1-2. Inyuki Bikristen bi ngéda yés bi nlama añ kaat i Lôk Lévi?

ÑÔMA Paul a kal liwanda jé Timôtéô le, “Tilna yosôna i nlôl ni Nyambe, i mbahal (i yé nseñ).” (2 Timôtéô 3:16) Yak kaat i Lôk Lévi i yé mu i tilna i. Lelaa we u ntehe i kaat i? Bôt bahogi ba yé le ba hoñol le, i yé nyonok ni mambén ma ma mbéñge bé bés, ndi bañga bikristen i nhoñol bé hala.

² Kaat i Lôk Lévi i bi tilba nano a yé jam kiki bo 3 500 nwii, ndi Yéhôva a bi tééda yo “le di kôs maéba mu.” (Rôma 15:4) Kiki i kaat i i nyis bés mahoñol ma Yéhôva, jon di nlama wan yo. Di nla nigil ngandak mam mu. Ikété i mam ma, di wan ma-na.

3. Inyuki ba bé ti bisesema hiki nwii i kel Bikwak?

³ Jam li bisu: Inyu boñ le Yéhôva a neebe bisesema gwés, di nlama lémél nye. Hiki nwii, i kel Bikwak, bon ba Israel ba bé lo, ba sémél Yéhôva binuga. Bisesema bi, bi bé hôla Lôk Israel i bigda le ba bééna ngôñ ni nwéhél i bibéba! Ndi ilole prisi keñi i njôbna sesema i Homa a nlôôha mpubhaga, a bé lama ndugi boñ ngim jam, i i bé lôôha ba nseñ iloo nwéhél i bibéba bi bon ba Israel.

4. Kiki kaat Lôk Lévi 16:12, 13 i nkal, kii prisi keñi i bé boñ ngéda i bé jôp inyu ngélé bisu i Homa a nlôôha pubhaga i kel Bikwak? (Béñge titii i lipep li bisu.)

 ⁴ Añ Lôk Lévi 16:12, 13. Hégda le kiki mam ma bé tagbe i kel Bikwak: Prisi keñi i bé jôp i lap. Yokela a bé lama jôp i Homa a nlôôha pubhaga ngélé aa. Ngélé bisu, woo wada u bééna hél nyonok ni binjinjiñ, uu woo umpe u bééga yôñôl i hié i gôl nyonok ni makalak ma hié. A bé a telep bisu bi libadô li li bé hô nwemel u Homa a nlôôha pubhaga. Ni njôôñ lipém, a bé a jôp i Homa a nlôôha pubhaga, a telep bisu bi nkuu malômbla wengoñle a yé bisu bi Yéhôva Nyambe nyemede! Ha nyen prisi i bé kôp binjinjiñ i ngii makalak ma hié, i tun i i yon ni loñge njiñ. * Mbus a bé a tiimba jôp i Homa a nlôôha pubhaga ni matjél ma bisesema inyu béba. Yimbe le, a bé ligis binjinjiñ ilole a nti bisesema inyu béba.

5. Bimbe biniigana di nla ôt mu kiki ba bé ligis binjinjiñ i kel Bikwak?

⁵ Bimbe biniigana di nla ôt mu kiki ba bé ligis binjinjiñ i kel Bikwak? Bibel i ñunda le Yéhôva a ntehe masoohe ma bagwélél bé kiki binjinjiñ. (Tjémbi 141:2; Masoola 5:8) Bigda le prisi keñi i bé kena binjinjiñ bisu bi Yéhôva ni njôôñ lipém. Nlélém, yak bés di nlama ti Yéhôva njôôñ lipém ngéda di nsoohe nye. Di nlôôha kon maséé le Nhek ngiinda yosôna a neebe le di kôôge nye bebee, kiki mañge a nkôôge isañ bebee. (Yakôbô 4:8) A nyoñ bés kiki mawañda mé! (Tjémbi 25:14) Di ntehe hala kiki nsima nkeñi kayéle di mboñ kii yosôna di nla inyu boñ le di unbaha bañ nye.

