1. Jehova amkam kitem korunk soddun dita?

AMI jivitant kitem vichunk zai to nirnnoi Jehova amcher soddun dita. Borem tem vichunk to amkam xikoita, ani taka khuxal korta tosle nirnnoi ami ghetat tednam tantunt ies mellounk to amkam modot korta. (St. 119:173) Tor Bible-ant asloli zannvai ami apnnaitat tednam ami bore nirnnoi gheunk pavtat.—Heb. 5:14.

2. Ek nirnnoi ghetlea uprant amkam kitem korunk kotthin zait?

² Ami ek borem nirnnoi ghetlear pasun, tea nirnnoia pormonnem kam suru kelea uprant tem sompounk amkam khotthin lagonk puro. Thoddim udharonnam polloum-ia: Ek bhav ak’kho Bible vachun sompouncho nirnnoi gheta. To thodde sumanam vachta punn khoinchea eka karonnak lagon vachop bond korta. Ek bhoinn apunn niemit pioneer zaun vavurtoli mhunn nirnnoi gheta punn ti kednam suru kortoli to dis ti fuddem ghalit ravta. Eka sobhentle vhoddil sobhentlea zaitea bhav-bhoinnank gonvlli bhett dium-ia mhunn sangata mellon nirnnoi ghetat, punn zaitea mhoineam uprant pasun te heo bhetto suru korunkuch pavonant. Him udharonnam veg-vegllim asat, punn hatunt kitem tori ek-sarkem asa. Nirnnoi ghetlea uprant tim soglim tachea pormonnem kam korun sompounk pavonk nant. Korintant aslolea poilea-xekddeantlea Kristanvank pasun oslich oddchonn asli. Tanchea thaun ami kitem xikonk zata tem polloum-ia.

3. Korintkaramnim koslo nirnnoi ghetlolo, punn kitem zalem?

³ Sumar 55 K.X.ant, Korintkaramnim ek mhotvacho nirnnoi ghetlo. Jerusalemant ani Judeant aslolim bhav-bhoinnam trasant aslim ani poixeanchea gorjek sampoddlolim. Her sobhentlim bhav-bhoinnam tankam modot korunk lagon poixe ektthaim kortalim mhunn tankam kollon ailem. Korintkar doiall ani udar kallzache asle tor tannim gorjek sampoddlolea bhav-bhoinnank modot korcho nirnnoi ghetlo. Taka lagon tannim koxi modot korunk zata mhunn Pauluk vicharlem. Paulun tea sobhek suchounneo dileo ani Tit-ak poixe ektthaim korunk nemlo. (1 Kor. 16:1; 2 Kor. 8:6) Punn thoddea mhoineam uprant, Korintkaramnim apunn jem kitem kortole mhunn sanglolem tem korunk na mhunn Pauluk kollon ailem. Taka lagon, Jerusalemant vhortale tea her sobhentlea danam borabor tanchim danam vhoronk ghoddie mellchim naslim.—2 Kor. 9:4, 5.

4. 2 Korintkarank 8:7, 10, 11-ant sanglolea pormonnem Paulun Korintkarank kitem korunk urba dili?

⁴ Korintkaramnim ek boro nirnnoi ghetlolo, ani tancho ghott bhavarth ani udar kallzan diunchea sobhavak lagon Paulun tankam xabaski dili. Punn tannim suru kelolem tem sompounk Paulun tankam urba diunchi goroz asli. (2 Korintkarank 8:7, 10, 11 vach.) Bore nirnnoi ghetlea uprant pasun tachea pormonnem kam korun tem sompounk visvaxi Kristanvank pasun kotthin zata mhunn hea udharonnantlean kollon ieta.

