1-2. Pingo omyero Lukricitayo me kare-ni gubed ki miti i kom buk pa Lulevi?

LAKWENA Paulo opoyo wi lareme Temceo ni ‘ginacoya ducu ma yam gicoyo, gicoyo pi teko pa cwiny pa Lubanga dok tye me kony.’ (2 Tem. 3:16) Buk pa Lulevi bene tye i kin ginacoya magi. In ineno buk me Baibul meno nining? Jo mukene gineno calo obedo buk ma tye ki cik mapol ma pe tiyo i karewa-ni, ento Lukricitayo me ada gitye ki neno mapat.

² Buk pa Lulevi kicoyo mwaki ma romo 3,500 angec, ento Jehovah oweko kigwoko “me pwonyowa.” (Rom. 15:4) Buk pa Lulevi konyowa me niang kit ma Jehovah winyo dok tamo kwede i kom jami mogo. Pi meno, omyero wabed ki miti me nongo pwony ki iye. Ki lok ada, tye pwony mapol ma waromo nongone ki i buk meno ma Lubanga oweko kicoyo-ni. Kong dong wanenu pwony angwen i kingi.

3. Pingo onongo kityero leyi mwaka ki mwaka i Nino me Kwanyo Bal?

³ Pwony me acel: Myero wabed ki cwak pa Jehovah ka wek en ojol gityerwa. Mwaka ducu i Nino me Kwanyo Bal, Luicrael onongo giribbe kacel ci lalamdog madit tyero leyi. Gityer magi onongo konyo me poyo wi Luicrael ni mitte ni kikwany balgi woko! Ento ma peya lalamdog madit okelo remo me lakwany bal i Kabedo Maleng Makato Ducu i nino  meno, en onongo myero kong otim gin mukene, gin ma pire tek loyo timo kica pi bal pa lwak.

4. Kit ma kitito kwede i Lulevi 16:12, 13, gin ango ma onongo lalamdog madit timo tyen mukwongo ma en donyo kwede i Kabedo Maleng Makato Ducu i Nino me Kwanyo Bal? (Nen cal ma i pok ngeye.)

⁴ Kwan Lulevi 16:12, 13. Go kong gin ma onongo timme i Nino me Kwanyo Bal: Lalamdog Madit odonyo i kema me woro. Man aye tyen mukwongo i kin tyen adek ma en myero odony kwede i Kabedo Maleng Makato Ducu i nino meno. I cinge tungcel en omako atabo ma opong ki odok eceta ma ngwece kur, i cinge mukene en otingo atabo weer me wango odok eceta ma opong ki lodi mac. En ocung kong manok i nyim bongo ma umo Kabedo Maleng Makato Ducu. Ki woro madit, en odonyo i Kabedo Maleng Makato Ducu ci ocung i nyim canduk me gicikke. Bedo calo en ocung i nyim Lubanga Jehovah kikome! I cawa man, lalamdog madit cako onyo odok eceta i lodi mac, ci i tyelo pong ki ngwec odok eceta ma kur-ri. * Lacen en dok bidonyo i Kabedo Maleng Makato Ducu ki remo pa lee ma gityero. Nge ni meno lalamdog madit owango odok eceta ma peya otyero remo me lakwany bal.

5. Gin ango ma wapwonyo ki i kit ma onongo kitiyo kwede ki odok eceta i Nino me Kwanyo Bal?

⁵ Gin ango ma wapwonyo ki i kit ma onongo kitiyo kwede ki odok eceta i Nino me Kwanyo Bal? Baibul nyuto ni lega pa lutic pa Jehovah ma gin lugen tye calo odok eceta makur. (Jab. 141:2; Yabo 5:8) Wi opo ni lalamdog madit onongo kelo odok eceta i nyim Jehovah ki woro madit. I yo acel-lu, ka wabino bot Jehovah i lega, omyero wabin ki woro madit. Watye ki pwoc ni Lacwe polo ki lobo ye ni wabin bote dok wanyikke cok kwede, kit ma latin bedo cok ki wonne. (Yak. 4:8) En jolowa me bedo lureme! (Jab. 25:14) Watye ki pwoc madit adada pi mot man mumiyo pe wamito ni watim gin mo keken ma cwero cwinye.

