1-2. Pwata a lamot án ekkewe Chón Kraist lón ei fansoun repwe mochen káé ewe puken Lifitikos?

EWE aposel Paulus a áchema ngeni chiechian we alúwél Timoty pwe “kapasen lon ekewe Toropwe mi Pin meinisin ra pop seni Ngünün Kot, ra aüchea.” (2 Tim. 3:16) Ewe puken Lifitikos a kapachelong lón ena. Met meefiom usun ena puk? Ekkóch ra meefi pwe ena puk a chék masou ren chómmóng allúk me rese pwal álilliséch ngenikich lón ei fansoun, nge esap ina án ekkewe Chón Kraist mi enlet ekiek usun.

² A mak ewe puken Lifitikos 3,500 som ier a ló, nge Jiowa a túmúnú pwe epwe chúen nóm rech “fän iten ach sipwe kaiö seni.” (Rom 15:4) Pokiten ewe puken Lifitikos a pwáraaló án Jiowa ekiek, itá sipwe pwal mochen káé me etittina ena puk. Ren enletin, a wor chómmóng lesen sia tongeni káé seni ena puk mi pop seni Kot. Sipwe pwóróus wóón rúáánú me lein ekkena lesen.

3. Pwata a kan fis ekkewe asor lón ewe Ránin Áchááchá mi kan fis iteiten ier?

³ Áeúin lesen: Mi lamot Jiowa epwe pwapwa rech me mwen an epwe etiwa ach kewe asor. Lón ewe Ránin Áchááchá mi kan fis iteiten ier, ekkewe mwúún Israel ra mwichfengen me ekkewe souasor me eáni asorun man. Ekkena asor ra áchema ngeni ekkewe chón Israel lamoten ar repwe limelim seni ar tipis! Nge me mwen án ewe souasor mi lap epwe uwealó lón ena rán chchaan ewe asorun man ngeni ewe leeni mi Unusen Pin, mi lamot epwe akkomw féri eú mettóch mi fókkun lamot lap seni musolóón án ekkewe chón Israel tipis.

4. Met ewe souasor mi lap a féri atun a áeúin tolong lón ewe leeni mi Unusen Pin lón ewe Ránin Áchááchá me ren Lifitikos 16:12, 13? (Ppii ewe sasing wóón péén.)

 ⁴ Álleani Lifitikos 16:12, 13. Anchangei met a kan fis lón ewe Ránin Áchááchá. Ewe souasor mi lap epwe tolong lón ewe imwenfel mangaku fán úlúngát lón ena rán. Lón ewe áeúin atun an tolong lón ewe leeni mi Unusen Pin, a kamwéch wóón efóch péún eú sepi mi masou appach mi pwokkus, nge wóón pwal ewe efóch a kamwéch eú sepien asoren étúét mi ffér seni kolt nge mi masou moochen ekkei lón. A mwo kaúló mwen ewe chech mi pwélúoló ewe leenien tolong ngeni ewe leeni mi Unusen Pin. Iwe, fán watteen súfél, a tolong lón ewe leeni mi Unusen Pin, me útá mwen ewe pwórófel. An útá ikena a liosuetá pwe a útá mwen mesen Jiowa Kot! Iwe iei, ewe souasor a túmúnúéchú le ninaatá ewe appach mi pin wóón ekkewe moochen ekkei, iwe a pwokkus unusen lón ewe ruumw. * Mwirin, ewe souasor epwe tolong sefál lón ewe leeni mi Unusen Pin fán chchaan ekkewe asorun man. Nengeni pwe a keni ewe appach mi pwokkus me mwen an eáni asor chchaan ekkewe man.

5. Met sia tongeni káé seni áeáán ewe appach mi pwokkus lón ewe Ránin Áchááchá?

⁵ Met sia tongeni káé seni áeáán ewe appach mi pwokkus atun ewe Ránin Áchááchá? Ewe Paipel a apasa pwe án néún Jiowa kewe aramas mi tuppwél iótek ra chék usun appach mi pwokkus. (Kölf. 141:2; Pwär. 5:8) Chemeni pwe fán watteen súfél, ewe souasor mi lap a uwei ewe appach mi pwokkus mwen mesen Jiowa. Pwal ina chék usun, sia kan iótek ngeni Jiowa fán watteen súfél. Sia fókkun kilisou pwe ewe Chón Fératá unuselapen láng me fénúfan a mut ngenikich ach sipwe arap ngeni me chiechi ngeni usun emén nau ngeni seman we. (Jas. 4:8) A etiwakich pwe chiechian! (Kölf. 25:14) Sia fókkun kilisou ren ei feiéch, iwe sisap fókkun mochen féri met epwe eletipechowu i.

