1-2. Mɛni he je nɛ e sa nɛ Kristofohi nɛ a ngɛ mwɔnɛ ɔ a bua nɛ jɔ he kaa a maa kase Mose womi nɛ ji etɛ ɔ?

BƆFO PAULO kai e huɛ Timoteo kaa “Ngmami ɔ tsuo je Mawu mumi mi nɛ se nami ngɛ he.” (2 Tim. 3:16) Mose womi nɛ ji etɛ ɔ hu piɛɛ he. Kɛ o naa Mose womi nɛ ji etɛ ɔ ha kɛɛ? Eko ɔ, ni komɛ naa lɛ kaa e ji womi ko kɛ e mi mlaahi fuu nɛ a he hia we ngɛ wa be nɛ ɔ mi, se anɔkuale Kristofohi nɛ lɛ jã.

² A ngma Mose womi nɛ ji etɛ ɔ maa pee jeha 3,500 ji nɛ ɔ, se Yehowa ha nɛ a baa yi “kɛ ha wɔ ní tsɔɔmi.” (Rom. 15:4) Mose womi nɛ ji etɛ ɔ haa nɛ wa naa Yehowa susumi, enɛ ɔ he ɔ, e sa nɛ wa bua nɛ jɔ he kaa wa maa kase. Ngɛ anɔkuale mi ɔ, níhi fuu ngɛ nɛ wa ma nyɛ maa kase ngɛ womi nɛ ɔ nɛ je Mawu mumi mi ɔ mi. Nyɛ ha nɛ waa hyɛ ní eywiɛ komɛ nɛ wa ma nyɛ maa kase ngɛ mi.

3. Mɛni he je nɛ blema a, a sãa afɔle daa jeha ngɛ Kpatami Ligbi ɔ nɔ ɔ?

³ Kekleekle nɔ́ nɛ wa ma nyɛ maa kase: Loko Yehowa maa kplɛɛ wa afɔle sami ɔmɛ a nɔ ɔ, ja e bua jɔ wa he. Daa jeha ngɛ Kpatami Ligbi ɔ nɔ ɔ, Israel ma a buaa a he nya, nɛ osɔfo nɔkɔtɔma pe kulaa a ngɔɔ lohwehi kɛ sãa afɔle. Jamɛ a afɔle sami ɔ kaiɔ Israel bi ɔmɛ kaa e sa nɛ a tsu a he ngɛ yayami he! Se loko osɔfo nɔkɔtɔma pe kulaa a maa ngɔ afɔle sami muɔ kɛ ya He Klɔuklɔu Pe Kulaa a ngɛ jamɛ a ligbi ɔ nɔ ɔ,  kekleekle ɔ, e sa nɛ e sɛ hlami nɛ e pee nɔ́ ko. Jamɛ a nɔ́ ɔ he hia kulaa pe ma a he yayami nɛ a kɛ maa pa mɛ ɔ.

4. Ngɛ 3 Mose 16:12, 13 ɔ nya a, ke osɔfo nɔkɔtɔma pe kulaa a sɛ He Klɔuklɔu Pe Kulaa a ngɛ Kpatami Ligbi ɔ nɔ ɔ, mɛni e peeɔ? (Hyɛ foni nɛ ngɛ womi ɔ hɛ mi ɔ.)

