1. ¿Jehová tä ni tuenmetre dre nuainne?

NIKWE dre nuain ja nire nikwe yebiti ye Jehovata ni tuenmetre den akwle jai. Ño ni raba kukwe kwin den nuaindre jai ye tä driere nie aune kukwe tuin kwin ie ye nita den nuaindre jai ngwane, tä ni dimike bätä tä kukwe kwin mike nemen bare ni kräke (Sal. 119:173). Ngöbö Kukweibätä mäträta nibätä ye nita mike täte ngwane, nita kukwe bäri kwin den nuaindre jai (Heb. 5:14).

2. ¿Kukwe diandre nuaindre jai ye bitikäre dre ñaka raba nemen nuäre?

² Nita kukwe kwin den nuaindre jai akwa yebiti ta tä ja di ngwandre nie kukwe ye mikakäre nemen bare täte. Ani bämike, monso bati käkwe ja töi mikadre ñäke täte Bibliabätä. Bämän ruäre te ñäkädre kwe Bibliabätä akwa ye bitikäre ñaka nuaindre jankunu kwe. Meri Testiko iti käkwe ja töi mikadre sribi prekursor ye nuainne akwa käre tädre kä kite ja känenkäre sribi ye kömikakäre. Nitre umbre ji ngwanka käkwe gwairebe ja töi mikadre ja mräkätre konkrekasionte ye tuinbiti. Akwa sö rikadre ta ngwane ñaka nemen ni tuinbiti jire iti. Kukwe jene jene nuain jababare akwa ja erebe kukwe keteiti känti. Ye abokän kukwe diani nuaindre jai ye ñaka mikani nemen bare. Siklo kena yete, kukwe ye erere bäsi namani bare nitre kristiano Corinto yebätä. ¿Ye raba kukwe meden driere nie? Ani mike gare jai.

3. ¿Nitre Corinto käkwe ja töi mikani dre nuainne akwa dre namani bare?

³ Kä 55 yete nitre Corinto käkwe ja töi mikani kukwe ütiäte nuainne. Ja mräkätre Jerusalén aune Judea nämäne bobre krubäte, yebätä konkrekasion ruäre käkwe ngwian ükaikrö kräketre dimikakäre ye namani gare ja mräkätre Corinto ie. Niaratre mantiame yebätä ja töi mikani kwetre ngwian bien siba ja mräkätre ye dimikakäre aune ye nuain raba ño ngwanintari kwetre apóstol Pablo ie. Nuaindre ño ye Pablo niebare ietre aune Tito kädekani kwe niaratre dimikakäre ngwian ükökrö (1 Cor. 16:1; 2 Cor. 8:6). Akwa sö nikani ruäre ta yete nitre Corinto jämi ngwian ükökrö namani  gare Pablo ie. Niaratre jämi ngwian ükökrö ye köböite ngwian ñan nämäne juto juankäre gwairebe Jerusalén konkrekasion mada yebe (2 Cor. 9:4, 5).

4. 2 Corintios 8:7, 10, 11 tä niere erere, ¿nitre Corinto käkwe dre nuaindre ribebare Pablokwe ietre?

⁴ Nitre Corinto ja töi mikani kukwe kwin nuainne. Niaratre nämäne tödeke krubäte aune nämänentre ja ngwen mantiame yebätä Pablo kwin niebare ietre. Akwa kukwe diani nuaindre kwetre jai ye mikadre nemen bare täte kwetre Pablokwe ribebare ietre (ñäkädre 2 Corintios 8:7, 10, 11 yebätä). Kukwe ye tä mike gare nie, ni kristiano ja ngwanka metre käkwe kukwe diandre nuaindre jai, akwa tä ja di ngwandre ie kukwe ye mikakäre nemen bare.

5. ¿Kukwe meden meden ngwantarita abokän nibike mike gare jai?

