1-2. Rosai ḇefnai fandun fa snonkaku Kristen simarisen kaku fa sfarkor syap Imamat?

MANWAWAN Paulus ḇyuk swarepen Timotius i, ḇo doḇe, ”Fasfas ḇeḇor ḇeramuma ro Allah nbefainda kaku.” (2 Tim. 3:16) Oser ro fasfas anna iso syap Imamat. Rariso karkara bedi faro syap ine? Siya soḇe syap ine iser sasoser ḇesrow werḇa kuker fafisu koḇedine. Ḇape, snonkaku Kristen skara rarirya ḇa.

² Syap Imamat sfas i indokada taun ri 3.500 naiwara. Ḇape, Yahwe fyaduru mnis syap ine isof ro baboine ”insa nfarkor ko”. (Rm. 15:4) Syap Imamat ifnoḇek ko fa kofawi Yahwe karkara ma sneḇaḇir Ḇyedi. Inja, fandun fa komarisen kaku fa kofarkor na. Kakuya, farkarkor nabor na kun ro syap ine. Mkorama kawos farkarkor rifyak ro syap ine.

3. Ro Ras Payasyos, rosai ḇefnai fa sḇuk aiwan ḇe farsarser?

³ Farkarkor ḇerandak: Insama Yahwe imarisen faro farsarser koḇena kofandun kyaremso Ḇyena. Ro taun nakam, er Israel siryur fa sifrur Hari Pendamaian ḇaido Ras Payasyos. Ro ras anya, imam ḇeba na ḇyuk aiwan sya sḇe farsarser. Farsarser nane neswarapepen ḇe snonkaku Israel snar sifandun payasyos faro sasar sena! Ras anya kako, imam ḇeba fandun fa dun aiwan ḇeḇefarser  ansi rik sena ḇe Sim Ḇesren Syadi insama sasar ro er ansi neḇepyos. Ḇape ḇeponya, na ifrur roi oso ḇefandun kaku.

4. Imnis ḇeyap ro Imamat 16:12, 13, ro Ras Payasyos rosai imam ḇeba ifrur ya fafisu syun randak ro Sim Ḇesren Syadi? (Mam sonin ḇero ḇarpon.)

⁴ Wasya Imamat 16:12, 13. Kowasenpan rosai sifrur ro Ras Payasyos ya. Ro ras ani, imam ḇeba syun rarwan rikyor ro Sim Ḇesren Syadi ḇero tabernakel. Fafisu syun randak, ḇramin oser duf rosaser ḇeser dupa ḇediref pyum ma eserya wer duf rosaser ḇrawen ḇeser for. Imnai koper ro ḇarpon kruḇen ḇedwarek nyan ḇesun ḇe Sim Ḇesren Syadi. Kuker syowi syun ro Sim Ḇesren Syadi ma dores ro burua asas ya ḇarpondi. Rya imnis ra dores ro ḇarpon Allah Yahwe! Mura, isḇawer fawas dupa roḇo forya, ma dupa ani nadiref ro sim anikam. * Swaf riḇeso ramnai syun wer ro Sim Ḇesren Syadi ḇo dun rik ro farsarser aiwan ansi. Komam ido ikun dupa ḇepon insape fyarser rik ro farsarser faro sasar ansi.

5. Rosai kofarkor ro nyan sḇuk dupa ro Ras Payasyos ya?

⁵ Rosai kofarkor ro nyan sḇuk dupa ro Ras Payasyos ya? Refo doḇe nadi ro Yahwe manfamyan ḇesoasuser Ḇyesi namnis ra dupa. (Mz. 141:2; Why. 5:8) Koswarepen, imam ḇeba fyasnai syowi kaku fyor dun dupa ḇe ḇarpon Yahwe. Rarirya kako, fyor koḇenadi ḇe Yahwe, kofasnai syowi ḇeba kaku. Komanen kaku baba Ḇyena. Kokofen kasumasa kaku snar Manḇedaw farsyos ḇeba ine ḇyuk swaf ḇe ko fa kofanam yoḇ I ma kona wis ḇepyum kuker I, raris romawa kasun fyanam ḇe kmari. (Yak. 4:8) Imarisen fa kakḇe bati Ḇyedi! (Mz. 25:14) Koḇesyowi kaku fakamaman ine isof komewer kofrur Yahwe fyafko.

