1-2. Boasa ingkon lomo roha ni halak Kristen saonari mamparsiajari buku 3 Musa?

DIDOK apostel Paulus tu si Timoteus, “sian Debata do sude Surat na Badia i jala dilehon marhite panogu-noguon ni tondi parbadia. Marguna do i”. (2 Tim. 3:16) Dohot ma i buku 3 Musa. Boha do pandapotmuna taringot buku on? Piga-piga halak marpingkir, molo buku 3 Musa marisi godang patik na so marlangku be di tingkinta saonari. Alai ndang songon i di halak Kristen.

² Buku 3 Musa disurat hira-hira 3.500 taon naung salpu. Jala disurat do i “laho mangajari hita”. (Rom 15:4) Sian buku 3 Musa, boi ma taantusi songon dia pingkiran dohot pangkilalaan ni Jahowa. Alani i, ingkon lomo do rohanta mamparsiajari i. Godang do na boi taparsiajari sian buku on. Jala taulas ma adong opat na boi tadapot sian i.

3. Boasa ingkon dilehon pelean ganup taon di Ari Pardamean?

³ Parsiajaran na parjolo: Asa dijalo Jahowa peleanta, ingkon taulahon do na dihalomohon rohana. Ganup taon di Ari Pardamean, marpungu ma halak Israel jala dipelehon malim bolon ma pelean binatang. Angka pelean i paingothon  halak Israel, na porlu do disesa dosa ni nasida! Alai andorang so masuk malim bolon tu Inganan na Mansai Badia laho mangalehon pelean, adong sada tugas na ingkon diulahon ibana. Sasintongna, rumingkot do i sian hasesaan ni dosa ni bangso i.

4. Songon na didok di 3 Musa 16:12, 13, aha do na diulahon malim bolon tingki parjolo sahali ibana masuk tu Inganan na Mansai Badia di Ari Pardamean? (Ida gambar sampul.)

⁴ Jaha 3 Musa 16:12, 13. Bayangkon ma situasi di Ari Pardamean. Somalna, ingkon tolu hali do malim bolon masuk tu Inganan na Mansai Badia. Tingki parjolo sahali ibana masuk, diboan ibana ma sada inganan na marisi daupa na angur jala sada inganan nai na marisi gara ni api. Jongjong ma ibana di jolo ni tire na manutupi Inganan na Mansai Badia. Di bagasan serep ni roha do ibana masuk tu Inganan na Mansai Badia i jala jongjong di jolo ni poti parpadanan. Di situasi i, songon na jongjong di jolo ni Jahowa do ibana! Dung i, manat ma diusehon ibana daupa na angur i tu inganan na marisi gara ni api. Gabe angur ma Inganan na Mansai Badia i. * Dung i, masuk ma muse ibana tu Inganan na Mansai Badia mamboan mudar ni pelean hasesaan ni dosa. Molo diparrohahon hamu, jolo ditutung malim i do daupa andorang so dipelehon ibana mudar i.

5. Aha do na boi taparsiajari sian daupa na ditutung di Ari Pardamean?

⁵ Aha do na boi taparsiajari sian daupa na ditutung di Ari Pardamean? Didok do di Bibel, dos songon daupa na angur do tangiang ni naposo ni Jahowa na dijangkon Ibana. (Ps. 141:2; Pgk. 5:8) Jala ingot ma, sian serep ni roha do malim bolon mamboan daupa i tu jolo ni Jahowa. Suang songon i ma, sian serep ni roha do hita martangiang tu Jahowa. Mandok mauliate do hita ala boi solhot tu Sitompa saluhutna, songon sahalak dakdanak na solhot tu amana. (Jak. 4:8) Boi do hita marale-ale tu Ibana! (Ps. 25:14) Sada hak istimewa do on di hita jala ndang olo hita mambahen hansit rohana.

6. Aha do na boi taparsiajari taringot daupa na ditutung andorang so mangalehon pelean?

⁶ Molo taingot muse, jolo ditutung malim bolon do daupa andorang so mangalehon pelean. On paposhon rohana, na lomo do roha ni Jahowa tu ibana tingki mangalehon pelean. Aha do na boi taparsiajari? Tingki di tano on Jesus, adong do na mansai ringkot na diulahon ibana. Jala rumingkot do i sian na paluahon angka jolma. Diulahon ibana do i andorang so mangalehon ngoluna gabe pelean. Aha ma i? Saleleng di tano on, tongtong do ibana setia jala unduk tu Jahowa. I do alana dijalo Jahowa do peleanna. Naeng dipatudu Jesus do, na denggan do ngolu ni sasahalak molo mangihuthon parenta ni Jahowa. Jala dipatudu do muse, dumenggan do cara ni Jahowa mamarenta.

