1, 2. Левит деп бичик бӱгӱнги кӱндеги христиандарга нениҥ учун тузалу болот?

ЭЛЧИ Павел Тимофей најызына: «Ончо Агару Бичик Кудайдыҥ Тыныла берилген. Ол... тузалу» — деп, эске алындырган (2 Тим. 3:16). Левит деп бичик база Агару Бичикке кирет. Слер бу бичик керегинде нени сананадаар? Кезик улус бу бичикти эмдиги ӧйдиҥ јӱрӱмине чек келишпей турган јасактардаҥ турат деп сананат. Је чын христиандар анайып сананбай јат.

² Левит деп бичик 3500 кире јыл кайра бичилген. Је андый да болзо, Иегова оны «бисти ӱредерге» кичееп салган (Рим. 15:4). Бу бичик Иегованыҥ кӧрӱм-санаазын оҥдоорго болужат, анайда ок анда тузалу кӧп ӱредӱлер бар, оныҥ учун биске оны тереҥжиде шиҥдеер керек. Айдарда, бу ӱредӱлердиҥ тӧртӱзин кӧрӱп ийектер.

3. Кинчектер ташталатан кӱнде нениҥ учун тайылгалар экелер керек болгон?

³ Баштапкы ӱредӱ. Иегова бистиҥ тайылгаларысты алзын деп турган болзоос, биске оныҥ јарадузын алар керек. Израиль албаты кажы ла јыл Кинчектер ташталатан кӱнде кожо јуулыжатан. Бу кӱнде улу абыс тайылгага тындулар экелер болгон. Экелген тайылгалар олорго кинчектеҥ аруталар керек деп ундыбаска болушкан. Улу абыска ончо албатыныҥ кинчеги ташталзын деп, тайылгага берилген канла Агарудаҥ агару јерге кирердеҥ озо, оноҥ учурлу неме эдер керек болгон.

4. Левит 16:12, 13-ле болзо, улу абыс Кинчектер ташталатан кӱнде Агарудаҥ агаруга баштапкы катап кирген ӧйдӧ нени эткен? (Кадарындагы јурукты кӧрӱгер.)

 ⁴ Левит 16:12, 13 кычырыгар *. Кинчектер ташталатан кӱн канайып ӧткӧнин сананып ийектер. Бу кӱнде улу абыска Агарудаҥ агаруга ӱч катап кирер керек болгон. Озо баштап ол агару байканга кирген. Оныҥ бир колында јараш јытту фимиам, база бир колында кызыдып салган косторлу алтын суску. Ол Агарудаҥ агаруга кирерге, кӧжӧгӧниҥ алдына токтой тӱже берет. Улу абыска бу јаан кӱндӱ болгон, нениҥ учун дезе, сӱрлеп айтса, анайып ол Иегованыҥ алдына турган. Оноҥ ол кызып калган косторго агару фимиамды араайынаҥ уруп јат, анайып кей јараш јытла толо берет *. Бир канча ӧйдӧҥ ол кинчектер учун тайылгага экелген тындулардыҥ каныла ойто ло Агарудаҥ агаруга кирер. Ајаруга алыгар: улу абыс фимиамды, тайылгага берилген канды экелердеҥ озо ӧртӧп јат.

5. Кинчектер ташталатан кӱнде улу абыс фимиамды канайып ӧртӧгӧнинеҥ, бис неге ӱренер аргалу?

⁵ Кинчектер ташталатан кӱнде улу абыстыҥ фимиамды канайып ӧртӧгӧнинеҥ бис неге ӱренер аргалу? Агару Бичикте Иегованыҥ чындык ишчилериниҥ мӱргӱӱлдери фимиамла тӱҥдештирилет (Сар. 141:2; Ачыл. 5:8). Ӧрӧги айдылганыла Иегованыҥ алдына фимиам ӧртӧгӧни улу абыска јаан кӱндӱ болгон. Анайып ла Иегованаҥ айап, ого мӱргӱгенис биске јаан кӱндӱ болот. Јер-телекейдиҥ Јайаачызы биске ого јууктап, балдар ла адазы ортодо ошкош јуук колбуларлу болотон арга берип турганы учун бис сӱреен быйанду (Иак. 4:8). Ол бисти бойыныҥ најылары деп бодойт! (Сар. 25:14). Бис мыны тыҥ баалап јадыс, оныҥ учун оны ачындырбаска кӱӱнзейдис.

6. Улу абыстыҥ тындуларды тайылгага экелердеҥ озо, фимиамды кӱйдӱрип салганынаҥ, Иисус керегинде нени билип аладыс?

