1. Ka lígirubei Heowá lun wadügün?

ÍGIRA lumutiwa Heowá lun wanúadahan kaba lan wadüga lau wabagari. Arufudahati woun ida luba lan wadügüni katei buidu ani íderagua lumutiwa lun buidu lan lidin woun dan le gunda lan lau le lunbei wadügüni. (Sal. 119:173). Líderagubadiwa wafalaruni lubuidun adundehani le tariñagubei Lererun Bungiu lun buídutima lan wadügüni katei (Ebü. 5:14).

2. Ka katei gayaraabei hénrengu lan woun lárigiñe saminaadiwa lan lun wadügün somu katei?

² Ligíati, anhein buidu lubéi le wasaminarubei wadügün ani wadügüñein, másiñati mosu lan wáfaagun lun wagumuchuni. Ariha wamá fiu hénpulu. Aban lasaminarun aban nibureinti laliihanu Bíbülia, aba lagumeserun aliihóun fiu dimaasu lárigiñe, lau lásügürün dan aba maliihan laaru lan. Aba tasaminarun aban íbiri lun prekursora tan, gama lumoun, aba terederun asansihei weyu le lunbei tagumeserun. Aba hariñagun wéiyaaña lidan afiñeni hagumesera lan abisidahaña íbirigu, aba lásügürün saragu dan mabisidahantiña ni aban hádangiñe. Íbini ámuñegueinarügü lan sügǘ le, genegeguati luáriuagua, saminatiña íbirigu ha hadügün aban katei, gama lumoun, madügün hamuti. Aba katei líbeina le asuseredubei houn kristiánugu ha Korintubaña ha lídanbaña furumiñeti sígulu. Ariha waméi kaba lan wafurendeira hámagiñe.

3. Ka aransehani hadügübei Korintuna ani ka asuseredubei?

³ Lidan irumu 55, aba haranserun Korintuna lun hadügün aban katei súdiniti. Aba híchugun fe luagu gudemei le gádanbaliña íbirigu ha Herusalénbaña hama ha Hudeabaña luma haransehaña lan lílana amu damuriguaü lun hóundarun seinsu lun hídehan. Aba línchahaniña lubuidun hagaburi luma areiduni lun hídehaba lan, ligía hálügüdünbalin apostolu Pábulu ida luba lan hadügüni. Aba líchugun adundehani houn ani aba líriduni Titu lun líderaguniña  adügei (1 Ko. 16:1; 2 Ko. 8:6). Fiu hati lárigiñe aba líchugun Pábulu fe luagu madügüngiña lan ni kata. Ligíati, chóuruti maranserungiña lan lun hóunahani ídemuei le lun Herusaléun úara luma le lunbei hóunahani lílana amu damuriguaü (2 Ko. 9:4, 5).

4. Según 2 Korintuna 8:7, 10, 11, ka lariñagubei Pábulu houn Korintuna lun hadügüni?

⁴ Adügaña meha Korintuna aban lubuidun aransehani ani aba lariñagun Pábulu houn buidu lan hadüga ladüga derebugu lan hafiñen luma ubebeni le hawagubei lun gíchigadi hamá. Mosu meha giñe lariñagun houn lun lan hagumuchuni le hagumeserubei (aliiha huméi 2 Korintuna 8:7, 10, 11). Furendeitiwa lídangiñe le asuseredubei houn gayara lan lasuseredun katei le íbini houn kristiánugu úaraguatiña lidan háfaagun lun hagunfuliruni le hasaminarubei hadügün.

5. Kaba álügüdahani wóunaba?

⁵ Kei lasuseredun houn Korintuna, másiñati hénrengu lan woun lun wadügüni le wasaminarubei wadügün ladüga gafigoun wamá luma ladüga wareidahani katei lubá amu weyu. Adügati giñe lasuseredun aban katei le magurabunti lun hénrengu lan woun wagunfuliruni le wasaminarubei wadügün (Apur. 9:11; Rom. 7:18). Lidan arütíkulu le wóunabubei álügüdahani burí le: ida luba buidu lan le wanúadirubei wadügün?, ka lunbei wadügüni lun warihini anhein buídubei lubéi le wanúadirubei wadügün? ani kaba íderaguawa lun wagumuchuni le gumese wamaalibei?

6. Ka dan ídanbei lunti lan wasansiruni le wasaminarubei wadügün?

⁶ Anihein katei le lunbei wadügüni súdiniti ani maweiyasunbadiwa asansirei. Kei hénpulu, mabusenruntiwa wígiruni weseriwidun lun Heowá ani aranseñu waña lun úaragua wamá houn wámari (Mat. 16:24; 19:6). Lau sun lira, anihein amu katei le másiñati lunti lan wasansiruni, ladüga lasansirun le gádanbaliwa. Kaba íderaguawa lun buidu lan le wasaminarubei wadügün?

