1. Jehova i larim yumi olgeta wan wan long mekim wanem?

JEHOVA i larim yumi yet long mekim disisen long ol samting yumi laik mekim. Em i skulim yumi long hau yumi inap mekim ol gutpela disisen, na em i helpim yumi long stap amamas taim yumi mekim ol disisen em i orait long en. (Sng. 119:173) Taim yumi bihainim gutpela savetingting i stap long Tok Bilong God, dispela bai helpim yumi long mekim ol gutpela disisen.—Hib. 5:14.

2. Maski yumi mekim wanpela disisen, yumi inap pilim hatwok long mekim wanem?

² Maski yumi mekim gutpela disisen, yumi inap pilim hatwok long pinisim wok yumi bin kirapim. Skelim sampela eksampel: Wanpela yangpela brata i mekim disisen long ritim Baibel olgeta. Em i kirap long rit na em i mekim olsem inap sampela wik, tasol bihain sampela samting i kamap na em i stop long rit. Wanpela sista i mekim disisen long em bai kamap painia oltaim, tasol em i surikim taim bilong em long kamap painia. Lain elda i wanbel na mekim disisen long mekim sepeding visit long ol bratasista insait long kongrigesen, tasol planti mun i lus na ol i no mekim dispela wok. Em ol disisen bilong mekim narapela narapela wok, tasol wanpela samting i wankain long ol dispela disisen. Lain elda i mekim ol disisen, tasol ol i no bihainim disisen bilong ol. Long taim bilong ol aposel, wankain samting olsem i bin kamap long ol Kristen long Korin. Yumi ken stori long skul yumi inap kisim long ol.

3. (a) Ol Kristen long Korin i mekim wanem disisen? (b) Tasol wanem samting i kamap?

³ Long 55 C.E. samting, lain Korin i mekim wanpela bikpela disisen. Ol i harim olsem hevi i painim ol wanbilip long Jerusalem na Judia na ol i stap rabis, olsem na ol narapela kongrigesen  i bungim mani bilong helpim ol. Ol Kristen long Korin i laik givim ol samting bilong helpim ol wanbilip, olsem na ol i mekim disisen long givim sampela kontribusen na ol i askim aposel Pol long hau ol inap givim helpim. Pol i givim instraksen long kongrigesen na em i makim Taitus long helpim wok bilong bungim mani. (1 Kor. 16:1; 2 Kor. 8:6) Sampela mun i lus na Pol i harim olsem ol Kristen long Korin i no bungim mani olsem ol i bin tok long mekim. Olsem na donesen bilong ol bai i no redi long ol brata inap kisim na bringim i go long Jerusalem wantaim donesen bilong ol narapela kongrigesen.—2 Kor. 9:4, 5.

4. Olsem 2 Korin 8:7, 10, 11 i kamapim, Pol i kirapim ol Kristen long Korin long mekim wanem?

⁴ Ol Kristen long Korin i mekim gutpela disisen, na Pol i tok amamas long strongpela bilip bilong ol na laik bilong ol long helpim ol narapela. Na tu, em i kirapim ol long pinisim wok ol i bin kirapim. (Ritim 2 Korin 8:7, 10, 11.) Stori bilong ol i skulim yumi olsem maski ol Kristen i mekim gutpela disisen, ol inap pilim hatwok long bihainim.

5. Yumi bai kisim bekim bilong wanem ol askim?

⁵ Olsem ol Kristen long Korin, yumi inap pilim hatwok long bihainim ol disisen bilong yumi. Wai? Yumi sinman, olsem na yumi inap surikim taim bilong mekim ol samting. O sampela hevi inap kamap na pasim rot bilong yumi long bihainim disisen yumi bin mekim. (Ekl. 9:11; Rom 7:18) Hau bai yumi inap skelim gen disisen bilong yumi na mekim sampela senis long en? Na wanem ol samting bai helpim yumi long pinisim gut wok yumi bin kirapim?

6. Wai na sampela taim yumi inap senisim disisen bilong yumi?

⁶ I gat sampela disisen em yumi no inap tru long senisim. Eksampel: Yumi stap gut long disisen bilong yumi long mekim wok bilong Jehova, na yumi tingting strong long stap gut long poroman marit bilong yumi. (Mat. 16:24; 19:6) Tasol i gat sampela disisen em yumi inap senisim. Wai? Sindaun bilong yumi i save senis. Yumi ken mekim wanem ol samting na bai yumi inap mekim ol disisen i gutpela tru?

