1-2. Ngatta interesadu nakuan i Cristiano ira ta maddaggun ta libru nga Levitico?

NIPERADDAM ni apostol Pablo ta mabbing nga kofunna nga si Timoteo nga “ngamin nga Katurakan ay ininspiran na Dios anna makabenefisio.” (2 Tim. 3:16, NW) Nelavu tatun i libru nga Levitico. Anni i pagimamma mu tatun nga libru na Biblia? Para ta karuan tadday yatun nga libru nga aru i dorobna nga ari ngana meyaplika ta kaggawattam, ngem ari tu kunnatun i pagimamma tatun na kurug ira nga Cristiano.

² Mga 3,500 nga ragun ngana nga netura i Levitico, ngem nipreserba yatun ni Jehova tapenu “matudduan ittam.” (Roma 15:4) Megafu ta ipasingan na Levitico i appana-panono ni Jehova, mawag gapa tu interesadu ittam nga gigiammuan yatun. Kakuruganna, aru nga leksion i magigiammu tam taw nga nainspiran nga libru. Ikonsidera tam i appa tatun.

3. Ngatta egga ira i sakrifisio nga metavvung ta zinagun nga Aggaw na Pangitavvung?

³ Ollu nga leksion: Mawag nga mala tam i fabor ni Jehova tapenu akseptanna i sakrifisio tam. Kada dagun ta Aggaw na Pangitavvung, maggarammammung i nasion na Israel anna mangitavvung i atannang nga pari tu aya-ayam. Makoffun danatun nga tavvung ta Israelita ira tapenu ipanono i pakawagan nga mapakarenuan nakuan ira ta liwa! Ngem nige nga iyangay na atannang nga pari tatun nga aggaw i maski anni nga daga nga sakrifisio ta Kuruga Masanto, egga paga i annunganna nga mas importante anne ta kapakoma na liwi-liwa na nasion.

4. Kagitta na nakagi ta Levitico 16:12, 13, anni i kuan na atannang nga pari ta ollu nga pattallunna ta Kuruga Masanto ta Aggaw na Pangitavvung? (Innan i letratu ta vungun.)

 ⁴ Bibbigan i Levitico 16:12, 13. Imajinammu i eksena ta Aggaw na Pangitavvung: Tullung i atannang nga pari ta tabernakulo. Yaw i ollu ta mamittallu nga pattallunna tatun nga aggaw ta Kuruga Masanto. Agga-tammina ta tadday nga limana i aggipayyan nga napannu tu mabangug nga insensu, tapus ta abbag nga limana tammina i vulawan nga aggipayyan nga napannu tu baggang. Magimmang yayya ta arubang na kurtina nga mangallag ta pattallungan na Kuruga Masanto. Gukaban na monag nga respeto, tullung yayya ta Kuruga Masanto anna tumaddag yayya ta arubang na kaban na pakkasinabban. Ta simboliko nga kebalinan, nakataddag yayya ta mismu nga arubang ni Jehova nga Dios! Sisinu nga ivuru na pari i masanto nga insensu ta baggang, yayya nga umangngag ta kuarto i mabanga-bangug nga agug. * Sonu kua, tullung mangana yayya ta Kuruga Masanto nga vulu-vuluna i daga na nesakrifisio ira nga ayam. Sifutan nga tuggianna labbi i insensu nige nga itavvunna i daga para ta pangitavvung ta liwi-liwa.

5. Anni i magigiammu tam ta pangusa tu insensu ta Aggaw na Pangitavvung?

⁵ Anni i magigiammu tam ta pangusa tu insensu ta Aggaw na Pangitavvung? Kagian na Biblia nga i mepangngo ira nga pakimallo na matalo ira nga maddayarayaw kani Jehova ay kagitta na insensu. (Sal. 141:2; Nep. 5:8) Nonopan nga egga monag nga respeto na atannang nga pari turi ta nitavvunna i insensu ta arubang ni Jehova. Kunnatun gapa, nu makimallo ittam kani Jehova, kuattam yatun nga egga monag nga respeto tam. Talaga mappabbaw ittam nisa. Talaga appresiattam i Namaratu ta uniberso megafu ta pinamavulunanna ittam nga makaranni nisa anna maddukko nisa, kagitta na ana ta yamana. (Sant. 4:8) Akseptanna ittam bilang kokkofunna! (Sal. 25:14) Appresiattam tu mapia yaw nga pribilehio yari tu ariattam ikaya nga mangngua tu maski anni nga makadismaya nisa.

