1-2. Porque el maga Cristiano ahora debe queda interesao na libro de Levitico?

YA HACE acorda si apostol Pablo con el de suyu joven amigo, si Timoteo, que “todo el maga Escritura inspirao de Dios y puede gayot usa con provecho.” (2 Tim. 3:16) Incluido alli el libro de Levitico. Cosa de tuyu mirada na ese libro? El otro ta mira con ese como libro de ley que gendeh aplicable na diaton tiempo ahora, pero gendeh ansina el mirada del maga Cristiano.

² El libro de Levitico ya escribi maga 3,500 año ya el ya pasa pero ya preserva con este si Jehova para enseña kanaton. (Roma 15:4) Este libro ta ayuda kanaton entende si paquemodo si Jehova ta pensa y ta sinti acerca na maga cosas. Poreso, debe kita queda interesao aprende con este. El deverasan, manada leccion kita puede aprende na este inspirao libro. Considera kita el cuatro de este.

3. Porque ta ofrece maga animal na Dia de Tapada de Culpa cada año?

³ Primer leccion: Necesita kita tiene el favor de Jehova para acepta le con el diaton maga sacrificio. Na Dia de Tapada de Culpa cada año, el nacion de Israel tan junto-junto y ta ofrece maga animal. Este maga ofrecimiento ta hace acorda con el maga Israelita que necesita sila queda limpio de pecado. Pero antes lleva el alto sacerdote con el sangre na Mas Sagrao Lugar, necesita le hace un cosa que mas importante contra na perdon del pecado del maga Israelita.

4. Asegun na Levitico 16:12, 13, cosa ya hace el alto sacerdote cuando primer vez le ya entra na Mas Sagrao Lugar na Dia de Tapada de Culpa? (Mira con el letrato na cover.)

 ⁴ Le con el Levitico 16:12, 13. Imagina si cosa ya sucede na Dia de Tapada de Culpa: El alto sacerdote ya entra na tabernaculo. Este el primer vez na tres beses que entra le na Mas Sagrao Lugar na ese dia. Na un mano, ta lleva le con el oloroso incenso y na otro mano, con el braza. Ya para le unrato enfrente del curtina que ta tapa con el Mas Sagrao Lugar. Y despues, con respeto le ya entra na Mas Sagrao Lugar y ya para enfrente del arca de contrata. Na simbolico manera, talli le na presencia de Dios Jehova. Despues, con cuidao ya vacia el sacerdote con el sagrao incenso na braza y ya queda bien oloroso el cuarto. * Na uliji, entra le otravez na Mas Sagrao Lugar que ta lleva con el sangre del maga animal. Nota que ya quema le una con el incenso antes le ofrece con el sangre del maga animal.

5. Cosa kita puede aprende na usada de incenso na Dia de Tapada de Culpa?

⁵ Cosa kita puede aprende na usada de incenso na Dia de Tapada de Culpa? El Biblia ta habla que igual como incenso el aceptable rezo del maga fiel siervo de Jehova. (Sal. 141:2; Rev. 5:8) Acorda que con grande respeto el alto sacerdote ya lleva con el incenso na presencia de Jehova. Na igual manera, con hondo respeto kita ta atraca con Jehova na rezo. Ta rindi kita gracias con el diaton Creador cay ya permiti le kanaton atraca y queda cerca con ele, como un anak na de suyu tata. (Sant. 4:8) Ta acepta le kanaton como de suyu maga amigo! (Sal. 25:14) Ta aprecia gayot kita con este privilegio poreso no quierre kita hace maga cosas que no quierre le.

6. Cosa kita puede aprende acerca con Jesus na quemada de incenso del alto sacerdote antes le ofrece con el ofrecimiento?

⁶ Acorda que el alto sacerdote debe quema con el incenso antes le puede ofrece con el sangre. Na ese manera, ya asigura le que tiene le el favor del Dios si ofrece le con el ofrecimiento. Cosa kita puede aprende con ese? Cuando taqui si Jesus na tierra, tiene importante cosa que debe le hace antes le puede ofrece con el de suyu vida como sacrificio. Mas importante pa este contra dale salvacion del maga gente. Cosa este? Necesita le queda leal y obedece con Jehova na de suyu entero vida aqui na tierra para acepta si Jehova con el de suyu sacrificio. Na ansina manera, si Jesus puede dale mira que el hacida del voluntad de Jehova amo el de con todo buen manera para vivi. Si Jesus puede vindica o dale prueba que justo el soberania o el manera de rulanza del de suyu Tata.

