1-2. Saide Kelesten mu sutudeli a Beibel buku Lefitikesi?

APOSTEL Pawlesi be membee en mati Timotiyesi taki ’ala den sani di de aini a Wowtu fu Gadu bun fu gi leli, bika a Gadu seefi meke sama sikiifi den sani ya’ (2 Tim. 3:16). A sani ya e teli gi a buku Lefitikesi tu. San yu e pakisei fu a Beibel buku ya? Son sama e si en enke wan buku di lai weiti di nai teli gi a ten fu u ya moo. Ma tuu Kelesten e pakisei taa fasi fu a buku ya.

² A wan sani fu 3500 yali pasa a buku Lefitikesi be sikiifi. Toku Yehofa kibii en fu a á poli fu di a wani „leli u wan sani” anga a buku ya (Rom. 15:4). A Beibel buku Lefitikesi e yeepi u fu fusutan fa Yehofa e denki anga fa ai fii, neen meke u mu sutudeli a buku ya. Fu taki en kiin, a omen sani u sa leli fu a buku ya di Gadu meke sama sikiifi. Meke u luku fo fu den sani di u sa leli fu a buku ya.

3. Saide a foluku be abi wan dei aini a yali fu tyai ofaandi fu akisi paadon fu den sondu fu den?

³ A fosi sani: Efu u wani Yehofa piisii anga den sani di wi e du gi en, u mu e libi enke fa a wani. Wan dei aini a yali, a foluku Islayeli be e kon makandaa, da a gaan pilisite be e tyai meti enke ofaandi fu begi paadon fu den sondu fu den. Den ofaandi ya be e membee den Islayelisama taki den be abi sondu. Ma fosi a gaan pilisite be tyai a buulu fu den ofaandi go aini a Moo Santa Peesi, a be mu du wan taa sani di be pelensipali moo a ofaandi ya.

4. Enke fa Lefitikesi 16:12, 13 e soi, da san a gaan pilisite be e du a fosi leisi te a be go aini a Moo Santa peesi? (Luku a fowtow a fesise fu A Wakititolen.)

 ⁴ Leisi Lefitikesi 16:12, 13. Pakisei san e pasa na a dei di a gaan pilisite mu begi paadon gi a foluku: A gaan pilisite be e waka go aini a tabernakel. A dii leisi a be e waka go aini a Moo Santa Peesi. A fosi leisi, a be e tyai wan sani di be abi sumee switi fatu a wanse ana, aini a taase ana a be e tyai wan gowtu pan anga koofaya aini. Te a doo na a gaiden di e tapu a Moo Santa Peesi, da ai taampu fosi. Anga ala lesipeki, ai pasa go aini a Moo Santa Peesi, da ai taampu na a ark fesi. A wan ageisi fasi a Yehofa Gadu fesi a be e taampu. Baka dati a pilisite be e iti a oli aini a pan, da a hii kambaa be e sumee switi. * Baka dati ai go aini a Moo Santa peesi baka anga a buulu fu den meti di a be tyai enke sondu-ofaandi. Fosi a pilisite tyai a buulu fu den sondu-ofaandi go aini a Moo Santa peesi, ai boon sumee switi fatu gi Yehofa.

5. San wi e leli fu a fasi fa den pilisite be e boon sumee switi fatu gi Yehofa na a dei di den be mu akisi paadon fu den sondu fu den?

⁵ San wi e leli fu a boon di a pilisite be e boon sumee switi fatu gi Yehofa na a dei di a be e tyai ofaandi fu akisi paadon gi a foluku? Beibel e soi taki Yehofa e si den begi fu den sama di e dini en anga den hii ati enke a boon di sama be e boon sumee switi fatu gi en (Ps. 141:2; Openb. 5:8). Ná feegete taki anga ala lesipeki a gaan pilisite be e boon a sumee switi fatu gi Yehofa. A leti so useefi mu soi lesipeki te wi e begi Yehofa. Wi e teke en fu bigi taki a sama di meke ala sani, gi wi a gaandi fu kon koosube neen, leti enke wan dda anga en pikin (Yak. 4:8). Yehofa e teke wi enke en mati! (Ps. 25:14). Ná pikin bigi a sani ya e bigi gi u, neen meke noiti u wani du wan sani di o meke a tyali.

