1. Yehowa gaw anhte hpe hpa galaw na matu ahkang jaw da ai kun?

YEHOWA gaw anhte a prat hkrun lam hpe anhte nan lata na matu ahkang jaw da ai. Shi gaw kaja ai dawdan lam ni hpe gara hku jahkrat mai ai lam sharin ya nna, shi a myit ra ai hte maren dawdan ai shaloi awng dang na matu anhte hpe karum ya ai. (Shk 119:173) Karai A Mungga hta mu lu ai hpaji byeng-ya hpe grau akyu jashawn magang, kaja ai dawdan lam ni hpe grau jahkrat lu magang re.​—Heb 5:14.

2. Anhte dawdan lam jahkrat ngut ai hpang hpa byin chye ai kun?

² Hpaji rawng ai dawdan lam ni jahkrat tim pyi, dai hpe ngut kre hkra galaw lu na matu shakut ra chye ai. Ga shadawn nkau mi hpe hkaja yu ga: Ramma hpunau langai gaw Chyum Laika buk ting hpe hti na matu dawdan da ai. Bat loi mi laman gaw hti byin nna, hpang hta gaw kaga lam ni a majaw jahkring kau ai. Nauna langai gaw aten galu ningshawng hku nna sak jaw na matu dawdan da ai. Raitim, galaw hpang na matu htingnut nga ai. Myitsu salang hpung gaw nawku hpung kaw na hpunau nauna ni hpe sagu kawan grau nna galaw lu na matu dawdan da ma ai. Dai hpe shata law law lai mat tim, n galaw byin shi ai. Shanhte a masa ni gaw shai tim, bung ai lam langai nga ai. Shanhte a dawdan lam ni hpe ngut kre hkra n lu galaw ai re. Tsa ban langai na Korinhtu Hkristan ni mung dai zawn byin wa ai. Shanhte kaw nna sharin la lu ai lam hpe hkaja yu ga.

3. Korinhtu masha ni gaw hpa hpe dawdan wa ai kun? Raitim, hpa byin wa ai kun?

³ A.D. 55 daram hta Korinhtu masha ni gaw ahkyak ai dawdan lam langai jahkrat ma ai. Yerusalem hte Yuda mung hta nga ai hpunau ni gaw yakhkak hkrum nga ai lam, matsan mayam hkrum nga ai lam hte kaga nawku hpung ni gaw shanhte hpe karum ya na matu alu gumhpraw lahkawn nga ai hpe Korinhtu masha ni chye wa ai. Shanhte gaw tsawra myit, gam jaw mayu ai myit hte dai lam hta alu gumhpraw jaw na matu dawdan nna, gara hku karum lu na lam kasa Pawlu hpe san ai. Shi gaw nawku  hpung hpe lam matsun ni sa ya nna, Titu hpe alu lahkawn ai hta karum na matu aya tang ai. (1 Ko 16:1; 2 Ko 8:6) Shata loi mi na ai hpang, Korinhtu masha ni gaw shanhte dawdan da ai hte maren n galaw lu ai hpe Pawlu chye mat ai. Yerusalem de kaga nawku hpung ni alu gumhpraw sa ai shaloi, shanhte a alu gumhpraw gaw n lu shagun ya ai zawn rai mat ai.​—2 Ko 9:4, 5.

4. 2 Korinhtu 8:7, 10, 11 hta Korinhtu masha ni hpe hpa galaw na matu Pawlu n-gun jaw wa ai kun?

⁴ Korinhtu masha ni gaw kaja ai dawdan lam ni jahkrat da ai. Pawlu gaw shanhte a ngang kang ai makam masham hte gam jaw gam ya mayu ai myit hpe shakawn ya wa ai. Raitim, shi gaw shanhte galaw hpang da ai lam hpe ngut kre hkra galaw na matu mung n-gun jaw ai. (2 Korinhtu 8:7, 10, 11 hpe hti u.) Sadi dung ai Hkristan ni pyi shanhte a kaja ai dawdan lam hpe hkan sa na matu shakut ra wa ai hpe shanhte a mahkrum madup kaw nna anhte sharin la lu ai.

