1. Hadia nitehegö Yehowa khöda?

ITEHEGÖ khöda Yehowa ba wotatugöi samösa lala waʼaurida. Hizaʼi, ifahaʼö göi ita hewisa lala ba wangai angetula si sökhi. Na tahalö gangetula si möi fangomusoiʼö dödö Yehowa, itolo ita enaʼö mofozu. (Zin. 119:173) Na lö tebulö ita ba woloʼö mene-mene si sökhi si no tafahaʼö yaʼita moroi ba Zura Niʼamoniʼö, itugu sökhi gangetula nihalöda.​—Heb. 5:14.

2. Hadia manö zi tobali daha-tahada me no aefa tahalö gangetula?

² Hewaʼae no tahalö gangetula si sökhi, tola manö abua khöda ba wangasiwai hadia zi no tabörögö. Nehegö ösa duma-duma andre: So samösa dalifusöda ono matua sangai angetula ba wombaso fefu nösi Zura Niʼamoniʼö. Lö iböhöli wamalua daʼö mato hauga migu, hizaʼi ba gafuriata ibato. Ihalö gangetula samösa dalifusöda ira alawe enaʼö tobali ia perintis biasa, hizaʼi itaha-taha ba wamalua yaʼia. Ba zi sambua mbanua niha Keriso, fao dödö ndra satua sokubaloi enaʼö oya lafalua wokubaloi, hizaʼi hauga waŵa aefa daʼö lö manö nasa nifaluara. No faböʼö-böʼö zalua andrö, hizaʼi so waʼafagölönia. Lö mufalua fefu gangetula si no muhalö. Daʼö zalua ba niha Keriso ba abad siföföna ba Korindro. Datatutunö hadia wamahaʼö si tola tahalö moroi khöra.

3. Hadia gangetula nihalö niha Gorindro, hizaʼi hadia zalua?

³ Te me döfi 55 M, lahalö gangetula sebua ira niha Keriso si so ba Gorindro. Larongo wa tosasa ba numana ndra talifusö si so ba Yeruzalema hegöi ba Yudea. Larongo göi wa no laʼowuloi gefe banua niha Keriso tanö böʼö ba wanolo yaʼira. Börö me sökhi lagu niha Gorindro ba oböwö ira, lahalö gangetula ba wanolo yaʼira. Lasofu khö zinenge sotöi Faulo, hewisa lalara ba wameʼe fanolo. Ibeʼe khöra wanuturu lala Faulo ba ifatenge Dito ba wangowuloi kefe. (1 Kor. 16:1; 2 Kor. 8:6) Hizaʼi, hauga waŵa aefa daʼö, irongo Faulo wa lö  manö nasa niʼowuloira dolo-tolo. Na lö laʼanemaiʼö lafalua daʼö, lö teʼowuloi dolo-tolo nibeʼera ba ginötö si tefaudu ba tebai muʼohe daʼö ba Yeruzalema, fao ba dolo-tolo nibeʼe mbanua niha Keriso tanö böʼö.​—2 Kor. 9:4, 5.

4. Simane nitutunö ba 2 Korindro 8:7, 10, 11, hadia wamarou dödö nibeʼe Waulo ba niha Gorindro?

⁴ No lahalö gangetula si sökhi ira niha Gorindro, ba isuno ira Faulo börö me laʼokhögö wamati saro ba omasi labeʼe dolo-tolo si fao faʼaohagölö. Hizaʼi, moguna nasa ifarou dödöra enaʼö laʼasiwai hadia zi no labörögö. (Baso 2 Korindro 8:7, 10, 11.) Moroi ba duma-duma salua khöra, tola tafahaʼö ita wa niha Keriso si lö faröi manö tola abua khöra ba wamalua angetula si no lahalö.