6. Anni i magigiammu tam ta informasion nga tuggian mabbi na atannang nga pari i insensu nige nga itavvunna i sakrifisio ira?

⁶ Daddamman nga tuggian mabbi na atannang nga pari i insensu nige nga itavvunna i sakrifisio ira. Gukaban na panuggina ta insensu, nasiguraduna nga egga nisa i fabor na Dios. Anni i magigiammu tam tatun? Durante nga egga si Jesus ta davvun, egga kingnguana nga kuruga importante nigena nga itavvung i inangona bilang sakrifisio​—mas importante anne ta pangiyawa tu kapaliag na totolay. Anni yatun? Mawag nga mattalupaddian yayya nga matalo kani Jehova ta interu nga pattolena ta davvun tapenu akseptan ni Jehova i sakrifisiona. Nu kunnatun, pakurugan ni Jesus nga i panuttul ta estandarte ira ni Jehova i fustu nga dalan na pattolay. Nidefensa ni Jesus​—onu pinakurugna nga fustu anna patas—​i soberania onu i pammaguray na Yamana.

7. Ngatta makapagayayya ta Yama ni Jesus i interu nga pattolena?

⁷ Ta interu nga pattolay ni Jesus, perfekto nga pinarulona si Jehova. Maski nu naekspiriensana i tentasion anna pazziga-riga ira anna ammuna nga mataka-taki i kapatena, determinadu yayya nga pakurugan nga i pammaguray na Yamana i kakastan ta ngamin. (Fil. 2:8) Turi ta neparubang ta mariga nga situasion si Jesus, nakimemallo yayya ta “masikan nga ngaral anna aru nga lulua.” (Heb. 5:7) Nipasingan na sinsero nga pakimallona mga  matalo yayya kani Jehova anna nabbalin yayya nga mas determinadu nga mamarulo. Para kani Jehova, kagitta na mabanga-bangug nga insensu i pakimallo ira ni Jesus. Pinagayayya ni Jesus i Yamana ta interu nga pattolena anna nidefensana i soberaniana.

8. Kunnasi tam maparigan i pattolay ni Jesus?

⁸ Maparigattam si Jesus gukaban na pangngua tam ta ngamin nga mawayya tam tapenu mamarulo kani Jehova anna mammakatalo nisa. Nu meparubang ittam ta kapurueba ira, makimemallo ittam ta uffun ni Jehova megafu ta kayà tam nga mapagayayya yayya. Ta kunnatun, mepasingattam i suporta tam ta pammaguray ni Jehova. Ammu tam nga ari akseptan ni Jehova i pakimallo tam nu egga kukukuattam nga ikalussona. Ngem nu mattolay ittam segun ta estandarte ni Jehova, makapakkomfiansa ittam nga kagitta na mabanga-bangug nga insensu i napafutuan nga pakimallo tam kani Jehova. Anna masiguradu tam nga magayayya i nelangitan nga Yama tam ta integridad anna kinamatalo tam.​—Prov. 27:11.

9. Ngatta metavvung i sakrifisio ta pakipammapia?

⁹ Mekadua nga leksion: Masserbi ittam kani Jehova megafu ta pappabalo tam nisa. Tapenu mantindiattam yaw, ikonsidera tam i sakrifisio ta pakipammapia, tadday nga importante nga aspeto na fustu nga paddayaw na Israel gari. * Ta libru nga Levitico, magigiammu tam nga mawayya na tadday nga Israelita i mangitavvung tu sakrifisio ta pakipammapia “bilang pangipasingan tu pappabalo.” (Lev. 7:11-13, 16-18) Mangitavvung yayya, ari tu megafu ta obligasionna, nu ari, megafu ta  kayàna nga kuan yatun. Boluntariu gafu yaw nga passakrifisio na tolay megafu ta iddeddukanna i Diosna nga si Jehova. Makkaravulu nga kuman tu karne na nesakrifisio nga ayam i tolay nga mangiyawa tu sakrifisio, i familiana, anna i papari. Ngem egga ira i parte na nesakrifisio nga ayam nga eksklusibo nga metavvung kani Jehova. Anni danatun nga parte?

