1-2. Nama kebuah kitai patut keran deka belajarka bup Adat Lewi?

RASUL Paul ngingatka bakih iya Timoti, ‘semua Bup Kudus endang bepun ari Petara magang, lalu beguna.’ (2 Tim. 3:16) Tu mega nyengkaum bup Adat Lewi. Nama runding nuan pasal bup nya? Sekeda orang ngumbai iya semina siti bup ke ngembuan mayuh adat ti enda beguna agi kemayaharitu. Tang nembiak Jehovah bisi runding ti enda sebaka enggau sida.

² Bup Adat Lewi ditulis kira-kira 3,500 taun kelia, tang Jehovah agi ngena bup nya “ngajar kitai.” (Rom. 15:4) Adat Lewi nulung kitai meretika runding sereta asai ati Jehovah pasal sekeda utai. Nya alai kitai patut keran deka belajarka bup nya. Iya ke amat, bisi mayuh utai ti ulih dipelajarka kitai ari bup nya. Aram kitai bejuraika empat iti pekara ke bisi ba bup nya.

3. Ninting taun ba Hari Pengampun Dosa, nama kebuah orang Israel meri jelu nyadika pemeri ngagai Jehovah?

³ Utai keterubah dipelajar: Kitai patut ngagaka ati Jehovah enti deka pemeri kitai diterima Iya. Ninting taun ba Hari Pengampun Dosa, orang Israel enggau Imam Besai meri jelu nyadika pemeri ngagai Jehovah. Pemeri tu kena ngingatka orang Israel pasal sida ke patut nuchi diri ari dosa! Tang sebedau Imam Besai mai darah jelu nya ngagai Endur ti Pemadu Kudus ba Langkau Sembiang, iya patut ngereja siti agi pengawa. Pengawa nya berat agi ari pengawa ngampun dosa bansa Israel.

4. Nitihka Adat Lewi 16:12, 13, nama digaga Imam Besai lebuh iya keterubah tama ngagai Endur ti Pemadu Kudus ba Hari Pengampun Dosa? (Peda gambar ba kulit majalah.)

 ⁴ Bacha Adat Lewi 16:12, 13. Gambarka utai ti nyadi ba Hari Pengampun Dosa: Imam Besai tama ngagai Langkau Sembiang. Ba hari nya, iya patut tama tiga kali ngagai Endur ti Pemadu Kudus. Lebuh iya keterubah tama, iya megai sarang menyan ba jari sepiak, lalu ba jari sepiak agi, iya mai siti talam emas ti penuh enggau bara api. Iya ngetu ba mua kain tirai ke nutup penama ngagai Endur ti Pemadu Kudus. Enggau bebasa iya tama ngagai endur nya, lalu bediri di mua Peti Lampang Batu Adat. Tu nandaka, iya bediri di mua Petara Jehovah! Diatu, Imam Besai nya enggau bejimat nuangka menyan ngagai bara api, lalu endur nya pan bebau rengut. * Udah nya, iya tama baru ngagai Endur ti Pemadu Kudus lalu mai darah jelu ke nyadi pemeri. Peratika, iya nunu menyan sebedau iya ngenjuk darah jelu nya nyadika pemeri.

5. Nama ulih dipelajar kitai pasal menyan ke dikena ba Hari Pengampun Dosa?

⁵ Nama ulih dipelajar kitai ari menyan ke dikena ba Hari Pengampun Dosa? Bup Kudus nunjukka, sampi nembiak Jehovah ke tetap ati nya baka menyan. (Mas. 141:2; Pem. 5:8) Kingatka baru, Imam Besai nunjukka basa lebuh mai menyan di mua Jehovah. Pia mega enggau kitai, lebuh besampi ngagai Jehovah, kitai patut ngereja nya enggau chara ti bebasa. Kitai amat beterima kasih laban Jehovah ti nempa dunya raya ngemendarka kitai semak ngagai Iya, baka anak enggau apai. (Jas. 4:8) Iya nerima kitai nyadi pangan Iya! (Mas. 25:14) Kitai balat beterima kasihka peluang tu. Nya alai, kitai enggai ngereja sebarang utai ti tau ngemediska ati Iya.

