1-2. Taano ta dapat na magin interesado an mga Kristiyano ngunyan sa libro nin Levitico?

IPINAGIRUMDOM ni apostol Pablo sa hoben na amigo niyang si Timoteo na “an bilog na Kasuratan ipinasabong nin Diyos asin kapaki-pakinabang.” (2 Tim. 3:16) Kaiba diyan an libro nin Levitico. Ano an naiisip mo mapadapit sa librong iyan sa Bibliya? Para sa iba, iyan sarong libro nin lista nin mga susundon na bakong aplikado sa satong panahon, alagad iba an pagmansay diyan nin tunay na mga Kristiyano.

² An Levitico isinurat mga 3,500 na taon na an nakaagi, alagad prineserbar iyan ni Jehova “para sa pagtukdo sa sato.” (Roma 15:4) Dapat na magin interesado kita na siyasaton an Levitico huling nagtatao iyan sa sato nin ideya mapadapit sa kaisipan ni Jehova. Sa katunayan, dakul kitang leksiyon na manunudan sa ipinasabong na librong iyan. Pag-ulayan ta an apat kaiyan.

3. Taano ta nagdudulot kaidto nin mga atang kada taon sa Aldaw nin Pagbayad sa Kasalan?

³ Inot na leksiyon: Kaipuhan na igwa kita kan pag-uyon ni Jehova tanganing akuon niya an satong mga atang. Kada taon sa Aldaw nin Pagbayad sa Kasalan, nagtitiripon an nasyon nin Israel asin nagdudulot nin mga atang na hayop an halangkaw na saserdote. An mga atang na iyan nagseserbing pagirumdom sa mga Israelita na kaipuhan sindang malinigan huli sa kasalan! Pero bago darahon kan halangkaw na saserdote sa Kabanal-banali an ano man na atang na dugo sa aldaw na iyan, kaipuhan niya ngunang gibuhon an saro pang bagay na mas mahalaga kisa sa kapatawadan sa mga kasalan kan nasyon.

4. Arog kan sinasambit sa Levitico 16:12, 13, ano an mga ginigibo kan halangkaw na saserdote sa inot na paglaog niya sa Kabanal-banali sa Aldaw nin Pagbayad sa Kasalan? (Hilingon an ritrato sa cover.)

 ⁴ Basahon an Levitico 16:12, 13. Imahinara an eksena sa Aldaw nin Pagbayad sa Kasalan: Naglaog sa tabernakulo an halangkaw na saserdote. Ini an inot sa tulong beses na dapat siyang maglaog sa Kabanal-banali sa aldaw na iyan. Sa saro niyang kamot, kapot-kapot niya an sarong lalagan na may mahamot na insenso, asin sa saro pang kamot, maingat niyang dinadara an sarong bulawan na bugtakan nin baga na pano nin baga. Nagpundo nguna siya sa atubangan kan kurtina na nagtatahob sa entrada pasiring sa Kabanal-banali. Dangan, may dakulang paggalang siyang naglaog sa Kabanal-banali asin nagtindog sa atubangan kan kaban kan tipan. Sa simbolikong paagi, yaon siya sa mismong presensiya kan Diyos na Jehova! Dangan maingat niyang ibinugtak an banal na insenso sa mga baga, asin nagin mahamuton an bilog na kuwarto. * Uruatyan, malaog giraray siya sa Kabanal-banali dara an dugo kan mga dulot para sa kasalan. Risahon na tinutong niya nguna an insenso bago niya iatang an dugo kan mga dulot para sa kasalan.

5. Ano an manunudan niyato sa paggamit kan insenso sa Aldaw nin Pagbayad sa Kasalan?

⁵ Ano an manunudan niyato sa paggamit nin insenso sa Aldaw nin Pagbayad sa Kasalan? Ipinaparisa kan Bibliya na an akseptableng mga pamibi kan maimbod na mga parasamba ni Jehova garo insenso. (Sal. 141:2; Kap. 5:8) Tandaan na nagpapahiling nin dakulang paggalang an halangkaw na saserdote mantang dinadara niya an insenso pasiring sa presensiya ni Jehova. Kaagid kaiyan, pag nagdudulok kita ki Jehova sa pamibi, ginigibo niyato iyan na may dakulang paggalang. Ipinagpapasalamat tang marhay na tinutugutan kita kan Kaglalang kan uniberso na dumulok asin rumani sa saiya, arog nin aki sa saiyang ama. (Sant. 4:8) Inaako niya kita bilang saiyang mga amigo! (Sal. 25:14) Ipinagpapasalamat niyatong marhay an pribilehiyong ini kaya habo nanggad niyatong mapamundo siya.

