1-2. Pine nemene matre nyipiewekë tro la itre Keresiano a wangatrune la tusi Levitiko enehila?

HNEI Paulo aposetolo hna qaja koi Timoteo, sinee i nyidrëti thöth ka hape, “qaathene la ua i Akötresie la nöjei hna cinyihan asë, nge ka nyipiewekë.” (2 Tim. 3:16) Kolo fe lai a hane qaja la tusi Levitiko. Nemene la aqane goeëne së la tusi Levitiko? Ame koi itre xan, tha ka nyipiewekë hmaca kö la itre wathebo hna hamën ngöne la tusi cili. Ngo tha celë kö la mekuna ne la itre Keresiano.

² Hna cinyihane la tusi Levitiko laka, 3 500 hë lao macatre enehila. Ngo hnei Iehova hna thupëne la tusi cili “göi troa ini së.” (Rom. 15:4) Kola xatua së hnene la tusi Levitiko troa trotrohnine la mekuna i Iehova. Celë hi matre, loi e tro sa inine la tusi cili. Hanawang la foa lao ini.

3. Pine nemene matre hna huujëne la itre öni e nöjei macatre ngöne lo Drai Ne Nyithupene Mel?

³ Pane ini: Loi e troa kepe së hnei Iehova matre tro Nyidrëti a kapa la itre huuje së. Ame e nöjei macatre ngöne lo Drai Ne Nyithupene Mel, hnei angetre Isaraela hna icasikeu, matre troa huujëne koi Iehova la itre öni. Celë hi ka troa amekunë angatr laka, loi e troa ietrane la itre ngazo i angatr! Ngo hetre ketre ewekë kö nyine tro la atre huuj ka sisitria a pane kuca, qëmekene troa anenine la madra ne la itre öni ngöne la Gaa Hmitrötr.

4. Thenge la Levitiko 16:12, 13, nemene la hna pane kuca hnene la atre huuj ka sisitria ngöne la nyidrëti a lö ngöne la Gaa Nyipi Hmitrötr? (Wange ju la pane iatr.)

 ⁴ E jë la Levitiko 16:12, 13. Pane mekune jë la ewekë ka traqa ngöne la Drai Ne Nyithupene Mel. Ame ngöne la drai cili, akönia troa lö hnene la atre huuj ka sisitria hnine la uma ne heta. Ame la nyidrëti a xötrei lö ngöne la Gaa Nyipi Hmitrötr, nyidrëti a xome trongëne la itre nyine dreuth ka pui loi, me ketre trepene eë ka tiqa hnei wanalepe ka mel. Nyidrëti a pane mano me cile qëmekene la Gaa Nyipi Hmitrötr. Thupene lai, nyidrëti a lö kowe la Gaa Nyipi Hmitrötr cememine la metrötr, me cile qëmekene la puha ne isisinyikeu. Kösë nyidrëti a cile xajawa i Iehova Akötresie! E cili, nyidrëti a nenge la ka pui loi hune la itre wanalepe ka mel, ame hna pui loi la hnahag. * Thupene lai, nyidrëti a troa lö ngöne la Gaa Nyipi Hmitrötr, memine la madra ne la itre öni hna huujën. Eje hi, nyidrëti a pane dreuthe la ka pui loi, qëmekene troa huujëne la madra ne la itre öni.

5. Nemene la ini hne së hna xom qa ngöne la aqane huliwane la itre ka pui loi ngöne la Drai Ne Nyithupene Mel?

⁵ Nemene la ini hne së hna xom qa ngöne la aqane huliwane la itre ka pui loi ngöne la Drai Ne Nyithupene Mel? Öni Tusi Hmitrötr ka hape, Iehova a kapa la itre thithi ne la itre hlue i Nyidrë, ceitu me itre ewekë ka pui loi. (Sal. 141:2; Hna ama. 5:8) Hnene fe la atre huuj ka sisitria hna tro fë la itre ka pui loi cememine la metrötr xajawa i Iehova. Ketre tune fe, easa thithi koi Iehova cememine la metrötr. Tru la hni ne ole së koi Iehova, Atre Xupe la nöjei ewekë asë ke, Nyidrëti a aijijë së troa easenyi koi Nyidrë, tune la kuku koi kem. (Iako. 4:8) Ketre, Iehova a kepe së tune la itre sinee i Nyidrë! (Sal. 25:14) Epi tro sa wangatrune la itre manathithi cili, matre tha tro kö sa akötrëne la hni Iehova.

