1, 2. ¿Chucoch yom chaʼan mi laj cʌn jiñi libro i chaʼan Levítico jiñi xñoptʼañonbʌla ili ora?

JIÑI apóstol Pablo tsiʼ cʼajtesʌbe jiñi Timoteo chaʼan «chʼoyol ti Dios pejtelel i Tsʼijbujel. An i cʼʌjñibal» (2 Ti. 3:16). Tiʼ jiñi «Tsʼijbujel» yaʼ ochen jiñi libro i chaʼan Levítico. ¿Chuqui maʼ ñaʼtan chaʼan ili libro? An wiñicob xʼixicob (quixtañujob) muʼ bʌ i yʌlob chaʼan jumpʼejl jach libro butʼul bʌ ti mandar tac maʼañix bʌ i cʼʌjñibal ili ora. Pero jiñi i sujm bʌ xñoptʼañonbʌla mach cheʼic mi lac ñaʼtan.

² Jiñi Levítico añix cheʼ bʌ 3,500 jab tsaʼ tsʼijbunti, pero Jehová an i cʌyʌ chaʼan «laj cʌntesʌntel» (Ro. 15:4). Ili libro chʼoyol bʌ ti Dios miʼ coltañonla chaʼan mi lac chʼʌmben i sujm bajcheʼ miʼ chaʼlen pensar Jehová, jin chaʼan yom mi lac wen mulan lac tsajin. Tiʼ sujm, cabʌl chuqui miʼ mejlel laj cʌn ti ili libro. Laʼ laj qʼuel chʌnchajp.

3. ¿Chucoch jiñi israelitajob miʼ yʌcʼob majtañʌl tiʼ Qʼuiñilel i ñusʌntel mulil?

³ Ñaxam bʌ laj cʌntesʌntel: Ñuc i cʼʌjñibal lac chaʼan cheʼ wen miʼ qʼuelonla Jehová chaʼan miʼ chʼʌm chuqui mi la cʌqʼuen. Ti jujumpʼejl jab ti jiñi Qʼuiñilel i ñusʌntel mulil, jiñi israelitajob miʼ tempañob i bʌ i jiñi ñuc bʌ motomaj miʼ pulben Dios jiñi añimal tac. Iliyi miʼ cʼajtesʌben jiñi israelitajob chaʼan sʌc yom miʼ yajñelob. Pero anto chuqui yom miʼ ñaxan mel (chaʼlen) jiñi ñuc bʌ motomaj cheʼ bʌ maxto ochemic yaʼ ti Cʼax chʼujul bʌ ajñibʌl yicʼot i chʼichʼel jiñi añimal tac, yom miʼ mel wen am bʌ i cʼʌjñibal ñumento bajcheʼ jiñi i ñusʌntel i mul israelitajob.

4. Cheʼ bajcheʼ miʼ yʌl Levítico 16:12, 13 (TNM), ¿chuqui miʼ mel jiñi ñuc bʌ motomaj cheʼ cojaxto mi caj i yochel yaʼ ti Cʼax chʼujul bʌ ajñibʌl cheʼ tiʼ Qʼuiñilel i ñusʌntel mulil? (Qʼuele jiñi dibujo am bʌ tiʼ tejchibal).

 ⁴ (Pejcan Levítico 16:12, 13, TNM *). Laʼcu lac ñaʼtan iliyi. Jiñi ñuc bʌ motomaj miʼ yochel yaʼ ti tabernáculo. Ti jumpʼejl i cʼʌb chucul i chaʼan alʌ pʼejt yicʼot xojocña bʌ pom i ti yambʌ i cʼʌb chucul i chaʼan majlel ñich cʼajc ti lechel bʌ i yajñib. Waʼal miʼ cʌytʌl tiʼ tojel jiñi pisil muʼ bʌ i mʌctan baʼan jiñi Cʼax chʼujul bʌ ajñibʌl. Miʼ wen cʌntan chaʼan wen miʼ mel cheʼ cojaxto miʼ yochel tiʼ jimbʌ qʼuin (chaʼyajlto mi caj i yochel) i waʼal miʼ cʌytʌl tiʼ tojel jiñi Arca chaʼan trato. Miʼ mejlel la cʌl chaʼan waʼal tiʼ tojel Jehová. Cheʼ jiñi, miʼ pul jiñi pom ti jiñi ñich cʼajc, i yaʼ ti Cʼax chʼujul bʌ ajñibʌl wen xojocña miʼ cʌytʌl. * Ti wiʼil, mi caj i chaʼ ochel yaʼ ti Cʼax chʼujul bʌ ajñibʌl yicʼot i chʼichʼel jiñi añimal tac i chaʼan bʌ i ñusʌntel mulil. Laʼ lac ñaʼtan iliyi: Miʼ ñaxan pul jiñi pom cheʼ bʌ maxto i yʌqʼue Dios jiñi i chʼichʼel jiñi añimal tac i chaʼan bʌ i ñusʌntel mulil.

