1-2. Ịyẹ tị́ du ká angịnyị nya ịKịrayịsị baba nyọka jẹ́ ang bwu ụpwụ nya Ala iLivayị?

ỊPỌLỤ ọngọmyẹrụ kpa iTimoti oligu nyamwụ itiya nyori, “Ohe Oluhye a kpa angịnyị ehe bwula Olegu Ịgọgọ nyamwụ da ẹla myị́ ẹla ọlẹpwụ nya Ụpwụ Ịgọgọ lẹ. Ụpwụ Ịgọgọ ọọwa ju apyobwuna.” (2 Tim. 3:16) Ụpwụ nya Ala iLivayị juwa ẹ-ẹpwụ nyamwụ ịnyịnyị. Ányị a tịị yẹ ụpwụ ọwẹ? Angịhyẹ kaa yọọ lala ụpwụ ọlẹ kọ ju ehile lụmẹ-lụmẹ ẹ-ẹpwụ kị tị ju apyobwuna hahị alẹ kaka, ma angịnyị nya ịKịrayịsị á tị kaa yọọ ịnyị ka.

² Ị da ụpwụ nya Ala iLivayị ọwẹ lala ẹka ụnọ ịta, da ohu ịrụ (3,500) kam kẹkpẹ lẹ, iJihova tị họ chịkpẹẹ kpụ̀ o juwa gbee daalẹ ‘chajị kọ ka mẹ ẹla jẹ́ẹhị.’ (Rom. 15:4) Ọ baba kahị ka jẹ́ ang bwu ụpwụ nya Ala iLivayị chajị ọ dahị ụbwọ nyọka jẹ́ jaabwọ ká iJihova kụ irya u-uhye nya ang ịhyẹ bala abwọlẹ kọ yaa. Ang lụmẹ-lụmẹ ji ịnyịlẹhị kahị ka jẹ́ bwu ụpwụ ọwẹ ká Ohe Oluhye kpa Olegu Ịgọgọ nyamwụ da angịnyị ụbwọ nyọka da wẹ. Ahị kụ ẹhị yẹ ine wẹẹ.

3. Ịyẹ tị́ du kị kaa kiliya la Ahyẹẹnụ Ọbịlẹ Ọhịnyọhi nya ẹka ọnyị myị́ ọnyị?

³ Ẹla ọjẹ́jẹ ọhọhẹ: Ẹla nyahị ka há iJihova ene kọ ka ye iya ọkịlaakịla nyahị myị. La Ahyẹẹnụ Ọbịlẹ Ọhịnyọhi nya ẹka ọnyị myị́ ọnyị, alẹpwụma nya Isirẹlụ wuu kaa tụguru bala o-ya iyo kiliya. Iya ọkịlaakịla ọwẹ kaa kpaa ịtịya nyori, ọ baba kị ka hwáa cheri-cheri bwu ẹpwụ nya ọhọbịrị! Ẹla ọhẹ tị ji ká olegbeju okiliya kaa họ ene kọ ka kpa ịwọ nya iya ọkịlaakịla ọlẹlẹhẹ ka ẹpwụ nya Ẹga Ọlịgọgọ Ọgụgụ wuu. Ẹla ọọwa tị dọmwụ baba gụ ọhọbịrị ọhịnyọhi nya alẹpwụma wẹẹ.

4. Ẹlịyẹ ụpwụ nya Ala iLivayị 16:12, 13 à tị́ ya ká olegbeju okiliya kaa họ, ụka ọhọhẹ ọlẹ kọ ka Ẹga Ọlịgọgọ Ọgụgụ wuu la Ahyẹẹnụ Ọbịlẹ Ọhịnyọhi? (Yẹ ifoto ọla ẹbẹ nya ọgbanyẹ.)