6. Bimbe biniigana di ñôt mu kii prisi keñi i bé ligis binjinjiñ ilole i nti bisesema?

⁶ Bigda le, prisi keñi i bé ligis binjinjiñ ilole a nti bisesema. Ngéda a bé a boñ hala, a bé nkwoog nkaa le Djob a ga ba maséé ni bisesema gwé. Kii hala a niiga bés? Ngéda Yésu a bé hana ’isi, a bi boñ jam li bé nseñ​—jam li nloo tohi i bôt ba binam​—ilole a nti niñ yé sesema. Limbe li jam? A bi yoñ bitelbene inyu boñ le Yéhôva a neebe sesema yé mu kii a bi téñbe i gwélél ni i gwés Yéhôva letee ni i nyemb. Ni njel i, Yésu a bi unda le i boñ sômbôl i Yéhôva yon i yé bañga niñ. A unda ki le Isañ nyen a kôli énél.

7. Inyuki niñ i Yésu yosôna hana ’isi i bé lémél Isañ?

⁷ Ngéda Yésu a bé hana ’isi, a bi nôgôl Yéhôva i nya i yôni. Manoodana mo ki mo​—to béba nyemb i i bé nye bisu​—bi bi la bé tuga nye i unda le Isañ nyen a kôli énél. (Filipi 2:8) Ngéda Yésu a bé boma manoodana, a bé a soohe “a londok makeñi ni gwiiha mis.” (Lôk Héber 5:7) Minyemhe nwé mi mi bé lôl i ñem, mi bé ti nye ngui i ke ni bisu i nôgôl Isañ. Yéhôva a bé leege masoohe ma Yésu kiki njiñ ilam i binjinjiñ. Niñ i Yésu yosôna hana ’isi i bé lémél Isañ, i bi unda le Isañ nyen a kôli énél.

8. Lelaa di nla kôna Yésu?

 ⁸ Di nla kôna Yésu ngéda di mboñ kii yosôna di nla inyu nôgôl Yéhôva ni i téñbe ni nye. Ngéda di mboma manoodana, di nyemhe Yéhôva le a hôla bés i lémél nye. Ngéda di mboñ hala, di ñunda le di nit énél i Yéhôva. Di nyi ntiik le Yéhôva a nla bé emble masoohe més ibale di mboñ mam ma nlémél bé nye. Ndi di nla ba nkwoog nkaa le minyemhe di nyemhe Yéhôva ni ñem wés wonsôna mi ga ba i mis mé kiki binjinjiñ bi bi numb loñge ibale di mbii matiñ mé bisélél i niñ yés. Di nyi ki le ngéda di yé ngi nsohi, di nôglak Isañ wés nungingii, hala a nkônha nye maséé.​—Bingéngén 27:11.

9. Inyuki bon ba Lôk Israel ba bé ti bisesema inyu nsañ?

⁹ Mam ma nyônôs ima: Di ngwélél Yéhôva inyule di yé maséé ni mam a mbôñôl bés. Inyu yigye i jam li, di pôdôl bisesema inyu nsañ, jam lipe li li bé nseñ mu bibégés bon ba nlômbi Israel ba bé ti Yéhôva. * I kaat i Lôk Lévi, di ntehe le man Lôk Israel a bé le a ti sesema inyu nsañ “inyu ti mayéga.” (Lôk Lévi 7:11-13, 16-18) A bé boñ bé hala inyule ba bé kal nye, ndi inyule a bé gwés boñ hala. A bé ti likébla li ni  ñem wé wonsôna inyule a bé gwés Yéhôva. Mut a bé ti likébla, lihaa jé, ni biprisi ba bé lama je i nuga i. Ndi ngim gwom bi kété ni bipes bipe bi bé ndigi inyu Yéhôva. Bimbe bi?

