1. Kiko Yehova ta laga nos hasi?

YEHOVA ta laga nos skohe kon nos ke biba. E ta siña nos kon pa tuma bon desishon. I si nos desishon ta agrad’é, e ta yuda nos ta eksitoso. (Sal. 119:173) Mas nos apliká e konsehonan sabí di e Palabra di Dios, mas kapas nos lo ta pa tuma bon desishon.—Heb. 5:14.

2. Ki difikultat por surgi despues ku nos a tuma un desishon?

² Pero, asta despues di a tuma un bon desishon, kisas ta difísil pa nos kaba loke nos a kuminsá kuné. Wak algun ehèmpel: Un ruman hóben ta disidí di lesa Beibel kompleto. Ta bai bon kuné e promé simannan, pero despues, pa un motibu òf otro, e ta stòp. Un ruman muhé ta disidí di traha pionero regular, pero e ta keda posponé su fecha di kuminsá. Un kuerpo di ansiano unánimamente ta disidí di pastoriá e rumannan mas tantu, pero hopi luna ta pasa sin ku nan a hasi nèt nèt nada. Aunke e situashonnan ei ta diferente, nan tin algu en komun. Tur e hendenan ei a tuma un desishon pero no a kumpli kuné. E kristiannan di promé siglo ku a biba na Korinto tabatin e mesun reto. Laga nos wak kiko nos por siña for di nan.

3. Ki desishon e korintionan a tuma, pero kiko a pasa?

³ Rònt di aña 55, e korintionan a tuma un desishon importante. Nan a haña sa ku nan rumannan na Herúsalèm i na Hudea tabata den nesesidat i ku otro kongregashon tabata kolektá sèn pa yuda nan. E korintionan tabata bondadoso i generoso i a disidí ku nan tambe ke yuda,  pues nan a puntra apòstel Pablo kiko nan tin ku hasi. El a manda instrukshon pa e kongregashon i a nombra Tito pa yuda ku e kolekta. (1 Kor. 16:1; 2 Kor. 8:6) Pero, un par di luna despues, Pablo a haña sa ku e korintionan no a kumpli ku loke nan a bisa. Komo resultado, nan regalo probablemente lo no a keda kla na tempu pa ser hibá na Herúsalèm huntu ku kontribushon di e otro kongregashonnan.—2 Kor. 9:4, 5.

4. Segun 2 Korintionan 8:7, 10 i 11, kiko Pablo a animá e korintionan pa hasi?

⁴ E korintionan a tuma un bon desishon i Pablo a elogiá nan pa nan fe fuerte i pasobra nan tabata ke ta generoso. Pero, e mester a animá nan tambe pa kaba loke nan a kuminsá kuné. (Lesa 2 Korintionan 8:7, 10, 11.) Nan eksperensia ta siña nos ku asta pa kristian fiel ta difísil pa kumpli ku un bon desishon.

5. Ki pregunta nos lo kontestá?

⁵ Meskos ku e korintionan, kisas ta difísil pa nos kumpli ku nos desishon. Dikon? Debí na imperfekshon, kisas nos tin e tendensia di keda posponé kos. Òf, kisas suseso imprevisto por stroba nos di hasi loke nos a disidí di hasi. (Ekl. 9:11; Rom. 7:18) Pero, kon nos por tuma bon desishon? Si ta nesesario, kon nos por analisá un desishon ku nos a tuma i wak si nos mester ahust’é? I kon nos por tin sigur ku nos ta kaba loke nos a kuminsá kuné?

6. Dikon kisas nos mester ahustá un desishon?

⁶ Tin algun desishon importante ku nos lo no kambia nunka. Por ehèmpel, nos ta pega na nos desishon di sirbi Yehova, i nos ta determiná pa keda fiel na nos kasá. (Mat. 16:24; 19:6) Pero, tin otro desishon ku kisas nos mester ahustá. Dikon? Pasobra sirkunstansia ta kambia. Kiko por yuda nos tuma e mihó desishon posibel?

