1. Jehova u tu yandjera kutja tu tjite vi?

JEHOVA utu yandjera okuritoororera oveni kutja matu vanga okuhupa vi. Eye u tu honga omuano wokutjita ozondando ozombwa, nu u tu vatera kutja tu ze yenenise indu tji matu tjiti ozondando nḓu maze mu yorokisa. (Eps. 119:173) Otja tji matu ṱakamisa ounongo mbu ri mEmbo ra Mukuru, ku tu vatera okutjita ozondando ozombwa.—Hebr. 5:14.

2. Ouzeu wa ye mbu mape ya atu munu kombunda yokutjita ondando?

² Nandarire indu tji twa tjiti ondando ombwa, mape ya a rire ouzeu kweṱe okuiyenenisa. Tara kovihorera tjiva mbi: Omukambure omutanda wa tye kutja ma lese Ombeibela ye aihe. Eye wa lese nawa ovivike ovitenga, posi yokutja okuzambo a zuko. Omukazendu omukambure wa tye okurira omukandjira woruveze aruhe, posi yokutja katoorere ko omukambo. Orutu rovanene vombongo rwa tye kutja maru utu okuvarura ouṋepo wombongo, posi yokutja kombunda yomieze omingi owo kave ya tjita nao. Ovandu movihorera mbyo va tjita ozondando pekepeke, posi yokutja kave yenenisire ozondando nḓo. Ovakriste veserewondo etenga moKorinte va ri nouzeu otjingewo. Ngatu tare kutja matu rihongo tjike ku wo.

3. Ondando iṋe ovakambure moKorinte ndji va tjita, posi yokutja pa tjitwa tjike?

³ Mombura ndji ape 55 O.Z., ovakambure moKorinte va tjita ondando onanḓengu. Owo va zuva kutja ovakambure ovakwao moJerusalem na Judea aave munu ouzeu nu va ri ovasyona nu ozombongo zarwe aaze wongo ovimariva okuvevatera. Mena rotjari nouharupu, ovakambure moKorinte va tya okuvevatera nu owo va pura omuapostele Paulus kutja mave yenene okuvatera vi. Eye wa hinda omarakiza kombongo ndjo, nu wa zika  Titus okuvatera okuwonga ovimariva. (1 Kor. 16:1; 2 Kor. 8:6) Omieze omiṱiṱi kombunda ya nao, Paulus wa zuva kutja ovakambure moKorinte kave tjitire otja pu va heya. Nu mena ra nao, oviyandjewa vyawo mape ya avi wombo okutwarewa ko Jerusalem puna oviyandjewa imbi vyozombongo inḓa ozarwe.—2 Kor. 9:4, 5.

4. Otja 2 Ovakorinte 8:7, 10, 11, Paulus wa tunduuza ovakambure moKorinte okutjita vi?

⁴ Ovakambure moKorinte va tjita ondando ombwa, nu Paulus we ve tanga kongamburiro yawo nonḓero yokuvanga okuvatera. Posi yokutja eye wina aa sokuvetunduuza okumana imbi mbi va tya okutjita. (Lesa 2 Ovakorinte 8:7, 10, 11.) Ovihorera vyawo mavi tu hongo kutja nandarire Ovakriste ovaṱakame mape ya ave munu ouzeu okuyenenisa ozondando zawo.

5. Omapuriro yeṋe ngu matu kazira?

⁵ Tjimuna ovakambure moKorinte, eṱe mape ya atu munu ouzeu okuyenenisa ozondando zetu. Omena ra tjike? Mena rokutja kaweṱe ohomonena, mape ya atu kambura orure okutjita otjiṋa. Poo mape ya a rire ouzeu kweṱe okuyenenisa ondando ndjo, mena rokutja pu vi tanda kapu vi punda. (Omuzuv. 9:11; Rom. 7:18) Hapo matu sokutjita vi tji matu vanga okukonḓonona kutja twa tjita ondando ombwa, nokutja matu hepa okuirundurura poo indee? Nu matu tjiti vi kutja tu yenenise ondando ndjo?

6. Oruṋe tji matu hepa okurundurura ondando ndji twa tjita?

⁶ Ozondando tjiva ozonanḓengu nu katu sokurundurura. Otjotjihorera, eṱe matu sokuṱaṱera kondando yetu yokukarera Jehova, nokurira ovaṱakame kovakwetu mbu twa kupasana. (Mat. 16:24; 19:6) Posi yokutja ozondando tjiva zarwe ze hepa okurundururwa. Omena ra tjike? Mena rokutja ozongaro ze runduruka. Ovikwaye mbi mavi yenene okutuvatera okutjita ozondando ozombwa?

7. Matu sokuningira ye, nu ongwaye?

⁷ Ningira ounongo. Jehova wa hinga Jakobus okutjanga omambo nga: “Mokati keṋu tji pe na ngu ma hepa ounongo, nga kumbe ku Ndjambi, nEye me mu pe, Ndjambi tjinga e yandja nouharupu.” (Jak. 1:5) Atuhe tu “hepa ounongo.” Kunao ṱaṱera ku Jehova indu tji mo tjiti ondando na indu tji mo hepa okurundurura ondando ndji wa tjita. Jehova me ku vatere okutjita ozondando ozosemba.

