1. Yaˬhoˉvaˬ ngaˬ hui htaꞈ aˬ htoꞈ ma te tcuh laˇ ve le?

 Nga hui a shaꞈ teꞈ hkʼaˇ hkʼaˬ hkʼe te tuˬ Yaˬhoˉvaˬ leuˆ yuˬ tcuh laˇ ve yoˬ. Ngaˬ hui daꞈ ve awˬ hkʼaˇ leuˆ tuˬ yawˇ kʼoˆ laˇ ve, leh ngaˬ hui yawˇ a loˍ cawˇ ve hkʼe dawˇ cheˆ htaˇ hkʼa dehꞈ te gʼa tuˬ yawˇ ga laˇ ve yoˬ. (Chiˇ mvuh ve 119:173) Liꞈ hpu hkʼaw beˆ maˍ laˇ ve htaꞈ ngaˬ hui cuˇ yiˍ cawˬ ve hkʼaw gʼaꞈ te ve kʼo, hkʼa dehꞈ dawˇ cehˆ gʼa tuˬ yoˬ.—Heˍbrehˇ 5:14.

2. Dawˇ cheˆ peuˬ hkʼawꞈ nawˉ ngaˬ hui aˬ htoꞈ ma gʼa hpuˇ ve le?

² Ngaˬ hui dawˇ cheˆ ve cawˇ˗oˬ ve htawˇ, dawˇ teh taˍ ve htaꞈ gʼaꞈ te tuˬ haˍ jaˇ tehꞈ dawˇ ve yoˬ. Tawˇ pa haˉ te kʼo, awˬ viˉ awˬ nyi yaˇ nehˬ Liꞈ hpu teˇ kʼoˆ hkʼa peu˗eˬ gʼaw tuˬ dawˇ teh taˍ ve htawˇ, yawˇ gʼaw ve hkʼaˬ nyiˇ shinˉ maˇ gaˬ sheˍ kaꞈ jehˇ ve yoˬ. Awˬ viˉ awˬ nyi yaˇ miˇ hkʼaˬ htaˆ kaꞈ gʼuˇ suhˍ peuˍ ve te tuˬ dawˇ teh taˍ ve htawˇ, yawˇ maˇ te sheˍ. Nyi haꞈ shaˉ paˍ awˬ moˍ hkʼaw caˉ daꞈ paˍ awˬ viˉ awˬ nyi htaꞈ awˬ gʼaˇ hkʼa dehꞈ piˇ tuˬ dawˇ teh taˍ ve laiˉ ha pa gaˬ˗oˬ ve htawˇ, maˇ te sheˍ. Awˬ lawn chi ve teˇ hpaˍ peun daꞈ ve htawˇ, teˇ hpaˍ hpaˍ shuˍ daꞈ ve yoˬ. Yawˇ hui dawˇ cheˆ˗oˬ ve htawˇ, dawˇ taˍ ve hkʼe te maˇ gʼa sheˍ. Kawˇrenˍhtuˆ Hkriꞈ yaˇ awˬ moˍ kaꞈ hkʼa shuˍ gʼa hpuˇ ve yoˬ. Yawˇ hui ve awˬ lawn ngaˬ hui htaꞈ hkʼaˬ hkʼe maˍ laˇ ve teˇ geh nyi sheˍ.

