1, 2. ¿Kunatsa cristianonakajj Levítico librot yatjjatañatak wal chʼamachasiñasa?

APÓSTOL Pablojj Timoteo amigopar akham sänwa: “Taqpach Qellqatajj Diosan amuytʼayatawa, sumarakiw yatichañataki” sasa (2 Tim. 3:16). Uka ‘Qellqatat’ maynïrejj Levítico librowa. ¿Kunsa jumajj uka librot amuyta? Yaqhepajj akham sapjjewa: “Uka libron walja leyinakaw utji, ukampis uka leyinakarjam sarnaqañajj janiw wakisjjeti” sasa. Ukampis cristianonakajj janiw ukham amuyktanti.

² Levítico librojj 3.500 maranak nayras qellqaskchïnjja, Jehová Diosajj “jiwasar yatichañatakiw” jichhakam utjayaskaki (Rom. 15:4). Diosan amuytʼayat uka librojja, Jehová Diosan amuyunakap yatiñatakiw yanaptʼistu, ukhamajj uka librot yatjjatañatakejj wal chʼamachasiñasa. Cheqas uka libronjja walja yatichäwinakaw utji. Ukanakat pusi yatjjatañäni.

3. Juchanak Perdonayasiñatak Urunjja, ¿kunatsa sacrificionakajj Diosar loqtasïna?

³ ¿Kunsa yateqsna? Maya, Diosajj kuntï lurktan ukanak katoqañapatakejja Jupampi suma jaqet uñjatäñaw wakisi. Juchanak Perdonayasiñatak Urojj maran may kuti amtasirïkäna uka urunjja, israelitanakajj taqpachaniw tantachasipjjerïna, jachʼa jilïr sacerdotejj animalanakwa Diosar sacrificiot loqtirïna. Ukajja, jan juchanïpjjañapajj kunja wakiskirïnsa ukwa israelitanakar  amtayäna. Ukampis Santísimo cheqar animalanakan wilap aptʼat janïr mantkasajja, yaqhampwa jachʼa jilïr sacerdotejj lurañapäna. Ukaw israelitanakan juchanakap perdonañat sipansa jukʼamp wakiskirïna.

4. Levítico 16:12, 13 textorjamajja, ¿Juchanak Perdonayasiñatak Urun kunsa jachʼa jilïr sacerdotejj Santísimo cheqar nayrïr kutin mantkäna ukhajj luräna? (Nayrïr paginankir dibujo uñjjattʼäta).

⁴ (Levítico 16:12, 13 liytʼañataki). Juchanak Perdonayasiñatak Urun kunas pasäna uk amuytʼañäni. Ukürojja, jachʼa jilïr sacerdotejj tabernáculo sat carparuw manti. Mä ampararojj suma olorani incienswa api, maysa ampararusti nina sankʼanakamp (brasas) phoqtʼata qorit lurat mä incensario aparaki. Jachʼa jilïr sacerdotejja, Santisimor mantañawjan utjkäna uka cortina nayraqataruw saytʼasi. Uka urojj wali respetompiw nayrïr kutin manti, ukampis pä kutimpiw uka cheqar mantarakini. Mantasajja, arca nayraqataruw saytʼasi. Ukankasajj Jehová Dios nayraqatankkaspas ukhamawa. Ukjjarojja, nina sankʼanak patjjaruw incienso warjjati, ukham luri ukhajja mä wali suma oloraw uka manqha phoqtʼi. * Qhepatjja, Diosar loqtat animalanakan wilapas aptʼataw wasitat mantani. ¿Amuytanti? Jachʼa jilïr sacerdotejj Diosar loqtat animalanakan wilapa janïr loqtkasajja, nayraqatajj incienswa naktʼayi.