6. Imam ḇeba ikun dupa ḇepon insape ḇyuk farsarser. Rosai kofarkor ro roi ine?

⁶ Koswarepen, imam ḇeba fandun fa ikun dupa ḇepon insape ḇyuk farsarser. Rarirya ido, ikyar nari ismai Allah kyaremso Ḇyena fafisu ḇyuk farsarser. Rosai farkarkor ya ḇe ko? Fafisu Yesus ryo supswan, fandun fa ifrur ḇepon roi oso insape fyarser mankundi ḇe farsarser. Roi anya fyandun syadi ro ḇyuk fasaspar faro snonkaku sya. Rosairirya? Fafisu Yesus ikenem ro supswan fandun fa isoasuser pdef faro Yahwe insama Yahwe imarisen faro farsarser ḇyuk na. Rarirya, Yesus fyasnaiḇair sasouser faro Yahwe sasoser Ḇyena ro kankenem ima nyan ḇepyum nairi. Yesus fyasnai kako Kmari ḇena hak kaku fa ḇyepoik ma nyan Ḇyepoik ndraya nanapes ḇesya kwar.

7. Rosai ḇefnai fa ro ras kankenem ḇyedi ḇesiper, Yesus ifrur Kmari imarisen ḇesya kwar?

⁷ Fafisu ikenem ro supswan, Yesus ismai fafrowes ma samswen nabore. Ifawi kako nari smun i fa imar. Rariryano, Yesus isouser pdef faro Yahwe. Ma, nya snerimuk fa fyasnaiḇair nyan Yahwe ḇyepoik raya ima nyan ḇepyum syadi. (Flp. 2:8) Rofyor ismai samswen, Yesus ḇyenadi ”dor kuker kankanes”. (Ibr. 5:7) Nadi Yesus dor kuker sne ḇesiper nane nfasnaiḇair isoasuser faro Yahwe. Nadi ḇyena nsambraḇser sne ḇyedi fa isouser pdef. Ro Yahwe mamam Ḇyedi,  Yesus nadi ḇyena namnis ra dupa ḇediref pyum. Ro ras kankenem ḇyedi ḇesiper, Yesus ifrur Kmari imarisen ḇesya kwar ma fyasnaibos Yahwe iso ḇena hak kaku fa ḇyepoik.

8. Moḇsa na kakso Yesus nyan ḇyena rai?

⁸ Kakso Yesus nyan ḇyena kuker kosewar kaku fa kosoasuser ḇe Yahwe pdef. Fyor kosmai samswen, koḇenadi kuker kakaku fa kor fafnoḇek ro Yahwe, snar koḇe kofrur sneri imarisen. Kofrur na ido, kofasnai komarisen faro nyan Yahwe ḇyepoik raya. Koḇaḇir kaku Yahwe nari ryower nadi koḇena ḇa fyor kofrur roi dayin na. Ḇape, kokenem imnis Yahwe marisen Ḇyena ido, kokyar nadi koḇena namnis ra dupa faro Yahwe I. Ma kokyar kaku sasoasuser koḇena nun marisen ḇe Kma koḇedi ro nanki.​—Ams. 27:11.

9. Rosai ḇefnai fa snonkaku Israel sḇuk farsarser ḇaḇeoser?

⁹ Farkarkor ḇesuru: Kofarmyan ḇe Yahwe snar koḇesyowi I. Na kofarkor roi ine kuker kawos persembahan persahabatan ḇaido farsarser ḇaḇeoser, snonkaku Israel sḇuk na. * Ro syap Imamat, kowasya ido snonkaku Israel oso bisa ḇyuk farsarser ḇeradine ”fa fyasnai kasumasa”. (Im. 7:11-13, 16-18) Ḇyuk farsarser ani snar kyara ima roi fandun fa ifrur ya ḇa, mboi snar imarisen. Inja, snonkaku oso ḇyuk farsarser kuker sne ḇemarisen snar iswar Allah ḇyedi, Yahwe. Snonkaku ḇeḇuk farsarser ani, nari dan kayam  kraf ro aiwan fyarserna, warpu kina ḇyesi ma imam sya. Ḇape, ḇar ḇeḇeso ro aiwan ani ḇyuk na ḇe Yahwe monda. Ḇar sairiri?

