1-2. O aniniay a Krisciyang hano mamisongilaˈ a mikingkiw to Lifi hani?

PASOWALAN no tarokos ci Pawlo koya kapah a Timoti, ‘mikayatan no Kawas ko tamdaw sakatilid no Fangcalay Cudad maemin,’ o saka ciepoc no tamdaw. (2 Timoti 3:16) O misowalan ni Pawlo a Fangcalay Cudad, mahawpay ko Lifi. Samaanay ko pinengneng iso to Lifi hani? Harateng no roma tamdaw cowato pilingat ko sarikec no Lifi to aniniay tamdaw sanay, kawra cowa ka lecad ko pinengneng no soˈlinay Krisciyang.

² O Lifi maedeng itiniay i ˈayaw no 3,500 miheca a tiliden, tereken ni Yihofa koniya cudad tahanini pakayniay ‘sapasifanaˈaw kitaanan.’ (Loma 15:4) O Lifi papadama kitaanan matongal ko kacipinang to harateng ni Yihofa, iraay ko epoc ita a mikingkiw. Mikitini i Lifi wa mananam ita ko adihayay kalimlaan a kimad, dotoc nengnengen ita ko sepat a kalimlaan.

3. Nolitengan a Israil hano misaaliay pacakat to toˈaya i Pihepolan to Raraw a Romiˈad hani?

³ Saka 1: Wa salakat milifok kita to pihayda ni Yihofa, mihaen ngaˈ cadaen Ningra ko pacakatan ita a sapatoˈaya. Nolitengan a Israil, polong a finawlan masaˈopoay i Pihepolan to Raraw a Romiˈad to mihecahecaan, pacakat to sapatoˈaya i Kawas. Oniya limasmas patalipaˈelalay to Israil tamdaw, o ciraraway cangra, misaaliay pakayni pacakat to toˈaya a mihepol to raraw. Kawra itini ˈayaw no miˈorong ko sakakaay saysi to ˈirang no toˈaya micomod i Safangcalay Kitiraan i, salakat wa midemak  cingra to cecay a demak, oniya demak mikikakaay to pipatado to polong a Israil mihepol to raraw a demak.

4. Pakayni pitadtad no Lifi 16:12, 13, sakinacecay no sakakaay saysi micomod i Safangcalay Kitiraan i, wa midemak to maanan hani? (Nengnengen ko potalay coka.)

⁴ ˈOsien ko Lifi 16:12, 13. Haratengen ko maˈaraway a demak toya Pihepolan to Raraw a Romiˈad a pakayraan: Wa kinatolo ko sakakaay saysi micomod i Safangcalay Kitiraan. Sakinacecay i, mitatiway cingra to matomesay ko exiw a kapowa, ato matomesay ko malikatay a falah no tada ekim a piyar. Sapitaˈelifaw cingra i mengli tomerepayho a mitala, dotoc, mikangodoay ko waywayan ningra micomod i Safangcalay Kitiraan, tayra i ˈaˈayaw no katatelekan a lipa. Itiya, mahecaday o tomirengay cingra i ˈaˈayaw ni Yihofa! Ikor, minaˈonay cingra mitaktak to exiw i cinamalay a falah, matomesay to fangsis ko lalomaˈ. * Dotoc kinatosa ko sakakaay saysi micomod i Safangcalay Kitiraan i, pacakat hananay ko sapihepol to raraw a ˈirang no toˈaya. Masinanotay iso han? Itini ˈayaw no pacakat ko sakakaay saysi to ˈirang no toˈaya i, isalakatho a mitodoh to exiw.

5. Mikitini pitodoh to exiw i Pihepolan to Raraw a Romiˈad mananamay ita ko maanan hani?

⁵ Mikitini pitodoh to exiw i Pihepolan to Raraw a Romiˈad mamananam ita ko maanan hani? Sowal no Fangcalay Cudad, o satolon no madimadiay midoko ci Yihofaan a tamdaw mahecaday to exiw. (ˈOlic 141:2; Paˈarawan 5:8) Mikangodoay ko waywayan no sakakaay saysi, miˈorong to exiw tayra i kaˈayaw ni Yihofa. Anini, ano mitolon kita ci Yihofaan i, pairaen ko mangodoay a waywayan. Tada miakoˈiday kita to misangaˈay to dohaw a Tatapangan papiingid kitanan i Cingranan, mahecad o piingid no wawa to wama. (Yakop 4:8) Miakoˈidayho kita Cingranan makahi malo widang no mita Cingra. (ˈOlic 25:14) Mihaenay cowa ko mamidemak kita to patoleday Cingranan a demak.