8. Omakonḓononeno yeṋe ngu matu sokutjita ngunda atu hiya toora omukambo?

⁸ Konḓonona nawa. Lesa Embo ra Mukuru, nomambo wotjira tja Jehova nu hungira ku novandu mbu mave yenene okukupa ondunge ombwa. (Omiano 20:18) Omakonḓononeno otja ingo omananḓengu ngunda au hiya toora omukambo wokurundurura oviungura vyoye, okutjindira kwarwe, poo okutoorora omahongero omasemba ngu maye ku vatere kutja u kayende komurungu okukarera Jehova.

9. Matu munu vi ouwa indu tji tu nouatjiri mu eṱe oveni?

⁹ Konḓonona ondando ndji mo tjitire otjiṋa. Ondando yetu onanḓengu ku Jehova. (Omiano 16:2) Eye u vanga kutja tu kare nouatjiri moviṋa avihe mbi matu tjiti. Kunao indu tji matu tjiti ozondando, eṱe matu vanga okukara nouatjiri nu aha rire kutja matu tjitire ovandu varwe. Indu tji tu hi nouatjiri mu avihe mbi matu tjiti, mape ya ai rire ouzeu kweṱe okutjita imbi mbi twa tye okutjita. Otjotjihorera, omukambure omutanda mape ya a yenenisa ondando ye yokurira omukandjira woruveze aruhe. Posi yokutja kombunda yoruveze oruṱiṱi, a utu okumuna ouzeu okuyenenisa ozoiri nḓe undjirwa ko nu a pandjara ondjoroka ye motjiungura tjokuzuvarisa. Eye mape ya e ripura kutja ondando ye oyokuyorokisa Jehova.  Nungwari, mouatjiri mape ya kutja ondando ye ya ri oyokuyorokisa ovanene ve poo omundu warwe ngwa suvera.

10. Ovikwaye mbi heperwa po okutjita omarundurukiro?

¹⁰ Ripura nomuhongwa wOmbeibela ngwa tye okuisa okupepa omakaya. Oure wovivike vivari, eye wa yenena okuhina okupepa nandarire kutja ya ri ouzeu ku ye. Posi yokutja kombunda yoruveze a utu rukwao okupepa. Nungwari korusenina, a toṋa mongondjero ye ndjo. Orusuvero rwe ku Jehova nonḓero ye yokumukarera ye mu vatera kutja ma ise okupepa.—Kol. 1:10; 3:23.

11. Ongwaye tji wa sokukara nomuhunga wokutja mo yenenisa vi ondando yoye?

¹¹ Kara nomuhunga wokutja mo yenenisa vi ondando yoye. Tji u nomuhunga ku mo ungurire ozondando zo ye irira oupupu kove okuzeyenenisa. Otjotjihorera, mape ya wa tye kutja mo lese Ombeibela aruhe. Posi yokutja tji u hi nomuhunga omusemba wokutja mo lese vi Ombeibela yoye, ove mape ya o ha yenenisa ondando ndjo. * Poo mape ya ovanene vombongo va tye kutja mave kavarura ouṋepo wombongo movikando, nungwari ave ha yenenisa ondando ndjo. Kutja ve yenenise ondando ndjo, owo mape ya ave ripura omapuriro nga: “Hapo twa tjanga omana wovakambure mbu mave hepa okuvarurwa? Hapo twa tjanga kutja matu ke ve varura ruṋe?”

12. Ovikwaye mbi matu sokutjita, nu omena ra ye?

¹² Kara noumune ouwa. Kaaruhe auhe wetu tje kara noruveze, poo omasa okutjita oviṋa avihe mbi matu vanga okutjita. Kunao oundjire ko ovingi kove omuini. Indu tje ri ohepero, ove mape ya orundurura ondando ndji mo munu kutja ko nokuiyenenisa. (Omuzuv. 3:6) Ngatu tje wa tjiti omarundurukiro ngu maye heperwa po, nu o munu kutja mo yenene okuyeyenenisa. Tara koviṋa vitano mbi mo yenene okutjita mbi mavi ku vatere okuyenenisa ondando yoye.

13. Ove mo yenene vi okumuna omasa ngu mo hepa okuyenenisa ondando yoye?

¹³ Ningira omasa wokuyenenisa otjiṋa. Mukuru ma yenene okukupa ‘omasa okuyenenisa’ ondando yoye. (Fil. 2:13) Kunao ningira ombepo ya Jehova ondjapuke okukupa omasa ngu mo hepa. Kayende komurungu okukumba nandarire indu tji mo munu kutja ongumbiro yoye mai toora orure okuzirwa. Jesus wa tja: “Ningireye nu mamu pewa.”—Luk. 11:9, 13.