5. Inciensojj Juchanak Perdonayasiñatak Urun naktʼayasirïkäna ukat ¿kunsa yateqsna?

⁵ Inciensojj Juchanak Perdonayasiñatak Urun naktʼayasirïkäna ukat ¿kunsa yateqsna? Diosajj Jupat jan jitheqtas servirinakapan oracionanakap istʼki uka oracionanakajja, inciensökaspas ukhamawa sasaw Bibliajj qhanañchi (Sal. 141:2; Apoc. 5:8). Amtañäni, jachʼa jilïr sacerdotejja wali respetompiw Jehová Dios nayraqatarojj inciensos aptʼat mantäna. Jiwasajj Jehová Diosar oración lurtan ukhajj ukhamarakiw wali respetompi mayistanjja. Kunjamatï mä wawajj awkipar jakʼachaskejja, ukhamarakiw taqe kun Luriri Diosar jakʼachassna, ukat wal yuspärtanjja (Sant. 4:8). Amigonakaparjamaw katoqarakistu (Sal. 25:14, NM). Cheqansa ukajj wali kusiskañawa, Diosarojj janipuniw kunäkipansa chuym ustʼayañ munktanti.

6. Jachʼa jilïr sacerdotejj Diosar sacrificionak janïr loqtkasin incienso naktʼayirïkäna ukajja, ¿kunsa yatichistu?

⁶ Ak amtañäni, Diosar sacrificionak janïr loqtkasajja, jachʼa jilïr sacerdotejj incienswa nayraqat naktʼayañapäna. Ukhamatwa Jehová Diosajj jupar iyawsiti janicha uk yatïna. ¿Kunsa ukat yateqsna? Jesusajj aka oraqenkkäna ukhajja, jakäwip sacrificiot janïr loqtkasajj taqe chuymaw Diosar istʼañapäna, ukaw jaqenakar salvañat sipansa jukʼamp wakiskirïna, ukhamatakwa Diosajj sacrificiop katoqaspäna. Jesusajja, Diosar taqe chuyma istʼasaw Diosan arunakaparjam sarnaqañajj qhawqha wakiskirisa uk uñachtʼayäna. Jehová Diosan Taqe Kunjjar Munañanïtapsa cheqaparjam apnaqerïtapsa uñachtʼayarakïnwa.

7. Aka oraqenkkasajj kunanaktï Jesusajj lurkäna ukajj ¿kunatsa Jehová Diosar kusisiyäna?

⁷ Aka oraqenkkasajja, Jesusajj taqe kunanwa Diosar istʼäna. Kunjamsa Awkipajj apnaqe uka toqet saytʼasiñapatakejja, janipuniw kuna yantʼasa, jan waltʼäwisa, ni wali tʼaqesiyat jiwayatäñapäkäna uk yatiñas jarkʼkänti (Filip. 2:8). Yantʼanakan uñjasïna ukhajja, ‘jachʼat artʼasisa jachtʼasisa’ ukhamaw Jesusajj Diosar mayisïna (Heb. 5:7). Ukham mayisitapajj Diosat janipun jitheqtañ munatapwa uñachtʼayäna, Diosatakjam sarnaqañ munaskakiñatakis chʼamañchtʼarakïnwa. Jehová Diosatakejja, Jesusan mayisitanakapajj suma  olorani inciensökaspas ukhamänwa. Kunanaktï jakäwipan lurkäna ukajj Awkipar wal kusisiyäna, Diosan Taqe Kunjjar Munañanïtapwa uñachtʼayarakïna.

8. ¿Kunjamsa Jesusat yateqasitas uñachtʼaysna?

