1-2. Ntak emi ọkpọdọn̄de mme Christian ndidụn̄ọde se idude ke n̄wed Leviticus?

APOSTLE Paul ama eti Timothy ekpri ufan esie ke “Abasi ọkọnọ odudu spirit ẹda ẹwet ofụri N̄wed Abasi,” ke n̄wed oro onyụn̄ “ọfọn.” (2 Tim. 3:16) N̄wed Leviticus esịne do n̄ko. Afo esida didie n̄wed Bible oro? Ndusụk owo ẹkeme ndida enye nte n̄wed emi ẹwetde nsio nsio ibet emi mînyeneke ufọn aba inọ nnyịn, edi ata mme Christian idaha ntre.

² Ẹkewet n̄wed Leviticus n̄kpọ nte isua 3,500 emi ekebede, kpa ye oro, Jehovah ama anam se ẹwetde do odu esịm eyo nnyịn man ‘ẹda ẹteme nnyịn’ se enye oyomde. (Rome 15:4) N̄wed Leviticus an̄wam nnyịn ikụt nte Jehovah esikerede n̄kpọ onyụn̄ adade ndusụk n̄kpọ, ntre akpana ọdọn̄ nnyịn ndidụn̄ọde se idude do. Enyene ediwak n̄kpọ emi ikemede ndikpep nto n̄wed oro ẹkedade odudu spirit Abasi ẹwet do. Ẹyak ineme inan̄ ke otu oro.

3. Nso ikanam ẹsiwa mme unam kpukpru isua ke Usen Usio-Isop?

³ Akpa n̄kpọ emi ikpepde: Ana inam se inemde Jehovah esịt man enye enyịme uwa nnyịn. Kpukpru isua ke Usen Usio-Isop, idụt Israel ẹma ẹsisop idem ọtọkiet, akwa oku ama esinyụn̄ awa mme unam. Mme uwa oro ẹma ẹsiti nditọ Israel ke akana ẹfen mme idiọkn̄kpọ mmọ! Edi enyene akpan n̄kpọ kiet emi akanade akwa oku anam usen oro mbemiso enye emende iyịp unam uwa ekededi odụk Ata Edisana. N̄kpọ oro ekedi akpan n̄kpọ akan Abasi ndifen idiọkn̄kpọ idụt oro.

4. Leviticus 16:12, 13 owụt ke nso ke akwa oku ekesinam akpa ini emi enye odụkde Ata Edisana ke Usen Usio-Isop? (Se ndise ikpaedem Enyọn̄-Ukpeme emi.)

 ⁴ Kot Leviticus 16:12, 13. Da nte ke odu ke Usen Usio-Isop. Akwa oku odụk tent utuakibuot. Akpa ke otu ikata emi enye edidụkde Ata Edisana usen oro edi oro. Enye akama n̄kpọ emi ẹdọn̄de edifuọn̄ incense ke ubọk n̄kan̄ kiet, onyụn̄ akama mbubek ikan̄ ke n̄kpọ ufọp incense emi ẹdade gold ẹnam ke ubọk n̄kan̄ eken. * Enye atuak ada kan̄a ke iso ọfọn̄ ikpehe emi ẹdade ẹbahade Ata Edisana, ekem asan̄a ata ukpono ukpono odụk Ata Edisana akada ke iso ekebe ediomi. Enye ndida do etie nte enye ndida ke ata ata iso Jehovah Abasi! Enye an̄wan̄a edisana incense oro ọduọk ke enyọn̄ mbubek ikan̄ oro sụn̄sụn̄; edinem utebe onyụn̄ ọyọhọ esịt ubet oro. * Ekem, enye ayada iyịp mme unam uwa idiọkn̄kpọ afiak odụk Ata Edisana oro. Ndi ama okụt ke enye ekesifọp incense kan̄a mbemiso emende iyịp mme uwa idiọkn̄kpọ oro odụk Ata Edisana?