5. ¿Chuqui mi laj cʌn cheʼ bʌ miʼ cʼʌjñel jiñi pom cheʼ tiʼ Qʼuiñilel i ñusʌntel mulil?

⁵ ¿Chuqui mi laj cʌn cheʼ bʌ miʼ cʼʌjñel jiñi pom cheʼ tiʼ Qʼuiñilel i ñusʌntel mulil? Jiñi Biblia miʼ yʌl chaʼan lajalʌch bajcheʼ pom jiñi oración tac muʼ bʌ i melob jiñi xucʼul bʌ i wiñicob Dios (Sal. 141:2; Ap. 5:8). Laʼ laj cʼajtesan chaʼan jiñi ñuc bʌ motomaj miʼ wen cʌntan bajcheʼ miʼ chʼʌm majlel jiñi pom tiʼ tojlel Jehová. Lajal jaʼel, cheʼ bʌ mi caj lac pejcan ti oración Jehová, mi laj cʌntan chuqui ti tʼan mi caj laj cʼʌn. Mi lac wen qʼuel ti ñuc chaʼan jiñi tsaʼ bʌ i mele pejtelel chuqui an, miʼ yʌcʼ chaʼan mi lac lʌcʼtesan lac bʌ tiʼ tojlel, cheʼ bajcheʼ juntiquil xbiʼtal tiʼ tojlel i tat (Stg. 4:8). Miʼ chʼujbiñonla bajcheʼ i yamigo (Sal. 25:14). Iliyi wen ñucʌch lac chaʼan i mach la com lac mel maʼañic bʌ miʼ wis mulan.

6. ¿Chuqui miʼ cʌntesañonla tiʼ tojlel Jesús cheʼ bʌ jiñi ñuc bʌ motomaj miʼ pul jiñi pom cheʼ bʌ maxto i yʌcʼʌ jiñi majtañʌl tac?

⁶ Laʼ laj cʼajtesan chaʼan jiñi ñuc bʌ motomaj yom miʼ pul jiñi pom cheʼ bʌ maxto i yʌcʼʌ jiñi majtañʌl tac. Cheʼ miʼ mel iliyi, miʼ coltan i ñaʼtan chaʼan weñʌch miʼ qʼuejlel ti Dios. ¿Chuqui mi laj cʌn? Cheʼ bʌ Jesús wʌʼto an ila ti Pañimil, an chuqui ñaxan ñuc bʌ i cʼʌjñibal tsiʼ mele chaʼan miʼ mejlel i yʌcʼ i cuxtʌlel, jiñʌch am bʌ i cʼʌjñibal ñumento bajcheʼ i coltʌntel ili pañimil. Chaʼan miʼ mejlel i chʼʌm Jehová jiñi cuxtʌlel muʼ bʌ caj i yʌcʼ bajcheʼ majtañʌl, chʌn xucʼul tsiʼ jacʼbe i tʼan tiʼ pejtelel i cuxtʌlel. Cheʼ bajcheʼ jiñi, tsiʼ pʌsʌ chaʼan ñumen wen cheʼ mi lac chumtʌl cheʼ bajcheʼ miʼ subeñonla Jehová. Jesús tsiʼ pʌsbeyonla chaʼan jiñi i yumʌntel i Tat toj yicʼot wen miʼ chaʼlen eʼtel (troñel).

7. ¿Chucoch tsiʼ wen tijicñesʌbe i pusicʼal Jehová pejtelel tsaʼ bʌ i mele Jesús cheʼ bʌ tsajñi ila ti pañimil?