10. Kii bisesema inyu nsañ kaat Lôk Lévi 3:6, 12, 14-16 i mpôdôl bi niiga bés inyu jam li bé tinde Yésu i boñ sômbôl i Isañ?

¹⁰ Mam ma nyônôs maa: Gwéha yon i ntinde bés i ti Yéhôva i ni i i nlôôha ilam di gwé. Inyu Yéhôva mahoñ ma bé malam iloo bini bipes bi nuga bipe. A bé diihe yak gwom bi kété bipe kiki bo ditam. (Añ Lôk Lévi 3:6, 12, 14-16.) Jon Yéhôva a bé maséé ngandak ngéda man Lôk Israel a bé ti i gwom bi kété bini ni mahoñ ni ñem wé wonsôna. I man Lôk Israel a bé ti i nya makébla i a bé unda le a bééna toi ngôñ i ti Yéhôva i ni i i nlôôha ilam a gwé. Nlélém, Yésu a bi ti Yéhôva jam li nloo mam momasôna a bé a gwé, mu kii a bi gwélél Nye ni ñem wé wonsôna, inyule a bé gwés Nye. (Yôhanes 14:31) Yésu a bé maséé i boñ sômbôl i Djob; a bé lôôha gwés mbén i Djob (Tjémbi 40:9) Kinje maséé Yéhôva a bé lama nôgda i tehe Yésu a ngwélél nye ni ñem wé wonsôna.

11. Inyuki nson wés u mpôôna bisesema inyu nsañ, inyuki hala a nlédés bés?

¹¹ Kiki bisesema inyu nsañ, di nsélél Yéhôva inyu unda nye le di ngwés nye. Di mbôñôl nye kii yosôna di nla inyule di ngwés nye ni ñem wés wonsôna. Kinje maséé Yéhôva a nlama nôgda ngéda a ntehe didun di bôt di ngwélél nye ni ñem wap wonsôna inyule ba ngwés nye! Hala a nlédés bés i yi le Yéhôva a ntehe nson wés a kônlak bés maséé inyu mam di mboñ, yak ni mahoñol malam di gwé. Kiki hihéga, ibale biuni bi nkéñ we i sélél Yéhôva kiki u ngwés, ba nkwoog nkaa le Yéhôva a nok we. U yé le u hoñol le u mboñ bé bañga jam, ndi Yéhôva a ntehe njôôñ gwéha u gwééne nye i i ntinde we i boñ kii yosôna u nla. A yé maséé i leege kii yosôna u nla ti nye.

12. Kii Yéhôva a bé nôgda ngéda ba bé ti nye bisesema inyu nsañ, inyuki hala a nlédés bés?

¹² Bimbe biniigana di ñôt mu bisesema inyu nsañ? Ngéda hié hi bé ligis bipes bilam bi nuga, i hiida hi bé bet hi bé lémél Yéhôva. Jon yi le, Yéhôva a yé maséé ngéda u ngwélél nye ni ñem woñ wonsôna. (Kôlôsé 3:23) Hégda nye a nôgôl we maséé. To kinje sesema u mboñ i nson u Yéhôva, a ntehe yo kiki lisôô li nkus li a ga hôya bé kekikel.​—Matéô 6:20; Lôk Héber 6:10.

13. Inoñnaga ni kaat Lôk Lévi 9:23, 24, lelaa Yéhôva a bi unda le a bi kon maséé ni biprisi ba bi téé?

¹³ Mam ma nyônôs ma-na: Yéhôva a nsayap ntôñ wé hana ’isi. Di béñge jam li bi bôña i nwii 1512 B.N.Y, ngeñ lap i bi tééba isi hikôa hi Sinai. (Manyodi 40:17) Môsi a téé Arôn ni bon bé biprisi. Bon ba Israel ba bi kodba inyu tehe kiki biprisi bi nti bisesema gwap bi bisu. (Lôk Lévi 9:1-5) Lelaa Yéhôva a unda le a bé maséé ni biprisi bini? Ngéda Arôn bo Môsi ba bé sayap litén, hié  hi bi lôl yak Yéhôva, hi ligis bisesema bi bé i ngii juu li bisesema.​—Añ Lôk Lévi 9:23, 24.

