1. Jehovha anotitendera kuti tiitenyi?

JEHOVHA anotitendera kuti tisane manera otinoda kupona. Iyena anotijijisa manera atinodikana kusana zvaushoni. Kudari tikatema zvivaringo zvinomudakajisa, iyena anozotibesera kuti tibudirire. (Nduyo 119:173) Ngokudaro, tikashandisa mbhangiro jatinowana mu Bhaibheri, tinozokwanisa kutema zvivaringo zvaushoni.—Vaheberi 5:14.

2. Ngocapi cineso cingavepo pasure po kutema civaringo?

² Asi, pikija tikatema civaringo caushoni, tingava no cineso co kuda kupejisa zvotatangeya. Vonanyi basi muezaniso munganani: Imwe hama iri mujaha yakatema civaringo co kuda kuverenga Bhaibheri rese. Asi wakakwanisa kuzviita pa sumana jakati kuti, perapo wakaima. Imwe hambzaji yatema civaringo co kuda kushanda inga piyona wo nguva jese, asi inonanga kuti ndinozozviita mweji unozari. Dare ro vakuru rinotema civaringo co kuda kuhavisa hama jo ungano, asi panotopera mweji jakati kuti vacikazivi kuita ciri cese. Zviro zvese zvanangwari zvakasiyana, asi pano ciro cimwe cakafanana. Avazivi kushandisa zvivaringo zvovakatema. Muzana ro kutanga ro makore, Makristu aigara ku dhorobha ro Korinto, ainga no cineso cakafanana. Ngativone kuti tingajijenyi ngo muezaniso wavo.

3. Hama jo ungano yo Korinto jakatema civaringo capi, asi zvicinyi zvakaitika?

³ Mu gore ro 55 N.V.Y., hama jo ungano yo Korinto jakatema civaringo cinosisira maningi. Ivona vakaashira masoko o kuti hama javo jo Jerusarema no Judheya, jainga jecitambujika. Cimwenizve, vakazwa kuti hama jo ungano jimweni jainga jeciita muhengo kuti jivabesere. Ngo ndava yo kunaka kwavo mwoyo pomwe no kukova, vakatema civaringo co kuda kuita muhengo kuti vabesere. Ngo iyo ndava, vakavhunjisa mupostori Pauro  manera ovangabesera. Pauro wakatumira ndhungamiro ku ungano iyi zve wakatuma Tito kuti abesere pa kuita muhengo. (1 VaKorinto 16:1; 2 VaKorinto 8:6) No papera mweji munganani, Pauro wakazwa masoko o kuti hama jo ungano iya, jainga jasiya kuita muhengo. Ngo iyo ndava, zvaivoneka inga kuti apacaingazve no nguva kuti vatumire muhengo wiya ku Jerusarema pamwepo no ungano jimweni.—2 VaKorinto 9:4, 5.

4. Inga zvatinovona pana 2 VaKorinto 8:7, 10, 11, Pauro wakavangisa hama jo Korinto kuti jiitenyi?

⁴ Hama jo ungano yo Korinto jainga jatema civaringo caushoni maningi. Ngo iyo ndava, Pauro wakavasimba ngo rutendo hwavo wakavanga pomwe no kukova kwavo. Asi, Pauro wakavavangisa kuti vapejise zvovainga vatanga. (Verenganyi 2 VaKorinto 8:7, 10, 11, Shanduro yeNyika Itsva.) Zvakaitikari na ivona, zvinovonesa kamare kuti Makristu akagondeka angatonesehwa kushandisa civaringo covapera kutema.

5. Ngojapi muvhunjo jaticada kudavira pa musoro uno?

⁵ Kudari inga hama jo ungano yo Korinto, tinganesehwavo kukwanirisa civaringo cotapera kutema. Ngenyi? Ngokuti atizivi kukwana. Ngo iyo ndava, tinopeamira pa kusiya zvese kuti tiite pa nguva imweni. Kangaije zviri zvese zvingatiphinga kuti titame kuita mukuzwirana no civaringo cotakatema. (Mucumaeri 9:11; VaRoma 7:18) Waro, tinodikana kuitenyi tikada kucinja civaringo cotakatema? Zvicinyi zvinozotibesera kuti tipejise zvotakatanga kuita? Ngatende tivone.

6. Ngenyi zvivaringo zvimweni zvingacinja?

⁶ Kuno zvivaringo zvimweni zvaticikadikani kucinja. Inga muezaniso, atidi kusiya civaringo catakatema co kushandira Jehovha. Tinodazve kuva takagondeka kuna wiya wotakacadha naye. (Mateu 16:24; 19:6) Asi kuno zvivaringo zvatingacinja. Ngenyi tingazvicinja? Ngokuti mugariro jinocinja. Zvicinyi zvingatibesera kuti titeme zvivaringo zvaushoni?