7. Porque el entero vida de Jesus aqui na tierra ya hace alegre con el de suyu Tata?

⁷ Na entero vida de Jesus aqui na tierra, ya obedece le con Jehova. Maskin pa ya experiencia le maga tentacion y dificultad y sabe le que muri le, determinao siempre le dale prueba que el rulanza del se suyu Tata amo el de con todo bueno. (Fil. 2:8) Cuando ya experiencia le maga dificultad, si Jesus ya reza “gritando y llorando.” (Heb. 5:7) Puede mira na de suyu rezo que leal le con Jehova y mas determinao esta obediente con ele. Para con Jehova, el maga rezo de Jesus igual como un bien oloroso incenso. El obediencia de Jesus ya hace gayot alegre con el  de suyu Tata y ya vindica con el De Suyu soberania.

8. Paquemodo kita puede imita con Jesus?

⁸ Puede kita imita con Jesus si hace kita el todo para obedece con Jehova y queda leal con ele. Si ta experiencia kita probanza, ta reza kita con Jehova que ayuda kanaton cay quierre kita hace alegre con ele. Na ansina manera, ta dale kita mira que ta suporta kita con el manera de rulanza de Jehova. Sabe kita que gendeh acepta si Jehova con el diaton maga rezo si ta hace kita maga cosas que no quierre le. Pero si vivi kita harmonia na de suyu maga principio, puede kita asigura que el diaton sincero rezo hay queda igual como bien oloroso incenso para con Jehova. Y puede tambien kita asigura que el diaton integridad y obediencia ta hace alegre con el diaton Tata na cielo.​—Prov. 27:11.

9. Porque el maga Israelita ta ofrece ofrecimiento de paz?

⁹ Ika-dos leccion: Ta sirvi kita con Jehova cay grande el diaton apreciacion con ele. Hay aprende kita este leccion mientras considera kita con el maga ofrecimiento de paz que ya hace el maga Israelita de antes. * Na libro de Levitico, el un Israelita puede dale ofrecimiento de paz para dale mira que ta rindi le gracias. (Lev. 7:11-13, 16-18) Ya hace le este ofrecimiento gendeh cay debe le hace sino cay quierre le se hace. Poreso, un voluntario ofrecimiento este que ta hace el un persona cay ta ama le con el de suyu Dios, si Jehova. El quien ta hace con el ofrecimiento, el de  suyu familia y el maga sacerdote hay come con el carne del animal que ya ofrece. Pero, tiene maga especifico parte de animal que para lang con Jehova. Cosa se?

10. Paquemodo el ofrecimiento de paz que ya menciona na Levitico 3:6, 12, 14-16 semejante na servicio de Jesus con Jehova?

¹⁰ Ika-tres leccion: Por causa na amor, ta dale kita el diaton de con todo bueno con Jehova. Ta mira si Jehova con el gurdura como el de con todo bueno parte del un animal. Ya habla tambien le que valoroso el otro parte del animal, incluido el riñon (kidney). (Le con el Levitico 3:6, 12, 14-16.) Poreso, bien alegre si Jehova si voluntario ta ofrece el un Israelita con este maga parte y con el gurdura. El Israelita quien ta hace este ofrecimiento ta dale mira que quierre le dale el de con todo bueno con Jehova. Na igual manera, si Jesus voluntario ya dale el de suyu de con todo bueno con Jehova cuando ya sirvi le con todo corazon con Ele por causa na de suyu amor con Jehova. (Juan 14:31) Alegre si Jesus hace el voluntad del Dios y tiene le grande amor na maga ley del Dios. (Sal. 40:8) Bien alegre mira si Jehova que si Jesus voluntario ta sirvi con ele!

11. Paquemodo el diaton servicio con Jehova igual con el maga ofrecimiento de paz y porque este ta dale kanaton comforta?

¹¹ Igual con el maga ofrecimiento de paz, ta sirvi kita con Jehova cay quierre kita dale mira que ta ama kita con ele. Ta dale kita el diaton de con todo bueno para con Jehova y ta hace kita este cay ta ama kita con ele con todo corazon. Asigurao que bien alegre si Jehova mira con el millones del de suyu maga siervo que ta sirvi con ele cay ta ama gayot sila con ele y con el de suyu maga principio. Si Jehova ta mira y ta aprecia gendeh lang si cosa kita ta hace sino si porque se kita ta hace. Este ta dale kanaton comforta. Por ejemplo, si de edad ya tu y gendeh mas ta puede hace el maga cosas que quierre tu, puede tu asigura que ta entende contigo si Jehova. Posible, ta sinti tu que diutay ya lang tu cosa puede hace para con Jehova, pero ta mira le con el amor que tiene tu que ta manda move contigo para hace si cosa tu puede hace. Alegre le acepta con el de con todo bueno que puede tu dale.

12. Cosa ta sinti si Jehova acerca con el maga ofrecimiento de paz y porque este ta anima kanaton?

¹² Cosa kita puede aprende na maga ofrecimiento de paz? Mientras ta quema con el de con todo bueno parte del animal, el humu ta subi pa-arriba y alegre si Jehova con ese. Puede tambien tu asigura que alegre si Jehova contigo si hace tu el de tuyu de con todo bueno para sirvi con ele. (Col. 3:23) Imagina si paquemodo de alegre si Jehova. Ta mira le con el de tuyu esfuerzo, grande man o diutay, como bien precioso y acorda le con este hasta para cuando.​—Mat. 6:20; Heb. 6:10.

