1, 2. ¿Ñobätä ni kristiano rabadre ja töi mike kukwe mike gare jai tärä Levítico yebätä?

APÓSTOL Pablo kukwe ne ngwani törö Timoteo ja ketamuko kwe yei: “Kukwe jökrä Tikani yebätä Ngöbökwe ja töi mikani aune [ye] kwin krubäte” (2 Tim. 3:16, TNM). “Kukwe jökrä Tikani” ye ngätäite tärä Levítico tä. Nitre ruäre kräke tärä ye ngwarbe ñobätä ñan aune kukwe tikani tärä yebätä ye nikanina ta nieta kwetre. Akwa ni kristiano metre abokän ñaka tärä ye mike tuin kore jai. ¿Mä abokän käkwe dre niedre?

² Kä 3,500 nikanina ta yete tärä Levítico ye tikani akwa Jehovakwe kriemikani nükebe ni näire ni tötikakäre (Rom. 15:4). Tärä nebätä Ngöbö töita tikani yebätä tärä ne tä ni dimike Ngöbö töita ño ye mike gare jai, aisete nikwe ja töi mikadre kukwe mike gare jai tärä nebätä. Metrere tä kukwe keta kabre driere ja töi kräke nie akwa ani ketabokä aibe mike gare jai.

3. ¿Ñobätä Köbö Ngite Ütiä Biankäre yete jondron nire kukwa nämäne?

³ Kukwe kena ja töi kräke: Jehovakwe ni kadre ngäbiti ye nita ribere jai ne kwe nita dre nuainne kräke ye mikadre ütiäte kwe jai. Kä kwatire kwatire te Köbö Ngite Ütiä Biankäre yete, nitre israelita nämäne ja ükökrö aune sacerdote bäri kri nämäne jondron nire ye kukwe. Kukwe nuain nämäne ye nämäne ngwen törö nitre israelita ie, niaratre yebätä ngite ñaka tädre jire. Akwa sacerdote bäri kri jämi niken Kä bäri deme yete jondron nire därie ngwena ye känenkri kukwe keteiti nämäne nuaindre ie. Kukwe nämäne nuaindre ie ye bäri ütiäte ngite juandre ta nitre israelitabiti ye kräke.

4. Levítico 16:12, 13 erere, ¿sacerdote bäri kri jämi niken Kä bäri deme yete Köbö Ngite Ütiä Biankäre ye näire ngwane nämäne dre nuainne? (Üai kena täräkwatabätä mikadre ñärärä).

 ⁴ (Ñäkädre Levítico 16:12, 13 yebätä). * Töbike kukwe nebätä. Köbö yete sacerdote bäri kri nämäne nemen bämä jire Kä bäri deme yekänti. Nämäne niken kena ngwane, nämäne niken incienso rä mane bätä baninkwata orore ñukwäbada mikara ye ngwena kisete. Nämäne nemen nünaninkä dänkwä Kä bäri deme ñäkäbitikäre ye känenkri. Kä ye mikadre ütiäte jai ye ererebätä nämäne mike ütiäte jai biti nämäne niken kä teri aune nämäne nemen nünaninkä Arca del Pacto ye känenkri. Nämäne nemen nünaninkä Jehová ngwärekri ye kwrere nie raba. Ye ngwane nämäne incienso ye kite ñukwäbada öbate yete aune incienso ye rä nämäne kite bälen gwita. * Nämäne nikenta bobukäre ngwane nämäne niken jondron nire ye därie ngwena Kä bäri deme yete. ¿Jutuani mäi? Jämi niken jondron nire ye därie ngwena känenkri nämäne incienso ye kukwe.

5. Incienso kukwa nämäne Köbö Ngite Ütiä Biankäre yete, ¿ye tä dre driere nie?

⁵ Incienso kukwa nämäne Köbö Ngite Ütiä Biankäre yete, ¿ye tä dre driere nie? Nitre ja ngwanka metre Ngöböi tä orasion nuainne ye Bibliabätä bämikata incienso ye kwrere (Sal. 141:2; Apoc. 5:8). Sacerdote bäri kri nämäne niken incienso ngwena Jehová ngwärekri ngwane nämäne Ngöbö mike ütiäte krubäte jai ye ngwandre törö jai. Ye erere arato nita orasion nuainne Ngöböi ngwane nita niara mike ütiäte jai. Monso tä nökrö rün ken ye erere, Ngöbö jondron jökrä Sribekä tä ni tuenmetre krötö ja ken ye ütiäte krubäte ni kräke (Sant. 4:8). Tä ni kain ngäbiti ja ketamuko kwe ye kwrere (Sal. 25:14). Ye ütiäte krubäte ni kräke aisete kukwe tuin blo ie ye ni ñaka tö nuaindi jire.

