1-2. Mumu liaka akwa-Kristu musono akuzanga kulilongesa mukanda wa Ulevi?

POSTOLO Paulu kalwezele sepa lienyi Timoteu ngwenyi: “Yisoneko yeswe yapwa we mwiku wa Zambi, neyo kuyafumbuka.” (2 Timo. 3:16) Kuchingako mukanda wa Ulevi. Yika wakunyonga hakutwala ku mukanda wacho? Atu amwe kakuumona ngwe umwe mukanda uze ukwete shimbi jinji jize kujishi ulemu musono, alioze, yetu akwa-Kristu kutushi kunyonga chocho.

² Mukanda wa Ulevi kausonekene ha miaka 3,500 kunyima, chipwe chocho Yehova kaufungile hanga ‘utufumbe.’ (Roma 15:4) Amu mukanda wa Ulevi wakutukwasa kunyingika chize Yehova akunyonga ni chize akwivwa hakutwala ku yuma yimwe, kashika tunazange kuuhengwola kanawa. Kwamba pundu, kuli yuma yinji yize mutuhasa kulilongesa hakutwala ku mukanda uno wakuhwimina kuli Zambi. Tushimutwinenu malongeso awana.

3. Mumu liaka te akuhana milambu ha Tangwa lia Kufuka Shili hita mwaka?

³ Longeso litangu: Mba Yehova atayize milambu yetu, twatamba kupwa ni utayizo wenyi. Ha tangwa limuwika ha mwaka, te kwakupwa Tangwa lia Kufuka Shili. Vungu lia Izalele te kakulikungulula mba sasendote wa lutwe mahana milambu. Milambu yacho, te yakukwasa A-Izalele kwiuluka ngwo te katamba kulipemesa mumu lia shili yo. Alioze sasendote wa lutwe te kakulinga chimwe chuma chahiana ulemu shimbu te kanda atwala manyinga a milambu Muma Musandu Mwahiana. Kwamba pundu,  chuma chacho te chilemu chinji kuhiana ukonekeno wa shili ya A-Izalele.

4. Ngwe chize anatongola ha Ulevi 16:12, 13, yika sasendote wa lutwe te akulinga chitangu shimbu kanda anjila Muma Musandu Mwahiana ha Tangwa lia Kufuka Shili? (Tala chizulie ha chifukilo)

⁴ Tanga Ulevi 16:12, 13. Achinyonga ha yize yalingiwile ha Tangwa lia Kufuka Shili. Sasendote wa lutwe kananjila mu tabernakulu. Ku kwoko limuwika, kanakwata chikwachilo cha too ni insensu ya lupembo mupema. Ku kwoko likwo, kanakwata chikwachilo cha oru cha too ni makala a kahia. Iye mamana kulutwe lia chikalakala cha unjililo cha Muma Musandu Mwahiana. Achi chili chisuho chitangu cha yisuho yitatu, chize iye manjila muma Musandu Mwahiana ha Tangwa lia Kufuka Shili. Ni vumbi lieswe, iye manjila Muma Musandu Mwahiana mamana kulutwe lia Mushete wa Usendo. Chapwile ngwe iye kanamana kulutwe lia mwene Yehova Zambi! Kusulaho, sasendote mahinjila kanawa insensu ha makala a kahia, chocho chihela chacho muchipwa ni lupembo mupema. * Hanyima, iye manjila cheka Muma Musandu Mwahiana ni manyinga a chitapo cha shili. Shina wamona nyi? Sasendote wa lutwe te kakwocha insensu shimbu kanda ahana manyinga a chitapo cha shili.

5. Yika mutuhasa kulilongesa ha chize te akuzachisa insensu ha Tangwa lia Kufuka Shili?

⁵ Yika mutuhasa kulilongesa ha chize te akuzachisa insensu ha Tangwa lia Kufuka Shili? Mbimbiliya yinambe ngwo, kuli Yehova, yilemba ya tuvumbi twenyi ashishika yapwa ngwe insensu. (Samu 141:2; Uso. 5:8) Iwuluka ngwe sasendote wa lutwe kapwile ni kusolola vumbi linji muze apwile ni kunjila ni insensu kumeso ja Yehova. Chizechene nawa, ni yetu muze twakukundama kuli Yehova mu yilemba, twakuchilinga ni vumbi lieswe. Yehova katela vumbi lietu. Twakusakwilila chinji amu Sakatanga wetu akutwecha hanga tukundame kuli iye, ngwe chize mwana-kemba akukundama kuli tato. (Tia. 4:8) Iye kakututayiza ngwe masepa jenyi! (Samu 25:14) Chino chili chiwape chinene, kashika kutwazangile kulinga chuma chize muchivwisa Yehova yinyengo.