7. Yumi mas beten askim God long wanem samting? Wai?

⁷ Beten long kisim savetingting. Jehova i kirapim Jems long raitim dispela tok: “Sapos wanpela bilong yupela i sot long savetingting, orait em i mas wok yet long askim God, na God bai givim long em. Long wanem, God i save amamas long givim planti samting long ol man.” (Jems 1:5) Long sampela samting, yumi olgeta i “sot long savetingting.” Olsem na yu mas askim Jehova long helpim yu taim yu laik mekim disisen na taim yu laik senisim dispela disisen. Long dispela rot, Jehova bai helpim yu long mekim ol gutpela disisen.

8. Yumi mas mekim wok painimaut long wanem ol samting paslain long yumi mekim disisen?

⁸ Mekim gut wok painimaut. Skelim Tok Bilong God, ritim ol pablikesen em oganaisesen bilong Jehova i redim, na toktok wantaim ol manmeri em yu inap trastim. (Prov. 20:18) Yu mas mekim olsem paslain long yu mekim disisen long senisim wok mani bilong yu, go stap long narapela hap, o yu laik makim wanem kain skul yu laik kisim bilong sapotim yu long wok autim tok.

9. Wanem gutpela samting inap kamap sapos yumi bihainim onest pasin?

⁹ Skelim ol risen bilong yu. Jehova i save skelim gut astingting bilong yumi. (Prov. 16:2) Em i laik bai yumi bihainim onest pasin long olgeta samting. Olsem na taim yumi mekim ol disisen long laip bilong yumi yet na long ol samting yumi mekim long ol narapela, yumi laik bai astingting bilong yumi i stret long ai bilong God. Sapos yumi no bihainim onest pasin, yumi inap pilim hatwok long bihainim dispela disisen. Ating wanpela yangpela brata  i mekim disisen long kamap painia oltaim. Tasol sampela haptaim i lus na em i pilim hatwok long winim ol aua bilong em, na em i no kisim amamas long mekim wok autim tok. Ating em i ting olsem nambawan risen na em i mekim wok painia em bikos em i laik amamasim Jehova. Tasol ating risen tru na em i mekim wok painia em olsem, em i laik amamasim papamama o narapela em i laikim.

10. Wanem samting inap helpim man long senisim sampela pasin?

¹⁰ Tingim eksampel bilong wanpela Baibel sumatin husat i laik lusim pasin bilong smok. Em i pilim hatwok tru long lusim, na isi isi em i traim long lusim smok inap wanpela o tupela wik. Tasol bihain em i lusim smok olgeta! Em i laikim tru Jehova na em i laik amamasim God, na dispela i helpim em long lusim pasin bilong smok.—Kol. 1:10; 3:23.

11. Wai na yu mas tingim stret ol mak yu laik winim?

¹¹ Tingim stret ol mak yu laik winim. Sapos yu tingim stret ol mak yu laik winim, dispela bai helpim yu long pinisim wok yu bin kirapim. Ating yu mekim disisen long ritim Baibel planti taim moa. Tasol sapos yu no mekim sediul bilong ritim Baibel, ating yu no inap winim dispela mak. * O ating ol elda long wanpela kongrigesen i mekim disisen long mekim sepeding visit planti taim moa, na ol i kirap long mekim olsem, tasol bihain long sampela haptaim ol i no mekim moa. Sapos ol i laik bihainim dispela disisen, ol i ken skelim ol kain askim olsem: “Yumi luksave long ol bratasista husat i nidim stret helpim long rot bilong planti moa sepeding visit? Yumi makim stret taim bilong visitim ol?”

12. Sampela taim, yumi ken mekim wanem? Wai?

¹² Holim stretpela tingting. Yumi olgeta i sot long taim, mani, na strong bilong mekim olgeta samting yumi laik mekim. Olsem na yu mas holim stretpela tingting. Sampela taim, ating yu ken senisim wanpela disisen em yu luksave olsem yu no inap long bihainim. (Ekl. 3:6) Orait, olsem wanem sapos yu skelim gen disisen bilong yu, mekim sampela senis long en, na yu pilim olsem yu inap bihainim? Skelim 5-pela samting we inap helpim yu long pinisim wok yu bin kirapim.

13. Hau bai yu inap kisim strong yu nidim bilong bihainim disisen bilong yu?

¹³ Beten askim God long strongim yu. God inap givim yu “strong long mekim ol samting” na bai yu inap bihainim disisen bilong yu. (Fili. 2:13) Olsem na askim Jehova long givim holi spirit bilong strongim yu. Yu mas wok yet long beten maski yu pilim olsem God i no givim kwik samting yu askim long en. Jisas i tok: “Wok yet long askim, na yupela bai kisim [holi spirit].”—Luk 11:9, 13.

