1. Uphẹn vọ yen Jihova kẹ avwanre?

JIHOVA kẹ avwanre uphẹn rẹ avwanre ọvo vwo brorhiẹn rẹ oka akpọ re che yerin. O yono avwanre obo re se vwo brorhiẹn rẹ aghwanre, avwanre je cha mrẹ ebruba rọyen siẹrẹ e de brorhiẹn rọ nẹrhẹ oma vwerhọn. (Une 119:173) Ọtiọyena, avwanre che bru omamọ rẹ erhiẹn siẹrẹ e de ru nene odjekẹ rehẹ Baibol na.—Hib. 5:14.

2. Ebẹnbẹn vọ yen e se hirharokuẹ siẹrẹ e de brorhiẹn evo nu?

² Emamọ rẹ erhiẹn evo je tobọ bẹn enene. Di roro kpahen idje evo: Oniọvo ọvo ro dia eghene brorhiẹn nẹ ọyen che se ọsoso ri Baibol na re. Ọ nabọ muomaphiyọ isese na vwẹ idughwrẹn evo, ọmọke vwọ wan nu, ọ da rhe dobọji. Oniọvo rẹ aye ọvo brorhiẹn rọ vwọ dia ọkobaro, ẹkẹvuọvo, ko dje ẹdẹ na ẹkpẹkparọ. Ekpako ukoko ọvo brorhiẹn rẹ ayen vwọ kọn bru iniọvo evo ra bọn ayen gan, ẹkẹvuọvo emeranvwe buebun wanvrẹ re, jẹ ayen je sa ra-a. Dede nẹ erhiẹn rẹ iniọvo nana fẹnẹ ohwohwo, ẹkẹvuọvo o vwo oborẹ ayen eje vwọ họhọ oma. Ayen brorhiẹn ẹkẹvuọvo, ayen se ru nene-e. Inenikristi re ẹgbukpe ujorin ẹsosuọ re dia Kọrẹnt ji vwo oka rẹ ebẹnbẹn yena. E jẹ avwanre fuẹrẹn obo re se yono mie ayen.

3. Orhiẹn vọ yen iniọvo ri Kọrẹnt bruru, kẹ die yen phiare?

³ Iniọvo ri Kọrẹnt brorhiẹn ọghanghanre ọvo vwẹ omarẹ ukpe ri 55 C.E. Ayen nyori nẹ iniọvo rayen rehẹ Jerusalẹm vẹ Judia hirharoku uwenre ọgangan, ikoko efa ki toro igho ra vwọ chọn ayen uko. Fikirẹ uruemuesiri  vẹ ẹse eruo rayen, ayen de brorhiẹn nẹ ayen che ru itetoro, ọtiọyena ayen da nọ ọyinkọn Pọl kpahen oborẹ ayen sa vwọ vwẹ ukẹcha phia. Pọl da vwẹ odjekẹ vwo rhe ayen ji vuẹ Taitọs nẹ ọ reyọ utoro rayen na rhe. (1 Kọr. 16:1; 2 Kọr. 8:6) Emeravwe evo vwọ wan nu, Pọl de nyo nẹ iniọvo na ji rhi ru utoro na-a. Ọtiọyena, a cha sa mrẹ utoro na vwọba ọ rẹ ikoko efa mu kpo Jerusalẹmu-u.—2 Kọr. 9:4, 5.

4. Vwo nene eta rehẹ 2 Kọrẹnt 8:7, 10, 11, uchebro vọ yen Pọl vwọ kẹ iniọvo ri Kọrẹnt?

⁴ Omamọ orhiẹn yen iniọvo ri Kọrẹnt na bruru, Pọl ji jiri ayen fikirẹ esegbuyota ọgangan ro rhe ayen vẹ owenvwe rẹ ayen vwo ru itetoro na. Ẹkẹvuọvo, o ji bru ayen uche nẹ ayen ru oborẹ ayen tonphiyọ re. (Se 2 Kọrẹnt 8:7, 10, 11.) Obo re phia kẹ ayen na yono avwanre nẹ, ọ sa bẹn vwọ kẹ Inenikristi re fuevun rẹ ayen vwo ru nene omamọ orhiẹn rẹ ayen bruru.