14. Kii di nigil mu kii Yéhôva a bi kon maséé ni nson u prisi u Arôn?

¹⁴ Limbe jam li hélha li bi bôña ngéda ba bé téé prisi keñi? Yéhôva a bi gwélél i hié hi inyu unda le a bé maséé ni nson u prisi u Arôn ni bon bé, ni le a bé nit bo i nya i yôni. Kiki bon ba Lôk Israel ba bi tehe le Yéhôva a nit nson u biprisi, ba bi kônde bana manjom malam i bôdôl nye ñem ni ñem wap wonsôna. Baa hala a mbéñge bés i len ini? Ñ! Nson u prisi u bé bôña i loñ Israel u bé yimbne i nson u prisi u Yésu u u nlôôha nkeñi. Kristô Prisi i nlôôha ikeñi, a ga sal i ngii ni 144 000 bikiñe, bi bi yé ki biprisi.​—Lôk Héber 4:14; 8:3-5; 10:1.

15-16. Lelaa Yéhôva a ñunda le a nit “nkol maliga ni u pék”?

¹⁵ I nwii 1919, Yésu a bi téé ndék minhook mi lôk kéé i bôlôm “nkol maliga ni u pék.” Nkol u u ñéga nson likalô u nti ki banigil ba Kristô “bijek ngéda litine.” (Matéô 24:45) Baa di ntehe toi le Djob a ñéga nkol maliga ni u pék?

¹⁶ Satan ni nkoñ ’isi wé ba nke ni bisu i kolba nson u nkol maliga ni u pék. Ibabé mahôla ma Yéhôva, ki nson u u nséla bé. To gwét bi Ntôla gwobiba, to ndééñga, to liyep, to ngitelepsép bi ntuga bé nkol maliga  ni u pék i ke ni bisu i ti banigil ba Kristô bijek. Hoñol ki ngandak bijek bi mbuu di gwé i len ini yañga ikété iloo 900 dilémb! Hala a ñunda toi le Yéhôva a nit nson wés. Jam lipe li ñunda le Yéhôva a nsayap bés li yé nson wés likalô. Ñañ nlam u ñañlana ikété “biloñ gwobisôna.” (Matéô 24:14) Ibabé pééna, Yéhôva a ñéga ntôñ wé, a nsayap ki wo i nya i mbuma ñañ.

17. Lelaa di nla unda le di nit ntôñ u Yéhôva?

¹⁷ Di badba le, ‘Baa me yé maséé i ba ikété ntôñ Yéhôva?’ Yéhôva a ñunda bés yimbne i i nkwés bés nkaa le a nit bés kiki a gwélél hié dilo di Môsi bo Arôn. Di kôli yaga ti Yéhôva mayéga. (1 Tésalônika 5:18, 19) Lelaa di nla unda le di nit ntôñ u Yéhôva? Ngéda di noñ maéba ntôñ u nti bés ni njel Bibel, bikaat, makoda ma hiki sonde, makoda ma makiiña, ni ma ndôn. Di nla ki boñ hala ngéda di nyoñ ngaba i nya i yôni likalô ni i niiga bôt.​—1 Korintô 15:58.

18. Mambe makidik u nyoñ?

¹⁸ Di yoñ makidik i bii biniigana di ñôt munu kaat Lôk Lévi i bisélél. Ngôñ yés i yé le Yéhôva a leege bisesema di mboñ. Di kee ni bisu i gwélél Yéhôva inyule di nkon maséé ni mam a mbôñôl bés, i boñ kii yosôna di nla i nson wé inyule di ngwés nye ni ñem wés wonsôna, i nit ntôñ Yéhôva a nsayap i len ini. Ngéda di mboñ i mam mana momasôna di ñunda le di yé maséé ni nsima di gwé i ba Mbôgi Yéhôva!