1-2. Wai Kristyanz tudeh shuda bee inchrestid eena di buk a Leviticus?

DI APASL Paal mi rimain ih yong fren Timoti dat “da Gaad mek peepl rait dong aal weh dehn don rait eena ih Skripcha. Ahn aal dehn ting weh deh eena ih Skripcha, dehn gud fi . . . wi.” (2 Tim. 3:16) Dat inklood di buk a Leviticus. Weh yoo tink bowt da buk a di Baibl? Som peepl tink dat da jos wahn buk weh gat een wahn lata roolz weh kyaahn help wi tudeh, bot Kristyanz noh tink laik dat.

² Moaziz mi rait di buk a Leviticus bowt 3,500 yaaz agoa, bot stil Jehoava sayv it “fi teech wi.” (Roam. 15:4) Di buk a Leviticus help wi fi andastan di way how Jehoava tink ahn feel bowt sertn tingz. Dats wai wi shuda wilin fi laan fan it. Dehn ga wahn lata lesn weh wi ku laan fahn di buk weh Gaad mi mek Moaziz rait. Mek wi kansida foa a dehndeh lesn.

3. Wai di hai prees mi aafa op sakrifais evri yaa pahn Atoanment Day?

³ Di fos lesn: Di onli way Jehoava wahn aksep fi wee sakrifais da if ih pleez wid wi. Evri yaa pahn Atoanment Day, di hai prees a di nayshan a Izrel doz aafa op animal sakrifais. Dehn sakrifais mi help rimain di Izrelait dehn dat dehn mi need fi bee kleen fahn sin! Bot bifoa di hai prees mi kehr eniting eena di Moas Hoali, hihn mi haftu du sohnting els fos. Dis mi moa impoatant dan di fagivnis a di nayshan sinz.

4. Akaadn tu Leviticus 16:12, 13, weh di hai prees mi du joorin di fos taim ih mi fi enta di Moas Hoali pahn Atoanment Day? (Koment pahn di picha pahn di kova.)

 ⁴ Reed Leviticus 16:12, 13. * Picha weh hapm pahn Atoanment Day: Di hai prees di enta di tabernakl. Dis da di fos taim owta chree taim wehpaat hihn haftu enta di Moas Hoali pahn da day. Eena wan a ih han, ih di hoal wahn kantayna weh ful op wid insens powda, an eena di neks han, ih di hoal wahn faiya hoalda weh ful op wid hat faiya koal. Hihn stap lee bit fronta di kertn weh di kova di way fi goh eena di Moas Hoali. Hihn shoa lata rispek az ih waak eena di Moas Hoali ahn stan op fronta di aak a di kovenant. Eena wahn way, da mi laik hihn mi-di stan op fronta Jehoava Gaad! Den di prees poar di hoali insens tap a di faiya koal weh di bon, ahn di room staat tu smel sweet sweet sweet. * Layta, hihn gwain bak eena di Moas Hoali wid di blod fahn di animal dehn weh ih mi sakrifais. Noatis dat hihn mi bon di insens bifoa hihn mi aafa op di blod a di animal dehn weh mi geh sakrifais.

5. Weh wi ku laan fahn di way how di insens mi geh yooz pahn Atoanment Day?

⁵ Weh wi ku laan fahn di way how di insens mi geh yooz pahn Atoanment Day? Di Baibl shoa wi dat di pryaaz weh Jehoava aksep fahn fi hihn faytful servants da jos laik insens. (Ps. 141:2; Rev. 5:8) Memba dat di hai prees doz shoa wahn lata rispek az ih kehr di insens fronta Jehoava. Soh jos laik dat, wen wi pray tu Jehoava wi fi du it wid deep rispek. Wi veri tankful dat di Kriyayta a di yoonivers alow wi fi kohn kloas tu ahn, jos laik wahn chail an ih pa. (Jay. 4:8) Hihn aksep wi az fi hihn frenz! (Ps. 25:14) Wi reeli apreeshiayt dis privilij wahn lat, soh wi wuda neva waahn du eniting weh noh wahn mek hihn bee hapi wid wi.

