1. Dí naniñulú mu̱ʼni̱ Jeobá rá.

JEOBÁ naniñulú muraʼwíí dí gúʼni náa xúgíʼ mbiʼi rí gakuwáánʼ. Naʼsngúlúʼ dí muraʼwíí mu̱ʼni̱ rí májánʼ ga̱jma̱a̱ nambáyulúʼ mu magajnúu májánʼ índo̱ nuraʼwíí mu̱ʼni̱ rí naniguuʼ ikhaa (Sal. 119:173). Rí muʼgíʼ muʼnimbánii xtágabu rí na̱ʼkha̱ náa Ajngá rawunʼ Dios nambáyulúʼ muraʼwíí májánʼ rí gúʼni (Heb. 5:14).

2. Dí gándoo maʼniulú gakhi̱i̱ nda̱wa̱á rí niriʼyáʼ mbá awan rá.

² Á mu nuraʼwíí mbá rí májánʼ mu̱ʼni̱, mbáa ndayóoʼ mu̱ʼni̱ tsiakimijna mu muʼnimbánii rí niguáʼdi̱i̱. Guʼyáá tikhu xkri̱da. Mbáa dxámá naríyaʼ awan mu maʼnigajmaa Biblia. Naʼngo̱o̱ naʼnimbánuu nguáthá xmáná, nda̱wa̱á naniñuuʼ raʼni. Mbáa ndxájulú naraʼwíí mani̱ndxu̱u̱ precursora, mú nángi eʼni eriʼkhu̱u̱ mbiʼi rí magíʼdu̱u̱. Mbá nguáthi̱i̱n bi̱ kuya̱ edxu̱u̱ nuríyaʼ awan mu magún gúñún a̱ngiu̱lú mu muxnún tsiakii, mú nanújngoo mba̱yu̱u̱ʼ igu̱nʼ ga̱jma̱a̱ asndu nimbáa xóo tségún gúyáá. Mixtiʼkhu nindxu̱u̱ náa xúgíʼ rígi̱, mú rígá rí naʼni mambrígui̱i̱: Niriyaʼ awan, mú na̱nguá ninimbaníí. Xúʼko̱ má kayuuʼ niguáʼníí cristianos bi̱ nikúwá náa Corinto nákha siglo timbá. Guʼyáá dí gándoo gajmañulú náa ikhiin.

3. Dí niraʼwi̱i̱ muni bi̱ corintios, mú ndiéjunʼ nirígá rá.

³ Nákha tsiguʼ 55, bi̱ corintios niriyaʼ mbá awan rí gíʼdoo numuu. Nidxawíín rí a̱ngiu̱lú bi̱ kúwá náa Jerusalén ga̱jma̱a̱ náa Judea kúwá rumíniiʼ ga̱jma̱a̱ ganitsu, ma̱ngaa rí i̱ʼwáʼ congregación nigimbúmijná mu mumbañún. Ga̱jma̱a̱ numuu rí  nandún kuñún niʼni rí maxkajxi̱i̱n mu mumbañún ga̱jma̱a̱ niráxi̱i̱ Pablo dí gándoo muni. Ikhaa niriyaʼ awan xóo muni ga̱jma̱a̱ nigíiʼ Tito mu mambáñún náa awan rígi̱ (1 Cor. 16:1; 2 Cor. 8:6). Mú nguáthá igu̱nʼ nda̱wa̱á Pablo niʼdxaun rí xóó tséni nimbá. Ikha jngó, gajkhun rí na̱nguá nikúwi̱i̱n xawii wapháá mu mumbañún a̱ngiu̱lú bi̱ kúwi̱i̱n náa Jerusalén ga̱jma̱a̱ xúʼko̱ má i̱ʼwáʼ congregación ma̱ngaa (2 Cor. 9:4, 5).

4. Xó má naʼthí náa 2 Corintios 8:7, 10, 11, dí niʼthúún Pablo bi̱ corintios rí muni rá.

⁴ Bi̱ corintios niraʼwi̱i̱ mbá rí májánʼ muni, ga̱jma̱a̱ Pablo nixníin núma̱aʼ ga̱jma̱a̱ numuu rí gújkhuʼ fe ndrígu̱ún ga̱jma̱a̱ rí nandún mumbañún eʼwíínʼ. Mú ma̱ngaa niʼthúún rí ndayóoʼ munimbánii rí nithi (atraxnuu 2 Corintios 8:7, 10, 11). * Rí niguáʼníí, naʼsngúlúʼ rí ma̱ndoo asndu a̱ngiu̱lú bi̱ naguájun jmbu mbaʼyóoʼ rí muni tsiakimijna mu munimbánii rí nithi muni.