6. Yika twalilongesa ha chize te sasendote wa lutwe akwocha insensu shimbu kanda alambula chitapo?

⁶ Iwuluka ngwo sasendote wa lutwe te katamba kwocha insensu shimbu te kanda alambula chitapo. Ha mashimbu a kwocha insensu, chitangu iye te katamba kusa shindakenyo ngwo Zambi matayiza chitapo chacho. Yika mutuhasa kulilongesa ha chikuma chino? Muze apwile hano hashi, Yesu te katamba kulinga chuma chilemu chize chahiana kulamwina atu, shimbu te kanda ahana mwono wenyi ngwe chitapo. Chuma chika chenacho? Kushishika ni kwononokena Yehova, hanga alulieke jila mba Yehova atayize chitapo chenyi. Ha kulinga chino, Yesu te masolola ngwo, kuvwisa Yehova kuwaha, che chuma chilemu ku mwono wenyi. Yesu te masolola nawa kuli eswe ngwo, pundu lume mulali wa Tato kuyula walita nawa ungunu.

7. Mumu liaka mwono wa Yesu hano hashi wevwishile Tato kuwaha?

⁷ Muze apwile hano hashi, Yesu kononokene Yehova ni ungunu weswe. Chipwe ngwe iye kapalikile mu yeseko ni yipikalo yinji nawa kanyingikine ngwo te mafwa chitaka, nihindu te kanazange kusolola ngwo mulali wa Tato kuyula we walita. (Fwili. 2:8) Muze apwile mu yeseko, Yesu kalembele ni “kuteta cha ngolo ni masoji.” (Hepre. 5:7) Yilemba yenyi kuli Yehova yasolwele ngwo, kapwile ni kushishika kuli iye nawa yino ye yamukwashile kununga ni  kwononoka. Kuli Yehova, yilemba ya Yesu yapwile ngwe vumba lipema lia insensu. Chize Yesu ambachile mwono wenyi chevwishile Tato kuwaha nawa chasolwele ngwo mulali wa Yehova kuyula walita.

8. Kuchi mutuhasa kwimbulula chilweza cha Yesu?

⁸ Ni yetu mutuhasa kwimbulula Yesu. Kuchi mutuhasa kuchilinga? Ha kusa tachi hanga twononokene Yehova ni kushishika kuli iye. Muze mupalika mu yeseko, lemba kuli Yehova ni mbunge yeswe ni kwita hanga akukwase kulinga yize iye akuzanga. Nyi walinga chocho, musolola ngwo unakwase mulali wa kuyula cha Yehova. Chikwo nawa, iwuluka ngwe Yehova kechi kutayiza kulemba chetu nyi tunalinga yuma yize iye keshi kuzanga. Alioze nyi tunalinga yuma yize iye akuzanga, Yehova mevwa yilemba yetu ya ku mbunge. Yilemba yetu muyipwa ngwe insensu yipema. Hachino, pwako ni shindakenyo ngwo kushishika ni kwononoka che chakuvwisa Yehova kuwaha.—Yishi. 27:11.

9. Mumu liaka A-Izalele te akuhana Milambu ya sambukila?

⁹ Longeso liamuchiali: Twakuwayila Yehova mumu lia usakwililo wetu kuli iye. Mutushimutwina longeso lino ha kuhengwola kanawa yitapo yize A-Izalele te akulambula. * Milambu yacho te yikwete ulemu mu uwayilo wamwenemwene mu Izalele. Mukanda wa Ulevi unalumbununa chize umwe Ka-Izalele te mahasa kuhana milambu ya sambukila ngwe “chitapo cha kusakwila.” (Levi 7: 11-13, 16-18) Iye te keshi kuhana milambu yacho mumu lia kumushinjila, alioze mumu kanazange kuchilinga. Chapwile chawana chize Ka-Izalele te akuhana mumu te kakuzanga Yehova Zambi yo. Mutu yoze te wakuhana mulambu, asoko jenyi ni asasendote e te akulia yifwo ya kashitu yoze ahananga ngwe chitapo. Alioze yihanda yikwo ya kashitu te kakuyihana wika kuli Yehova. Yihanda yika yenayo?