6. Met sia tongeni káé usun Jesus seni án ewe souasor mi lap kenaló ewe appach mi pwokkus me mwen an eáni ekkewe asor?

⁶ Chemeni pwe mi lamot án ewe souasor mi lap epwe kenaló ewe appach mi pwokkus me mwen an epwe tongeni eáni ekkewe asor. An féri ena, a anúkúnúkú pwe Kot a pwapwa ren lupwen a eáni ekkewe asor. Met sia tongeni káé seni ena? Lupwen Jesus a nóm wóón fénúfan, me mwen an epwe tongeni asoresini manawan, a mwo féri eú mettóch mi lamot lap seni an awora alen amanawen aramas. Met ena? Ren án Jiowa epwe etiwa an we asor, mi lamot pwe epwe álleasochisi Jiowa fán tuppwél lón unusen manawan wóón fénúfan. Án Jesus féri ena epwe ánnetatá pwe ina eú alen pwúng an onómu manawan fán emmwenien Kot. Iwe, Jesus a ánnetatá pwúngún án Seman we nemenem.

7. Pwata unusen manawen Jesus wóón fénúfan a apwapwaai Seman we?

⁷ Lón unusen manawen Jesus wóón fénúfan, a unusen álleasochisi án Jiowa kewe allúk mi pwúng. A fókkun tipeppós le ánnetatá pwúngún án Seman we nemenem inaamwo ika a kúna sókkopaten sóssót, me a silei pwe epwele ninniiló fán watteen riáfféú. (Fil. 2:8) Lupwen a nóm fán ekkewe sóssót, a iótek “fän mwelian mi leüömong, a pwal kechü ngeni Kot.” (Ipru 5:7) An kewe iótek seni alóllóólun letipan a pwári an tuppwél ngeni Jiowa, me a etipeppósu letipan le álleasochis. Án Jesus kewe iótek ra usun appach mi pwokkus me ren Jiowa. Unusen manawen Jesus wóón fénúfan  a apwapwaai Seman we, me a ánnetatá pwúngún an nemenem.

8. Ifa usun sipwe tongeni áppirú napanapen án Jesus áeá unusen manawan?

⁸ Sia tongeni áppirú Jesus ren ach féri úkúkún ach tufich le álleasochisi Jiowa me tuppwél ngeni. Lupwen sia kúna sóssót, sia tingormaú ngeni Jiowa an epwe álisikich pún sia mochen apwapwaai. Ach féri ena a pwáraatá pwe sia penaatá án Jiowa nemenem. Sia mirititi pwe Jiowa esap etiwa ach kewe iótek ika sia eáni ekkewe sókkun féffér mi ánioput me ren. Iwe nge, ika sia manaweni ewe manaw me ren án Kot kewe allúk, iwe sia tongeni lúkúlúk pwe ach kewe iótek fán wenecharen letipach epwe usun appach mi pwokkus me ren. Sia pwal tongeni lúkúlúk pwe ach tuppwél me álleasochis a apwapwaai Semach we lón láng.​—SalF. 27:11.

9. Pwata ekkewe chón Israel ra eáni ekkewe asoren kinamwe?

⁹ Oruuen lesen: Sia angang ngeni Jiowa pokiten sia kilisou ngeni. Ren ach sipwe menlapei ena, sipwe pwóróus wóón ekkewe asoren kinamwe, ina pwal eú mettóch mi lamot lón án chón Israel lóóm fel mi enlet. * Lón ewe puken Lifitikos, sia káé pwe emén chón Israel a tongeni eáni eú asoren kinamwe pwe epwe eú “asoren kilisou.” (Lif. 7:11-13, 16-18) Ese eáni ena asor pokiten chék ina wisan, nge a eáni pokiten ina met a wesewesen mochen féri. Ina minne, eménna a pwisin filatá le eáni ena asor pokiten a tongei an we Kot Jiowa. Iwe minne ká an ena asor, me chón an we famili  me ekkewe souasor repwe ocheei futuken ewe ménún asor. Nge mi wor ekkóch kinikinin inisin ena ménún asor ra eáni asor ngeni Jiowa chék. Menni kinikin?

10. Met ekkewe asoren kinamwe Lifitikos 3:6, 12, 14-16 a fós usun ra áiti ngenikich usun ewe popun Jesus a féri letipen Seman we?