6. Jondron nire bian nämäne kukwadre ye känenkri sacerdote bäri kri nämäne incienso kukwe, ¿ye tä dre driere nie Jesubätä?

⁶ Sacerdote bäri kri ye käkwe jondron nire kukwadre Ngöböi ye känenkri rabadre incienso kukwe ye nikwe ngwandre törö jai. Niara käi tädre juto Jehovabätä yekäre nämäne incienso ye kukwe käne. ¿Ye tä dre driere nie? Jesús nämäne kä tibienbätä ngwane jämi ja nire bien ni kä tibienbätä ütiäre ye känenkri kukwe bäri ütiäte nuainbare kwe. Ja nire biain kwe ni kä tibienbätä ütiäre ye Jehovakwe kadre ngäbiti yekäre niarakwe ja ngwani metre Ngöböi nünanbare kwe kä tibienbätä ye ngwane. Yebiti bämikani kwe, nikwe nünandre ño ie Jehová tö ye bäri kwin aune Rün kwe ye aibe raba gobrane kwin ye bämikani metre kwe.

7. Jesús nünanbare kä tibienbätä ngwane, ¿kukwe jökrä nuainbare kwe ye ñobätä matani kwin Jehovabätä?

⁷ Jesukwe nünanbare kä tibienbätä ngwane käre Jehová kukwei metre ye mikani täte kwe. Niara nuaninte, ja tuani kwe kukwe tare ben aune murie ketai ye nämänena gare jabätä ie akwa yekwe ñaka töi kwitani jire Rün kwe tä gobrane bäri kwin ye bämikakäre (Filip. 2:8, TNM). Jesús “namani ja müaire amne, okwä ñöi namani näkäenkä kabre” orasion nuainbätä ja tuani kwe kukwe tare ben ngwane (Heb. 5:7). Orasion nuainbare kwe töi bökänbiti aune ja brukwä tätebiti ye käkwe dimikani ja ngwen metre jankunu. Orasion nuainbare kwe ye namani incienso rä bälen ye kwrere Jehová kräke. Rün tö nämäne dre ie ye erere nuainbare kwe aune Ngöbö aibe raba gobrane kwin ye bämikani metre kwe.

8. ¿Ño ni raba ja ngwen Jesús erere?

⁸ Kukwe ükaninte Ngöbökwe ye nita ja di ngwen mike täte aune ja ngwen metre ie ngwane,  nita ja ngwen Jesús erere. Nita ja tuin kukwe tare ben ngwane nita ja di kärere Ngöböi, ni töta ja ngwanbätä metre ie yebätä. Ne erere nita nuainne ngwane niarata gobrane ye nita juto biare mikakäre täte. Kukwe tuin blo Ngöböi ye nita nuainne ngwane ñaka orasion nikwe ye kukwe nuai kwe ye gare nie. Akwa nikwe ja di ngwain nüne Ngöbö tö ie ye erere ngwane orasion nuainta nikwe töi bobrebiti ye rabai incienso rä bälen ye kwrere niara kräke. Aune nita ni Rün kä kwinbiti mike täte bätä ja ngwen metre ie ye mate kwin krubäte niarabätä ye gare metre nie (Prov. 27:11).

9. ¿Ñobätä jondron nire bian nämäne Jehovai ja keta nämäne jäme ben ye bämikakäre?

⁹ Kukwe ketebukäre ja töi kräke: Ni tö debe biain Jehovai yebätä nita sribire kräke. Nitre israelita nämäne jondron bien kukwadre Ngöböi ja keta nämäne jäme ben ye bämikakäre yebätä ani ja tötike. * Ngöbö nämäne kukwe kwin nuainne nitre israelita kräke yebätä nämänentre debe bien ye bämikakäre nämänentre jondron nire bien Ngöböi ye mikata gare tärä Levítico yebätä (Lev. 7:11-13, 16-18). Nämänentre jondron bien kukwadre Jehovai ribe nämäne ietre ye ñan aibätä ñakare aune tö nämäne biain yebätä nämänentre nuainne. Nämänentre Jehová tarere yebätä nämänentre jondron bien kukwadre ja töi jeñebiti Ngöböi. Ni jondron nire bianka kukwadre ye mräkätre aune sacerdote nämäne ngri ye kwete. Akwa ngri ruäre dianka nämäne Jehová aibe kräke. ¿Gere dianka nämäne mento?

10. Jondron nire bian nämäne Ngöböi ja keta nämäne jäme ben bämikakäre mikata gare Levítico 3:6, 12, 14-16, ¿ye tä dre driere nie Jesukwe kukwe nuainbare Rün kwe töi mikakäre täte yebätä?

