1. Jehova okwe tu pitika tu ninge shike?

JEHOVA ohe tu pitike tu hoolole onghedi yetu yokukalamwenyo. Ohe tu hongo nghee tu na okuninga omatokolo e li mondjila nohe tu kwafele tu pondole ngeenge twa ningi omatokolo oo tae mu hafifa. (Eps. 119:173) Ngeenge otwa kala hatu tula moilonga osho hatu lihongo mOmbiibeli, ohatu ka ninga omatokolo e li mondjila. — Heb. 5:14.

2. Eshongo lilipi hatu kala twa taalela ngeenge twa ningi etokolo?

² Nonande otu ninge omatokolo e li mondjila, otashi dulika omafimbo amwe tu mone shidjuu okuwanifa oshilonga osho twa hovela. Natu ka taleni koihopaenenwa imwe: Omumwatate omunyasha okwa tokola okumana ko okulesha Ombiibeli aishe. Okwa li te shi endifa nawa oule woivike inini, ashike lwanima okwa ka efa po oku i lesha omolwetomheno lonhumba. Omumwameme a tokola okuninga omukokolindjila wondjikilile, ashike okwa kala ta undulile komesho efiku omo e na okuhovela. Olutu lovakulunhuongalo la ninga etokolo lokuninga omatalelepo oufita meongalo, ashike opa pita eemwedi dihapu inava hovela. Eenghalo adishe odo oda yoolokafana, ashike ope na oshinima shimwe osho tashi dana onghandangala. Omatokolo aeshe oo kaa li a tulwa moilonga. Ovakriste vomefelemudo lotete vomuKorinto navo ova li va taalela eshongo la faafana. Natu taleni kutya oshike hatu lihongo kuvo.

3. Ovakorinto ova li va ninga etokolo lilipi, noshike sha li sha ningwa po?

³ Ovakorinto ova li va ninga etokolo la fimana  mo 55. O.P. lwaapo. Ova li va uda kutya ovamwaxe muJerusalem nomuJudea ova li tava mono oixuna koluhepo nosho yo kutya omaongalo makwao okwa li taa ongele oshimaliwa opo e va kwafele. Omolwolukeno nomhepo yokuyandja, Ovakorinto ova li va tokola okukwafela nova li va pula omuyapostoli Paulus nghee tava dulu oku shi ninga. Okwa li a yandja omalombwelo keongalo nokwa li a hoolola Titus a kwafele mokwoongela oshimaliwa osho. (1 Kor. 16:1; 2 Kor. 8:6) Konima yeemwedi dinini, Paulus okwa li a mona kutya Ovakorinto inava wanifa po eudaneko olo va ninga. Oshidjemo, omayambidido avo kaa li a fika pefimbo opo a dule okutumwa kuJerusalem pamwe nomayambidido okomaongalo makwao. — 2 Kor. 9:4, 5.

4. Metwokumwe 2 Ovakorinto 8:7, 10, 11, Paulus okwa li a ladipika Ovakorinto va ninge shike?

⁴ Ovakorinto ova li va ninga etokolo li li mondjila, na Paulus okwa li e va pandula omolweitavelo lavo la kola nosho yo eshi va li va halelela okuyandja. Ashike okwa li yo e va twa omukumo opo va manife oshilonga osho va hovela. (Lesha 2 Ovakorinto 8:7, 10, 11.) Oshimoniwa shavo otashi tu hongo kutya Ovakriste ovadiinini navo otashi dulika shi kale shidjuu kuvo okuwanifa osho va hovela.

5. Omapulo elipi hatu ka nyamukula?

⁵ Ngaashi Ovakorinto, nafye otashi dulika tu mone shidjuu okuwanifa po omaudaneko etu. Omolwashike mbela? Molwaashi otu li ovalunde, otashi dulika tu ongaonge oku a wanifa po. Ile otashi dulika pa holoke onghalo yonhumba inatu shi teelela notai ke shi ningifa shidjuu okuwanifa po omaudaneko etu. (Omuud. 9:11; Rom. 7:18) Oshike tu na okuninga ngeenge otwa mono kutya otwa pumbwa okutalulula etokolo olo twa ningile monakudiwa notwa hala oku li lundulula? Nongahelipi hatu dulu okukala noushili kutya ohatu ka manifa oshilonga osho twa hovela?

6. Mbela onaini tashi dulika twa pumbwa okulundulula etokolo letu?

⁶ Ope na omatokolo a fimana oo tuhe na okulundulula. Pashihopaenenwa, otu li ovadiinini ketokolo letu lokulongela Jehova notwa tokola toko okukala ovadiinini kookaume ketu kopahombo. (Mat. 16:24; 19:6) Ashike otashi dulika twa pumbwa okulundulula omatokolo amwe. Omolwashike? Molwaashi eenghalo ohadi lunduluka. Mbela oshike tashi dulu oku tu kwafela tu ninge omatokolo e li mondjila?

