1. Jeová fó liberdade ba ita atu halo saida?

JEOVÁ fó liberdade ba ita atu hili oinsá ita halaʼo ita-nia moris. Nia hanorin ita oinsá atu halo desizaun diʼak, no nia ajuda ita atu hetan susesu bainhira ita foti desizaun neʼebé halo nia kontente. (Sal 119:173) Bainhira ita aplika matenek neʼebé ita aprende husi Bíblia, ita sei halo desizaun neʼebé diʼak.—Ebr 5:14.

2. Susar saida mak ita bele hasoru bainhira halo tiha desizaun ida?

² Maski ita halo desizaun diʼak, maibé dala ruma susar ba ita atu kumpre buat neʼebé ita hahú ona. Hanoin toʼok ezemplu balu: Irmaun joven ida deside atu lee Bíblia tomak. Nia lee Bíblia ba semana balu, maibé depois neʼe nia para. Irmán ida deside atu serbí nuʼudar pioneiru maibé nia demora atu komesa. Grupu katuas halo desizaun atu hakaʼas an vizita ema iha kongregasaun, maibé liutiha fulan balu sira seidauk komesa. Situasaun sira-neʼe la hanesan, maibé iha buat ida neʼebé hanesan. Sira halo desizaun maibé la halo tuir. Iha apóstolu sira-nia tempu, kongregasaun Korinto hasoru susar neʼebé hanesan. Mai ita haree saida mak ita bele aprende husi sira.

3. Kongregasaun Korinto deside saida? Maibé saida mak akontese?

³ Maizumenus iha tinan 55 EC, kongregasaun Korinto halo desizaun importante ida. Sira rona katak irmaun-irmán iha Jeruzalein no Judeia hasoru susar no kiak, no mós kongregasaun seluk halibur daudaun osan atu ajuda irmaun-irmán sira-neʼe. Tanba laran-diʼak no laran-luak, kongregasaun Korinto mós deside atu fó kontribuisaun no husu apóstolu Paulo kona-ba oinsá sira bele ajuda. Nia haruka matadalan ba kongregasaun neʼe no husu Tito  atu halibur kontribuisaun. (1 Kor 16:1; 2 Kor 8:6) Maibé fulan balu liutiha, Paulo rona katak kongregasaun Korinto la halo tuir sira-nia desizaun. Rezultadu mak karik sira-nia kontribuisaun sei la prontu tuir tempu atu bele lori ba Jeruzalein hamutuk ho kontribuisaun husi kongregasaun seluk.—2 Kor 9:4, 5.

4. Tuir 2 Korinto 8:7, 10, 11, Paulo anima kongregasaun Korinto atu halo saida?

⁴ Kongregasaun Korinto halo ona desizaun diʼak, no Paulo gaba sira tanba sira iha fiar no hakarak atu hatudu laran-luak. Maibé nia mós presiza anima sira atu kumpre buat neʼebé sira hahú ona. (Lee 2 Korinto 8:7, 10, 11.) Sira-nia esperiénsia hanorin ita katak ema Kristaun neʼebé laran-metin mós dala ruma sente susar atu halo tuir desizaun diʼak neʼebé sira halo ona.

5. Ita sei buka resposta ba pergunta saida deʼit?

⁵ Hanesan Kongregasaun Korinto, karik ita sente susar atu halo tuir ita-nia desizaun. Tanbasá? Tanba la perfeitu, karik ita demora. Ka situasaun ruma akontese no neʼe halo susar ba ita atu halo tuir buat neʼebé ita deside ona. (Ecle 9:11; Rom 7:18) Oinsá ita bele haree fali ita-nia desizaun no deside se ita presiza halo mudansa? No saida mak bele ajuda ita kumpre didiʼak ita-nia desizaun ka buat neʼebé ita hahú ona?

6. Bainhira mak ita presiza halo mudansa ba ita-nia desizaun?

⁶ Ita labele troka desizaun importante balu. Porezemplu, ita kaer metin ita-nia desizaun atu serbí Jeová, no laran-metin ba ita-nia kaben. (Mt 16:24; 19:6) Maibé, dala ruma ita presiza halo mudansa ba desizaun balu. Tanbasá? Tanba ita-nia situasaun troka. Saida mak bele ajuda ita atu halo desizaun neʼebé diʼak?