5. Enọ vọ yen a cha kpahenphiyọ?

⁵ Kerẹ Inenikristi ri Kọrẹnt, avwanre je sa mrẹ bẹnbẹn re vwo ru nene erhiẹn rẹ avwanre bruru. Diesoro? Fikirẹ jẹgba, avwanre se dje erhiẹn rẹ avwanre evo ẹkpẹkparọ. Obo re rhẹro rọye-en je sa nẹrhẹ ọ bẹn re vwo ru nene orhiẹn re bruru. (Aghwo. 9:11; Rom 7:18) Mavọ yen a sa vwọ fuẹrẹn orhiẹn evo re bru wanre sẹ ofori nẹ e wene ayen? Mavọ yen e se vwo ru oborẹ avwanre tonphiyọ re?

6. Ọke vọ yen e se vwo wene erhiẹn rẹ avwanre bruru?

⁶ O vwo orhiẹn ebro evo rẹ avwanre che se wene-e. Kerẹ udje, avwanre che tinka mu orhiẹn rẹ avwanre bruru ra vwọ ga Jihova, a je cha fuevun kẹ aye yẹrẹ ọshare rẹ avwanre. (Mat. 16:24; 19:6) Vwọ kẹ erhiẹn efa, e se wene ayen. Diesorọ? Fikiridie akpeyeren rẹ ohwo se wene. Die yen sa chọn avwanre uko vwo bru omamọ rẹ orhiẹn?

7. Die yen ofori nẹ a yare mie Jihova, kẹ diesorọ?

⁷ Yare Aghwanre mie Jihova. Ẹwẹn ọfuanfon mu Jems vwo si: “Ohwo ro rhe vwo aghwanre vwẹ usun rẹ ovwa-an, e jọ nọ vwẹ obọ rẹ Ọghẹnẹ, ọye ri se siobọ nẹ kemu kemu kẹ ohwo.” (Jems 1:5) Vwẹ idjerhe evo, a je sa tanẹ “aghwanre” kanre avwanre eje. Ọtiọyena, nẹrhovwo rhe Jihova siẹrẹ wo de che brorhiẹn yẹrẹ wene orhiẹn ọvo ru wo bruru jovwo. Jihova cha chọn wẹ uko vwo bru orhiẹn rẹ aghwanre.

8. Ehiahiẹ vọ yen ofori nẹ e ru tavwen e ki brorhiẹn?

⁸ Nabọ ru ehiahiẹ. Yono Ota rẹ Ọghẹnẹ, se ẹbe rẹ ukoko na, rere wọ je nokpẹn rẹ uchebro mie ihwo ru wọ vwẹroso. (Isẹ 20:18) Ofori nẹ e ru ehiahiẹ ọtiọyen siẹrẹ ohwo de che wene iruo, kua kpo asan ọfa yẹrẹ jẹ oka ẹbe eyono rọ sa nẹrhẹ ọ mrẹ igho vwọ vwẹrote oma rọyen vwẹ ẹga ri Jihova.

9. Erere vọ yen a cha mrẹ siẹrẹ e de sianro ta uyota kẹ oma rẹ avwanre?

⁹ Fuẹrẹn iroro ro mu we vwo brorhiẹn na. Jihova vwo oniso rẹ iroro ro mu avwanre vwo brorhiẹn. (Isẹ 16:2) Ọ guọnọre nẹ avwanre fuevun vwẹ kemu kemu. Ọtiọyena e de che brorhiẹn, ofori nẹ avwanre sianro ta uyota kẹ oma rẹ avwanre vẹ ihwo efa kpahen iroro ro mu avwanre vwo brorhiẹn na. Ọ rha dia ọtiọye-en, ọ sa bẹn re vwo ru nene orhiẹn ebro rẹ avwanre. Kerẹ udje,  eghene ọshare se brorhiẹn rọ vwọ dia ọkobaro. Jẹ ọke evo vwọ wan nu, kọ phara ro vwo ru inọke rọyen gba, ọtiọyena ọ rha mrẹ aghọghọ vwẹ iruo aghwoghwo na-a. Ọkiọvo, o se roro nẹ owenvwe rọ vwọ nẹrhẹ oma vwerhen Jihova yen muro vwọ dia ọkobaro. Ẹkẹvuọvo, ọ sa dianẹ obo ri muro vwọ dia ọkobaro yen ọ vwọ nẹrhẹ oma vwerhen oni vẹ ọsẹ rọyen yẹrẹ ihwo efa.