6. Weh wi ku laan fahn di fak dat di hai prees mi bon di insens bifoa hihn mi aafa op di sakrifais?

⁶ Memba dat di hai prees mi haftu bon di insens bifoa hihn kuda mi aafa op di sakrifais. Wen hihn mi du dis, hihn mi-di mek shoar dat Gaad mi wahn bee pleez wid ahn. Da weh wi ku laan fahn dat? Wen Jeezas mi deh pahn di ert, Jeezas mi haftu du sohnting reeli impoatant—dis da-mi sohnting weh mi moa impoatant dan fi sayv hyoomanz—dis da-mi bifoa hihn kuda mi aafa op fi hihn laif az wahn sakrifais. Da weh hihn mi haftu du? Hihn mi haftu bee faytful an obay Jehoava dong tu di en. Wen Jeezas mi du dat, hihn mi proov dat di rait way fi liv ahn du tingz, da Jehoava way. Jeezas mi wahn help klayr op Jehoava naym, ahn proov dat fi hihn Faada roolaship rait an jos.

7. Wai Jehoava mi pleez wid di way Jeezas mi liv ih laif wen ih mi deh pahn di ert?

⁷ Wail Jeezas mi-di liv pahn di ert, hihn mi obay fi hihn Faada eena wahn perfek way. Jeezas mi fays wahn lata temtayshan ahn gaan chroo wahn lata haad taimz. Hihn mi eevn noa dat hihn mi wahn sofa wahn paynful det. Bot stil, hihn mi mek it fi hihn goal fi proov dat fi hihn Faada way a roolin da di bes way. (Fil. 2:8) Wen Jeezas mi fays sohn haad tes, hihn mi “krai owt tu Gaad haad-wan wid livin aiywaata” wen hihn mi pray. (Heeb. 5:7) Fi hihn  sinsyaa pryaa mi shoa dat hihn laayal tu Jehoava, ahn dis mi mek hihn waahn obay Jehoava eevn moa. Wen Jeezas mi pray, da mi laik wahn sweet smel a insens tu Jehoava. Di way Jeezas mi liv ih laif mi pleez Jehoava, an ih mi proov dat fi Hihn way a roolin rait.

8. How wi ku kapi Jeezas egzampl a how hihn mi liv ih laif?

⁸ Wi ku fala Jeezas wen wi du wi bes fi obay Jehoava ahn wen wi laayal tu hihn. Wen wi fays tes, wi fi pray wid wi hoal haat fi mek Jehoava help wi, bikaaz da hihn wi waahn pleez. Wen wi du dat, wi di shoa Jehoava dat wi di sopoat fi hihn way a roolin. Wi noa dat if wi di du tingz weh Jehoava hayt, hihn noh wahn aksep fi wee pryaaz. Bot pahn di ada han, if wee di du tingz weh Hihn lov, wee ku bee shoar dat weneva wee pray fahn wi haat ih wahn bee laik wahn sweet smel a insens tu Jehoava. Ahn wi ku bee shoar dat wen wi serv Jehoava fahn wi haat ahn wi laayal tu hihn, wi di pleez ahn.—Prov. 27:11.

9. Wai di Izrelait dehn doz aafa op kamyoonyan?

⁹ Di sekant lesn: Wi serv Jehoava bikaaz wi tankful tu ahn. Fi laan moa bowt dis lesn, mek wi egzamin di kamyoonyan sakrifais weh di Izrelait dehn doz mek. * Eena di buk a Leviticus, wi laan dat wahn Izrelait kuda mi aafa op wahn kamyoonyan sakrifais “az wahn way fi shoa dat ih tankful.” (Lev. 7:11-13, 16-18) Hihn mi du dis, noh bikaaz hihn mi haftu, bot bikaaz hihn mi waahn du it. Soh di Izrelait mi wilin fi mek dis aafrin bikaaz hihn mi lov fi hihn Gaad, Jehoava. Di wan weh mek di aafrin, ih famili,  ahn di prees, wuda mi eet di meet a di animal weh mi geh sakrifais. Bot dehn gat sertn paats a di animal weh mi geh sakrifais weh mi aafa op onli tu Jehoava. Bot da mi wich paat a di animal?

10. How di kamyoonyan sakrifais weh geh diskraib da Leviticus 3:6, 12, 14-16 simila tu di way how Jeezas mi serv Jehoava?