 ⁴ Wa Ala iLivayị 16:12, 13. Kụ irya nya ang ọlẹ kọ kaa họ la Ahyẹẹnụ Ọbịlẹ Ọhịnyọhi wẹẹ: Olegbeju okiliya kaa ju ka ẹpwụ nya ọdụ nya Ohe Oluhye. Ụka ọhọhẹ ẹ-ẹpwụ nya ụka ịta ịlẹ kọ kaa ka ẹpwụ nya Ẹga Ọlịgọgọ Ọgụgụ wuu la ahyẹẹnụ ọwẹ à wẹ lẹ. Ọ kaa kpa ẹja nya ịtangare ọ-chị oru kwọkwọ ụ-ụbwọ ọhẹ bala ọ-kpa ang o-chu ila ọlẹ kị họ la okpoko ịgọm la awụrụ-ila myọọ, ụ-ụbwọ ọkịla. Ọ kaa chị godayị pyịnyẹng ụka kọ pwụ ẹga nya apwụ olẹ kị ya ke Ẹga Ọlịgọgọ Ọgụgụ wuu. Ọọwa lẹ, ọ kaa ju ka ẹpwụ nyamwụ la ihi ọtụka-ọtụka kaka godayị ị-ịlahị nya akpa nya iro lẹlẹ. Ọ lala o-ri, ọ godayị rịrị i-ijata nya iJihova lịlọmwụ kpangga! Lẹẹlẹẹ wẹẹ, ọngọkịla ka dọmwụ nyọka ya ịtangare ọlịgọgọ ọwẹ hu awụrụ-ila u-uhye dụmwọ-dụmwọ, lẹ oru ọnyịịla-ọnyịịla nyamwụ a kaa yịrị ube ọọwa yịrị wuu lẹlẹ. * Ọ kaa tịrẹkpẹ myịmyị ka Ẹga Ọlịgọgọ Ọgụgụ ọwẹ la ịwọ nya iya ọkịlaakịla nya ọhọbịrị. Kpịtịya nyori, ọ kaa ya ịtangare ju ila kpá, ene kọ ka hu ịwọ nya iya ọkịlaakịla nya ọhọbịrị ha.

5. Ẹlịyẹ ahị tị́ ka jẹ́ bwu ang ọlẹ kị kaa kpa ịtangare họ la Ahyẹẹnụ Ọbịlẹ Ọhịnyọhi?

⁵ Ẹlịyẹ ahị tị́ ka jẹ́ bwu ang ọlẹ kị kaa kpa ịtangare họ la Ahyẹẹnụ Ọbịlẹ Ọhịnyọhi? ỊBayịbụụ họ kahị jẹ́ nyori, abwọ ọrịrị nya anchẹ nya iJihova ịlẹ kọ kaa ye myị, nyị lala iya ọkịlaakịla nya ịtangare. (Eje. 141:2; Ọwụ. 5:8) Kpịtịya nyori, olegbeju okiliya kaa kpa ịtangare ọwẹ ka ijata nya iJihova la ihi ọtụka-ọtụka. Ịnyịnyị ụka kahị juwa raabwọ ha iJihova, ọ baba kahị ka mẹ ihi okpori-kpori jẹ. Ọ myịhị lẹhị yẹẹyẹẹ nyọlẹ ká Ọngọ họ ang myị́ ang wuu, ya iwe hahị nyọka ka ẹga nyamwụ bala ọ-tụ́ jwoo chwẹẹ jaabwọ ká ọnyị bala adịda la. (Jem. 4:8) O yehi myị nyọka ri aligu nyamwụ! (Eje. 25:14) Iwe ọwẹ myịhị lẹhị lụmẹ, lẹ áhị ka họ ịngịngịhyẹ ọlẹ kọ ka kpọọ ọkịlẹtụ enyi ẹnẹnẹhẹ ka.

6. Ẹlịyẹ ahị tị́ ka jẹ́ u-uhye nya iJisọsị bwu abwọlẹ ká olegbeju okiliya kaa ya ịtangare ju ila ene kọ ka hu iya ọkịlaakịla ha?