⁸ Jesusat yateqasitasjja, Diosan leyinakaparjam sarnaqañatak chʼamachasisa, Diosat janipun jitheqtasaw uñachtʼaysna. Yantʼanakan uñjastan ukhajja, Jehová Diosatakjam sarnaqañ munasaw Juparojj ‘yanaptʼita’ sasin mayistanjja. Ukham lurasajj Diosan apnaqäwip toqet saytʼasitaswa uñachtʼaytanjja. Jiwasatï Diosatakjam jan sarnaqkañänejja, Jupajj janiw mayisitanakas istʼkaniti. Ukampis Diosatakjam sarnaqañäni ukhajja, Jupatakejj taqe chuyma mayisitasajj suma olorani inciensökaspas ukhamäniwa. ‘Jan jitheqtas servitajasa jupar istʼatajas alajjpachankir Awkijar kusisiyiwa’ sasaw taqe chuym sarakiñäni (Prov. 27:11).

9. ¿Kunatsa sumankthapiñ ofrendanakajj loqtasïna?

⁹ ¿Kunsa yateqsna? Paya, Diosar wal yuspärtanjja ukatwa Jupar sirvtanjja. Uka toqet qhanañchañatakejj sumankthapiñ ofrendanakat parltʼañäni, uka ofrendanak churasaw israelitanakajj Diosar yupaychapjjarakïna. * Kunjamatï Levítico libron siskejja, israelitanakajj Diosar yuspärañatakiw sumankthapiñ ofrendanak loqtapjjarakispäna (Lev. 7:11-13, 16-18). Uka ofrenda churañajj janiw wakiskapunïnti, ukampis chuymapatwa churapjjäna. Ukhamajj uka ofrendjja, Jehová Diosar munasipjjatap laykuw churapjjäna. Ofrenda churirisa,  familiapasa, sacerdotenakas sacrificiot loqtat animalan aychap manqʼapjjänwa. Ukampis uka animalan yaqhep partenakapajj Jehová Diosatakikïnwa. ¿Ukanakajj kawkïrinakänsa?

10. Jesusajj kunjam chuymampitï Jehová Diosar sirvkäna ukatjja, ¿kunsa Levítico 3:6, 12, 14-16 textonakan parlki uka sumankthapiñ ofrendanakajj yatichistu?

¹⁰ ¿Kunsa yateqsna? Kimsa, Jehová Diosar munasitasatwa kunatï jiwasatak wali valoranïki uk Jupar churtanjja. Jehová Diosatakejja, animalanakan likʼipaw wali sumat uñjatäna. Animalan riñonanakapasa higadopasa wali valoraniwa sasaw Diosajj säna (Levítico 3:6, 12, 14-16 liytʼañataki). Ukhamajj kunapachatï mä israelitajj animalan riñonanakapsa higadopsa likʼipsa chuymapat churäna ukhajja, Jehová Diosajj wal kusisïna. Ukanak churir israelitajja, kunatï jupatak wali valoranïki uk Jehová Diosar churañ munatapwa uñachtʼayäna. Jesusajj ukhamarakiw luräna, Awkipar munasitap laykojj taqe chuymaw Jupar servïna, ukhamatwa kunatï jupatak wali valoranïkäna uk churäna (Juan 14:31). Jesusatakejja Diosan munañap lurañajj wali kusiskañänwa, leyiparus wal munasïna (Sal. 40:8). Yoqapajj kunjam chuymampis Jupar servïna uk uñjasajja, Jehová Diosajj wal kusispachäna.