¹⁰ Di terd lesn: Kaaz a lov, wi giv Jehoava wi bes. Jehoava mi vyoo di fat a di animal az di bes paat a di animal. Hihn mi aalso seh dat som paat a di animal, laik di kidni, mi speshal tu Hihn. (Reed Leviticus 3:6, 12, 14-16.) * Soh Jehoava mi veri hapi wen wahn Izrelait mi wilin fi aafa dehndeh paat a di animal ahn di fat tu hihn. Di Izrelait hoo mi giv dis tu Jehoava mi shoa dat hihn mi waahn giv fi hihn bes tu Gaad. Jos laik dat, bikaaz a lov, Jeezas mi serv Jehoava wid ih hoal haat; hihn mi giv ahn ih veri bes. (Jan 14:31) Tu Jeezas, fi du Gaad wil mi mek hihn hapi; hihn mi gat deep lov fi Gaad laa. (Ps. 40:8) Jehoava mi veri pleez fi si how Jeezas mi wilin fi serv ahn!

11. Da how di way wi serv Jehoava ku bee laik dehn kamyoonyan sakrifais, ahn how dat ku komfert wi?

¹¹ Fi wee servis tu Jehoava da laik dehn kamyoonyan sakrifais, bikaaz dis da how wee shoa Jehoava how wi feel bowt ahn. Wee giv Jehoava fi wee bes, ahn wi du it bikaaz wi lov ahn wid wi hoal haat. Jehoava mosi onli hapi fi si milyanz a fi hihn wershipaz di serv hihn bikaaz a weh dehn lov hihn ahn fi hihn wayz! Jehoava si ahn valyu noh onli weh wi du bot aalso wai wi du it. Dis ku giv wi lata komfert. Fi egzampl, if yoo da wahn oalda persn ahn yu kyaahn du az moch az yu waahn, yu ku bee shoar dat Jehoava andastan yu. Maybi yu feel laik yu kyaahn du az moch fi Jehoava, bot hihn si di lov weh yu ga eena yu haat weh moov yu fi du wateva yu kud fi hihn. Hihn hapi fi aksep di bes weh yu ku giv ahn.

12. How Jehoava feel bowt kamyoonyan sakrifais, ahn how dat ku inkorij wi?

¹² Weh wi ku laan fahn di kamyoonyan sakrifais dehn? Wail di bes paat a di animal mi-di bon, di smoak goh op intu di skai ahn dat mek Jehoava hapi. Soh yu ku bee shoar dat Jehoava hapi wid yu wen yu wilin fi serv ahn wid yu hoal haat. (Kol. 3:23) Tink bowt how hapi hihn hapi wid yu. Ih noh mata if yu ku du wahn lat er wahn lee bit fi Jehoava. Bot weh yu du fi Jehoava veri preshos tu hihn, ahn hihn wahn memba it fareva.—Mach. 6:20; Heeb. 6:10.

13. Akaadn tu Leviticus 9:23, 24, how Jehoava mi shoa dat hihn mi pleez wid aala di prees dehn?

¹³ Di foat lesn: Jehoava di bles di paat a fi hihn aaganaizayshan weh deh pahn di ert. Kansida weh mi hapm eena di yaa 1512 B.C.E. wen di tabernakl mi geh set op da di batam a Mongt Sainai. (Ex. 40:17) Moaziz mi kandok di serimoni wen Jehoava mi apoint Ayron an ih son dehn fi bee prees. Di nayshan a Izrel mi gyada tugeda fi si di prees dehn aafa op dehn fos animal sakrifais. (Lev. 9:1-5) How Jehoava mi shoa di nayshan a Izrel dat hihn mi pleez wid di prees dehn weh mi jos geh apointid? Wail Ayron ahn Moaziz mi-di bles di peepl, Jehoava mi sen faiya fahn hevn fi swala op  di res a di sakrifais weh mi deh pahn di alta.—Reed Leviticus 9:23, 24. *