¹⁰ Kukwe ketamäkäre ja töi kräke: Nita jondron  kwin bien Jehovai ñobätä ñan aune tare nikwe yebätä. Jondron nire kö ye nämäne tuin bäri kwin Jehovai. Arato jondron nire mumain bätä moto ye nämäne ütiäte krubäte kräke ye mikani gare kwe (ñäkädre Levítico 3:6, 12, 14-16 yebätä). * Ni israelita nämäne ja töi jeñebiti jondron nire ye mumain, moto aune kö ye bien kukwadre ye nämäne kä mike juto krubäte Jehovabätä. Ni israelita nämäne jondron ye kwrere bien Jehovai ngwane nämäne bämike niara tö nämäne jondron kwin ye bianbätä ie. Ye erere arato, Jesukwe Rün mikani täte ja nire tätebiti ngwane, jondron bäri kwin ye biani kwe ie nämäne tarere yebätä (Juan 14:31). Ngöbö töi mikadre täte ye nämäne kä mike juto krubäte Jesubätä aune nämäne kukwe ükaninte Ngöbökwe ye tarere krubäte (Sal. 40:8). Jesús nämäne juto biare sribikäre ye käkwe kä mikani juto krubäte Jehovabätä.

11. a) ¿Sribi nikwe Ngöbö kräke ye ñobätä ketata jondron bian nämäne kukwadre Jehovai yebe? b) ¿Kukwe ne raba ni töi mike ño jäme?

¹¹ Jondron bian nämäne Ngöböi ja keta nämäne jäme ben bämikakäre ye nuain nämäne ja töi jeñebiti aune niara tare nämäne yebätä. Sribi nikwe Jehová kräke ye ketata jondron nire bian nämäne Ngöböi yebätä, ñobätä ñan aune ni töita ño niara kräke ye nita bämike ie sribi nuainta nikwe kräke yebiti. Ngöbö tare nikwe yebätä ja brukwä tätebiti aune ja di tätebiti nita sribire kräke. Nitre kwati tä niara tarere krubäte yebätä tä sribire kräke aune tä kukwe kwe tarere ye tä kä mike juto krubätebätä. Nita sribire kräke ye tuin ie aune ñan jerekäbe tä mike ütiäte jai, ñakare aune ñobätä nita nuainne ye gare ie ye tä ni töi mike jäme. Ñodre, ni niena umbre yebätä ni di ñan niena sribikäre krubäte kräke ye gare ie aune niara ñan tä ja töi mike ni ñan sribire krubäte kräke ye aibätä. Ni ñan sribire krubäte kräke ni raba nemen nütüre akwa niara tare krubäte nikwe yebätä nita ja di ngöibiti sribi nuainne kräke ye tuin ie. Nita sribire ja di ngöibiti kräke ye niarata kain ngäbiti kä jutobiti.

12. Jondron nire kukwa nämäne Jehovai ja keta nämäne jäme ben bämikakäre ye ngwane, ¿ja nämäne nemen ruin ño ie aune dre tädre gare metre nie?

¹² Jondron bian nämäne Ngöböi ja keta nämäne jäme ben bämikakäre, ¿ye tä dre driere nie? Jondron nire ngrie kwinkwin mika nämäne ñukwäte ngübüe nämäne niken kunkwäre ye käi nämäne nemen juto Jehovabätä. Ye erere arato, sribi nuainta nikwe ja töi jeñebiti aune ja nire tätebiti Jehová kräke ye tä kä mike juto krubätebätä tädre gare metre nie (Col. 3:23, TNM). Ni käi juto krubäte Jehovabätä ye bämike ja töite. Nita niara tarere yebätä nita sribire ja di tätebiti kräke ye ñaka käi kwitaikä jire kwe jabiti. Nita sribire ere o chi kräke akwa ye ütiäte krubäte kräke (Mat. 6:20; Heb. 6:10).

13. Levítico 9:23, 24 tä niere erere, ¿nitre sacerdote kädekani ye namani debe Jehová kräke ye bämikani ño kwe?

¹³ Kukwe ketabokäkäre ja töi kräke: Jehovata kukwe kwin mike nemen bare nitre niara mikaka täte ye kräke. Kä 1512 Kristo känenkri yete tabernáculo sribebare ngutuä Sinaí ngürebätä ye ngwane dre namani bare yebätä ani ja tötike chi (Éx. 40:17). Aarón aune monsotre kwe kädekani sacerdote ye ngwane, Moisés käkwe gätä ye jie ngwani. Nitre sacerdote käkwe jondron nire kukwani kena Jehovai ngwane nitre israelita käkwe ja ükaninkrö kukwe ye mrusaikäre (Lev. 9:1-5). ¿Nitre sacerdote kädekani ye namani debe Jehová kräke ye bämikani ño kwe? Aarón aune Moisés käkwe kukwe kwin  ribebare Ngöböi nitre israelita kräke ngwane, ñukwä Jehovakwe kä kwinbätä jatani näkäin kä nikani jondron mikani kukware altarbiti ye kukwe ngise jökrä (ñäkädre Levítico 9:23, 24 yebätä). *

14. ¿Aarón kädekani sacerdote namani debe Jehová kräke ye ñobätä ütiäte ni kräke nengwane?