⁷ Jesús tsiʼ jacʼʌ jiñi toj bʌ i mandar tac Jehová cheʼ bʌ wʌʼto chumul ti Pañimil. Mi jumpʼejlic wocol, mi jiñicto cheʼ bʌ mach weñic mi caj i tsʌnsʌntel, tsiʼ cʼunʼesa chaʼan yom i coltan bajcheʼ mi chaʼlen yumʌntel i Tat (Fil. 2:8). Jesús tsiʼ chaʼle oración «ti wocol tʼan. Cʼam tsiʼ chaʼle uqʼuel. Tsaʼ tili i yaʼlel i wut» cheʼ bʌ tsiʼ ñusa wocol tac (He. 5:7). Cheʼ bʌ tiʼ sube tiʼ oración Dios bajcheʼ miʼ yubin i bʌ tsaʼʌch loqʼui tiʼ toj bʌ i pusicʼal i tsiʼ pʼʌtʼesa chaʼan yomʌch i bej jacʼben i tʼan Dios. Ili oración tac tsaʼ cʼoti baʼan Jehová bajcheʼ xojocña bʌ i yujtsʼil pom. Pejtelel jiñi tsaʼ bʌ i mele Jesús tiʼ  cuxtʌlel wen tsiʼ qʼuele jiñi i Tat yicʼot tsiʼ coltʌbe i yumʌntel.

8. ¿Bajcheʼ miʼ mejlel lac lajin Jesús?

⁸ Miʼ mejlel lac lajin Jesús cheʼ mi lac chaʼlen wersa lac jacʼben i mandar tac Dios yicʼot cheʼ chʌn xucʼulonla tiʼ tojlel. Cheʼ mi lac ñusan wocol tac, mi laj cʼajtiben Jehová chaʼan miʼ coltañonla come com lac mel chuqui wen tiʼ wut. Cheʼ mi lac mel pejtelel iliyi, mi lac pʌs chaʼan la com laj coltan bajcheʼ miʼ chaʼlen yumʌntel. La cujil chaʼan maʼañic mi caj i jacʼ la coración tac mi woli (choncol) lac mel tsʼaʼ bʌ miʼ qʼuel. Pero, mi mucʼʌch lac chumtʌl cheʼ bajcheʼ yom Dios, miʼ mejlel lac ñop chaʼan cheʼ mi lac jamben lac pusicʼal ti oración tiʼ tojlel mi caj i sujtel bajcheʼ xojocña bʌ i yujtsʼil pom. Miʼ mejlel lac ñop chaʼan jiñi lac Tat am bʌ ti panchan miʼ tijicñesʌben i pusicʼal jiñi lac xucʼtʌlel yicʼot cheʼ mi lac jacʼben i tʼan (Pr. 27:11).

9. ¿Chucoch miʼ yʌcʼob majtañʌl tac chaʼan miʼ yʌqʼueñob wocolix i yʌlʌ Jehová?

⁹ I chaʼpʼejlel laj cʌntesʌntel: Mi lac melben i yeʼtel Jehová come la com la cʌqʼuen wocolix i yʌlʌ. Laʼ laj qʼuel yambʌ ñuc bʌ i cʼʌjñibal chaʼan i chʼujutesʌntel Dios yaʼ ti Israel: Jiñi majtañʌl tac chaʼan miʼ yʌqʼueñob wocolix i yʌlʌ Jehová. * Ti jiñi libro i chaʼan Levítico mi laj cʌn chaʼan jiñi israelitajob miʼ melob iliyi (Lv. 7:11-13, 16-18). Mach xicʼbilob chaʼan miʼ yʌcʼob ili majtañʌl chaʼañʌch yom i yʌcʼob. Jin chaʼan, jumpʼejlʌch majtañʌl loqʼuem bʌ tiʼ bajñel pusicʼalob muʼ bʌ i yʌcʼob chaʼan miʼ cʼuxbiñob jiñi Dios Jehová. Muʼ bʌ i yʌcʼ jiñi majtañʌl, jiñi i familia yicʼot jiñi motomajob miʼ  cʼuxbeñob i bʌcʼtal jiñi añimal tsʌnsʌbil bʌ. Pero an tac yajcʌbil bʌ i chaʼan Jehová ti jiñi añimal am bʌ tiʼ wenta chaʼan jin jach miʼ chʼʌm. ¿Baqui tac bʌ?

10. ¿Chuqui miʼ cʌntesañonla chaʼan jiñi majtañʌl tac muʼ bʌ i yʌqʼuentel Jehová chaʼan wocolix i yʌlʌ jiñi Levítico 3:6, 12, 14-16 chaʼan chuqui tsaʼ bʌ i ñijca Jesús chaʼan miʼ mel chuqui yom i Tat?