5. Xú káʼnii graxe̱ gúriʼña̱a̱ rá.

⁵ Xó má bi̱ corintios, mbáa mangáánʼ naʼniulú gakhii rí muʼnimbánii rí niʼthá mu̱ʼni̱ numuu rí ni̱ndxu̱lú xa̱bu̱ aʼkhá ga̱jma̱a̱ nu̱ʼni̱ gajííʼ. Rí nagíʼnulú mbá rí tséguaʼti̱i̱n, ma̱ngaa naʼni rí xándoo muʼnimbánii rí niʼgíʼ awan mu̱ʼni̱ (Ecl. 9:11; Rom. 7:18). Náa artículo rígi̱ muriʼña̱a̱ tikhu graxe̱: Xú káʼnii gándoo gúraʼwíí májánʼ rí mu̱ʼni̱ rá. Ndiéjunʼ gándoo mu̱ʼni̱ mu mbuʼyáá xóo niraʼwíí mu̱ʼni̱ nákha ginii rí niʼngo̱o̱ niʼnimbáníí rá. Ga̱jma̱a̱ dí gándoo gambáyulú mu mambúlú rí niguáʼdi̱i̱ rá.

6. Ndiéjunʼ rí xándoo muriʼkhui̱i̱ nditháan rá.

⁶ Rígá dí itháán gíʼdoo numuu rí nu̱ʼni̱ rí xáʼyóoʼ muriʼkhu̱u̱ mbá kayuuʼ. Mbá xkri̱da tsíyulú rí muniʼñáaʼ ru̱ʼni̱ ñajuunʼ Jeobá ga̱jma̱a̱ ni̱ndxu̱lú xa̱bu̱ jmbi náa bi̱ ndiʼyáa (Mat. 16:24; 19:6). Mú, mbáa rígá i̱ʼwáʼ rí ma̱ndoo muriʼkhui̱i̱, numuu rí naxtiʼkhuu xóo kuwáánʼ. Ndiéjunʼ gambáyulú mu muraʼwíí májánʼ rí mu̱ʼni̱ rá.

7. Ndiéjunʼ gíʼmaa munda̱ʼa̱a̱ Dios ga̱jma̱a̱ náá numuu rá.

⁷ Gunda̱ʼa̱a̱ Dios rí maxnúlúʼ ku̱ma̱. Jeobá nixnúu xi̱ʼ kaʼwu Santiago mu maʼnirámáʼ: “Ikha jngó, á mu rí mbáa dí ikháanʼla ndayóoʼ majmañuu xóó itháan, gando̱ʼo̱o̱ má xúʼko̱ Dios, numuu rí ikhaa naxnún xúgínʼ rí nda̱ñúnʼ” (Sant. 1:5). Xúgiáanʼ “ndayóoʼ majmañulúʼ” náa tikhu rí xóo kuwáanʼ. Ikha jngó gakumulú kuʼyáá Jeobá xó má índo̱ nuraʼwíí mbá rí mu̱ʼni̱. Ikhú Jeobá mambáyulúʼ mu muraʼwíí májánʼ rí gúʼni.

8. Ndiéjunʼ rí gíʼmaa mbuʼyáá nákha xóó tséraʼwíí dí mu̱ʼni̱ rá.

⁸ Guʼyáʼ makru̱ʼu̱lú itháán. Guʼyáʼ majmañulúʼ itháán ga̱jma̱a̱ Ajngá rawunʼ Dios, guraxnuu i̱yi̱i̱ʼ dí naguwíi xuajñuu Jeobá ga̱jma̱a̱ guʼthúún eʼwíínʼ (Prov. 20:18). Gíʼdoo wéñuʼ numuu rí mu̱ʼni̱ xúgíʼ rígi̱ índo̱ nundxa̱ʼwa̱míjna̱ muriʼkhui̱i̱ ñajunʼ rí kuwáánʼ ru̱ʼni̱, mu mu̱ʼgua̱ i̱mba̱ níʼkhá mu mu̱ʼni̱ ñajuunʼ Dios ki xóo rí muʼnigajmaa o muʼdaʼ itháán mbújkha̱a̱.

