1. Ka Jéova ka pèwmèt-nou fè ?

JÉOVA ka lésé-nou désidé ka nou ké fè an vi an nou. I ka montré-nou kijan pou nou pran bon désizyon é si désizyon an nou ka fè-y plézi i ka édé-nou (Sòm 119:173). Sé konsèy-la ki an Bib-la plen sajès. Pli nou ké apliké-yo, é pli nou ké pran bon désizyon (Ébr. 5:14).

2. Ka nou pé ni dimal a fè apré nou pran on désizyon ?

² Menm lè nou pran on bon désizyon, dépawfwa sa pé rèd pou nou dè rivé an bout a sa nou désidé fè. An-nou pran déotwa ègzanp : On jenn frè désidé li tout Bib-la. I ka koumansé cho-cho pannan déotwa simenn men apré i ka arété. On sè désidé pran sèwvis pyonyé pèwmanan, men chakfwa lè-la rivé pou koumansé sèwvis-la, i ka di i ké pran-y mwa pwochen. Komité a sé ansyen-la désidé kè fò-yo fè plis vizit pastoral pou frè é sè a lasanblé-la. Men déotwa mwa ja pasé é yo po’o jen koumansé. Tout sé sitiyasyon-lasa diféran men ni on biten nou ka touvé adan yotout. Sé moun-la pran on désizyon men yo ponyonn pa tchenn a mo a yo. O prèmyé syèk, Krétyen a Korent té ni menm pwoblèm-la. An-nou vwè ka ègzanp a yo pé aprann-nou.

3. Ki désizyon sé Korentyen-la pran, men ka ki rivé ?

³ An lanné 55, moun ki té ka rété Korent pran on désizyon enpòwtan. Yo vin sav kè frè a yo ki té Jérizalèm é ki té Jidé té ka jwenn bout-rèd é yo té anmizè. Sé pousa dòt lasanblé té ka sanblé lajan pou édé-yo. Sé Korentyen-la té  janti é yo té donan, kifè yo désidé kè yo osi yo ké édé sé frè-la. Alò, yo mandé lapòt Pòl ka yo té pé fè. I di-yo kijan pou yo té fè é i voyé Tit pou ba-yo on pal pou sanblé lajan-la (1 Kor. 16:1 ; 2 Kor. 8:6). Men déotwa mwa apré, Pòl vin sav kè sé Korentyen-la poto’o jen sanblé lajan-la. Kifè, sa pou yo té voyé la pa té’é jen ni tan rivé Jérizalèm anmenmtan ki lajan a tout sélézòt lasanblé-la (2 Kor. 9:4, 5).

4. Dapré sa 2 Korentyen 8:7, 10 é 11 ka di, ka Pòl ankourajé sé Korentyen-la a fè ?

⁴ Sé Korentyen-la té pran on bon désizyon é Pòl félisité-yo pou sa, pas sa té ka montré kè yo té ni on fwa ki fò é kè yo té donan. Men i di-yo osi kè fò-yo té ‘fin sa yo koumansé’ (li 2 Korentyen 8:7, 10, 11). Ègzanp a yo ka montré-nou kè menm dé krétyen ki fidèl pé ni dimal a tchenbé a mo a yo lè yo pran on bon désizyon.

5. A ki kèsyon nou ké réponn ?

⁵ Nou osi, kon sé Korentyen-la, nou pé touvé sa rèd dè fè sa nou té désidé. Poukwa ? Pas konm nou enpawfè, pétèt kè nou ni labitid ranvoyé sa nou ni a fè a plita. Oben pétèt ni dé biten nou pa té prévwa ki ka anpéché-nou fè sa nou té di (Ékl. 9:11 ; Wom. 7:18). Kijan nou ka fè sav si fò-nou wouvin asi on désizyon nou té pran é ka nou pé fè ? É kijan nou pé aranjé-nou pou nou fin sa nou koumansé ?

6. A ki moman fò-nou wouvin si on désizyon nou té pran ?

⁶ Nou pé’é jen vé wouvin asi sèwten désizyon enpòwtan kè nou pran. Pa ègzanp, nou pé’é jen règrété nou désidé sèvi Jéova, é nou byen désidé a rété fidèl a moun-la nou mayé èvè-y la (Mat. 16:24 ; 19:6). Men pawfwa, ni dòt désizyon ki mérité nou wouvin asi yo. Poukwa ? Pas sitiyasyon an nou pé chanjé. Ka ki pé édé-nou pran méyè désizyon ki tini ?