7. Oshike twa pumbwa okwiilikana kombinga yasho, nomolwashike?

⁷ Ilikana opo u mone ounongo. Jehova okwa li a nwefa mo Jakob a shange ta ti: “Ngeenge umwe womunye okwa hepa ounongo, ne u indile kuKalunga ou e hole okuyandjela aveshe.” (Jak. 1:5) Oshoshili kutya ohatu kala twa “hepa ounongo” peemhito dimwe. Onghee pula alushe ekwafo kuJehova ngeenge to ningi etokolo nongeenge wa hala oku li lundulula. Opo nee Jehova ote ke ku kwafela u ninge omatokolo e li mondjila.

8. Openi hatu dulu okuninga omapekapeko ofimbo inatu ninga etokolo?

⁸ Ninga omapekapeko. Konga ouyelele mEendjovo daKalunga, lesha oishangomwa oyo ya nyanyangidwa kehangano laJehova nosho yo popya novanhu ovo we lineekela. (Omayel. 20:18) Omapekapeko a tya ngaho okwa fimana ofimbo ino ninga etokolo lokulundulula oilonga, lokutembuka ile lokuhoolola ehongo olo tali ke ku kwafela u mone oyuuyemo nou twikile okulongela Jehova.

9. Ouwa washike hatu ka mona ngeenge otwa kala ovanashili?

⁹ Konakona omalinyengotomheno oye. Jehova oha kala e na ko nasha nomalinyengotomheno etu. (Omayel. 16:2) Okwa hala tu kale ovanashili moinima aishe. Ngeenge hatu  ningi omatokolo, otwa hala okukala ovanashili nokulombwela vakwetu oshili kombinga yomalinyengotomheno etu. Otashi ka kala shidjuu okuwanifa osho twa udaneka ngeenge katu li ovanashili. Pashihopaenenwa, omumwatate omunyasha okwa tokola okuninga omukokolindjila wondjikilile. Mokweendela ko kwefimbo, osha ka kala shidjuu kuye okuwanifa po eevili daye noiha hafele vali oilonga yokuudifa. Otashi dulika a diladile kutya elinyengotomheno laye lokuninga omukokolindjila ola li okuhafifa Jehova. Otashi dulika ngoo shi kale osho, ashike elinyengotomheno laye lokuninga omukokolindjila ola li okuhafifa ovadali vaye ile omunhu umwe vali.

10. Otwa pumbwa okuninga omalunduluko hatu linyengifwa kushike?

¹⁰ Diladila komukonakoni oo a tokola okweefa po okushila omakaya. Okwa li e a efa po oule woshivike ile woivike ivali, ndele ta hovele vali. Lwanima, okwa ka efa po filufilu okushila omakaya. Okwe a efa po filufilu molwaashi oku hole Jehova nokwa hala oku mu hafifa. — Kol. 1:10; 3:23.

11. Omolwashike twa pumbwa okulitulila po omalalakano okondadalunde?

¹¹ Litulila po omalalakano okondadalunde. Ngeenge owe litulila po omalalakano okondadalunde otashi ka kala shipu kwoove oku a wanifa po. Pashihopaenenwa, otashi dulika u tokole okulesha Ombiibeli pandjikilile. Ashike ngeenge ino litulila po elandulafano, ito ka dula okuwanifa po omalalakano oye. * Ile ovakulunhuongalo va ninga etokolo lokuninga lwoikando omatalelepo oufita meongalo, ashike inava tula etokolo olo moilonga. Opo va pondole, ova pumbwa okulipula omapulo taa shikula: “Mbela ope na ovamwatate novamwameme ovo tava ka mona ouwa momatalelepo oufita? Mbela otwe litulila po ovili yokondadalunde oyo tu na oku ke va talela po?”

12. Oshike tashi dulika twa pumbwa okuninga, nomolwashike?

¹² Kala u na etaleko li li pandjele. Kape na oo e na efimbo, oyuuyemo ile eenghono dokuninga keshe osho a hala. Onghee hano, kala u na ondjele. Ngeenge otashi shiiva, oto dulu okulundulula etokolo olo wa ninga ngeenge ito dulu oku li wanifa po. (Omuud. 3:6) Onghee, talulula etokolo loye, ninga omalunduluko ngeenge osha pumbiwa nokutala nee ngeenge oto dulu oku li wanifa po. Natu ka taleni keenghedi nhano odo tadi ke tu kwafela tu wanife osho twa hovela.