3. Kawˇrenˍhtuˆ venˇ hkʼaw ve awˬ viˉ awˬ nyi aˬ htoꞈ ma te tuˬ dawˇ cheˆ ve le? Aˬ htoꞈ ma hpehꞈ la ve le?

³ Yeˍsuˆ suh peuˬ hkʼawꞈ nawˉ aˬ laˬ hkʼe 55 hkʼawꞈ htaˇ, Kawˇrenˍhtuˆ Hkriꞈ yaˇ a yeˇ uiˍ ve teˇ ceuˬ gʼa dawˇ cheˆ ve yoˬ. Oˇ teˇ yanˇ, Yeˍruˆsaˍlehnˍ venˇ leh Yuˇdaꞈ mvuhˇ miˬ hkʼaw ve awˬ viˉ awˬ nyi haˍ gʼawˇ jaˇ leh tuꞈ jaˇ. Oˇ kaˬ lo ve awˬ viˉ awˬ nyi htaꞈ ga piˇ tuˬ Hkriꞈ yaˇ awˬ moˍ laiˉ kaˬ lo ve hpu shaw hpoˆ ve yoˬ. Kawˇrenˍhtuˆ venˇ  hkʼaw ve awˬ viˉ awˬ nyi piˇ gaˇ ve nyi ma cawˬ leh yawˇ hui kaꞈ awˬ viˉ awˬ nyi htaꞈ ga piˇ tuˬ dawˇ cheˆ ve yoˬ. Yawˇ hui hkʼaˬ hkʼe hpawˇ ga piˇ gʼa tuˬ Pawˇluꞈ htaꞈ na nyi ve yoˬ. Pawˇluꞈ Hkriꞈ yaˇ awˬ moˍ htaꞈ liꞈ bvuhꞈ piˇ leh hpu shaw gʼa taˍ ve htaꞈ haꞈ shaˉ tuˬ Tiˇtuˆ htaꞈ leuˆ yuˬ ve yoˬ. (1 Kawˇrenˍhtuˆ 16:1; 2 Kawˇrenˍhtuˆ 8:6) 2-3 ha pa peuˬ hkʼawꞈ nawˉ Kawˇrenˍhtuˆ Hkriꞈ yaˇ yawˇ hui te tuˬ kʼoˆ ve htaꞈ maˇ gʼaꞈ te ve Pawˇluꞈ shiˍ ve yoˬ. Yawˇ hui Hkriꞈ yaˇ awˬ moˍ teˇ hpaˍ geh Yeˍruˆsaˍlehnˍ venˇ lo hpu feu tuˬ shaw hpoˆ maˇ taˇ.—2 Kawˇrenˍhtuˆ 9:4, 5.

4. 2 Kawˇrenˍhtuˆ liꞈ 8:7, 10, 11 hkʼaw kʼoˆ taˍ ve hkʼe, Kawˇrenˍhtuˆ venˇ hkʼaw ve awˬ viˉ awˬ nyi aˬ htoꞈ ma te tuˬ Pawˇluꞈ awˬ gʼaˇ piˇ ve le?

⁴ Kawˇrenˍhtuˆ venˇ hkʼaw ve awˬ viˉ awˬ nyi hkʼa dehꞈ dawˇ cheˆ gʼa ve, yawˇ hui yonˍ ve leh piˇ gaˇ ve nyi ma cawˬ ve htaꞈ Pawˇluꞈ chiˇ mvuh piˇ ve yoˬ. Yaꞈ hkʼaˇ, yawˇ hui dawˇ teh taˍ ve htaꞈ te gʼa tuˬ Pawˇluꞈ awˬ gʼaˇ piˇ ve yoˬ. (2 Kawˇrenˍhtuˆ 8:7, 10, 11 gʼaw sheˍ.) Ka tiꞈ yeˬ ve Hkriꞈ yaˇ htawˇ dawˇ teh taˍ ve htaꞈ te gʼa tuˬ haˍ jaˇ ve tehꞈ awˬ lawn chi ngaˬ hui htaꞈ maˍ laˇ ve yoˬ.

5. Ngaˬ hui aˬ htoꞈ ma ve na hkawˇ htaꞈ hkʼawꞈ tuˬ le?

⁵ Kawˇrenˍhtuˆ venˇ hkʼaw ve awˬ viˉ awˬ nyi hkʼa shuˍ, dawˇ cheˆ taˍ ve htaꞈ te gʼa tuˬ haˍ jaˇ tehꞈ ngaˬ hui dawˇ ve yoˬ. Aˬ htoꞈ ma pa taw le? Ngaˬ hui maˇ biˇ ve chaw hpehꞈ ve pa taw, maˇ dawˇ maˇ gaˇ ve hkʼaw dawˇ haˍ tuˬ cawˬ la puiˉ ve yoˬ. (Cuˇ yiˍ piˇ ve 9:11; Roˉmaꞈ 7:18) Chi htaꞈ pa taw, ngaˬ hui maˇ dawˇ cheˆ sheˍ htaˇ aˬ htoꞈ ma awˉ lawˉ te ve, maˇ heˆ leh ngaˬ hui dawˇ cheˆ ve htaꞈ dawˇ nyi tuˬ aˬ htoꞈ ma awˬ hkʼaˇ cawˬ ve le? Ngaˬ hui awˉ lawˉ htaˇ dawˇ teh taˍ ve htaꞈ hkʼaˬ hkʼe te hkʼa dehꞈ te gʼa tuˬ le?

