1. ¿Tuku Jehová kinkamaxkiyan talakaskin natlawayaw?

JEHOVÁ kinkamaxkiyan talakaskin nalaksakaw tuku natlawayaw kkilatamatkan. Kinkamasiyaniyan tlan tuku nalaksakaw chu kinkamakgtayayan tlan nakinkakitaxtuniyan akxni laksakaw tuku xla makgapaxuwa (Sal. 119:173). Komo nalilatamayaw xtastakyaw Biblia nakinkamakgtayayan tlan tuku nalaksakaw (Heb. 5:14).

2. ¿Tuku tuwa namakgkatsiyaw natlawayaw akxni wi tuku laksakaw?

² Maski lakgachunin tlan tuku laksakaw, max tuwa namakgkatsiyaw namakgantaxtiyaw o namakgalhsputuyaw tuku matsukinitaw. Kaʼakxilhwi makgapitsi liʼakxilhtit. Chatum kgawasa lakpuwan nalikgalhtawakga Biblia. Chuna tlawa, pero alistalh nialh likgalhtawakga. Chatum tala lakpuwan pi precursora nalitaxtu, pero ankgalhin mamakgapali akxni namatsuki. Lakgkgolotsin liwana lakkaxwilikgo pi nakalakgapaxialhnankgo natalan xalak congregación xlakata nakamakgpuwantinikgo, pero titaxtu kilhtamaku chu niti lakgapaxialhnankgo. Tanu tanu tuku titaxtumakgo natalan tiku kalichuwinaw, pero wi tuku xputumkan tlawakgo: wi tuku laksakkgolh, pero ni makgantaxtikgolh. Kstalaninanin Cristo xalak Corinto nachuna titaxtukgolh. Kaʼakxilhwi tuku kinkamasiyaniyan xliʼakxilhtitkan.

3. ¿Tuku lakpuwankgolh natlawakgo kstalaninanin Cristo xalak Corinto, pero tuku kitaxtulh?

³ Kkata 55, tiku xalak Corinto wi tuku lu xlakaskinka laksakkgolh. Katsikgolh pi natalan xalak Jerusalén chu xalak Judea nialh xkgalhikgo tuku xmaklakaskinkgo, chu pi amakgapitsin congregaciones xlakkaxwilikgonit nakalimakgtayakgo tuku xkgalhikgo. Xlakata xlakan lu xmakgtayanamputunkgo, lakpuwankgolh pi nakamakgtayakgo natalan chu wa xlakata kgalhskinkgolh apóstol Pablo la tlan xtlawakgolh. Xla kawanilh tuku tlan xtlawakgolh chu wanilh Tito pi xkamakgtayalh natalan namastokgkgo tuku xʼamakgo mastakgo (1 Cor. 16:1; 2 Cor. 8:6). Pero, titaxtulh kilhtamaku Pablo katsilh pi nitu xtlawakgonit.  Wa xlakata, max ni xkgalhikgolh kilhtamaku xlakata tlan namastokgkgo tuku xʼama limakgtayanankgo xlakata tlan xmalakgachakgolh kJerusalén akxni amakgapitsi congregaciones na xmalakgachakgolh xtamakgtaykan (2 Cor. 9:4, 5).

4. Chuna la wan 2 Corintios 8:7, 10, 11, ¿tuku kawanilh Pablo kstalaninanin Cristo xalak Corinto pi xtlawakgolh?

⁴ Natalan xalak Corinto lu tlan tuku xlaksakkgonit chu Pablo kawanilh laktlan tachuwin xlakata tliwakga xkgalhikgo xtakanajlakan chu xlakata lu xkamakgtayaputunkgo natalan. Pero nachuna kawanilh pi xmakgalhsputukgolh tuku xmatsukikgonit (kalikgalhtawakga 2 Corintios 8:7, 10, 11). Tuku titaxtukgolh kinkamasiyaniyan pi asta tiku tliwakga wi xtakanajlakan talakaskin pi lu naliskujkgo xlakata namakgantaxtikgo tuku laksakkgo.

5. ¿Tuku takgalhskinin nakgalhtiyaw?