13. Ongahelipi hatu dulu okumona eenghono opo tu dule okuwanifa po etokolo olo twa ninga?

¹³ Ilikana u pewe eenghono. Kalunga ote ke ku pa ‘eenghono dokulonga’ opo u dule okuwanifa po etokolo olo wa ninga. (Fil. 2:13) Onghee ilikana kuJehova e ku pe omhepo iyapuki opo i ku pe eenghono odo wa pumbwa. Twikila okwiilikana nonande ou wete omailikano oye inaa nyamukulwa. Ngaashi Jesus a popya, “Indileni, ndele tamu pewa” omhepo iyapuki. — Luk. 11:9, 13.

14. Ongahelipi efinamhango olo li li mOmayeletumbulo 21:5 tali dulu oku ku kwafela u wanife po etokolo loye?

¹⁴ Ninga omhangela. (Lesha Omayeletumbulo 21:5.) Opo u wanife oshilonga keshe wa hovela, owa pumbwa okuninga omhangela. Opo nee owa pumbwa okulonga metwokumwe nomhangela oyo. Sha faafana, ngeenge owa ningi etokolo, shanga omusholondodo woinima aishe oyo wa pumbwa okumanifa. Ngeenge oto longo oshilonga sha kitakana, oto dulu oku shi tukula moutukulwa vanini. Efimbo keshe to ka manifa shimwe oto ka mona kutya owa longa shihapu. Paulus okwa li a ladipika Ovakorinto  va ongele omayambidido “mefiku lotete loshivike keshe” ponhele yokuteelela okwoongela oshimaliwa ngeenge a fiki. (1 Kor. 16:2) Okutukula oshilonga sha kitakana moutukulwa vanini otashi ke ku kwafela uha kale wa wililwa po.

15. Oshike tashi dulu okuningwa konima ngeenge owa ningi omhangela?

¹⁵ Ngeenge owa shange osho wa hala okuninga, otashi ke ku kwafela u shi wanife po. (1 Kor. 14:40) Pashihopaenenwa, olutu lovakulunhuongalo ohali hoolola omukulunhuongalo a shange oinima aishe oyo ovakulunhuongalo va tokola oku ka ninga, oo te ke shi ninga nonaini tave ke shi manifa. Ovakulunhuongalo ovo hava shikula elandulafano olo ohava wanifa po omatokolo oo va ninga. (1 Kor. 9:26) Naave oto dulu okuninga sha faafana noinima yoye ya kwalukeshe. Pashihopaenenwa, oto dulu okushanga omusholondodo woinima oyo wa hala okuninga, ndele to shange tete osho wa hala okuhovela nasho. Osho itashi ke ku kwafela ashike u manife osho wa hovela, ndele otashi ke ku kwafela yo u mane pefimbo.

16. Oshike wa pumbwa okuninga opo u wanife po etokolo loye, nOvaroma 12:11 otave shi yambidida ngahelipi?

¹⁶ Ninga eenghendabala. Ohashi pula eenghendabala okushikula omhangela oyo wa ninga nokuwanifa osho wa hovela. (Lesha Ovaroma 12:11.) Paulus okwa li a lombwela Timoteus a ‘twikile nokuninga’ omuhongi omunekeka. Ohatu dulu okulongifa omayele aPaulus mu keshe shimwe osho twa hala okuningila Jehova. — 1 Tim. 4:13, 16.

17. Ongahelipi Ovaefeso 5:15, 16 tave tu kwafele tu wanife po omatokolo etu?

¹⁷ Longifa nawa efimbo loye. (Lesha Ovaefeso 5:15, 16.) Litulila po efimbo u longe osho wa tokola okuninga. Ino teelela eenghalo di kale tadi ende nawa opo u hovele oshilonga shoye. (Omuud. 11:4) Ino efa oinima yongaho i ku manene po efimbo neenghono dokuninga oinima oyo ya fimanenena. (Fil. 1:10) Ngeenge otashi shiiva, hoolola efimbo opo vamwe itave ku piyaaneke. Va lombwela kutya olo olo efimbo ino pumbwa okupiyaanekwa. Shilipaleka kutya owa dima ongodi yoye, nomatumwalaka oo wa tuminwa oto ke a lesha ngeenge wa mane nosho yo okuya kointaneta. *

18-19. Oshike tashi dulu oku ku kwafela u twikile oku wanifa po osho wa tokola okuninga nokuli nonande kashi pu?

¹⁸ Yandja elitulemo koidjemo. Oidjemo oyo to ka mona oya fa ashike wa fika konhele oko wa li to i. Opo u fike oko, owa pumbwa okutwikila okweenda nokuli nonande owa mono kutya owa pumbwa okuya nondjila imwe. Sha faafana, ngeenge otwa yandje elitulemo koidjemo yomatokolo etu, itatu ka sholola noupu nonande otu shakeneke omainda. — Gal. 6:9.

¹⁹ Oshidjuu okuninga omatokolo e li mondjila, nohashi kala eshongo oku a wanifa po. Ashike Jehova ote ke ku pa ounongo neenghono opo u manife oshilonga osho wa hovela.