⁴ Kane 3 Mose 16:12, 13. Poo nɔ́ nɛ yaa nɔ ngɛ Kpatami Ligbi ɔ nɔ ɔ he foni nɛ o hyɛ: Osɔfo nɔkɔtɔma pe kulaa a sɛ bo tsu ɔ mi. E sɛɔ he klɔuklɔu pe kulaa a si etɛ ngɛ Kpatami Ligbi ɔ nɔ, nɛ enɛ ɔ ji kekleekle nɔ́. E kɛ e nine kake hɛɛ nɔ́ nɛ tsopa kɛ e he via ngɛ mi, nɛ e kɛ e nine kake ɔ hu hɛɛ sika tsu ngɛyu kɛ e mi la. E da si bɔɔ ngɛ tsu mi pomi bo nɛ a kɛ po He klɔuklɔu kɛ He Klɔuklɔu Pe Kulaa a kpɛti ɔ se. E kɛ he si bami sɛ He Klɔuklɔu Pe Kulaa a, nɛ e ya da si ngɛ somi daka a hɛ mi. Ngɛ okadi peemi nya a, e daa si ngɛ Yehowa Mawu hɛ mi! Jehanɛ ɔ, osɔfo ɔ plɛ tsopa kɛ e he via klɔuklɔu ɔ ngɔ pue la a mi, nɛ tsu ɔ mi tsuo bɔni via jemi liliili. * Pee se ɔ, e maa sɛ He Klɔuklɔu Pe Kulaa a ekohu kɛ muɔ nɛ a kɛ ma ha kaa yayami pami bɔ ɔ. Mo kadi kaa e sã tsopa kɛ e he via a loko e kɛ muɔ ɔ ha kaa yayami pami bɔ.

5. Mɛni wa ma nyɛ maa kase ngɛ tsopa kɛ e he via nɛ a kɛ tsuɔ ní ngɛ Kpatami Ligbi ɔ nɔ ɔ mi?

⁵ Mɛni wa ma nyɛ maa kase ngɛ tsopa kɛ e he via nɛ a kɛ tsuɔ ní ngɛ Kpatami Ligbi ɔ nɔ ɔ mi? Baiblo ɔ tsɔɔ kaa Yehowa sɔmɔli anɔkualetsɛmɛ a sɔlemi ngɛ kaa tsopa kɛ e he via. (La 141:2; Kpoj. 5:8) Mo kai kaa ke osɔfo nɔkɔtɔma pe kulaa a ngɔ tsopa kɛ e he via a kɛ ma Yehowa hɛ mi ɔ, e kɛ he si bami peeɔ jã. Jã kɛ̃ nɛ ke wa ya Yehowa hɛ mi ngɛ sɔlemi mi ɔ, wa peeɔ jã kɛ he si bami. Wa ngɛ bu nɛ mi kuɔ kɛ ha lɛ. Wa bua jɔ wawɛɛ kaa je ɔ tsuo Bɔlɔ ɔ ngmɛ wɔ blɔ konɛ waa ba e hɛ mi kaa bɔ nɛ bi hɛɔ kɛ suɔ e tsɛ he ɔ. (Yak. 4:8) E ngɔ wɔ kaa e huɛmɛ! (La 25:14) Wa bua jɔ he blɔ nɛ wa ná nɛ ɔ he wawɛɛ, enɛ ɔ he ɔ, wa be suɔe nɛ e nine nɛ nyɛ si.

6. Mɛni wa ma nyɛ maa kase ngɛ nɔ́ he je nɛ osɔfo nɔkɔtɔma pe kulaa a sãa tsopa kɛ e he via a loko e sãa afɔle ɔ mi?

⁶ Mo kai kaa osɔfo nɔkɔtɔma pe kulaa a sãa tsopa kɛ e he via a loko e sãa afɔle ɔmɛ. E peeɔ jã konɛ e kɛ na kaa Mawu bua jɔ e he loko e sãa afɔle ɔ. Mɛni wa ma nyɛ maa kase ngɛ mi? Benɛ Yesu ngɛ zugba a nɔ ɔ, e he ba hia nɛ e pee nɔ́ ko nɛ he hia wawɛɛ loko e ngɔ e wami kɛ sã afɔle​—jamɛ a nɔ́ ɔ he hia wawɛɛ pe adesahi a yi wami nɛ a ma he. Mɛni ji jamɛ a nɔ́ ɔ? Benɛ Yesu ngɛ zugba a nɔ ɔ, e sa nɛ e kɛ anɔkuale yemi nɛ bu Yehowa tue konɛ lɔ ɔ nɛ ha nɛ Yehowa nɛ kplɛɛ e afɔle sami ɔ nɔ. Jã nɛ Yesu maa pee ɔ ma ha nɛ waa na kaa bɔ nɛ e sa nɛ waa ba wa je mi ji kaa waa kɛ Yehowa blɔ tsɔɔmihi ma tsu ní. Yesu maa wo e tsɛ ɔ nɔ yemi ɔ nguɔ, aloo e maa tsɔɔ kaa blɔ nɛ e Tsɛ ɔ guɔ nɔ kɛ yeɔ nɔ ɔ da.