11. Sumankthapiñ ofrendanakampi Diosar servitasampejj ¿kunansa niya kikpaki, ukat kunjamsa ukajj chuymachtʼistaspa?

¹¹ Jehová Diosar servitasajj sumankthapiñ ofrendanakampi sasiwa. Israelitanakajj Diosar munasiñatwa uka ofrendanak loqtapjjerïna, jiwasajj ukhamarakiw Diosarojj munasiñat sirvtanjja. Juparojj taqe chuymaw munastanjja, ukatwa kunatï jiwasatak wali valoranïki uk churtanjja. Jichhürunakan walja millón jaqenakaw Diosarojj munasiñata, leyinakapar munasiñat servisipki, uk uñjasajja Diosajj walpun kusispacha. Jehová Diosajj janiw kunanaktï Jupar serviñatak lurktan ukak wali valoranit uñjkiti, jan ukasti kunatsa ukanak lurtan uksa ukhamarakiw uñji, uk yatiñajj wal chuymachtʼistu. Sañäni, edadanëjjatas laykojj inas kunjamtï munktan ukham jan serviñ puedjjstanti, ukampis Jehová Diosajj janiw uk uñchʼukkiti, janipun uk armañäniti. Maysa toqetjja, inas akham amuystan: “Diosatakejj janiw phoqatpach lurkti” sasa. Ukampis Jehová Diosajja, Jupar munasiñat kunanaktï lurirjamäktan ukwa uñji. Kunatï jiwasatak wali valoranïki uk churtan ukhajja, wal kusisi.

12. 1) Sumankthapiñ ofrendanakajj loqtasïna ukhajja, ¿kunjamsa Diosajj jikjjatasïna? 2) Kunanaktï Diosar serviñatak lurktan ukanak uñjasajja, ¿kunjamsa Diosajj jikjjataspacha?

¹² ¿Loqtaskäna uka sumankthapiñ ofrendanakat kunsa yateqsna? Animalan riñonanakapasa, higadopasa, likʼipas nakhantäna ukhajja, jewqʼejj alajjpacharuw makatäna. Ukajja Jehová Diosar wal kusisiyäna. Diosar taqe chuyma serviñatak chʼamachastan ukhajja, ukhamarakiw kusispacha (Col. 3:23). Kunanaktï Jupar munasitasat lurktan ukanakajj jukʼakïpasa waljäpasa, Diosatakejj wali valoraniwa, janirakiw armkaniti (Mat. 6:20; Heb. 6:10).

13. Levítico 9:23, 24 textorjamajja, ¿kunjamsa Jehová Diosajj sacerdotenakar iyawsatap uñachtʼayäna?

¹³ ¿Kunsa yateqsna? Pusi, Jehová Diosajj markapar bendisiwa. Tabernáculo sat carpajj 1512 (antes de Cristo) maran tukuyasjjäna ukhajj kunas pasäna uk amuytʼañäni, uka carpajj Sinaí Qollu jakʼanwa saytʼayasïna (Éx. 40:17). Aaronampiru wawanakapampir sacerdotet uttʼayaskäna uka tantachäwjja Moisesaw sarayäna. Sacerdotenakajj kunjamsa sacrificionak nayrïr kutin loqtapjjäna uk uñjañatakejja, israelitanakajj taqeniw tantachasipjjäna (Lev. 9:1-5). ¿Kunjamsa Jehová Diosajj jichhak uttʼayat sacerdotenakar iyawsatap  uñachtʼayäna? Aaronampi Moisesampejj israelitanakar bendisipjjäna ukhajja, Jehová Diosajj ninwa alajjpachat apayanïna, ukhamat altarankkäna uka sacrificionak nakhantañapataki (Levítico 9:23, 24 liytʼañataki).

14. Nayrajj kunjamsa Diosajj sacerdotenakar iyawsatap uñachtʼayäna uk yatiñajja, ¿kunatsa jiwasatak wali wakiskiri?

¹⁴ Aaronampiru wawanakapampir sacerdotet uttʼayasïna ukhajja, ukham musparkañ luräwimpiw Jehová Diosajj jupanakar iyawsatap uñachtʼayäna. Diosajj kunjamsa uka sacerdotenakar iyawsäna uk uñjasajja, israelitanakajj Jehová Diosjamarakiw sacerdotenakarojj taqe kunan yanaptʼapjjañapäna ukwa amuyapjjäna. ¿Kunatsa uk yatiñajj jiwasatak wakiskiri? Israelan utjkäna uka sacerdotenakajja, jutïrin mä jachʼa jilïr sacerdotejj utjañapäkäna ukan chʼiwipakïnwa. Cristow uka Jachʼa Jilïr Sacerdotejja, jupamp chikasti 144.000 sacerdotenakampi reyinakampiw alajjpachan servipjjani (Heb. 4:14; 8:3-5; 10:1).