⁶ Kpịtịya nyori, olegbeju okiliya kaa ya ịtangare ju ila ene kọ ka hu iya ọkịlaakịla ha. Ọ họ ịnyị ya ahị ọdahile họọ nyori ẹla nyamwụ ka há iJihova ụka nya iya ọkịlaakịla. Ẹlịyẹ ahị tị́ ka jẹ́ bwu ẹla ọwẹ? Ụka ọlẹ ká iJisọsị jam odehe, ọ họ ẹla ọkpọngchị ọhẹ ọlẹ kọ baba gụ ọ-ka họ ká angịnyị ehe ka dọmwụ la ọchịda wẹẹ, ene kọọ yẹ ọhịhị nyamwụ kiliya. Ẹla oyina tị́? Ọ kpịlọmwụ keji ju ihi nya iJihova bala o-godayị giri-giri họọ ẹ-ẹpwụ nya ọhịhị nyamwụ wuu chajị ká iJihova ka ye iya ọkịlaakịla nyamwụ myị. Bwula ọ-họ ịnyị, iJisọsị mẹjẹ nyori ọ họ ẹla nya iJihova à ri ụgbẹyị nya ọhịhị ọlẹ kọ há gụgụ wuu lẹ. Ọ myịmyị mẹjẹ nyori Adamwụ à chịla bala ọ-la kpakpa nyọka kpeji lẹ.

7. Ịyẹ tị́ du ká ọhịhị nya iJisọsị olodehe ọlẹ wuu kpụ adamwụ ịpyọ?

⁷ Ụka ọlẹ ká iJisọsị jam odehe, ọ kaa ju ihi nya ehile nya iJihova kpẹẹkpẹẹ. Nanana nyori iJisọsị yẹ akama, la ịmayẹ ịdatị-ịdatị bala ọ-jẹ́ nyori ọ juwa ka gbu igu onyuujujwo, ọ cheje la ọngịrị-ọngịrị nyọka mẹjẹ nyori eji ọkpakpa nya Adamwụ à ri ọlẹ kọ há gụgụ wuu lẹ. (Filip. 2:8) Ụka ọlẹ ká ịmayẹ chọọ ọgụ, iJisọsị raabwọ “la egbejida ẹ-ẹhị lomyi o-gboo.” (Hib. 5:7) Abwọ ọrịrị bwu ọkịlẹtụ nyamwụ ọwẹ mẹjẹ nyori o godayị giri-giri ha iJihova. Ọọwa myịmyị jwoo ọngịrị nyọka kịnyaa juwa ju ihi nya Ohe Oluhye. Abwọ ọrịrị nya iJisọsị lala oru o-nyi kwọkwọ nya ịtangare ẹ-ẹga nya iJihova. Ọhịhị nya iJisọsị  wuu kpụ adamwụ ịpyọ lụmẹ. Ọ chihi ju eji ọkpakpa nya iJihova.

8. Ányị ahị tị́ ka bwu ba ọgụ-ẹpẹtẹ nya iJisọsị jẹ?

⁸ Ahị ka ba ọgụ-ẹpẹtẹ nya iJisọsị jẹ bwula ọ-maga nyịlẹhị-ịlẹhị nyọka ju ihi nya ehile nya iJihova bala o-godayị giri-giri họọ. Ụka ká ịmayẹ á chịhị ọgụ, ahị ka raabwọ yẹẹyẹẹ bwu ọkịlẹtụ nyahị bịlẹ ụbwọ ọdada nya iJihova chajị ahị tịtọ nyọka họ ẹla ọlẹ kọ ka kpọọ ịpyọ. Bwula ọ-họ ịnyị, ahị mẹjẹ nyori ahị chẹkpẹ ju eji ọkpakpa nya iJihova. Ahị myịmyị jẹ́ nyori iJihova á ka myị-ị̀ ke ụrụ wo abwọ ọrịrị nyahị ka, kori kahị juwa họ ang ịlẹ kị wọ́ọ ẹjẹ. Ma kori kahị tị juwa họ ang ịlẹ kị họ́ọ, ahị la ahị ọdahile nyori abwọ ọrịrị nyahị ka lala ịtangare ọ-chị oru kwọkwọ ẹ-ẹga nya iJihova. Ahị jẹ́ myị̀myị̀ nyori o-godayị giri-giri bala ihi ojuju kpori-kpori nyahị, kpụ Adahị olepwoohe ịpyọ lụmẹ.—Etu 27:11.