7. Zvicinyi zvatinodikana kukumbira kuna Mwari zve ngenyi?

⁷ Kumbiranyi uzivi. Jehovha wakafemera Jakobo kuti atare kudari: “Ndiani wenyu anotama uzivi, ngaakumbire Mwari, wiya anopa vese ngo kuzara.” (Jakobo 1:5) Akuna mundhu anokhombija kuva no uzivi pa zviro zvese. Ngokudaro, mukada kutema kana kucinja civaringo ciri cese, thembanyi Jehovha. Iyena anomubesera kuti musane zvaushoni.

8. Mucito matema zvivaringo, munodikana kuitenyi?

⁸ Nasanyi kupsakisisa. Verenganyi Bhaibheri, verenganyi mabhuku o sangano ra Jehovha no kubhuya no mundhu wamunothemba. (Mazwi Akangwara 20:18) Mucito matema zvivaringo zvakadari inga kucinja basa, kuthuta no kuita kurusu inomubesera kuti muenderere mberi mecishandira Jehovha, munodikana kupsakisisa.

9. Pamunotema civaringo, ngenyi munodikana kunasa kungwarira?

⁹ Vonanyi kuti ngenyi munoda kuzviita. Jehovha aaneseki basi ngo zvivaringo zvatinotema, asi anonesekavo ngo thangwe rinotiitisa kuti titeme zvivaringozvo. (Mazwi Akangwara 16:2) Iyena anoda kuti tive takagondeka pa zviro zvese. Ngokudaro, pamunotema zvivaringo, nasanyi kungwarira. Jivhunjisenyi kudari: Ngenyi ndiri kutema civaringo ici? Tikatama kungwarira, tinozonesehwa pa kukwanirisa zviya zvataperaya kutema. Inga muezaniso, kangaije hama iri mujaha ingatema civaringo co kuva piyona wo nguva jese. Asi pakufamba ko nguva, angava no cineso co kukwanirisa maora, zvoita kuti asuruvare. Kangaije zvakaita kuti mujaha uu ave piyona, ngo zvokuti iyena waida kudakajisa Jehovha. Asi zvingaitazve  kuti iyena waida maningi kudakajisa majibabake no vamweni vaanodakarira.

10. Zvicinyi zvingabesera mundhu kuti acinje?

¹⁰ Rangariranyi basi mujiji wo Bhaibheri anoda kutema civaringo co kusiya kubhema. Pakutanga, iyena anokwanisa padoko. Anopeja sumana kana sumana mbiri acikabhemi. Asi perapo, anohwirirazve kobhema. Majhi njiku imweni ozokwanisa kusiya kamare kubhema! Zvakabesera mujiji uu wo Bhaibheri kuti asiye kubhema, ngo zvokuti iyena waida Jehovha pomwe waida kumudakajisa.—VaKolosi 1:10; 3:23.

11. Ngenyi tinodikana kugaja zvatinodikana kuita?

¹¹ Gajanyi zvamunoda kuita. Mukagaja zvamunoda kuita, azvizonesi kupejisa zvomakatanga kuita. Inga muezaniso, kangaije makatema civaringo co kuverenga Bhaibheri njiku jese. Mukatama kuva no urongwa, kangaije amuzokwanisi kupeja kuriverenga. * Muezaniso umweni: Vakuru vo imwe ungano, vakatema civaringo co kuhavisa hama jo pa ungano pavo. Asi, pakufamba ko nguva, ivona avazviiti. Zvingavabesera kuti vakwanise kuzviita, i kujiita muvhunjo iji: “Taakujiziva hama kana hambzaji jinoda kuhaviswa here? Tagaja njiku no nguva kuti tipinde kovahavisa here?”

12. Munodikana kuvona cinyi zve ngenyi?

¹² Vonanyi zvamuri. Akuna mundhu ano nguva no simba ro kuita zvese zvaanoda. Ngokudaro, vonanyi zvamuri zve ivanyi makaezanana. Mukavona kuti matema civaringo comucikakwanisi kuita, kangaije zviri nani kucinja. (Mucumaeri 3:6) Nganditi mapera kucinja civaringo comakaita, motorangarira kuti muri kuda kuita mukuzwirana no zvamasungaro, zvicinyi zvingamubesera kuti mupejise zvomakatanga kuita? Vonanyi zviro zvishanu zvingamubesera.

13. Mungawanisa kudini simba ro kuda kushandisa civaringo comatema?

¹³ Kumbiranyi simba. Mwari angamupa “simba ro kuda no kuita” zvomapera kusunga. (VaFilipi 2:13) Ngokudaro, kumbiranyi mujimu mucena wa Jehovha kuti umupe simba ramunoda. Kudari mukavona kuti mukumbiro wenyu uri kunonoka kudavihwa, mucadoremba, kumbiranyi basi. Jesu wakananga kudari: “Kumbiranyi, [mujimu mucena], munozopuwa.”—Luka 11:9, 13.