6. Ngaˬ hui teˇ pawˆ kʼawꞈ dawˇ cheˆ ve hkʼaˬ hkʼe htaˇ le?

⁶ Ngaˬ hui dawˇ cheˆ ve htaꞈ maˇ pa tuˬ a yeˇ uiˍ ve teˇ hpaˍ cawˬ ve yoˬ. Yaˬhoˉvaˬ leh a shu yawˇ ve awˬ ca htaꞈ ka tiꞈ yeˬ tuˬ dawˇ teh taˍ ve yoˬ. (Maꞈhtehˍ 16:24; 19:6) Yaꞈ hkʼaˇ, teˇ lawn lawn kʼo ngaˬ hui teˇ pawˆ gʼa kʼawꞈ dawˇ cheˆ ve yoˬ. Aˬ htoꞈ ma pa taw le? Awˬ tcuhˉ awˬ yanˇ pa kʼai ve pa taw yoˬ. Hkʼa dehꞈ dawˇ cheˆ gʼa tuˬ awˬ hkʼaˇ teˇ hpaˍ htaꞈ teˇ geh nyi sheˍ.

7. Ngaˬ hui aˬ htoꞈ ma gʼa tuˬ bon lawˬ cawˇ ve le? Aˬ htoꞈ ma pa taw le?

⁷ Cuˇ yiˍ gʼa tuˬ bon lawˬ sheˍ. Yaˬhoˉvaˬ Yaˍkoˆ htaꞈ dawˇ pawnˍ piˇ leh bvuhꞈ tcuh ve, ‘nawˬ hui teˇ gʼaˇ gʼaˇ cuˇ yiˍ maˇ biˇ ve kʼo, Gʼuiˬ sha geh lawˬ˗oꞈ. Gʼuiˬ sha lehˬ chaw hkʼa peu˗eˬ htaꞈ piˇ ve hkʼa shuˍ shuˍ, cuˇ yiˍ lawˬ ve chaw htaꞈ kaꞈ piˇ tuˬ yoˬ.’ (Yaˍkoˆ 1:5) Teˇ lawn lawn kʼo, ngaˬ hui “cuˇ yiˍ maˇ biˇ” ve pa taw lawˬ cawˇ ve yoˬ. Hkʼe te leh ngaˬ hui dawˇ cheˆ htaˇ leh dawˇ cheˆ peuˬ ve htaꞈ dawˇ nyi htaˇ, Yaˬhoˉvaˬ htaꞈ gʼaˇ va cawˇ ve yoˬ. Chi hkʼe te ve kʼo, cuˇ yiˍ cawˬ ve hkʼaw dawˇ cheˆ gʼa tuˬ yawˇ ga laˇ ve yoˬ.

8. Maˇ dawˇ cheˆ sheˍ htaˇ ngaˬ hui aˬ htoꞈ ma htaꞈ hpfuhˆ nyi cawˇ ve le?

⁸ Hkʼa dehꞈ hpfuhˆ nyi sheˍ. Liꞈ hpu hkʼaw hpfuhˆ nyi ve, Gʼuiˬ sha ve kanˉ hkʼaˇ geh laˬ ve liꞈ teˇ hpaˍ gʼaw ve, ngaˬ hui htaꞈ cawˇ ve hkʼaw beˆ maˍ laˇ gʼa ve chaw geh tawˇ yaw daꞈ cawˇ ve yoˬ. (Tawˇ naˉ ve 20:18) Kanˉ pa ve, yehˬ jiˆ ve, Yaˬhoˉvaˬ ve kanˉ caˉ leh te gʼa tuˬ liꞈ hkʼaˬ hkʼe ve henˇ leh a shu yawˇ awˬ to htaꞈ hu gʼa tuˬ maˇ gʼa dawˇ cheˆ sheˍ htaˇ, hpfuhˆ nyi ve awˬ hkʼaˇ oˇ ve teˇ hpaˍ htaꞈ awˉ lawˉ hkʼa dehꞈ dawˇ nyi cawˇ ve yoˬ.