6. A gaan pilisite be mu boon sumee switi fatu gi Yehofa fosi a be o man tyai den taa ofaandi. San a sani ya e leli u?

⁶ Holi a pakisei taki a gaan pilisite be mu boon a sumee switi fatu gi Yehofa fosi a be o man tyai den taa ofaandi. Te a pilisite be du a sani ya, da Yehofa be e piisii anga en. San a sani ya e leli u? Di Yesesi be de a goontapu, a be mu du wan sani fosi a be o man dede gi libisama. A sani ya be pelensipali moo a dede di a be o dede gi u. San a be mu du? Yesesi be abi fu soi fosi taki a ná o gwe fika Yehofa winsi san e miti en. A te a be o du a sani ya fosi, Yehofa be o teke a ofaandi di a be kon fu tyai gi libisama. Te Yesesi be o holidoo, a be o soi taki a moo bun fasi fu libi, a te wi e du sani enke fa Yehofa wani. A be o soi tu taki neen Dda abi a leti fu tii.

7. Saide Yehofa be e piisii anga a fasi fa Yesesi be e tyai enseefi di a be de a goontapu?

⁷ Di Yesesi be de a goontapu, a be e aliki Yehofa ala yuu. A omen tesi be e miti Yesesi, a be sabi tu taki den be o kii en a wan ogii-ati fasi. Ma nawan fu den sani ya be tapu en fu soi taki neen Dda abi a leti fu tii (Filip. 2:8). Te tesi be e miti Yesesi, a be e begi fayafaya (Heb. 5:7). Den begi fu Yesesi be e soi taki a lobi Yehofa anga en hii ati. Den yeepi en tu fu tan du sani enke fa Yehofa wani. Yehofa be e si den begi fu Yesesi enke te sama e boon sumee switi fatu gi en. Yehofa be e piisii  anga ala den sani di Yesesi du di a be de a goontapu. Yesesi soi taki neen Dda abi a leti fu tii. A soi tu taki Yehofa na a moo bun Tiiman.

8. Fa u sa waka a Yesesi baka te u luku a fasi fa a be e libi di a be de a goontapu?

⁸ U sa waka a Yesesi baka, te u nai gwe fika Yehofa, anga te wi e du ala san u man fu libi enke fa wani. Te tesi e miti u, wi e begi Yehofa fayafaya fu a yeepi u, bika u wani a piisii anga u. Te wi e du den sani ya, wi e soi taki a Yehofa wi e si enke a moo bun Tiiman. U sabi taki Yehofa ná o aliki den begi fu u, efu wi e du sani di a á lobi. Ma efu wi e du san Yehofa lobi, da a o si den begi fu wi enke sumee switi fatu. U sa biibi taki a o piisii anga u tu, fu di wi e soi taki u nai gwe fika en.​—Odo 27:11.

9. Saide den Islayelisama be e tyai freide-ofaandi?

⁹ Du fu tu sani: Wi e dini Yehofa fu di den sani di a du gi wi e bigi gi u. Den freide-ofaandi di den Islayelisama be e tyai e soi a sani ya. * A buku Lefitikesi e soi taki wan Islayelisama be sa tyai freide-ofaandi ’fu gi Gadu daa’ (Lef. 7:11-13, 16-18). A wan Islayelisama seefi be e luku efu a be wani tyai freide-ofaandi. A sama di o tyai a ofaandi be e nyan a meti makandaa anga en osufamii anga den pilisite. Ma den á be mu nyan son pisi fu a meti. Den be mu gi Yehofa den pisi de. Sowtu pisi den be mu gi Yehofa?