⁵ Nitre Corinto erere, nita dre den nuaindre jai ye ruäre ngwane ñan tä nemen nuäre ni kräke mikakäre nemen bare, ¿ñobätä? Ñan ñobätä aune ni töi ngite aune käre nita kä kite ja käne kukwe ye nuainkäre yebätä. Arato kukwe ngüba ñaka nikwe tä nakainkä ye köböite kukwe mikata nikwe nuaindre jai ye ñaka tä nemen bare nie (Ecl. 9:11; Rom. 7:18). ¿Ño ni raba kukwe kwin den nuaindre jai? ¿Kukwe diani nuaindre jai yebätä nikwe töbikadreta ngwane dre nuaindre? ¿Dre käkwe ni dimikai kukwe mikakäre nemen bare täte? Kukwe ngwantarita ye nibike mikai gare kukwe ja tötikara nekänti.

6. ¿Nikwe kukwe diani nuaindre jai ye ñongwane ni raba kwite?

⁶ Kukwe ruäre nikwe diani nuaindre jai yebätä ni ñaka tö ja töi kwitai jire chi. Ñodre, ni tö Jehová mikai täte jankunu aune ni töita kwatibe ja ngwanbätä metre ni muko ie (Mat. 16:24; 19:6). Akwa kukwe mada abokän ni raba kwite ñan ñobätä aune käta niken ta ngwane kukwe mada tä nemen ni kisete. Aisete, ¿dre käkwe ni dimikai kukwe kwin den nuaindre jai?

7. ¿Nikwe dre kärädre Ngöböi aune ñobätä?

⁷ Ngöbökwe ni mikadre töbätä ye ribedre ie. Jehovakwe Santiago töi mikani kukwe ne tike: “Munkwe dre dre nuendre, ye ñan raba nüke gare munye angwane, Ngöbökwe mun mikadre töbtä abko munkwe kärä ie [...], ñobtä ñan angwane nire nire käta jändrän kärere ie, ye erere Ngöböta jändrän bien täte jökrä ie” (Sant. 1:5). Kukwe ruäre känti nikwe dre nuaindre ye ñaka tä nemen gare nie, aisete kukwe diandre nuaindre jai o töbikatarikäretabätä nikwe ja di kärädre Jehovai. Ye erere ngwane Jehovakwe ni dimikai kukwe kwin den nuaindre jai.

8. ¿Ni jämi kukwe den nuaindre jai ye känenkri dre nuaindre?

⁸ Ja tötikadre nguseta kukwe yebätä. Nikwe sribi mada känäin jai, ni näin nüne kä madakänti o drebätä nikwe ja tötikai ja ngübakäre sribikäre jankunu Ngöbö kräke yebätä nita töbike ngwane, ütiäte krubäte kukwe känändre Bibliabätä aune juta Jehovakwe tä tärä bätä täräkwata sribere yebätä ja tötikadre aune ja ketamuko nikwe ünä kukwe ja üairebiti yebe blitadre (Prov. 20:18).

9. Nita kukwe den nuaindre jai ye nita nuainne jondron täri ya ¿ye ñobätä nikwe ngwandretari akwle jai?

⁹ Nuainta jondron täri ya yebätä töbikadre. Ñobätä nita kukwe den nuaindre jai ye ütiäte krubäte Jehová kräke (Prov. 16:2). Kukwe jökräbätä nikwe ja ngwandre metre ie niara tö. Ye medenbätä, nita kukwe den nuaindre jai ngwane, nita nuainne jondron täri ya o ñakare ye rabadre gare akwle jabätä nie aune rabadre gare metre ni madai. Ni ñaka ja ngwen metre kukwe nekänti ngwane, ñaka rabai nuäre ni kräke kukwe mikata nuaindre jai ye mikakäre nemen bare. Töbike kukwe nebätä, monso bati käkwe sribi prekursor ye diandre nuaindre jai, akwa kä rikadre ta ngwane ñaka tädre nüke ora näre sö kratire kratire aune kä ñaka tädre jutobätä kukwe driekäre. Sribi ye diani nuaindre kwe jai kä mikakäre juto Jehovabätä namani ruin ie. Akwa, metrere sribi ye diani nuaindre kwe jai kä  mikakäre juto rün kwebätä o ni mada nämäne kukwe niere ie yebätä.

10. ¿Nikwe dre nuaindre ja töi kwitakäre kukwe käme yebätä?

