1-2. Na cava meda vulica kina na lotu vaKarisito nikua na ivola na Vunau ni Soro?

E TUKUNA na yapositolo o Paula vei Timoci na nona itokani itabagone ni “vakavuna na Kalou na iVolatabu kece, e yaga.” (2 Tim. 3:16) E wili tale ga kina na ivola na Vunau ni Soro. O dau raica vakacava na ivola qori? Era nanuma eso ni levu ga kina na lawa e sega ni yaga vei keda nikua. Ia e sega ni va qori na noda rai na lotu vaKarisito dina.

² E volai na Vunau ni Soro ena rauta na 3,500 na yabaki sa oti. Ia se maroroya tiko ga o Jiova “meda vakavulici kina.” (Roma 15:4) Na cava meda vulica kina na lotu vaKarisito nikua na Vunau ni Soro? Eda na kila kina na rai i Jiova. E levu sara na ka eda na vulica ena ivola e uqeti vakalou qori. Meda dikeva mada e va.

3. Na cava e dau cabori kina na isoro ena Siga ni Veibuluti e veiyabaki?

³ Kena imatai: Ena vakadonui keda o Jiova ke ciqoma na noda isoro. Ena Siga ni Veibuluti e veiyabaki, era dau soqoni vata na Isireli, era cabora tale ga na isoro manumanu. Na cava na inaki ni isoro qori? Mera kila kina ni dodonu me vakasavasavataki na nodra ivalavala ca! Ia ni bera ni kauta na bete levu na dra ina Loqi Tabu Sara ena siga qori, e vinakati me cakava e liu e dua na ka e bibi sara mai na vosoti ni nodra ivalavala ca na Isireli.

4. Me vaka e cavuti ena Vunau ni Soro 16:12, 13, na cava ena cakava na bete levu ena imatai ni gauna e curu kina ena Loqi Tabu Sara ena Siga ni Veibuluti? (Raica na iyaloyalo ena waqana.)

⁴ Wilika Vunau ni Soro 16:12, 13. Raitayaloyalotaka  mada na ka e dau caka ena Siga ni Veibuluti: Ena curu vakatolu na bete levu ena Loqi Tabu Sara ena siga qori. Na kena imatai, ena curu yani ena valeniveitavaki, e taura tiko ena dua na ligana na itawatawa e sinai kina na ka boivinaka. Ena tiko ena ikarua ni ligana na itawatawa koula e sinai kina na qilaiso waqa. Ena lai tu ena mata ni ilatilati e latia na icurucuru ni Loqi Tabu Sara. E curu yani ena veidokai ena Loqi Tabu Sara, lai duri ena mata ni kato ni veiyalayalati. Qori e vaka ga ni duri tu ena mata ni Kalou o Jiova! Sa na qai sova vakamalua na ka boivinaka savasava ena dela ni qilaiso waqa, ena robota na rumu qori na kena iboi kamica. * Ena qai curu tale ena Loqi Tabu Sara me kauta na dra ni isoro ni ivalavala ca. Koya gona, e dau vakama e liu na bete levu na ka boivinaka ni bera ni cabora na dra ni isoro ni ivalavala ca.

5. Na cava eda vulica ena vakayagataki ni ka boivinaka ena Siga ni Veibuluti?

⁵ Na cava eda vulica ena vakayagataki ni ka boivinaka ena Siga ni Veibuluti? E tukuni ena iVolatabu ni nodra masu na dausokalou yalodina i Jiova e vaka na ka boivinaka. (Same 141:2; Vkta. 5:8) Eda sa vulica mai ni dau curu ena veidokai na bete levu me lai tu ena mata i Jiova. E va tale ga qori nida masu, eda na torovi Jiova ena veidokai. Eda rokovi koya vakalevu. Dua na ka noda vakavinavinaka ni vakadonuya na Dauveibuli meda masu vua, meda volekati koya tale ga me vaka nona volekati tamana e dua na gone. (Jeme. 4:8) E vakadonuya meda nona itokani! (Same 25:14) Qori e dua na ka eda mareqeta vakalevu, eda sega gona ni vinakata meda vakacudrui Jiova.