⁵ Chuna la natalan xalak Corinto, akinin max tuwa namakgkatsiyaw namakgantaxtiyaw tuku laksaknitaw natlawayaw xlakata makglakgalhinanin akinin chu mamakgapaliyaw tuku lakpuwanitaw natlawayaw. Nachuna, tuku kaj xalan la tlan natlawa pi ni namakgantaxtiyaw tuku laksakaw (Ecl. 9:11; Rom. 7:18). Kʼuma artículo nakgalhtiyaw umakgolh takgalhskinin: ¿tuku nakinkamakgtayayan tlan tuku nalaksakaw?, ¿tuku tlan natlawayaw xlakata liwana naʼakxilhaw tuku laksaknitaw, chu komo natalakaskin pi nalakgpaliyaw?, chu ¿tuku nakinkamakgtayayan namakgalhsputuyaw tuku matsukiw?

6. ¿Tuku xlakata max natalakaskin nalakgpaliyaw tuku laksaknitaw?

⁶ Wi tuku laksakaw nema lu xlakaskinka chu nikxni katilakgpaliw. Akgtum liʼakxilhtit, nikxni katimakgxtakgwi la skujnaniyaw Jehová chu nikxni katiʼakgskgawiw tiku tamakgaxtokgaw (Mat. 16:24; 19:6). Pero, wi tuku laksakaw nema max natalakaskin nalakgpaliyaw, xlakata wi tuku talakgpali kkilatamatkan. ¿Tuku nakinkamakgtayayan tlan tuku nalaksakaw?

7. ¿Tuku naskiniyaw Jehová, chu tuku xlakata?

⁷ Kaskiniw liskgalala Dios. Jehová malakpuwanilh Santiago pi xtsokgwililh: «Komo wi tiku tsankgani liskgalala, chuntiya kaskinilh Dios, xlakata xla putum [...] masta» (Sant. 1:5). Kimputumkan kinkatsankganiyan «liskgalala» akxni wi tuku tlawayaw. Wa xlakata, kalipawaw Jehová akxni wi tuku laksakaw chu akxni laksaknitawa tuku natlawayaw. Chu Jehová nakinkamakgtayayan tlan tuku nalaksakaw.

8. ¿Tuku pulana natlawayaw akxni nina laksakaw tuku natlawayaw?

⁸ Liwana kalakputsananiw. Kalikgalhtawakgaw xTachuwin Dios, likgalhtawakga nema kinkamaxkiyan xkachikin chu katachuwinaw tiku lipawanaw (Prov. 20:18). Lu xlakaskinka natlawayaw putum uma akxni lakpuwamaw pi nalakgpaliyaw kintaskujutkan, naʼanaw latamayaw alakatanu kachikin o niku nakgalhtawakgayaw xlakata wi tuku naliskujaw chu chuntiya naskujnaniyaw Jehová.

9. ¿Tuku xlakata lu tlan kitaxtu komo pulana naʼakxilhaw tuku xlakata natlawayaw tuku lakpuwamaw?

⁹ Liwana kaʼakxilhwi tuku xlakata chuna natlawayaw. Jehová lu xlakaskinka akxilha tuku xlakata tlawaputunaw tuku lakpuwamaw (Prov. 16:2). Xla lakaskin pi kamakgantaxtiw tuku laksakaw natlawayaw. Wa xlakata lu xlakaskinka namakgantaxtiyaw tuku malaknuyaw. Komo ni chuna xtlawaw, max tuwa namakgkatsiyaw namakgalhsputuyaw tuku matsukinitaw. Kalilakpuwaw pi chatum kgawasa lakpuwanit pi precursor nalitaxtu, pero alistalh akxilha pi nila makgatsi horas chu ni lipaxuwa akxni an lichuwinan Dios. Max xapulana lakpuwa pi xmakgapaxuwaputun Jehová. Pero, ¿xlikana wa Jehová xmakgapaxuwaputun, o max wa xkamakgapaxuwaputun xnatlatni o atanu tala?

10. ¿Tuku talakaskin xlakata natlawayaw talakgpalit?

 ¹⁰ Kaʼakxilhwi atanu liʼakxilhtit. Chatum tiku limakgalhtawakgemaka Biblia liwana lakpuwan pi nialh katixkulilh. Xapulana, lu liskuja chu akgtum o akgtiy semanas ni xkuli, pero alistalh xkulipara. Chu alistalh makgxtakga. Tapaxkit nema kgalhini Jehová chu la xmakgapaxuwaputun makgtayalh namakgxtakga la kxkuli (Col. 1:10; 3:23).

