1. Eaha ta Iehova i horoa i te taata tataitahi?

 UA HOROA Iehova i te tiamâraa i te taata tataitahi ia maiti, ua haapii atoa mai râ oia e nafea ia rave i te faaotiraa maitatai. Ua tu anaˈe i to ˈna hinaaro, e tauturu mai Iehova ia faatupu i te reira. (Sal. 119:173) Ia tamau tatou i te haapao i te mau aˈoraa paari i roto i ta ˈna Parau, e faaotiraa paari atoa ïa ta tatou e rave.—Heb. 5:14.

2. Eaha te fifi e itehia ua oti anaˈe te hoê faaotiraa i te ravehia?

² Noa ˈtu e faaotiraa paari tei ravehia, e ere atoa i te mea ohie ia rave faahope i ta tatou i haamata. A feruri na i te mau tupuraa i muri nei: Ua faaoti te hoê taeae apî i te taio i te taatoaraa o te Bibilia. Ua na reira oia tau hebedoma, i muri mai râ, faaea ˈtura. Ua faaoti te tahi tuahine i te rave i te taviniraa pionie tamau, hopea ore râ oia i te turai i te taime no te haamata. Ua hoê te manaˈo o te tino matahiapo no te rave i te mau tere faaitoitoraa i te mau taeae e tuahine o te amuiraa, ua mairi râ te mau avaˈe, aita â te reira i haamatahia. Mea taa ê teie mau tupuraa, hoê â râ fifi te itehia ra, aita te mau faaotiraa i rave-faahope-hia! Ua farerei atoa te mau Kerisetiano i Korinetia i te hoê â fifi, e hiˈopoa anaˈe eaha te mau haapiiraa ta tatou e huti mai.

3. Eaha te faaotiraa i ravehia e to Korinetia, eaha râ tei tupu?

³ I te matahiti 55, e faaotiraa faufaa ta to Korinetia i rave. I to ratou iteraa i te ati ta te mau taeae i Ierusalema e i Iudea e faaruru ra, ua faaoti e rave rahi amuiraa i te horoa i te moni no te tauturu i te feia veve. Ma te hamani maitai e te aau horoa noa, ua hinaaro to Korinetia e horoa i te tauturu, ani aˈera ratou i te aposetolo Paulo eaha ta ratou  e nehenehe e horoa ˈtu. Ua faaite Paulo ia ratou i ta ˈna mau aratairaa e faatoroa ihora ia Tito no te haaputu i te moni a te amuiraa. (Kor. 1, 16:1; Kor. 2, 8:6) Tau avaˈe râ i muri aˈe, aita â to Korinetia i haamata i te horoa i te moni. Aita ˈtura ta ratou ô i ineine i te afaihia i Ierusalema mai ta te tahi atu mau amuiraa.—Kor. 2, 9:4, 5.

4. Ia au i te Korinetia 2, 8:7, 10, 11, eaha ta Paulo i faaitoito i to Korinetia ia rave?

⁴ E faaotiraa maitai ta to Korinetia i rave. Ua haapopou Paulo ia ratou no to ratou faaroo e hinaaro e tauturu ia vetahi ê. Ua faaitoito atu râ oia i te rave faahope roa i ta ratou i haamata. (A taio i te Korinetia 2, 8:7, 10, 11.) Te faaite mai ra teie tupuraa e ere atoa i te mea ohie no te mau Kerisetiano haapao maitai ia faatupu i ta ratou i faaoti i te rave.

5. Eaha te mau uiraa ta tatou e pahono?

⁵ Mai to Korinetia, mea fifi atoa paha no tatou ia rave faahope i ta tatou i faaoti i te rave. No te aha? No to tatou huru tia ore, pinepine paha tatou i te vaiiho i to teie mahana no ananahi. Aore ra, e haafifi mai paha te tahi tupuraa manaˈo-ore-hia. (Koh. 9:12; Roma 7:18) E nafea ia ite e titauhia anei ia faatano i te mau faaotiraa ta tatou i rave? Eaha te tauturu mai ia rave faahope i ta tatou i haamata?

6. No te aha e titauhia paha ia faatano i te tahi faaotiraa?

⁶ Eita tatou e taui i te tahi mau faaotiraa faufaa ta tatou i rave mai te faaotiraa ia tavini ia Iehova e ia ati maite noa i to tatou hoa faaipoipo. (Mat. 16:24; 19:6) Tera râ, e titauhia paha ia faatano i te tahi atu mau faaotiraa no te mea ua taui te tupuraa. I tera taime, eaha te tauturu mai ia faaite i te paari?