6. Na cava eda vulica ena nona vakama e liu na ka boivinaka na bete levu ni bera ni vakacaboisoro?

⁶ Meda nanuma tiko ni dau vakama e liu na bete levu na ka boivinaka ni bera ni vakacaboisoro. Na cava e cakava kina qori? Ena gauna me vakacaboisoro kina, e vakadeitaka ni vakadonui koya na Kalou. Na cava eda vulica kina? Ni se bula e vuravura o Jisu, e cakava e dua na ka bibi. Qori e bibi sara mai na noda vakabulai na kawatamata ni bera ni cabora vakaisoro na nona bula. Na cava na ka bibi qori? Ena vinakati me talairawarawa vei Jiova, me yalodina tale ga ena nona bula taucoko me rawa ni vakadonuya o Jiova na nona isoro. Ni cakava qori o Jisu, e vakadinadinataka ni vinaka duadua meda cakava na ka e vakadonuya o Jiova. E vakalasuya o Jisu na veika e vakalewai kina na veiliutaki cecere i Tamana, se ivakarau ni nona veiliutaki.

7. Na cava e marautaka kina o Jiova na ivakarau ni bula i Jisu?

⁷ Ni se bula e vuravura o Jisu, e talairawarawa tu ga vei Jiova. E vakatovolei, e sotava na veika dredre, e kila tale ga ni na mosimosi na nona vakamatei. Ia e vakadinadinataka o Jisu ni vinaka duadua na ivakarau ni veiliutaki i Tamana. (Fpai. 2:8) Ni sotava na ituvaki dredre, e masu o Jisu “salavata na nona tagi vakaukaua kei na wainimatana.” (Iper. 5:7) Na nona masu vagumatua e dusia ni yalodina vei Jiova, e vakadeitaki koya tale ga me talairawarawa tiko ga. E raica vakacava o Jiova na masu nei Jisu? E kamica me vaka na ka boivinaka. E vakamarautaki Tamana vakalevu na ivakarau kece ni bula i Jisu, e vakadinadinataka  ni dodonu tu ga na ivakarau ni nona veiliutaki.

8. Eda na muria vakacava na ivakarau ni bula i Jisu?

⁸ Eda na muria vakacava na ivakarau ni bula i Jisu? Meda talairawarawa vei Jiova mai vu ni lomada, meda yalodina tale ga vua. Nida vakatovolei, meda masu vagumatua nida kerea na veivuke i Jiova meda vakamarautaki koya. Nida cakava qori, eda vakaraitaka nida tokona nona veiliutaki. Eda kila ni na sega ni rogoca o Jiova na noda masu ke da cakava na ka e cata. Ia ke da cakava na ka e taleitaka, eda nuidei ni na kamica vei Jiova na noda masu me vaka na ka boivinaka. Eda kila ni na vakamarautaka na Tamada vakalomalagi na noda yalodina kei na noda talairawarawa mai vu ni lomada.—Vkai. 27:11.

9. Na cava era cabora kina na isoro ni veiyaloni na Isireli?

⁹ Kena ikarua: Eda qaravi Jiova nida vakavinavinakataki koya. Meda cakava qori, meda dikeva mada na isoro ni veiyaloni era dau cabora e Isireli makawa. * Eda vulica ena ivola na Vunau ni Soro ni rawa ni cabora e dua na Isireli na isoro ni veiyaloni “me [ivakaraitaki ni nona] vakavinavinaka.” (Vunau 7:11-13, 16-18) E vu sara ga mai lomana me cabora na isoro qori, e sega ni tukuni vua. Kena ibalebale ni cabora e dua na Isireli na isoro e sega ni lavaki, e dusia ni lomana na Kalou o Jiova. Ena kania na lewenimanumanu e cabori o koya e nona na isoro, na nona vuvale, kei  ira na bete. Ia eso tale na tiki ni manumanu qori ena cabori vakatabakidua vei Jiova. Me vaka na cava?