⁶ Ӧрӧги айдылганыла, улу абыс тындуларды тайылгага экелердеҥ озо, фимиамды кӱйдӱрип салар учурлу болгон. Мынаҥ улам оныҥ тайылгазын Иегова јектебес деп, ол бӱдӱмјилӱ болгон. Бис мынаҥ нени билип аладыс? Иисуска кижиликти аргадаарга, бойыныҥ јӱрӱмин кижилик учун толынты эдип берердеҥ озо, јек јок болор керек болгон ло Кудайга чындык артар керек болгон. Анайып, Иисус Иегованыҥ табын бӱдӱрерин — сок јаҥыс чын јол деп кӧргӱзер эди ле јӱк ле Иегова Бий болор јаҥду деп керелеер эди.

7. Иегованы Иисустыҥ јердеги јӱрӱми нениҥ учун сӱӱндирген?

⁷ Иисус бастыра јӱрӱмине Иеговага јаантайын сӧсуккур болгон. Ченелтелер де, керек дезе кыйналып ӧлтӱртери де, Иисустыҥ Адазыныҥ бийленер јаҥы учун тартыжатан кӱӱнин соотпогон (Флп. 2:8). Иисус кӱч ченелтелерге табартып, Иеговага «тыҥ ӱнденип, кӧстӧри јашталып, јайнап мӱргиген» (Евр. 5:7). Оныҥ јайнап мӱргӱгени Иеговага акту јӱрегинеҥ чындык болгонын кӧргӱскен ле ого сӧсуккур болотон кӱӱнин тыҥыткан. Иеговага Иисустыҥ мӱргӱӱлдери фимиамныҥ јараш јыды ошкош болгон. Иисустыҥ бастыра јӱрӱми оныҥ Адазына јаан сӱӱнчи экелген ле јӱк ле Иегова Бий болор јаҥду деп керелеген.

8. Бис Иисустаҥ кандый тем алар аргалу?

⁸ Бис Иисустаҥ кандый тем алар аргалу? Биске Иеговага сӧсуккур болорго, бастыра кӱчистеҥ албаданып, ого чындык артар керек. Бис Иегованы сӱӱндирерге кӱӱнзейдис, оныҥ учун ченелтелерге табартсаас, ого  мӱргӱп, болуш сурайдыс. Мынайып Иегованыҥ бийленер јаҥына јӧмӧжӧдис. Бис Иеговага јарабай турган неме эдип турзаас, ол бистиҥ мӱргӱӱлдеристи укпас деп оҥдоп јадыс. Је бис Иегованыҥ табы аайынча јӱрзеес, бистиҥ акту јӱректеҥ айткан мӱргӱӱлдерис ого фимиамныҥ јараш јыдындый болор деп, алаҥзыбас аргалу. Бистиҥ сӧсуккур ла чындык болгоныс теҥеридеги Адабысты сӱӱндирет деп, алаҥзыбай јадыс (Укаа 27:11).

9. Израильдиҥ улузы нениҥ учун амырдыҥ тайылгаларын экелип туратан?

⁹ Экинчи ӱредӱ. Бис Иеговага быйанду болгоныстаҥ улам иштеп јадыс. Мыны јакшы оҥдоорго, јебрен Израильде чын бажырыштыҥ база бир учурлу бӧлӱгин — амырдыҥ тайылгаларын кӧрӱп ийектер *. Левит деп бичиктеҥ Израильдиҥ улузы амырдыҥ тайылгаларын «быйанду болгонынаҥ улам» экелген деп айдылат (Лев. 7:11—13, 16—18). Улустаҥ мындый тайылгалар экелери некелбеген. Бу тайылгаларды олор бойыныҥ Кудайын, Иегованы сӱӱп турганынаҥ улам, акту јӱрегинеҥ экелген. Кижи тайылгага тынду экелип, кийнинде бу тындуныҥ эдин јип, бойыныҥ билезиле, анайда ок абыстарла да ӱлежип туратан. Је тындуныҥ эди-каныныҥ кезиги јӱк ле Иеговага берилер учурлу болгон. Кандыйы?

10. Левит 3:6, 12, 14—16-да бичилген амырдыҥ тайылгалары Иисус Адазыныҥ табын недеҥ улам бӱдӱрген деп оҥдоорго канайып болужат?