7. Eaha te titauhia ia ani na roto i te pure e no te aha?

⁷ A ani ia Iehova i te paari. I raro aˈe i te aratairaa a te varua moˈa, ua papai Iakobo: “Ia ere noa ˈtu hoê o outou i te paari, ia tamau noa ïa oia i te ani atu i te Atua, e horoa noa mai hoi oia i te taata atoa.” (Iak. 1:5) Ia rave aore ra ia faatano tatou i te hoê faaotiraa, mea faufaa roa ia tiaturi ia Iehova no te fanaˈo i te paari.

8. Hou a rave ai i te faaotiraa, eaha te mau maimiraa e titauhia ia rave?

⁸ A rave i te mau maimiraa. A hiˈopoa i ta te Bibilia e parau ra, a taio i te mau papai a te faanahonahoraa a Iehova e a paraparau e te feia e nehenehe e tiaturihia. (Mas. 20:18) Mea faufaa roa ia na reira, ia faaoti iho â râ tatou i te taui i te ohipa, te faaearaa aore ra te huru haapiiraa e tano ia tauturu noa mai te reira ia tavini ia Iehova.

9. No te aha eiaha tatou ia haavare ia tatou iho?

⁹ A hiˈopoa i te tumu e rave ai tatou i tera faaotiraa. No Iehova, mea faufaa te manaˈo turai. (Mas. 21:2) Te titau mai ra oia ia riro tatou ei taata haavare ore i roto i te mau tuhaa atoa. Ia rave tatou i te hoê faaotiraa, eiaha e haavare ia tatou iho e i te taata. E ere anaˈe to tatou manaˈo turai i te mea maitai, mea fifi ia rave faahope i ta tatou i faaoti. A feruri na i te hoê taeae apî tei faaoti i te riro ei pionie tamau. I muri mai râ, aita i naea ia ˈna te rahiraa hora i titauhia, ere atura oia i te oaoa i roto i ta ˈna taviniraa. I manaˈo na paha oia ua rave o ˈna i tera faaotiraa no to ˈna here ia Iehova. Peneiaˈe râ, ua na reira noa oia ia mauruuru to ˈna nau metua aore ra te tahi atu taata ta ˈna e faatura ra!

10. Eaha te titauhia no te rave i te mau tauiraa?

 ¹⁰ I teie nei, a feruri na i te hoê piahi Bibilia tei faaoti e faaea i te puhipuhi i te avaava. I te haamataraa, ua tutava oia i te na reira e piti hebedoma, i muri mai râ, ua hema faahou. Aita râ te piahi i tuu, ua tutava â oia e ore roa ˈtura tera peu! Na to ˈna here ia Iehova i tauturu ia ˈna ia faaea i te puhipuhi i te avaava!—Kol. 1:10; 3:23.

11. No te aha mea faufaa ia haamau i te hoê fa taa maitai?

¹¹ A haamau i te hoê fa taa maitai. Mea ohie aˈe ia rave faahope i ta tatou i haamata ua papu anaˈe ia tatou eaha te fa. Ia faaoti tatou i te taio tamau i te Bibilia, aita râ e tapura taioraa Bibilia, eita tatou e rave faahope i ta tatou i faaoti i te rave. * E opua paha te mau matahiapo o te amuiraa e rave tamau atu â i te mau tere faaitoitoraa, ua mairi râ te mau mahana, aita â ratou i rave mai tei faaotihia. Ia naea te fa haamauhia, e titauhia i te mau matahiapo ia uiui: “Ua tapao anei matou te iˈoa o te mau taeae e tuahine e hinaaro i te hoê tere faaitoitoraa? Ua hamani anei matou i te hoê tapura e faaite i te taio mahana no te farerei i tera e tera taeae e tuahine?”

12. No nia i ta tatou mau faaotiraa, eaha paha te titauhia ia rave e no te aha?

¹² Eiaha e titau i te ore e maraa. Aita to tatou e taime e e puai no te rave i te mau mea atoa ta tatou e hinaaro. Mea faufaa roa ia farii e otia to tatou e ia rave noa i te maraa ia tatou. E titauhia paha ia faatano i te hoê faaotiraa tei ravehia, o te ore faahou râ e maraa ia tatou. (Koh. 3:6) Ua hiˈopoa faahou anei outou i te hoê faaotiraa ravehia e ua faatano ia au i te maraa ia outou? Eaha te tauturu atu ia rave faahope i ta outou i haamata?

13. E nafea ia noaa te puai no te rave faahope i ta outou i haamata?

¹³ A ani ia Iehova i te puai no te rave faahope i ta outou i haamata. E nehenehe Iehova e tuu i roto ia outou i “te hinaaro e te puai” no te rave faahope i ta outou faaotiraa. (Phil. 2:13) A ani ia Iehova i to ˈna varua moˈa no te fanaˈo i te itoito e titauhia. Eiaha e faaea i te pure noa ˈtu e au ra e aita ta outou pure e pahonohia ra. Ua faaitoito mai hoi Iesu: “A tamau i te ani, e horoahia mai.”—Luka 11:9, 13.

