1. Со дозволинела аменге о Јехова те кера?

О ЈЕХОВА дозволинела аменге те одлучина сар ка живина. Ов сикавела амен сар те ана шукар одлуке. А кеда анаја одлуке кола со керена ле бахтало ов поможинела амен успешно те икера амен ки ленде (Пс. 119:173). Кобор повише применинаја о мудра советија таро е Девлескоро Лафи, добором пошукар одлуке ка ана (Евр. 5:14).

2. Саве проблемија шај ка овен амен откеда ка ана несави одлука?

² Ама, чак ако анаја несави мудро одлука, шај те овел аменге пхаро те завршина адава со почминѓем те кера. Те дикха несаве примерија: Јекх терно пхрал одлучинела те читинел цело Библија. Некобор курке ов редовно читинела, ама пало адава тари несави причина ов чхинавела. Јекх пхен одлучинела те служинел сар општо пионери, ама секогаш одложинела о датум кеда те почминел. О старешине таро јекх собрание заедно одлучинена те керен повише пастирска посете ко пхраља хем пхења таро собрание, ама накхле некобор масекија а ола панда на почминѓе те керен адава. Акала ситуацие тане различна, ама иси лен нешто заедничко. О мануша анѓе одлуке, ама на керѓе адава со одлучинѓе. Е христијанен таро прво веко ко Коринт сине лен слична проблемија. Те дикха со шај те сикљова лендар.

3. Сави одлука анѓе о Коринќања, ама со случинѓа пе?

³ Околу 55 берш а.е., о Коринќања анѓе јекх важно одлука. Ола шунѓе кај ленгере пхраља ко Ерусалим хем ки Јудеја мучинена пе сине соске сине бут чороле, хем кај о јавера собранија кхедена прилогија те шај те поможинен ленге. Адалеске со сине сочувствителна хем дарежлива, о Коринќања одлучинѓе те ден прилог е чороле пхраленге,  хем пучле е Павле сар шај те керен адава. О Павле бичхалѓа упатствија е собраниеске хем замолинѓа е Тите те поможинел ко кхедибе о прилогија (1. Кор. 16:1; 2. Кор. 8:6). Ама, пало некобор масекија о Павле шунѓа кај о Коринќања на керѓе адава со одлучинѓе. Адалеске ленгоро поклон нане те овел сине спремно ко време те шај те ингарел пе ко Ерусалим заедно е прилогонцар таро јавера собранија.

4. Сар со дикхаја таро 2. Коринќаните 8:7, 10, 11, ко со охрабринѓа о Павле е пхрален таро Коринт?

⁴ О Коринќања анѓе шукар одлука, хем о Павле фалинѓа лен баши ленгири бари вера хем баши ленгири искрено желба те сикавен дарежливост. Ама исто аѓаар, ов мора сине те охрабринел лен те завршинен адава со почминѓе. (Читин 2. Коринќаните 8:7, 10, 11.) Таро ленгоро пример сикљоваја кај чак е верна христијаненге шај те овел пхаро те керен адава со одлучинѓе.

5. Башо кола пучиба ка кера лафи?

⁵ Слично сар о Коринќања, шај аменге да тано пхаро те кера адава со одлучинѓем. Соске? Адалеске со сием несовршена, шај одложинаја о буќа. Или, несаве непредвидена буќа шај те керен те овел аменге пхаро те кера адава со одлучинѓем (Проп. 9:11; Рим. 7:18). Сар шај те преиспитина несави амари одлука хем те дикха дали ваљани те менина ла? Хем, сар шај те завршина адава со одлучинѓем те кера?

6. Соске шај ка ваљанел те менина несави одлука?

⁶ Несаве важна одлуке никогаш нане те менина лен. На пример, цврсто икераја амен ки амари одлука те служина е Јеховаске хем одлучна сием те ачхова верна амаре брачно партнереске (Мат. 16:24; 19:6). Ама, шај ка ваљани те менина несаве јавера одлуке. Соске? Адалеске со о околностија менинена пе. Кола буќа ка поможинен аменге те ана о најшукар одлуке со шај?

7. Баши со ваљани те молина амен, хем соске?