¹⁰ Ӱчинчи ӱредӱ. Бис Иегованы сӱӱп турганыстаҥ улам ого эҥ артыгын берип јадыс.  Иеговага тындуныҥ јуузы эҥ артык болгон. Анайда ок бӧӧрӧктӧри ле бууры база баалу болгон. (Левит 3:6, 12, 14—16 кычырыгар *.) Оныҥ учун Иеговага Израиль албатыныҥ акту кӱӱнинеҥ тындуныҥ бӧӧрӧктӧрин, буурын ла јуузын экелгени сӱреен јараган. Анайып, олор Иеговага эҥ артыгын берерге тыҥ кӱӱнзеп турганын кӧргӱскен. Мынайып ла Иисус Иегованы сӱӱген, оныҥ учун Адазына акту кӱӱнинеҥ иштеп, эҥ артыгын берген (Иоанн 14:31). Ол адазыныҥ табын бӱдӱргенинеҥ јаан сӱӱнчини алган (Сар. 40:8). Ол Кудайдыҥ јасагын тыҥ сӱӱген. Иегова, Иисустыҥ ого акту јӱрегинеҥ иштеп турганын кӧрӱп, јаан сӱӱнчи алатан!

11. Бистиҥ ижис ле амырдыҥ тайылгалары незиле тӱҥей? Бу бисти нениҥ учун токунадып јат?

¹¹ Канайып амырдыҥ тайылгаларын улус акту кӱӱнинеҥ экелген, анайып ла Иеговага иштезин деп, бисти кем де албадабай јат. Бис ого эҥ артыгын бередис, нениҥ учун дезе оны бастыра јӱрегисле сӱӱп јадыс. Иегова миллиондор тоолу ишчилериниҥ оны ла оныҥ нормаларын тыҥ сӱӱп турганын кӧрӱп, јаан сӱӱнчи алып јат! Иегова бистиҥ јӱк ле эдип турган керектеристи эмес, је олорды недеҥ улам эдип турганысты кӧрӱп јат деп билгенис, бисти токунадып јат. Темдектезе, јажаар јаанап калганынаҥ улам Кудайга кӧп иштеп болбой турган болзогор, Иегова слерди јакшы оҥдоп јат деп ундыбагар. Слер Иеговага иштееринде кӧпти этпей турганаар деп сананып турган болорыгар. Је Кудайды сӱӱп турганаардаҥ улам бойыгардыҥ айалгагарда кӱчеер јеткенче иштеерге кӱӱнзеп турганаарды Иегова кӧрӱп јат. Кудай слердиҥ ого акту јӱрегердеҥ иштеп турганаарга сӱӱнип јат.

12. Улус амырдыҥ тайылгаларын экелип турарда, Иеговада кандый сезимдер болгон? Бу бисти нениҥ учун оморкодып јат?

¹² Амырдыҥ тайылгаларын экелгени бисти неге ӱредер аргалу? Качан тайылгага берилген тындуныҥ эди-каныныҥ эҥ артыгы кӱйӱп, ыжы теҥериге чыгып турарда Иегова сӱӱнген. Слер агару иште эҥ артыгын берип турзагар, Иегованы тыҥ сӱӱндирип јадыгар деп алаҥзыбагар (Кол. 3:23). Кудай слерди кӧрӱп, кӱлӱмзиренип турган деп сананып ийзеер. Иегова слердиҥ кӧп пӧ, ас па иштенип турганыгарды эмес, је албаданып турганаарды баалап јат ла оны качан да ундыбас (Матф. 6:20; Евр. 6:10).

13. Левит 9:23, 24-лӧ болзо, Иегова кӧстӧлгӧн абыстарды јарадып турган деп канайып кӧргӱскен?

¹³ Тӧртинчи ӱредӱ. Иегова бойыныҥ јердеги организациязына алкыжын јетирип јат. Б. э. озо 1512 јылда, Синай кырдыҥ эдегинде агару байкан тургузыларда не болгонын кӧрӱп ийектер (Чыг. 40:17). Бу ӧйдӧ Аарон ла оныҥ уулдары абыстар эдип кӧстӧлгӧн. Израиль албаты абыстардыҥ баштапкы катап тындуларды тайылгага экелерин кӧрӧргӧ јуулышкан (Лев. 9:1—5). Иегова кӧстӧлгӧн абыстарды јарадып турган деп канайып кӧргӱскен? Моисей ле Аарон албатыны алкап ийерде, Иегованыҥ табыла теҥеридеҥ от тӱжӱп, тагылда јаткан ончо немени јудып ийген. (Левит 9:23, 24 кычырыгар *.)

14. Иегованыҥ абыстар эдип кӧстӧлгӧн Ааронго ло оныҥ уулдарына јарадузын кӧргӱскени бисти неге ӱредет?