¹⁰ Ani kukwe mada bämike. Ni ja tötikaka Bibliabätä käkwe ja töi mikadre sö dua ye tuenmetre. Kenanbe ja di ngwandre krubäte kwe aune bämän krati o krobu ñaka duadre kwe, akwa kä ñaka rükadre ie aune duadreta bobukäre kwe. Akwa ja känenkäre tuanemetre täte kwe. ¿Dre käkwe dimikani? Jehová tare kwe aune tö kä tuai jutobätä ye köböire kukwe käme ye tuanimetre kwe (Col. 1:10, TNM; 3:23, TNM).

11. ¿Ñobätä nikwe kä diandrekä jai kukwe mikakäre nemen bare?

¹¹ Kä diandrekä jai kukwe mikakäre nemen bare. Ye käkwe ni dimikai kukwe kömikata nikwe ye jökrä mike nemen bare. Ñodre, nikwe ja töi mikadre ñäke Bibliabätä mantre jetebe, akwa ni ñaka ora ükete jai ngwane ñan raba nemen bare nie. * O nitre umbre ji ngwanka käkwe ja töi mikadre ja mräkätre tuinbiti, akwa kä rikadre ta aune ñaka ni tuinbiti jire iti. Niaratre raba kukwe ne kwrere ngwentari jai kukwe ye mikakäre nemen bare: “¿Ja mräkätre meden nunkwe tuadrebiti ye nunkwe kädriebarera jabe? ¿Nunkwe kä dianinanka jai nuainkäre?”.

12. ¿Ruäre ngwane ni raba dre nuainne aune ñobätä?

¹² Raba nemen bare o ñakare yebätä töbikadre. Kä ñaka krubäte nie aune ni di ñaka krubäte dre dre ni töta nemen nuain ye jökrä nuainkäre. Aisete kukwe ruäre ñan raba nemen bare nie ye ngwandre törö jai aune ni raba dre nuainne yebätä töbikadre kwin. Ne madakäre, kukwe diani nuaindre jai ye ñaka rabai bare nie rabadre tuin nie ngwane, ni raba ja töi kwitetabätä aune kukwe ye üketeta jai (Ecl. 3:6). Nikwe ükadreteta jai aune raba nemen bare nie rabadre tuin nie ngwane, ¿dre raba ni dimike mike nemen bare? Ani kukwe ketarike mike gare jai.

13. ¿Nire raba ja di bien nie kukwe diani nuaindre jai ye mikakäre nemen bare?

¹³ Ja di kärädre Ngöböi mikakäre nemen bare. Nikwe dre diani nuaindre jai ye mikakäre nemen bare Jehová raba ja di bien nie (Filip. 2:13). Ye medenbätä nikwe üai deme kärädre ie ne kwe ja di biandre kwe nie nuainkäre. Ngöbö ñaka ja di bien nie bengwairebe rabadre tuin nie akwa nikwe oradre jankunu ie. Jesukwe niebare: “Käre munkwe [üai deme] kärä Ngöböye amne Ngöbökwe biandi munye” (Luc. 11:9, 13).

14. Proverbios 21:5 tä niere erere, ¿kukwe dianta nuaindre jai ye dre raba ni dimike mike nemen bare?

¹⁴ Kukwe nuaindre ño jatäri ye ükadrete (ñäkädre Proverbios 21:5 yebätä). * Sribi keteiti nuaindre ño jatäri yekäre kukwe ükadrete aune nuaindre ye ererebätä. Ye erere arato nita kukwe den nuaindre jai ngwane, dre nuaindre mikakäre nemen bare ye tikadre jai täräbätä, biti ye erere nuaindre. Kukweta ere nuaindre nie ngwane, bäri kwin ükadrete kiakia jatäri nuainkäre. Ye köböire jatai nemen bare nie ye jutuai nie. “Käre [...] bämänte” nitre Corinto käkwe ngwian mikadre jenena biankäre niebare Pablokwe ietre, ne kwe ñaka ngwian ükadrekrö niara rükadre ye ngwane batibe, ñakare aune ngwian tädrera ükaninkrö niara ngäbiti niebare kwe (1 Cor. 16:2). Ne madakäre, kukwe ükateta kiakia nuainkäre jai ye kwin krubäte ñan ñobätä aune ni ñan tä nainte käne.