7. Kiko nos mester pidi Yehova, i dikon?

⁷ Pidi Yehova pa sabiduria. Yehova a inspirá Santiago pa skirbi: “Si un di boso falta sabiduria, lag’é sigui pidi Dios, i lo e dun’é . . . generosamente.” (Sant. 1:5) Den un sentido, nos tur “falta sabiduria.” P’esei, konfia den Yehova ora bo mester tuma un desishon i ora bo mester hasi ahuste. Lo e yuda bo hasi un bon eskoho.

8. Ki tipo di investigashon nos mester hasi?

⁸ Hasi bon investigashon. Konsultá e Palabra di Dios, lesa e publikashonnan di e organisashon i pidi konseho serka hende madurá. (Pro. 20:18) Ta masha importante pa bo hasi e investigashon ei promé ku bo kambia di trabou, muda pa un otro lugá òf skohe edukashon ku ta yuda bo sostené bo mes pa sigui sirbi Yehova.

9. Dikon ta importante pa nos ta onesto ku nos mes?

⁹ Analisá bo motivashonnan. Nos motivashonnan ta importante pa Yehova. (Pro. 16:2) E ke pa nos ta onesto den tur kos. Pues, ora nos ta tuma desishon, nos mester ta onesto tambe ku nos mes i ku otro hende tokante nos motivashonnan. Si nos no ta kompletamente onesto, probablemente lo ta difísil pa pega na nos desishon. Por ehèmpel, kisas un ruman hóben ta disidí di bira pionero regular. Pero, despues di algun tempu, e ta lucha pa yega na su oranan i ta pèrdè su goso den sirbishi. Segun e, e motibu prinsipal ku el a kuminsá traha pionero tabata  pasobra e kier a agradá Yehova. Pero, ta posibel ku su motibu prinsipal tabata pasobra e kier a agradá su mayornan òf un otro hende?

10. Kiko ta nesesario pa un hende hasi kambio?

¹⁰ Pensa riba un studiante di Beibel ku ta disidí di stòp di huma. Na promé instante, kos ta bai bon pa un òf dos siman, pero despues e ta kuminsá huma atrobe. Pero, finalmente e ta logra! Su amor pa Yehova i su deseo pa agrad’É a yud’é kambia.—Kol. 1:10; 3:23.

11. Dikon bo mester pone meta spesífiko?

¹¹ Pone meta spesífiko. Mas spesífiko bo metanan ta, mas fásil lo ta pa bo kaba loke bo a kuminsá kuné. Por ehèmpel, kisas bo a disidí di lesa Beibel mas regular. Pero, si bo no a traha un programa spesífiko, lo bo no alkansá bo meta. * Un otro ehèmpel: e ansianonan di kongregashon ta disidí di pastoriá e rumannan ku mas frekuensia. Pero, despues di algun tempu, nan no a kumpli ku nan desishon. Pa e ansianonan tin bon resultado, nan por hasi nan mes e siguiente preguntanan: “Nos a identifiká e rumannan ku tin mester di pastoreo? Nos a pone un dia i ora spesífiko pa bishitá nan?”

12. Kiko kisas nos mester hasi, i dikon?

¹² Sea realístiko. Ningun di nos no tin e tempu, rekurso ni energia pa hasi tur loke nos tin gana di hasi. Pues, sea realístiko i rasonabel. Si bo ripará ku bo a tuma un desishon ku ta difísil pa bo kumpli kuné, kisas bo mester hasi ahuste. (Ekl. 3:6) Pero, suponé ku bo a analisá bo desishon, bo a hasi e ahustenan nesesario i bo ta sinti ku bo por kumpli kuné. Wèl, tin sinku kos ku bo por hasi pa yuda bo kaba loke bo a kuminsá kuné.

13. Kon bo por haña e forsa ku bo mester pa kumpli ku un desishon?

¹³ Pidi Yehova e forsa pa hasi tur loke ta agrad’é. Dios por duna bo “e poder pa hasi tur loke ta agrad’é” i kumpli ku bo desishon. (Flp. 2:13) Pues, pidi Yehova pa su spiritu santu pa haña e forsa ku bo mester. I si bo ta sinti ku Yehova ta tarda pa kontestá bo orashon, djis sigui hasi orashon. Manera Hesus a bisa: “Sigui pidi, i boso lo risibí [spiritu santu].”—Luk. 11:9, 13.