10. E tautauvata vakacava na isoro ni veiyaloni ena Vunau ni Soro 3:6, 12, 14-16 kei na ivakarau ni nona qaravi Tamana o Jisu?

¹⁰ Kena ikatolu: Eda solia vei Jiova na noda vinaka kece nida lomani koya. E raica o Jiova na uro me tiki ni manumanu vinaka duadua. E kaya tale ga ni yaga vakalevu eso tale na tikina me vaka na ivi. (Wilika Vunau ni Soro 3:6, 12, 14-16.) Kena ibalebale, e marau o Jiova ni cabora mai vu ni lomana e dua na Isireli eso na tiki ni manumanu qori kei na kena uro. E vakaraitaka ni via solia nona vinaka kece vei Jiova. E va tale ga qori o Jisu, e solia vei Jiova na nona vinaka kece ni lomani koya mai vu ni lomana. (Joni 14:31) E marautaka o Jisu me cakava na loma i Tamana, e lomana vakalevu na lawa ni Kalou. (Same 40:8) Sa na wacava na marau nei Jiova ni raici Jisu ni qaravi koya mai vu ni lomana!

11. E tautauvata vakacava na isoro ni veiyaloni kei na noda veiqaravi? E veivakacegui vakacava?

¹¹ E tautauvata na isoro ni veiyaloni kei na noda qaravi Jiova, ni kilai kina na noda rai me baleti koya. Eda solia vua na noda vinaka taucoko nida lomani koya mai vu ni lomada. Sa na wacava na marau nei Jiova me raica nodra qaravi koya e vica vata na milioni nira lomani koya mai vu ni lomadra kei na nona ivakatagedegede! Eda lomavakacegu ni kila vinaka o Jiova na ka eda cakava, e mareqeta tale ga. E kila na inaki ni noda veiqaravi. Kena ivakaraitaki, ke o dua na itabaqase, sa sega ni levu na ka o rawa ni cakava, mo nuidei ni kila vinaka o Jiova ni vakaiyalayala na ka o rawata. De dua o nanuma ni lailai na ka o solia vei Jiova, ia e kila ni o lomani koya vakalevu, qori e uqeti iko mo cakava na ka o rawata. E marau ni o solia na nomu vinaka taucoko ena nomu veiqaravi.

12. E raica vakacava o Jiova na isoro ni veiyaloni? E uqeti keda vakacava?

¹² Na cava eda vulica me baleta na isoro ni veiyaloni? Ni yameca na buka na tiki ni manumanu vinaka duadua, e kuvu cake na kena kubou, io e marautaka o Jiova. Mo nuidei gona ni marau o Jiova ni o qaravi koya mai vu ni lomamu. (Kolo. 3:23) Raitayaloyalotaka na nona marau ni vakadonui iko. Ke levu se lailai na ka o solia vei Jiova, e talei vua na ka o rawata, ena sega vakadua ni guilecava.—Maciu 6:20; Iper. 6:10.

13. Me vaka e tukuni ena Vunau ni Soro 9:23, 24, e vakaraitaka vakacava o Jiova ni vakadonuya na matabete?

¹³ Kena ikava: E vakalougatataka o Jiova na nona isoqosoqo e vuravura. Meda dikeva mada na ka e yaco ena 1512 B.G.V., ni vakaduri na valeniveitavaki e ruku i Ulu i Saineai. (Lako 40:17) E liutaka o Mosese na soqo me ratou buli o Eroni kei ratou na luvena tagane me ratou bete. E soqo yani na matanitu o Isireli me raica ena imatai ni gauna me ratou cabora kina na bete na isoro manumanu. (Vunau 9:1-5) E vakaraitaka vakacava o Jiova ni vakadonuya na buli ni matabete? Ni vosa vakalougatataki ira na tamata o Eroni kei Mosese, e vakavuna o Jiova me lako sobu mai na bukawaqa, e yameca sara na vo ni isoro ena icabocabonisoro.—Wilika Vunau ni Soro 9:23, 24.