6. Ano an manunudan niyato sa pagtutong nguna nin insenso kan halangkaw na saserdote bago niya idulot an mga atang?

⁶ Girumdumon na kaipuhan nguna kan halangkaw na saserdote na tutungon an insenso bago niya idulot an mga atang. Paagi kaiyan, sinisigurado niya na igwa siya kan pag-uyon nin Diyos pag idinudulot niya na an mga atang. Ano an manunudan niyato diyan? Kan yaon pa si Jesus sa daga, may sarong mahalagang bagay na kinaipuhan niyang gibuhon—sarong bagay na mas importante kisa sa pagligtas sa katawuhan—bago niya itao an saiyang buhay bilang atang. Ano iyan? Kinaipuhan ni Jesus na ipahiling na may integridad siya asin maimbod sa bilog niyang buhay tanganing akuon ni Jehova an saiyang atang. Paagi kaiyan, mapapatunayan ni Jesus na an pamumuhay kauyon kan kabutan ni Jehova iyo an tamang paagi nin pamumuhay. Ibibindikar ni Jesus—o papatunayan niyang tama asin makatanusan—an soberaniya, o paagi nin pamamahala, kan saiyang Ama.

7. Taano ta nakapaugma sa saiyang Ama an bilog na buhay ni Jesus sa daga?

⁷ Sa bilog na buhay ni Jesus digdi sa daga, padagos niyang ipinahiling an perpektong pagsunod sa matanos na mga pamantayan ni Jehova. Mayong sugot o pagbalo—maski an mangyayari sa saiyang makulugon na kagadanan—an makakapaluya sa saiyang determinasyon na idepensa an paagi nin pamamahala kan saiyang Ama. (Fil. 2:8) Kan mapaatubang sa mga pagbalo, namibi si Jesus “na may kaibang mga pag-agrangay saka mga luha.” (Heb. 5:7) An saiyang udok na mga pamibi nagpahiling na maimbod siya asin nakapakusog iyan sa saiyang pagmawot na magdanay na masinunod. Para ki Jehova, an mga pamibi ni Jesus garo mahamuton na insenso. An bilog na buhay ni Jesus nakapaugmang marhay sa saiyang Ama asin nagbindikar sa Saiyang soberaniya.

8. Paano niyato maaarog an paagi nin pamumuhay ni Jesus?

 ⁸ Maaarog niyato si Jesus paagi sa paggibo kan satong pinakamakakaya na ipahiling sa bilog niyatong buhay an satong integridad asin kaimbudan sa mga pamamaagi saka pagbuot ni Jehova. Pag napapaatubang sa mga pagbalo, udok kitang namimibi para sa tabang ni Jehova huling gusto niyatong mapaugma siya. Pag ginigibo ta an mga ini, ipinapahiling niyato na sinusuportaran ta an paagi nin pamamahala ni Jehova. Nasasabutan niyato na dai aakuon ni Jehova an satong mga pamibi kun naggigibo kita nin mga bagay na kinokondenar niya. Minsan siring, kun namumuhay kita kauyon kan mga pamantayan ni Jehova, makakapagtiwala kita na an satong udok na mga pamibi magigin siring sa mahamuton na insenso ki Jehova. Asin makakasigurado kita na an satong integridad asin maimbod na pagkuyog nakakapaugma sa satong Ama sa langit.—Tal. 27:11.

9. Taano ta nagdudulot kaidto nin mga atang sa pakikipagkatuninungan?

⁹ Ikaduwang leksiyon: Naglilingkod kita ki Jehova huling nagpapasalamat kita sa saiya. Tanganing iduon ini, pag-ulayan niyato an mga dulot sa pakikipagkatuninungan, na saro pang mahalagang aspekto kan tunay na pagsamba sa suanoy na Israel. * Sa libro nin Levitico, naaraman niyato na an sarong Israelita puwedeng magdulot nin atang sa pakikipagkatuninungan bilang “pasasalamat.” (Lev. 7:11-13, 16-18, NW) Ginigibo niya an pag-atang na ini, bakong dahil kaipuhan niyang gibuhon iyan, kundi dahil gusto niyang gibuhon iyan. Kaya, an pag-atang na ini gikan sa buot na ginigibo nin saro huling namumutan niya an Diyos, si Jehova. An tawong nag-aatang, an  saiyang pamilya, asin an mga saserdote, makakan kan karne kan iinatang na hayop. Pero may mga parte kan atang na hayop na pig-aatang sana para ki Jehova. Anong mga parte iyan?

10. Ano an itinutukdo sa sato kan mga atang sa pakikipagkatuninungan na sinasabi sa Levitico 3:6, 12, 14-16 mapadapit sa dahilan ni Jesus kaya ginigibo niya an kabutan kan saiyang Ama?