5. Gara ga san ni a mahtai hpe chye lu na kun?

⁵ Korinhtu masha ni zawn, anhte mung dawdan lam hte maren galaw na matu yak chye ai. Hpa majaw kun? N hkum tsup ai majaw, anhte htingnut chye ai. Shing nrai n myit mada ai lam ni a majaw, dawdan da ai lam ni hpe ngut kre hkra galaw na matu yak chye ai. (Hpj 9:11; Rom 7:18) Dawdan lam hpe bai sawn maram na matu hte galai shai ging ai hpe chye na matu gara hku galaw na kun? Anhte galaw hpang da ai lam hpe ngut kre hkra gara hku galaw lu na kun?

6. Dawdan lam hpe gara aten hta galai shai ra chye ai kun?

⁶ Ahkyak ai dawdan lam nkau hpe gaw galai shai lu na n re. Ga shadawn, Yehowa hpe nawku na ngu ai anhte a dawdan lam hpe hkan shatup ra ai. Ningrum ningtau hpe sadi dung na matu dawdan da ra ai. (Mat 16:24; 19:6) Kaga dawdan lam ni hpe gaw galai shai ra chye ai. Hpa majaw kun? Masa lam ni galai shai mat ai majaw re. Kaja htum dawdan lam jahkrat lu na matu hpa gaw karum ya lu ai kun?

7. Anhte hpa a matu akyu hpyi ging ai kun? Hpa majaw kun?

⁷ Hpaji byeng-ya a matu akyu hpyi u. Ndai lam hpe Yaku ka na matu Yehowa shung ya wa ai: “Nanhte hta na marai langai ngai hpaji byeng-ya kadawn nga yang gaw, n jet kau ai sha, nlang hte hpe n daw n hta a jaw nga ai Karai Kasang kaw, hpyi nga u ga.” (Yak 1:5) Lam nkau hta, anhte yawng gaw “hpaji byeng-ya kadawn” nga ai. Dai majaw, dawdan lam jahkrat ai shaloi hte dawdan lam hpe bai myit yu ai shaloi Yehowa hpe kamhpa u. Yehowa gaw hpaji rawng ai dawdan lam ni jahkrat lu na matu karum ya lu ai.

8. Dawdan lam ni garai n jahkrat shi yang gara sawk sagawn lam ni galaw ging ai kun?

⁸ Atsawm sawk sagawn u. Chyum Laika hkaja u. Yehowa a uhpung na laili laika ni hpe hti u. Kaja ai hpaji jaw ga ni jaw lu ai masha ni hte ga shaga u. (Gsh 20:18) Bungli galai shai na matu, shara htawt na matu (sh) hkaw tsun bungli hpe madi shadaw ya lu ai jawng hpaji ni hpe lata na matu garai n dawdan shi yang dai zawn sawk sagawn ai lam ni galaw na matu ahkyak ai.

9. Anhte ding man na nga yang gara akyu ni lu la na kun?

⁹ Na a myit jasat hpe san jep u. Anhte a myit jasat hpe Yehowa sadi yu nga ai. (Gsh 16:2) Lam yawng mayawng hta ding man na matu shi ra sharawng ai. Dai majaw, anhte dawdan lam jahkrat ai shaloi, anhte a myit jasat hte seng nna anhte hte kaga ni a ntsa ding man mayu ga ai. Anhte ding man ai lam n nga yang, dawdan lam hte maren galaw na matu yak chye ai. Ga shadawn, ramma hpunau langai gaw aten galu ningshawng galaw na matu dawdan chye ai. Aten loi mi na ai hpang, hpyi shawn da ai aten hpring na matu shakut ra nga ai majaw, hkaw tsun bungli hta nau n pyaw wa ai. Ningshawng  galaw mayu ai shi a myit jasat gaw Yehowa hpe myit shapyaw ya na matu re ngu shi myit chye ai. Raitim, gaja nga yang shi a kanu kawa (sh) kaga marai langai ngai hpe myit shapyaw ya mayu ai majaw rai na re.

