1-2. Kristanvamnim aiz Levi-Xastr pustoka vixim kiteak zannam zaunk zai?

APOSTL Paulun aplea tornnattea ixtt Timotak, “sogllem Povitr Pustok Devachea preronnan boroilam; xikovnn diunk . . . upkarta,” mhunn ugddas korun dilem. (2 Tim. 3:16) Hantunt Levi-Xastr pustok mellon asa. Levi-Xastr pustoka vixim tumi kitem chintat? Aiz amchea faideak poddona tosle zaite kaide hea pustokant asat mhunn thoddo lok chintat, punn khorim Kristanvam toxim chintinant.

² Levi-Xastr pustok sumar 3,500 vorsam adim boroil’lem. Toripunn tantuntlean “amkam xikovnn diunchea pasot” Jehovan tem aiz meren samballun dovorlam. (Rom. 15:4, Povitr Pustok – Novo Korar) Umkeach vostu vixim Jehova koso chint’ta ani taka koxem bhogta, tea vixim hem pustok amkam zannam zaunk modot korta. Takach lagon, hea pustokantlean xikchi amkam utsuktai asonk zai. Khorem mhunnttlear, hea prerit kel’lea pustoka thaun ami zaitim lisanvam xikonk xoktat. Tantuntlim char lisanvam atam ami bhasabhas korum-ia.

3. Dor vorsa Farikponnachea Disa iodn kiteak bhettoitale?

³ Poilem lisanv: Jehovan amche iodn manun gheunk zai zalear amkam tachi maniotai gorjechi. Dor vorsa Farikponnachea Disa, Israel lok sangata mellon ietale ani zonvaranche iodn bhettoitale. Patka thaun tankam suttkechi goroz asa mhunn te iodn tanchea ugddasak haddttale! Israel raxttrank patkantlean nitoll zaunk porom iadnikan Bhov Povitr zagear bhettoilolea zonvaranchem rogot haddchea poilim, kitem tori korop chodd gorjechem zaun aslem.

4. Levi-Xastr 16:12, 13-ant sanglolea pormonnem, porom iadnik Farikponnachea Disa poilea pavtti Bhov Povitr zagea bhitor sortalo tednam kitem kortalo? (Masikachem fuddlem chitr polloiat.)

⁴ Levi-Xastr 16:12, 13 vachat. Farikponnachea Disa kitem zatalem tem tumchea monant haddat: Porom iadnik tombunt bhitor sorta. Hea disa to tin pavtti Bhov Povitr zagea bhitor voita, tantuntlem hem poilem pavtt zaun asa. Tachea eka hatant, pormollachea dhumpant bhorlolem ek aidon asa, ani dusrea hatant, zollttea inglleanim bhorloli ek kail asa. Bhov Povitr zago lipoita tea podd’ddea bhair to thambta. To khub respedan, Bhov Povitr zagea bhitor sorta ani korarachea pette mukhar ubo ravta. Eka orthan, to Jehovachea mukharuch ubo asa! Atam to porom iadnik zollttea inglleancher to povitr dhump samballun ghalta, ani to ak’kho zago tea pormollan bhorta. * To uprant patkanchea farikponnak lagon bhettoilolea zonvaranchem rogot gheun Bhov Povitr zagea bhitor sortolo. Dhean diat, hem rogot bhettounchea poilim to dhump zolloita.

5. Farikponnachea Disa dhump uzar kortale tachea thaun ami kitem xikonk xoktat?

⁵ Farikponnachea Disa dhump uzar korchea vixim ami kitem xikonk xoktat? Jehovak manvota toslim aplea visvaxi sevokamnim kel’lim magnnim dhumpa sarkim asat mhunn Bible sangta. (St. 141:2; Prok. 5:8) Ugddas korat, porom iadnik dhump gheun Jehovachea mukhar voitalo tednam to khub respedan voitalo. Teach bhaxen, ami Jehovak magnnem kortat tednam, tem ami khub respedan kortat. Ek bhurgo aplea bapai lagim sodanch uloita ani tachea lagim sorta. Teach bhaxen, vixvacho Rochnnar Jehovan magnnea vorvim aplea lagim soronk amkam ek vatt ukti kelea mhunn ami tache khub upkari asat. (Jak. 4:8) To amkam aple ixtt mhunn lekhta! (Jak. 2:23) Tea sueogacho ami itlo valor kortat ki kosleach karonnak lagon taka dukhounk amkam naka.