6. Nemene la ini hne së hna xom qa ngöne la hna kuca hnene la atre huuj ka sisitria qëmekene troa huuj?

⁶ Maine aja ne la atre huuj tro Akötresieti a kapa la huuje i nyidrë, nyipiewekë tro nyidrëti a pane dreuth la itre ka pui loi qëmekene troa huuj. Nemene la ini koi së? Ame lo Iesu e celë fen, hetre ewekë hnei nyidrëti hna pane kuca qëmekene troa huujëne la mele i nyidrë. Nemen? Nyipiewekë tro Iesu a drengethenge Iehova, matre tro Nyidrëti a kapa la huuje i Iesu. E cili, Iesu a amamane laka, ame la nyipi mel tre, ene la troa kuca la itre ewekë thenge la aja i Iehova. Ketre, nyidrëti a anyipicine laka, meköti troa musi hnene la Keme i nyidrëti e koho hnengödrai.

7. Pine nemene matre tru la madrine i Iehova koi Iesu ngöne lo nyidrëti e celë fen?

⁷ Ame ngöne lo Iesu e celë fen, hnei nyidrëti hna drengethenge Iehova. Ngacama hna traqa la itre itupath koi nyidrë nge hnei nyidrëti hna mec ngöne la akötr, ngo hnei Iesu palahi hna cilëgöline la musi cile ne la Keme i nyidrë. (Fil. 2:8) Nge ame lo nyidrëti a cile kowe la itre jol ka tru, hnei nyidrëti hna thith me “sue catre fë ce me trenge timidra.” (Heb. 5:7) Kola mama ngöne la itre thithi Iesu la aqane mele nyipici nyidrë, memine la aja i nyidrëti troa drengethenge Iehova. Ame koi Iehova,  ceitune hi la itre thithi Iesu memine la itre ka pui loi. Tru la madrine i Iehova ke, hnei Iesu hna cilëgöline la Baselaia ne la Keme i nyidrë ngöne la mele i nyidrë.

8. Nemene la aqane tro sa nyitipu Iesu?

⁸ Loi e tro sa nyitipu Iesu, me catre drengethenge Iehova me mele nyipici koi Nyidrë. Ame la easa cile kowe la itre itupath, easa sipo ixatua koi Iehova jëne la thith ke, easa ajane troa amadrinë Nyidrë. Celë hi lai aqane tro sa cilëgöline la musi cile i Iehova. Maine tro sa kuca la itre ewekë ka ngazo, tha tro kö Iehova a drenge la itre thithi së. Ngo maine tro palahi sa kuca la itre ewekë ka lolo, tro ha pui lolo la itre thithi së koi Iehova. Xecie hnyawa koi së laka, Iehova a madrine la easa mele nyipici me drengethenge Nyidrë.—Ite edomë 27:11.

9. Pine nemene matre angetre Isaraela a tro fë la itre “huje ne hedö”?

⁹ Hnaaluene ini: Easa nyihlue i Iehova ke, tru la hni ne ole së koi Nyidrë. Hanawang la tulu ne la itre huuj hna tro fë hnei angetre Isaraela. * Kola qaja ngöne la tusi Levitiko laka, ijije hi tro la ketre atre ne Isaraela a tro fë la “nyine huje ne hedö.” (Lev. 7:11-13, 16-18) Pëkö ka musinë angeic troa tro fë la huuje cili, ngo angeic a kuca qa kuhu hni ke, tru la ihnimi angeic koi Iehova. Tro la atre tro fë la huuj me fami angeic me itretre huuj, a öni la mitr hna huujën. Ngo hetre itre götranene kö la öni laka, thatraqai Iehova hmekuje hi. Nemen?