5. Nte akwa oku ekesifọpde incense ke Usen Usio-Isop ekpep nnyịn nso?

⁵ Nte akwa oku ekesifọpde incense ke Usen Usio-Isop ekpep nnyịn nso? Bible owụt ke akam nti ikọt Jehovah emi enye esikopde etie nte incense. (Ps. 141:2; Edi. 5:8) N̄kọ emeti ke akwa oku ekesimen incense odụk iso Jehovah ata ukpono ukpono. Ntre n̄ko ke isinam n̄kpọ ke ini ibọn̄de akam inọ Jehovah; isinam n̄kpọ ata ukpono ukpono. Uten̄e Jehovah esinam nnyịn. Esinen̄ede enem nnyịn nte Andibot enyọn̄ ye isọn̄ ayakde nnyịn itịn̄ ikọ ye enye inyụn̄ ikpere enye, nte eyen esinyụn̄ anamde ye ete. (Jas. 4:8) Enye ada nnyịn nte ufan esie! (Ps. 25:14) Imenen̄ede ima se Jehovah anamde emi ọnọ nnyịn, oro anam nnyịn mîyomke ndinam n̄kpọ ekededi emi ediyatde enye esịt.

6. Akwa oku ndikesifọp incense kan̄a mbemiso ọfọpde mme unam ekpep nnyịn nso aban̄a Jesus?

⁶ Ti ke akana akwa oku ọfọp kan̄a incense mbemiso enye ekekemede ndiwa mme unam. Enye ndinam oro ama anam enye ọdiọn̄ọ ke Abasi idiyatke esịt ye imọ ini enye awade mme unam oro. Emi ekpep nnyịn n̄kpọ aban̄a Jesus. Ini Jesus okodude ke isọn̄, akana enye anam ata akpan n̄kpọ kiet mbemiso enye ayakde uwem esie ọnọ nte uwa; n̄kpọ oro akakam edi akpan n̄kpọ akan ndinam ẹnyan̄a ubonowo. Nso ke ekedi? Akana Jesus ọsọn̄ọ ada ye Jehovah onyụn̄ okop uyo esie ofụri usen uwem esie ke isọn̄ man Jehovah ekeme ndinyịme uwa emi enye ediwade. Jesus ndikanam ntre okowụt ke owo ndinam kpukpru n̄kpọ nte Jehovah ọdọhọde edi nnennen usụn̄ emi owo okpodude uwem. Oro ke Jesus okonyụn̄ ada owụt ke Ete esie enyene unen ndikara, ke nte enye onyụn̄ akarade enen.

7. Ntak emi kpukpru se Jesus akanamde ini enye odude ke isọn̄ ẹkenemde Ete esie esịt?

⁷ Ofụri ini emi Jesus okodude uwem ke isọn̄, enye ama okop uyo Jehovah ke kpukpru n̄kpọ, n̄kpọ isụhọke. Kpa ye emi enye okosobode nsio nsio idomo ye mfịna onyụn̄ ọdiọn̄ọde ke idikpa ata ubiak ubiak n̄kpa, enye ama ebiere ndika iso n̄wụt ke nte Ete imọ akarade ọfọn akan. (Phil. 2:8) Ini mme mfịna ẹkesịmde Jesus, enye ama ọbọn̄ akam “ke ọkpọsọn̄ eseme ye mmọn̄eyet.”  (Heb. 5:7) Akam ofụri esịt emi enye ọkọbọn̄de okowụt ke enye ọsọn̄ọ ada ye Jehovah, oro ama onyụn̄ anam enye enen̄ede ebiere ndikop uyo Jehovah. Jehovah akada kpukpru akam Jesus nte incense emi enemde utebe. Kpukpru se Jesus akanamde ama enen̄ede enem Ete esie esịt onyụn̄ owụt ke nte Ete esie akarade enen.