9. A shu yawˇ awˬ to htaꞈ ka tiꞈ yeˬ ve lehˬ awˬ bon hkʼaˬ hkʼe cawˬ ve le?

⁹ Nawˬ te ve awˬ hkʼaˇ htaꞈ dawˇ nyi sheˍ. Ngaˬ hui te ve awˬ ceuˬ htaꞈ Yaˬhoˉvaˬ a yeˇ yuˬ ve yoˬ. (Tawˇ naˉ ve 16:2) Yawˇ lehˬ ngaˬ hui htaꞈ teˇ hpawˇ le le ka tiꞈ yeˬ tcuh gaˇ ve yoˬ. Chi htaꞈ pa taw, ngaˬ hui a shu yawˇ awˬ to htaꞈ ka tiꞈ gʼa yeˬ leh dawˇ cheˆ˗oˬ htaˇ shu htaꞈ kaꞈ ka tiꞈ gʼa yeˬ ve  yoˬ. Ngaˬ hui ka tiꞈ maˇ yeˬ ve kʼo, dawˇ teh taˍ ve htaꞈ te gʼa tuˬ haˍ jaˇ. Tawˇ pa haˉ te kʼo, yaˇ nehˬ teˇ gʼaˇ hkʼaˬ htaˆ kaꞈ gʼuˇ suhˍ peuˍ ve te tuˬ dawˇ cheˆ ve yoˬ. Yaꞈ hkʼaˇ, awˬ naˍ riˍ hkʼa biˇ te gʼa tuˬ haˍ jaˇ tehꞈ dawˇ leh Gʼuiˬ sha ve kanˉ te ve hkʼaw hkʼa dehꞈ maˇ ha lehˬ. Awˉ lawˉ htaˇ yawˇ hkʼaˬ htaˆ kaꞈ gʼuˇ suhˍ peuˍ ve te ve lehˬ Yaˬhoˉvaˬ nyi hkʼaˇ suh tcuh gaˇ ve pa taw yoˬ. Yaꞈ hkʼaˇ, awˬ tehˬ tehˬ kʼo awˬ pa awˬ e maˇ heˆ leh awˬ nu ve chaw nyi hkʼaˇ suh tcuh gaˇ ve pa taw te ve laˇ?

10. Pa tuˬ a yeˇ uiˍ jaˇ ve aˬ htoꞈ ma le?

¹⁰ Liꞈ hpu henˇ ve chaw teˇ gʼaˇ ve awˬ lawn htaꞈ dawˇ sheˍ. Yawˇ shuˉ maˇ dawˬ tuˬ dawˇ cheˆ ve yoˬ. Yaꞈ hkʼaˇ, hkʼaˬ nyi shinˉ maˇ gaˬ sheˍ kaꞈ yawˇ kʼawꞈ dawˬ ve yoˬ. Awˬ leh meuˇ htaˇ yawˇ maˇ dawˬ˗o. Yaˬhoˉvaˬ htaꞈ haꞈ leh nyi hkʼaˇ suh tuˬ te piˇ gaˇ ve pa taw, yawˇ maˇ daꞈ ve dawˇ hkʼaˇ htaꞈ tawˍ daꞈ gʼaˇ ve yoˬ.—Kawˇlawˇsehˇ 1:10; 3:23.