7. Mɛni he je nɛ níhi nɛ Yesu pee ngɛ e wami si himi mi ɔ tsuo sa e Tsɛ ɔ hɛ mi ɔ?

⁷ Benɛ Yesu ngɛ zugba a nɔ ɔ, e kɛ anɔkuale yemi bu Yehowa tue ngɛ nɔ́ fɛɛ nɔ́ mi. E ngɛ mi kaa e kɛ kahi kɛ si fɔfɔɛhi nɛ a mi wa kpe, nɛ e le kaa e ma gbo gbenɔ yeyee mohu lɛɛ, se e fia e pɛɛ si kaa e maa pee nɔ́ fɛɛ nɔ́ nɛ e ma nyɛ kɛ tsɔɔ kaa e Tsɛ ɔ nɔ yemi ɔ ji nɔ́ nɛ hi pe kulaa. (Filip. 2:8) Benɛ Yesu kɛ kahi kpe ɔ, “e kɛ ngmlaa kpami nɛ nya wa kɛ vo nyu” sɔle. (Heb. 5:7) E tsui mi nɛ e je kɛ sɔle ɔ tsɔɔ kaa e yeɔ Yehowa anɔkuale, nɛ e fia e pɛɛ si kaa e maa bu lɛ tue kɛ ya si nyagbe. Sɔlemi nɛ Yesu sɔle ɔ ngɛ kaa  tsopa kɛ e he via liliili ha Yehowa. Ngɛ Yesu wami si himi mi tsuo ɔ, e pee níhi nɛ sa e Tsɛ ɔ hɛ mi, nɛ e wo e Tsɛ ɔ nɔ yemi ɔ nguɔ.

8. Kɛ wa maa pee kɛɛ kɛ kase bɔ nɛ Yesu ba e je mi ha a?

⁸ Ke wa bu Yehowa blɔ tsɔɔmi tue, nɛ wa ye e mlaa amɛ a nɔ ɔ, lɔ ɔ tsɔɔ kaa wa ngɛ Yesu kasee. Ke waa kɛ kahi ngɛ kpee ɔ, wa jeɔ wa tsui mi kɛ sɔleɔ kɛ biɔ Yehowa yemi kɛ buami ejakaa wa suɔ nɛ waa sa e hɛ mi. Ke wa pee jã a, lɔ ɔ tsɔɔ kaa wa fĩ Yehowa nɔ yemi ɔ se. Wa le kaa ke wa pee níhi nɛ Yehowa hiɔ ɔ, e be wa sɔlemi ɔmɛ tue bue. Se ke waa kɛ Yehowa blɔ tsɔɔmi tsu ní ɔ, wa ma nyɛ ma ná nɔ mi mami kaa ke wa je wa tsui mi kɛ sɔle ɔ, wa sɔlemi ɔ maa pee kaa tsopa kɛ e he via ha Yehowa. Wa ma nyɛ ma ná nɔ mi mami hu kaa wa hiɔwe Tsɛ ɔ bua jɔ anɔkuale nɛ wa yeɔ lɛ ɔ he.​—Abɛ 27:11.