5. Hadia manö wanofu-nofu nitutunöda?

⁵ Simane niha Gorindro, tola manö abua khöda ba wamalua angetula si no tahalö. Börö me lö moʼahonoa ita, tola manö taradö-radö wamalua yaʼia. Mazui, so zalua si lö tadöna-döna irege tebai tafalua gangetula si no tahalö. (Zango. 9:11; Rom. 7:18) Hewisa enaʼö tola tahalö gangetula si sökhi? Na moguna mufareso mangawuli gangetula si no tahalö, hewisa lalada ba wamalua yaʼia? Ba hewisa enaʼö mofozu ita ba wangasiwai hadia zi no tabörögö?

6. Hawaʼara moguna tafaudugö gangetula nihalöda?

⁶ So ösa gangetula sebua si tebai tabulöʼö. Duma-dumania, me no tahalö gangetula ba wamosumange Yehowa, tebai tabulöʼö ba wamalua daʼö. Tahalö göi gangetula enaʼö lö faröi ita khö woʼomoda. (Mat. 16:24; 19:6) Hizaʼi, itaria so gangetula sinangea tafaudugö börö me tebulö zalua ba waʼaurida. Hadia zanolo yaʼita ba wangai angetula sabölö sökhi?

7. Hadia zinangea taʼangandröi, ba hadia mbörö?

⁷ Angandrö enaʼö so khöu waʼatua-tua. Yehowa zameʼe fanuturu lala khö Yakobo ba wanura, ”Na so zambö faʼatua-tua, böi miböhöli wangandrö khö Lowalangi, ba hasambalö mitema, börö me fahöna wameʼe Lowalangi.” (Yak. 1:5) Na so zalua, sindruhu sa wa moguna taʼandrö ’waʼatua-tua’. Andrö, odaligö Yehowa na öhalö gangetula hegöi na öfuli öfareso mangawuli gangetula daʼö. Hasambalö itolo ndraʼugö Yehowa ba wangai angetula si fao faʼatua-tua.

8. Fatua lö öhalö gangetula, hezo so tola ösöndra wanuturu lala?

⁸ Forege wangalui fanuturu lala. Fareso Daromali Lowalangi ba baso publikasi moroi ba organisasi Yehowa. Fahuhuo ba niha si tola mameʼe khömö mene-mene si sökhi. (Gamd. 20:18) Moguna öfalua daʼö, na öhalö gangetula ba wombulöʼö lala halöwö nifaluamö, findra ba mbanua böʼö, mazui ba wamili sekola si tola manolo yaʼugö ba wombönökhi soguna khömö ba lö tebulö öfosumange Yehowa.

9. Hadia mbuania na tatörö zindruhu ba khöda samösa?

⁹ Fareso hadia mbörö wa öhalö gangetula daʼö. Iʼameʼegö tödö sibai Yehowa hadia mbörö wa tahalö zi sambua angetula. (Gamd. 16:2) Omasi ia na tatörö zindruhu ba ngawalö hadia ia. Börö daʼö, na edöna tahalö gangetula, moguna tatörö zindruhu ba khöda samösa hegöi ba niha böʼö sanandrösa ba gangetula nihalöda. Duma-dumania, te ihalö gangetula zi samösa dalifusöda ono matua enaʼö tobali ia perintis biasa. Hizaʼi, me no ara numalö ginötö ibörögö abua khönia ba wombönökhi jam dinasnia. Ambö göi iʼokhögö waʼowua-wua dödö. Ba wamobörö, te iwaʼö wa tobali ia perintis enaʼö tola iʼomusoiʼö dödö Yehowa.  Hizaʼi, tola manö ilau merintis börö me omasi ia iʼomusoiʼö dödö ndra satuania mazui niha somasi ia.

