1. Jehová Diosca cada uno ¿imata rurachunda saquin?

JEHOVÁ DIOSCA ñucanchi causaipi imata rurangapaj munashcata, imata na rurangapaj munashcata cada uno agllachunmi saquin. Paillatami ñucanchicuna ali decidichun yachachin. Shina yachachishcamandami ali decidishpaca ñucanchillata cushilla, Jehovatapash cushilla sintichipanchi (Sal. 119:173). Bibliapa consejocunata pactachishpaca ali decisiongunatami agllaita ushapanchi (Heb. 5:14).

2. Imatapash rurangapaj decidishca cashpapash ¿imata pasai ushan?

² Imatapash rurangapaj decidishca cashpaca chai nishcata pactachingapami esforzarina capanchi. Huaquin ejemplocunata ricupashun. Shuj jovenga Biblia enterota liingapami decidin. Huaquin semanacunatami Bibliata liin. Shinapash jipamanga ñana liinllu. Shuj paniguca precursora cangapaj munashpapash pretextocunata churashpami precursoradotaca nimahora na japin. Shuj congregacionbi cuerpo de ancianos huauquicunaca congregacionmanda huaquin huauquipanicunata animangapaj visitashun nishpami paicunapura parlarishpa quedan. Shinapash huaquin quillacuna yalijpipash ni shuj huauquita, ni shuj panita nara visitashcachu. Cai ejemplocunapica tucuicunallatami imatapash rurangapaj quedashcata ricupanchi. Shinapash imata rurasha nishcataca na pactachishcatami ricupanchi. Cai problemacunashnallatami apostolcunapa punllacunapipash Corinto congregacionbica pasarca. Chaipi ima pasashcata, imata yachajui ushashcatapash ricupashun.

3. Corinto huauquipanicunaca ¿imatata rurashunllami nirca? Shinapash ¿imata pasarca?

³ Huata 55​pica, Corinto congregacionmanda huauquipanicunaca Jerusalenmanda, Judeamanda huauquipanicuna llaqui apanajujtami yachaj chayarca. Shinallata shuj congregacionmanda huauquipanicuna culquiguta tandachishpa paicunata ayudanajujtami yachaj chayarca. Chaimandami paicunapash shungumanda ayudangapaj munashpa imatata rurana capanchi nishpa apóstol  Pablota tapurca. Chaimi apóstol Pabloca culquiguta carashpa cachana canguichi nirca. Paicunata culquiguta tandachishpa ayudachunmi apóstol Pabloca Titota cacharca (1 Cor. 16:1; 2 Cor. 8:6). Shinapash huaquin quillacuna jipapash imatapash na tandachishcatami apóstol Pabloca yachaj chayarca. Chaimi Corintomanda huauquipanicunaca shuj congregaciongunapa ayudacunandica imatapash na cachai usharca (2 Cor. 9:4, 5).

4. ¿Imata rurachunda apóstol Pabloca 2 Corintios 8:7, 10, 11​pica animarca?

⁴ Corinto huauquipanicunaca alita rurangapami munarca. Chaimi apóstol Pablopash shujcunata ayudangapaj munashcamanda, Jehovapi crishcamandapash paicunata felicitarca. Shinapash imata rurashun nishcata pactachichunmi apóstol Pabloca paicunata animarca (2 Corintios 8:7, 10, 11, liingui). Cai ejemploca Jehovata ali sirvijcunapash, imatapash rurasha nishcataca pactachingapaj esforzarina cashcatami ricuchin.

5. Cai temapica ¿ima tapuicunatata yachajupashun?

⁵ Juchayucuna caimandami ñucanchicunapash Corinto huauquipanicunashna imatapash rurasha nishpapash na pactachi ushapanchi. Shinallata ima pasanata na yachaimandami huaquinbica imata rurasha nishcatapash na pactachi ushapanchi (Ecl. 9:12; Rom. 7:18). Cai temapica cai tapuicunatami yachajupashun: ¿Imatata nara decidishpallata rurana capanchi? Imata rurasha nishcata pactachingapaca ¿imatata rurana capanchi?

6. ¿Imashpata shuj decisionda cambiai ushapanchiman?

⁶ Pundacuna imatapash rurangapaj decidishcataca na cambiai ushapanchichu. Por ejemplo, Jehovata siempre sirvisha nishcata, ñucanchi huarmitalla o cusatalla siempre juyasha nishcataca na cambiai ushapanchichu (Mat. 16:24; 19:6). Shinapash ñucanchi causaipi imapash pasajpica huaquin decisiongunataca cambiai ushapanchimi. Shinaca ¿imatata nara decidishpallata rurana capanchi?