8. Didie ke ikeme ndikpebe Jesus?

⁸ Imekeme ndikpebe Jesus ke ndidomo ofụri ukeme nnyịn nsọn̄ọ nda ye Jehovah nnyụn̄ n̄kop uyo esie. Ke ini nsio nsio idomo ẹsịmde nnyịn, imesibọn̄ akam ke ofụri esịt idọhọ Jehovah an̄wam nnyịn sia nnyịn iyomke ndinam se idiyatde enye. Mme n̄kpọ emi ẹsiwụt ke imama nte Jehovah akarade. Imọdiọn̄ọ ke Jehovah idikopke akam nnyịn edieke inamde mme n̄kpọ emi enye asuade. Edi edieke idude uwem nte enye ọdọhọde, imenịm ke Jehovah edida mme akam emi ibọn̄de ke ofụri esịt nte incense emi enemde utebe. Imonyụn̄ inịm n̄ko ke nte isọn̄ọde ida inyụn̄ ikopde uyo Ete nnyịn eke heaven enem enye esịt.—N̄ke 27:11.

9. Ntak emi ẹkesiwade uwa ebuana?

⁹ Ọyọhọ n̄kpọ iba emi ikpepde: Esịtekọm emi inyenede esinam inam n̄kpọ Jehovah. Man ikụt ke edi ntre, yak ineme akpan n̄kpọ efen emi nditọ Israel ẹkesinamde ẹda ẹtuak ibuot ẹnọ Jehovah. N̄kpọ oro ekedi uwa ebuana. * N̄wed Leviticus owụt ke eyen Israel ama ekeme ndiwa uwa ebuana nda ‘n̄kọm’ Jehovah.  (Lev. 7:11-13, 16-18) Uwa oro ikedịghe n̄kpọ emi ẹkedọhọde ke ana enye anam; ekedi n̄kpọ emi ọkọdọn̄de-dọn̄ enye ndinam. Ima emi enye akamade Jehovah Abasi esie akanam enye ebiere ke idemesie ndiwa uwa emi. Ẹma ẹwa uwa oro ẹma, andikada uwa oro ndi, ye ubon esie, ye mme oku ẹma ẹsita unam oro ẹkewade. Edi ndusụk itie ke idem unam oro ẹkenyene Jehovah kpọt. M̀mọ̀n̄ ye m̀mọ̀n̄ ikedi oro?

10. Didie ke uwa ebuana oro ẹtịn̄de ẹban̄a ke Leviticus 3:6, 12, 14-16 anam ikụt se ikanamde ọdọn̄ Jesus ndinam uduak Ete esie?

¹⁰ Ọyọhọ n̄kpọ ita emi ikpepde: Ima esinam inam ofụri se ikemede inọ Jehovah. Jehovah akada ikpọn̄ unam nte mfọnn̄kan itie ke idem unam. Enye ama owụt n̄ko ke mme akpan itie ke idem unam, esịnede mme ekpụt ẹkedi san̄asan̄a. (Kot Leviticus 3:6, 12, 14-16.) Ntre ama esinen̄ede enem Jehovah ini eyen Israel awade mme akpan itie oro ye ikpọn̄ ada ọkọm enye. Eyen Israel emi akawade mme n̄kpọ emi okowụt ke enen̄ede ọdọn̄ imọ ndinam ofụri se imọ ikemede nnọ Abasi. Jesus akanam ukem oro. Enye ama ada ofụri esịt esie anam n̄kpọ ọnọ Jehovah. Oro okowụt ke enye anam ofụri se enye ekekekeme ọnọ Jehovah. (John 14:31) Ekesinenem Jesus ndinam uduak Abasi; enye ama onyụn̄ enen̄ede ama ibet Abasi. (Ps. 40:8) Imekere ke ama enen̄ede enem Jehovah ndikụt Jesus anamde n̄kpọ ọnọ enye ke ofụri esịt ntre!