14. Kuitisa kudini Mazwi Akangwara 21:5, ingamubesera kuti mushandise zvomasunga kuita?

¹⁴ Itanyi urongwa. (Verenganyi Mazwi Akangwara 21:5.) Kuti mupejise ciro comakatanga, munodikana kuita urongwa. Cimwenizve, munodikana kushanda mukuzwirana no urongwa womaitaro. Ngo zvinoitikavo pa zvivaringo zvamunotema. Itanyi rista yo zviro zvese zvamunoda kuita kuti muzvishandise mu upenyu hwenyu. Mukavona kuti pano basa riri kunesa kuita, ejanyi kuripaura kuti ritame kunesa. Mukadaro, zvinozoreruka kuripeja. Pauro wakavangisa hama jo Korinto kuti jivige mare “njiku jese jokutanga jo sumana” kuciripi kuimira Pauro agume kuti vatange kuita muhengo. (1 VaKorinto 16:2) Kupaura basa renyu zvingamubesera kuti murerukihwe.

15. Mapera kuita urongwa, zvicinyi zvamungaita?

¹⁵ Itanyi ngo kutara urongwa hwenyu. Izvi zvinobesera kuti mushandise zvivaringo zvenyu. (1 VaKorinto 14:40) Inga muezaniso, dare ro vakuru rinogaja umwe mukuru kuti atarire zvivaringo zvinotemwa ngo dare. Mukuru anongari agajwa anotarira mundhu anonga asanwa kuti aite zviri zvese pa njiku jakatemwa kuti zvipere. Vakuru pavanoteveja  urongwa uwu, vanozokwanisa ushoni kuita mukuzwirana no zvivaringo zvovatema. (1 VaKorinto 9:26) Ejanyi kuita zvakafanana pamunoronga kuita zviro zvenyu. Inga muezaniso, mungaita rista yo zviro zvamunoda kuita pa njiku yenyu. Taranyi manera amunoda kuzviita. Izvi zvingamubesera kuit mupejise zvomakatanga zve zvinomubesera kuti muite zvizinji pa nguva shomani.

16. Ngocapi ciro cinosisira maningi catingaita kuti tishandise civaringo cotatema? Kuitisa kudini VaRoma 12:11, inobesera zvondhozvo?

¹⁶ Vangisiranyi. Kuteveja urongwa wo makaita no kupejisa zvomakatanga, zvinoda kuvangisira. (Verenganyi VaRoma 12:11.) Kuti Timoti ave mujijisi waushoni Pauro wakamuvhunja kudari: “Batai hako mabuku, jijai” zve “vangai ucikarembi.” Tingashandisa mbhangiro ya Pauro pa zviro zvese zvatinoda kuita pa kushandira kwedu Jehovha.—1 Timoti 4:13, 16.

17. Kuitisa kudini VaEfeso 5:15, 16, ingatibesera kuti tishandise zviya zvotaronga kuita?

¹⁷ Nasanyi kushandisa nguva yenyu. (Verenganyi VaEfeso 5:15, 16.) Gajanyi njiku no nguva kuti mushandise zvamunonga masunga kuita. Mucadopsaka kuti dengani munozowana nguva kwayo yo kuzviita, ngokuti amuzoiwani. (Mucumaeri 11:4) Mucadotendera kuti zviro zvicikasisiri zvimutorere nguva no simba romaida kushandisa pa kuita zviro zvinosisira. (VaFilipi 1:10) Kudari zvecikwanisika, itanyi zviya zvinosisira maningi pa nguva yamunovona kuti amuphingaijwi. Zvecikwanisika weya, vhunjanyi vamweni kuti pa nguva yakati, amudi kuphingaijwa. Mungatojima foni yenyu kana kutovona mesajhi jenyu jo mu interneti pa nguva imweni. *

18-19. Zvicinyi zvingamubesera kuti mutame kuremba pa kuda kwenyu kukwanirisa civaringo comakatema pikija mukasongana no zvineso?

¹⁸ Rangariranyi ngo pamusoro po muviyo jaushoni. Muviyo wo civaringo cotakatema, wakadari inga kuguma kwatinoda kwenda. Kudari munoda kuguma kwamunoda, munodikana kwenderera mberi meciita hwendo hwenyu pikija gwanja ramunoda kwenda naro parinonga rakafungwa zve moenda ngo gwanja rimweni. Mukufananavo, kudari mukabatisisa muviyo wo zvivaringo zvenyu, amuzorembi pikija mukasongana no zvineso kana mukatodikana kuzvicinja.—VaGalàsia 6:9.

¹⁹ Kutema zvivaringo zvaushoni no kuzvishandisa azvizivi kureruka. Asi, ngo besero ra Jehovha, mungava no uzivi pomwe no simba ro kupejisa zviya zvomakatanga.