6. Itini ˈayaw no papatoˈaya ko sakakaay saysi wa mitodoh to exiw, mihaen ko demak maharatengay ita ko maanan?

⁶ Itini ˈayaw no papatoˈaya ko sakakaay saysi wa mitodoh to exiw, mihaen ko demak ningra ho cipinang to ˈayaw no patoˈaya milifokayto pihayda no Kawas. Mahecaday onini, itini fafekang no sera ˈayaw no papatafangen ni Yis ko ˈorip malo sapatefoc i, i salakatay midemak to kalimlaan a demak, oniya demak mikikakaay ko kalimlaan to pilidong to tamdaw. O maanan a demakan hani? Hakelong no ˈorip ningra wa madimadi a midofdof ci Yihofaan, mihaen ngaˈ cadaen ni Yihofa ko patafangan ningra a sapatefoc. Mihaen ko demak ni Yis, ngaˈay misawacay to sangaˈayay a pakayraan maˈorip ko pidofdof ci Yihofaan, ngaˈayho misawacay o matatodongay ko sapikowan a fadangalan ni Yihofa.

7. O hakelong nokaˈorip ni Yis i fafekang no sera, hano pakahemekay ci Yihofaan hani?

⁷ Itini ci Yis i fafekang no sera masongilaˈay ko pidofdof to moecelay a palinian ni Yihofa. Soˈlin tahalifaay ci Yis to sakayhid, sapalifet misemsem ko kapatay, kawra o sapiˈadingaw to pikowan no kakarayan Wama a falocoˈ cowa ka ngiyangi. (Filipi 2:8) Misiˈayaw to sapalifet i, ‘cilosaˈay a miowaw’ cingra a mitolon. (Hipray 5:7) Mikifalocoˈay cingra a mitolon ci Yihofaan, paihkal to madimadiay to kakarayan a Wama, o mahaenay a satolon padamaay cingranan misaˈosi to falocoˈ tahatolas a midofdof. Pakayni ci Yihofaan, o satolon ni Yis mahecaday o fangsisay a exiw. Mitafoay ci Yis to madimadi,  misawacay to matatodongay ko pikowan no kakarayan Wama, pakahemekay ci Yihofaan konini.

8. Samaan kita mitodong ci Yisan hani?

⁸ Wa ngaˈayay todongen ita ci Yis, misarocod i kaˈorip midofdof ato madimadi ci Yihofaan. Ano misiˈayaw to sapalifet i, makalimay kita sapakahemekaw ci Yihofaan, mansa micangacang to sapadama Ningra. Mihaen ko demak ita, paihkalay to midamaay ko niyah to sapikowan a fadangalan ni Yihofa. Ano midemakay kita to kaˈintehan ni Yihofa a demak, cowato ko mamitengil Cingra to satolon no mita. Kawra ano tooren ita ko palinian Ningra a maˈorip, ngaˈayto pakasoˈlin to mahecaday o fangsisay a exiw ko satolon ita a pakahemek ci Yihofaan. Ano madimadi kita ci Yihofaan, misarocod a midofdof Cingranan, oha mamahemek Cingra.—Taneng 27:11.

9. Hano pacakat to Sakarihaday Sapatoˈaya ko nolitengan a Israil hani?

⁹ Saka 2: Matayal kita saki Yihofaan pakayniay piakoˈid Cingranan. Nengnengen ita ko sapacakat nolitengan a Israil to Kawas a Sakarihaday Sapatoˈaya, * cacipinang to kalimlaan ko miakoˈiday a falocoˈ. Mikitini i Lifi mananamay ita, pacakat to Sakarihaday Sapatoˈaya ko Israil i ‘pakayniay piakoˈid.’ (Lifi 7:11-13, 16-18) Pacakat ko Israil tamdaw to hatiniay toˈaya cowa ko mikitiniay i ˈinorong, o mikitiniay piakoˈid, oniyah a harateng pacakat to Sakarihaday Sapatoˈaya pakayniay kaolah ci Yihofaan. O pacakatay to Sakarihaday Sapatoˈaya a tamdaw malacafayay to paro no lomaˈ ato  saysi komaen to heci no toˈaya, kawra o roma a dafong no toˈaya edengan oha ni Yihofa, cowa ka ngaˈay kaenen. O maamaan hani?