10. Rosai ḇemnis ro farsarser ḇaḇeoser ḇefas ro Imamat 3:6, 12, 14-16 kuker Yesus fararmyan ḇyena ḇe Yahwe?

¹⁰ Farkarkor ḇekyor: Koḇuk roi ḇepyum syadi ḇe Yahwe snar koswar I. Ro Yahwe mamam Ḇyedi mafen ro aiwan ima ḇar ḇepyum syadi. Dap mnis kako ḇarmor ḇero sifer ma ken suma ḇar ḇefandun kaku. (Wasya Imamat 3:6, 12, 14-16.) Iso eḇedari, Yahwe imarisen kaku fyor snonkaku Israel sḇuk mafen ma ḇar ansuya ḇe farsarser kuker sne ḇemarisen. Snonkaku Israel ḇeḇuk farsarser ḇeradine sfasnai simarisen sḇuk roi ḇepyum syadi faro Yahwe. Rarirya kako, Yesus kuker sne ḇemarisen ḇyuk roi ḇepyum syadi ḇe Yahwe. (Yoh. 14:31) Yesus imarisen kaku fa ifrur Yahwe marisen Ḇyena ma iswar kaku Allah sasoser Ḇyena. (Mz. 40:8) Yahwe na iryaḇ kaku fyor myam Yesus fyarmyan ḇe I kuker sne ḇemarisen!

11. Rosai ḇemnis ro farsarser ḇaḇeoser kuker fararmyan koḇena ḇe Yahwe, ma rosai ḇefnai fa ine nun sneprei kaku ko?

¹¹ Raris farsarser ḇaḇeoser, fararmyan koḇena ḇe Yahwe iso nyan kofasnai saswar koḇena faro I. Koḇuk roi ḇepyum syadi ḇe Yahwe, ma kofrur na snar koswar I kuker sne ḇesiper. Na Yahwe iryaḇ kaku fyor myam mboi snonkaku syaran ma syaran sfarmyan ḇe I kuker sne ḇemarisen snar siswar Yahwe ma nyan Ḇyena! Yahwe myam ma ḇyesyowi roi kofrur na monda ḇa, ḇape roi ḇedif kosnesna kako. Ine nun sneprei kaku ko! Imnis raris, Auma ḇesinan kwar ma jadi ḇa fa buk nabor syadi raris ḇeponya wer ḇa ido, wakyar kaku Yahwe ifawi roi wasmai na. Imbude kwara mboi buk kermkun monda ḇe Yahwe, ḇape Ifawi wafrur rosai swambraḇ fa wafrur na snar waswar kaku I. Swewar fa buk roi ḇepyum syadi ḇe I ido Yahwe na imarisen kaku.

12. Rofyor sḇuk farsarser ḇaḇeoser ya, moḇsa Yahwe ḇyaḇir rai, ma rosai farkarkor ya ḇe ko?

¹² Rosai kofarkor ro farsarser ḇaḇeoser ya? Fafisu forya ikun ḇar ḇepyum ro aiwan sfarser na ido, paw ḇyena nafrur fa Yahwe imarisen. Inja, Yahwe na imarisen kako snar wafarmyan ḇe I kuker sne ḇeryaḇ. (Kol. 3:23) Wawasenpan kada Yahwe sneri na imarisen kaku snar myam soasuser Bena. Wafrur nabor ke roḇa ro fararmyan faro Yahwe, na myam na ḇe roi ḇemaeja kaku. Ma nari fyanander na ḇa isof fyoro.​—Mat. 6:20; Ibr. 6:10.

13. Imnis ḇefas ro Imamat 9:23, 24, rariso Yahwe fyasnai kyaremso Ḇyena faro imam ḇerem babo anskoya?

¹³ Farkarkor ḇefyak: Yahwe ḇyebarakas organisasi Ḇyedi ḇero supswan. Kokarapan rosai ḇeḇejadi ro taun 1512 SM rofyor sifrur tabernakel ro Bon Sinai ya ḇaḇdi. (Kel. 40:17) Fyor ya, Moses fyarkin munara fa sramrem Harun ma roma ḇyeskoya sḇe imam. Er Israel siryur kam fa smam imam anskoya sḇuk randak farsarser skoḇena. (Im. 9:1-5) Rariso Yahwe fyasnai kyaremso Ḇyena faro imam ḇerem babo anskoya? Fafisu Harun ma Moses suḇeḇok er Israel ansya, Yahwe ḇye forya fa ikunpres farsarser ḇero rokef farsarser na.​—Wasya Imamat 9:23, 24.