14. Olsem wanem stiatok bilong Provep 21:5 inap helpim yu long bihainim disisen bilong yu?

¹⁴ Wokim plen. (Ritim Provep 21:5.) Yu mas wokim plen na bai yu inap pinisim wok yu bin kirapim. Yu mas bihainim gut dispela plen. Long wankain pasin, taim yu mekim wanpela disisen, mekim lista bilong ol samting yu tingting long mekim na bai yu inap bihainim gut dispela disisen. Sapos yu laik mekim wanpela bikpela wok, i gutpela long brukim i go liklik liklik na dispela bai helpim yu long luksave long skel bilong wok yu inap mekim. Pol i kirapim ol Kristen long Korin long tingim olsem “long namba 1 de bilong olgeta wik,” ol i ken putim sampela mani i stap bilong givim olsem kontribiusen taim em i kam kamap. (1 Kor. 16:2) Taim yu brukim wok i go liklik liklik, dispela i no inap putim presa long yu.

15. Bihain long yu mekim wanpela plen, yu ken mekim wanem?

 ¹⁵ Taim yu wokim na raitim plen bilong yu, dispela inap helpim yu long mekim samting yu laik mekim. (1 Kor. 14:40) Eksampel: Lain elda i mas makim wanpela namel long ol long raitim olgeta wan wan disisen ol i mekim, na tu, em i mas raitim nem bilong husat i mas bihainim dispela disisen, na det ol i makim bilong pinisim dispela wok. Taim ol elda i mekim olsem, dispela bai helpim ol long pinisim gut wok. (1 Kor. 9:26) Yu ken bihainim wankain pasin long ol samting yu yet i laik mekim. Yu ken mekim lista bilong ol samting yu laik mekim long olgeta wan wan de, na makim wanem ol samting yu bai mekim fes. Dispela inap helpim yu long pinisim wok yu bin kirapim, na tu, yu inap mekim planti wok moa insait long sotpela haptaim.

16. (a) Yu mas mekim wanem na bai yu inap bihainim disisen bilong yu? (b) Olsem wanem tok bilong Rom 12:11 i sapotim dispela tingting?

¹⁶ Mekim wok. Yu mas bihainim plen bilong yu na mekim wok na pinisim wok yu kirapim. (Ritim Rom 12:11.) Pol i tokim Timoti long “mekim yet wok”na “wok strong yet” long kamap gutpela moa long mekim wok tisa. Yumi inap bihainim dispela edvais long ol narapela samting yumi laik mekim long sait bilong wok lotu.—1 Tim. 4:13, 16.

17. Olsem wanem tok bilong Efesus 5:15, 16 inap helpim yumi long bihainim disisen bilong yumi?

¹⁷ Yusim gut taim bilong yu. (Ritim Efesus 5:15, 16.) Makim wanpela taim we yu laik bihainim disisen bilong yu na no ken senisim taim. No ken ting olsem wanpela taim bai rait taim stret bikos olgeta taim i gat sampela samting i save kamap. (Ekl. 11:4) No ken larim ol liklik samting i pinisim taim na strong we yu inap yusim long mekim ol bikpela samting. (Fili. 1:10) Sapos inap, makim taim we ol narapela samting i no inap distebim yu. Tokim ol narapela olsem yu nidim dispela haptaim long tingting gut long sampela samting. Yu ken ofim fon bilong yu na sekim e-mail o Instagram samting long bihain. *

18-19. Wanem samting inap helpim yu na bai yu no ken givap long bihainim disisen yu mekim maski sampela samting i laik pasim rot bilong yu?

¹⁸ Tingim ol gutpela samting bai kamap. Samting bai kamap long disisen bilong yu i olsem ples yu laik raun i go long en. Sapos yu laik tru long go kamap long dispela ples, yu bai wok yet long go maski ol i pasim rot na yu mas bihainim narapela rot. Olsem tasol, sapos yumi tingim ol gutpela samting bai kamap long disisen bilong yumi, yumi bai no inap givap taim sampela samting i laik pasim rot bilong yumi.—Gal. 6:9.

¹⁹ I hatwok long mekim ol gutpela disisen, na sampela samting inap kamap na i laik pasim yu long bihainim ol dispela disisen. Tasol Jehova inap givim savetingting na strong yu nidim bilong pinisim wok yu bin kirapim.