7. Ka lunbei wamuriahani lubaragiñe wadügün aban katei?

⁷ Wamuriaha lichú au luma Bungiu. Heowá ariñagubei lun Santiagu lun labürühani dimurei burí le: “Anhein megei lubéi aban hídangiñe lichú aau, amuriahalá luma Bungiu, [...] ladüga mánginti ani ruti lau areini houn súngubei” (Sant. 1:5). Sun wagía mégeitiwa “lichú aau” lidan somu dan lidan wabagari. Ligíati, afiñe wamá luagu Heowá dandu dan le wadüga lan somu katei kei dan le wakutihañein lan le wadügübei. Ani ítara líderagubadiwa Heowá lun buidu lan le lunbei wadügüni.

8. Kaba lunbei wadügüni lubaragiñe wadügün somu katei?

⁸ Akutiha waméi katei buidu. Ariha waméi le tariñagubei Lererun Bungiu, aliiha wamoun agumeiraguagüdüni to tadügün lóundarun Heowá ani ayanuha wamá luma somu gürigia le uágubei wachourura (Ari. 20:18). Súdiniti ladügǘn sun le dan le wasaminaruña lan wasansirun wadagimanu, wáguyun lidoun amu fulasu o le lan lunbei waturiahani lun gayara lan wanuriagun woungua lun wasigirun eseriwida lun Bungiu.

9. Ida luba lahuudun woun wasubudiruni gádantiwa?

⁹ Akutiha waméi lébuna le lunbei wadügüni. Bereseti Heowá lau lébuna wadügüni katei (Ari. 16:2). Agurabati lun haruma lan wanügüni wabagari lidan sun katei. Ligíati, súdiniti haruma lan wadügüni katei dandu wóuniwagua kei houn amu. Anhein magaburi wabalin igaburi le, másiñati hénrengubei lan woun wagumuchuni dasi le gumese wamaalibei. Samina wamá aban lan lasaminarun aban nibureinti lun prekursoru lan, gama lumoun, lárigiñe fiu dan aba larihin masaga lani oura le lunbei lasagaruni ani aba lasandirun magundani lidan lani ministeriu.  Másiñati le lan lébunabei prekursoru lan lun lan lagundaaragüdüni Heowá. Le linarün katei, gayaraati giñe lun lan lagundaraguagüdüniña lagübürigu o somu gürigia le hínsiñeti lun.

10. Ka mégeiwabei lun ladügǘn asansiruni?

¹⁰ Ariha wamá ábaya kesi, aba lígiruni aban aturiahati Bíbülia agumulahani. Furumiñe áfaaguati lun magumulahan lan ani adüga lumuti luagu aban o bián dimaasu, gama lumoun ábaya lagumulahan. Lagumuhóun ábaya lígiruni. Ínsiñeni le lasandirubei luagu Heowá luma lun lagundaraguagüdüni ligía adügübei lun lígiruni agumulahani (Kol. 1:10; 3:23).

11. Ka uagu mosu lubéi ladügǘniwa aransehani le buiti?

¹¹ Adüga wamá aransehani buiti. Líderagubadiwa le lun wagumuchuni le wagumeserunbei. Kéiburi, anhein saminaadiwa lubéi waliihanu Bíbülia sagü weyu ani úatu aban programa wama, gayaraati madügün wabéi lan. * Ábaya kesi: aba hasaminarun wéiyaaña lidan afiñeni houdin abisidahaña íbirigu, aba lásügürün dan ani madügün hamagili. Aban ídemuei le gayaraabei líderaguniña lun hadügüni, lun hadügün álügüdahani kei le: “Adügaadiwa san aban lísüta lau hiri íbirigu ha mégeibaña lun habisidahóuniwa? Direi haadiwa san aban weyu lun wabisidahaniña?”.

12. Ka katei gayaraabei wadügüni, ani ka uagu?

¹² Subudi waméi gádantiwa. Úati ni aban gadaaniti, ni gaseinsuti, ni héreti, lun ladügüni sun le labusenrunbei. Ligíati mosu wasubudiruni gádantiwa. Anihein dan gayaraabei lan wasansiruni le lunbei yebe wadügüni ladüga siñá lan wagunfuliruni (Apur. 3:6). Anhein lunti lubéi wakutihani le adüga wamaalibei adüga waméi asansiruni le mégeiwabei ani samina wamá ka lan lunbei wadügüni, kaba íderaguawa lun wagumuchuni le wagumeserunbei? Ariha wamá seingü katei.

13. Ida luba wibihin erei lun gayara lan wadügüni le wasaminarubei?

¹³ Wamuriaha erei luma Bungiu lun wadügüni dasi. Gayaraati líderaguniwa Heowá lun wadügüni katei “kei labusenruni” luma lun wagunfuliruni le wariñagubei (Fili. 2:13). Ligíati amuriaha wamá sífiri sandu lun gayara lan wibihini erei le wemegeirubei. Sigí wamá afurieida íbini genege lan darü lan wounabún. Ariñagati Hesusu: “Hamuriaha, ábame líchugun Bungiu [sífiri sandu] hun” (Luk. 11:9, 13).