6. Gin ango ma wapwonyo ki i kit ma lalamdog madit onongo kong wango odok eceta ma nongo peya otyero gitum?

⁶ Wi opo ni lalamdog madit onongo myero kong owang odok eceta ma peya otyero gitum. Man onongo weko en nongo cwak pa Lubanga i cawa me tyero gitum. Meno miyowa pwony ango? I kare ma Yecu tye i lobo, en otimo gin mo ma pire tek​—gin ma pire tek loyo yabo yo me laro dano—​dok otimo man ma en peya omiyo kwone macalo gitum. Gin ango ma en otimo-ni? Onongo mitte ni en obed lawiny bot Jehovah pi kwone ducu i wi lobo wek Jehovah ojol gitum ma mege lacen. I yo meno, Yecu onongo binyuto ni timo jami i yo pa Jehovah aye obedo yo maber loyo me kwo. Yecu onongo binyuto ni yo me loc pa Wonne aye tye atir.

7. Pingo yo me kwo pa Yecu ducu i lobo-ni oyomo cwiny Wonne?

⁷ Pi kare me kwone ducu i lobo, Yecu obedo lawiny kun lubo rwom me kit matir pa Jehovah. Kadi bed en owok ki i atematema ki kwo matek, dok onongo ngeyo ni ebito to malit, en omoko tamme me nyuto ni yo me loc pa Wonne aye ber loyo. (Pil. 2:8) I kare ma Yecu okato ki i atematema, en olego matek “ki koko ki pig wange.” (Ibru 5:7) Legane ki cwinye ducu onyuto ni en lagen bot Jehovah  dok ojingo mitine me bedo lawiny. Ki bot Jehovah, lega pa Yecu onongo tye calo odok eceta ma ngwece kur. Yo me kwo pa Yecu ducu oyomo cwiny Wonne dok oilo malo twero me Locce.

8. Waromo lubo kit me kwo pa Yecu nining?

⁸ Watwero lubo lanen pa Yecu ka watute matek me winyo Jehovah ki bedo lugen bote. Ka watye ka wok ki i atematema, walego ki cwinywa ducu pi kony pa Jehovah pien wamito ni wayom cwinye. I yo ma kit meno wanyuto cwakwa pi kit ma Jehovah loyo kwede ki locce. Wangeyo ni Jehovah pe bijolo legawa ka watimo jami mogo ma en dagi. Ento, ka wakwo ma lubbe ki rwom me kit ma atir pa Jehovah, watwero bedo ki gen ni legawa ki cwinywa ducu bibedo calo odok eceta ma ngwece kur bot Jehovah. Dok watwero bedo labongo akalakala mo ni gwoko gennewa ki bedo luwiny yomo cwiny Wonwa.​—Car. 27:11.

9. Pingo jo Icrael onongo gimiyo gityer me lakwecwiny?

⁹ Pwony me aryo: Watiyo pi Jehovah pien watye ki pwoc. Wabiniang i kom pwony man ka wawoto ki ngiyo gityer me lakwecwiny ma onongo jo Icrael gityero. * I buk pa Lulevi, wapwonyo ni Laicrael onongo twero miyo gityer me lakwecwiny “pi miyo pwoc.” (Levi 7:11-13, 16-18) En onongo miyo gityer man, pe ni pien mitte i te cik, ento pien cwinye mito. Man onongo gityer ma ngat moni miyo kun a ki i  cwinye pien en maro Lubangane Jehovah. Ngat ma tye ka miyo gityer meno, jo gange, ki lulamdog aye onongo gicamo ringo pa lee ma gityero. Ento jami mogo ki i kom lee meno onongo kityero bot Jehovah keken. Jami mene?