9. Ịyẹ tị́ du ká ala Isirẹlụ kaa kiliya nya okpunyi?

⁹ Ẹla ọjẹ́jẹ oheeye: Ahị gbịgba ha iJihova chajị ẹla ọlẹ kọ họ hahị myịhị lẹhị. Ahị ka jẹ́ ang u-uhye nya ẹla ọwẹ yẹẹyẹẹ bwula ọ-kụ ẹhị yẹ iya nya ọhọlawụlẹ lee iya ọkịlaakịla nya okpunyi ọlẹ ká ala Isirẹlụ kaa họ. * Ụpwụ nya Ala iLivayị họ kahị jẹ́ nyori, ala Isirẹlụ ọhẹ nyị ka kiliya ọwẹ “nya ọ-ji [iJihova] obe” myị́. (Liv. 7:11-13, 16-18) Ọ́ kaa kiliya ọọwa chajị o ri opyii kọ ka họ ịnyị ka, ma ọ kaa họọ bwu irya nyamwụ ịnyị. Lẹ, iya ọkịlaakịla ọwẹ ri ang ọlẹ ká ọngịnyị kaa họ bwu ọkịlẹtụ chajị ọ la ọháha ha iJihova Ohe Oluhye nyamwụ. Ọngọlẹ kọ wẹẹ hu iya ọkịlaakịla ọwẹ ha, alugbiyegu nyamwụ bala ọngọkiliya  kaa ri iyo ịlẹ kị kpa kiliya ọọwa. Ẹ̀ga ịhyẹ tị juwa ịlẹ kị ri ịnya iJihova kem. Ẹ̀ga iyina tị́?

10. Ụgbẹyị oyina ịgba ọgbagba nya iJisọsị ha iJihova bala ẹla ọlụpwụ nya Ala iLivayị 3: 14-16 à tị́ bwu gu awụlẹ?

¹⁰ Ẹla Ọjẹ́jẹ ọhata: Ahị kaa kpa ọngịrị nyahị wuu họ ụkụrwọ ha iJihova chajị nya ọháha. IJihova yẹ eyo nya iyo lala ẹ̀ga ọlẹ kọ há gụgụ wuu. Ọ myịmyị ya nyori, ẹ̀ga ịkịla lala egbachị nyị ju apyobwuna yẹẹyẹẹ. (Wa Ala iLivayị 3:6, 12, 14-16.) Lẹ, ọ kaa kpụ iJihova ịpyọ lụmẹ ụka ká ọngọ la Isirẹlụ ọhẹ à hu ẹ̀ga i-ju apyobwuna ịlịịwẹ bala eyo nya iyo họọ bwu ọkịlẹtụ. Ọngọ la Isirẹlụ ọlẹ kọ họ ịnyị, mẹjẹ nyori ọ tịtọ nyọka hu ang ọlẹ kọ há gụgụ wuu ha Ohe Oluhye. Ụ-ụgbẹyị ọlịwịịwẹ, iJisọsị gbịgba ha iJihova bwu ọkịlẹtụ bwula ọ-họ ụkụrwọ họọ la ọngịrị nyamwụ wuu ọọlajị nya ọháha ọlẹ kọ la ẹ-ẹga nya iJihova. (Jọn. 14:31) Ọ kaa kpụ iJisọsị ịpyọ nyọka họ irya nya Ohe Oluhye. Ọ la ọháha okpori-kpori ẹ-ẹga nya ehile nyamwụ. (Eje. 40:8) IJihova chị ọkẹkẹnị ọtụka-ọtụka nyọlẹ kọ yẹ jaabwọ ká iJisọsị wẹẹ gbịgba họọ bwu ọkịlẹtụ!

