MUTWE WA KUFUNDA 48
“Pwishai Akya kyo Mwatendekele”
“Pwishai akya kyo mwatendekele.”—2 KO. 8:11.
LWIMBO 35 ‘Muyukenga Bintu Byanemesha’
BIJI MU UNO MUTWE *
1. Yehoba witupa luusa lwa kuba byepi?
YEHOBA witupa luusa lwa kwifuukwila byo tukeba kwikala mu bwikalo bwetu. Witufunjisha bya kufuukula bintu bulongo kabiji witukwasha kufikizha byo tufuukula inge twafuukula bintu bimutokesha ku muchima. (Sala. 119:173) Inge saka twingijisha maana aji mu Mambo a Lesa, tukafuukulanga bintu bulongo.—Hebe. 5:14.
2. Ñanyi lukatazho lo twakonsha kwikala nalo inge twafuukulapo bya kuba?
2 Bino nangwatu twafuukula bulongo, kyakonsha kwitukatazha kupwisha akya kyo twatendeka. Akilangulukai pa bino: Nsongwalume Kamonyi wafuukulapo kutanga Baibolo yense. Mu milungu itanshi waubatu bulongo, bino mu kuya kwa kimye wikileka na mambo a bintu bimo. Nyenga wafuukulapo kwikala painiya wa kimye kyonse, bino ubena kukankazhama kutendeka uno mwingilo. Jibumba ja bakulumpe mu kipwilo jafuukulapo kuba’mba basakwingila mwingilo wa bukafunga kukila byo baubanga kala, bino byo papita bañondo bavula bataana kuba’mba kechi baingijilapo ne. Abino bintu byo twaambapo byapusana, bino kuji mumo mo bipashisha. Abino byo bafuukwilepo kechi bebifikizhe ne. Bena Kilishitu batanshi mu Kolinda nabo byo baubile. Twayai twisambe pa byo twakonsha kufunjilako kwi abo.
3. Bena Kolinda bafuukwilepo kuba ka, bino ki ka kyamwekele?
3 Nobe mu mwaka wa 55 C.E., bena Kolinda bafuukwilepo kuba kintu kyanema. Baumvwine kuba’mba balongo mu Yelusalema ne mu Yudea bayanjile bingi kabiji amba bipwilo bikwabo byakonkenyenga mali a kwibakwashishamo. Na mambo a lusa ne bumpanyi bwabo, bena Kolinda bafuukwilepo kukwasha balongo bakajilwe kabiji baipwizhe mutumwa Paulo kuba’mba ebabuule jishinda jo bakonsheshe kwibakwashishamo. Paulo watumine mikambizho ku bipwilo kabiji watongwele Titusa kuya na kutambula mali o bapaine. (1 Ko. 16:1; 2 Ko. 8:6) Bino byo papichile bañondo bacheche, Paulo waumvwine’mba bena Kolinda kechi bapana bya bupe byo baambile’mba bakapana ne. Kyafuminemo, bupe bwabo kechi bwafikile pa kimye kyo bafwainwe kwibutwala ku Yelusalema pamo na bupe bwafumine mu bipwilo bikwabo ne.—2 Ko. 9:4, 5.
4. Kwesakana na byaamba 2 Kolinda 8:7, 10, 11, Paulo watundaikile bena Kolinda kuba byepi?
4 Bena Kolinda bafuukwile kuba kintu kyawama, kabiji Paulo wibatakaikile pa lwitabilo lwakosa lo bajinga nalo ne kwibikako kwikala bampanyi. Bino wibatundaikile ne kupwisha akya kyo batendekele. (Tangai 2 Kolinda 8:7, 10, 11.) Kino kyamwekele kitufunjisha kuba’mba nangwatu bena Kilishitu ba kishinka kyakonsha kwibakatazha kufikizha mulanguluko wawama ye bafuukula.
5. Ñanyi mepuzho o twafwainwa kukumbula?
5 Byonkatu byo kyajinga ku bena Kolinda, ne atweba kyakonsha kwitukatazha kufikizha byo tufuukula. Mambo ka? Na mambo a bumbulwa kulumbuluka, twakonsha kwikala na katende. Nangwa bintu bimweka bya kubula kuketekela byakonsha kwitulengela kukankalwa kufikizha kyo twafuukula kuba. (Sapwi. 9:11; Loma 7:18) Twafwainwa kuba byepi pa kuba’mba tupitulukemo mu bintu byo twafuukwile kuba ne kumona inge twakonsha kupimpulako? Kabiji twakonsha kuba byepi pa kuba’mba tupwishe kyo twatendekele?