6. Porom iadnik iodn bhettounchea poilim dhump zolloitalo hachea thaun amkam kitem xikonk melltta?

⁶ Ugddas dovrat, porom iadnikan iodn bhettounchea poilim dhump zollouchi goroz asli. Oxem kelolean, to iodn bhettoitalo tednam taka Jehovachi maniotai astali. Hantunt thaun ami kitem xikonk xoktat? Jezu prithumer astana, aplo jiv iodn mhunn bhettoun munxakullak soddvonn diunchea poilim kitem tori chodd mhotvachem korchem aslem. Tem kitem? Jehovan tacho iodn manun gheunk zai zalear, Jezun aplem jivit promannikponnan ani visvaxiponnan jieunk zai aslem. Hea toren, Jehovak zai toxem aplem jivit jielolean, jivit jieunk hich ek sarki vatt mhunn Jezun dakhoilem. Hoi, aplea Bapacho razodhikar vo jea toren to raz choloita tem sarkem asa mhunn Jezu dakhouncho aslo.

7. Prithumer Jezun sarlolem ak’khem jivit tachea Bapak kiteak manvolem?

⁷ Jezu prithumer jielo tednam to Jehovachea nitivont dorjeank sompurnn toren khalto ravlo. Taka tallnni ani tras sosche asle ani apunn ek dis khub dukh sosun morcho aslo mhunn zannam aslear pasun aplea Bapachi razvottki cholounchi rit sarki asa mhunn dakhoun diuncho tacho nichov ghott aslo. (Filp. 2:8) Kotthin poristhitint, “Jezun” Devak “vhoddlean bob marun ani dukam golloun” magnnem kelem. (Heb. 5:7) Tannem kallzant thaun kel’lim magnnim, to Jehovak visvaxi aslo mhunn dakhoun ditalim. Ani tachea magnnea vorvim Devak khalti ravcho tacho nichov ghott zalo. Jezuchim magnnim, Jehovak eka pormollit dhumpa sarkim aslim. Jezun jea ritin aplem jivit hea sonvsarant sarlem tem Jehovak khub manvolem ani tea udexim Jehovachi razvottki sarki mhunn tannem dakhoun dili.

8. Jezun prithumer sarlolea jivitachi ami koxi dekh gheunk zata?

⁸ Jehovak khalti ani visvaxi ravonk ami amchean zata tem soglem kortat tednam ami Jezuchi dekh ghetat. Amkam porikxencho fuddo korcho poddtta tednam kallzantlean Jehovachi modot magtat karonn ami taka khuxal korunk sodhtat. Hea toren, ami Jehovachea razvottkek tenko ditat mhunn dakhoun ditat. Jehova dves korta tem ami kortat zalear to amchim magnnim manun gheuncho na mhunn ami ugddas dovrunk zai. Punn, ami Jehovachea totvam pormonnem jietat zalear Jehova fuddem amchem magnnem pormollit dhumpa sarkem astolem mhunn ami khatri dovrunk zata. Ani ami Jehovak khaltim ani visvaxi ravtat dekhun to khuxal zata mhunn ami bhorvonso dovrunk zata.—Mho. 27:11.

9. Ekcharache iodn kiteak bhettoitale?

⁹ Dusrem lisanv: Ami Jehovache upkari asat dekhun ami tachi seva kortat. Hem somzonk, ekcharache iodn bhettounchea vixim polloum-ia. Adlea Israelitkaranchea bhoktent, ho pasun anik ek mhotvacho bhag zaun aslo. * Levi-Xastr pustokant, ek Israelitkar ekcharacheo bhetto “dhinvasnnechi bhett” koxi diunk xoktalo mhunn vachunk melltta. (Lev. 7:11-13, 16-18) To heo bhettounneo, diuncheo poddttaleo mhunn dinaslo, punn aple khuxen ditalo. Hea ap-khuxen kelolea bhettounnne vorvim ek Isrealitkar apunn aplo Dev Jehovacho mog korta mhunn dakhoun ditalo. Ti bhettounni korpi tachi famil ani iadnik, bhettoilolea zonvarachem mas khatale. Punn tea bhettoilolea zonvarache thodde bhag fokot Jehovakuch bhettounk zai. Te bhag khoinche?