15. Kukwe ükadrerate jai, ¿ye bitikäre nikwe dre nuaindre?

¹⁵ Kukwe diani nuaindre jai ye tikadre täräbätä ye käkwe ni dimikai mikakäre nemen bare (1 Cor. 14:40). Ñodre, nitre umbre ji ngwanka tä kukwe meden den nuaindre jai, nire käkwe nuaindi aune ñongwane mikadre nemen bare ye iti käkwe tikadre täräbätä ribeta ietre.  Nitre umbre ji ngwanka tä kukwe ne mike täte ye köböire kukwe mikata nuaindre kwetre jai ye tä nemen bare ietre (1 Cor. 9:26). Ni raba kukwe ye erere nuainne arato. Ñodre, dre dre tä nuaindre nie ye köbö kwatire kwatire ni raba tike täräbätä jai. Meden meden nikwe nuaindi käne ye erere ni raba ükete jatäri. Ye käkwe ni dimikai kukwe tä nuaindre nie ye mike nemen bare, akwa ye ñan aibe, ñakare aune yekwe ni dimikai arato kukwe keta kabre nuainne kä braibe te.

16. Romanos 12:11 erere, ¿kukwe dianta nuaindre jai ye mikakäre nemen bare ütiäte krubäte dre nuaindre?

¹⁶ Ja di ngwandre. Kukwe ükaninte jai ye mikakäre nemen bare nikwe ja di ngwandre krubäte (ñäkädre Romanos 12:11 yebätä). Timoteo käkwe ja kitadre jankunu dirikäre bäri kwin niebare Pablokwe ie. Kukwe ye raba ni dimike sribi keta kabre ja üaire mikata nuaindre jai yebätä arato (1 Tim. 4:13, 16).

17. ¿Efesios 5:15, 16 ye tä ni dimike ño kukwe mikata nuaindre jai ye mikakäre nemen bare?

¹⁷ Ñaka kä gate ngwarbe (ñäkädre Efesios 5:15, 16 yebätä). Nikwe kukwe keteiti nuaindi ora medente ye nikwe ñaka kwitadre. Kä ngübata nikwe kukwe ye nuainkäre rükai, ye ngwane batibe nikwe nuaindre ye nikwe ñaka ngübadre jire (Ecl. 11:4). Ni ñaka rabadre ja di ngwen ngwarbe aune kä gainte ngwarbe kukwe bäräkä yebätä (Filip. 1:10, TNM). Raba ngwane, nikwe kukwe ütiäte ütiäte ye nuaindre käta kwekebe ye ngwane. Nita kä titibe ribere jai kukwe ye nuainkäre ye nikwe niedre nitre ie ne kwe ñaka ni nikadre kwetre. Arato, nikwe teléfono ötadre aune correo electrónico o redes sociales * ye ñaka mikadre ñärärä.

18, 19. Nikwe kukwe kwin diani nuaindre jai akwa, ¿dre raba ni dimike ñaka ja di ngwen nekä kukwe rabadre ni jiete yebiti ta?

¹⁸ Ja töi mikadre kukwe kwin rabadre bare yebätä. Nita kukwe den nuaindre jai köböire kukwe kwin tä nemen nikwe ye ni raba bämike nita niken mente kä madakänti ye erere. Ñodre, ji tädre dikani jite akwa ti tö rabai kä yekänti aisete nikwe ji ye kwitadrebiti nänkäre jankunu. Ye erere arato, nikwe ja töi mikai kukwe kwin rabai nikwe yebätä ngwane, kukwe keta kabre rabai ni jiete akwa nikwe ñaka ja di ngwain nekä (Gál. 6:9).

¹⁹ Kukwe kwin diandre nuaindre jai aune mikadre nemen bare ye ñaka nuäre. Akwa Jehová diebiti ni raba nemen töbätä aune ja di raba kwen nie kukwe tä nuaindre nie ye mikakäre nemen bare.