14. Omurari mbu ri mOmiano 21:5 mau ku vatere vi okuyenenisa ondando yoye?

¹⁴ Kara nongongorasaneno yoviṋa mbi mo tjiti. (Lesa Omiano 21:5.) Kutja u yenenise ondando ngamwa aihe, ove mo hepa okukara nongongorasaneno yokutja mo i yenenisa vi. Nu okuzambo ungura otja komuano mbu we ripura okuyenisa ondando yoye. Momuano otjingewo, indu tji mo tjiti ondando, tjanga oviṋa mbi mo vanga okutjita okuyenenisa ondando yoye ndjo. Indu tji u notjiṋa otjizeu okutjita, tji haṋa motupa otuṱiṱi. Otjikando atjihe tji wa yenenisa orupa rumwe, tji tjita kutja u yenene okumuna kutja wa ungura pu pe ṱa pi. Paulus wa tunduuza ovakambure moKorinte okutwapo ovimariva pehi “Osondaha aihe” pendje nokuundja nga eye tje ya. (1 Kor. 16:2) Okuhaṋa oviṋa motupa otuṱiṱi wina ku vatera kutja oha munu kutja ko nokuyenena okuyenenisa ondando yoye.

15. Ovikwaye mbi mo yenene okutjita, indu tji wa zu nokutjanga ongongorasaneno yoviṋa mbi mo vanga okutjita?

¹⁵ Tji wa tjanga oviṋa mbi mo vanga okutjita, i rira oupupu kove okuvitjita. (1 Kor. 14:40)  Otjotjihorera, orutu rovanene vombongo ru toorora kutja ouṋe ngu ma tjanga oviṋa avihe mbi va tye okutjita, nokutja ouṋe ngu me vi tjiti nu ma vi sokuyenenisiwa ruṋe. Ovanene vombongo tji va kongorere oviṋa mbyo, i rira oupupu ku wo okuyenenisa ondando ndjo. (1 Kor. 9:26) Ove wina mo yenene okutjita nao, noviṋa vyarwe mehupo roye. Otjotjihorera, mo yenene okutjanga ongongorasaneno yoviṋa mbi mo vanga okutjita meyuva, okuza kotjiṋa otjitenga tji mo vanga okutjita nga ku ihi otjisenina. Indu tji wa tjiti nao, maku ku vatere kutja i rire oupupu kove okuyenenisa ovingi moruveze oruṱiṱi.

16. Ovikwaye vyarwe mbi mo hepa okutjita, nu Ovaroma 12:11 ma ri ṋunisa vi epu ndo?

¹⁶ Kondja nomasa. Okutjita otja pu wa hee nokuyenenisa ozondando zoye ku hepa ozongondjero. (Lesa Ovaroma 12:11.) Paulus wa raera Timoteus ‘okupanḓera pokulesa’ nokurira omuhonge omuwa. Matu yenene okuungurisa eronga ra Paulus ndo moviṋa avihe mbi matu vanga okuungurira Jehova.—1 Tim. 4:13, 16.

17. Ovaefese 5:15, 16 ma ri tu vatere vi okuyenenisa ondando yetu?

¹⁷ Ungurisa oruveze roye nawa. (Lesa Ovaefese 5:15, 16.) Twapo oruveze okutjita imbi mbi wa tye okutjita nu o rundurura ko. Nu o undju oruveze ndu mo munu kutja ooruveze orusemba okuuta, oruveze ndo mape ya aru heya. (Omuzuv. 11:4) O yandjere oviṋa mbi he ri ovinanḓengu okukambura oruveze nomasa ngu mo hepa koviṋa ovinanḓengu tjinene. (Fil. 1:10) Paha oruveze ovandu varwe mu ve hina okukuisako ombango ku imbi mbi mo ungura. Nu ve raera kutja mo hepa oruveze okuyandja ombango. Ma rire nawa tji wa zemisa ongoze yoye nu tara ozombuze zoye poo oviṋa vyarwe kombunda. *

18-19. Ovikwaye mbi mavi ku vatere kutja o he rihahiza nandarire kutja kaupupu okuyenenisa ondando yoye?

¹⁸ Ripurira kouwa mbu mo munu. Ouwa mbu mo munu mokuyenenisa ondando yoye u ri tjimuna okuvaza koṋa ku mo i. Tji mo vanga okukavaza ngo, ove mo kayenda komurungu nandarire kutja mo hepa okutoora ondjira yarwe. Momuano otjingewo, tji twa yandja ombango kouwa mbu matu munu mokuyenenisa ondando yetu, eṱe kamaatu rihahiza tjimanga nandarire kutja matu munu omatokero.—Gal. 6:9.

¹⁹ Okutjita ozondando ozombwa nokuzeyenenisa kaupupu. Posi yokutja Jehova me ku vatere okurira onongo nu me kupe omasa ngu mo hepa okuyenenisa imbi mbi mo vanga okutjita.