11. Ụgbẹyị oyina ịgba ọgbagba nyahị à tị́ bwu lala iya ọkịlaakịla nya okpunyi? Ányị ọọwa à tị́ bwu ri ẹjẹ ọkpụ́kpụ́ hahị?

¹¹ Ịgba ọgbagba nyahị ha iJihova lala iya ọkịlaakịla nya okpunyi chajị o ri ụgbẹyị ọhẹ ọlẹ kahị kaa bwu mẹjẹ jaabwọ ká iJihova háahị kaka ba. Ahị kaa họ ụkụrwọ nya iJihova la ọngịrị nyahị wuu chajị ọ háahị bwu ẹpwụ nya ọkịlẹtụ nyahị wuu. Ọ kaa kpụ iJihova ịpyọ yẹẹyẹẹ ụka kọ yẹ jaabwọ ká uku nya angịnyị lụmẹ-lụmẹ wẹẹ gbịgba họọ bwu ọkịlẹtụ nyaa wuu ọọlajị nya ọháha ọlẹ kị la họọ bala ehile nyamwụ! O ri ẹjẹ ọkpụ́kpụ́ hahị yẹẹyẹẹ nyori iJihova yẹ ang ọlẹ kahị kaa họ họọ wuu bala ọ-jẹ́ irya ọlẹ kahị kaa kpa họọ. Ọ tị kaa myọọ lẹhị ịnyịnyị. Lala ọ-chụ pwokwita, kori ká ri ọngọgbahị ka tị kaa jụ́ ụkụrwọ họ jaabwọ á kaa họ ene-ene kaka, jẹ́ myịmyị nyori iJihova jẹ́ jaabwọ ká iwe-ahụrụ nyang la. Ọhẹka, ọ ka lang lala o-ri à ka jẹ́-ẹ họ ụkụrwọ ha iJihova lụmẹ kaka, ma Ọ yẹ ọháha ọlẹpwụ nya ọkịlẹtụ nyang ọlẹ kọ gung gbịla nyọka họ ang ọlẹ à ka jụ́ họ myị́. Ọ kpọọ ịpyọ nyọka ye ang ọlẹ ká wẹẹ họ la ọngịrị nyang wuu myị.

12. Ányị iya ọkịlaakịla nya okpunyi à tịị la iJihova? Ányị ọọwa à tị́ bwu juhi ọhụ?

¹² Ẹlịyẹ ahị tị́ ka jẹ́ bwu iya ọkịlaakịla nya okpunyi? Ụka ká ẹ̀ga i-ju apyobwuna nya iyo á juwa ru ila, ịmwụ nyamwụ ka juwa rụ dụmwọ-dụmwọ ka uhye-ọgba. Ọọwa kaa kpụ iJihova ịpyọ. Lẹ, la ahị ọdahile nyori ẹla nyang kaa kpụ iJihova ịpyọ ịnyịnyị, ụka ka họ ụkụrwọ họọ la ọkịlẹtụ bala ọngịrị nyang wuu. (Kol. 3:23) Kụ irya jaabwọ ká ẹla nyang ka kpọọ ịpyọ kaka ba. Ang myị́ ang ọlẹ ká jụ́ họ ha iJihova myọọ lẹhị yẹẹyẹẹ, ọ tị ka kpịtịya nyamwụ gboyi myị́ oyi. —Mat. 6:20; Hib. 6:10.