 ¹⁴ Теҥеридеҥ тӱшкен от нени кӧргӱскен? Анайып, Иегова абыстар эдип кӧстӧлгӧн Ааронды ла оныҥ уулдарын јарадып турган деп кӧргӱскен. Израиль албаты Иегованыҥ мындый јарадузын кӧрӱп, Ааронго ло оныҥ уулдарына јӧмӧжӧр керек деп оҥдогон. Бу јетирӱ бисти неге ӱредет? Израильдеги абыстар келер ӧйдӧ болотон Улу абыстыҥ, Иисус Христостыҥ, анайда ок оныла кожо теҥериде башкарар 144000 каандардыҥ ла абыстардыҥ јӱк ле кӧлӧткӧзи болгон (Евр. 4:14; 8:3—5; 10:1).

15, 16. Иегова «бӱдӱмјилӱ ле керсӱ кулга» болужып турганын канайып кӧргӱзет?

¹⁵ Иисус 1919 јылда майлаткан христиандардыҥ бир кичинек бӧлӱгин «бӱдӱмјилӱ ле керсӱ кул» эдип кӧстӧгӧн. Бу кул јарлаар ишти башкарат ла Христостыҥ ӱренчиктерине «ӧйинде курсак» берет (Матф. 24:45). Бис Кудайдыҥ бӱдӱмјилӱ ле керсӱ кулга болужып турганыныҥ керелерин јарт кӧрӱп јадыс па?

¹⁶ Сатана ла ого башкарткан телекей бӱдӱмјилӱ ле керсӱ кулга Христостыҥ берип салган јакарузын бӱдӱрерине чаптык эдерге тыҥ албаданып јат. Бу кул Иегованыҥ болужы јокко јакарузын бӱдӱрип болбос эди. Эки телекейлик јуу-согуш болгон до болзо, бастыра телекейде экономический кризистер болуп турган да болзо, чын христиандар јаман кӧрдӱрип, токтобозынаҥ истедип турган да болзо, бӱдӱмјилӱ ле керсӱ кул кӧгӱс курсакты оноҥ ло ары берип јат. Бӱгӱнги кӱнде бисте сӱреен кӧп библиялык бичиктер бар. Бу бичиктер 900-теҥ ажыра тилдерге чыгат, кажы ла кижи оны бир де акча тӧлӧбӧзинеҥ алар аргалу. Бу ончо неме Иегованыҥ  болужыныҥ јарт керези болуп јат. Анайда ок Иегова бӱдӱмјилӱ кулга болужат деп, јарлаар иштеҥ кӧрӧдис. Сӱӱнчилӱ јар «јер-ӱстине јарлалар» деп сӧстӧр чыннаҥ ла бӱдӱп јат (Матф. 24:14). Айдарда, Иегова бойыныҥ организациязыла башкарып, алкыжын јетирет деп, бис бир де алаҥзыбай јадыс.

17. Иегованыҥ организациязына јӧмӧжип турганысты канайып кӧргӱзерис?

¹⁷ Оныҥ учун бойыстаҥ сураарга јараар: «Мен Иегованыҥ организациязына кирип турганым учун, быйанду ба?» Канайып Кудай Моисей ле Ааронныҥ ӧйинде теҥеринеҥ от тӱжӱрип болушканы чылап, анайып ла бӱгӱнги кӱнде Иегова биске бойыныҥ организациязы ажыра болужып јат. Бисте Кудайга быйанду болотон шылтактар чыннаҥ ла бар (1 Фес. 5:18, 19). Бис Иегованыҥ организациязына јӧмӧжип турганысты канайып кӧргӱзерис? Агару Бичикке тӧзӧлӧнгӧн башкартуларла јӱрӱп турганысла кӧргӱзедис. Бис бу башкартуларды бистиҥ бичиктердеҥ таап аладыс ла јуунныҥ туштажуларынаҥ ла курултайлардаҥ угадыс. Анайда ок јарлаар иште ле јаҥы ӱренчиктер белетеер иште эрчимдӱ туружып турганысла јӧмӧжӧдис (1 Кор. 15:58).

18. Слер нени эдерге сананып алдыгар?

¹⁸ Левит деп бичиктеҥ нени билип алганысты тузаланарга бек сананып алактар. Нениҥ учун дезе Иегова бистиҥ тайылгаларысты јаратсын деп кӱӱнзейдис. Бис Иегованы бастыра јӱрегисле сӱӱп турганыстаҥ улам, бар немегистиҥ эҥ артыгын бередис. Анайда ок ого быйанду болгоныстаҥ улам иштейдис. Бис оныҥ организациязына акту јӱрегистеҥ јӧмӧжип јадыс. Анайып, Иегованыҥ Керечилери болуп турганысты баалап јадыс деп кӧргӱзедис!