7. Ita tenke halo orasaun atu husu saida, no tanbasá?

⁷ Halo orasaun hodi husu matenek. Jeová dirije Tiago atu hakerek: “Se imi ida presiza matenek, nia tenke husu beibeik ba Maromak, no Maromak sei fó matenek ba nia, tanba Maromak fó ba ema hotu ho laran-luak.” (Tgo 1:5) Ita hotu “presiza matenek”. Tan neʼe sadere ba Jeová bainhira ita halo desizaun no bainhira presiza halo mudansa ba ita-nia desizaun. Hodi halo nuneʼe, Jeová sei ajuda ita atu halo desizaun neʼebé diʼak.

8. Saida mak ita presiza halo antes foti desizaun? Oinsá?

⁸ Halo riset. Buka matadalan husi Maromak nia Liafuan, lee publikasaun sira husi Ita-nia organizasaun, no koʼalia ho ema neʼebé Ita konfia. (Prov 20:18) Halo riset hanesan neʼe mak importante tebes antes halo desizaun kona-ba troka serbisu, muda ba fatin seluk, ka hili edukasaun neʼebé bele ajuda Ita serbí Jeová.

9. Tanbasá diʼak atu buka-hatene uluk ita-nia motivu?

⁹ Buka-hatene Ita-nia motivu. Ita-nia motivu mak importante ba Jeová. (Prov 16:2) Nia hakarak ita atu hatudu laran-moos iha buat hotu. Tan neʼe, bainhira ita halo desizaun, ita lakohi lohi ita-nia an no ema seluk kona-ba ita-nia motivu. Se ita lohi ita-nia an, karik susar ba ita atu halo tuir ita-nia desizaun. Porezemplu, irmaun joven ida deside atu sai pioneiru regulár. Maibé liutiha tempu balu, nia sente susar atu kumpre oras pioneiru nian no nia la sente kontente ho ninia serbisu haklaken. Karik uluk nia hanoin katak ninia motivu atu sai pioneiru mak atu halo Jeová kontente. Maibé karik tuir  loloos ninia razaun mak atu halo kontente ninia inan-aman ka ema seluk.

10. Saida mak bele book ita atu halo mudansa?

¹⁰ Hanoin toʼok kona-ba estudante Bíblia ida neʼebé deside atu para fuma. Nia la fuma ba semana ida ka rua maski neʼe susar ba nia, maibé tuirmai nia fuma fali. Ikusmai nia konsege para fuma. Ninia domin ba Jeová no ninia hakarak atu halo kontente Jeová mak book nia atu manán ninia toman neʼe.—Kol 1:10; 3:23.

11. Tanbasá Ita presiza iha planu espesífiku?

¹¹ Iha planu neʼebé espesífiku. Se Ita iha planu neʼebé espesífiku, neʼe bele ajuda Ita atu kumpre buat neʼebé Ita hahú ona. Porezemplu, karik Ita deside atu lee Bíblia beibeik. Maibé se Ita la iha oráriu espesífiku, karik Ita labele kumpre Ita-nia objetivu. * Ka karik katuas sira iha kongregasaun deside atu vizita beibeik ema iha kongregasaun, maibé liutiha tempu balu, sira seidauk halo tuir desizaun neʼe. Atu bele hetan susesu, sira bele husu pergunta sira hanesan: “Ami halo ona lista kona-ba irmaun no irmán neʼebé ami bele vizita ka lae? Ami deside ona tempu espesífiku atu vizita sira ka lae?”

12. Karik ita presiza halo saida, no tanbasá?

¹² Iha hanoin neʼebé loos. Ita la iha tempu, forsa ka kbiit atu halo buat hotu neʼebé ita hakarak halo. Tan neʼe, halo planu neʼebé Ita bele kumpre tuir Ita-nia abilidade. Karik Ita presiza troka Ita-nia desizaun se Ita rekoñese katak Ita-nia kbiit la toʼo atu halo tuir ida-neʼe. (Ecle 3:6) Se Ita hanoin fali ona Ita-nia desizaun no halo ona mudansa ruma, no Ita sente katak Ita iha kbiit atu halo tuir desizaun neʼe, saida mak bele ajuda Ita atu kumpre buat neʼebé Ita hahú ona? Mai Ita hanoin kona-ba hakat lima.

13. Oinsá mak Ita bele hetan kbiit neʼebé Ita presiza atu halo tuir Ita-nia desizaun?

¹³ Halo orasaun atu husu kbiit. Maromak bele fó ba Ita “kbiit” atu halo tuir Ita-nia desizaun. (Flp 2:13) Tan neʼe husu Jeová atu haraik ninia espíritu santu hodi Ita iha kbiit neʼebé Ita presiza. Kontinua halo orasaun se Ita sente katak Maromak seidauk hatán Ita-nia orasaun. Jesus hatete: “Kontinua husu, no imi sei simu [espíritu santu].”—Lc 11:9, 13.