⁷ Молин тут баши мудрост. Преку о свети дух, о Јехова поттикнинѓа е Јакове те пишинел: „Ако некаске тумендар фалинела мудрост, нека родел таро Девел, соске ов дела дарежливо сариненге“ (Јак. 1:5). Шај те вакерел пе кај ко несаво начин сариненге аменге „фалинела мудрост“. Адалеске роде водство таро Јехова кеда анеа несави одлука, ама хем кеда преиспитинеа адаја одлука. Аѓаар, о Јехова ка поможинел туке те ане мудра одлуке.

8. Саво истражибе ваљани те кере англедер те ане несави одлука?

⁸ Темелно истражин. Проверин со пишинела ко е Девлескоро Лафи, читин о публикацие тари е Јеховаскири организација хем кер лафи адаленцар касте со шај те овел тут доверба (Изр. 20:18). Асавко истражибе тано бут важно англедер те одлучине те менине тли бути, те селине тут ко јавер тхан или те бирине школа со ка поможинел туке те издржине тут џикоте служинеа е Јеховаске.

9. Соске тано шукар те испитина амаре мотивија кеда анаја одлуке?

⁹ Испитин тле мотивија. О Јехова испитинела амаро вило, а адава значинела кај тане леске важна амаре мотивија (Изр. 16:2). Кеда испитинаја амен, дикхаја кола тане амаре мотивија. Ваљани шукар те размислина кола чаче тане о причине баши амари одлука. Уствари, ако испитинаја со иси амен чаче ко вило сикаваја кај сием искрена. Ако таро погрешно мотиви анаја несави одлука, ка овел аменге пхаро те икера амен ки лате кеда ка овен проблемија. На пример, јекх терно пхрал одлучинела те почминел пионерско службаја. Ама, пало несаво време, пхаро леске те исполнинел о одредимо број саатија, хем повише на уживинела ки служба. Соске? Ов шај мислинѓа песке кај о главно мотиви те служинел сар пионери сине леске и желба те керел бахтало е Јехова. Ама, дали шај лескоро  главно мотиви сине и желба те угодинел пле родителенге или некаске јавереске?

10. Со ваљани аменге те шај те кера промене?

¹⁰ Размислин баши ситуација јекхе интересентескири кова со одлучинела те чхинавел е пушибаја. Ко почеток, ов успејнела ко адава јекх или дуј курке иако леске пхаро, ама пало адава палем почминела те пушинел. Пало несаво време конечно успејнела те чхинавел адале навикаја! Лескоро мангипе спрема о Јехова хем и желба те керел ле бахтало поможинѓе леске те побединел и лошно навика (Кол. 1:10; 3:23).

11. Соске ваљани те чхиве туке конкретна целија?

¹¹ Чхив туке конкретна целија. Ако иси тут конкретна целија ка овел туке полокхо те исполнине лен. На пример, шај ка одлучине почесто те читине и Библија. Ама, ако на кереа туке конкретно распоред, шај нане те исполнине адаја цел. * Или, о старешине ко јекх собрание шај ка одлучинен почесто те керен пастирска посете ко пхраља хем пхења, ама иако накхља несаво време ола панда на почминѓе те керен адава. Те шај те успејнен ко адава, ола шај те пучен пе пучиба сар акала: „Дали размислинѓем коле пхраленге хем пхењенге посебно ваљанела пастирско посета? Дали размислинѓем кеда точно те посетина лен?“

12. Со шај ка ваљани те кере, хем соске?

¹² Ов реално. Никас амендар нане ле време, средствија хем сила те керел са адава со би мангела те керел. Адалеске ов реално хем разумно. Кеда ка овел потребно, шај ка ваљани те менине несави одлука баши која со ка хаљове кај нашти те исполнине ла (Проп. 3:6). Ама, те вакера кај преиспитинѓан тли одлука, керѓан о промене со ваљани хем мислинеа кај шај те завршине адава со одлучинѓан. Те дикха панџ буќа со шај те поможинен туке те завршине адава со почминѓан те кере.

13. Сар шај те добине и сила со ваљани туке те шај те кере адава со одлучинѓан?

¹³ Молин тут баши сила. О Девел шај те дел тут сила те кере адава со одлучинѓан (Фил. 2:13). Адалеске молин е Јехова те дел тут свети дух те шај те овел тут и сила со ваљани туке. Понадари да молин тут чак кеда мислинеа кај панда на добинѓан одговор ко тле молитве. Сар со вакерѓа о Исус: „Молинен тумен, хем ка дел пе туменге [свети дух]!“ (Лука 11:9, 13).