¹⁰ I yuxpʼejlel laj cʌntesʌntel: Mi la cʌqʼuen chuqui ñumen wem bʌ Jehová come mi laj cʼuxbin. Jehová tsiʼ yʌlʌ chaʼan tiʼ wut jiñʌch ñumen wen i lewil jiñi añimal. Cheʼ jaʼel, tsiʼ yʌlʌ chaʼan an tac am bʌ i chaʼan jiñi añimal yom bʌ mi yʌqʼuentel bajcheʼ jiñi cuchoʼtun wen ñuc bʌ i cʼʌjñibal tiʼ tojlel (pejcan Levítico 3:6, 12, 14-16). Jin chaʼan, jiñi Jehová wen tijicña miʼ yubin i bʌ cheʼ juntiquil israelita miʼ ñaʼtan tiʼ bajñel pusicʼal i yʌqʼuen chuqui an tac bʌ i chaʼan jiñi añimal yicʼot i lewil. Jiñi muʼ bʌ i yʌcʼ jiñi majtañʌl miʼ pʌs chaʼan yoque yom i yʌqʼuen chuqui wen jiñi Jehová. Lajal jaʼel, Jesús tsiʼ yʌqʼue chuqui wen i Tat cheʼ bʌ tiʼ pejtelel i pusicʼal tsiʼ melbe i yeʼtel come miʼ wen cʼuxbin (Jn. 14:31). Jiñi Jesús wen tijicña miʼ yubin i bʌ cheʼ mi mel chuqui yom Dios yicʼot miʼ wen cʼuxbiben i mandar (Sal. 40:8). ¡Wen tijicña tiʼ yubi i bʌ Jehová cheʼ bʌ tsiʼ qʼuele chaʼan jiñi i yalobil yom i melben i yeʼtel!

11. a) ¿Bajcheʼ miʼ laj i bʌ jiñi la queʼtel tiʼ chaʼan bʌ Dios yicʼot jiñi majtañʌl tac chaʼan miʼ yʌqʼuentel wocolix i yʌlʌ? b) ¿Bajcheʼ miʼ ñuqʼuesʌbeñonla lac pusicʼal?

¹¹ Jiñi majtañʌl tac tsaʼ bʌ i yʌqʼueyob Dios jiñi israelitajob chaʼan wocolix i yʌlʌ tsaʼ loqʼui tiʼ bajñel pusicʼalob i miʼ yʌcʼob chaʼan miʼ cʼuxbiñob Dios. Jiñi eʼtel muʼ bʌ lac melben Jehová lajal bajcheʼ jiñi majtañʌl tac come ti bajñel lac pusicʼal mi lac pʌsben Jehová chuqui mi la cubin tiʼ tojlel. Mi la cʌqʼuen chuqui wen, i mi lac mel come tiʼ pejtelel lac pusicʼal mi laj cʼuxbin. Wen tijicña miʼ yubin i bʌ cheʼ bʌ miʼ qʼuel yonlel i wiñicob woli (yʌquel) bʌ i melbeñob i yeʼtel come miʼ wen cʼuxbiñob yicʼot i mandar tac. Miʼ ñuqʼuesan lac pusicʼal cheʼ mi laj cʼajtesan chaʼan miʼ qʼuel ti ñuc chuqui mi lac mel yicʼot chaʼan chuqui miʼ ñijcañonla. Jumpʼejl ejemplo, mi añix lac jabilel i miʼ mʌctañonla chaʼan mi lac melben i yeʼtel cheʼ bajcheʼ cʼamel la com, miʼ mejlel lac ñop chaʼan Jehová mach jiñic miʼ qʼuel chuqui mach mejlix lac mel. Tajol mi lac ñaʼtan chaʼan maʼañix chuqui miʼ mejlel lac wen aqʼuen, pero miʼ qʼuel chaʼan jiñi laj cʼuxbiya miʼ ñijcañonla lac melben i yeʼtel cheʼ bajcheʼ cʼamel mi lac mejlel. Wen tijicña miʼ chʼʌm mejlto bʌ la cʌqʼuen.

12. ¿Bajcheʼ miʼ yubin i bʌ Jehová cheʼ bʌ miʼ yʌqʼuentel jiñi majtañʌl tac chaʼan wocolix i yʌlʌ, i chuqui miʼ mejlel lac ñop?