14. Oinsá mak prinsípiu iha Provérbios 21:5 ajuda Ita atu halo tuir Ita-nia desizaun?

¹⁴ Halo planu. (Lee Provérbios 21:5.) Ita presiza halo planu atu bele kumpre buat neʼebé Ita hahú ona. Tuirmai Ita tenke halo tuir Ita-nia planu neʼe. Nuneʼe mós bainhira Ita halo desizaun, diʼak atu halo lista espesífiku kona-ba buat neʼebé Ita presiza halo atu bele kaer metin ba Ita-nia desizaun. Se Ita fahe serbisu boot sira ba kiʼik-kiʼik, neʼe bele ajuda Ita atu hatene buat neʼebé Ita kumpre ona. Paulo anima kongregasaun Korinto atu tau ketak buat ruma “iha loron primeiru semana-semana” hodi fó nuʼudar kontribuisaun duké hein toʼo Paulo mai mak foin halibur osan. (1 Kor 16:2) Se Ita fahe serbisu boot sira ba kiʼik-kiʼik, neʼe bele ajuda Ita atu sente kmaan, no la hanoin barak.

15. Depois halo tiha planu, Ita bele halo tan saida?

¹⁵ Se Ita hakerek buat neʼebé Ita planu atu halo, neʼe bele halo fasil ba Ita atu halo tuir Ita-nia desizaun. (1 Kor 14:40) Porezemplu, grupu katuas hetan matadalan atu hili katuas ida atu hakerek desizaun neʼebé sira halo, inklui sé mak  simu knaar atu halo tuir desizaun neʼe no data atu kumpre knaar neʼe. Se katuas sira halo tuir matadalan neʼe, fasil liu ba sira atu halo tuir sira-nia desizaun. (1 Kor 9:26) Ita bele halo buat neʼebé hanesan. Porezemplu, Ita bele hakerek lista loroloron. Bainhira Ita halo lista, hakerek uluk buat neʼebé Ita hakarak halo primeiru. Neʼe bele ajuda Ita atu kumpre buat neʼebé Ita hahú ona no mós halo buat barak liután.

16. Hahalok saida mak importante atu Ita bele halo tuir Ita-nia desizaun? Oinsá mak Roma 12:11 apoia ida-neʼe?

¹⁶ Hakaʼas an. Ita presiza hakaʼas an atu halo tuir Ita-nia planu no kumpre buat neʼebé Ita hahú ona. (Lee Roma 12:11.) Paulo hatete ba Timóteo atu “hakaʼas an” atu sai mestre neʼebé diʼak liu. Ita bele aplika Paulo nia konsellu neʼe ba buat hotu neʼebé Ita hakarak halo ba Jeová.—1 Tim 4:13, 16.

17. Oinsá Éfeso 5:15, 16 bele ajuda ita halo tuir ita-nia desizaun?

¹⁷ Uza didiʼak Ita-nia tempu. (Lee Éfeso 5:15, 16.) Determina tempu neʼebé Ita hakarak atu halo tuir Ita-nia desizaun no labele troka tempu neʼe. Keta hein toʼo tempu diʼak mak foin komesa halo tuir Ita-nia desizaun, tanba karik Ita sei nunka hetan tempu diʼak. (Ecle 11:4) Labele husik buat neʼebé ladún importante atu dada Ita-nia atensaun toʼo Ita la iha tempu ka forsa atu halo buat neʼebé importante liu. (Flp 1:10) Se bele, hili tempu neʼebé ema sei la atrapalla Ita. Fó-hatene ema seluk katak Ita presiza tempu atu fokus. Diʼak atu taka Ita-nia telefone no labele haree Ita-nia e-mail ka média sosiál durante tempu neʼe. *

18-19. Bainhira buat ruma hanetik Ita-nia desizaun, saida mak bele ajuda Ita atu la rende an?

¹⁸ Hanoin kona-ba rezultadu. Rezultadu husi Ita-nia desizaun mak hanesan ho fatin neʼebé Ita planu atu vizita. Se Ita hakarak tebes atu toʼo fatin ida, neʼe sei motiva Ita atu kontinua Ita-nia viajen maski dalan taka no presiza uza dalan seluk. Nuneʼe mós, se Ita fokus ba rezultadu husi Ita-nia desizaun, Ita sei la rende an lalais bainhira buat ruma hanetik Ita.—Gal 6:9.

¹⁹ Halo desizaun diʼak mak susar, no mós dala ruma susar atu halo tuir desizaun. Maibé ho Jeová nia ajuda, Ita bele hetan matenek no kbiit neʼebé Ita presiza atu kumpre buat neʼebé Ita hahú ona.