10. Kuchi milambu ya sambukila anatongola ha Ulevi 3:6, 12, 14-16, unalifwu ni uwayilo wa Yesu kuli Yehova?

¹⁰ Longeso liamuchitatu: Twakuwayila Yehova ni mbunge yeswe mumu twakumuzanga. Kuli kashitu, Yehova te kakulemesa chinji yifwo yili ni maji. Iye kambile ngwenyi, yihanda yimwe ya kashitu kuchingako njiho hanji ana asukwa ye yapwile yilemu kuli iye. (Tanga Ulevi 3:6, 12, 14-16.) Kashika, Yehova te kakuwahilila chinji muze umwe Ka-Izalele ni mbunge yeswe malambula maji ni yihanda yimwe ya kashitu yize yilemu. Ka-Izalele yoze te wakulinga chino, kapwile ni kusolola ngwo kanazange kuhana kuli Zambi yeswe yize apwile nayo. Chizechene nawa, Yesu kahanyine kuli Yehova yeswe yize apwile nayo ha kumuwayila ni mbunge yeswe mumu te kakumuzanga. (Yoa. 14:31) Kuli Yesu, kulinga upale wa Zambi chapwile chiwape chinene, mumu te kakuzanga chinji shimbi ja Zambi. (Samu 40:8) Kwamba pundu, Yehova kevwile kuwaha chinji muze amwene Yesu kanamuwayila ni mbunge yeswe!

11. Mumu liaka milimo yize twakulingila Yehova yapwa ngwe milambu ya sambukila, nawa kuchi chino chakututakamisa?

¹¹ Mulimo wetu kuli Yehova wapwa ngwe milambu ya sambukila, mumu yakusolola kuli Yehova chize tunevu hakutwala kuli iye. Twakulihana ni tachi jeswe ku milimo ya Yehova mumu twakumuzanga ni mbunge yeswe. Achinyonga ha chize Yehova akuwahilila muze akumona tununu a tununu twa atu, kanalihana ni kumuwayila ni mbunge yeswe mumu kakumuzanga hamwe ni shimbi jenyi. Nawa chili utakamiso kunyingika ngwo, Yehova keshi kumona ni kulemesa wika yitanga yetu, alioze ni chikuma chize chakututwala kulinga yuma yimwe. Chakutalilaho, nyi uli kashinakaji nawa kuushi kuhasa kulinga yuma yinji mu mulimo wa Yehova, pwako ni shindakenyo ngwo iye kananyingika yikwiko ye. Hanji muhasa kunyonga ngwo kuushi kulinga yuma yinji mu mulimo Yehova, alioze iye kakumona zango lize liakukutwala kulinga yize muhasa. Iye kakuwahilila chinji ha kutayiza mulimo uze muhasa kulinga kulita ni uhashi we.

12. Kuchi Yehova akwivwa hakutwala ku milambu ya sambukila, nawa kuchi yino yakututakamisa?

¹² Yika mutuhasa kulilongesa hakutwala ku milambu ya sambukila? Ngwe chize te kahia kakwocha yihanda yimwe ya yifwo, mwishi wacho te wakuvwisa Yehova kuwaha chinji. Chizechene nawa, ni yena muhasa kupwa ni shindakenyo ngwo, Yehova kakuwahilila chinji muze mulihana ni mbunge yeswe hanga umuwayile. (Kolo. 3:23) Nyonga ha chize Yehova akuwahilila hali yena. Chipwe ngwe wakulinga yuma yinji hanji yikepe mu mulimo wa Yehova, alioze nyi wawulinga ni mbunge yeswe iye kechi kakuvulama.—Mateu 6:20; Hepre. 6:10.

13. Kulita ni Ulevi 9:23, 24, kuchi Yehova asolwele ngwo asasendote waze aha kapwile ni utayizo wenyi?

¹³ Longeso liamuchiwana: Yehova kanawahisa chihanda cha hashi cha ululikiso wenyi. Tutalenu yize yalingiwile ha mwaka 1512 K.M.J., muze asele Tabernakulu ku Mulundu wa Sinai. (Kutuhu. 40:17) Mose kalingile jimwe pande muze atongwele Arone ni ana jenyi ngwe asasendote. Vungu lia Izalele te kanalikungulula hanga amone chize asasendote malambula yitapo yo yitangu ya  tushitu. (Levi 9:1-5) Kuchi Yehova asolwele ngwo asasendote waze aha kapwile ni utayizo wenyi? Shimbu te Arone ni Mose anawahisa atu, Yehova yatuma kahia kaze kalalishile mulambu ha chilumbilo.—Tanga Ulevi 9:23, 24.