¹⁰ Ikatulong leksiyon: Namumutan niyato si Jehova kaya itinatao ta sa saiya an satong pinakamakakaya. Para ki Jehova, an taba an pinakamarahay na parte nin sarong hayop. Espesipiko niya man na sinabi na an mahalagang marhay na mga organo, kaiba an bato, may espesyal na halaga. (Basahon an Levitico 3:6, 12, 14-16.) Kaya lalo nang nauugma si Jehova pag an sarong Israelita gikan sa buot na itinatao sa saiya an mahalagang marhay na mga organo asin an taba. An Israelitang nagtatao nin siring na dulot nagpapahiling nin makusog na pagmawot na itao sa Diyos an pinakamarahay. Sa kaagid na paagi, gikan sa buot man na itinao ni Jesus ki Jehova an pinakamakakaya niya paagi sa paglingkod sa Saiya nin bilog na kalag huli sa pagkamuot niya sa Saiya. (Juan 14:31) Dakulang kaugmahan para ki Jesus an paggibo kan kabutan nin Diyos; namumutan niyang marhay an pagbuot nin Diyos. (Sal. 40:8) Siguradong nakapaugmang marhay ki Jehova na mahiling na talagang gikan sa buot na naglilingkod sa saiya si Jesus!

11. Paano an satong paglilingkod nakakaagid sa mga atang sa pakikipagkatuninungan, asin paano iyan nakakaranga sa sato?

¹¹ Nakakaagid sa mga atang sa pakikipagkatuninungan an satong paglilingkod ki Jehova huling paagi kaini ipinapahiling niyato kun ano an satong namamatian para sa saiya. Itinatao niyato ki Jehova an satong pinakamakakaya, asin ginigibo ta iyan huling namumutan ta siya nin bilog na puso. Siguradong nauugma si Jehova na mahiling an minilyon na parasamba na gikan sa buot na naglilingkod sa saiya huli sa dakulang pagkamuot ninda sa saiya asin sa saiyang mga pamamaagi! Makakaranga sa sato kun gigirumdumon niyato na nahihiling asin pinapahalagahan ni Jehova bako lang an satong mga ginigibo kundi pati man an satong mga motibo. Halimbawa, kun may edad ka na asin dakul ka kutang gustong gibuhon pero dai mo na magibo, makakasigurado kang bako sa mga limitasyon mo nakahiling si Jehova. Tibaad mamatian mong dikit lang an maitatao mo sa saiya, alagad hinihiling ni Jehova an pagkamuot sa puso mo na nakakamotibar sa saimo na gibuhon kun ano an kaya mong gibuhon. Nauugma siyang akuon an pinakamakakaya mong itao.

12. Base sa reaksiyon ni Jehova sa mga atang sa pakikipagkatuninungan, sa ano kita makakasigurado?

¹² Ano an manunudan niyato sa mga atang sa pakikipagkatuninungan? Mantang tinutumtom kan kalayo an pinakamarahay na mga parte kan hayop, nag-iitaas an aso kaiyan asin ikinakaugma iyan ni Jehova. Sa kaagid na paagi, makakasigurado ka na nauugma si Jehova sa saimong gikan sa buot asin bilog na kalag na paglilingkod. (Col. 3:23) Imahinara na nakangirit siya sa saimo huling inuuyunan ka niya. An saimong mamumuton na paglilingkod sa saiya, dakula man o sadit, ibinibilang niyang kayamanan na gigirumdumon asin papahalagahan niya sagkod lamang.—Mat. 6:20; Heb. 6:10.

13. Sigun sa Levitico 9:23, 24, paano ipinahiling ni Jehova an pag-uyon niya sa bagong nombrahan na mga saserdote?

¹³ Ikaapat na leksiyon: Binebendisyunan ni Jehova an daganon na kabtang kan saiyang organisasyon. Pag-isipan an nangyari kan 1512 B.C.E. kan pinatindog an tabernakulo sa pamitisan kan Bukid nin Sinai. (Ex. 40:17) Si Moises an nanginot sa seremonya tanganing nombrahan si Aaron asin an mga aking lalaki kaini bilang mga saserdote. Nagtiripon an nasyon nin Israel tanganing mahiling mismo na idinudulot kan mga saserdote an saindang kainot-inuting mga atang na hayop. (Lev. 9:1-5) Paano ipinahiling ni Jehova an pag-uyon niya sa bagong nombrahan na mga saserdote? Mantang binebendisyunan ni Moises an nasyon, nagpaluwas si Jehova nin kalayo para  tumtumon an natada sa atang na nasa altar.—Basahon an Levitico 9:23, 24.

14. Taano ta mahalaga sa sato ngunyan an pag-uyon ni Jehova sa saserdoteng si Aaron asin sa mga saserdoteng gikan sa pamilya niya?