¹² ¿Chuqui miʼ cʌntesañonla cheʼ miʼ yʌqʼuentel Jehová jiñi majtañʌl tac chaʼan wocolix i yʌlʌ? Wen tijicña miʼ yubin i bʌ Jehová cheʼ bʌ miʼ letsel i butsʼil jiñi cʼajc cheʼ woliʼ pulel jiñi muʼ bʌ i cʼajtin chaʼan ti jiñi añimal. Jin chaʼan, miʼ mejlel lac ñop chaʼan Jehová tijicña miʼ qʼuel jiñi eʼtel woli bʌ lac melben ti bajñel lac pusicʼal yicʼot tiʼ pejtelel laj cuxtʌlel (Col. 3:23). Laʼcu lac ñaʼtan bajcheʼ cʼamel woliʼ yubin i tijicñʌyel. Mach yʌlʌyic mi cabʌl o tsʼitaʼ jach woli la cʌcʼ laj coltaya tiʼ yeʼtel ti laj cʼuxbiya, wen ñucʌch miʼ qʼuel i mi caj i cʼajtesan tiʼ pejtelel ora (Mt. 6:20; He. 6:10).

13. Cheʼ bajcheʼ miʼ yʌl Levítico 9:23, 24, ¿bajcheʼ tsiʼ pʌsʌ Jehová chaʼan wen tsiʼ qʼuele jiñi eʼtel chaʼan motomaj?

¹³ I chʌnchajplel laj cʌntesʌntel: Jehová miʼ yʌqʼuen i bendición jiñi i tejclum. Laʼ lac tsajin tsaʼ bʌ ujti ti 1512 cheʼ bʌ maxto tilemic Cristo, cheʼ bʌ tsaʼ waʼchoconti jiñi tabernáculo yaʼ ti wits Sinaí (Éx. 40:17). Moisés tsiʼ mele ili qʼuiñijel baqui tsaʼ waʼchoconti ti motomaj jiñi Aarón yicʼot i yalobilob. Jiñi tejclum Israel tsiʼ tempayob i bʌ i qʼuel jiñi motomajob cheʼ tsiʼ ñaxan acʼʌyob jiñi majtañʌl tac chaʼan  añimal (Lv. 9:1-5). ¿Bajcheʼ tsiʼ pʌsʌ Jehová chaʼan wen miʼ qʼuel majqui tsaʼ waʼchocontiyob ti motomajob? Cheʼ baqui ora Aarón yicʼot Moisés tsiʼ yʌqʼueyob i bendición jiñi israelitajob, Jehová tsiʼ choco jubel cʼajc chaʼan miʼ jisan jiñi majtañʌl am bʌ ti pulʌntib (pejcan Levítico 9:23, 24).

14. ¿Chucoch i cʼʌjñibal lac chaʼan ili ora cheʼ jiñi Dios tsiʼ qʼuele ti wen cheʼ tsaʼ waʼchoconti jiñi Aarón ti motomaj?

¹⁴ Cheʼ bajcheʼ jiñi, Jehová tsiʼ pʌsʌ chaʼan mucʼʌch i coltan cheʼ tsaʼ waʼchoconti jiñi Aarón ti motomaj. Cheʼ baqui ora jiñi israelitajob tsiʼ qʼueleyob chaʼan jiñi motomajob añoʼ bʌ i coltaya tiʼ tojlel Jehová, tsaʼ cʼoti i chʼʌmbeñob i sujm chaʼan yom miʼ coltañob jaʼel. Iliyi wen añʌch i cʼʌjñibal bʌ lac chaʼan come i waʼchocontel jiñi motomaj ti Israel tsiʼ yʌxñal pʌsʌ chaʼan tiʼ tojlel juntiquil motomaj ñumen ñuc bʌ i cʼʌjñibal. Jesucristo jiñʌch jiñi Cʼax ñuc bʌ motomaj i temel mi caj i chaʼlen eʼtel yicʼot 144 mil motomajob yicʼot reyob (He. 4:14; 8:3-5; 10:1).

15, 16. ¿Bajcheʼ miʼ cʼotel lac ñaʼtan chaʼan Jehová woliʼ coltan «jini xucʼul bʌ xʼeʼtel am bʌ cabʌl i ñaʼtʌbal»?

¹⁵ Ti 1919 Jesús tsiʼ waʼchoco alʌ junmojt xñoptʼan bombiloʼ bʌ chaʼan miʼ sujtel ti «jini xucʼul bʌ xʼeʼtel am bʌ cabʌl i ñaʼtʌbal». Ili xucʼul bʌ xʼeʼtel jiñʌch woli bʌ i qʼuel chaʼan miʼ yujtel jiñi subtʼan yicʼot miʼ yʌqʼuen i bʌl i ñʌcʼ «cheʼ tiʼ yorajlel» jiñi woli bʌ i tsajcañob Cristo (Mt. 24:45). ¿Woli ba laj qʼuel chaʼan Dios miʼ qʼuel ti wen jiñi xucʼul bʌ xʼeʼtel am bʌ cabʌl i ñaʼtʌbal?