13. Jaabwọ ká ụpwụ nya Ala iLivayị 9:23, 24 ya, ányị iJihova à tị́ mẹjẹ nyori ọ ye angịkiliya inyeewe ịwẹ myị?

¹³ Ẹla Ọjẹ́jẹ ohene: IJihova wẹẹ wahị kụrụ ogu nyamwụ olodehe ọlẹ. Kụ irya nya ẹla ọlẹ kọ họ ẹka ụnọ ookpokpo da ohu ịrụ, da iwo kụrụ imiiye ene nya ọmama nya ịKịrayịsị (1512 B.C.E.) wẹẹ. Ẹka ọọwa ị ya ọdụ ọlịgọgọ nya Ohe Oluhye yeji ọ-ọmwụ nya ọgbọdọ nya ịSayịnayị lẹ. (Ehe. 40:17) IMosisi kpịlahị ọ-ọhụhụ ọhẹ ọlẹ kị họ nyọka hu Erọn bala anyị nyamwụ nya angịkiliya. Alẹpwụma nya Isirẹlụ tụguru nyọka yẹ ụka ká angịkiliya ka ya iyo kiliya lụka ọhọhẹ. (Liv. 9:1-5) Ányị iJihova à tị́ mẹjẹ nyori ọ ye angịkiliya inyeewe ịwẹ myị? Jaabwọ ká Erọn bala iMosisi wẹẹ wahị kụrụ iru nya angịnyị ịịwa, iJihova du ila bwu epwoohe kaka rụ iya ihihi iluhye nya ogidi.—Wa Ala iLivayị 9:23, 24.

14. Angịkiliya i-bwu ugbiyegu nya Erọn tị́ ku ọmwakpa nya owo anyị alẹ?

 ¹⁴ Ẹlịyẹ ila o-bwu epwoohe ọwẹ à tị́ mẹjẹ? Bwula ọọwa, iJihova mẹjẹ nyori ọ ji ẹkpẹ nya Erọn bala anyị nyamwụ ịlẹ kọ chụ nyọka ri angịkiliya. Nyọlẹ ká ala Isirẹlụ yẹ gbagbịla nyori iJihova ji ẹkpẹ nya angịkiliya inyeewe ịwẹ, ị wẹ ka jẹ́ nyori ị baba nyọka chẹkpẹ jwaa ịnyịnyị. Ányị ẹlẹwẹ à tị́ baba hahị alẹ? Angịkiliya ịlẹpwụma nya Isirẹlụ ku ọmwakpa nya angịkiliya ịkịla ịlẹ kị há bala ọ-baba gụ ịlụka onyogo. ỊKịrayịsị à ri Olegbeju Okiliya ọlẹ kọ gụ lẹ. Angịkiliya bala ịdịrịhụ angị ụnọ ohu, da ụnọ iwo ine kụrụ ine, ka họ ụkụrwọ bala iJisọsị e-epwoohe.—Hib. 4:14; 8:3-5; 10:1.

15-16. Ányị iJihova à tị́ bwu mẹjẹ nyori o ji ẹkpẹ nya “ọnchẹ ọ-chịla o-hu ọkịlẹtụ ha bala ọngọ jẹ́ ẹla”?

¹⁵ La 1919, iJisọsị chụ ebwo ochiche ọhẹ bwu ẹpwụ nya angịlẹ ká iJihova ya ida wụ́, nyọka ri “ọnchẹ ọ-chịla o-hu ọkịlẹtụ ha bala ọngọ jẹ́ ẹla.” Ọnchẹ ọọwa kaa kpịlahị ẹ-ẹpwụ nya ụkụrwọ nya ẹrụ ọnyịịla ọ-kpa pyẹ bala o-ya ‘ang oriri ha angịjụgbẹyị nya iJisọsị ri lụka ọchịla-chịla.’ (Mat. 24:45) Ahị yẹ ang ẹjẹẹ gede-gede nyori, iJihova ye ọnchẹ ọ-chịla o-hu ọkịlẹtụ ha bala ọngọ jẹ́ ẹla ọwẹ myị?