9. Mɛni he je nɛ a sãa tue mi jɔmi bɔ ɔ?

⁹ Nɔ́ enyɔne nɛ wa ma nyɛ maa kase: Wa sɔmɔɔ Yehowa ejakaa wa hɛ sa níhi nɛ e pee ha wɔ ɔ. Bɔ nɛ pee nɛ waa nu oti nɛ ɔ sisi saminya a, nyɛ ha nɛ wa susu tue mi jɔmi bɔ nɛ blema Israel bi ɔmɛ sãa a he nɛ waa hyɛ. E ji a jami ɔ fã ko nɛ he hia wawɛɛ. * Ngɛ Mose womi nɛ ji etɛ ɔ mi ɔ, wa kase kaa nɔ ko ma nyɛ maa sã tue mi jɔmi bɔ kɛ ‘na Yehowa si.’ (3 Mose 7:11-13, 16-18) A wui mlaa kaa a sã afɔle nɛ ɔ, mohu ɔ, nɔ ɔ nitsɛ lɛ jeɔ e suɔmi mi kɛ peeɔ jã. Enɛ ɔ ji afɔle nɛ nɔ ko jeɔ e tsui mi faa kɛ sãa akɛnɛ e suɔ Yehowa, e Mawu ɔ he je. Nɔ nɛ ba sã afɔle ɔ, e weku ɔ, kɛ  osɔfo ɔmɛ yeɔ lohwe ɔ nɛ a kɛ ba sã afɔle ɔ. Se a ngɔɔ lohwe ɔ he ní pɔtɛɛ komɛ kɛ sãa afɔle ha Yehowa pɛ. Lohwe ɔ jije kɛ jije?

10. Mɛni nɛ tue mi jɔmi bɔ nɛ a tu he munyu ngɛ 3 Mose 3:6, 12, 14-16 tsɔɔ wɔ ngɛ nɔ́ nɛ ha nɛ Yesu pee e Tsɛ ɔ suɔmi nya ní ɔ he?

¹⁰ Nɔ́ etɛne nɛ wa ma nyɛ maa kase: Wa suɔ Yehowa, enɛ ɔ he ɔ, wa sɔmɔɔ lɛ kɛ wa tsui tsuo. Yehowa naa lohwe zɔ kaa nɔ́ nɛ hi pe kulaa ngɛ lohwe ɔ he. Jehanɛ hu ɔ, e tsɔɔ kaa lohwe ɔ he ní komɛ kaa se tso mi ngmɛ ɔmɛ a he hia wawɛɛ. (Kane 3 Mose 3:6, 12, 14-16.) Enɛ ɔ he ɔ, ke Israel no ko je e tsui mi faa nɛ e ngɔ lohwe ɔ he níhi nɛ a he hia wawɛɛ kɛ lohwe ɔ zɔ ɔ kɛ sã afɔle ha Yehowa a, e bua jɔɔ wawɛɛ. Ke Israel no ko sã afɔle nɛ ɔ, e ngɛ tsɔɔe kaa e suɔ nɛ e ngɔ e níhi nɛ a hi pe kulaa a kɛ ha Mawu. Jã kɛ̃ nɛ Yesu hu je e tsui mi nɛ e ngɔ e níhi nɛ hi pe kulaa a kɛ ha Yehowa kɛ gu e tsui tsuo nɛ e kɛ sɔmɔ lɛ ɔ nɔ. (Yoh. 14:31) Ngɛ Yesu blɔ fa mi ɔ, e bua jɔ Yehowa suɔmi nya ní peemi he wawɛɛ, nɛ e suɔ Yehowa mlaa kɛ e tsui tsuo. (La 40:8) Hyɛ bɔ nɛ Yehowa bua maa jɔ ha benɛ e na kaa Yesu je e tsui mi tsuo kɛ ngɛ lɛ sɔmɔe ɔ!