10. Galai shai na matu hpa ra ai kun?

¹⁰ Hkayawm n lu na matu dawdan ai Chyum ga sharin langai a masa hpe myit yu ga. Shi gaw yak tim pyi, bat langai lahkawng daram hkayawm n lu ai. Dai hpang bai lu wa ai. Raitim, hpang jahtum hta gaw shi awng dang mat ai. Yehowa hpe tsawra nna myit shapyaw ya mayu ai shi a myit jasat gaw, dai akyang hpe awng dang na matu karum ya wa ai.​—Kol 1:10; 3:23-24.

11. Tup hkrak re ai bandung ni hpa majaw nga ra ai kun?

¹¹ Tup hkrak re ai bandung tawn u. Grau nna tup hkrak rai magang, nnan hpang da ai lam hpe ngut kre hkra galaw lu magang re. Ga shadawn, Chyum Laika hpe grau nna hti na matu dawdan chye ai. Raitim, tup hkrak re ai chyarang n nga yang, na a bandung de du na n re. * Shing nrai, nawku hpung a myitsu salang ni gaw, sagu kawan grau nna galaw lu na matu dawdan chye ai. Raitim, aten loi mi na ai hpang, dai dawdan lam hte maren n lu galaw ai. Rai yang, awng dang lu na matu, ndai zawn ga san ni hpe san mai ai: “Anhte sa kawan ai shaloi hpunau nauna ni akyu lu na matu jahpan galaw da sai kun? Shanhte hpang de sa chyai na matu tup hkrak re ai aten hpe masat da sai kun?”

12. Hpa galaw ra chye ai kun? Hpa majaw kun?

¹² Tatut rai u. Anhte galaw mayu ai lam yawng mayawng hpe galaw na matu, anhte hta n-gun atsam, ahkying aten hte arung arai n nga ai. Dai majaw, tatut byin ra nna rap ra ra ai. Ra ang yang, ngut kre hkra n galaw lu ai dawdan lam hpe galai shai ra chye ai. (Hpj 3:6) Na a dawdan lam hpe bai maram yu ai shaloi, galai shai ra na hpe nang chye wa ai. Dai hte maren galaw lu na ngu nna mung nang shadu ai. Nang galaw hpang da ai lam hpe ngut kre hkra galaw lu na matu karum ya na lam 5 hpe hkaja yu ga.

13. Dawdan lam hte maren galaw lu na atsam hpe gara hku lu la mai na kun?

¹³ Galaw lu ai n-gun atsam lu na matu akyu hpyi u. Karai Kasang gaw na a dawdan lam hte maren galaw lu na matu hte galaw lu ai atsam hpe jaw lu ai. (Hpl 2:13) Dai majaw, nang ra nga ai atsam hpe jaw na matu Yehowa kaw chyoi pra ai wenyi hpyi u. Nang hpyi shawn da ai lam ni a matu mahtai n lu shi yang pyi, matut nna hpyi nga u. “Hpyi mu, shaloi [chyoi pra ai wenyi, NW] nanhte lu la na myit dai” nga nna Yesu tsun wa ai.​—Luk 11:9, 13.

14. Luka 14:28 hta mu lu ai npawt tara gaw dawdan lam hpe ngut kre hkra galaw lu na matu gara hku karum ya lu ai kun?

¹⁴ Masing jahkrat u. (Luka 14:28 hpe hti u.) Nang hpang da ai gara lam hpe raitim, ngut kre lu na matu masing jahkrat ra ai. Dai masing hte maren mung galaw ra ai. Dai hte maren, dawdan lam jahkrat ai shaloi, dai hpe ngut kre hkra galaw lu na matu, hkan sa lu ai lam ni hpe jahpan galaw da u. Bungli ni hpe daw hte daw garan nna galaw ai nga yang, aloi sha ngut kre lu na re. Pawlu gaw shi du ai shaloi she, alu lahkawn na malai, “bat shagu na shawng shani hta” alu gumhpraw hpe mahkawng da na matu, Korinhtu masha ni hpe n-gun jaw ai. (1 Ko 16:2) Bungli hpe daw hte daw garan nna galaw ai nga yang, n ngut kre ai ngu nna mung hkamsha sana n re.