10. I yo ma nining ma gityer me lakwecwiny ma kiloko pire i Lulevi 3:6, 12, 14-16 rom aroma ki tic pa Yecu bot Jehovah?

¹⁰ Pwony me adek: Pien wamaro Jehovah, wamine gin maber loyo ma watye kwede. Jehovah onongo neno dwolo calo gin maber loyo i kom lee. En bene owaco ni jami mogo ma tye i i lee, kadi wa olang nyo angalura, pigi onongo tek bote. (Kwan Lulevi 3:6, 12, 14-16.) Pi meno Jehovah onongo cwinye bedo yom adada ka Laicrael mo omiyo jami i lee ki dwolone bote. Laicrael ma omiyo gityer ma kit man nyuto mitine me miyo gin maber loyo bot Lubanga. Marom aroma, Yecu bene omiyo bot Jehovah jamine maber loyo ki tic pire ki cwinye ducu dok pi marre pire. (Jon 14:31) Timo miti pa Lubanga okelo yomcwiny bot Yecu; en onongo tye ki mar matut pi cik pa Lubanga. (Jab. 40:8) Nen calo oyomo cwiny Jehovah adada me neno ka Yecu tiyo pire labongo dic!

11. I yo ango ma ticwa tye calo gityer me lakwecwiny, dok meno twero cuko cwinywa nining?

¹¹ Ticwa pi Jehovah tye calo gityer me lakwecwiny magi pien nyuto kit ma wawinyo kwede i kome. Wamiyo bot Jehovah gin maber loyo ma watye kwede, dok watimo man pien ni wamare ki cwinywa ducu. Pud dong yomo cwiny Jehovah me neno dano milion mapol ma gidyere me tic pire pi mar ma gitye kwede pire ki pi yone! Cuko cwinywa me ngeyo ni Jehovah pe neno ticwa keken ento bene cwiny ma watye kwede. Me labolle, ka dong iti ma pe itwero timo tic mapol kit ma cwinyi mito, bed ki gen ni Jehovah niang kit ma iwinyo kwede. Iromo winyo calo pe itye ka timo tic muromo pi Jehovah, ento en neno mar ma tye i cwinyi ma weko itimo gin ma pud itwero. Cwinye bedo yom me jolo gin maber loyo ma itwero miyone.

12. Jehovah onongo winyo nining i kom gityer me lakwecwiny, dok meno cuko cwinywa nining?

¹² Ngo ma watwero pwonyone ki i gityer me lakwecwiny? I cawa ma mac tye ka wango jami mabeco loyo ki i kom lee, yito onongo duny cito malo dok yomo cwiny Jehovah. Pi meno itwero bedo ki gen ni Jehovah cwinye yom kwedi ka in bene itiyo pire ki cwinyi ducu labongo dic mo. (Kol. 3:23) Go kong kit ma cwinye yom kwede i komi. Jehovah tero tuteni i ticce, kadi dwong nyo nok, calo lonyo dok wiye pe biwil iye matwal.​—Mat. 6:20; Ibru 6:10.

13. Ma lubbe ki Lulevi 9:23, 24, Jehovah onyuto cwakke nining i kom lulamdog manyen-ni?

¹³ Pwony me angwen: Jehovah tye ka goyo laane i kom but dulle ma i lobo. Tam kong gin mutimme i mwaka 1512 K.M.P. i kare ma kiyubo kema me woro i te Got Cinai. (Nia 40:17) Moses odoro yub me kwero Aron ki awobene macalo lulamdog. I nge meno jo Icrael gugure kacel me neno ka lulamdog manyen magi gityero gitumgi mukwongo. (Levi 9:1-5) Jehovah onyuto cwakke pi lulamdog manyen-ni nining? I kare ma Moses ki Aron gitye ka lamo gum i kom lwak, Jehovah ocwalo mac obino owango gitum ma onongo pud odong i wi keno tyer.​—Kwan Lulevi 9:23, 24.