14. Mumu liaka utayizo wa Yehova ha usasendote wa Arone ni ana jenyi yili ni ulemu musono?

¹⁴ Yize yalingiwile yapwile chikomokeso chinene. Kahia kaze kakatukile mwilu yika te kanalumbunuka? Kapwile ni kulumbunuka utayizo ni ukwaso wa Yehova ha usasendote wa Arone ni ana jenyi. Kashika muze A-Izalele amwene chize asasendote apwile ni ukwaso wa Yehova, yino yahele shindakenyo hanga no aakwase. Shina chikuma chino chili ni ulemu kuli yetu? Ewa! Usasendote mu Izalele wapwile wika chizulie cha sasendote mulemu wahiana. Kristu kali Sasendote wetu wa Lutwe munene, iye makapwa hamwe ni 144,000 asasendote ni mianangana waze makakalakala hamuwika nenyi mu malilu.—Hepre. 4:14; 8:3-5; 10:1.

15-16. Yika yinatwehe shindakenyo ngwo “ndungo wamwenemwene wakanyama” kali ni utayizo wa Yehova?

¹⁵ Ha mwaka wa 1919, Yesu kasakwile chimwe chizavu chikehe cha akwa-Kristu akuwayisa ngwe “ndungo wamwenemwene wakanyama.” Ndungo wacho mwe unasongwela mulimo wa kwambujola ni kuhana “kulia ha mwaka walita” kuli tumbaji a Kristu. (Mateu 24:45) Shina tuli ni shindakenyo ngwetu, ndungo wamwenemwene wakanyama kali ni utayizo wa Yehova?

¹⁶ Satana ni atu jenyi kakusa tachi hanga apinjise mulimo uze akulinga ndungo wamwenemwene. Nyi ndungo wamwenemwene keshi ni ukwaso wa Yehova kachi keshi kuhasa kulinga mulimo uno. Chipwe ngwe kwalingiwile jita jiali hashi heswe, kutuhungumiona, kuhona cha mbongo hamwe ni ungulungulu, nihindu  ndungo wamwenemwene wakanyama kakununga ni kuhana kulia cha ku spiritu kuli tumbaji a Kristu hano hashi. Achinyonga ha unji wa kulia cha ku spiritu tulinacho musono, chize twakutambula chawana mu unji wa malimi kuhiana 900! Yino yinatwehe shindakenyo pundu ngwo, ndungo wamwenemwene wakanyama kali ni ukwaso wa Zambi. Tushimutwinenu shindakenyo yikwo ya yiwape ya Yehova: mulimo wa kwambujola. Sango lipema kanaliambujola “mu yifuchi yeswe ya hashi.” (Mateu 24:14) Kwamba pundu, Yehova kanasongwela ni kuwahisa chinji ululikiso wenyi musono.

17. Kuchi twakusolola ngwetu tunakwase ululikiso uze Yehova anazachisa?

¹⁷ Chili chipema kulihula ngwo: ‘Shina nakusakwilila ha kulinga chihanda mu ululikiso wa Yehova?’ Yuma yeswe yize Yehova akutwaha, tunayimono pundu ngwe chize kahia kakatukile mwilu ku mashimbu ja Mose ni Arone. Kwamba pundu, twatamba kupwa akwa-kusakwilila. (1 Tesa. 5:18, 19) Mba kuchi mutuhasa kusolola ngwetu tunakwase ululikiso uze Yehova anazachisa? Ha kukaula usongwelo uze unakatuka mu Mbimbiliya twakutambula ha mikanda, kuya ku hita kukunguluka ni kuya ku kukunguluka cha mbonge ni cha mambonge. Chikwo nawa mutuhasa kusolola ngwetu, tunakwase ululikiso wa Yehova ha kusa tachi hanga tulinge mulimo wa kwambujola ni kulongesa.—1 Kori. 15:58.

18. Yika tunazange kununga ni kulinga?

¹⁸ Sako tachi hanga ununge ni kukaula yuma yeswe yize twalilongesa mu mukanda wa Ulevi. Chitangu, fupa kupwa ni utayizo wa Yehova mba iye atayize milambu ye. Chamuchiali, lingila Yehova ni usakwililo we weswe. Chamuchitatu, wayila Yehova ni yuma ye yeswe mumu lia zango lie hali iye. Chamuchiwana, kwasa ni mbunge yeswe ululikiso uze iye anawahisa. Nyi twalinga chocho, mutusolola kuli Yehova ngwetu twakuzanga chiwape cha kupwa Yela jenyi!