5. Ami khoinchea prosnanche zobab polloitolim?

⁵ Korintkaram bhaxen, ami pasun nirnnoi ghetlea uprant tea pormonnem kam suru korun sompounk amkam kotthin zaunk puro. Kiteak? Opurnn zalolean, ami korchim asat tem kam, magir korum-ia mhunn chintun tem kam bestench fuddem ghalunk puro. Vo ami opekxa korunk na tosleo ghoddnneo ghoddlolean ami ghetlolea nirnnoia pormonnem kam korun sompounk amkam kotthin zaunk puro. (Up. 9:11; Rom. 7:18) Ami adim ghetlolo nirnnoi bodlunk zai vo na tem ami koxem tharaunk zata? Ani ami suru kelam tem sompoitolim, hachi koxi khatri korun gheunk zata?

6. Ami ghetlole nirnnoi amkam kednam bodlunk poddot?

⁶ Thodde mhotvache nirnnoi ami kednanch bodolnant. Udharonnak, Jehovachi seva korit ravcho nirnnoi, ani amchea kazari sangateak visvaxi ravcho nirnnoi ami kednanch bodolnant. (Mt. 16:24; 19:6) Punn her nirnnoi, amkam ghoddie bodlunk poddot. Kiteak? Karonn poristhiti bodolta. Tor khoinchim pavlam ghetlear ami sogleam-von bore nirnnoi gheunk pavtolim?

7. Ami kitea pasot magnnem korunk zai, ani kiteak?

⁷ Zannvai di mhunn Jehova lagim magat. Jehovan Jakobak oxem borounk prerit kelo: “Dev dita ti zannvai tumche modlea konnak-ui na zalear, tannim ti Deva lagim magchi; To ti tankam ditolo, kiteak To soglleank udarponnan bore khuxen dita.” (Jak. 1:5) Ek-na-ek toren amkam sogleank ‘zannvai na.’ Taka lagon tumkam ek nirnnoi gheuncho poddtta tednam vo tumi ghetlolo ek nirnnoi tumkam bodolcho poddtta tednam modotik lagon Jehova lagim magat. Tednam Jehova tumkam bore nirnnoi gheunk modot kortolo.

8. Ek nirnnoi gheunchea poilim ami koslo sodh korchi goroz asa?

⁸ Boro sodh korat. Devachem Utor, ani Jehovachea songottnne thaun mellttat tim prokaxonam vachat, toxench tumkam bore sol’le diunk xoktat tosleam lagim uloiat. (Mho. 20:18) Tumchi sirvis bodolchea vixim, eka novea zagear vochon ravchea vixim, vo tumi Jehovachi seva kortana tumcho khorch bhagounk ek sirvis mellonk modot korta toslem xikxonn vichun kaddchea vixim nirnnoi ghetana boro sodh korop gorjechem.

9. Ami amcheach lagim promannik asat zalear amkam koso faido zatolo?

⁹ Tumcho hetu kitem tem chintat. Ami kortat tem kiteak lagon kortat tem Jehova polloita. (Mho. 16:2) Ami soglea ritimnim promannik aslolim taka zai. Tor ami nirnnoi ghetat tednam amchea sangata ani dusream sangata ami promannik asonk zai. Ami purnn toren promannik nant zalear ami sanglam tea toren kam korunk amkam ghoddie kotthin zaunk puro. Udharonnak, eka tornnattea bhavan niemit pioneer zaun seva korcho nirnnoi ghetla astolo. Punn uprant, eka pioneer-an korunk zai titlim voram korunk taka kotthin zait. Ani porgottnnent mellonk zai ti khuxalkai taka mellona zait. Pioneering korcho aplo mukhel dhei Jehovak khuxal korcho mhunn tannem chintlem astolem. Punn tacho khoro hetu aplea avoi-bapaik vo anik konnank khuxal korcho aslo kai?

10. Bodlav korunk kiteachi goroz asa?

¹⁰ Chintat, ek Bible videarthi sigrett voddchi sonvoim soddttolo mhunn nirnnoi gheta. Survatek, taka kotthin zata, tori astana to ek tim don sumanam pasun sigrett voddina, punn uprant to porot voddunk lagta. Xevottak, to sigrett voddchi bond korta! Jehova pasot aslolea tachea mogak lagon ani taka manvota tem korunk asloli tachi itsek lagon to ti sonvoi soddunk pavta.—Kol. 1:10; 3:23.