10. Die yen a guọnọre re se vwo ru ewene?

¹⁰ Roro kpahen ohwo ra vwẹ Baibol yono ro brorhiẹn nẹ ọyen cha dobọ rẹ isigati ephopho ji. Dede nẹ ọlọhọre-e, ọ kẹnoma kẹ omarẹ udughwrẹn ọvo fi ivẹ, ẹkẹvuọvo, ọ da rhoma she ruọ. Ukuko rọyen, o da rhe dobọ rẹ isigati ephopho na ji! Ẹguọnọ ro vwo kpahen Jihova vẹ owenvwe ro vwo ru ọhọre rọyen yen chọn rọ uko vwo phi orharhe uruemu yena kparobọ.—Kọl. 1:10; 3:23.

11. Diesorọ o vwo fo nẹ wo bru ẹkẹn kẹ oma?

¹¹ Bru ẹkẹn kẹ oma. Wọ de bru ẹkẹn kẹ oma, kọ cha lọhọ wo vwo ruo gba. Kerẹ udje, wo se brorhiẹn nẹ wo che se Baibol na ọkieje. Ẹkẹvuọvo, wo rhe vwo uvi rẹ ọrhuẹrẹphiyotọ-ọ, wo che se ruo-o. * Yẹrẹ ekpako rẹ ukoko ọvo se brorhiẹn rẹ ayen vwọ kọn bru iniọvo evo ra bọn ayen gan, ẹkẹvuọvo, ọke evo vwọ wan nu, ayen sa ra-a. Rere ayen se vwo phikparobọ, ofori nẹ ayen nọ oma rayen enọ nana: “Avwanre tobọ si edẹ rẹ iniọvo ro fori nẹ a kọn brura na phiyotọ? Avwanre se ọke ra cha vwọ kọn bru ayen ra?”

12. Die yen avwanre se ru, kẹ diesorọ?

¹² Vwo ẹro abavo. Ohwo vuọvo vwo ọke, igho yẹrẹ ẹgba ro vwo ru kemu kemu rọ guọnọ ru-u. Ọtiọyena gbe vwo ẹro abavo wọ je dia ohwo rọ sa nuẹ. Ọkiọvo dede, wo se wene orhiẹn ebro evo ru wo niri nẹ e vrẹ wẹ oma. (Aghwo. 3:6) Ọ da dianẹ wọ fuẹrẹn erhiẹn wẹn evo, ru ewene ro fori, ji no nẹ wo se ruo vwo? Owọẹjẹ iyorin ra cha fuẹrẹn na sa chọn wẹ uko vwo ru oborẹ wọ tonphiyọ re.

13. Mavọ wọ sa vwọ mrẹ ẹgba vwo ru nene orhiẹn ebro wẹn?

¹³ Yare ẹgba mie Jihova. Ọghẹnẹ sa kẹ wẹ “ẹgba wo vwo ruiruo” nene orhiẹn ebro wẹn. (Fil. 2:13) Ọtiọyena, gba yare ukẹcha rẹ ẹwẹn ọfuafon ri Jihova rere ọ kẹ wẹ ẹgba. Dje ẹrhovwo ẹnẹnẹ ọ da tobọ dianẹ wo niro nẹ a je rhe kpahenphiyọ ẹrhovwo wẹ na-a. Jesu da ta: “Nọ, ka [vwẹ ẹwẹn ọfuanfon na] kẹ wẹ.”—Luk 11:9, 13.

14. Mavọ yen odjekẹ rọhẹ Isẹ 21:5 sa vwọ chọn wẹ uko vwọ yanmu orhiẹn ebro wẹn?

¹⁴ Vwo ọrhuẹrẹphiyotọ. (Se Isẹ 21:5.) Wọ guọnọ ọrhuẹrẹphiyotọ wo se vwo ru nene orhiẹn ru wo bruru. Ofori nẹ wo ru nene ọrhuẹrẹphiyotọ na. Siẹrẹ wo de brorhiẹn, ofori nẹ wo si erọnvwọn eje re sa chọn wẹ uko vwo ru orhiẹn ebro wẹn na gba. Oborẹ wo che ru na da rho mamọ, gharọ phiyọ ẹkuẹko, wọ sa vwọ riẹn asan wo ru tere. Pọl vwẹ uchebro kẹ iniọvo ri Kọrẹnt nẹ ayen vwẹ imigho vwọ jahwa “vwẹ ẹdẹ rẹsosuọ rẹ ẹdidjala kẹdidjala” ukperẹ ayen vwọ hẹrhẹ te ọke ọyen vwọ rhe. (1 Kọr. 16:2) Ra vwọ ghare obo re che ru phiyọ ẹkuẹko itete, nẹrhẹ udu rẹ ewian re pha rhuarho rhe bru ohwo-o.