10. Pine nemene matre ceitune hi la huuje ne ole hna qaja ngöne Levitiko 3:14-16 memine la huliwa i Iesu koi Iehova?

 ¹⁰ Hnaakönine ini: Easa hamëne koi Iehova la ka sisitria ke, easa hnimi Nyidrë. Ame koi Iehova, ka nyipiewekë la girisi ne la öni. Nge nyipiewekë mina fe la itre xaa götranene la öni, tune la wenethuluhmath. (E jë la Levitiko 3:6, 12, 14-16.) Madrine catre Iehova ngöne la kola huujëne la itre götrane cili, hnene la ketre atre ne Isaraela. Angeice hi a amamane la aja i angeic troa hamëne la ka sisitria koi Iehova. Ketre tune fe, tru catre la ihnimi Iesu koi Iehova, matre hnei Iesu hna hamëne la ka sisitria koi Nyidrë, me kuca asë la hna atreine matre troa nyihlue i Nyidrë. (Ioane 14:31) Madrine catre Iesu troa kuca la aja i Iehova ke, e kuhu hni nyidrëti la itre wathebo i Akötresie. (Sal. 40:8) Drei la madrine i Iehova ngöne la Iesu a nue la mele i nyidrëti ka pexej troa nyihlue i Iehova!

11. Pine nemene matre hna aceitunëne la huliwa i Iehova memine la huuje ne ole, nge pine nemene matre kola akeukawane la hni së?

¹¹ Hna aceitunëne la huliwa i Iehova memine la huuje ne ole ke, easa amamane la aliene hni së koi Nyidrë. Pine laka tru la ihnimi së koi Iehova, matre easa hamëne la ka sisitria koi Nyidrë. Drei la madrine i Iehova troa goeëne la itre milio lao Keresiano ka hnimi Nyidrë me hniin la itre wathebo i Nyidrë! Öhne hi Iehova la itre hne së hna kuca thatraqai Nyidrë, memine la kepin matre easa kuca. Celë hi ka akeukawane la itre hni së. Drei la ketre ceitun. Maine qatre hë së nge thatreine hë së catre huliwa i Iehova, ngo trotrohni së hi hnei Nyidrë. Maine jë tro sa mekun laka, co hi la hne së hna hamën koi Iehova. Ngo ame pe, öhne hi Nyidrëti la etrune la ihnimi së. Ihnim la ka upi së troa kuca la itre hne së hna atrein. Madrine catre Iehova troa kapa la itre hne së hna hamën ka sisitria.

12. Nemene la thangane la itre huuje ne ole koi Iehova, nge nemene la ithuecatre hne së hna kapa?

¹² Nemene la ini hne së hna xom qa ngöne la itre huuje ne ole? Ame la kola dreuthe la itre götrane ka nyipiewekë ne la öni, kola pui lolo nge madrine catre Iehova. Tha luelue kö së laka, Iehova a madrine la easa kuca asë la hne së hna atrein. (Kol. 3:23) Pane mekune jë la etrune la madrine i Iehova troa ce huliwa me easë. Ngacama tru maine co la hne së hna kuca koi Iehova, ngo tha ka gufa kö lai koi Nyidrë. Tha tro jë kö Nyidrëti a thëthëhmi së.—Mat. 6:20; Heb. 6:10.

13. Thenge la Levitiko 9:23, 24, nemene la aqane amamane Iehova laka, Nyidrëti a kapa la itretre huuj hna hnyipi acil?

¹³ Hnaafoane ini: Iehova a amanathithine la götrane ka mama ne la organizasio i Nyidrëti e celë fen. Hanawang la ka traqa lo 1512 M.P.K., ngöne lo kola acile la uma mano fene la wetre Sinai. (Eso. 40:17) Mose la ka elemekene la icasikeu, ngöne la kola acili Arona me itre nekö i angeic troa itretre huuj. Hnene la nöje Isaraela hna icasikeu, matre troa goeëne la itretre huuj troa tro fë la pane huuje i angatr. (Lev. 9:1-5) Nemene la aqane amamane Iehova laka, Nyidrëti a kapa la itretre huuj hna hnyipi acil? Ame la Arona me Mose a ase amanathithine la nöj, tro pi hi qa hnengödrai la eë i Iehova, troa dreuth asë la itre huuj.—E jë la Levitiko 9:23, 24.