10. Jezun keloli Jehovachi seva Levi-Xastr 3:6, 12, 14-16-ant sanglolea ekcharachea iodnam sarki koxi asli?

¹⁰ Tisrem lisanv: Ami Jehovacho mog kortat dekhun, ami taka amchem boreantlem borem ditat. Chorob, ho zonvaracho boreantlo boro bhag mhunn Jehova lekhtalo. Zonvarache thodde sandhe, mutpario pasun khas valorache asle mhunn Jehovan sanglem. (Levi-Xastr 3:6, 12, 14-17 vachat.) Tor ek Israelitkar he sandhe ani chorob Jehovak ap-khuxen bhettoitalo tednam Jehova khuxal zatalo. Ek Israelitkar osli bhettounni ditalo tednam apunn Devak boreantlem borem diunk sodhtalo mhunn dakhoun ditalo. Jezu Jehovacho mog kortalo dekhun tannem purnn kallzantlean Jehovachi seva keli. (Juanv 14:31) Hea toren, tannem Jehovak aplem boreantlem borem dilem. Jezu Devachi khuxi korunk sontostalo; to Devachea kaideancho kallzant thaun mog kortalo. (St. 40:8) Jezu ap-khuxen apli seva korta ti polloun Jehova kitlo khuxal zalo astolo!

11. Ami kortat ti seva ekcharachea iodna sarki koxi asa, ani hem amkam buzvonn koxi diunk xokta?

¹¹ Ami kortat ti seva tea ekcharachea bhettounnea sarki asa, karonn tea vorvim Jehova vixim amkam koxem bhogta tem ami dakhoun ditat. Jehovak ami amchem boreantlem borem ditat ani ami kallzantlean tacho mog kortat dekhun hem ami kortat. Lak’khanim lok aplo ani aplea dorjeancho mog korta dekhun tim ap-khuxen apli seva kortat tem polloun Jehova kitlo khuxal zata astolo! Fokot amcheo korneo nhoi punn amcho hetu pasun Jehova polloita ani tacho valor korta mhunn zannam zalolean amkam buzvonn melltta. Udharonnak, tumi zanttim zaleat dekhun Jehovachea sevent tumkam zai titlem tumi korunk xokonant astolim, punn ugddas dovrat Jehova tumkam somzota. Tumi Jehovak ditat tem thoddench oxem tumkam disot, punn Jehova tumchea kallzant aslolo mog polloita. Ho mog tumchean zata tem korunk tumkam urba dita. Ani tumi boreantlem borem ditat tem to khuxalkaien manun gheta.

12. Ekcharache iodn bhettoitale tednam Jehovak koxem bhogtalem, ani tachea thaun amkam kosli khatri melltta?

¹² Ekcharachea bhettounne thaun ami kitem xiktat? Zonvaranche boreantle bore bhag ujeant lastale toxe, tacho dhunvor voir sortalo ani Jehova khuxal zatalo. Teach toren, tumi ap-khuxen purnn kallzan tachi seva kortat tednam Jehova khuxal zata. (Kol. 3:23) Tumkam polloun to kitlo khuxal zata astolo tem chintat. Jehovachea sevent tumi chodd korum vo unnem, tumi kallzantlean kortat te sevecho Jehova valor korta ani to sodanch tem ugddasak dovorta.—Mt. 6:20; Heb. 6:10.

13. Levi-Xastr 9:23, 24-a pormonnem apnnem iadnikponnache manddavollek maniotai dilea mhunn Jehovan koxem dakhoilem?

¹³ Chovtem lisanv: Prithume voilea aplea songottnecher Jehova besanv ghalta. 1512 K.X.A.-ant Sinai Dongrachea boglek tombu bandlolo tednam kitem ghoddlem tem polloum-ia. (Sutt. 40:17) Tea vellar, Aaron ani tachea bhurgeank iadnik mhunn nemchea eka somarombant Moizesan fuddakar ghetlo. Iadnik aplea poilea zonvaranche iodn bhettoitat tem pollounk Israel raxttr ektthaim zal’lem. (Lev. 9:1-5) Novean nemlolea hea iadnikponnachea manddavollecher apli maniotai asa mhunn Jehovan koxem dakhoilem? Aaron ani Moizes lokancher axirvad ghaltale toxe, Jehovan sorgar thaun uzo dhaddlo ani tea ujean tea vedicher aslole iodn lasun uddoile.—Levi-Xastr 9:23, 24 vachat.