6. Nama ulih dipelajar ari pengawa Imam Besai ke nunu menyan sebedau iya meri darah jelu nyadika pemeri?

⁶ Kingatka meh, Imam Besai patut nunu menyan sebedau iya meri darah jelu nyadika pemeri. Enggau nunu menyan nya dulu, iya nentuka diri ngagaka ati Jehovah. Nama ulih dipelajar ari pengawa tu? Lebuh Jesus ba dunya, iya patut ngereja siti pengawa sebedau iya meri nyawa diri nyadika genselan. Pengawa nya berat agi ari pengawa nyelamatka mensia. Nama pengawa ti berat bendar nya? Iya patut nunjukka diri taluk sereta ngasika Jehovah sepemanjai pengidup iya ba dunya ngambika genselan iya diterima Jehovah. Enggau chara nya, Jesus nunjukka ngereja utai nitihka chara Jehovah nya jalai pengidup ti pemadu badas. Iya mega nunjukka chara Apai iya merintah nya ngena sereta lurus.

7. Nama kebuah jalai pengidup Jesus chukup ngelantangka ati Apai iya?

⁷ Sepemanjai pengidup Jesus ba dunya, iya nunjukka diri ngasika standard Jehovah ti lurus. Taja pan iya napi penguji enggau penanggul, lalu nemu diri deka mati enggau chara ti balat pedis, iya tetap keran deka ngenanka hak Apai iya merintah. (Plp. 2:8) Lebuh napi penguji, Jesus besampi “ngena sabak ti inggar, sereta enggau ai mata.” (Heb. 5:7) Sampi iya ke ari ati, nunjukka iya taluk lalu tu ngasuh iya deka agi ngasika Jehovah. Ba Jehovah, sampi Jesus nya baka menyan ti bebau rengut. Jalai pengidup Jesus chukup ngelantangka ati Apai iya, sereta nunjukka Apai iya endang bisi hak merintah.

8. Baka ni kitai ulih neladan Jesus?

⁸ Kitai ulih neladan Jesus lebuh kitai enggau naka ulih ngasi sereta taluk ngagai Jehovah. Lebuh napi penguji, kitai besampi ari  ati minta tulung ari Jehovah laban kitai deka ngelantangka ati Iya. Enggau chara nya, kitai nunjukka diri nyukung chara Jehovah merintah. Kitai nemu Jehovah enggai nerima sampi kitai enti kitai ngereja utai ti dipegedika Iya. Tang enti kitai ngereja utai ti ngelantangka ati Iya, kitai ulih pechaya sampi kitai deka baka menyan ti bebau rengut ba Iya. Lalu kitai mega pechaya penaluk enggau ulah kitai ti ngasi tentu ngelantangka ati Apai kitai, Jehovah.—J-lam. 27:11.

9. Nama kebuah orang Israel meri pemeri pemaik ngagai Jehovah?

⁹ Utai kedua dipelajar: Kitai nyembah Jehovah laban kitai beterima kasih ngagai Iya. Kitai deka belajarka tu seraya kitai meratika pemeri pemaik tauka pemeri ke dikena bebaik enggau Petara Jehovah, ti diberi orang Israel. * Bup Adat Lewi madahka, orang Israel ulih meri pemeri tu kena nunjukka diri beterima kasih ngagai Jehovah. (Lew. 7:11-13, 16-18) Pemeri nya diberi ukai ketegal sida patut ngereja nya, tang sida deka ngereja nya laban sida sayauka Jehovah. Orang ke meri pemeri, sida ke sebilik enggau iya, sereta bala imam patut makai dagin jelu ke diberi nyadika pemeri. Tang bisi sekeda perengka tubuh jelu nya semina diberi ngagai Jehovah aja. Ni bagi perengka tubuh jelu ke patut diberi?