11. Tumi umkech dhei dovrop kiteak gorjechem?

¹¹ Umkech dhei dovrat. Tumi umkech dhei dovortat zalear, te dhei mellon gheunk tumkam sompem zatolem. Udharonnak, tumi ghoddie dor disa Bible vachtolim mhunn nirnnoi ghetla astolo. Punn tachea pasot tumi ek bori manddavoll korinant zalear tem tumi korunk ghoddie pavchimnant. * Vo eke sobhent vhoddilamnim zaitea bhav-bhoinnank gonvlli bhett korunk zai mhunn chintlam astolem. Punn thoddea vella uprant te toxem korunk pavonant. Tor tannim ghetlolea nirnnoi-a pormonnem tankam kam korunk zai zalear tannim apleakuch he prosn vicharunk zatat: “Gonvlli bhette thaun khoinchea bhav-bhoinnank chodd faido zatolo tanchim nanvam ami boroun dovorleant kai? Tankam hi bhett diunk ami ek dis vo vell tharaila kai?”

12. Amkam kitem korunk poddot, ani kiteak?

¹² Melloun gheunk zatat tosle dhei dovrat. Ami korunk sodhtat tem soglem korunk amchea modem konnankuch vell, vostu, vo xokti na. Taka lagon somjikaien melloun gheunk zata tosle dhei dovrat. Tumi ghetlolea eka nirnnoi-a pormonnem tumchean kam korunk zaina mhunn kollon ailea uprant, tumkam ghoddie to nirnnoi bodlunk poddot. (Up. 3:6) Tor, tumi ghetlolea eka nirnnoi-a vixim portun borea bhaxen chintun tantunt bodlav kelea uprant, tachea pormonnem kam korunk zata oxem tumkam dista zalear, tem kam korun sompounk tumkam panch pavlam modot kortolim. Tea pavlam vixim atam ami bhasabhas korum-ia.

13. Tumi ghetlolea nirnnoi-a pormonnem kam korunk tumkam koxi modot mellonk xokta?

¹³ Vavrunk lagon boll di mhunn magat. Tumi zo nirnnoi ghetla tachea pormonnem vavrunk Dev tumkam “boll” diunk xokta. (Filp. 2:13) Tor tumkam goroz ti xokti mellonk lagon Jehova lagim povitr xokte pasot magat. Azun tumchea magnneak zobab mellonk na oxem dislear pasun magnnem korit ravat. Jezun mhunnttlem toxem: “Magat, ani Dev tumkam [povitr xokti] ditolo.”—Lukas 11:9, 13.

14. Mhonn’nneo 21:5-ant sanglolem totv tumchea nirnnoi-a pormonnem kam korunk tumkam koxem modot korunk xokta?

¹⁴ Tumi kitem kortolim tem chintat ani boroun dovrat. (Mhonn’nneo 21:5 vachat.) Koslem-i kam suru korchea poilim, tem tumi koxem korun sompoitolim tea vixim borea bhaxen chintunk zai. Uprant, tumi chintlam tea pormonnem kam korunk zai. Teach bhaxen, tumi ek nirnnoi ghetlea uprant, tea nirnnoi-a pormonnem tem kam sompounk tumi kitem kortolim tim pavlam boroun dovrat. Tumkam ek vhodd kam korunk asa zalear, tem lhan-lhan kamamnim vanttat. Hea toren tim lhan-lhan kamam, ek-ek korun tumi sompoitat tednam anik kitlem kam urlam tem tumkam kollttolem. Paulun apunn ailea uprant poixe ektthaim korchea bodlek, Korintkaramnim “dor satolleachea poilea disa” denngim ektthaim korchim mhunn urba dili. (1 Kor. 16:2) Tor ek vhoddlem kam apnnachean korun sompounk zaunchench na oslem chintop pois korunk tem kam lhan-lhan kamamnim vanttlear boreak poddtta.