10. San a freide-ofaandi di sikiifi a Lefitikesi 3:6, 12, 14-16 e leli u fu a fasi fa Yesesi be e dini Yehofa di a be de a goontapu?

 ¹⁰ Du fu dii sani: Fu di u lobi Yehofa meke wi e gi en den moo bun sani di wi abi. Yehofa be e si a fatu fu a meti enke a moo bun pisi fu a meti. Yehofa be taigi den tu taki den be mu gi en den nili anga a lebi fu a meti. (Leisi Lefitikesi 3:6, 12, 14-16.) Yehofa be e piisii te den Islayelisama be gi en den pisi ya, anga a fatu fu den meti anga den hii ati. Te wan Islayelisama be tyai a ofaandi ya, a be e soi taki a be wani gi Gadu a moo bun sani di a abi. A letiso Yesesi gi Yehofa a moo bun sani di a abi, di a dini Yehofa anga en hii ati fu di a lobi En (Yoh. 14:31). Yesesi be e si en enke wan piisii sani fu dini Gadu. A be lobi den weiti fu Gadu tu (Ps. 40:8). Yehofa be musu piisii di a si fa Yesesi e dini en anga en hii ati!

11. Saide u sa taki den sani di wi e du gi Yehofa de enke a freide-ofaandi? Fa a sani ya e toosutu u?

¹¹ Den sani di wi e du gi Yehofa de enke a freide-faandi, bika a nai dwengi u fu wooko gi en. Wi e gi Yehofa den moo bun sani di wi abi fu di u lobi en anga u hii ati. Yehofa musu e piisii te a si miliyunmiliyun sama e dini en fu di den lobi en tuutuu. Den sama ya lobi den weiti fi en tu. Yehofa nai si san wi e du gi en namo, ma ai si tu saide wi e du den sani ya. A sani ya e gi u taanga-sikin fu tan wooko gi en. Efi yu a wan gaandi baala efuso sisa, neen yu á poi du ala san i be sa wani du gi Yehofa moo, holi a pakisei taki Yehofa e fusutan fa yu e fii. Kande yu e si enke yu á poi du tyaipi sani gi Yehofa, ma Yehofa e si taki a di i lobi en tuutuu meke yu e du san i poi gi en. Anga ala piisii ai teke san yu e gi en bika a sabi taki na a moo bun sani di yu abi yu e gi en.

12. San wi e leli te u luku fa Yehofa be e fii te den be boon a freide-ofaandi gi en?

¹² San u sa leli fu a freide-ofaandi? Te a faya boon den moo bun pisi fu a meti, da a somoko e go a tapu. A sani ya be e meke Yehofa piisii. A letiso i sa biibi tu taki Yehofa e piisii tuutuu te yu e dini en anga i hii ati (Kol. 3:23). Pakisei fa ai piisii te ai luku i. Winsi yu á poi du tyaipi gi Yehofa, toku ai teke a pikinso di i poi du fu bigi. Noiti a o feegete san yu e du gi en.​—Mat. 6:20; Heb. 6:10.

13. Enke fa Lefitikesi 9:23, 24 e soi, da fa Yehofa soi taki a be teke Aron anga den manpikin fi en enke pilisite?

¹³ Du fu fo: Yehofa e belesi en foluku. Pakisei san be pasa aini a yali 1512 Fosi Kelestesi, di den be poti a ark na a futu fu a Sinai Mongo (Ek. 40:17). Mosesi du wantu sani fu poti Aron anga den manpikin fi en enke pilisite. A foluku Islayeli be kon makandaa fu si fa den pilisite be o boon den fosi ofaandi (Lef. 9:1-5). Fa Yehofa soi taki a be teke Aron anga den manpikin fi en enke pilisite? Di Aron anga Mosesi belesi a foluku, neen Yehofa meke faya koti komoto a tapu boon a ofaandi di be de na a altari.​—Leisi Lefitikesi 9:23, 24.