10. Baka ni pemeri pemaik ba Adat Lewi 3:6, 12, 14-16 bekaul enggau kebuah Jesus ngereja peneka Apai iya?

¹⁰ Utai ketiga dipelajar: Ketegal pengerindu,  kitai deka nyembah Jehovah enggau naka ulih. Jehovah ngumbai lemak jelu nya utai ti pemadu badas. Iya mega enggau nyemetak madahka tungkul sengayuh, atau, enggau ati nya bagi perengka dalam tubuh jelu ti pemadu manah ba Iya. (Bacha Adat Lewi 3:6, 12, 14-16.) Nya alai, Jehovah amat rindu lebuh orang Israel deka meri sekeda perengka dalam tubuh enggau lemak jelu nyadika pemeri. Orang Israel ke meri pemeri tu nunjukka diri bisi pengingin deka meri ngagai Jehovah enggau naka ulih. Pia mega enggau Jesus, ketegal iya balat rinduka Jehovah, iya deka nyembah Jehovah enggau naka ulih. (Jhn. 14:31) Ba Jesus, ngereja peneka Petara nya utai ti ngasuh iya gaga ati. Lalu iya mega rindu bendar ke Adat Jehovah. (Mas. 40:8) Jehovah tentu gaga ati lebuh meda Jesus deka nyembah Iya!

11. Baka ni sembah kitai ngagai Jehovah nya baka pemeri pemaik? Nama kebuah tu meransang ati kitai?

¹¹ Sembah kitai ngagai Jehovah nya baka pemeri pemaik laban nya chara kitai nunjukka asai ati diri ngagai Iya. Kitai enggau naka ulih meri ngagai Jehovah lalu kitai ngereja nya ketegal pengerindu kitai ti pengabis ati ngagai Iya. Naka meh pengaga ati Jehovah lebuh meda bejuta iku orang nyembah Iya ketegal balat rinduka Iya sereta chara Iya ngereja utai! Jehovah ukai semina meda sereta beterima kasihka utai ti dikereja kitai, tang Iya mega nemu kebuah kitai ngereja nya. Tu tentu ulih meransang semua kitai. Ambika chunto, enti nuan nya orang ke udah tuai lalu enda ulih ngereja mayuh baka ke udah, pechaya meh Jehovah meretika penanggul ke ditapi nuan. Nuan engka ngasaika diri enda ulih ngereja mayuh utai ke Jehovah. Tang Iya ulih meda pengerindu ke meransang nuan ngereja utai ke ulih digaga nuan. Iya tentu gaga ati nerima utai ke diberi nuan ngagai Iya enggau naka ulih.

12. Baka ni asai ati Jehovah pasal pemeri pemaik? Baka ni tu ulih meransang kitai?

¹² Nama ulih dipelajar kitai ari pemeri pemaik? Lebuh api nganguska perengka tubuh jelu, asap niki ke atas lalu nya ngagaka ati Jehovah. Nya alai nuan ulih pechaya, Jehovah tentu gaga ati lebuh nuan enggau naka ulih gawa ke Iya. (Kol. 3:23) Uji pikirka pengaga ati Iya ke nuan. Enda ngira utai ke diberi nuan nya besai tauka mit, Iya ngumbai nya utai ti berega lalu deka ingatka nya belama iya.—Mat. 6:20; Heb. 6:10.

13. Nitihka Adat Lewi 9:23, 24, baka ni Jehovah nunjukka Diri gaga ati enggau bala imam ke baru dichiri?

¹³ Utai keempat dipelajar: Jehovah merekatka gerempung Iya ba dunya tu. Peratika utai ke nyadi ba taun 1512 S.M. lebuh Langkau Sembiang didirika ba kaki Bukit Sinai. (P-sut. 40:17) Moses bejalaika pengawa nyiri Aron enggau bala anak iya nyadi imam. Bansa Israel begempuru meda bala imam mungkal pengawa meri jelu nyadika pemeri. (Lew. 9:1-5) Baka ni Jehovah nunjukka Diri gaga ati enggau bala imam ke baru dichiri? Lebuh Aron enggau Moses merekatka orang Israel, Jehovah ngasuh api nurun ari langit nganguska semua pemeri ke bisi ba alta.—Bacha Adat Lewi 9:23, 24.