7. Saleleng mangolu di tano on Jesus, boasa las roha ni Jahowa tu ibana?

⁷ Saleleng mangolu di tano on, tongtong do Jesus unduk tu Jahowa. Nang pe mangadopi angka hasusaan dohot sitaonon jala diboto ibana do na laho hansit parmatena, marsitutu do Jesus patuduhon na dumenggan do cara ni Jahowa mamarenta. (Plp. 2:8) Tingki mangadopi hasusaan, martangiang do Jesus “marhite angguk-angguk dohot ilu-ilu tu Debata”. (Heb. 5:7) Tangiangna na sian ias ni roha patuduhon, na setia do ibana tu Jahowa jala mangurupi ibana asa tongtong unduk.  Tangiang ni Jesus i dos do songon daupa na angur di Jahowa. Saleleng ngoluna, dibahen Jesus do las roha ni Jahowa jala unduk do ibana tu pamarentaonna.

8. Songon dia do hita boi maniru Jesus?

⁸ Boi do tatiru Jesus molo taulahon nasa tolapta asa tongtong unduk jala setia tu Jahowa. Ringkot do di hita mambahen las roha ni Jahowa. Alani i, tingki mangadopi hasusaan, martangiang ma hita asa diurupi. Molo taulahon i, on patuduhon na lomo do rohanta tu cara ni Jahowa mamarenta. Taboto do, ndang dijalo Jahowa tangiangta molo taulahon na dihasogohon rohana. Alai, molo taulahon aha na dihalomohon rohana, pos ma rohanta songon daupa na angur do tangiangta di Jahowa. Jala pos ma rohanta, las do roha ni Jahowa molo tongtong hita setia jala unduk tu Ibana.​—Poda 27:11.

9. Boasa dilehon halak Israel pelean hamauliateon?

⁹ Parsiajaran na paduahon: Tasomba Jahowa ala naeng patuduhon hamauliateonta tu Ibana. Adong parsiajaran na ringkot sian pelean hamauliateon na diulahon halak Israel najolo. * Sian buku 3 Musa, taboto ma na dilehon halak Israel do “sada pelean pujipujian” laho patuduhon hamauliateon ni nasida. (3 Mus. 7:11-13, 16-18) Sasintongna, ndang na ingkon dilehon sasahalak pelean hamauliateon, alai ala lomo do rohana mangalehon i. Jala on patuduhon, na holong do rohana tu Jahowa. Halak na mangalehon pelean i, keluargana, dohot angka malim boi mangallang jagal pelean i. Alai, adong piga-piga bagian  sian pelean binatang i na ingkon dilehon tu Jahowa. Angka aha ma i?

10. Songon dia do pelean pardamean na didok di 3 Musa 3:6, 12, 14-16, mangajarhon tu hita taringot aha na mambahen Jesus mangulahon lomo ni roha ni Jahowa?

¹⁰ Parsiajaran na patoluhon: Alani holongta, talehon do na dumenggan tu Jahowa. Dipaboa Jahowa do molo bagian na dumenggan sian pelean binatang, i ma tabo-tabona. Jala didok muse piga-piga bagian na asing sian binatang i, i ma ginjalna. (Jaha 3 Musa 3:6, 12, 14-16.) Alani i, las do roha ni Jahowa tingki rade halak Israel mangalehon i gabe pelean. Jala on patuduhon na lomo do roha ni nasida mangalehon na dumenggan tu Jahowa. Suang songon i ma, dilehon Jesus do na dumenggan tu Jahowa ala holong do rohana tu Ibana. (Joh. 14:31) Lomo do roha ni Jesus mangulahon sangkap ni Debata, jala holong do rohana tu patikna. (Ps. 40:9) Mansai las do roha ni Jahowa tingki mangida Jesus rade mangulahon lomo ni rohana!

11. Boasa ulaonta manomba Jahowa dipatudos songon pelean pardamean, jala boasa i mangapuli rohanta?

¹¹ Ulaonta manomba Jahowa, dos do songon pelean pardamean. Talehon do na dumenggan tu Jahowa, ala mansai holong do rohanta tu Ibana. Tontu las hian do rohana mangida marjuta halak sian ias ni roha manomba Ibana! Diida jala diargai Jahowa do aha na taulahon jala aha na mangonjar rohanta laho mangulahon i. On boi mangapuli rohanta. Umpamana, ala nunga matua, ra dihilala hamu ndang godang be na boi diulahon hamu. Alai pos ma rohamuna, diantusi Jahowa do i. Jala diida Ibana, holong do na mangonjar rohamu mangulahon aha na boi ulahononmuna. Las do rohana manjalo na dumenggan na dilehon hamu.

12. Songon dia pangkilalaan ni Jahowa taringot pelean pardamean, jala boasa i boi patoguhon rohanta?

¹² Aha do na boi taparsiajari sian pelean pardamean? Dung suda ditutung angka bagian na dumenggan sian pelean binatang i, nangkok ma timusna. Jala las ma roha ni Jahowa. Pos ma rohamuna, las do roha ni Jahowa tu hamu tingki rade hamu mangalehon na dumenggan tu Ibana. (Kol. 3:23) Pingkirhon ma songon dia las ni rohana tu hamu. Godang manang otik na boi dilehon hamu tu Jahowa, mansai arga do i di Ibana. Jala ingotonna do i salelengna.​—Mat. 6:20; Heb. 6:10.