¹⁶ Satanás yicʼot i pañimil añob i chaʼleyob wersa chaʼan miʼ mʌctañob i yeʼtel jiñi xucʼul bʌ xʼeʼtel am bʌ cabʌl i ñaʼtʌbal. Tiʼ sujm, maʼañic cʼotem tiʼ mejlel ili eʼtel cheʼ machic tiʼ coltaya Jehová. An cʼoti ti ujtel chaʼsujtel ñuc bʌ guerra yicʼot pʼumpʼuñiyel tiʼ pejtelel pañimil, cheʼ jaʼel, an mejli mach bʌ tojic tiʼ tojlel i tejclum Jehová yicʼot an wen tsʼaʼlenti. Anquese an ujti  pejtelel iliyi, jiñi xucʼul bʌ xʼeʼtel am bʌ cabʌl i ñaʼtʌbal an i chʌn aqʼue chʼujul bʌlñʌcʼʌl jiñi muʼ bʌ i tsajcañob Cristo ila ti Pañimil. Laʼcu lac ñaʼtan: An lac chaʼan cabʌl jun tac maʼañic bʌ mi lac toj am bʌ ñumen ti 900 tʼan tac. Ili jiñʌch muʼ bʌ i ñumen aqʼueñonla lac ñaʼtan chaʼan Jehová woliʼ chaʼlen coltaya. Jiñi subtʼan jiñʌch yambʌ muʼ bʌ i pʌs chaʼan woliʼ yʌcʼ i bendición. Jiñi wem bʌ tʼan woliʼ sujbel «tiʼ pejtelel pañimil» (Mt. 24:14). Tiʼ sujm, Jehová woliʼ pʌsben jiñi bij jiñi i yorganización yicʼot tiʼ yutslel i pusicʼal woliʼ yʌqʼuen i bendición.

17. ¿Bajcheʼ mi lac pʌs chaʼan mi laj coltan jiñi i yorganización Jehová woli bʌ i cʼʌn?

¹⁷ Laʼ laj cʼajtiben lac bʌ: «¿Tijicña ba mi cubin c bʌ chaʼan añon tiʼ yorganización Jehová wʌʼ bʌ an ila ti pañimil?». Wen tsiquil bajcheʼ an i pʌsbeyonla Jehová chaʼan woliʼ coltan i yorganización cheʼ bajcheʼ jiñi cʼajc tsaʼ bʌ i choco tilel cheʼ ti yorajlel Moisés yicʼot Aarón. Tiʼ sujm, cabʌl chucoch yom mi la cʌcʼ wocolix a wʌlʌ (1 Ts. 5:18, 19). ¿Bajcheʼ mi lac pʌs chaʼan mi laj coltan jiñi i yorganización Jehová woli bʌ i cʼʌn? Cheʼ mi jacʼ pejtelel jiñi i ticʼojel muʼ bʌ la cʌqʼuentel ti jiñi jun tac, ti tempa bʌ yicʼot ti colem tempa bʌ yicʼot cheʼ mi lac chaʼlen wersa lac loqʼuel ti subtʼan yicʼot lac sutqʼuin ti xcʌntʼan yambʌlob (1 Co. 15:58).

18. ¿Chuqui la com lac mel?

¹⁸ Yom mi lac mel jiñi muʼ bʌ laj cʌn tac ti jiñi libro i chaʼan Levítico. Laʼ lac chaʼlen wersa chaʼan wen miʼ laj qʼuejlel ti Jehová chaʼan miʼ chʼʌm jiñi muʼ bʌ la cʌqʼuen. Laʼ lac melben i yeʼtel Jehová come la com la cʌqʼuen wocolix i yʌlʌ. Laʼ la cʌqʼuen chuqui wen come mi laj cʼuxbin tiʼ pejtelel lac pusicʼal. Yicʼot la laj coltan tiʼ pejtelel laj cuxtʌlel jiñi i yorganización woli bʌ i cʼʌn ili ora. Cheʼ mi lac mel pejtelel iliyi, mi lac pʌsben Jehová chaʼan mi laj qʼuel ti ñuc cheʼ mi lac melben i yeʼtel yicʼot cheʼ añonla bajcheʼ i Testigo.