7. Jehová Diostaca ¿imatata mañana capanchi?

⁷ Jehovatami ali yachaita carahuai nishpa mañana capanchi. Jehová Dios yarichijpimi Santiagoca escribirca: “Cangunapurapi ali yachaita maijambash na charishpaca, Taita Diostami mañana canguichi. Paica carangapachami” (Sant. 1:5). Tucuicunallatami “ali yachaita” minishtipanchi. Chaimandami imatapash rurangapaj decidijushpa, o imata ruragrijushpapash Jehová Diosta ayudahuai nishpa mañana capanchi. Chaimi Jehová Diosca imata rurana cashcata ali decidichun ayudanga.

8. Nara decidishpallata ¿imatata rurana capanchi?

⁸ Ali alimi intindina capanchi. Imatapash decidingapaca Bibliata, publicaciongunatapashmi liina capanchi. Shinallata shuj ali amigohuanbashmi parlana capanchi (Prov. 20:18). Shuj trabajota mascajushpa, shuj ladopi causangapaj rigrijushpa, Jehovata sirvishpa cati ushangapaj imata estudiana cashcata decidigrijushpaca Bibliata, publicaciongunatapash liinami capanchi.

9. ¿Imashpata honrado canaca minishtirishcapacha can?

⁹ Imamanda rurangapaj munashcatami ali yachana capanchi. Ñucanchi imata decidijta, imata na decidijtapash Jehová Diosca alimi ricujun (Prov. 16:2). Jehová Diosca ñucanchicuna tucuipi honradocuna cachunmi munan. Chaimandami imatapash decidijushpaca ñucanchimandallata, shujcunahuanbash honradocuna cana capanchi. Na honradocuna cashpaca imata rurasha nishcatapash pactachitaca na ushashunllu. Caipi yuyapashun. Shuj joven huauquica precursor regularmi tucun. Shinapash huaquin quillacuna jipaca horascunataca na pactachi ushanllu. Callaripica tal vez cai huauquiguca Jehovata cushichingapaj munaimandami precursor tucushcanga. Shinapash paipa taitamamacunata o pitapash alicachingapallami talvez precursor tucushcanga. Chaimi villachishpapash na cushilla sintirin.

10. Bibliamanda shuj yachajujca ¿imatata rurarca?

 ¹⁰ Caipipash yuyapashun. Bibliamanda shuj yachajujca tabacota fumanatami saquingapaj decidin. Shina decidimandami casi ishcai semanata tabacota fumanata saquin. Shinapash cutinmi fumai callarin. Shina pasajpipash esforzarishpa catimandaca tabacota fumanataca saquinmi. Paica Jehová Diosta ninanda juyaimanda, paipa ñaupajpi ali ricuringapaj munaimandami chai viciotaca saquin (Col. 1:10; 3:23, NM).

11. ¿Imamandata imatapacha ruragrijushcataca yachana capanchi?

¹¹ Imatapacha ruragrijushcatami yachana capanchi. Chaimi imata decidishcataca pactachi ushapashun. Por ejemplo, cada punlla Bibliata liingapaj decidishca cashpapash, shuj programata na charishpaca Bibliata liitaca na usharingachu. * Cai ejemplopipash yuyapashun, shuj congregacionmanda ancianocuna huauquipanicunata visitangapaj decidishcanman. Shinapash huaquin quillacuna jipapash pitapash nara visitanllu. Anciano huauquicunataca cai tapuicunata tapurinami ayudanga: “¿Maijan huauquipanicunata visitachun minishtinajun? ¿Ima horata visitagrinchi?” nishpa.

12. Huaquinbica ¿imatata rurapashcanchi?

¹² Imata rurai ushashcata, imata na rurai ushashcatami yaipi charina capanchi. Tucuicunallatami ñucanchi munashcashnaca tiempoguta, fuerzataca na charipanchi. Chaimandami ñucanchicuna imata rurai ushashcata, imata na rurai ushashcataca yaipi charina capanchi. Huaquinbica imatapash rurashalla nishpapash, na pactachi ushashpami cambiana tucupashcanchi (Ecl. 3:6). Shinapash imatapacha rurasha nishcata pactachingapaca ¿imatata rurana capanchi? Chaipaca cai 5 yuyaicunamanda yachajupashunchi.

13. Imata rurasha nishcata pactachingapaca ¿imatata rurana capanchi?

¹³ Jehovata fuerzata cuhuai nishpa mañana capanchi. Jehová Diosmi ‘paipa munaita pactachichunga fuerzata cushpa’ ayudanga. Shinallami imata rurasha nishcatapash ñucanchica pactachita ushapashun (Filip. 2:13, NM). Fuerzata charishpa catingapaca Jehová Diospa espíritu santota mañapashunchi. Na uyan yashpapash Jehová Diospa espíritu santota mañashpa catinallami capanchi. Jesusca nircami: “Diosta mañaichi, paica carangallami” nishpa (Luc. 11:9, 13).