14. Pingo cwak ma Jehovah onyuto i kom tic pa Aron ki awobene macalo lulamdog pire tek piwa i kare-ni?

 ¹⁴ Gin ango ma mac ma obino ki i polo i kare me kwero lulamdog onyuto? Jehovah ocwalo mac-ci me nyuto ni ecwako Aron ki awobene ma eyerogi me bedo lulamdog. I kare ma Luicrael guneno atir cwak pa Jehovah i kom lulamdog magi, guniang ni gin bene myero gimi cwakgi bot lulamdog magi. Tika meno tye ki pwony mo piwa? Ee! Tic pa lulamdog me Icrael onongo cung pi tic pa lalamdog madit loyo. Yecu aye Lalamdog Madit loyo, dok en tye ki jo 144,000 ma gibitic macalo luker ki lulamdog kacel kwede i polo.​—Ibru 4:14; 8:3-5; 10:1.

15-16. I yo ma nining ma Jehovah onyuto kwede cwakke i kom “lagwok ot ma lagen dok maryek”?

¹⁵ I mwaka 1919, Yecu ocimo gurup matidi pa Lukricitayo ma kiwirogi me tic macalo “lagwok ot ma lagen dok maryek.” Lagwok ot meno telo wiwa i tic me tito kwena dok miyo bot lulub kor Kricito “camgi i kare ma mitte.” (Mat. 24:45) Tika watye ka neno ka maleng cwak pa Lubanga i kom lagwok ot ma lagen dok maryek?

¹⁶ Catan ki lobone gitye ka tute matek me juko tic pa lagwok ot ma lagen. Ka onongo lagwok ot man pe ki cwak pa Jehovah, kono onongo pe gitwero cobo tic man. Lweny ma okwako lobe ducu otimme kiryo, peko me can lim tye matek, dok bene kiketo aunauna magwar i kom jo pa Jehovah. Kadi bed kit meno, lagwok ot ma lagen dok maryek tye ka medde ki miyo cam me cwiny pi lulub kor Kricito i lobo kany. Tam kong i kom jami akwana, vidio ki jami awinya mapol ata ma watye kwede i kare-ni, me nono, i leb makato  900 kulu! Man nyuto atyer ka maleng ni Lubanga tye ka miyo cwak i kom lagwok ot ma lagen. Nen kong dok gin mukene ma nyuto ni Jehovah tye ka goyo laane i komwa: tic me pwony. Ada, watye ka tito kwena maber-ri ‘i wi lobo ducu.’ (Mat. 24:14) Labongo akalakala mo, Jehovah tye ka tiro ki goyo laa i kom dulle i kare-ni.

17. Watwero nyuto cwakwa nining pi dul ma Jehovah tye ka tic kwede?

¹⁷ Bedo ber ka wapennye ki lapeny man, ‘Tika atye ki pwoc me ribbe ki but dul pa Jehovah ma tye i lobo?’ I kare pa Moses, Jehovah ocwalo mac ki i polo me nyuto cwakke i kom jo ma en ocimogi. I yo acel-lu, Jehovah ominiwa lanyut ma nen ka maleng ni etye ka tic ki dulle i kare-ni. Watye ki tyen lok mapol me bedo ki pwoc. (1 Tec. 5:18) Watwero nyuto cwakwa nining pi dul ma Jehovah tye ka tic kwede? Watimo meno ka walubo tira me Baibul ma kiminiwa i bukkewa, i cokkewa, i gure me adwol, ki i gure madito. Medo i kom meno, wanyuto cwakwa ki nywako i tic me tito kwena ki pwony ki kerowa ducu.​—1 Kor. 15:58.

18. Ngo ma imoko tammi me timone?

¹⁸ Myero wamoku tamwa me keto i tic pwony ma wanongo ki i buk pa Lulevi. Watute wunu matek me nongo cwak pa Jehovah wek en ojol gitumwa. Dok omyero watiyu pi Jehovah pien watye ki pwoc. Wamedde wunu ki miyo gin maber loyo ma watye kwede bot Jehovah pien wamare ki cwinywa ducu. Dong walegowu ni wumedde ki cwako dul ma Jehovah tye ka goyo laane i kome i kare-ni ki cwinywu ducu. Ka watimo jami magi, wanyuto bot Jehovah ni watye ki pwoc pi mot me tic pire macalo Lucadenne!