14. Saide a pelensipali gi wi aini a ten ya fu sabi taki Yehofa be e holibaka gi den pilisite fu fositen?

¹⁴ San Yehofa soi di a meke faya komoto a tapu boon den ofaandi? Yehofa soi anga a sani ya taki a be e holibaka gi Aron anga den manpikin fi en enke pilisite. Di den Islayelisama si a sani ya,  den fusutan taki Yehofa be e holibaka gi den pilisite. A sani ya soi den kiin taki denseefi mu holibaka gi den. Saide u mu sabi a sani ya? Bika den pilisite fu Islayeli e soi go a wan moo pelensipali sani. Den e soi go a Yesesi a moo Gaan Pilisite anga den 144.000 taa pilisite anga kownu di o tii makandaa anga Yesesi a hemel.​—Heb. 4:14; 8:3-5; 10:1.

15-16. Fa Yehofa soi taki ai holibaka gi „a koni saafu di u sa fitoow”?

¹⁵ Aini a yali 1919, Yesesi poti wan pikin kulu salufu baala enke „a koni saafu di u sa fitoow”. A koni saafu e teke fesi aini a peleikiwooko. Den e gi den bakaman fu Yesesi „nyanyan na a ten di den abi en fanowdu” tu (Mat. 24:45). San e soi taki Gadu e holibaka gi a koni saafu di u sa fitoow?

¹⁶ Saatan anga a goontapu fi en e meke moiti fu tapu a koni saafu fu du a wooko fi en. Efu Yehofa á be e yeepi den baala ya, noiti den be o man du a wooko di a gi den. Tu gaan feti be feti di seke a hii goontapu. Moni polobelema be lai na a hii goontapu tu. Boiti dati, sama e du ogii anga a foluku fu Gadu. Ma winsi fa den sani ya e pasa, toku a koni saafu e tan gi den bakaman fu Kelestesi nyanyan. Pakisei den somen buku anga felon di wi e fende sondee fu pai aini moo enke 900 tongo. A sani ya e soi kiin taki Gadu e holibaka gi den. A peleikiwooko a wan taa sani di e soi taki Yehofa e belesi a koni saafu. A bun nyunsu e paati „na a hii goontapu” (Mat. 24:14). Wi e si kiin taki Yehofa e tii a olikanisâsi fi en aini a ten ya. Ai belesi en tu.

17. Fa u sa soi taki wi e holibaka gi a olikanisâsi fu Yehofa?

 ¹⁷ A bun fu wi akisi useefi taki: ’Ai bigi gi mi fu de aini a olikanisâsi fu Yehofa?’ Aini a ten fu Mosesi, Yehofa be sende faya komoto a hemel boon den ofaandi fu den pilisite fu soi taki ai holibaka gi den. Aini a ten ya, Yehofa soi u kiin tu taki ai holibaka gi a olikanisâsi fi en (1 Tes. 5:18, 19). Fa u sa soi taki wi e holibaka gi a olikanisâsi di Yehofa e koboloiki? A te wi e wooko anga den sani di wi e leli aini den buku fu a olikanisâsi, den sani di wi e leli a komakandaa, den kelen komakandaa, anga den konkelesi. Beibel e holibaka gi ala den sani di a olikanisâsi e leli u. Wan taa fasi fa u sa soi taki wi e holibaka gi a olikanisâsi fu Yehofa, a te wi e du ala san u man aini a peleikiwooko.​—1 Kor. 15:58.

18. San i de kabakaba fu du?

¹⁸ Ala u mu de kabakaba fu wooko anga den sani di wi e leli fu a Beibel buku Lefitikesi. U wani Yehofa teke den ofaandi di wi e tyai gi en. Den sani di Yehofa du gi wi e bigi gi u, neen meke wi e dini en. Meke u tan dini Yehofa anga u hii ati fu di u lobi en. Meke u du ala san u man fu holibaka gi a olikanisâsi fi en. Te wi e du ala den sani ya, da wi e soi taki ai bigi gi u fu de wan Kotoigi fu Yehofa.