15. Umkench kortolim mhunn chintlea uprant kitem korunk zata?

¹⁵ Tumi kitem korunk chintlam tem boroilem zalear, tumi ghetlolea nirnnoi-a pormonnem tem kam korunk tumkam sompem zatolem. (1 Kor. 14:40) Udharonnak, sobhentle vhoddil ek nirnnoi ghetat tednam tea nirnnoi-a vixim, ani tem kam konn kortolo tea vixim, toxench, tem kam khoinchea tarker korun sompounk zai tem tanchea modlea eka vhoddilan boroun dovrunk zai mhunn margdorxon dil’lem asa. Je vhoddil hem margdorxon pallttat, te ghetlolea nirnnoi-a pormonnem sompeponnim tem kam korun sompounk pavtat. (1 Kor. 9:26) Tumchea sodanchea jivitant pasun tumi oxench kitem korunk zata. Udharonnak, dor disa tumi kitem korchim asat tachem ek list tumi toiar korunk zata. Ani khoinchem kam tumkam poilem korunk zai ani khoinchem kam uprant korunk zai, tea pormonnem tantunt borounk zata. Oxem kelolean, tumi fokot suru kelolem kam sompounkuch nhoi, punn thoddea vella bhitor tumi zaitem kam korun sompounk pavtolim.

16. Nirnnoi ghetlea uprant tachea pormonnem kam korunk kitem gorjechem, ani hea vixim Romkarank 12:11 kitem sangta?

¹⁶ Vavrat. Tumi chintlolea bhaxen, tumi suru kelolem kam sompounk vavurchi goroz asa. (Romkarank 12:11 vachat.) Timot ek boro xikoupi zatolo zalear, tannem “lokx” diunk zai ani tantunt “thir” ravonk zai mhunn Paulun taka urba dili. Jehovachea sevent her dhei dovortana pasun ho sol’lo lagu zata.—1 Tim. 4:13, 16.

17. Eka nirnnoi-a pormonnem kam korunk Efezkarank 5:15, 16 amkam koso modot korunk xokta?

¹⁷ Tumcho vell borea bhaxen uzar korat. (Efezkarank 5:15, 16 vachat.) Tumi ghetlolea nirnnoi-a pormonnem tumi kednam kam suru kortolim to vell tharaiat ani to bodolnakat. Soglench borem asta tednam apunn kam suru kortolo mhunn chintun ravonakat; toslo ek vell ghoddie kednanch ieuncho na. (Up. 11:4) Mhotvacheo nant tea vostuncher chodd vell ani xokti pidd’ddear korinakat. Oxem kelear, chodd gorjechim kamam korunk tumkam vell mellcho na. (Filp. 1:10) Zata zalear, konnui tumchem dhean halounchim nant, toslo ek vell vinchun kaddat. Tumi kam kortat tednam tumkam dhean diunchem poddtta mhunn dusreank kolloiat. Kam kortana tumi tumcho fon bond korunk zata vo tumkam ietat teo e-mail vo message-o tumi uprant pollounk zatat. *

18-19. Kotthinai-o ailear pasun tumi ghetlolea borea nirnnoi-ak chittkun ravonk tumkam kitem modot korunk xokta?

¹⁸ Porinnamacher dhean diat. Tumi ghetlolea nirnnoi-acho porinnam, tumi provas korun pavonk zai tea zagea bhaxen asa. Tumi provas korun eka zagear voitana, tumchea rostear ek addkoll asa zalear tumi dusro rosto gheun tea zagear pavcho proitn kortolim. Teach toren, tumchea nirnnoi-ancho kitem porinnam zatolo tacher dhean dilear, tumkam vatter oddchonneo vo addkolleo aileo zalear pasun, dusri ek vatt uzar korun tumchea kamant vavrit ravonk tumkam sompem zatolem.—Gal. 6:9.

¹⁹ Bore nirnnoi ghevop sompem nhoi, ani tea nirnnoi-a pormonnem kam korop kotthin zaunk puro. Punn tumi suru kelolem kam sompounk Jehova tumkam zannvai ani boll diunk xokta.