11. Ngɛ mɛni blɔ nɔ nɛ sɔmɔmi nɛ waa kɛ haa Yehowa a ngɛ kaa tue mi jɔmi bɔhi, nɛ kɛ lɔ ɔ ma nyɛ maa wo wa bua ha kɛɛ?

¹¹ Wa tsui mi nɛ wa jeɔ faa kɛ sɔmɔɔ Yehowa a ngɛ kaa tue mi jɔmi bɔ, ejakaa e ji blɔ nɛ wa guɔ nɔ kɛ tsɔɔ kaa wa suɔ lɛ. Waa kɛ wa nyɛmi tsuo sɔmɔɔ Yehowa, ejakaa wa suɔ lɛ kɛ wa tsui tsuo. Ke Yehowa na bɔ nɛ nimli ayɔhi abɔ ngɛ lɛ sɔmɔe akɛnɛ a suɔ lɛ kɛ e blɔ tsɔɔmi ɔmɛ ɔ, hyɛ bɔ nɛ e bua jɔɔ ha! Ke wa kai kaa Yehowa naa níhi nɛ wa peeɔ kɛ yi mi tomi he je nɛ wa peeɔ jã a, lɔ ɔ ma nyɛ maa wo wa bua. Kaa nɔ hyɛmi nɔ́ ɔ, ke o wa ngɛ jeha mi nɛ o nyɛ we nɛ o pee babauu kaa bɔ nɛ o suɔ nɛ o pee ɔ, mo ná nɔ mi mami kaa Yehowa nu mo sisi. Eko ɔ, o maa nu he kaa o be nyɛe nɛ o pee fuu, se Yehowa naa kaa o suɔ lɛ, nɛ lɔ ɔ he ɔ, o peeɔ nɔ́ nɛ o ma nyɛ. E bua jɔ nɔ́ nɛ o nyɛɔ peeɔ ɔ he.

12. Kɛ Yehowa naa tue mi jɔmi bɔhi nɛ a sãa a ha kɛɛ, nɛ kɛ lɔ ɔ woɔ wɔ he wami ha kɛɛ?

¹² Mɛni wa ma nyɛ maa kase ngɛ tue mi jɔmi bɔhi nɛ a sãa blema a mi? Ke lohwe ɔ he níhi nɛ hi pe kulaa a ngɛ sãe ɔ, la su ku ɔ yaa hiɔwe, nɛ Yehowa bua jɔɔ he. Enɛ ɔ he ɔ, mo ná nɔ mi mami kaa Yehowa bua jɔ sɔmɔmi nɛ o je o tsui tsuo mi nɛ o kɛ ngɛ lɛ hae ɔ he. (Kol. 3:23) Mo susu bɔ nɛ e bua jɔɔ o he ha a he nɛ o hyɛ. E naa ní nyafinyafi kɛ ní nguanguahi nɛ o peeɔ ngɛ e sɔmɔmi mi ɔ kaa junehi, e bua jɔ he, nɛ e ma kai kɛ ya neneene.​—Mat. 6:20; Heb. 6:10.

13. Ngɛ 3 Mose 9:23, 24 ɔ nya a, mɛni Yehowa pee kɛ tsɔɔ kaa e kplɛɛ osɔfohi nɛ a hla mɛ ɔ a nɔ?

¹³ Nɔ́ eywiɛne nɛ wa ma nyɛ maa kase: Yehowa ngɛ e blɔ nya tomi ɔ fã nɛ ngɛ zugba a nɔ ɔ jɔɔe. Mo susu nɔ́ nɛ ya nɔ ngɛ jeha 1512 L.F.K. ɔ he nɛ o hyɛ. Jamɛ a be ɔ mi nɛ a ma bo tsu ɔ ngɛ Sinai Yoku ɔ sisi ɔ nɛ. (2 Mose 40:17) Mose pee kusumi kɛ wo Aaron kɛ e binyumu ɔmɛ osɔfohi. Israel ma a tsuo ba bua konɛ a hyɛ osɔfo ɔmɛ nɛ a kɛ lohwehi ngɛ a kekleekle afɔle sãe ɔ. (3 Mose 9:1-5) Mɛni Yehowa pee kɛ tsɔɔ kaa e kplɛɛ osɔfo ehehi nɛ a hla mɛ ɔ a nɔ? Benɛ Mose kɛ Aaron ngɛ ni ɔmɛ jɔɔe ɔ, Yehowa ha nɛ la ba sã lohwe ɔ fã nɛ piɛ ngɛ afɔle sami la tɛ ɔ nɔ ɔ.​—Kane 3 Mose 9:23, 24.