14. Wai di way how Jehoava mi shoa dat hihn mi pleez wid Ayron ahn di prees dehn da sohnting impoatant fi wi tudeh?

¹⁴ Weh di faiya fahn hevn mi shoa wen di prees dehn mi geh anointid? Rait dehsoh, Jehoava mi sen di faiya fi shoa dat hihn pleez wid dehn ahn dat hihn sopoat Ayron ahn fi hihn son dehn weh ih mi chooz fi bee prees. Wen di Izrelait dehn mi si di proof dat Jehoava mi-di sopoat di prees dehn, dehn mi noa dat dehn mi wahn need fi sopoat di prees dehn tu. Wai di way how Jehoava mi shoa dat hihn mi pleez wid di prees dehn eena Izrel impoatant fi wee tudeh? Dis da bikaaz dehn prees reprizent wahn beta ahn moa impoatant hai prees. Jeezas da di grayta Hai Prees, ahn hihn ga 144,000 prees weh wahn serv wid hihn da hevn.—Heeb. 4:14; 8:3-5; 10:1.

15-16. How Jehoava shoa dat hihn pleez wid “di faytful ahn diskreet slayv”?

¹⁵ Eena di yaa 1919, Jeezas mi apoint wahn smaal groop a bradaz fi bee “di faytful ahn diskreet slayv.” Dis slayv di tek di leed eena di preechin werk, an ih di giv Krais falowaz dehn food da di rait taim. (Mach. 24:45, NW) Wi si evidens dat Gaad pleez wid di faytful ahn diskreet slayv?

¹⁶ Saytan ahn di wan dehn weh di sopoat hihn di chrai fi stap di werk weh di faytful an diskreet slayv di du. If di faytful ahn diskreet slayv neva ga Jehoava help, ih neva mi wahn pasabl fi mek dehn du di werk weh dehn di du. Soh faar, too werl waar don  hapm ahn di werl ga lata moni prablemz. Gaad peepl aalso haftu fays persikyooshan ahn bad chreetment. Bot chroo aala dehnya tingz, di faytful ahn diskreet slayv di kantinyu fi provaid spirichwal food fi Krais falowaz weh deh pahn di ert. Tink bowt humoch poblikayshanz wi gat aredi, weh da fi free, ahn weh avaylabl eena moa dan 900 langwij! Dis da klayr proof dat Gaad di sopoat di slayv. Di preechin werk da aalso proof a Jehoava blesinz. Di gud nyooz di geh preech “oava di hoal werl.” (Mach. 24:14) Fahn aala dis, ih klyaa fi si dat Jehoava di gaid ahn bles ih aaganaizayshan tudeh.

17. How wee ku shoa dat wi di sopoat di aaganaizayshan weh Jehoava di yooz?

¹⁷ Wi ku aks wiself, ‘Ai tankful fi bee paat a Jehoava aaganaizayshan?ʼ Bak eena Moaziz an Ayron taim, Jehoava mi sen faiya fahn hevn fi shoa dat hihn mi pleez wid dehn wan weh hihn apoint. Jos laik dat, Jehoava don gi wi klayr proof dat hihn di yooz fi hihn aaganaizayshan tudeh. Wi reeli ga wahn lat fi bee tankful fa. (1 Tes. 5:18, 19) How wi ku shoa dat wi di sopoat di aaganaizayshan weh Jehoava di yooz? Wi ku du dis wen wi praktis weh wi laan fahn di Baibl, wi poblikayshanz, wi meetin dehn, wi asembli dehn, ahn wi kanvenshan dehn. Pahn tap a dat, wi ku shoa wi sopoat wen wi du az moch az wi kud eena di minischri.—1 Kor. 15:58.

18. Da weh yoo wilin fi du?

¹⁸ Wi waahn Jehoava aksep wi sakrifais. Soh mek wi bee wilin fi mek gud yoos a di lesn dehn weh wi laan fahn di buk a Leviticus. Mek wi serv Jehoava kaaz a weh wi tankful tu ahn. Mek wi kantinyu fi giv wi bes tu Jehoava bikaaz wi lov ahn wid aala wi haat. Ahn mek wi du aal weh wi kud fi sopoat di aaganaizayshan weh hihn di bles tudeh. Wen wi du dehnya tingz, wi wahn ku shoa Jehoava dat wi apreeshiayt di privilij weh wi geh fi serv hihn az fi hihn Witnisiz!