11. Didie ke se inamde inọ Jehovah etie nte uwa ebuana? Didie ke oro ọdọn̄ nnyịn esịt?

¹¹ Se nnyịn inamde inọ Jehovah etie nte uwa ebuana sia emi esiwụt nte idade Jehovah. Isinam ofụri se ikemede inọ Jehovah sia imama enye ke ofụri esịt. Imenịm ke enem Jehovah ndikụt nte ediwak miliọn ikọt esie ẹnamde n̄kpọ ẹnọ enye ke ntak emi ẹmade enye, ẹnyụn̄ ẹmade nte enye esinamde n̄kpọ! Ima iti ke Jehovah esikụt onyụn̄ ama se inamde inọ enye, ye se isinamde nnyịn inam se ededi emi inamde, emi esidọn̄ nnyịn esịt. Ke uwụtn̄kpọ, ekpedi ọmọsọn̄ unyụn̄ ukemeke ndinam ekese nte akpamade ndinam, diọn̄ọ ke an̄wan̄a Jehovah nte etiede fi ke idem. Emekeme ndikere ke se anamde edi ekpri, edi Jehovah okụt esịt fo onyụn̄ okụt ke ima emi afo amade imọ anam fi anam se ekemede ndinam. Enye ama, onyụn̄ enyịme se anamde ke ofụri ukeme fo.

12. Nte esịt ekenemde Jehovah ini ẹwade uwa ebuana ekpep nnyịn nso?

¹² Nso ke ikeme ndikpep nto uwa ebuana? Nte ikan̄ akatade mme mfọnn̄kan itie ke unam oro, nsụn̄ikan̄ ama ọwọrọ ọdọk enyọn̄, esịt ama onyụn̄ enem Jehovah. Yak oro anam fi enịm ke Jehovah ama se anamde ke ofụri esịt fo ye ke ofụri ukeme fo ọnọ enye. (Col. 3:23) Kere nte Jehovah enemde esịt ye afo. Se ededi emi afo anamde ọnọ enye, edide esisịt m̀mê akamba, edi ọsọn̄urua n̄kpọ ke enyịn esie, enye idinyụn̄ ifreke tutu amama.—Matt. 6:20; Heb. 6:10.

13. Leviticus 9:23, 24 owụt ke nso ke Jehovah akanam owụt ke imọ imenyịme obufa ndutịm itie oku oro ẹketọn̄ọde?

¹³ Ọyọhọ n̄kpọ inan̄ emi ikpepde: Jehovah ke ọdiọn̄ ikpehe esop esie emi odude ke isọn̄. Kere se iketịbede ke isua 1512 mbemiso eyo Christ, ini ẹkewụkde tent utuakibuot ke ukot Obot Sinai. (Ex. 40:17) Moses akada usụn̄ ke edinam emi ẹkedade ẹmek Aaron ye nditọ Aaron oku. Ofụri idụt Israel ẹma ẹsop idem man ẹkụt akpa ini emi mme oku oro ẹwade unam ẹnọ Abasi. (Lev. 9:1-5) Didie ke Jehovah okowụt ke imọ imenyịme obufa ndutịm itie oku oro ẹketọn̄ọde do? Nte Aaron ye Moses ẹkesụk ẹdiọn̄de mme owo, Jehovah  ama anam ikan̄ edita nyọhọ nsụhọ uwa emi okodorode ke itieuwa.—Kot Leviticus 9:23, 24.

14. Ndutịm itie oku emi okodude ke Israel akada aban̄a nso?

¹⁴ Ikan̄ emi okotode heaven edita uwa ini ẹketọn̄ọde obufa ndutịm itie oku okowụt nso? Jehovah akada oro owụt ke imenyịme Aaron ye nditọ esie emi imọ imekde mme oku, ke iyonyụn̄ iberi mmọ edem. Ini nditọ Israel ẹkekụtde n̄kpọ emi owụtde ke Jehovah do ye mme oku oro, mmọ ẹma ẹdiọn̄ọ ke ana mmimọ n̄ko iberi mme oku oro edem. Ndi se ẹtịn̄de oro ebehe nnyịn? Ih, ebehe! Ndutịm itie oku oro ke Israel akada aban̄a itie oku emi okponde akan oro. Itie Akwa Oku eke Christ akan eke Aaron, mme oku ye ndidem 144,000 ẹnyụn̄ ẹdu emi ẹditienede enye ikara ke heaven.—Heb. 4:14; 8:3-5; 10:1.