10. Pakayni i Lifi 3:6, 12, 14-16, o sapacakat no Israil tamdaw a Sakarihaday Sapatoˈaya, o maanan ko mahecaday to katayal ni Yis ci Yihofaan hani?

¹⁰ Saka 3: Maolahay kita ci Yihofaan, mansa pacakat to sangaˈayay. O pinengneng ni Yihofa to simal o sangaˈayay a dafong, o roma a dafong no ˈaˈadopen dengan oha ni Yihofa aca, tinakoen o podo. (ˈOsien ko Lifi 3:6, 12, 14-16.) Ano makahi ko Israil tamdaw pacakat ci Yihofaan to podo ato ˈatay no ˈaˈadopen ato simal i, tada mahemekay Cingra, samanen mihaen cangra to demak paihkalay to o sangaˈayay ko pacakatan nangra i Kawas. Tangongolay ko olah ni Yis ci Yihofaan, misarocoday to falocoˈ midoko Cingranan, makahi patafang to sangaˈayay no niyah Cingranan. (Yohani 14:31) Maolahay ci Yis to sarikec no Kawas, mahemekay a midofdof to araaw no Kawas. (ˈOlic 40:8) Maˈaraw ni Yihofa makahi ci Yis matayal saki Cingranan, maedeng taˈangayay ko lipahak.

11. O katayal ita ci Yihofaan hano mahecaday to pacakatay to Sakarihaday Sapatoˈaya hani? Mafanaˈ tonini hano misayaray kitaanan hani?

¹¹ O katayal ita ci Yihofaan mahecaday to pacakatay to Sakarihaday Sapatoˈaya, o sangaˈayay ko sapacakat ita ci Yihofaan, samanen misarocoday ko falocoˈ ita a maolah Cingranan. Maˈaraw ni Yihofa ko pinaay soˈot ˈofad a tamdaw pakayni kaolah Cingranan ato palinian Ningra a midoko Cingranan, maedeng taˈangayay ko hemak. Misaaretengay ci Yihofa minengneng to tayal no mita, kawra ikakaay ko pisaareteng to nafalocoˈan a harateng no mita, mafanaˈ tonini misayaray kitaanan. Ano o matoˈasay a Krisciyang kiso, latekay cangoˈotay ko ˈicel sanay miharateng, ngaˈayay rihaday kiso, cipinangay ci Yihofa to tolas no ˈicel iso. Citolasay ko midemakan no niyah sanay kiso miharateng, kawra mafanaˈay ci Yihofa tangongolay ko olah iso Cingranan hanaca misarocoday a midemak, maedeng mahemekay Cingra pacakat kiso Cingranan to sangaˈayay.

12. Mikitini i pacakat to Sakarihaday Sapatoˈaya, mananamay ita ko maanan hani?

¹² Mikitini i limasmas no Sakarihaday Sapatoˈaya mananamay ita ko maanan hani? Patodohen ko sangaˈayay no sapatoˈaya i, macokacok ko ˈacefel wa pahemek ci Yihofaan. Mihaenay i, ano makahi kiso patafang to sangaˈayay no miso ci Yihofaan, mamahemek Cingra. (Kolosay 3:23) Haratengen hena, pasayraay ci Yihofa tisowanan a masedi ko pising, maolahay kiso Cingranan a midemak to kihcod, ano hakowa ko midemakan iso, misalimlaay Cingra cowa ko mamatawal.—Matay 6:20; Hipray 6:10.

13. Mikitini i Lifi 9:23, 24, samaanay ci Yihofa paihkal to pihayda Ningra to faelohay a saysi hani?

¹³ Saka 4: Midamaay ci Yihofa to i seraay a likakawa Ningra. Nengnengen ko cecay nalifetan, itini i ˈayaw no hofoc ni Yis 1512 miheca, itiya i patirengay ko Israil tamdaw to fangcalay kopang i Sinay Lotok. (Kasadakan 40:17) Misikayay ci Mosi to malo saysi a saˈopo, manilnilay ni Mosi ci Aron ato wawa ningra. Itiya masaˈopoay ko polong no Israil tamdaw, maˈaraw ko faelohay saysi salakatay a pacakat to sapatoˈaya. (Lifi 9:1-5) Misamaanay ci Yihofa paihkal to pihayda toniya saysi hani? Ya palemed ci Mosi aci Aron to finawlan i, patefadan ni Yihofa ko namal a mitodoh to kihcod a sapatoˈaya.—ˈOsien ko Lifi 9:23, 24.