11. Aˬ htoꞈ ma te ngaˬ hui hkʼa dehꞈ dawˇ teh taˍ cawˇ ve le?

¹¹ Hkʼa dehꞈ dawˇ teh taˍ sheˍ. Nawˬ hkʼa dehꞈ dawˇ teh taˍ ve kʼo, dawˇ teh taˍ ve htaꞈ te gʼa tuˬ sha jaˇ. Tawˇ pa haˉ te kʼo, nawˬ Liꞈ hpu kʼawꞈ gʼaw maˇ tuˬ dawˇ teh taˍ ve yoˬ. Nawˬ awˬ hkʼaˇ hkʼa dehꞈ gu teh taˍ ve maˇ cawˬ ve kʼo, dawˇ teh taˍ ve htaꞈ te maˇ gʼa. * Nyi haꞈ shaˉ paˍ awˬ viˉ awˬ nyi htaꞈ awˬ gʼaˇ kʼawꞈ piˇ maˇ tuˬ dawˇ teh taˍ ve yoˬ. Yaꞈ hkʼaˇ, awˬ yanˇ ponˬ kʼai htaˇ yawˇ hui dawˇ teh taˍ ve htaꞈ maˇ gʼaꞈ te. Chi htaꞈ pa taw, yawˇ hui hkʼa dehꞈ te gʼa tuˬ na hkawˇ chi teˇ hpaˍ htaꞈ dawˇ nyi cawˇ ve yoˬ. “Awˬ viˉ awˬ nyi hkʼaˬ ve teˇ gʼaˇ geh awˬ gʼaˇ piˇ tuˬ awˬ yanˇ shawˍ teh˗oˬ laˇ? Yawˇ hui geh awˬ gʼaˇ piˇ tuˬ, awˬ yanˇ tinˍ piˇ˗oˬ ve laˇ?”

12. Ngaˬ hui aˬ htoꞈ ma te cawˇ ve le? Aˬ htoꞈ ma pa taw le?

¹² Awˬ tehˬ ve htaꞈ nyi sheˍ. Awˬ yanˇ, hpu, maˇ heˆ leh te gaˇ ve hkʼe te gʼa ve teˇ gʼaˇ kaꞈ maˇ cawˬ. Chi htaꞈ pa taw, awˬ tehˬ ve htaꞈ nyi leh awˬ hkʼaˇ ca sheˍ. Te gʼa tuˬ awˬ hkʼaˇ maˇ cawˬ ve htaꞈ shiˍ htaˇ, nawˬ teˇ pawˆ gʼa kʼawꞈ dawˇ cheˆ ve yoˬ. (Cuˇ yiˍ piˇ ve 3:6) Tawˇ pa haˉ te kʼo, dawˇ cheˆ˗oˬ ve htaꞈ dawˇ nyi˗oˬ htaˇ, loˍ ve awˬ ceuˬ pa˗oˬ htaˇ, dawˇ teh taˍ ve htaꞈ te gʼa tuˬ yonˍ gʼa ve yoˬ. Dawˇ cheˆ ve htaꞈ te gʼa tuˬ 5 hkʼaˇ htaꞈ teˇ geh nyi sheˍ.

13. Nawˬ dawˇ taˍ ve htaꞈ te gʼa tuˬ aˬ htoꞈ ma lawˬ cawˇ ve le?

¹³ Te gʼa tuˬ bon lawˬ sheˍ. ‘Gʼuiˬ sha nyi ma cawˇ ve htaꞈ nawˬ te gaˇ ve nyi ma cawˬ’ ve kʼo, nawˬ dawˇ cheˆ ve htaꞈ te gʼa tuˬ yawˇ ga laˇ ve yoˬ. (Hpiˇliˇpiˆ 2:13) Nawˬ loˍ ve awˬ gʼaˇ cawˬ tuˬ, Yaˬhoˉvaˬ geh daꞈ kehˬ ve awˬ ha hpu ga laˇ tuˬ bon lawˬ sheˍ. Nawˬ bon lawˬ ve htaꞈ Gʼuiˬ sha maˇ hkʼawꞈ laˇ sheˍ ve htawˇ caˉ leh lawˬ sheˍ. Yeˍsuˆ kʼoˆ ve, daꞈ kehˬ ve awˬ hpu geh “lawˬ loˬ. Lawˬ kʼo gʼa tuˬ yoˬ.”—Luˉkaꞈ 11:9, 13.