7. Ka fò-nou mandé Jéova, é poukwa ?

⁷ Priyé pou ni sajès. Mi sa Jéova pousé Jak maké : « Si yonn adan zòt ka manké sajès, fò i kontinyé mandé Bondyé li, é Bondyé ké ba-y li, pas i donan èvè toutmoun » (Jak 1:5). Adan sèwten sitiyasyon, nou pé ka « manké sajès ». Donk, mandé Jéova édé-w lè ou ni on désizyon a pran é lè fò ou wouvin asi on désizyon ou té ja pran. A moman-lasa, Jéova ké édé-w pran désizyon ki saj.

8. Ka pou nou fè avan nou pran on désizyon ?

⁸ Fouyé lè ou ka fè rèchèch. Gadé ka Pawòl a Bondyé ka di, li piblikasyon a òwganizasyon a Jéova, é palé èvè moun ki pé ba-w bon konsèy (Pwov. 20:18). Pa ègzanp, avan ou désidé chanjé travay oben déménajé, sa enpòwtan kè ou fouyé lè ou ka fè rèchèch. Fò ou fè sa osi pou rivé chwazi on fòwmasyon ki ké pèwmèt-vou gangné vi a-w é ki ké pèwmèt-vou kontinyé sèvi Jéova anmenmtan.

9. Ka sa ké pòté dè bon pou nou si nou onèt èvè noumenm ?

⁹ Chèché a vwè poukwa ou vlé pran désizyon-lasa. Sa vréman enpòwtan pou Jéova dè sav ka ki ka pousé-nou fè on biten (Pwov. 16:2). I vlé kè nou onèt adan tout biten nou ka fè. Kifè, lè nou ka pran on désizyon é nou ka analizé sa ki ka pousé-nou pran désizyon-lasa, fò-nou onèt èvè noumenm é èvè lézòt. Si nou pa vréman onèt, pétèt sa ké rèd ban nou dè  tchenn a mo an nou é dè fè sa nou désidé. Pa ègzanp, on jenn frè pé désidé vin pyonyé pèwmanan. Men apré kèlkè tan, sa ka vin rèd bay dè fè 70 è chak mwa, é i ka pèd jwa a-y. Pétèt i konpranndèdi kè sé pas i té vlé fè Jéova plézi kè i pran sèwvis pyonyé. Alòskè an réyalité, sé pé pou fè fanmi a-y oben ondòt moun plézi.

10. Ka ki ka édé-nou chanjé ?

¹⁰ An-nou pran ègzanp a on moun ki ka étidyé Labib é ki désidé arété fimé. Odépa, menmsi sa rèd ba-y, i ka rivé tchenbé yonn ou dé simenn. Men chakfwa, konm sa two fò ba-y, i ka viré fimé. É onlè, afòs i goumé, i ka arété èvè sa ! Tèlman i enmé Jéova, é tèlman i vlé fè-y plézi, i rivé about a zafè a fimé la (Kol. 1:10 ; 3:23).

11. Poukisa fò ou ni òbjèktif ki byen prési ?

¹¹ Fò ou ni òbjèktif ki byen prési. Pi ou sav ka ou vlé, é pi sa ké fasil pou-w dè tchenn a mo a-w. Pa ègzanp, pétèt ou désidé li Labib pli souvan. Men si ou pa fè on pwogram *, ou ké ni dimal a fè sa. Mi ondòt sitiyasyon : pétèt kè ansyen a on lasanblé désidé fè plis vizit pastoral, men tan-la pasé é yo pa pran pon dispozisyon. Yo té’é pé pozé-yo sé kèsyon-lasa : « Ès nou éséyé vwè ki frè é sè ki té’é byen bizwen on ti vizit ? Ès nou pwogramé sé vizit-lasa ? »

12. Ka ou ké bizwen fè pétèt, é poukwa ?

¹² Pa pann chapo a-w two ho. Ponyonn adan nou pa ni tan-la, lajan-la é fòs-la pou fè tousa i té’é vlé fè. Gadé laréyalité anfas é montré-w rézonab. Si ou ka rann-vou kont kè ou pé’é pé fè sa ou té di, pétèt fò ou ké chanjé désizyon-la ou té pran la (Ékl. 3:6). Imajiné aprézan kè ou ka wouvin asi désizyon-lasa é ou ka fè chanjman ki nésésè. Alèla ou ka santi ou ké pé rivé fè sa ou désidé. Mi 5 biten ou pé fè pou rivé fin sa ou koumansé.

13. Kijan ou pé ni fòs-la ou bizwen la pou fè sa ou désidé ?

¹³ Mandé Jéova fòs pou ou aji. Bondyé pé ba-w ‘fòs-la ou bizwen la pou aji’ é pou fè sa ou désidé (Filip. 2:13). Alò mandé Jéova lèspri sen a-y pou i ba-w fòs-la ou bizwen la. Kontinyé priyé menmsi ou ni lenprésyon i po’o réponn-vou. Mi sa Jézi di anrapò èvè lèspri sen : « Kontinyé mandé, é yo ké ba-zòt » (Lik 11:9, 13).