SAKA MUKYANGYE KUFUUKULA KINTU
6. Ki ka kyakonsha kwitulengela kupimpulako byo twafuukwile kuba?
6 Bintu bimo byo tufuukulapo kechi bikapimpulwapo ne. Tukatwajijila kufikizha kyo twafuukwilepo kya kwingijila Yehoba, kabiji tukatwajijila kwikala ba kishinka ku benakwetu. (Mat. 16:24; 19:6) Pano bino, bintu bikwabo byo tufuukulapo twakonsha kwibipimpulako. Mambo ka? Mambo bintu mu bwikalo bipimpulwa. Ñanyi bintu byakonsha kwitukwasha kufuukula bulongo?
7. Twafwainwa kulomba kuba’mba betupa ka, kabiji mambo ka?
7 Lombai maana. Yehoba watangijile Yakoba kunemba’mba: “Umvwe umo mwi anweba wakepelwa maana, alombenga kwi Lesa, mambo aye upana na muchima yense ku bonse.” (Yako. 1:5) Mu mbaji imo, atweba bonse ‘twakepelwa maana.’ Onkao mambo, twafwainwa kukinka manungo mwi Yehoba pa kufuukula bintu ne pa kupimpulako bimo byo tufuukula. Yehoba uketukwasha kufuukula bulongo.
8. Twafwainwa kuba byepi pa kuba’mba twikale na bishinka byakonsha kwitukwasha pa kufuukula bintu?
8 Kebakebai bishinka. Tangainga Mambo a Lesa, mabuku anengezha jibumba ja Yehoba, ne kwipuzhako bantu bo mwaketekela. (Maana 20:18) Kukebakeba bishinka mu ano mashinda saka mukyangye kufuukulapo kutwela nkito ikwabo, kuvilukila ku mpunzha ingi, nangwa kusala bintu byo mwafwainwa kufunda pa kuba’mba mukekale na mwa kumwena pa kwingila mwingilo wa kusapwila kukemukwasha.
9. Kwikala ba kishinka kwi atweba bene kuketukwasha byepi?
9 Langulukai pa ene mambo o mubena kukebela kuba kyo kyo kintu. Yehoba uta muchima pa kine kintu kitulengela kuba bintu bimo. (Maana 16:2) Ukeba’mba twikale ba kishinka mu bintu byonse. Onkao mambo, pa kufuukula bya kuba, ne atweba tukeba kwikala ba kishinka kwi atweba bene ne ku bakwetu. Inge twabula kwikala ba kishinka, kiketukatazha kufikizha byo twafuukula kuba. Twambe’mba, mulongo mwanyike wafuukulapo kwikala painiya wa kimye kyonse. Bino pa kupitapo kimye, ke akankalwe kufikizha maola akebewa kabiji lusekelo lwa kwingila mwingilo wa kusapwila lwatendeka kupwa. Wakonsha kulanguluka kuba’mba kine kintu kyamulengejile kutendeka bupainiya ke kukeba kusangajika muchima wa Yehoba. Nanchi abya watendekele uno mwingilo na mambo a kukebatu kusangajika bansemi banji nangwa muntu mukwabo ye anemeka nyi?
10. Twafwainwa kuba byepi pa kuba’mba tupimpule byubilo byetu?
10 Akilangulukai pa muntu ubena kufunda Baibolo wafuukulapo kuleka kupepa fwanka. Patanshi, wibikako kabiji wauba bulongo pa mulungu umo nangwa ibiji, bino mu kuya kwa kimye wapepa jikwabo. Bino mu kuya kwa moba washinda kino kyubilo. Kutemwa Yehoba ne kukeba kumutokesha ku muchima kwamukwasha kuleka kino kyubilo.—Kolo. 1:10; 3:23.