¹⁰ Aúlúngátin lesen: Sia fang ngeni Jiowa úkúkún ach tufich pokiten sia tongei: Me ren Jiowa, ewe kinikin lón inisin man mi aúchea seni meinisin, ina ewe kiris. A pwal affata pwe a kkóló aúchean ekkóch kinikin lón inisin man, áwewe chék ren ewe kidney. (Álleani Lifitikos 3:6, 12, 14-16.) Ina minne, Jiowa a fókkun pwapwa lupwen emén chón Israel a pwisin filatá le asor ngeni ewe kiris me pwal ekkena kinikin lón inisin man. Emén chón Israel mi eáni ena sókkun asor a pwári an enletin mochen fang ngeni Kot minne mi aúchea seni meinisin. Pwal ina chék usun, Jesus a tipemecheres le fang ngeni Jiowa úkúkún an tufich ren an angang ngeni ren unusen letipan pokiten an tongei. (Joh. 14:31) Jesus a pwapwa lupwen a féri letipen Kot, me a fókkun aúcheani an kewe allúk. (Kölf. 40:8) A ifa me watteen pwapwaan Jiowa ren an kúna án Jesus angang ngeni ren enletin letipan!

11. Ifa usun ach angang ngeni Kot a usun ekkewe asoren kinamwe, me ifa usun ena mettóch a tongeni oururukich?

¹¹ Ach angang ngeni Jiowa ra usun chék ekkewe asoren kinamwe pokiten ina alen ach pwári met meefiach ngeni. Sia fang ngeni Jiowa met mi múrinné seni meinisin pokiten sia tongei ren unusen letipach. A ifa me pwapwaan Jiowa le kúna án fite million néún kewe aramas mi tipemecheres angang ngeni pokiten ra fókkun tongei me aúcheani an kewe allúk! Sia kúna ourur ren ach chemeni pwe Jiowa a silei me aúcheani esap chék met sia féri nge pwal ewe popun sia féri mettóch. Áwewe chék, ika en emén chinnap nge kese chúen tongeni féri met ka mochen féri, iwe kopwe lúkúlúk pwe Jiowa a weweiti nónnómum. Neman ka meefi pwe met ka tongeni fang ngeni Jiowa a chék fókkun kisikis, nge Jiowa a silei pwe óm tong ngeni mi alóllóól a amwékútuk le féri met ka tufichin féri. A pwapwa le etiwa met ka tongeni fang ngeni ren úkúkún óm tufich.

12. Met meefien Jiowa usun ekkewe asorun kinamwe, me ifa usun ena mettóch a apéchékkúlakich?

¹² Met sia tongeni káé seni ekkewe asoren kinamwe? Atun a kek kinikinin inisin ewe man mi múrinné seni meinisin, me étúwétún a étútá, Jiowa a pwapwa ren. Iwe, kopwe pwal lúkúlúk pwe Jiowa a pwapwa reom lupwen ka tipemecheres le féri úkúkún óm tufich lón óm angang ngeni. (Kol. 3:23) Anchangei án Jiowa pwapwa reom. Ese lifilifil ika a watte are mi chék kúkkún met ka féri fán itan, nge a fókkun aúcheaniir me epwe chechchemeniir tori feilfeiló.​—Mat. 6:20; Ipru 6:10.

13. Me ren Lifitikos 9:23, 24 ifa usun Jiowa a pwári pwe a pwapwa ren ewe kkótun souasor?

¹³ Arúáánúún lesen: Jiowa a efeiéchú kinikinin an we mwicheich wóón fénúfan. Nengeni met a fis lón ewe ier 1512 mwen Kraist lupwen a kaútá ewe imwenfel mangaku fánsonun ewe Chuuk Sinai. (Eks. 40:17) Moses a emmweni ewe mwich fán iten seikitáán Aaron me néún kewe lón wiser kewe souasor. Chón ekkewe mwúún Israel meinisin ra mwichfengen pwe repwe katol án ekkena souasor eáni ar áeúin asorun man. (Lif. 9:1-5) Ifa usun Jiowa a pwári pwe a pwapwa ren ei mineféén kókkótun souasor? Atun Moses me Aaron ra efeiéchú ekkewe aramas, Jiowa a tinaató ekkei me kenaló lusun ewe asor mi nóm wóón ewe rongen asor.​—Álleani Lifitikos 9:23, 24.