14. Kijan prensip-la ou ka touvé an Pwovèb 21:5 ka édé-w fè sa ou désidé ?

¹⁴ Fò ou fè on plan (li Pwovèb 21:5). Kèlkanswa pwojé-la ou kay koumansé la, fò-w ni on plan. É apré, fò-w suiv plan-lasa. Menmjan-la, lè ou ka pran on désizyon, fè on lis a chak biten ou ni lentansyon fè pou rivé an bout a sa ou désidé. Lè ou ni on travay ki rèd a fè, fè-y an plizyè fwa. Konsa, chakfwa ou ké fè on ti biten adan-y, ou ké ni on lidé asi sa ou ja fè é ou ké rann-vou kont kè ou ka avansé. Pòl ankourajé sé krétyen Korent la mèt tibwen lajan a koté chakfwa simenn-la té ka koumansé olyé yo té atann-li rivé pou yo té koumansé sanblé lajan-la (1 Kor. 16:2). Lè ou ka fè on travay ki rèd an plizyè fwa, sa ka évité-w ni lenprésyon kè sa two rèd a fè.

15. Apré ou fè on plan, ka fò ou fè ?

¹⁵ Si ou maké sa ou ni lidé fè, sa ké pli fasil pou-w dè mété-y an pratik  (1 Kor. 14:40). Pa ègzanp, yo ankourajé sé ansyen-la a chwazi yonn adan yo pou maké tousa komité-la ka désidé fè ; fò i ké maké non a ansyen-la ki ké fè sa yo prévwa fè la, é kitan pou i fèt. Lè sé ansyen-la ka aji konsa, sa ka pli fasil pou yo dè fè sa yo désidé (1 Kor. 9:26). Vou osi ou pé éséyé fè menm biten-la. Pa ègzanp, ou pé maké sa ou ni a fè chakjou asi on lis, é ou pé mèt sa ki pli enpòwtan antèt a lis-la. Si ou fè sa, ou ké fin sa ou koumansé é ou ké jous fè plis ki sa ou té prévwa.

16. Apré ou pran on désizyon, ki biten enpòwtan pou ou fè é ka Women 12:11 ka di anrapò èvè sa ?

¹⁶ Fè éfò. Fò-w fè éfò pou suiv plan a-w é pou ‘fin sa ou koumansé’ (li Women 12:11). Pòl di Timoté ‘kontinyé apliké-y’ é kontinyé fè éfò pou i vin on méyè anségnan. Konsèy-lasa valab kèlkèswa sa nou vlé fè pou Jéova (1 Tim. 4:13, 16).

17. Kijan Éfézyen 5:15, 16 ka édé-nou fè sa nou désidé ?

¹⁷ Jéré tan a-w èvè sajès (li Éfézyen 5:15, 16). Chwazi on moman pou fè sa ou désidé, é tchenn a mo a-w. Pa rété ka atann kè sitiyasyon-la vin pawfè pou ou fè sa ou désidé, pas i pé’é jen vin pawfè (Ékl. 11:4). Pa lésé biten ki pa ni onlo enpòwtans pran tan-la é énèwji-la ou bizwen la pou sa ki pi enpòwtan (Filip. 1:10). Si sa posib, chwazi on moman ou sav ponmoun pé pa koupé-w adan sa ou ka fè. Fè lézòt sav kè ou bizwen konsantré-w. Épi sonjé étenn pòwtab a-w. Gadé mésaj a-w é ay asi rézo sosyo apré *.

18-19. Ka ki pé édé-w fè sa ou désidé menm lè ou ka jwenn difikilté ?

¹⁸ Konsantré-w asi bon rézilta ou ké rékòlté. Rézilta a on désizyon ou ka pran ka touvé-y kon koté-la ou vé rivé-la lè ou ka pati an vwayaj. Si vréman ou vlé rivé la ou kay la, ou ké kontinyé avansé menmsi ou ka touvé-w oblijé fè ondòt chimen ki tala ou té ja prévwa la. Menmjan-la, si nou konsantré-nou asi sa nou ké rékòlté, nou pé’é fè dèyè menmsi nou ka jwenn difikilté (Gal. 6:9).

¹⁹ Déja, sa rèd dè pran bon désizyon, men anplis, sé on konba pou rivé fè sa ou désidé. Men Jéova pé ba-w sajès-la é fòs-la ki nésésè la pou ‘fin sa ou koumansé’.