14. Nama kebuah pengawa Jehovah ke nerima bala imam ba Israel menya bisi reti ba kitai kemayaharitu?

¹⁴ Lebuh api nurun ari langit, nama reti nya? Tu nunjukka Jehovah nerima sereta nyukung Aron enggau bala anak iya ke udah dipilih nyadi imam. Lebuh orang Israel nemu Jehovah udah nyukung bala imam nya, sida mega nemu diri patut nyukung bala imam nya. Nama kebuah pengawa Jehovah ke nerima bala imam ba Israel menya bisi reti ba kitai kemayaharitu? Laban bala imam nya ngambarka bala imam ke badas agi. Jesus nya Imam Besai  ti pemadu tinggi, lalu bisi 144,000 iku da agi bala imam ke mega nyadi raja, deka gawa enggau iya ba serega.—Heb. 4:14; 8:3-5; 10:1.

15-16. Baka ni Jehovah nunjukka Diri nyukung “ulun ke tetap ati sereta bepenemu-dalam”?

¹⁵ Ba taun 1919, Jesus nyiri seraban mit menyadi Kristian lelaki ti dipilih ke serega nyadi “ulun ke tetap ati sereta bepenemu-dalam.” Sida ngiring pengawa nginjil lalu meri murid Jesus “pemakai ba maya ti patut.” (Mat. 24:45) Tu nunjukka Jehovah amat nerima sida ke nyadi “ulun ke tetap ati sereta bepenemu-dalam.”

¹⁶ Sitan enggau bala penyukung iya nguji deka ngetuka pengawa ke digaga ulun ke tetap ati. Enti ulun ke tetap ati enda nerima saup ari Jehovah, pengawa sida tentu enda ulih dipejalaika. Dua iti perang dunya udah mai mayuh penusah, lalu bisi mega penanggul ba ekonomi di serata dunya. Kelimpah ari nya, nembiak Petara diperinsa sereta disakal. Taja pan napi semua tu, ulun ke tetap ati enda ngetu nyediaka utai ti diguna kena ngeringka pengarap murid Jesus ba dunya. Uji pikirka pemayuh litaricha ti udah disedia ke kitai kemayaharitu. Semua nya enda bebayar lalu udah bisi dalam lebih ari 900 iti bansa jaku! Tu enggau terang nunjukka Jehovah endang nyukung ulun ke tetap ati. Pengawa nginjil mega nunjukka berekat ari Jehovah. Berita Manah amat benung ditusui “di serata dunya.” (Mat. 24:14) Sigi amat, Jehovah endang benung ngiring sereta ngemujurka pengawa ti dipejalaika gerempung Iya ba dunya kemayaharitu.

17. Baka ni kitai ulih nunjukka diri nyukung gerempung Jehovah?

 ¹⁷ Kitai patut nanya diri, ‘Kati aku beterima kasih laban ulih enggau gerempung Jehovah ba dunya tu?’ Maya jeman Moses, Jehovah nurunka api ari langit kena nunjukka Diri udah nerima orang ke dipilih Iya. Pia mega kemayaharitu, Jehovah udah meri kitai bukti ke nunjukka Iya ngena gerempung Iya ngiring kitai. Endang amat, kitai bisi mayuh kebuah deka beterima kasih ngagai Jehovah. (1 Tes. 5:18, 19) Baka ni kitai ulih nunjukka diri nyukung gerempung Jehovah? Kitai ulih ngereja nya lebuh kitai nitihka iring ari litaricha kitai ti bepelasarka Bup Kudus, ari gempuru ninting minggu, gempuru besai, enggau konvensyen. Kitai mega ulih nunjukka diri nyukung gerempung Jehovah lebuh kitai enggau naka ulih bejalaika pengawa nginjil sereta ngajar.—1 Kor. 15:58.

18. Nama utai ke keran deka digaga nuan?

¹⁸ Aram meh kitai enggau bebendar nitihka utai ti dipelajar ari bup Adat Lewi. Kitai deka Jehovah nerima pemeri kitai. Arapka kitai nyembah Jehovah ketegal kitai beterima kasih ngagai Iya. Ketegal rinduka Jehovah enggau pengabis ati, anang ngetu meri utai ti pemadu badas ngagai Iya. Lalu enggau naka ulih meh nyukung gerempung ke diberekat Iya kemayaharitu. Enggau ngereja semua tu, kitai nunjukka diri beterima kasih ke peluang ulih nyadi Saksi Iya!