15, 16. Jehová Diosajj kunjamsa suma phoqeri amuyasir esclavor yanaptʼaski uk ¿kunjamatsa yattanjja?

¹⁵ Khä 1919 maranjja, Jesusajj mä jiskʼa gruporuw ‘suma phoqeri amuyasir esclavöñapatak’ ajllïna. Uka esclavow Diosan arunakap yatiyañan pʼeqtʼaski, Criston arkirinakaparus ‘tiempopar manqʼa churaraki’ (Mat. 24:45). ¿Jehová Diosajj uka esclavor iyawspachati? Iyawspachaw sasin kunatsa sissna uk uñjañäni.

¹⁶ Supayasa jupan apnaqat akapachasa, kuntï ‘suma phoqeri amuyasir esclavojj’ luraski uk jarktʼañwa munapjje. Jehová Diosatï uka esclavor jan yanaptʼkaspajja, jupanakatakejj lurañapampi phoqañajj wali chʼamäspawa. Jichhakamajj pä jachʼa guerranakaw utjawayi, qollqet pistʼañanakas oraqpachanwa utjawayaraki, Diosan markaparusa ina chʼusatwa jan waltʼayañatak arknaqasiwayi. Ukhamäkchisa,  suma phoqeri amuyasir esclavojj walja yatichäwinakwa Criston arkirinakaparojj manqʼäkaspas ukham churaskaki. Aka toqet amuytʼañäni: Bibliat apstʼat qellqatanakajj 900 jila arunakanwa utjistu, ukanakajj janiw aljaskiti. Ukaw kunjamsa Jehová Diosajj suma phoqeri amuyasir esclavor yanaptʼaski uk uñachtʼayi. Predicacionaw Diosan yaqha bendicionaparakejja. Suma yatiyäwinakajja, “aka oraqpachanwa” yatiyasiski (Mat. 24:14). Cheqansa Jehová Diosajj markapar yanaptʼaskiwa bendisiskarakiwa.

17. ¿Kunanak lurasas Jehová Diosan markapar yanaptʼsna?

¹⁷ Akham jisktʼasiñäni: “¿Diosan markapankatajat kusisitätti?” sasa. Moisesajj jakkäna uka urunakanjja, sacerdotëpjjañapatak uttʼayaskäna ukanakar iyawsatap uñachtʼayañatakejj ninwa Jehová Diosajj alajjpachat apayanïna. Jichhürunakanjja, niya ukhamarakiw markapar yanaptʼaskatap kunaymanit uñachtʼayistu. Ukhamajj walpun Jehová Diosarojj markapankatasat yuspärtanjja (1 Tes. 5:18). ¿Kunanak lurasas Diosan markapar yanaptʼsna? Bibliat apstʼat qellqatanakana, tantachäwinakana, jachʼa tantachäwinakan katoqktan uka ewjjtʼanakarjamaw sarnaqañasa, Diosan arunakap yatiyañatakisa jaqenakar Criston arkiripar tukuyañatakis taqe chuymaw chʼamachasiñasaraki (1 Cor. 15:58).

18. ¿Kun lurañpunsa muntanjja?

¹⁸ Kunanaktï Levítico librot yateqawayktan ukanakarjam sarnaqañpunwa muntanjja. Diosajj kuntï lurktan ukanak katoqañapatakejja, Jupampi suma jaqet uñjatäñatak chʼamachasiñäni. Juparojj yuspäratas layku servipjjañäni. Diosar munasitas laykojj kunatï jiwasatak wali valoranïki uk Jupar churasipkakiñäni. Markaparus taqe chuyma yanaptʼapjjañäni. Taqe ukanak lurasajja, Jehová Diosar serviñasa Testigopäñas kunja kusiskañasa ukwa Jupar uñachtʼayañäni.