¹⁴ Ano an ipinapahiling kan makangangalas na ginibo ni Jehova kan pignonombrahan an halangkaw na saserdote? Paagi kaiyan, ipinapahiling ni Jehova na lubos niyang sinusuportaran si Aaron asin an mga aking lalaki kaini na pinili Niyang magin saserdote. Kan mahiling kan mga Israelita an malinaw na ebidensiyang iyan kan pagsuporta ni Jehova sa mga saserdote, may marahay sindang dahilan na lubos na suportaran an mga ini. Mahalaga daw iyan sa sato ngunyan? Iyo nanggad! An areglo sa pagkasaserdote sa Israel anino sana kan sarong mas urog nanggad na areglo sa pagkasaserdote. Si Cristo, an mas nangungurog na Halangkaw na Saserdote, igwa nin 144,000 na saserdote na maglilingkod bilang mga hadi kaiba niya sa langit.—Heb. 4:14; 8:3-5; 10:1.

15-16. Paano ipinapahiling ni Jehova na inuuyunan niya an “maimbod asin mapagmansay na uripon”?

¹⁵ Kan 1919, ninombrahan ni Jesus an sarong sadit na grupo nin linahidan na mga brother bilang “maimbod asin mapagmansay na uripon.” An uripon na iyan an nanginginot sa gibuhon na paghuhulit asin an nagtatao sa mga parasunod ni Cristo nin “kakanon sa tamang panahon.” (Mat. 24:45) Nahihiling daw niyato an malinaw na ebidensiya na inuuyunan ni Jehova an maimbod asin mapagmansay na uripon?

¹⁶ Kadakul kan ginigibo ni Satanas asin kan saiyang kinaban tanganing padipisilon, o magin imposible pa ngani, sa punto de vista nin tawo, an trabaho kan maimbod na uripon na iyan. Sa ibong kan duwang giyera mundiyal, daing pundong persekusyon, pambilog na kinaban na krisis sa ekonomiya, asin bakong makatanusan na pagtratar, padagos na nagtatao nin espirituwal na kakanon an maimbod asin mapagmansay na uripon sa mga parasunod ni Cristo digdi sa daga. Isipa an abunda asin libreng espirituwal na kakanon na  igwa kita ngunyan, sa labing 900 na lengguwahe! Dai nanggad maninigaran na ebidensiya iyan kan suporta nin Diyos. Pag-isipan an dugang pang ebidensiya kan bendisyon ni Jehova: an gibuhon na paghuhulit. An maugmang bareta tunay nanggad na ihinuhulit “sa bilog na kinaban.” (Mat. 24:14) Mayong duda na ginigiyahan asin abundang binebendisyunan ni Jehova an saiyang organisasyon ngunyan.

17. Paano ta maipapahiling an satong suporta sa organisasyon na ginagamit ni Jehova?

¹⁷ Marahay na haputon ta an satong sadiri, ‘Nagpapasalamat daw ako na kabilang ako sa daganon na kabtang kan organisasyon ni Jehova?’ Arog kan literal na kalayo hali sa langit kan panahon ni Moises asin Aaron, tinawan kita ni Jehova nin nakakakumbinsir na ebidensiya na ginagamit niya an saiyang organisasyon ngunyan. Tunay nanggad na dakul kitang maipagpapasalamat. (1 Tes. 5:18, 19) Paano ta maipapahiling an satong suporta sa organisasyon na ginagamit ni Jehova? Paagi sa pagsunod sa basado sa Bibliyang paggiya na itinatao sa satong mga publikasyon asin sa satong mga pagtiripon, asembleya, saka kumbensiyon. Apuwera kaiyan, maipapahiling man niyato an satong suporta paagi sa pakikikabtang sagkod sa pinakamakakaya niyato sa gibuhon na paghuhulit asin pagtutukdo.—1 Cor. 15:58.

18. Ano an determinado mong gibuhon?

¹⁸ Lugod na magin determinado kita na iaplikar an mga leksiyon na nanudan ta sa libro nin Levitico. Lugod na makua niyato an pag-uyon ni Jehova tanganing magin akseptable an satong mga atang. Lugod na an dahilan niyato kaya naglilingkod kita ki Jehova iyo an satong dakulang pasasalamat sa saiya. Lugod na padagos niyatong itao an satong pinakamakakaya huling namumutan ta siya nin bilog na puso. Asin lugod na bilog na puso niyatong suportaran an organisasyon na binebendisyunan niya ngunyan. Kun gigibuhon niyato an mga bagay na ini, maipapahiling niyato ki Jehova na pinapahalagahan tang marhay an satong pribilehiyo na maglingkod sa saiya bilang mga Saksi niya!