10. Hadia zi tola manolo yaʼita ba wamalua fombulöʼö?

¹⁰ Angeragö duma-duma daʼa. So samösa niha nifahaʼö ba Zura Niʼamoniʼö sangai angetula enaʼö iböhöli woroko. Ba wamobörö, iforege sibai wamalua daʼö. Te tola itaha dödönia lö moroko mato samigu mazui dombua migu, aefa daʼö ifuli zui ilau moroko. Hizaʼi ba gafuriata, börö me iʼomasiʼö Yehowa ba omasi ia ba wangomusoiʼö dödö Yehowa, tola mofozu ia ba iböhöli woroko.​—Kol. 1:10; 3:23.

11. Hana wa moguna ötatugöi hadia gohitö dödömö?

¹¹ Haogö tatugöi gohitö dödömö. Na no ötatugöi hadia gohitö dödömö, aoha khömö ba wogamö yaʼia. Duma-dumania, te öhalö gangetula enaʼö asese öbaso Zura Niʼamoniʼö. Hizaʼi, na lö mutatugöimö hadia gohitö dödömö wa öfalua daʼö, tola manö abua khömö ba wamalua yaʼia. * Mazui, lahalö gangetula ira satua sokubaloi ba mbanua niha Keriso enaʼö asese lafalua wokubaloi. Hizaʼi, me no numalö ginötö lö manö mufaluara gangetulara andrö. Enaʼö mofozu, moguna laʼangeragö wanofu-nofu daʼa, ”Hadia no mahaogö wanura döi-töi ndra talifusö sinangea makubaloi? Hadia no matatugöi ginötö hawaʼara möiga khöra?”

12. Hadia manö zinangea öfalua, ba hadia mbörö?

¹² Okhögö wangera-ngera si sökhi. Börö me no fagambö-gambö ginötö, faʼabölö hegöi okhötada, tola manö tebai tafalua fefu zomasi ita. Andrö wa moguna taʼokhögö wangera-ngera si sökhi. Itaria, tola manö öbulöʼö gangetula nihalömö börö me öʼila wa tebai öfalua ia. (Zango. 3:6) Tola manö no öfareso mangawuli gangetula nihalömö, öfaudugö ba öʼila wa tola öfalua ia. Iadaʼa, hadia zi tola manolo yaʼugö ba wangasiwai hadia zi no öbörögö? Nehegö zi lima ngawalö andre.

13. Hewisa enaʼö so khöu waʼabölö ba wamalua angetula si no öhalö?

¹³ Angandrö enaʼö so khöu waʼabölö. Tola ibeʼe khöu Lowalangi ’waʼabölö ba wamalua’ angetula si no öhalö. (Fil. 2:13) Moguna öʼandrö geheha niʼamoniʼö enaʼö so khöu waʼabölö ba wamalua yaʼia. Böi böhöli wangandrö hewaʼae na lö nasa mutemamö wanema linia. Imane Yesu, ”Böi miböhöli wangandrö [eheha niʼamoniʼö] ba tebeʼe khömi.”​—Luk. 11:9, 13.

14. Hewisa goi-goi si so ba Gamaedola 21:5 tobali fanolomö ba wamalua angetula si no öhalö?

¹⁴ Haogö angeragö. (Baso Gamaedola 21:5.) Enaʼö tola öʼasiwai zi sambua halöwö, moguna öhaogö woʼangeragö yaʼia. Ba falua hadia zi no öʼera-era andrö. Simanö göi na öhalö gangetula, moguna ösura hadia manö zinangea öfalua ba wamalua angetulamö andrö. Na so gangetula sabua, tola öʼola-olaini ia ba lala si tola öfalua. Na öfalua daʼö, tola öʼila hawaʼoya gangetula si no ökhamö. Ifarou dödö mbanua niha Keriso si so ba Gorindro Faulo, enaʼö labeʼe yawa gefera ”ba ngaluo siföföna ero migu” moroi na lasamuzaigö ba wangowuloi yaʼia ba ginötö tohare Waulo. (1 Kor. 16:2) Aefa daʼö, na taʼola-olaini wamalua angetula sebua, lö marase ita ba wamalua yaʼia.