14. Mɛni he je nɛ kplɛɛmi nɛ Yehowa kplɛɛ Aaron weku ɔ mi osɔfo ɔmɛ a nɔ ɔ he hia wɔ mwɔnɛ ɔ?

¹⁴ Mɛni nɛ la nɛ ba sã afɔle ɔ benɛ a hla  osɔfo nɔkɔtɔma pe kulaa a tsɔɔ? Lɔ ɔ tsɔɔ kaa Yehowa fĩ Aaron weku ɔ mi osɔfo ɔmɛ a se. Benɛ Israel bi ɔmɛ na okadi nɛ tsɔɔ heii kaa Yehowa fĩ osɔfo ɔmɛ a se ɔ, a na kaa e sa nɛ mɛ hu a fĩ a se kpɛii. Anɛ se nami ngɛ he kɛ ha wɔ mwɔnɛ ɔ lo? Ee! Ejakaa osɔfo yemi nɛ ɔ daa si kɛ ha osɔfo yemi ko nɛ he hia wawɛɛ nɛ maa ba a. Kristo nɛ e ji Osɔfo Nɔkɔtɔma Pe Kulaa a ngɛ odehe osɔfohi 144,000 nɛ a maa piɛɛ e he kɛ sɔmɔ ngɛ hiɔwe.​—Heb. 4:14; 8:3-5; 10:1.

15-16. Ngɛ mɛni blɔ nɔ nɛ Yehowa tsɔɔ kaa e kplɛɛ “tsɔlɔ anɔkualetsɛ kɛ ní lelɔ ɔ” nɔ?

¹⁵ Ngɛ jeha 1919 ɔ mi ɔ, Yesu hla kuu nyafii ko nɛ a pɔ mɛ nu kaa “tsɔlɔ anɔkualetsɛ kɛ ní lelɔ.” Tsɔlɔ anɔkualetsɛ ɔ lɛ nyɛɛɔ fiɛɛmi ní tsumi ɔ hɛ mi, nɛ e haa Kristo se nyɛɛli ɔmɛ “niye ní ngɛ be nɛ sa mi.” (Mat. 24:45) Anɛ wa naa odasehi nɛ a ngɛ heii nɛ tsɔɔ kaa Mawu kplɛɛ tsɔlɔ anɔkualetsɛ kɛ ní lelɔ ɔ nɔ lo?

¹⁶ Satan kɛ e je ɔ ngɛ mɔde bɔe kaa a ma ha nɛ ní tsumi nɛ tsɔlɔ anɔkualetsɛ ɔ ngɛ tsue ɔ he nɛ wa ha mɛ, konɛ ke e maa hi ɔ, a ko nyɛ nɛ a tsu ní tsumi ɔ po. Ngɛ je mi ta slɔɔtohi enyɔ nɛ ya nɔ, yi mi wamihi, sika he nyagbahi, kɛ dami sane nɛ a yi Yehowa we bi tsuo se ɔ, tsɔlɔ anɔkualetsɛ kɛ ní lelɔ ɔ yaa nɔ nɛ a haa Kristo se nyɛɛli nɛ a ngɛ zugba a nɔ ɔ mumi mi niye ní. Mo susu Baiblo kasemi ní slɔɔtohi nɛ a pee ngɛ gbihi nɛ hiɛ pe 900 mi nɛ wa náa mwɔnɛ ɔ he nɛ o hyɛ. Wa wui ní nɛ ɔmɛ a he hiɔ! Enɛ ɔ ji odase nɛ ngɛ heii kaa Yehowa fĩ a se. Mo susu nɔ́ kpa ko hu nɛ tsɔɔ kaa Yehowa ngɛ mɛ jɔɔe ɔ he nɛ o hyɛ. Lɔ ɔ ji fiɛɛmi ní tsumi ɔ. Ngɛ anɔkuale mi ɔ, wa ngɛ sane kpakpa a fiɛɛe “ngɛ zugba a nɔ hehi tsuo nɛ nimli ngɛ.” (Mat. 24:14)  Atsinyɛ jemi ko be he kaa mwɔnɛ ɔ, Yehowa ngɛ e blɔ nya tomi ɔ fã nɛ ngɛ zugba a nɔ ɔ blɔ tsɔɔe, nɛ e ngɛ mɛ jɔɔe wawɛɛ nitsɛ.