14. Pwata án Jiowa pwapwa ren ewe kókkótun souasor a lamot ngenikich lón ei fansoun?

 ¹⁴ Met án Jiowa tiinaato ekkei seni láng atun seikitáán ewe souasor mi lap a pwári? Jiowa a pwári pwe a unusen pwapwa ren Aaron me néún kewe, ekkewe a filiretá pwe repwe wisen souasor. Lupwen ekkewe chón Israel ra kúna ena pisekin ánnet pwe Jiowa a wesewesen álisatá ekkena souasor, iwe ra weweiti pwe a pwal lamot ar repwe unusen álisiiretá. Nge a wor lamoten ena pwóróus ngenikich? Ewer! Ewe kkótun souasor a liosuetá pwal eú kkótun souasor mi lap seni ena. Jesus i ewe Souasor mi Lapalap, me a wor 144,000 repwe eti i lón láng pwe repwe wisen king me souasor.​—Ipru 4:14; 8:3-5; 10:1.

15-16. Ifa usun Jiowa a pwáraatá pwe a pwapwa ren ewe “chon angang mi allükülük o tipachem”?

¹⁵ Lón ewe ier 1919, Jesus a seikaatá eú kúkkún kúmiin pwiich kewe mi kepit, “chon angang mi allükülük o tipachem.” Ena chón angang a emmweni ewe angangen afalafal me awora “mongö lon fansoun fich” ngeni ekkewe chón tapweló mwirin Kraist. (Mat. 24:45) Kich mi enletin kúna pisekin ánnet pwe Jiowa a pwapwa ren ewe chón angang mi alúkúlúk me tipachem?

¹⁶ Satan me chienan kewe ra achocho le aúkatiw angangen ewe chón angang mi alúkúlúk me tipachem. Ika esap pwúnún án Jiowa álillis, ena angang esap nóm tori ikenái. A fen fis ruu maunen fénúfan me osukosuken moni wóón unusen fénúfan. Néún Kot aramas ra fen kúna riáfféúmwáál me féffér ese pwúng. Nge, ewe chón angang mi alúkúlúk me tipachem a chék akkawora ewe mwéngé lón pekin lúkú fán iten ekkewe Chón Kraist wóón fénúfan. Ekieki usun chómmóngun ewe mwéngé lón pekin lúkú mi kan kawor lón ei fansoun lón lap seni 900 fósun fénúfan, nge ese kamé!  Ese wor tipemwaramwar pwe Kot a ákkálisi ewe chón angang mi alúkúlúk me tipachem. Pwal eú mettóch mi ánnetatá án Jiowa efeiéchú an we mwicheich, ina ewe angangen afalafal. Enlet pwe ewe kapas allim a tori “unusen fanüfan.” (Mat. 24:14) Sia fókkun kúna pwe Jiowa a ekkemmweni an we mwicheich lón ei fansoun me a asopwéchú.

17. Ifa usun sipwe pwáraatá pwe sia álisatá ewe mwicheich Jiowa a nénnéúnéú?

¹⁷ Mi éch ach sipwe pwisin eisinikich, ‘Ua kilisou ren ai chóni kinikinin án Jiowa we mwicheich wóón fénúfan?’ Lón fansoun Moses we, Jiowa a tinaató ekkei seni láng ren an epwe pwáraatá pwe a pwapwa ren ekkewe aramas a filiretá. Pwal ina chék usun, Jiowa a fen affata ngenikich pwe a kan néúnéú an we mwicheich lón ei fansoun. Enlet, a wor chómmóng mettóch sipwe kilisou ren. (1 Tes. 5:18, 19) Ifa usun sipwe pwári pwe sia álisatá ewe mwicheich Jiowa a nénnéúnéú? Ren ach apwénúetá ekkewe emmwen mi lóngólóng wóón Paipel mi katowu seni néúch kewe puk, lón ach kewe mwich, me lón ach kewe mwichelap. Pwal och, sia pwáraatá pwe sia álisatá ewe mwicheich ren ach unusen fiti ewe angangen afalafal me asukula aramas.​—1 Kor. 15:58.

18. Met kopwe tipeppós le féri?

¹⁸ Sipwe tipeppós le apwénúetá met sia káé seni ewe puken Lifitikos. Amwo Jiowa epwe pwapwa rech pwe epwe etiwa ach kewe asor. Sipwe angang ngeni Jiowa pokiten sia kilisou ngeni. Sipwe sópweló le fang ngeni Jiowa úkúkún ach tufich pokiten sia tongei ren unusen letipach. Me sipwe unusen álisatá ewe mwicheich Jiowa a nénnéúnéú lón ei fansoun. Ren ach féri ekkena mettóch meinisin, sia tongeni pwár ngeni pwe sia aúcheani feiéchúch le angang ngeni pwe kich néún Chón Pwáraatá!