11. ¿Tuku xlakata xlakaskinka liwana nalakapastakaw tuku natlawayaw?

¹¹ Liwana kalakapastakwi tuku natlawayaw. Uma nakinkamakgtayayan namakgalhsputuyaw tuku matsukinitaw. Akgtum liʼakxilhtit, komo liwana lakapastaknitaw pi ankgalhin nalikgalhtawakgayaw Biblia pero nitu lakkaxwilinitaw tuku hora, max ni katimakgantaxtiw. * Kalichuwinaw atanu liʼakxilhtit: lakgkgolotsin xalak congregación liwana lakkaxwilikgolh pi nakalakgapaxialhnankgo natalan xalak congregación xlakata nakamakgpuwantinikgo, pero titaxtu kilhtamaku chu niti lakgapaxialhnankgo. Tlan namakgantaxtikgo komo nalilakpuwankgo umakgolh takgalhskinin: «¿Lakkaxwilinitaw tiku natalan na’anaw kalakgapaxialhnanaw? ¿Lakkaxwilinitaw tukuya kilhtamaku chu tukuya hora tlan xakkalakgapaxialhnaw?».

12. ¿Tuku max natalakaskin natlawayaw, chu tuku xlakata?

¹² Kalakkaxwiliw tuku tlan namatlaniyaw. Niti kgalhi kilhtamaku, litliwakga chu tuku talakaskin xlakata tlan namakgantaxti putum tuku tlawaputun. Wa xlakata talakaskin kajwatiya nalakkaxwiliyaw tuku tlan tlawayaw. Max namin kilhtamaku natalakaskin pi nalakgpaliyaw tuku laksaknitawa nema nila makgantaxtiyaw (Ecl. 3:6). Pero, komo liwana nalilakpuwanaw tuku laksaknitawa, nalakgpaliyaw tuku talakaskin chu nalakpuwanaw pi tlan namakgantaxtiyaw, ¿tuku nakinkamakgtayayan tlan namakgalhsputuyaw? Kalichuwinaw pulakkitsis tuku kilitlawatkan.

13. ¿La tlan nakgalhiyaw litliwakga xlakata tlan makgantaxtiyaw tuku laksakwi?

¹³ Kaskiniw Dios pi kakinkamaxkin litliwakga. Jehová tlan nakinkamaxkiyan «litliwakga xlakata chuna natlawaya» chu namakgantaxtiyaw tuku laksakwi (Filip. 2:13). Wa xlakata kaskiniw Jehová xʼespíritu santo xlakata nakgalhiyaw litliwakga nema maklakaskinaw. Chuntiya katasaskiniw maski lakpuwanaw pi ni lakapala kinkakgalhtiyan. Jesús lichuwinalh: «Chuntiya kaskintit, chu nakamaxkikanatit [espíritu santo]» (Luc. 11:9, 13).

14. ¿La kinkamakgtayayan tastakyaw xla Proverbios 21:5 xlakata tlan namakgantaxtiyaw tuku laksakaw?

¹⁴ Liwana kalakkaxwiliw tuku natlawayaw (kalikgalhtawakga Proverbios 21:5). Akxni wi tuku tlawaputunaw, talakaskin pi pulana nalakkaxwiliyaw la namakgantaxtiyaw chu natlawayaw tuku lakkaxwiliw. Nachuna, akxni wi tuku laksakaw natlawayaw, katlawaw akgtum lista niku nalhkawiliyaw tuku natlawatilhayaw. Akxni lu tuwa tuku natlawaya, kalakkaxwiliw pi tsinu tsinu natlawatilhayaw, chu chuna tlan namakgantaxtiya. Pablo kawanilh natalan xalak Corinto pi «xapulana kilhtamaku xla semana» xmaʼakgataxtikgolh tumin nema xatapaxuwan xmastakgolh, chu ni xkgalhkgalhikgolh asta akxni xchilh chu akxniku xtsukukgolh mastokgkgo (1 Cor. 16:2). Atanu la kinkamakgtayayan tsinu tsinu natlawatilhayaw tuku tlawaputunaw wa pi ni lu katitlakgwaw.