15. Die yen e se ru siẹrẹ e de ru ọrhuẹrẹphiyotọ nu?

 ¹⁵ Ọrhuẹrẹphiyotọ ra nabọ si phiyotọ sa nẹrhẹ ọ lọhọ re vwo ru nene orhiẹn re bruru. (1 Kọr. 14:40) Kerẹ udje, a vwẹ odjekẹ vwọ kẹ ekpako ukoko nẹ ayen sanẹ ọkpako ọvo ro che si erhiẹn rẹ ekpako na bruru phiyotọ, ohwo ro che ruo kugbe ẹdẹ re che vwo ruo re. Ekpako ri nene odjekẹ nana rha cha mrẹ bẹnbẹn rẹ ayen vwo ru nene orhiẹn ebro raye-en. (1 Kọr. 9:26) Wo ji se nene odjekẹ yena. Kerẹ udje, wo se si erọnvwọn ru wo che ru kẹdi kẹdẹ phiyotọ je ghare ayen utute vwo nene oborẹ wo che ru ayen wan. Ọnana cha nẹrhẹ wọ wian ewian na eje ji fobọ wian ayen re.

16. Die yen a guọnọre wo se vwo ru nene orhiẹn ru wo bruru, mavọ yen Rom 12:11 wan dje ọnana phia?

¹⁶ Muomaphiyọ. Ọ guọnọ ẹgbaẹdavwọn re se vwo ru nene orhiẹn re bruru, e mi ruo re. (Se Rom 12:11.) Pọl vuẹ Timoti nẹ o “mie se ọbe ofuanfon na” rere ọ sa vwọ dia uvi rẹ oyono. Uchebro yena ji churobọ si kemu kemu rẹ avwanre guọnọ ru vwẹ ẹga ri Jihova.—1 Tim. 4:13, 16.

17. Mavọ yen uchebro rọhẹ Ẹfesọs 5:15, 16 sa vwọ chọn avwanre uko vwo ru nene orhiẹn rẹ avwanre?

¹⁷ Vwẹ aghwanre reyọ ọke wẹn vwo ruiruo. (Se Ẹfesọs 5:15, 16.) Se ọke ru wo che vwo ru oborẹ wo brorhiẹn rọyen na, wo mi ji ruo. Kẹnoma kẹ uruemu ra vwọ hẹrhẹ ọke ro me fuoma wọ ke tonphiyọ, kidie ọkiọvo ọke yena cha rhe-e. (Aghwo. 11:4) Wo jẹ erọnvwọn ri fiemu-u reyọ ọke vẹ ẹgba ru wo che vwo ru erọnvwọn re ma ghanre-e. (Fil. 1:10) Ọ da dia oborẹ wo se ru, sane ọke ru wo niri nẹ ihwo che vwo je uwe ekpokpo. Vuẹ ihwo nẹ ayen kẹ wẹ uphẹn. Wọ sa tobọ fun ifonu wẹn, ji ni evuẹ wẹn siẹrẹ wo de ru nu. *

18-19. Die yen sa chọn we uko vwo tinkamu orhiẹn ebro wẹn ọ da tobọ dianẹ wo hirharoku ebẹnbẹn?

¹⁸ Tẹnrovi erhuvwu ro che nẹ orhiẹn na rhe. Okuphiyọ rẹ orhiẹn ebro họhọ asan rẹ ohwo ra. Wọ da guọnọ te asan wọ ra, ọ da tobọ dianẹ emuọvo shegbere idjerhe, wọ cha guọnọ idjerhe ọfa. Vwẹ idjerhe vuọvo na, avwanre da tobọ hirharoku ebẹnbẹn vwẹ orhiẹn rẹ avwanre, e jẹ a tẹnrovi erhuvwu ro che norhe.—Gal. 6:9.

¹⁹ Ọ bẹn re vwo brorhiẹn, jẹ a vwọ yanmuo kọyen ma bẹn. Jihova cha kẹ wẹ aghwanre vẹ ẹgba wo se vwo ru obo ru wọ tonphiyọ re.