11. Mambo ka o mwafwainwa kwibikila bikonkwanyi?
11 Ibikilai bikonkwanyi. Inge mwibikila bikonkwanyi, kikemupelela kupwisha kyo mwatendekele. Twambe’mba, mwafuukulapo kutanga Baibolo moba onse. Inge kechi mwilengela mutanchi wa kutanga ne, mwakonsha kukankalwa kufikizha kyo mwafuukulapo. * Nangwa kampe bakulumpe mu kipwilo bafuukwilepo kwingila mwingilo wa bukafunga bimye byavula, bino mu kuya kwa kimye, bakonsha kukankalwa kufikizha kyo bafuukula. Pa kuba’mba bafikizhe kyo bafuukula kuba, bafwainwa kwiipuzha mepuzho nabiji ano: “Nanchi twanemba mutanchi wa mazhina a balongo ne banyenga babena kukebewa lupempu lwa bukafunga nyi? Abya twatongola kimye kya kwibafwakesha nyi?”
12. Ñanyi kintu kyo twakonsha kuba, kabiji mambo ka?
12 Kumina kumo ne. Kafwako uji na kimye, bintu bikebewa mu bwikalo, nangwa ngovu ya kuba byonse byo tukeba kuba ne. Inge kyakonsheka, mwakonsha kupimpulako kintu kyo mwafuukwile kuba inge mwamona’mba kechi mwakonsha kwikifikizha ne. (Sapwi. 3:6) Fwanyikizhai kuba’mba mwapitulukamo bulongo mu kyo mwafuukwile kuba ne kupimpulako, kabiji mwamona’mba pano mwakonsha kwikifikizha. Langulukai pa bintu bitanu byakonsha kwimukwasha kupwisha akya kyo mwatendekele.
BINTU BYAKONSHA KWIMUKWASHA KUFIKIZHA BYO MWAFUUKULAPO
13. Mwakonsha kutaana kwepi bulume bwa kwimukwasha kufikizha kyo mwafuukulapo?
13 Lombainga bulume bwa kwimukwasha kwingila. Lesa wakonsha kwimupa “bulume” bwa kufikizha kyo mwafuukula kuba. (Fili. 2:13) Onkao mambo, lombai Yehoba kuba’mba emupe mupashi wanji wazhila kuba’mba emupe bulume bwa kufikizha byo mwafuukula. Twajijilai kulomba nangwa kya kuba mukumbu ye mubena kukeba wamweka kubanda. Yesu waambile’mba: “Lombainga, bakemupa [mupashi wazhila].”—Luka 11:9, 13.
14. Jifunde janembwa pa Byambo bya Maana 21:5 jakonsha kwimukwasha byepi kufikizha kyo mwafuukulapo kuba?
14 Lengai mutanchi. (Tangai Byambo bya Maana 21:5.) Pa kuba’mba mwingile mwingilo yense ye mwatendeka, mwafwainwa kulenga mutanchi wawama. Kabiji mwafwainwa kulondela mutanchi ye mwalenga. Kyo kimotu, inge mwafuukula kuba kintu, tanchikai bintu byo mwafwainwa kuba pa kuba’mba mufikizhe kyo mwafuukulapo. Inge kya kuba mwafuukulapo kuba kintu kyakatazha, mwafwainwa kwikyabanya mu mbaji icheiche. Kimye kyonse inge mwaingijila pa lubaji lumo, mukamona kuba’mba mu kuya kwa kimye mukafikizha kyo mwafuukulapo kuba. Paulo watundaikile bena Kolinda kutulapo bya bupe bimo “pa juba jitanshi mu mulungu yense” kukila kupembela’mba Paulo akikafike apa bino bakatendeke kukeba mali. (1 Ko. 16:2) Kwabanya mwingilo wabaya mu tumingilo tucheche kwakonsha kwimukwasha kumwingila bulongo.
15. Mwakonsha kuba byepi pa kuba’mba mulenge mutanchi?
15 Inge mwanemba mutanchi wa bintu byo mukeba kuba, kikemupelela kufikizha byo mwafuukulapo. (1 Ko. 14:40) Langulukai pa kino: Bakulumpe mu kipwilo bapa mukulumpe mu kipwilo umo kunemba byonse byafuukulapo jibumba ja bakulumpe, kubikapo ne mazhina a bakulumpe bo bapa mwingilo wa kwingijila pa bintu bimo ne juba ja kuba byobyo. Bakulumpe mu kipwilo inge banemba mutanchi wa bibena kukebewa kwingijilapo ne bo bapa mwingilo wa kwingila byobyo bintu, javula bafikizha byo bafuukulapo. (1 Ko. 9:26) Ne anweba byobyo mwakonsha kuba na bintu byo mufuukulapo pa juba pa juba mu bwikalo bwenu. Mwakonsha kunemba mutanchi wa bintu byo mukeba kuba pa juba pa juba ne kwibitanchika mu ndonda yo mukeba kwibyubilamo. Kuba bino kwakonsha kwimukwasha kufikizha byo mufuukula ne kubula kutayapo kimye kyabaya.