14. Ida liña líderaguniwa adundehani le lídanbei Ariñawagúni 21:5 lun wagunfulirun lau le wasaminarubei wadügün?

¹⁴ Aranse wamá aban programa (aliiha huméi Ariñawagúni 21:5). Lun wadügün furumiñeguarügü dasi, mégeitiwa lun waranserun aban programa luma lun wagunfuliruni. Ligiaméme asuseredubei dan le wanúadirun kaba lan wadüga, adüga wamá aban lísüta luagu burí sun katei le lunbei wadügüni. Ánhawa adüga aransehani lun wadügün aban dasi hénrenguti lidan burí igaburi le ménrenguti, ménrenguntimabei woun lun warihini wawanserun. Ariñagati Pábulu houn korintuna lun sagü lan furumiñeti weyu lidan dimaasu, lun “ladireirun kada aban [...] murusun lídangiñe le lagañeirubei” lubaragiñe hagurabahan lun lachülürün lun híchuguni súngubei lidan aban (1 Ko. 16:2). Ábaya katei le ídehabei lun madiheridun wamá lidan wadügün dasi hénrenguti lau wafanreinraguni lun wadügüni murusun murusun.

15. Lárigiñe waranserun aban programa, ka amu katei gayaraabei wadügüni?

¹⁵ Líderagubadiwa wabürüdüni le wasaminarubei wadügün lidan aban programa lun aranseñu wamá lun wadügüni (1 Ko. 14:40). Kei hénpulu, súnwandan lariñawagún houn wéiyaaña lidan afiñeni lun hanúadirun aban hádangiñe lun abürüheina lani katei burí le hanúadirubei hadügün, kaba lan hádangiñe adügei luma  ídaba lan lagumuchúa. Wéiyaaña lidan afiñeni ha afalarubalin adundehani le ménrenguntimati houn lun hagunfulirun lau le hasaminarubei hadügün (1 Ko. 9:26). Gayaraati giñe wadügün aban katei ítarati. Kéiburi wabürüdün aban lísüta sagü weyu lun wabürüdüni dasi le lunbei wadügüni, abürüheina wameime le lunbei wadügüni furumiñe. Líderagubadiwa katei le mámarügü lun wagumuchuni le wagumeserunbei, líderagubadiwa lun wadügüni lídanrügü murusun dan.

16. Kei lariñawagún lidan Rómana 12:11, ka katei súdinibei lun wagunfulirun lau le wasaminarubei wadügün?

¹⁶ Áfaagua wamá. Mégeiwati áfaaguni lun lagumuchuni gürigia le lagumeserubei (aliiha huméi Rómana 12:11). Ariñagati Pábulu lun Timotéu lun líchaagun lungua “lun [l]aliihanu Lererun Bungiu” lun aban lan arufudahati le buiti luma lun ítarameme lan. Huuti adundehani le woun lidan ámuñegueinarügü ligaburi eseriwiduni lun Heowá (1 Tim. 4:13, 16).

17. Ida liña líderaguniwa Éfesuna 5:15, 16 agunfulira lau le wasaminarubei wadügün?

¹⁷ Yusu waméi dan buidu (aliiha huméi Éfesuna 5:15, 16). Anúadira waméi kaba lan dan wadüga somu katei ani masansira waméi. Magurabaha wamá lun lachülürün dan le buídutimabei, lugundun másiñati machülürünbei lan (Apur. 11:4). Mewesira waméi wadaani ni were lidan katei le masudininti (Fili. 1:10). Anhein gayara lubéi direi wamá murusun dan le ídanbei ua lan ni aban eberesehawa. Ariñaga wamá houn amu megei wamá dan lun wetenirun lun dasi le lunbei wadügüni. Áfaagua wamá lun wéñeguchuni gágamuru luma lun warihini wani koréu o páhina lánina hadügǘn umadagu lárigiñe. *

18, 19. Lárigiñe lanúadirun gürigia buidu, ka gayaraabei líderaguniwa lun mábürüha lan warüna íbini anhein ñein lénrengunga?

¹⁸ Teni wamá lun le wibihubei. Gayaraati wagoubaguagüdüni le ibiha wamaalibei lidan le wadügübei lumoun aweiyasuhani. Anhein busén wabéi wachülürün, lunti wasigirun wabaruaguóun íbini anhein darugu liña lubéi üma ani mosu wegeyedagun. Ligiaméme, ánhawa etenira lun le wibihubei lídangiñe le wanúadirubei, mábürühanbei warüna íbini anhein ñein lénrengunga (Gál. 6:9).

¹⁹ Mama aban katei le ménrenguti lanúadirun gürigia buidu luma lun lagunfuliruni. Lau sun lira, lau lídehan Heowá gayaraabei wibihin lichú au luma erei le wemegeirubei lun wagumuchuni le wagumeserunbei.