14. E nafea te aratairaa i roto i te Maseli 21:5 e tauturu ai ia rave faahope i ta outou i haamata?

¹⁴ A hamani i te hoê tapura ohipa. (A taio i te Maseli 21:5 i roto i te nota. *) No te rave faahope i ta outou i haamata, e titauhia te hoê tapura ohipa taa maitai. I muri mai, a haapao maite i te reira. A rave ai i te hoê faaotiraa, a tapao i te mau ohipa e titauhia ia rave no te faaoti i ta outou i haamata. Mea rahi anaˈe te ohipa e titauhia ia rave, a tatuhaa i te reira. E oti oioi ïa te ohipa e eita outou e haapeapea. Hoê â aˈoraa ta Paulo i horoa i to Korinetia. Ia ore ta ratou ô ia haaputuhia i te taime hopea, ua faaitoito oia ia ratou ia faataa maa moni iti i “te mahana matamua o te hebedoma atoa.”—Kor. 1, 16:2.

15. Ia oti ta outou tapura ohipa, eaha te titauhia ia rave i muri mai?

¹⁵ E tauturu te papai-roa-raa i te hoê tapura ohipa ia rave faahope i ta outou i haamata. (Kor. 1, 14:40) No reira te tino  matahiapo e faaitoitohia ˈi ia maiti i te hoê o ratou no te tapao i te mau faaotiraa atoa i ravehia, o vai te rave i tera e tera tuhaa ohipa e eaha te taio mahana e titauhia ia oti te reira. Ia na reira te mau matahiapo, eita ïa ratou e tairi hanoa i te mataˈi! (Kor. 1, 9:26) No te aha e ore ai e pee i te hoê â faanahoraa? A tapao i te mau ohipa ta outou e hinaaro e rave i tera e tera mahana. I nia i ta outou tapura, a tuu i nia roa te ohipa matamua e titauhia ia rave. Mea rahi aˈe ïa te ohipa e oti e eita to outou taime e mâuˈa hanoa.

16. Eaha ˈtu â te titauhia no te rave faahope i ta tatou i haamata? Eaha te faaitoitoraa e horoahia ra i roto i te Roma 12:11?

¹⁶ Eiaha e tuu. E titauhia te tutavaraa no te haapao maite i te tapura ohipa e no te rave faahope roa i ta outou i haamata. (A taio i te Roma 12:11.) Ua parau Paulo ia Timoteo ia “tamau i te haamataro” no te riro ei taata aravihi i te haapii ia vetahi ê. E tano atoa tera aˈoraa no te mau fa pae varua atoa ta tatou e haamau.—Tim. 1, 4:13, 16.

17. E nafea te Ephesia 5:15, 16 e tauturu mai ai ia rave faahope i ta tatou i haamata?

¹⁷ A faaohipa maitai i to outou taime. (A taio i te Ephesia 5:15, 16.) Eiaha e tiai i te taime tano roa no te rave faahope i ta outou i haamata, a maiti râ i te hoê mahana taa maitai e a haapao maite i te reira. (Koh. 11:4) Eiaha atoa e haamâuˈa i te taime no te rave i te mau ohipa e ere i te mea faufaa roa e o te faarohirohi ia outou. (Phil. 1:10) Ia nehenehe, a faaherehere i te hoê taime eita outou e haafifihia. Ia ite vetahi ê ua faataa outou i tera taime no te feruri maite. Eiaha e haamoˈe i te tupohe i ta outou vini e a tiai i te tahi atu taime no te hiˈo i te mau rata uira e reni faahoaraa. *

18-19. Eaha te tauturu ia rave faahope i ta outou i faaoti noa ˈtu e ere i te mea ohie i te tahi taime?

¹⁸ A tiatonu i te mau maitai. Ia oti outou i te rave faahope i ta outou i haamata, mai te huru ra ïa ua tapae outou i te vahi ta outou i faaoti i te haere. Noa ˈtu e opanihia te purumu, e imi outou i te mau ravea atoa no te tapae atu. Ia tiatonu atoa outou i te mau maitai e itehia na roto i ta outou faaotiraa, eita outou e tuu e tae roa i te taime e oti roa ˈi ta outou i haamata!—Gal. 6:9.

¹⁹ E ere i te mea ohie ia rave i te faaotiraa maitai e ia faatupu i te reira. Maoti râ ta Iehova tauturu, e fanaˈo outou i te paari e te puai no te rave faahope i ta outou i haamata!