9. Xú káʼnii gambáyuluʼ rí manindxu̱lúʼ mbáa xa̱bu̱ gamajkhuii rá.

⁹ Guʼyáá náá numuu. Jeobá naxmiéjuunʼ ga̱jma̱a̱ rí nu̱ʼni̱ (Prov. 16:2). Ikhaa gíʼthu̱u̱n rí muxnáá gamajkhu náa xúgíʼ rí nu̱ʼni̱. Ikha jngó ndayóoʼ rí maguaʼdáá gamajkhu náa mámbáa rí ikháanʼ ga̱jma̱a̱ náa eʼwíínʼ, índo̱ nuraʼwíí mbá rí mu̱ʼni̱. Á mu na̱nguá e̱ʼni̱ káxi̱,  mbá maʼniulú mingíjyúuʼ muʼnimbaníí rí nigíʼdi̱i̱. Gundxaʼwamíjna̱ rí mbáa dxámá naraʼwíí mani̱ndxu̱u̱ precursor, mú nguáthá mbiʼi nda̱wa̱á tséʼngo̱o̱ gáʼni magooʼ hora ga̱jma̱a̱ tséxtáa gagi náa naʼtáraʼa. Mbáa nindxa̱ʼwáminaʼ rí mani̱ndxu̱u̱ precursor mbaʼyamajkuu itháán Jeobá. Mú, lá niʼni mu maxtáa gagi anu̱u̱ o imba̱a̱ bi̱ nambáxu̱u̱ ga̱jma̱a̱ xáʼ.

10. Ndiéjunʼ eyóoʼ mu muriʼkhumijná rá.

¹⁰ Guʼyáá i̱mba̱ xkri̱da. Mbáa bi̱ naʼnigajmaa̱ Biblia naniñuuʼ ratsikhá ndíí. Nákha ginii, naʼni tsiakimínáʼ wéñuʼ rí xátsikhá ndíí mbá o a̱jma̱ xmáná, mú nagíʼdu̱u̱ natsiká mbu̱júu̱ʼ. Mú nda̱wa̱á naʼngo̱o̱ naniñuuʼ mbá kayuuʼ. Ga̱jma̱a̱ numuu ngajua rí gíʼdoo náa Jeobá ma̱ngaa numuu rí nandoo mbaʼyamajkuu, rúʼko̱ nambáyúu mu maʼngo̱o̱ maniñuuʼ ratsikhá ndíí (Col. 1:10; 3:23).

11. Náá numuu rí ndayóoʼ maguaʼdáá mbá májánʼ awan rá.

¹¹ Guʼtá rí gajkhun. Rígi̱ gambáyulú mu muʼnimbánii káxi̱ rí nigíʼdi̱i̱. Mbá xkri̱da, á mu niʼthá dí muraxnuu Biblia tsejtsí mbiʼi, mbáa má xáʼngo̱o̱ guʼnimbánii á mu na̱nguá kuaʼdáá mbá awan rí muʼnigajmaa. * I̱mba̱ xkri̱da: Bi̱ kuya̱ edxu̱u̱ náa mbá congregación nuriyaʼ itháan awan mu magún gúñún a̱ngiu̱lú, mú nanújngoo mbiʼi ga̱jma̱a̱ na̱nguá egún. Mbá rí ma̱ndoo mambáñun nindxu̱u̱ rí murajximíjna̱ rígi̱: “Lá niriʼyaʼ mbá awan rí mu̱ʼgua̱ gúʼñún a̱ngiu̱lú ráʼ. Lá ndiʼyáá má náá mbiʼi gúʼgua̱ gúʼñún xáʼ.”