13. Asegun na Levitico 9:23, 24, paquemodo ya dale mira si Jehova que ya aproba le con el nuevo maga sacerdote?

¹³ Ika-cuatro leccion: Ta bendici si Jehova con el parte del de suyu organizacion na tierra. Considera si cosa ya sucede del 1512 B.C.E. cuando ya planta con el tabernaculo abajo del Monte de Sinai. (Ex. 40:17) Ya conduci si Moises con el ceremonia donde ya iscuji con Aaron y con el de suyu maga anak hombre para queda sacerdote. El nacion de Israel yan junto-junto para mira con el maga sacerdote que ofrece con el diila primer ofrecimiento de animal. (Lev. 9:1-5) Paquemodo ya dale mira si Jehova que ya aproba le con este nuevo maga sacerdote? Mientras si Aaron y Moises  ta bendici con el maga gente, si Jehova ya imbia fuego estaba na cielo para quema con el ofrecimiento que ya queda na altar.​—Le con el Levitico 9:23, 24.

14. Porque importante kanaton ahora el suporta que ya dale si Jehova na maga sacerdote de antes?

¹⁴ Cosa quierre decir del fuego que estaba na cielo? Quierre decir quel que ta suporta si Jehova con Aaron y con el de suyu maga anak con quien Le ya iscuji para queda sacerdote. Cuando ya mira el maga Israelita este claro evidencia, ya entende sila que necesita tambien sila suporta kanila. Importante ba se kanaton ahora? Si! El sacerdote na Israel de antes ta representa con el mas importante sacerdote. El Cristo, el mas importante Alto Sacerdote, tiene 144,000 sacerdote y rey quien hay sirvi junto con ele na cielo.​—Heb. 4:14; 8:3-5; 10:1.

15-16. Paquemodo ya dale mira si Jehova que ta aproba le con el “fiel y sabio esclavo”?

¹⁵ Del 1919, si Jesus ya iscuji con el un diutay grupo de maga iscujido hermano para queda el “fiel y sabio esclavo.” Sila el ta guia con el trabajo predicacion y ta dale “comida na justo tiempo” con el maga siguidores del Cristo. (Mat. 24:45, NWT) Ta mira ba kita con el claro evidencia que ta aproba si Jehova con el fiel y sabio esclavo?

¹⁶ Si Satanas y el de suyu maga siguidores ta pricura sangga con el trabajo de ese fiel esclavo. Si nuay ayuda de Jehova, imposible sila hace con ese trabajo. Maskin pa na dos guerra mundial, grabe persecucion, financial problema na entero mundo y maltratamiento, el fiel y sabio esclavo ya continua dale espiritual comida con el maga siguidores de Jesus na tierra. Pensa si paquemodo de manada  el maga publicacion que tiene kita ahora na mas de 900 lengguaje que nuay pago. Evidencia este que ta suporta el Dios con ese esclavo. El trabajo predicacion un evidencia tambien del bendicion de Jehova. El buen noticia deverasan ta “anuncia na entero mundo.” (Mat. 24:14) Claro kita puede mira que ta guia y ta bendici si Jehova con el de suyu organizacion ahora.

17. Paquemodo kita puede dale mira el diaton suporta na organizacion que ta usa si Jehova?

¹⁷ Puede kita pregunta na diaton mismo cuerpo, ‘Ta aprecia ba yo que parte yo del organizacion de Jehova?’ Igual si paquemodo de claro el fuego que estaba na cielo na tiempo de Moises y Aaron, bien claro tambien na diaton tiempo ahora que ta usa si Jehova con el de suyu organizacion. Bien mucho cosas kita que debe rindi gracias. (1 Tes. 5:18, 19) Paquemodo kita puede suporta con el organizacion que ta usa si Jehova? Puede kita se hace si aplica kita con el cosa kita ya aprende estaba na Biblia, na diaton maga publicacion, miting y asemblea. Mas pa, puede kita dale mira el diaton suporta si hace kita el todo para participa na trabajo predicacion y enseñada.​—1 Cor. 15:58.

18. Cosa tu determinao hace?

¹⁸ Queda kita determinao aplica con el maga leccion que ya aprende kita na libro de Levitico. Quierre kita que acepta si Jehova con el diaton sacrificio. Ojala sirvi kita con Jehova cay grande el diaton apreciacion con ele. Continua kita hace el de con todo bueno para con Jehova cay ta ama kita con ele con todo corazon. Y ojala suporta kita con el organizacion que ta usa le ahora. Si hace kita con este todo, puede kita dale mira con Jehova que ta aprecia gayot kita con el privilegio que sirvi con ele como de suyu maga Testigo!