13. Hombar tu 3 Musa 9:23, 24, songon dia do Jahowa patuduhon na las rohana tu angka malim naung dilantik i?

¹³ Parsiajaran na paopathon: Dipasu-pasu Jahowa do organisasina na adong di tano on. Pingkirhon ma taringot na masa di taon 1512 SM dung sae tabernakel dipajongjong di toru ni Dolok Sinai. (2 Mus. 40:17) Dilantik si Musa ma si Aron dohot angka anakna gabe malim. Marpungu ma bangso Israel laho mangida tingki parjolo sahali angka malim mamelehon angka binatang. (3 Mus. 9:1-5) Songon dia do Jahowa patuduhon na las rohana tu angka malim naung dilantik i? Dung dipasu-pasu si Aron dohot si Musa bangso i, diparo Jahowa do api sian surgo laho manutung pelean i.​—Jaha 3 Musa 9:23, 24.

14. Aha do na ringkot sian hamalimon ni si Aron tu tingkinta saonari?

¹⁴ Api na sian surgo patuduhon na las do roha ni Jahowa tu si Aron dohot angka anakna naung dipillit Ibana gabe malim. Tingki diida bangso Israel na lomo roha ni Jahowa tu nasida, diantusi nasida ma na ingkon  dohot do nasida mangurupi angka malim. Aha do na ringkot sian hamalimon ni halak Israel tu tingkinta saonari? Hamalimon ni Israel manggombarhon hamalimon na dumenggan. Jesus do na dilantik gabe Sintua ni Malim. Jala adong 144.000 na gabe malim dohot raja na laho mamarenta dohot ibana di surgo.​—Heb. 4:14; 8:3-5; 10:1.

15-16. Sian dia do taboto na dihalomohon Debata do naposo haposan jala na marbisuk?

¹⁵ Taon 1919, dilantik Jesus ma piga-piga halak Kristen naung dimiahi gabe “naposo haposan jala na marbisuk”. Nasida ma na manguluhon ulaon marbarita dohot na mangalehon angka naposo ni Jahowa “mangan di tingkina”. (Mat. 24:45) Sian dia do taboto na dihalomohon Debata do naposo haposan jala na marbisuk?

¹⁶ Marsitutu do Sibolis dohot portibi on mangambati ulaon ni naposo haposan. Alai ala diurupi Jahowa, boi do nasida marhasil mangulahon ulaon i. Ala dua hali masa porang dunia, gabe susa ma parhepengon di tingki i. Jotjot do dibahen na so tigor jala dianiaya do naposo ni Debata. Nang pe songon i, tongtong do naposo haposan paradehon angka na ringkot laho patoguhon naposo ni Debata. Pingkirhon ma godang ni publikasinta saonari. Boi do i tadapot gratis jala adong lobi sian 900 bahasa! On patuduhon na sai diurupi Jahowa do naposo haposan. Asing ni i, tarida do pasu-pasu ni Jahowa sian ulaonta marbarita. Alana nunga dibaritahon barita na uli “di liat portibi on”. (Mat. 24:14) Pos ma rohanta, dipasu-pasu jala ditogu-togu Jahowa do organisasina saonari.

17. Songon dia hita boi dohot mangurupi organisasi ni Jahowa?

 ¹⁷ Tasungkun ma dirinta, ‘Las do rohangku gabe bagian sian organisasi ni Jahowa di tano on?’ Di tingki ni si Musa, diparo Jahowa ma api sian surgo laho patuduhon lomo ni rohana tu angka halak naung dilantik. Suang songon i ma di tingkinta saonari. Dipatudu Jahowa do lomo ni rohana tu organisasina. Tontu mandok mauliate do hita tu Jahowa. (1 Tes. 5:18, 19) Songon dia hita boi dohot mangurupi organisasi ni Jahowa? Marhite mangihuthon tudu-tudu sian Bibel na adong di publikasinta, di parpunguan, dohot di kebaktian. Asing ni i, taulahon ma nasa tolapta di ulaon marbarita dohot mangajari angka halak.​—1 Kor. 15:58.

18. Aha do na ingkon tongtong taulahon?

¹⁸ Marsitutu ma laho mangulahon parsiajaran na tadapot sian buku 3 Musa. Lomo do rohanta asa dijalo Jahowa peleanta. Tasomba do Jahowa laho patuduhon hamauliateon tu Ibana. Ala holong do rohanta tu Jahowa, talehon ma na dumenggan jala taurupi ma organisasina sian nasa tolapta. Molo taulahon i, on patuduhon na taargai do hak istimewa gabe Sitindangina!