10. Kunnasi nga megitta ta sakrifisio ta pakipammapia nga nadeskriba ta Levitico 3:6, 12, 14-16 i serbisiu ni Jesus kani Jehova?

¹⁰ Mekatallu nga leksion: Megafu ta aya, iyawa tam kani Jehova i kapianattam. Imammatan ni Jehova i taba bilang i kapianan nga parte na tadday nga ayam. Espesipiko gapa nga nibilinna nga i batu ira anna i agal ay kuruga espesial i balorna. (Bibbigan i Levitico 3:6, 12, 14-16.) Yayya nga kuruga magayayya si Jehova nu boluntariu nga itavvung na tadday nga Israelita danatun nga parte kunne na gapa i tabana. Nipasingan natun nga Israelita nga nangitavvung, i monag nga pakkaragana nga iyawa i kapianan ta Dios. Kunnatun gapa i kingngua ni Jesus turi ta sigga-paran nga nisakrifisiona i kapiananna kani Jehova gukaban na interu-kararua nga passerbi megafu ta ayana Nisa. (Juan 14:31) Para kani Jesus, magayayya yayya nga kuan i uray na Dios; monag i pangayana ta dob na Dios. (Sal. 40:8) Kurug tu fermi nga nagayayya si Jehova nga makasingan kani Jesus nga sigga-paran nga masserbi nisa!

11. Kunnasi nga megitta i serbisiu tam kani Jehova ta sakrifisio ira ta pakipammapia, anna ngatta makapabannay yatun nittam?

¹¹ I serbisiu tam kani Jehova ay megitta tatun ira nga sakrifisio ta pakipammapia megafu ta kuruga ayatattam yayya. Iyawa tam kani Jehova i kapianattam megafu ta interu-futu nga pangaya tam nisa. Talaga magayayya si Jehova nga makasingan ta minillion nga sigga-paran nga maddayaw nisa megafu ta monag nga pangayada nisa anna ta dala-dalanna! Mabanna-bannayan ittam ta pakannammu nga masingi-singan anna tagibaloran ni Jehova ari laman i kukukuattam, nu ari, maski i motibo tam ira. Angngariganna, nu tadday ka nga lakay onu bako nga ariammu ngana makua i kayà mu nakuan nga kuan, makasiguradu ka nga malippawa ni Jehova i limitasiommu ira. Baka matageno mu nga baddi laman i mesakrifisiom, ngem masingi-singan ni Jehova i aya nga egga ta kononaggammu nga mamaguyu nikaw nga kuan nu anni i mawayyam. Magayayya yayya nga alawatan i kapianan nga meyawa mu.

12. Anni i matageno ni Jehova ta sakrifisio ira ta pakipammapia, anna ngatta makapagaram nittam yatun?

¹² Anni i magigiammu tam ta sakrifisio ira ta pakipammapia? Durante nga matuggi i kapianan ira nga parte na ayam, mappa-utung i atu natun anna mapagayayya si Jehova. Masiguradum gafu nga magayayya si Jehova ta sigga-paran anna interu-kararua nga serbisium. (Col. 3:23) Nonopan i ayayyana nikaw. Maski nu baddi onu dakal i makuam nga passerbi kani Jehova, tagibaloranna yatun anna mannanayun nga egga ta nonona.​—Mat. 6:20; Heb. 6:10.

13. Segun ta Levitico 9:23, 24, kunnasi nga ipasingan ni Jehova nga faboranna i natunno nga papari?

¹³ Meka-appa nga leksion: Bebbendisionan ni Jehova i neravvunan nga parte na organisasionna. Ikonsidera i nesimmu ta 1512 B.C.E. turi ta nepataddag i tabernakulo ta gukag na Vukig Sinai. (Ex. 40:17) Si Moises i nangirollu ta seremonia na panunno kani Aaron anna ta ánana nga lallaki bilang papari. Naggarammammung i nasion na Israel tapenu memammatan i pangipresenta na papari  ta ollu ira nga aya-ayam nga itavvudda. (Lev. 9:1-5) Kunnasi nga ipasingan ni Jehova nga faboranna i bagu nga natunno ira nga papari? Durante nga bendisionan ni Aaron anni Moises i magili, nappakazza si Jehova tu afi maggafu ta langi tapenu interamente nga tuggian i ngamin nga navuna ta sakrifisio ta altar.​—Bibbigan i Levitico 9:23, 24.