12. Ndiéjunʼ rí gándoo mu̱ʼni̱ ga̱jma̱a̱ náá numuu rá.

¹² Gu̱ʼni̱ xóo gíʼmaa. Nimbáa tséguapha̱a̱ ga̱jma̱a̱ ragíʼdoo mbújkha̱a̱ ni má tsiakii mu maʼni rí nandoo. Ikha jngó gu̱ʼni̱ xó má gíʼmaa ga̱jma̱a̱ gundxaʼwamíjna̱ májánʼ. Mbáa nguáná mbaʼyóoʼ muriʼkhui̱i̱ rí niraʼwíí mu̱ʼni̱, á mu tséʼngo̱o̱ guʼnimbánii (Ecl. 3:6). Á mu mbuʼyáá dí niraʼwíí xóo mu̱ʼni̱ ga̱jma̱a̱ nuriʼkhui̱i̱ xóo makuwáánʼ ma̱ngaa rí nundxaʼwamíjna̱ muʼnimbánii, ndiéjunʼ gambáyulú mu muʼnimbánii rí nigíʼdi̱i̱ rá. Guʼyáá mbá witsu enii.

13. Xú káʼnii gándoo gákánulúʼ tsiakii mu muʼnimbánii rí niraʼwíí mu̱ʼni̱ rá.

¹³ Gunda̱ʼa̱a̱ Dios mu maxnúlúʼ tsiakii muʼnimbánii. Jeobá ma̱ndoo ‹maxnúlúʼ tsiakii mu muʼnimbánii› ga̱jma̱a̱ muʼgíʼ mu̱ʼni̱ rí niraʼwíí (Filip. 2:13). Ikha jngó gunda̱ʼa̱a̱ xi̱ʼ kaʼwu ndrígóo mu xúʼko̱ muguaʼdáá tsiakii rí ndayúlú. Guʼtákáñii má xúʼko̱ maski ajndu ndajyúuʼ mu mariʼñulú. Jesús niʼthí: ‹Gundaʼa má xúʼko̱ ga̱jma̱a̱ makánala [xi̱ʼ kaʼwu]› (Luc. 11:9, 13).

14. Xú káʼnii nambáyulúʼ ikha rí na̱ʼkha̱ náa Proverbios 21:5 mu muʼnimbánii rí niraʼwíí mu̱ʼni̱ rá.

¹⁴ Guríyaaʼ mbá awan rí mu̱ʼni̱ (atraxnuu Proverbios 21:5). * Asndu ndiéjunʼ má ñajunʼ rí gúʼni̱, ndayúlú rí muriʼyáʼ mbá májánʼ awan ga̱jma̱a̱ guʼgíʼ muʼnimbánii. Xúʼko̱ má kayuuʼ, índo̱ gúraʼwíí mbá rí gúʼni, guʼnirámáʼ mámbá rí ndayóoʼ rí muʼnimbánii. Á mu nu̱ʼni̱ wájí mbá ñajunʼ rí gakhii ga̱jma̱a̱ dí ragákhíi, xáʼniulu mingíjyúuʼ mu mbuʼyáá náá rí naʼngo̱o̱ nu̱ʼni̱. Pablo niʼthúún bi̱ corintios rí “mámbá mbiʼi rí ndayáa xmáná” ndayóoʼ rí muyejxíi̱ mbá chíʼgíiʼ mbújkha̱a̱ ki xóo rí muguaʼthi̱i̱n ga̱jma̱a̱ rí mugimbóo índo̱ ikhaa gáʼkanú (1 Cor. 16:2). Imbo̱ʼ rí mambáyulúʼ rí mu̱ʼni̱ wájí ñajunʼ gakhii nindxu̱u̱ rí xáʼni néʼngulú.