¹⁶ Olegu Onyobyi bala alakpa nyamwụ kaa maga nyịlẹhị-ịlẹhị nyọka hu ọnchẹ ọwẹ abwọ hi ụkụrwọ ọlẹ ká Ohe Oluhye ya họọ. Ma, bwula ụbwọ ọdada nya iJihova à du ká ụkụrwọ ọọwa chịkpẹẹ myị́ lẹ. Ị dẹwụ nya ẹpwụma nya odehe wuu lala ụka imiiye lẹ, okpoko á myịmyị ji nwà ka. Ị kaa họ anchẹ nya iJihova ẹla ọkịrọrọ bala ọ-taa pyịpyị ịnyịnyị. Ọnchẹ ọ-chịla o-hu ọkịlẹtụ ha bala ọngọ jẹ́ ẹla tị kịnyaa juwa ya ang oriri nya olegu ha angịjụgbẹyị nya ịKịrayịsị odehe ọlẹ  wuu, ẹ-ẹpwụ nya akama ịlịịwẹ. Kụ irya nya ang nya olegu ịlẹ kị kaa ya hahị wuu wẹẹ. Ị ji la òja ịdatị-ịdatị gụ ohu ihikichu, áhị tị kaa nwụ uri nyaa ka. Ọwẹ mẹjẹ nyori iJihova ji ẹkpẹ nya ọnchẹ ọwẹ ịnyịlẹhị. Ụkụrwọ nya ẹrụ ọnyịịla ọ-kpa pyẹ ri ang ẹjẹẹ ọkịla ọlẹ kọ mẹjẹ nyori iJihova wẹẹ wahị kụraa ịnyịnyị. Ị jam kpa ẹrụ ọnyịịla ọlẹ pyẹ “ẹ-ẹga myị́ ẹga nya odehe ọlẹ wuu” ịnyịlẹhị. (Mat. 24:14) Ọ la gbagbịla nyori, iJihova wẹẹ wahị kụrụ ogu nyamwụ bala ọ-kpọọ ụgbẹyị alẹ ịnyịnyị.

17. Ányị ahị tị́ ka bwu mẹjẹ nyori ahị wẹẹ chẹkpẹ ju ogu nya iJihova?

¹⁷ Ọ baba kahị ka tịlọhị wo nyori, ‘Ọ myịm lẹhị nyọka ji ẹpwụ nya ogu nya iJihova olodehe ọlẹ alẹ?’ IJihova ya ang ẹjẹẹ mẹjẹ́ẹhị gede-gede lala ila ọlẹ kọ kaa bwu epwoohe hireji lụka nya iMosisi bala Eron. Ahị lang lụmẹ-lụmẹ ịlẹ kahị ka joo obe chajị nyaa. (1 Tes. 5:18) Ányị ahị tị́ bwu chẹkpẹ ju ogu nya iJihova alẹ? Ahị ka họ ịnyị bwula ọ-kpa ẹla ọlẹ kị kaa mẹjẹ́ẹhị bwu ịBayịbụụ ọọjịra-jịra nya epwihi-epwihi bala ọjịra-jịra ịtụka họ ụkụrwọ. Ahị ka myịmyị họ ịnyị bwula ọ-kpa ẹrụ ọnyịịla pyẹ la ila ọchịchị. .—1 Kọr. 15:58.

18. Ẹlịyẹ a tị́ cheje nyọka họ?

¹⁸ Ahị cheje bwu ọkịlẹtụ nyahị nyọka kpa ẹla ọlẹ kahị jẹ́ bwu ụpwụ nya Ala iLivayị họ ụkụrwọ. Ahị maga ká iJihova ka ye iya ọkịlaakịla nyahị myị. Ahị gbịgba ha iJihova chajị nyori ang ọlẹ kọ họ hahị myịhị lẹhị. Ahị kịnyaa juwa họ ụkụrwọ ha iJihova la ọngịrị nyahị wuu chajị ọ háahị bwu ọkịlẹtụ. Ahị myịmyị kịnyaa juwa chẹkpẹ ju ogu ọlẹ ká iJihova wẹẹ kpa họ ụkụrwọ alẹ. Bwula ọ-họ ang ịwẹ wuu, ahị ka mẹjẹ iJihova nyori iwe ọlẹ kọ ya hahị nyọka ri Alibeenu nyamwụ myịhị lẹhị yẹẹyẹẹ!