¹⁴ Aarón kädekani sacerdote namani debe Jehová kräke ye bämikani kwe kukwe ñan tuabare yebiti. Ngöbö nämäne nitre sacerdote kain ngäbiti jutuabare nitre israelita ie ngwane, niaratre arato käkwe sacerdote dimikadre aune mikadre ütiäte jai ye nükani gare ietre. Kukwe namani bare ye ütiäte krubäte ni kräke ñobätä ñan aune nitre sacerdote mikani kira Israel ye tä sacerdote bäri ütiäte rabai ja känenkäre ye bämike. Kristo ye Sacerdote Bäri Kri aune nitre 144,000 ye käkwe sribidi gwairebe sacerdotere aune reire ben kä kwinbiti (Heb. 4:14; 8:3-5, TNM; 10:1).

15, 16. ¿“Ni klabore ie tö ngwan raba bätä töbätä” ye Jehová tä dimike ñokänti gare nie?

¹⁵ Nitre kristiano dianinkä nänkäre kä kwinbiti ye ruäre Jesukwe kädekani kä 1919 yete “ni klabore ie tö ngwan raba bätä töbätä” ye erere. Niaratre tä kukwe drie ye jie ngwen aune nitre nänkä Kristo jiebiti ye niaratre tä buke kukwe ja üairebiti kä debe “näre te” (Mat. 24:25, TNM). ¿“Ni klabore ie tö ngwan raba bätä töbätä” ye Jehovata dimike tuin nie?

¹⁶ Ni klabore ie tö ngwan raba bätä töbätä tä sribi nuainne ye Satana aune nitre gobrainta kwe ye tä ja mike rüere. Jehová ñaka ni klabore ie tö ngwan raba bätä töbätä ye dimike akräke sribi ye ñan raba nemen bare ie. Ñodre, rü nakaninkä kri  bobu aune ngwian ñaka namani kä jökräbiti tibien, ne madakäre juta Ngöbökwe ye rüere ja mikata krubäte aune mikata tuin ngwarbe jai. Kukwe ye jökräbiti ta, ni klabore ie tö ngwan raba bätä töbätä täbe ni nänkä Kristo jiebiti ye buke jankunu mrö ja üaire yebiti. Tärä aune täräkwata tä kukwe 900 jene jenebiti yebätä töbike. Ngöbö ara tä kukwe ye jökrä mike nemen bare. Jehovata kukwe kwin mike nemen bare ye kukwe drie tä mike gare arato. Kukwe kwin Gobran Ngöbökwe ye drie niena “kä jökräbti temen” (Mat. 24:14). Jehovata juta kwe jie ngwen aune kukwe kwin mike nemen bare kräke ye tuin metre nie.

17. ¿Jehovakwe juta ükaninte yebe nita sribire gwairebe ye ni raba bämike ño?

¹⁷ Nikwe ngwandretari jai: “¿Tita juta ükaninte Jehovakwe yete yebätä tita debe bien?”. Moisés aune Aarón näire ñukwä Jehovakwe jatani näkäin tibien ye namani bare metre, ye kwrere Jehová tä juta kwe dimike nengwane ye tuin metre nie. Kukwe keta kabrebätä nikwe debe biandre Ngöböi ¿ñan ererea? (1 Tes. 5:18). ¿Jehovakwe juta ükaninte yebe nita sribire gwairebe ye ni raba bämike ño? Kukwe nieta ja jie ngwankäre nie täräbätä ye nikwe mikadre täte. Gätä aune gätä krite mäträta nibätä ye mikadre täte bätä kukwe driedre ja di ngöibiti aune nitre mikadre ja tötikaka Jesukwe. Ye erere nita nuainne ngwane nita sribire gwairebe juta Jehovakwe yebe (1 Cor. 15:58).

18. ¿Ni töita kwatibe dre nuainbätä?

¹⁸ Kukwe nibi gare ja töi kräke nie tärä Levítico yebätä ye nikwe ja töi mikadre kwatibe mike täte. Jehovakwe ni kadre ngäbiti yekäre nikwe ja di ngwandre, ne kwe nita dre nuainne kräke ye mikadre ütiäte kwe jai. Nita debe bien krubäte Ngöböi yebätä sribidre kräke. Aune nita tarere ja brukwä tätebiti yebätä sribidre jankunu aune ja di ngöibiti kräke. Arato juta ükaninte kwe yebe sribidre ja nire tätebiti. Nikwe kukwe jökrä ne erere nuaindi ngwane, nita sribire Jehová kräke aune ni abokän testiko kwe ye ütiäte krubäte ni kräke ye nikwe bämikai ie.