15. Nda̱wa̱á rí niriʼyáʼ má awan rí mu̱ʼni̱, ndiéjunʼ gándoo mu̱ʼni̱ xóó itháán rá.

 ¹⁵ Dí muʼnirámáʼ rí nandulú mu̱ʼni̱, mambáyulúʼ mu mu̱ʼgua̱nú muʼnimbánii (1 Cor. 14:40). Mbá xkri̱da, bi̱ kuya̱ edxu̱u̱ najuiʼthún rí mugíiʼ mbáa dí ikhiin mu maʼnirámáʼ dí gúraʼwíí muni, ma̱ngaa bi̱ maʼnimbánuu ga̱jma̱a̱ nguáná gámbóo raʼni. Bi̱ kuya̱ edxu̱u̱ bi̱ nugíʼ nunimbánii ikha rígi̱ nambánuu rí nuthi (1 Cor. 9:26). Ikháanʼ mangáanʼ ma̱ndoo mu̱ʼni̱ ikháá kayuuʼ. Mbá xkri̱da, ma̱ndoo muʼnirámáʼ rí mu̱ʼni̱ tsejtsí mbiʼi ga̱jma̱a̱ mámbá enii rí nandulú mu̱ʼni̱ ginii. Rígi̱ raʼkháa i̱ndó mambáyulúʼ mu mambúlú rí nigíʼdi̱i̱ ma̱ngaa xájyúlú mba̱yu̱u̱ʼ mu mu̱ʼni̱ mbaʼa ñajunʼ.

16. Xó má eʼthí náa Romanos 12:11, ndiéjunʼ rí gíʼdoo numuu mu̱ʼni̱, mu xúʼko̱ muʼnimbánii dí niraʼwíí rá.

¹⁶ Gu̱ʼni̱ tsiakimijna: Rí mataʼgíʼ matanimbánii awan dí nitríyaʼ ga̱jma̱a̱ mambáaʼ rí nitagíʼdi̱i̱, ndayóoʼ wéñuʼ tsiakii (atraxnuu Romanos 12:11). * Pablo niʼthúu̱n Timoteo dí magíʼ maʼni má xúʼko̱ rí ikhaa najmañuu ga̱jma̱a̱ rí xániñuuʼ raʼni. Xtágabu rígi̱ nayambáá wéñuʼ mu mataʼgíʼ matani ñajuunʼ Dios (1 Tim. 4:13, 16).

17. Xú káʼnii embayulú Efesios 5:15, 16 mu muʼnimbánii dí niʼthá rá.

¹⁷ Gajmulú májánʼ mbiʼi (atraxnuu Efesios 5:15, 16). * Guriʼyáʼ mbá mbiʼi mu mu̱ʼni̱ mbá ñajunʼ ga̱jma̱a̱ xúriʼkuíí ga̱jma̱a̱ imbo̱ʼ xáguaʼthiin má dí marigá mbá mbiʼi májánʼ, numuu rí xárígá má (Ecl. 11:4). Xúniʼñáaʼ dí ragíʼdoo numuu marígú kaʼyulú mbiʼi ga̱jma̱a̱ tsiakii rí mbaʼyulú mu̱ʼni̱ rí itháán gíʼdoo numuu (Filip. 1:10). Á mu nandoo, guriʼyáʼ mbá mbiʼi náa dí xáʼni ngarígáanʼ. Guʼthúún eʼwíínʼ rí ndayóoʼ mbiʼi mu makru̱ʼu̱lú. Ga̱jma̱a̱ gundijuííʼ celular mu xáʼni ngarígáanʼ ga̱jma̱a̱ asndu wakhííʼ gátu̱ʼu̱lú náa internet. *

18, 19. Nda̱wa̱á rí niraʼwíí májánʼ mbá rí mu̱ʼni̱, dí gándoo gambáyulú mu xakanajkulú gáʼni xkujndu rá.

¹⁸ Guʼyáá rí niʼngulú ni̱ʼni̱. Rí niraʼwíí mu̱ʼni̱ ma̱ndoo mu̱ʼni̱ mbríguii ga̱jma̱a̱ mbá kamba̱a̱. Á mu nandulú muʼguanú náa na̱jkua ndayóoʼ rí mu̱ʼgua̱ ma xúʼko̱ maski ajndu nuxkamaa kamba̱a̱ rí kúgoo ga̱jma̱a̱ mu̱ʼgua̱ i̱mba̱ níʼkhá. Xúʼko̱ má kayuuʼ, á mu nduʼyáá rí niʼngulú ni̱ʼni̱ dí niraʼwíí, xákanajkulú maski ajndu muraʼníí xkujndu (Gál. 6:9).

¹⁹ Mingijyúúʼ nindxu̱u̱ índo̱ nuraʼwíí rí mu̱ʼni̱ ga̱jma̱a̱ muʼnimbánii. Mú Jeobá gambáyulú mu ma̱ndoo maguaʼdáá ku̱ma̱ ga̱jma̱a̱ tsiakii rí ndayúlú mu mambúlú rí nigíʼdi̱i̱.