14. Imatapash rurasha nishcata pactachichunga ¿imashinata Proverbios 21:5​pi shimicunaca ayudan?

¹⁴ Imata rurasha nishcatami ña rurai callarina capanchi (Proverbios 21:5, liingui). Imatapash rurangapaca cunanmandami imata ruranata imata ña ruranataca segurashcalla charina capanchi. Chaicunata rurasha nishpaca pactachingapami esforzarina capanchi. Chaipaca imatalla ruragrijushcatami shuj listapi anotana capanchi. Shinapash na pactachi ushanacunataca shuj listapi anotapashunchi. Talvez shinami asha asha imata rurasha nishcataca pactachita ushapashun. Corinto huauquipanicunataca apóstol Pabloca “tucuicunallata semana callari punllapi” culquiguta “tandachinguichi” nishpami animarca. Shinami pai chayamujpica ña culquigutaca tandachishcalla charirca (1 Cor. 16:2). Imatapash rurasha nishcata pactachingapaj shuj listata ña charishpaca na yapata pinarishun.

15. ¿Imashpata imata ruranata shuj listapi anotashca charina capanchi?

¹⁵ Imata rurasha nishcata shuj listapi ña anotashca charishpaca facilmi pactachipashun (1 Cor. 14:40). Por ejemplo, Jehovapa organizacionga anciano huauquicunataca cashnami mandashca: Anciano huauquicuna tandanajushpaca imatalla ruragrinajujta, pi rurana cashcata, imahora rurana cashcata anotachunmi shuj  ancianoman mingana can nishpa. Shina rurashpami anciano huauquicunaca imata rurashun nishcataca fácil pactachi ushanga (1 Cor. 9:26). Ñucanchicunapashmi shinallata rurai ushapanchi. Por ejemplo, cada punllapa imacunatalla ruranata shuj listapi anotashpaca chaicunataca facilmi pactachi ushapashun.

16. Imata rurasha nishcata pactachichunga ¿imashinata Romanos 12:11a nishcaca ayudan?

¹⁶ Esforzarina capanchi. Imata rurasha nishcata ña rurai callarishpaca, pactachingapami esforzarina capanchi. Bibliapica “imata cashpapash ucha ruranataca, na quillanayachinachu canguichi” ninmi (Rom. 12:11). Apóstol Pabloca Timoteotaca cashnami consejarca, alipacha yachachijmi cashpa catina cangui nishpa. Apóstol Pablopa consejoca cunanbipashmi Jehovata sirvishpa catichun ayudan (1 Tim. 4:13, 16).

17. Imata rurasha nishcata pactachichunga ¿imashinata Efesios 5:15, 16​pi nishca shimicunaca ayudan?

¹⁷ Aliguta yarishpami tiempota ali utilizana capanchi (Efesios 5:15, 16, liingui). Imata ruranata ña shuj punlla agllashca cashpaca ama shuj punllamanra cambiapashunchichu. Punllata cambiashpaca imata rurasha nishcata pactachitaca na usharingachu (Ecl. 11:4). Minishtirishca cosascunata ruranapi shuj yanga cosascunara jarcachunga ama saquipashunchichu (Filip. 1:10). Imata ruranata pactachina punllata ña charishpaca, correo electronicota o redes sociales nishcata ama ricungapami celularta apagashpa saquina capanchi. Shinallata imata rurangapaj munashcata pactachingapaj pipash jarcachunga ama saquipashunchichu. *

18, 19. Imata rurasha nishcata pactachina na fácil cajpipash ¿imatata rurana capanchi?

¹⁸ Imata rurasha nishcata pactachishpa imashina sintirinapi pensapai. Imata rurasha nishcata pactachishpa imashina sintirinapi pensarinaca carropi maimanbash rij cuendami can. Maimanbash chayangapaj munashpapachaca masqui ñan huaglishca cajpipash, shuj ñangunata mascashpami chai pushtumanga chayanchiman. Shina cuendami imata rurasha nishcata pactachingapaca imacunatapash rurana capanchi. Na pactachita usharcanichu nishpallaca na quedanachu capanchi. Pactachingapami esforzarina capanchi (Gál. 6:9).

¹⁹ Imatapash rurangapaj decidina o imata rurasha nishcata pactachinaca na fácil canllu. Shinapash Jehová Dios ayudajpillami ñucanchicunaca ali yuyaita charita ushapanchi. Shinallata Jehová Dios fuerzata cujpillami imata rurasha nishcatapash pactachita ushapanchi.