15. Masing jahkrat ngut ai hpang hpa galaw ra ai kun?

¹⁵ Hpa galaw na ngu ai masing hpe ka da yang, dai hpe galaw na matu grau loi wa na re. (1 Ko 14:40) Ga shadawn, myitsu salang hpung gaw lit langai hpe kadai galaw na, gara shani  hta ngut kre ra na ngu ai lit hte hpawn, shanhte jahkrat ai dawdan lam langai hpra hpe matsing da na matu, myitsu salang langai hpe lit jaw ai. Dai lam matsun hte maren hkan sa ai myitsu salang ni gaw, shanhte a dawdan lam ni hte maren grau nna galaw lu ai. (1 Ko 9:26) Shani shagu na galaw hkawm sa ai lam hta mung dai hte maren galaw mai ai. Ga shadawn, shani shagu galaw ra na lam ni hpe jahpan galaw da nna, nambat langai galaw ra na lam hpe jahpan a shawng hta ka da u. Nnan hpang da ai bungli hpe ngut kre hkra galaw lu ai sha n-ga, aten kadun laman hta mung grau nna ngut kre lu na re.

16. Dawdan da ai hpe ngut kre hkra gara hku galaw mai ai kun? Roma 12:11 gaw dai hpe gara hku karum ya lu ai kun?

¹⁶ Shakut shaja u. Masing jahkrat da ai hte maren hkan sa nna ngut kre hkra galaw u. (Roma 12:11 hpe hti u.) Pawlu gaw Timohti hpe “a shaja nga” na matu hte grau kaja ai sara byin wa hkra shakut na matu tsun da ai. Kaga wenyi bandung ni hta mung dai hpaji jaw ga hpe hkan sa mai ai.​—1 Tm 4:13, 16.

17. Dawdan da ai hte maren galaw lu hkra Ehpesu 5:15, 16 hpe gara hku hkan sa mai ai kun?

¹⁷ Aten hpe hpaji rawng ai hku akyu jashawn u. (Ehpesu 5:15, 16 hpe hti u.) Na a dawdan lam hpe ngut kre lu na matu aten hpe masat da nna, dai hte maren galaw lu na matu shakut u. Kaja htum aten hta she galaw na ngu myit ai hpe koi u. Kaja htum aten gaw du yang she du wa na re. (Hpj 11:4) Nau n ahkyak ai lam ni a matu aten hpe n shama na matu hte grau ahkyak ai lam ni galaw ai shaloi n-gun atsam n nga mat ai baw n byin na matu sadi u. (Hpl 1:9-11) Nang galaw ai lam ni hta kaga lam ni shang wa chye ai majaw, byin mai yang, aten ngam da u. Tinang hta masat da ai aten nga ai lam kaga ni hpe tsun dan u. Na a phone hpe pat da u. Hpang hta she bai hpaw nna laika ni (sh) social media ni hpe yu u. *

18-19. Dawdan lam hpe ngut kre hkra galaw na matu n loi tim matut galaw lu hkra hpa gaw karum ya lu ai kun?

¹⁸ Lu la na akyu hpe myit maju jung u. Na a dawdan lam a akyu gaw tinang sa mayu ai hkrun lam langai de du ai hte bung ai. Dai de du mayu yang, lam pat nga tim pyi kaga lam hpe lata nna matut sa na re. Dai hte maren, dawdan lam a akyu hpe myit maju jung yang, yakhkak ai lam ni (sh) htingnut shangun ai lam ni hte anhte hkrum yang pyi, aloi sha asum jaw na n re.​—Gal 6:9.

¹⁹ Kaja ai dawdan lam ni jahkrat na matu yak chye nna, ngut kre hkra galaw na matu mung n loi ai. Raitim, dawdan lam hpe ngut kre hkra galaw lu na matu, ra nga ai nyan hpaji hte n-gun atsam hpe Yehowa a karum shingtau lam hte lu la mai ai.