15. Hadia zi tola öfalua na no aefa öʼangeragö?

¹⁵ Na no öʼangeragö, tola ösura gangetula nihalömö andrö. Daʼö mbörö wa itugu aoha khömö ba wamalua angetula si no öhalö. (1 Kor. 14:40) Duma-dumania,  mubeʼe wanuturu lala khö ndra satua sokubaloi ba wamili samösa zatua sokubaloi sanura fefu gangetulara. Isura göi haniha manö nifataro ba wamalua angetula daʼö ba hawaʼara muʼawaisi ia. Ira satua sokubaloi soloʼö fanuturu lala andrö, tola itugu aoha khöra ba wamalua angetula si no lahalö. (1 Kor. 9:26) Tola göi öfalua zimane daʼö ba waʼaurimö sero maʼökhö. Duma-dumania, moguna ösura hadia manö zinangea öfalua ba öföföʼö daʼö moloʼö hezo zabölö muʼofönaiʼö mufalua. Na öfalua daʼö, tola öʼasiwai hadia zi no öbörögö ba itugu oya zi tola ökhamö.

16. Hadia nasa zinangea öfalua, ba hadia niwaʼö ba Roma 12:11 sanandrösa ba daʼö?

¹⁶ Böi böhöli wamorege. Moguna öforege ba woloʼö si no öʼera-era hegöi ba wangasiwai hadia zi no öbörögö. (Baso Roma 12:11.) Ifatunö Faulo khö Dimoteo enaʼö lö ’iböhöli wangodödögö’ ba iforege si fao faʼanau gölö enaʼö tobali samahaʼö si sökhi. Tola tafalua mene-mene daʼö ba wogamö fefu ohitö dödöda ba wamati.​—1 Tim. 4:13, 16.

17. Hewisa lalada ba woloʼö mene-mene si so ba Efeso 5:15, 16 ba ginötö tafalua gangetula nihalöda?

¹⁷ Yaʼatua-tua ndraʼugö wangogunaʼö inötö. (Baso Efeso 5:15, 16.) Na no öhalö gangetula ba wamalua zi sambua halöwö, tatugöi ginötö ba wamalua yaʼia ba böi saʼae bulöʼö. Böi baloi ginötö si tefaudu, börö me tola manö lö irai so ginötö si tefaudu. (Zango. 11:4) Böi talafo oya öʼogunaʼö ginötö hegöi faʼabölö ba wamalua sambö moguna. Tola manö marase ndraʼugö mazui lö inötömö ba wamalua halöwö sabölö moguna. (Fil. 1:10) Na tola, fili ginötö ba zi lö nini-nini. Fatunö ba niha böʼö wa moguna öʼosambuaʼö wangera-ngeramö. Na tola, bunu HP-mö, böi bokai e-mail mazui media sosial. *

18-19. Hadia zi tola manolo yaʼugö ba wangokhögö faʼanau gölö hewaʼae so daha-taha?

¹⁸ Angeragö mbua si sökhi niʼasogönia. Bua gangetula nihalömö tola mufagölöisi simane nahia sedöna öʼondrasi ba ginötö öfalua wofanö. Na omasi ndraʼugö örugi zi sambua nahia, lö awuwu ndraʼugö hewaʼae no laduhu lala weʼamöi ba daʼö, hizaʼi hasambalö öʼalui lala tanö böʼö ba wogamö yaʼia. Simane daʼö göi, na taʼosambuaʼö dödöda ba mbua niʼasogö gangetula nihalöda, lö alio awuwu ita na so daha-taha mazui na moguna mubulöʼö gangetulada andrö.​—Gal. 6:9.

¹⁹ Tenga saoha ba wangai angetula si sökhi, ba tola manö abua wamalua yaʼia. Hizaʼi, tola ibeʼe khöu Yehowa waʼatua-tua hegöi faʼabölö ba wangasiwai hadia zi no öbörögö.