14. Tawˇ naˉ ve liꞈ 21:5 hkʼaw ve awˬ liˇ awˬ hkʼaˇ nawˬ dawˇ teh taˍ ve htaꞈ te gʼa tuˬ aˬ htoꞈ ma ga laˇ ve le?

¹⁴ Awˬ hkʼaˇ gu sheˍ. (Tawˇ naˉ ve 21:5 gʼaw sheˍ.) Dawˇ taˍ ve hkʼe te gʼa tuˬ nawˬ awˬ hkʼaˇ gu teh leh gʼaꞈ te cawˇ ve yoˬ. Chi ve hkʼa shuˍ shuˍ nawˬ aˬ htoꞈ ma te tuˬ dawˇ teh taˍ htaˇ, te gʼa tuˬ gʼa bvuhꞈ tawˆ la ve yoˬ. Kanˉ uiˍ ve htaꞈ shawˍ teh puiˉ tuˬ awˬ hkʼaˇ gu sheˍ. Chi hkʼe te ve kʼo, nawˬ co ha hpawˇ uiˍ la mvuh la ve hkʼa tawˍ lehˆ mawˬ tuˬ yoˬ. Pawˇluꞈ Kawˇrenˍhtuˆ Hkriꞈ yaˇ htaꞈ kʼoˆ piˇ ve, yawˇ gaˬ la htaˇ hehꞈ teˇ pawˆ tiˉ shaw hpoˆ ve aꞈ kehˉ “teˇ shinˉ le le awˬ hkʼaw lo awˉ lawˉ teˇ nyi htaˇ” hpu shaw hpoˆ tuˬ awˬ hkʼaˇ maˍ piˇ ve yoˬ. (1 Kawˇrenˍhtuˆ 16:2) Kanˉ uiˍ ve htaꞈ shawˍ teh puiˉ ve kʼo ngaˬ hui te gʼa leh awˬ vuiˬ maˇ hehnˇ.

15. Ngaˬ hui awˬ hkʼaˇ gu teh˗oˬ ve kʼo hkʼaˬ hkʼe te cawˇ ve le?

¹⁵ Awˬ hkʼaˇ hkʼa dehꞈ gu teh leh bvuhꞈ tawˆ la ve kʼo, gʼaꞈ te tuˬ sha ve yoˬ. (1 Kawˇrenˍhtuˆ 14:40)  Nyi haꞈ shaˉ paˍ awˬ moˍ hkʼaw caˉ daꞈ paˍ, nyi haꞈ shaˉ paˍ teˇ gʼaˇ htaꞈ dawˇ cheˆ ve bvuhꞈ keu tcuh ve yoˬ. A shu te tuˬ ve leh awˬ lawn oˇ ve hkʼaˬ htaˆ peuˬ tuˬ bvuhꞈ tcuh ve yoˬ. Chi hkʼe te ve kʼo nyi haꞈ shaˉ paˍ gʼaꞈ te sha ve yoˬ. (1 Kawˇrenˍhtuˆ 9:26) Nawˬ kaꞈ teˇ nyi le le chi hkʼe te gʼa ve yoˬ. Nawˬ teˇ nyi le le te tuˬ ve awˬ ceuˬ htaꞈ bvuhꞈ leh aˬ htoꞈ ma awˉ lawˉ te tuˬ shawˍ teh sheˍ. Chi hkʼe te ve lehˬ dawˇ teh taˍ ve htaꞈ te gʼa ve ceh maˇ heˆ. Yaꞈ hkʼaˇ, nawˬ awˬ vuiˬ gʼa maˇ leh dawˇ taˍ ve aꞈ kehˉ te peuˬ vaiˇ ve htaꞈ gʼa mawˬ tuˬ yoˬ.

16. Dawˇ teh taˍ ve htaꞈ hkʼa dehꞈ te gʼa tuˬ a yeˇ uiˍ jaˇ ve aˬ htoꞈ ma le? Roˉmaꞈ liꞈ 12:11 hkʼaw awˬ gʼaˇ hkʼaˬ hkʼe peꞈ laˇ ve le?