14. Rosai ḇefnai fa Yahwe kyaremso Ḇyedi faro imam ḇero Israel sya fandun fa kofarkor na?

 ¹⁴ For ḇeyado ro nanki mumfes ḇekunpres farsarser anna nḇeḇair ḇe rosai? Ine nḇebair Yahwe imarisen ma kyinfir Harun ma roma ḇyesi fa sḇe imam. Fyor er Israel smam ro mankunsi Yahwe ḇyuk kyaremso Ḇyena ḇe imam anskoya, sifawi fandun kako fa saksaramper imam anskoya. Roi ine nya fasfes kuker ko ro baboine ke? Imbo. Imam anskoya skokurfasnai ḇe imam ḇeba syadi sya. Yesus iso Imam Ḇeba syadi, ma snonkaku ri 144.000 nari sḇe imam ma raja ro nanki fnoḇek Yesus i.​—Ibr. 4:14; 8:3-5; 10:1.

15-16. Rariso Yahwe fyasnaiḇair isya isaramper ’women ḇesouser ma ḇefawinanem’ sya?

¹⁵ Ro 1919, Yesus ikanow raryur kasun ro naek ḇesmai ramrem sya fa sḇe ’women ḇesouser ma ḇefawinanem’. Women ḇesouser ansine sfarkin fararur ḇaḇeḇaryas ma sḇuk ḇe manfamyan Kristus ḇyesi ”nanan faro si ro fafisu ya”. (Mat. 24:45) Koisya komambos kwar Allah isya isaramper women ḇesouser ma ḇefawinanem ansi ke?

¹⁶ Setan ma ḇeso i sya sisewar marmar kaku fa sifrur mnai fararur ro women ansine. Yahwe ifnoḇek si ḇa ido, jadi fa sifrur fararur ḇyuk ḇe si na ḇa. Mamamun dunya risuru, samswen ekonomi ro supswan ḇesiper, ḇaḇewayam ḇemnai ḇa, sifrur mnis si ḇa raryano, women ḇesouser ansine sfasos pdef nanan rurya faro Yesus manfamyan ḇyesi ro supswan ḇesiper. Publikasi koḇena nasya kwar ro wos nasyadi ri 900, ma nakame kosmai na waworek monda! Ine nefasnaiḇair kaku Allah isya isaramper women ḇesouser ansine. Osower ido, komam Allah isaramper  fararur ḇaḇebaryas koḇena. Ankankinem ḇeḇye kirine ḇyeḇeḇaryas kwar ro ”supswan ḇesiper”. (Mat. 24:14) Inja, bisa kokyar snar Yahwe isya fyarkin ma ḇyebarakas organisasi Ḇyedi ro kirine.

17. Rariso kofasnai kaksaramper organisasi Yahwe Ḇyedi?

¹⁷ Kwarauser fakfuken anine: ’Yaḇesyowi kaku fakamaman yedi fa yakro Yahwe organisasi Ḇyedine ke?’ Ro Moses fafisu ḇyedi, Yahwe ḇye for ro nanki mumfes fa fyasnaiḇair kyaremso Ḇyena faro imam ḇeḇerem sya. Ro fafisu koḇedine, Yahwe fyasnaibos kwar ḇye organisasi ine fa fyarkin ko. Na kokofen kasumasa kaku. (1 Tes. 5:18, 19) Rariso kofasnai kaksaramper organisasi Yahwe Ḇyedine? Kofrur na kuker koso mnis akurfasnai ḇeknam ro Refo ḇero publikasi koḇena, fananjur, ma kebaktian. Kokako bisa kofrur na kuker komyaren koḇaryas ma koḇuk farkarkor.​—1 Kor. 15:58.

18. Rosai snemuk Ḇedi?

¹⁸ Mkorama kun snemuk fa kofrur rosai kofarkor ro syap Imamat. Kokam komarisen insama Yahwe kyaremso farsarser koḇena. Koḇe kofarmyan ḇe Yahwe snar koḇesyowi kaku I. Komarisen koḇuk roi ḇepyum syadi faro Yahwe snar koswar I kuker sne ḇesiper. Ma komarisen kaku fa kosaramper organisasi Yahwe fyarkini ro baboine. Kofrur roi nanekam ido, kofasnaiḇair ḇe Yahwe I koḇesyowi kaku fakamaman kosmai fa kofarmyan faro I ḇe Saksi Ḇyedi!