14. Сар о начело таро Изреки 21:5 шај те поможинел туке те кере адава со одлучинѓан?

¹⁴ Кер плани. (Читин Изреки 21:5, фус.) Те шај те завршине несави бути со почминѓан те кере ла, ваљани туке плани. Пало адава ваљани те икере тут ко адава плани. Слично, кеда анеа несави одлука, кер туке списако буќенцар со ваљани те кере лен те шај те исполнине адава со одлучинѓан. Кеда ваљани те завршине несави попхари задача, шукар тано те делине ла ко потикне задаче. Секогаш кеда ка завршине несави таро акала потикне задаче, ка овел тут јасно слика башо адава џи кај ресљан. О Павле поттикнинѓа е Коринќанен те чхивен ки страна дело таро пле средствија „секова прво диве таро курко“ наместо те аџикерен хем те пробинен те кхеден прилогија кеда ка ресел ов (1. Кор. 16:2). Адава со ка делине несави попхари задача ко некобор потикне задаче, ка поможинел туке те на ове обесхрабримо мислиндор кај нашти те завршине ла.

15. Со шај те кере откеда ка кере плани?

¹⁵ Ако пишинеа адава со планиринеа те кере, ка овел туке полокхо те исполнине адава (1. Кор. 14:40). На пример, о старешинства добинена упатствија те биринен јекхе  старешина со ка пишинел секоја одлука со анела о старешинство, исто аѓаар кој тано биримо која одлука те завршинел хем џи кеда ваљани те завршинел пе. Кеда о старешине керена аѓаар, тегани ка овел ленге полокхо те керен адава со одлучинѓе (1. Кор. 9:26). Ту да шај те кере нешто слично е буќенцар со кереа лен секова диве. На пример, секова диве шај те кере туке списако е буќенцар со ваљани те завршине лен адава диве хем прво ко списако пишин и најважно бути со ваљани те кере ла. Акава ка поможинел туке те завршине адава со почминѓан хем те кере повише буќа башо по хари време.

16. Со јавер тано бут важно ако мангеа те кере адава со одлучинѓан, хем сар о Римјаните 12:11 сикавела адава?

¹⁶ Де тутар са. Те шај те завршине адава со почминѓан, ваљани те трудине тут те икере тут ко тло плани. (Читин Римјаните 12:11.) О Павле вакерѓа е Тимотееске понадари да те концентриринел пе ко сикајбе хем те истрајнел ко адава те шај те овел пошукар учители. Адава совет важинела башо јавера да духовна целија (1. Тим. 4:13, 16).

17. Сар шај о совет таро Ефешаните 5:15, 16 те поможинел туке те кере адава со планиринѓан?

¹⁷ Мудро користин тло време. (Читин Ефешаните 5:15, 16.) Бирин време кеда ка кере адава со одлучинѓан хем икер тут ко адава. Ма аџикер те овен тут совршена околностија те почмине те кере адава со планиринѓан, соске најверојатно никогаш нане те овен тут асавке околностија (Проп. 11:4). Ма мукх о похари важна буќа те лен тло време хем сила со ваљанена туке те шај те кере о поважна буќа (Фил. 1:10). Ако шај, бирин време кеда о јавера веројатно нане те чхинавен тут ко адава со кереа. Вакер е јаверенге кај ваљани туке време те концентририне тут. Шај те ачхаве тло телефони, те проверине тле електронска пораке или о социјална мреже покасно. *

18-19. Со шај те поможинел туке те на откажине тут тари несави шукар одлука чак кеда адава нане локхо?

¹⁸ Мислин ко резултати. О резултати тари тли одлука тано сар јекх цел таро јекх патување. Ако чаче мангеа те ресе ки адаја цел, нане те чхинаве те патујне чак ако о друмо тано пханло хем чак ако мора те џа таро јавер друмо те шај те ресе џи адари. Слично, ако мислинаја ко резултатија таро амаре одлуке, нане локхесте те откажина амен кеда ка овен амен пхарипа или пречке (Гал. 6:9).

¹⁹ Нане локхо те ане шукар одлуке хем шај те овел пхаро те кере адава со одлучинѓан. Ама о Јехова ка поможинел тут, ка дел тут и мудрост хем и сила со ваљанена туке те шај те завршине адава со почминѓан те кере.