14. Ngatta importante para nittam ta maddaggun i pangapruba ni Jehova ta papari nga naggafu ta ginaka ni Aaron?

¹⁴ Anni i ipasingan na afi nga naggafu ta langi? Ipasingan natun nga apruban anna suportan ni Jehova si Aaron tuange ta ánana bilang pinilina nga papari. Turi ta nemammatan na Israelita ira yaw nga manawag nga suporta ni Jehova ta papari, nalippawada nga mawag gapa nga suportadda i papari. Importante kari gapa nittam yatun? Wan! Megafu ta irepresenta natun nga kinapari ta Israel i mas makasta nga kinapari. Si Jesus i mas makasta nga Atannang nga Pari, anna egga i 144,000 nga papari anna patul nga makipasserbi nisa ta langi.​—Heb. 4:14; 8:3-5; 10:1.

15-16. Kunnasi nga ipasa-pasingan ni Jehova i faborna ta “matalo anna memmugug nga aripan”?

¹⁵ Tagga ta 1919, sinunno ni Jesus i tadday nga baddi nga grupo na nazelugan ira nga brother bilang i “matalo anna memmugug nga aripan.” Yatun nga aripan i mangirollu ta trabahu nga pallayyagayya anna mangiyawa ta disipulos ni Cristo tu “makan ta mepangngo nga tiempo.” (Mat. 24:45, NW) Masingi-singattam kari i manawag nga ebidensia na fabor na Dios ta matalo anna memmugug nga aripan?

¹⁶ Puru-purueban nga pagimmangan ni Satanas anna na taga-suportana ira i trabahu na matalo nga aripan. Nu awan tu uffun ni Jehova ta matalo nga aripan, imposible nga metuppal yaw nga trabahu. Nappasa ngana i  World War I, World War II, krisis ira ta ekonomia ta interu mundo anna ari patas i katratu anna napeppersigi i totolay na Dios, ngem tulu-tuloy lagapa nga nangiyawa tu espiritual nga makan i matalo anna memmugug nga aripan ta disipulos ni Cristo ta davvun. Nonopan i karu na espiritual nga makan sangawe nga mala ta maturu 900 nga lengguahe, tapus libre danatun! Manawag nga ebidensia danatun nga suportadu na Dios i aripan. I trabahu nga pallayyagayya ay tadday paga nga pamakurug na bendision ni Jehova. Kurug nga melayyagayya ngana i mapia nga dumug ta “ta tanga-ravvunan.” (Mat. 24:14) Awan tu duda nga igiggiya anna bebbendisionan ni Jehova i organisasionna ta davvun ta maddaggun.

17. Kunnasi tam mepasingan i suporta tam ta organisasion nga usu-usan ni Jehova?

¹⁷ Makasta nu iyavu tam ta baggi tam, ‘Mappabalo ngà kari nga parte ngà na neravvunan nga organisasion ni Jehova?’ Niddan ittam ni Jehova tu makakumbinsi nga ebidensia kagitta nuri na literal nga afi nga naggafu ta langi ta kaggawan da Moises anni Aaron. Aru talaga i rasottam nga mappabalo. (1 Tes. 5:18, 19) Kunnasi tam mepasingan i passuporta tam ta organisasion nga usu-usan ni Jehova? Gukaban na panuttul ta nebase-Biblia nga direksion nga meyawa nittam ta publikasion anna ta study tam ira, asembli, anna kombension. Fuera paga tatun, mepasingattam i suporta tam nu kuattam i adde na mawayya tam ta trabahu nga pallayyagayya anna panuddu.​—1 Cor. 15:58.

18. Anni i determinasiommu?

¹⁸ Determinadu tam nakuan nga iyaplika i leksion ira nga nagigiammu tam ta libru nga Levitico. Kayà tam nga alawatan ni Jehova i sakrifisio tam ira. Passerbiattam si Jehova megafu ta mappabalo ittam nisa. Paray nakuan tu tulu-tuloy nga iyawa tam i kapianattam kani Jehova megafu ta ayatattam yayya ta interu-futu tam. Anna interu-futu nakuan nga suportattam i organisasion nga usu-usanna ta maddaggun. Nu kuattam danatun, mepasingattam kani Jehova nga tagibalorattam i pribilehio nga passerbian yayya bilang Saksina ira!