15. Akxni lakkaxwiliyaw tuku natlawayaw, ¿tuku atanu kilitlawatkan?

¹⁵ Komo natsokgwiliyaw tuku lakpuwanitaw natlawayaw nakinkamakgtayayan tlan namakgantaxtiyaw (1 Cor. 14:40). Akgtum liʼakxilhtit, lakgkgolotsin kawanikan pi chatum  kgolotsin katsokgwililh tuku nalaksakkgo, tiku namakgantaxti tuku laksakkgolh chu tuku kilhtamaku namasputukgo. Lakgkgolotsin tiku chuna tlawakgo nakamakgtaya tlan namakgantaxtikgo tuku lakkaxwilikgo (1 Cor. 9:26). Akinin nachuna tlan natlawayaw. Akgtum li’akxilhtit, chali chali tlan natlawayaw akgtum lista niku nalhkawiliyaw tuku kilitlawatkan chu tuku pulana natlawayaw. Uma nakinkamakgtayayan namakgalhsputuyaw tuku matsukinitaw chu ni tuwa katimakgkatsiw namakgantaxtiyaw.

16. Chuna la wan Romanos 12:11, ¿tuku lu xlakaskinka xlakata tlan namakgantaxtiyaw tuku laksakaw?

¹⁶ Lu kaliskujwi. Talakaskin lu naliskujaw xlakata tlan nastalaniyaw tuku lakkaxwiliw natlawayaw chu namakgalhsputuyaw tuku matsukinitaw (kalikgalhtawakga Romanos 12:11). Pablo wanilh Timoteo pi chuntiya lu xliskujli xlakata tlakg tlan makgalhtawakgena nalitaxtu. Uma tastakyaw lu kinkamakgtayayan akxni wi tuku lakgchamputunaw xlakata kintakanajlakan (1 Tim. 4:13, 16).

17. ¿La kinkamakgtayayan Efesios 5:15, 16 xlakata tlan namakgantaxtiyaw tuku laksaknitaw natlawayaw?

¹⁷ Liwana kamaklakaskiw kinkilhtamakujkan (kalikgalhtawakga Efesios 5:15, 16). Kalakkaxwiliw tukuya hora chu tukuya kilhtamaku natlawayaw tuku laksaknitaw chu ni kalakgpaliw. Ni kalakpuwaw pi chuna natlawayaw akxni nachin xatlan kilhtamaku, xlakata max nikxni katichilh ama kilhtamaku (Ecl. 11:4). Ni kamastaw talakaskin pi tuku ni lu xlakaskinka nakinkamakglhtiyan kilhtamaku chu litliwakga xlakata natlawayaw tuku tlakg xlakaskinka (Filip. 1:10). Komo matlaniyaw, kalimaxtuw tsinu kilhtamaku xlakata nitu nakinkamakglhuwiyan. Kakawaniw amakgapitsin pi maklakaskinaw kilhtamaku xlakata liwana nalilakpuwanaw. Kamamixiw kicelularkan chu nina ka’akxilhwi correo electrónico o redes sociales. *

18, 19. Akxni wi tuku tlan laksaknitawa, ¿tuku nakinkamakgtayayan ni nataxlajwaniyaw maski wi tuku tuwa natitaxtuyaw?

¹⁸ Wa kalilakpuwaw tuku tlan nakitaxtu. Akxni wi tuku laksakaw xtachuna la akxni wi niku amaw. Komo champutunaw niku amaw, talakaskin chuntiya natlawanaw maski natekgsaw akgtum tiji nema lakgatalakanit chu natalakaskin pi atanu niku nalakanaw. Nachuna, komo naʼakxilhaw tuku tlan nakitaxtu akxni wi tuku natlawayaw, ni tunkun katitaxlajwaniw maski wi tuku tuwa natitaxtuyaw (Gál. 6:9).

¹⁹ Lakgachunin tuwa tamakgkatsi wi tuku tlan nalaksakaw chu namakgantaxtiyaw. Pero Jehová nakinkamakgtayayan tlan nakgalhiyaw liskgalala chu litliwakga xlakata tlan namakgalhsputuyaw tuku matsukinitaw.