15-16. Didie ke Jehovah owụt ke imeberi “ofụn emi anamde akpanikọ onyụn̄ enyenede ọniọn̄” edem?

¹⁵ Ke 1919, Jesus ama emek ekpri otu nditọete emi ẹyetde aran ẹdi “ofụn emi anamde akpanikọ onyụn̄ enyenede ọniọn̄.” Ofụn oro ada usụn̄ ke utom ukwọrọikọ onyụn̄ ọnọ mbet Christ “udia ke nnennen ini.” (Matt. 24:45) Ndi imokụt mme n̄kpọ emi ẹwụtde ke Abasi eberi ofụn emi anamde akpanikọ onyụn̄ enyenede ọniọn̄ edem?

¹⁶ Satan ye mbon ererimbot esie emi ẹnam ata ediwak n̄kpọ emi anamde ọsọn̄ ofụn emi ndinam utom esie; ndusụk ini esitie nte ofụn emi idikemeke-keme ndinam. Ikpọ mfịna emi ekọn̄ ererimbot mbiba ẹkedade ẹdi, ọkpọsọn̄ ukọbọ, nsọn̄ọn̄kpọ ke ofụri ererimbot, ye ufịk ikpanke ofụn emi anamde akpanikọ onyụn̄ enyenede ọniọn̄ ndika iso n̄kpep mbet Christ Ikọ Abasi. Se adan̄a ediwak n̄wed ye vidio  emi inyenede ke se ibede usem 900 ke mfọn! Oro enen̄ede owụt ke Abasi ke eberi ofụn oro edem. Utom ukwọrọikọ edi n̄kpọ efen emi owụtde ke Jehovah ke ọdiọn̄ ofụn oro. Ke ẹkwọrọ eti mbụk “ke ofụri isọn̄.” (Matt. 24:14) Imokụt ke Jehovah ke enen̄ede ọdiọn̄ onyụn̄ ada esop esie usụn̄ mfịn.

17. Didie ke ikeme ndiwụt ke imeberi esop emi Jehovah adade anam n̄kpọ edem?

¹⁷ Ọfọn owo nnyịn kiet kiet obụp idemesie, ‘Ndi mmọkọm Jehovah nte ndude ke ikpehe esop esie eke isọn̄?’ Ke eyo Moses, Jehovah ama anam ikan̄ oto heaven edita uwa man owụt ke imenyịme mbon emi enye ekemekde. Mfịn n̄ko, Jehovah ke owụt nnyịn mme n̄kpọ emi ẹnamde inen̄ede ifiọk ke enye ke ada esop esie anam n̄kpọ. Akpana isikọm Jehovah nte enye anamde idu ke esop esie. (1 Thess. 5:18, 19) Didie ke ikeme ndiwụt ke imeberi esop emi Jehovah adade anam n̄kpọ edem? Edi nnyịn ndinam mme item Bible emi ẹsinọde nnyịn ke mme n̄wed nnyịn, ke mme mbono esop, ye ke n̄kpri ye ikpọ mbono nnyịn. Usụn̄ efen edi ndisịn idem n̄kwọrọ ikọ nnyụn̄ n̄kpep mme owo Ikọ Abasi adan̄a nte ikekeme.—1 Cor. 15:58.

18. Nso ke afo ebiere ndinam?

¹⁸ Yak ibiere ndinam mme n̄kpọ emi ikpepde ito n̄wed Leviticus. Yak inam se inemde Jehovah esịt man enye ekeme ndinyịme uwa nnyịn. Yak esịtekọm emi inyenede anam nnyịn inam n̄kpọ Jehovah. Yak ika iso inam ofụri se ikekeme inọ Jehovah ke ntak emi imade enye ke ofụri esịt. Yak inyụn̄ ida ofụri esịt iberi esop emi enye ọdiọn̄de mfịn emi edem. Ima inam kpukpru emi, iyowụt Jehovah ke enenem nnyịn ndinam n̄kpọ esie nnyụn̄ ndi Ntiense esie!