14. Kon e prinsipio na Proverbionan 21:5 por yuda bo kumpli ku bo desishon?

¹⁴ Traha un plan. (Lesa Proverbionan 21:5.) Pa kompletá kualke proyekto, bo mester di un plan. I despues bo mester pega na e plan ei. Meskos ta konta pa bo desishonnan. Traha un lista di e kosnan spesífiko ku bo mester hasi pa kumpli ku bo desishon. Purba di parti trabou grandi den tarea mas chikitu. Asina ei, lo ta mas fásil pa bo mira bo progreso. Por ehèmpel, Pablo a animá e korintionan pa “tur promé dia di siman” pone algu un banda pa kontribushon, en bes di kolektá tur den un biaha ora e yega. (1 Kor. 16:2) Un otro bentaha di parti trabou grandi den tarea mas chikitu ta ku lo bo no sinti ku bo no por kumpli ku nan.

15. Despues di traha un plan, kiko bo por hasi?

¹⁵ Pone bo plan riba papel. Asina ei, lo ta mas fásil pa bo kumpli ku bo desishon. (1 Kor. 14:40) Por ehèmpel, kuerpo di ansiano a haña e instrukshon pa asigná  un ansiano pa skirbi kada desishon ku e kuerpo tuma. E ansiano asigná ei tin ku skirbi ken a ser skohí pa kumpli ku sierto tarea i pa ki tempu e mester kumpli kuné. Ora ku e ansianonan ta sigui instrukshon, nan lo tin mas éksito pa kumpli ku nan desishonnan. (1 Kor. 9:26) Purba di hasi algu similar den bo bida diario. Por ehèmpel, traha un lista di tur e kosnan ku bo tin ku hasi riba un dia. Pone e tareanan den e sekuensia ku bo tin pensá di hasi nan. Esei no solamente por yuda bo kaba loke bo a kuminsá kuné, pero tambe lo yuda bo hasi mas den ménos tempu.

16. Kiko ta nesesario pa kumpli ku bo desishon, i kon Romanonan 12:11 ta mustra esei?

¹⁶ Hasi esfuerso. Pa pega na un plan i kaba loke bo a kuminsá kuné ta eksigí esfuerso. (Lesa Romanonan 12:11.) Pablo a bisa Timoteo pa “sigui dediká [su] mes na lesamentu” i pa “perseverá” pa bira un mihó maestro. E konseho ei ta konta tambe pa kualke otro meta spiritual.—1 Tim. 4:13, 16.

17. Kon Efesionan 5:15 i 16 por yuda nos kumpli ku nos desishon?

¹⁷ Usa bo tempu bon. (Lesa Efesionan 5:15, 16.) Pone un ora pa kumpli ku bo desishon i pega na dje. Evitá di warda e momento perfekto pa kumpli kuné; e momento ei lo no yega nunka. (Ekl. 11:4) Tene kuidou pa bo no laga kos di ménos importansia kita e tempu i energia ku bo mester pa kos mas importante. (Flp. 1:10) Si ta posibel, hasi sierto tarea na un ora ku bo tin ménos interupshon. Bisa otro hende ku durante e ora ei bo mester konsentrá. Si ta nesesario, paga bo telefòn i wak bo e-mail òf medio sosial mas despues. *

18-19. Kiko por yuda bo pa no keda sin kumpli ku un bon desishon asta si bo haña bo ku opstákulo?

¹⁸ Enfoká riba e resultadonan. E resultado di bo desishon ta manera destinashon di un biahe. Si realmente bo ke yega bo destinashon, bo mester sigui bo biahe asta si e kaminda ta será i bo mester ahustá bo ruta. Di mes manera, si nos enfoká riba e resultadonan di nos desishonnan, nos lo no entregá fásilmente ora nos mester ahustá nos desishonnan òf ora nos haña nos ku opstákulo.—Gal. 6:9.

¹⁹ No ta fásil pa tuma bon desishon i kumpli ku nan. Pero, ku yudansa di Yehova bo por tin e sabiduria i forsa nesesario pa kaba loke bo a kuminsá kuné.