folem desisen blong yu?

¹³ Prea from paoa blong wok folem desisen blong yu. God i save givim ‘paoa blong mekem olgeta samting’ mo blong wok folem desisen blong yu. (Fil. 2:13) Taswe, i gud yu askem tabu spirit blong Jehova blong i givim paoa we yu nidim. Gohed nomo blong prea nating se yu no kasem yet ol ansa blong prea blong yu. Jisas tu i talem se: “Yufala i mas gohed blong askem [tabu spirit], nao bambae yufala i kasem.”—Luk 11:9, 13.

14. ?Olsem wanem advaes blong Ol Proveb 21:5 i save givhan long yu blong wok folem desisen blong yu?

¹⁴ Mekem wan plan. (Ridim Ol Proveb 21:5.) Blong finisim wan projek we yu statem, yu mas mekem wan gudfala plan. Mo yu mas wok folem plan ya. Long sem fasin, taem yu mekem wan desisen, makemaot klia samting we yu wantem mekem blong yu save wok folem desisen ya. Sipos yu gat wan wok we i had blong mekem, yu seraotem long ol smosmol haf. Pol i leftemap tingting blong ol Kristin long Korin blong oli tekemaot smol mane “long fas dei blong evri wik,” i bitim we oli wet kasem taem we hem i go blong pikimap ol presen mane blong olgeta. (1 Kor. 16:2) Sipos yu seraotem wok blong yu long ol smosmol haf, bambae yu no harem se i had blong finisim.

15. Afta we yu mekem wan plan, ?wanem nekis samting we yu save mekem?

¹⁵ Sipos i yu raetemdaon ol plan blong yu, bambae i isi moa blong yu wok folem ol plan ya. (1 Kor. 14:40) Eksampol, ol bodi blong  elda oli kasem advaes se oli mas putumap wan elda we wok blong hem i blong raetemdaon evri desisen we ol elda oli gat plan blong mekem. Mo tu, hem i raetemdaon nem blong elda we i wok folem desisen ya, mo wetaem oli mas finisim wok ya. Taem ol elda oli raetemdaon ol samting we oli mas mekem, i isi moa blong oli wok folem desisen we oli mekem. (1 Kor. 9:26) Yu save mekem olsem tu. Maet yu save raetemdaon lis blong ol samting we yu mekem evridei. Long stat blong lis ya, yu raetemdaon faswan samting we bambae yu mekem. Hemia i save givhan long yu blong finisim samting we yu statem, mo tu, i givhan long yu blong mekem plante samting long wan smol taem nomo.

16. Folem Rom 12:11, ?wanem impoten samting we yumi mas mekem blong finisim ol desisen we yumi statem?

¹⁶ Wok had. I tekem taem blong folem plan blong yu mo finisim wanem we yu statem. (Ridim Rom 12:11.) Pol i talem long Timoti blong i “gohed blong mekem bes” blong hem mo ‘oltaem hem i mas mekem olgeta samting,’ blong hem i save kam wan gudfala tija. Yumi save folem advaes ya tu, taem yumi stap mekem ol wok blong Jehova.—1 Tim. 4:13, 16.

17. ?Olsem wanem Efesas 5:15, 16 i save givhan long yumi blong finisim samting we yumi plan blong mekem?

¹⁷ Yusum gud taem blong yu. (Ridim Efesas 5:15, 16.) Makemaot wan taem blong mekem samting we yu plan blong mekem mo yu no jenisim taem ya. Yu no mas wet long wan stret taem blong mekem samting we yu plan blong mekem, from we i neva gat wan taem we i stret. (Prija. 11:4) Yu mas lukaotgud se yu no letem ol samting we oli no impoten oli mekem se yu no moa gat paoa blong mekem ol samting we oli moa impoten. (Fil. 1:10) Sipos i stret, maet yu save jusum wan taem we bambae ol narafala oli no distebem yu. Yu save letem ol narafala tu oli save se yu gat wan samting blong mekem. Mo tu, i gud yu ofem mobaelfon blong yu o jekem ol Imel blong yu, mo yu yusum sosol media long wan narafala taem. *

18-19. ?Wanem i save givhan long yu blong wok folem ol desisen blong yu nating se i no isi?

¹⁸ Tingbaot gudfala frut we bambae i kamaot. Gudfala frut blong wan desisen i olsem wan ples we yu wantem kasem. Maet rod blong go long ples ya i klos, be sipos yu rili wantem kasem ples ya, bambae yu folem wan narafala rod. Long sem fasin, bambae yu no hareap blong lego ol desisen blong yu sipos yu mas folem wan narafala rod, o sipos wan samting i blokem yu.—Gal. 6:9.

¹⁹ I had blong mekem ol gudfala desisen, mo i no isi tu blong wok folem ol desisen blong yu. Be wetem help blong Jehova, yu save kasem waes mo paoa we yu nidim blong finisim wanem we yu statem.