14. Na cava e bibi kina vei keda nikua na nona vakadonuya o Jiova na matabete i Eroni?

¹⁴ Na cava e dusia ni yameca na isoro kama na bukawaqa? E vakaraitaka o Jiova ni tokona na matabete i Eroni. Nira  vakadinadinataka na Isireli na nona veitokoni o Jiova vei ratou na bete, qori e dua na vuna mera tokoni ratou kina. Na cava e bibi kina vei keda nikua? Na matabete e Isireli e vakatayaloyalotaka e dua na matabete vinaka sara. O Karisito na Bete Levu uasivi, era na tomani koya ena veiqaravi vakabete na le 144,000 era na tui tale ga mera veiliutaki kei Jisu mai lomalagi.—Iper. 4:14; 8:3-5; 10:1.

15-16. E vakaraitaka vakacava o Jiova ni tokona na “dauveiqaravi yalodina e vuku”?

¹⁵ Ena 1919, e digitaka o Jisu na “dauveiqaravi yalodina e vuku,” qori e dua na ilawalawa lailai eratou lewena na tacida tagane lumuti. E liutaka na dauveiqaravi qori na cakacaka vakavunau, e vakarautaka tale ga vei ira na imuri i Karisito “na kedra kakana ena kena gauna donu.” (Maciu 24:45) Vakacava o vakadinadinataka ni vakadonuya o Jiova na dauveiqaravi yalodina e vuku?

¹⁶ E saga o Setani kei ira na nona ito mera tarova na nona cakacaka na dauveiqaravi yalodina e vuku. Ke sega ni tokoni koya o Jiova, ena sega ni cakava rawa na cakacaka qo. Sa yaco oti e rua na ivalu, e vakilai e vuravura na leqa vakailavo, era vakacacani na tamata i Jiova, e caka tale ga vei ira na ka tawadodonu. Ia e sega ni tarova qori na nona vakarautaka tiko ga na dauveiqaravi yalodina e vuku na kakana vakayalo vei ira na imuri i Karisito e vuravura. Vakasamataka mada na levu ni kakana vakayalo sa tu nikua ena sivia na 900 na vosa, era sega ni saumi! Qori e ivakadinadina levu ni tokona tiko na dauveiqaravi yalodina e vuku o Jiova. Qo tale e dua na ivakadinadina: na cakacaka vakavunau. E vunautaki tiko na itukutuku  vinaka “ena veiyasa i vuravura.” (Maciu 24:14) E macala ga ni dusimaka tiko o Jiova na nona isoqosoqo e vuravura, e vakalougatataka tale ga.

17. Eda na tokona vakacava na isoqosoqo i Jiova?

¹⁷ Meda taroga, ‘Au marautaka niu lewe ni isoqosoqo i Jiova e vuravura?’ Ena gauna i Mosese, e vakavuna o Jiova me lako sobu mai lomalagi na bukawaqa me vakaraitaka ni vakadonui ira e digitaka. Eda vakadinadinataka tale ga nikua ni o Jiova e dusimaka tiko na nona isoqosoqo. Qori e dua na ka meda vakavinavinakataka. (1 Ces. 5:18, 19) Eda na tokona vakacava na isoqosoqo i Jiova? Nida muria na ivakasala vakaivolatabu e tabaki ena noda ivola, eda rogoca ena soqoni, soqo ni tabacakacaka kei na soqo ni veiwasewase. Kena ikuri, eda na vakaraitaka tale ga na veitokoni nida vakaitavi vakalevu ena vunau kei na veivakavulici.—1 Kor. 15:58.

18. Na cava mo vakadeitaka?

¹⁸ Meda vakadeitaka mada ga meda muria na ka eda vulica ena ivola na Vunau ni Soro. Eda vinakata me vakadonuya o Jiova na noda isoro. Meda qaravi Jiova nida vakavinavinakataki koya. Meda solia tiko ga na noda vinaka vei Jiova nida lomani koya mai vu ni lomada. Meda tokona tale ga ena noda vinaka taucoko na isoqosoqo e dusimaka tiko nikua. Nida cakava qori, eda vakaraitaka vei Jiova nida mareqeta na noda qaravi koya meda nona iVakadinadina!