14. Pine nemene matre ka nyipiewekë koi së enehila lo Iehova a kepe Arona tune la ketre atre huuj ne la nöj?

 ¹⁴ Nemene la aliene la kola tro pi la eë qa hnengödrai? Iehova a amamane laka, Nyidrëti a kapa me sajuë Arona me itre nekö i angeic, itre hna acil matre troa itretre huuj ne la nöj. Trotrohnine hë la nöj laka, ka loi e troa sajuë angatr. Hapeu, ka nyipiewekë kö lai koi së enehila? Eje hi! Pine nemen? Pine laka, kola nyihatrene la ketre atre huuj ka sisitria catre kö. Iesu Keriso la Atre Huuje Ka Sisitria, nge 144 000 la itretre huuj me joxu ka troa ce musi me Iesu e hnengödrai.—Heb. 4:14; 8:3-5; 10:1.

15-16. Nemene la ka amamane koi së laka, Iehova a kapa la “hlue ka nyipici me ka inamacan”?

¹⁵ Ame lo macatre 1919, hnei Iesu hna acil la “hlue ka nyipici me ka inamacan,” ketre lapa ka co ne itre trejin hna iën. Eje la ka xomiujine la huliwa ne cainöj, me ithuane la itretre drei Keriso “ngöne la nyipi ijin.” (Mat. 24:45) Hapeu, mama hnyawa kö koi së ka hape, Iehova a kapa la hlue ka nyipici me ka inamacan hna acile hnei Iesu?

¹⁶ Kola tupathe hnei Satana me itre sine xöle i angeic troa sawa la huliwa ne la hlue ka nyipici me ka inamacan. Maine tha hnei Iehova ju hna kapa la hlue cili, thatreine jë kö troa eatr la huliwa ne cainöj. Hetrenyi la lue isi ka tru ekö me itre jol göi manie e cailo fen. Hna qanangazone fe la nöje i Akötresie. Ngo hnene la hlue ka nyipici me ka inamacan hna catre hamëne la xeni ngöne la nyipi ijin kowe la itretre drei Iesu e celë fen. Pane mekune jë së la etrune la itre itusi enehila ka pëkö thupen, nge hna ujën koi 900 lao qene hlapa  nge hetre munën! Eje hi, Iehova Akötresieti a sajuëne la hlue. Ketre tune fe, Iehova a amanathithin la huliwa ne cainöj. Kola cainöjëne la itre maca ka lolo “e cailo fen.” (Mat. 24:14) Mama hnyawa hi koi së laka, Iehova la ka xomiujine me amanathithine la organizasio i Nyidrëti enehila.

17. Nemene la aqane tro sa sajuëne la organizasio i Iehova?

¹⁷ Loi e tro sa isa hnying ka hape, ‘Hapeu eni kö a madrine troa sine la organizasio i Iehova?’ Ame ngöne la hneijine i Mose, hnei Iehova hna axulune la eë qa hnengödrai matre troa amamane laka, Nyidrëti a kapa la itre hna acil. Ame enehila, Iehova a amamane laka, Nyidrëti a eatrongëne la organizasio i Nyidrë. Tru la madrine së troa amamane la hni ne ole së. (1 Thes. 5:18, 19) Nemene la aqane tro sa sajuëne la organizasio i Iehova? Loi e tro palahi sa trongëne la itre hne së hna inin e hnine la Tusi Hmitrötr me ngöne la itre itus, me ngöne la itre icasikeu me ngöne la itre asabele ne sirkoskripsio me asabele katru. Ketre, loi e tro sa catre cainöj me inine la itre atr.—1 Kor. 15:58.

18. Nemene la nyine tro sa kuca enehila?

¹⁸ Epi tro sa catre trongëne la itre ini qa hnine la tusi Levitiko. Eje hi, easa ajane tro Iehova a kapa la itre huuje së. Pine laka, tru la hni ne ole së koi Nyidrë, matre easa catre nyihlue i Nyidrë. Easa hamëne la ka sisitria koi Iehova ke, tru la ihnimi së koi Nyidrë. Nge easa nue trengecatr, matre troa sajuëne la organizasio i Nyidrë. Easë hi lai a amamane koi Iehova laka, caasi hi la ka sisitria koi së, ene la troa nyihlue i Nyidrë!