14. Midamaay ci Yihofa to rayray ni Aron malo saysi, oniya matiliday hano tada kalimlaan kitaanan hani?

¹⁴ Midemakay ci Yihofa to kafahkaˈan itini i pinilnil to saysi a saˈopo mitaypiway to maanan hani? Midamaay ci Yihofa to rayray ni Aron malo saysi. Maˈaraway no Israil tamdaw  koniya ihkalay a wacay, wa mahapinang nangra to mamidama ko niyah to saysi. Oniya matiliday tada kalimlaan kitaanan, samanen lalitengan a kapot no saysi mitaypiway to ikakaay kasapaan a kapot no saysi, o sakakaay saysi ci Yis, ato 144,000 tatayra i kakarayan padama ci Kristoan a saysi ato Hongti.—Hipray 4:14; 8:3-5; 10:1.

15-16. Hano cipinang kita midamaay ci Yihofa to ‘madimadiay citanengay koli’ hani?

¹⁵ Iitini i 1919 miheca, minilnilan ni Yis ko mimingay ˈopo a Krisciyang malo ‘madimadiay citanengay a koli.’ Oniya manilnilay a salikaka mikeriday a milimasmas to mitosilay a tayal, itini i ‘matatodongay a tatokian’ pafeliay cangra to Krisciyang to ‘kakaenen’. (Matay 24:45) Mahapinangay ita to pihayda no Kawas to ‘madimadiay citanengay a koli’ han?

¹⁶ Misaka dademakay ci Satan ato hekal ningra miafaday to madimadiay citanengay a koli, ano awaay ko sapadama ni Yihofa, cowa ko mamalaheci ko tayal nangra. Soˈlin, mafekad ko tosaay a taˈangayay lalood no hekal, saroero, sasifod no kicay, ato cowa ka sadafdaf a demak, kawra ‘madimadiay citanengay a koli’ kamayanay a pafeli to Krisciyang to sapalahad to pakasoˈlinay falocoˈ a ‘kakaenen’. Haratengen hena, o mitepangan no likakawa no Kawas a lalakaw tada kadofahayto, maedeng 900 ko kasasiroma no sowal a lalakaw, cowa papayci ko kihcod! Oniya demak sahetoay o wacay to midamaan ni Yihofa ko ‘madimadiay citanengay koli.’ O roma a wacay i, pakayni pitosilan, o ngaˈayay lihaf soˈlinay a mapatenak i ‘polong no hekal.’ (Matay 24:14) Soˈlinayto, mikayatay halo padamay ci Yihofa to likakawa Ningra.

17. Sasamaan kita paihkal to midamaay ko niyah to likakawa ni Yihofa hani?

¹⁷ Licayen ko niyah: ‘Malo tamdaw no likakawa  no Kawas kako, tada malikoay kako han?’ Itini i lintad ni Mosi aci Aron, patefadan ni Yihofa ko namal a misawacay to midamaay Cingra to itiyaay a saysi, anini, adihayay ko wacay ita a pakasoˈlin to midamaay ci Yihofa to likakawa Ningra. Iraay ko adihayay lalangian ita miakoˈid ci Yihofaan. (1 Tisalonika 5:18, 19) Sasamaan kita paihkal to midamaay ko niyah to likakawa ni Yihofa hani? O lalakaw no likakawa no Kawas, saˈopo ato taykay pafeliay to adihayay a sakayat no Fangcalay Cudad, saˈicelen ita a mitoor koniya sakayat a midemak. Roma i, misaˈicel kita a mitosil ato pakafanaˈay to tamdaw a demak.—1 Korinto 15:58.

18. Saˈosien ita ko falocoˈ midemak to maanan hani?

¹⁸ Saˈosien ita ko falocoˈ misaka dademak to kalimlaan i Lifi a cudad. Saˈicelen ita milifok to pihayda ni Yihofa ngaˈ, micada Cingra to sapacakat a sapatoˈaya no mita. Tada miakoˈiday kita ci Yihofaan, makalimay kita matayal saki Cingranan, samanen maolahay kita Cingranan, mansa pacakat to sangaˈayay no mita. Midamaay ci Yihofa to likakawa Ningra, mihaenay i, misaˈicel kita a midama. Ano mihaen kita midemak i, mahecad o pasowalay ci Yihofaan, malo misawacayay tamdaw Ningra, o kalikoan no mita, mahemekay midoko Cingranan!