17. Mɛni wa ma nyɛ maa pee kɛ tsɔɔ kaa wa fĩ blɔ nya tomi nɛ Yehowa kɛ ngɛ ní tsue ɔ se?

¹⁷ E sa nɛ wa bi wa he ke: ‘Anɛ ye bua jɔ kaa i piɛɛ Yehowa blɔ nya tomi ɔ fã nɛ ngɛ zugba a nɔ ɔ he lo?’ Yehowa ha wɔ odase nɛ ngɛ heii kaa bɔ nɛ e ha nɛ la je hiɔwe kɛ ba sã lohwe ɔ ngɛ Mose kɛ Aaronmɛ a be ɔ mi ɔ. Ngɛ anɔkuale mi ɔ, wa ngɛ yi mi tomi fuu a he je nɛ e sa nɛ waa na Yehowa si. (1 Tɛs. 5:18, 19) Mɛni wa maa pee kɛ tsɔɔ kaa wa fĩ blɔ nya tomi nɛ Yehowa kɛ ngɛ ní tsue ɔ se? E sa nɛ waa ngɔ blɔ tsɔɔmihi nɛ a jeɔ Baiblo ɔ mi kɛ haa wɔ ngɛ wa womi ɔmɛ a mi, ngɛ asafo mi kpehi, kpɔ mi kpehi, kɛ kpokpa nɔ kpehi a sisi ɔ kɛ tsu ní. Jehanɛ hu ɔ, ke waa kɛ wa he wo fiɛɛmi ní tsumi ɔ mi vii, nɛ wa tsɔɔ nihi ní ɔ, lɔ ɔ tsɔɔ kaa wa fĩ Yehowa blɔ nya tomi ɔ se.​—1 Kor. 15:58.

18. Mɛni o fia o pɛɛ si kaa o maa pee?

¹⁸ Nyɛ ha nɛ waa fia wa pɛɛ si kaa waa kɛ níhi nɛ wa kase ngɛ Mose womi nɛ ji etɛ ɔ mi ɔ ma tsu ní. Nyɛ ha nɛ waa pee níhi nɛ ma ha nɛ Yehowa bua nɛ jɔ wa he konɛ e kplɛɛ wa afɔle sami ɔmɛ a nɔ. Nyɛ ha nɛ wa sɔmɔ Yehowa akɛnɛ wa hɛ sa níhi nɛ e pee ha wɔ ɔ he je. Nyɛ ha nɛ waa ya nɔ nɛ waa kɛ wa nyɛmi tsuo nɛ sɔmɔ Yehowa akɛnɛ wa suɔ lɛ kɛ wa tsui tsuo ɔ he je, nɛ́ waa kɛ wa tsui tsuo nɛ fĩ blɔ nya tomi nɛ e kɛ ngɛ ní tsue mwɔnɛ ɔ se. Ke wa pee ní nɛ ɔmɛ ɔ, lɔ ɔ ma ha nɛ Yehowa nɛ na kaa wa bua jɔ he blɔ nɛ wa ná nɛ waa kɛ ngɛ lɛ sɔmɔe kaa e we Odasefohi ɔ he!