16. Mwafwainwa kuba byepi pa kuba’mba mufikizhe kyo mwafuukulapo, kabiji kinembelo kya Loma 12:11 kikosesha byepi kino kishinka?
16 Ingilai na ngovu. Kikebewa kwibikako pa kuba’mba mulondele mutanchi wenu ne kupwisha akya kyo mwatendekele. (Tangai Loma 12:11.) Paulo watundaikile Timoti ‘kuteshako muchima’ ne ‘kukoselamo’ pa kuba’mba akafunjishenga bulongo. Twakonsha kulondela luno lutundaiko inge tukeba kwingila mingilo yonse itupa Yehoba.—1 Timo. 4:13, 16.
17. Kinembelo kya Efisesa 5:15, 16 kyakonsha kwitukwasha byepi kufikizha byo tufuukulapo kuba?
17 Ingijishainga kimye kyenu bulongo. (Tangai Efisesa 5:15, 16.) Salai kimye kyo mwafwainwa kwingijila pa kyo mwafuukulapo kuba kabiji kechi mwafwainwa kupimpula kimye ne. Chinuzhukainga muteeto wa kupembelela kimye kyafwainwa; kimye kyafwainwa kechi mukekimona ne. (Sapwi. 11:4) Kange muleke bintu byabula kunema kwimujiila kimye ne kwimupwishisha ngovu ya kwingila bintu byanema ne. (Fili. 1:10) Inge kyakonsheka, salai kimye kya kubilamo bintu byanema kwa kubula ba kwimuvulañanya. Buulai bakwenu kuba’mba mubena kukebewa kimye kya kubilamo bintu byanema. Mwakonsha kuzhimya foni wenu ne kutanga byambo byo bemutumina nangwa kwisamba na bantu pa Intaneti kimye kikwabo. *
18-19. Ki ka kyakonsha kwimukwasha kubula kubwela panyuma inge mwafuukula kintu kyawama bino kwaikala mikiika?
18 Tai muchima pa byawama bikafumamo. Bintu bifuma mu byo mufuukulapo kuba biji nobe ku mpunzha ko mubena kuya inge muji pa lwendo. Inge kya kuba’mba mubena kukeba kufika ko mubena kuya, mukatwajijila kuya nangwatu inge mwatana’mba jishinda bejishinka, mukaya mu jishinda jikwabo. Kyo kimotu, inge twata muchima pa byawama bikafuma mu bintu byo twafuukula kuba, kechi tukabwela panyuma inge twapita mu makatazho nangwa twataana mikiika ne.—Nga. 6:9.
19 Kyakatazha bingi kufuukula bintu byawama, kabiji kufikizha byo twafuukulapo nako kwakatazha. Pano bino, na bukwasho bwa Yehoba, mwakonsha kwikala na maana ne bulume bukebewa pa kuba’mba mupwishe akya kyo mwatendekele.
LWIMBO 65 Tuyenga Kulutwe!
^ jifu. 5 Pa kuba’mba munengezhe bulongo kutanga Baibolo pa bunke bwenu, mwakonsha kwingijisha “Mutanchi wa Kutanga Baibolo” uji pa jw.org®.
^ jifu. 11 Nanchi mwilangulusha pa bintu bimo byo mwafuukwilepo kuba nyi? Nangwa nanchi bimye bimo kimukatazha kufuukula bulongo bya kuba ne kwibifikizha nyi? Uno mutwe usakwimukwasha kuyuka bya kuba na ano makatazho ne kupwisha akya kyo mwatendekele.
^ jifu. 17 Pa kuba’mba muyuke mashinda akwabo a kwingijishishamo kimye kyenu bulongo, monai kibaaba kya kuba’mba “Byo Mwakonsha Kwingijisha Bulongo Kimye Kyenu” mu Labainga! wa March-April 2014.