¹⁶ Coˇ caˇ sheˍ. Awˬ hkʼaˇ gu teh leh dawˇ teh taˍ ve htaꞈ gʼaꞈ te gʼa tuˬ gʼa coˇ caˇ cawˇ ve yoˬ. (Roˉmaꞈ 12:11 gʼaw sheˍ.) Daꞈ ve maˍ piˇ shehˍ hpaˇ hpehꞈ tuˬ “awˬ gʼaˇ piˇ” leh “yeˬ chehˇ˗oˆ” tehꞈ Pawˇluꞈ Tiˆmoˉseˍ htaꞈ kʼoˆ piˇ ve yoˬ. Pawˇluꞈ beˆ maˍ piˇ ve chi Hkriꞈ yaˇ kaꞈ yehˇ gʼa ve yoˬ.—1 Tiˆmoˉseˍ 4:13, 16.

17. Eˇfeˇsuꞈ liꞈ 5:15, 16 hkʼaw ngaˬ hui awˬ yanˇ shawˍ teh taˍ ve htaꞈ te gʼa tuˬ hkʼaˬ hkʼe ga laˇ ve le?

¹⁷ Awˬ yanˇ hkʼa dehꞈ shawˍ teh taˍ sheˍ. (Eˇfeˇsuꞈ 5:15, 16 gʼaw sheˍ.) Awˬ yanˇ tinˍ taˍ ve htaꞈ taˇ pa. Awˬ yanˇ oˇ ve maˇ gaˬ la sheˍ ve pa taw, awˬ yanˇ daꞈ daꞈ ve htaꞈ taˇ law. (Cuˇ yiˍ piˇ ve 11:4) A yeˇ maˇ uiˍ ve awˬ ceuˬ ngaˬ hui ve awˬ gʼaˇ leh awˬ yanˇ htaꞈ taˇ shonˇ tcuh. (Hpiˇliˇpiˆ 1:10) Te gʼa ve kʼo nawˬ ve awˬ yanˇ htaꞈ maˇ gʼa shoꞈ shaꞈ laˇ tuˬ leuˆ sheˍ. Nawˬ dawˇ nyi tuˬ awˬ yanˇ cawˬ gaˇ ve shu htaꞈ kʼoˆ piˇ sheˍ. Tawˇ yaw tuˬ awˬ hkʼeun hoˆ ve, maˇ heˆ leh In˗ten˗neꞈ hkʼaw maˇ nyi. *

18-19. Nawˬ dawˇ teh taˍ ve htaꞈ hkʼa dehꞈ te gʼa tuˬ maˇ sha ve htawˇ te gʼa tuˬ aˬ htoꞈ ma ga laˇ ve le?

¹⁸ Awˬ bon gʼa tuˬ htaꞈ dawˇ nyi sheˍ. Yaꞈ kʼaw toˇ ve hkʼa shuˍ, nawˬ awˬ ti lo gaˬ gaˇ ve kʼo, yaꞈ kʼaw awˬ nu ve teˇ caˆ htaꞈ gʼa kʼawꞈ kʼai ve htawˇ, nawˬ caˉ leh kʼai tuˬ yoˬ. Chi ve hkʼa shuˍ ngaˬ hui gʼa tuˬ ve awˬ bon htaꞈ dawˇ nyi htaˇ, teˇ ceuˬ ceuˬ kʼo ngaˬ hui dawˇ taˍ ve hkʼe maˇ hpehꞈ la ve htawˇ te tcuhˉ taˍ tuˬ yoˬ.—Gaˍlaˍtiˆ 6:9.

¹⁹ Cawˇ ve htaꞈ dawˇ cheˆ gʼa tuˬ leh dawˇ teh taˍ ve htaꞈ gʼaꞈ te tuˬ haˍ jaˇ. Yaꞈ hkʼaˇ, ngaˬ hui dawˇ teh taˍ ve htaꞈ hkʼa dehꞈ te gʼa tuˬ, Yaˬhoˉvaˬ cuˇ yiˍ leh awˬ gʼaˇ peꞈ laˇ tuˬ yoˬ.