14. Aaronache sonstintlea iadnikank nemchea manddavollicher Jehovachi maniotai asli tem amkam aiz kiteak mhotvachem?

¹⁴ Sorgar thaun uzo dhaddun Jehova kitem dakhounk sodhtalo? Aaron ani tache put iadnik mhunn seva kortana, tankam apunn purnn tenko ditolo mhunn tannem dakhoilem. Tea iadnikank Jehovacho tenko asa tem polloun, tannim pasun iadnikank purnn tenko diunk zai mhunn Israelitkarank kollon ailem. Hem amkam mhotvachem asa kai? Hoi! Israelant asloli iadnikanchi manddavoll ek mhotvachi iadnikponnachi fokot ek savlli zaun asli. Tea mhotvachea iadnikponnant, Jezu vhodd Porom Iadnik mhunn seva kortolo ani tachea sangata 1,44,000 zann, raza ani iadnik zaun sorgar seva kortole.—Heb. 4:14; 8:3-5; 10:1.

15-16. ‘Visvaxi ani xannea chakracher’ apli maniotai asa mhunn Jehovan koxem dakhoilem?

¹⁵ 1919-ant, obhixikt bhavanchea eka lhan zomeak ‘visvaxi ani xanno chakor’ mhunn Jezun nemlo. To chakor porgottnnechea kamant fuddakar gheta ani Kristachea pattlavdarank sarkea vellar jevonn dita. (Mt. 24:45) Visvaxi ani xannea chakracher Devachi maniotai asa mhunn amkam spoxttponnim dison ieta kai?

¹⁶ Soitan ani tacho sonvsar visvaxi chakrachem kam bond korcho proitn kortat. Hea chakrak Jehova modot korinaslo zalear te hem kam korunk xokonasle. Sonvsarant don zhuzam ani sonvsarbhorchi poixeanchi somosea asli, toxench Devachea lokancher on’neai zalo, tankam dhumallo dilo. Tori astana, visvaxi ani xannea chakran, prithumer aslolea Kristachea pattlavdarank sarkea vellar jevonn diunchem soddun diunk na. Amchea lagim aiz kitlim prokaxonam asat tea vixim chintat, 900 poros chodd bhasamnim tim asat, ani tem-ui kainch poixe farik korinastana amkam mellttat! Jehovacho tenko asa mhunn ho ek vhodd puravo zaun asa. Jehovachem besanv asa mhunn anik ek puravo mhunnttlear, porgottnnechem kam. Bori khobor “ak’khea sonvsarant porgott” zait asa. (Mt. 24:14) Jehova aiz aple songottnnek vatt dakhoita ani udarponnan besanvam di-it asa mhunn amkam kosloch dubhav na.

17. Jehova uzar korta tea songottnnek ami tenko ditat mhunn amchean koxem dakhounk zata?

¹⁷ Ami amkanch ho prosn vicharun pollounk zata, ‘Hanv Jehovachea songottnnecho bhag zaun asa mhunn upkari asa kai?’ Moizesachea disamnim Jehovan sorgar thaun uzo dhaddun apnnem nemlolea lokancher maniotai asa mhunn puravo dilo. Teach toren to aiz pasun aplem songotton uzar korta mhunn zai titlo puravo dita. Jehovak upkari asat mhunn dakhoun amkam zaitim karonnam asat. (1 Tes. 5:18, 19) Jehova uzar korta tea songottnnek ami tenko ditat mhunn amchean koxem dakhounk zata? Amkam amchea prokaxonamnim toxench mittingent, zomatint, ani odhivexonant mellttat tea Bible adarit margdorxonam vorvim ami hem korunk pavtat. Tea bhair, porgottnnent ani xikounchea kamant zata titlo tenko diun ami hem korunk zata.—1 Kor. 15:58.

18. Tumi kitem korcho nichov kela?

¹⁸ Levi-Xastr pustoka thaun xiklolim lisanvam apnnauncho ami nichov korum-ia. Jehovak ami bhettoitat tea iodnacher tachi maniotai melloun gheum-ia. Ami Jehovak upkari asat dekhun ami tachi seva korit ravum-ia. Ami purnn kallzan Jehovacho mog kortat dekhun taka ami amchem boreantlem borem di-it ravum-ia. Ani aiz to besanv ghalta tea songottnnek ami kallzan thaun tenko di-it ravum-ia. Heo sogleo vostu korun, Jehovache Sakxi mhunn amkam aslolea sueogache ami khub upkari asat mhunn dakhoun ditolim!