1-2. Apay nga interesado koma dagiti Kristiano iti libro a Levitico?

IMPALAGIP ni apostol Pablo iti agtutubo a gayyemna a ni Timoteo nga “inwanwan ti Dios ti pannakaisurat ti intero a Kasuratan ken makagunggona dayta.” (2 Tim. 3:16) Karaman iti dayta ti libro a Levitico. Ania ti panangmatmatmo iti dayta a libro ti Biblia? Ibilang dayta ti dadduma kas libro a naglaon iti listaan dagiti paglintegan a saanen nga agaplikar iti kaaldawantayo, ngem naiduma ti panangmatmat dagiti pudno a Kristiano.

² Naisurat ti Levitico agarup 3,500 a tawenen ti napalabas, ngem impaisurat dayta ni Jehova a “pakasursuruantayo.” (Roma 15:4) Interesadotayo koma a mangusig iti Levitico ta ipakitana ti kapanunotan ni Jehova. Kinapudnona, adu ti maadaltayo iti dayta a libro. Pagsasaritaantayo ti uppat kadagita.

3. Apay nga adda panagdaton iti tinawen nga Aldaw ti Panangabbong?

³ Umuna a leksion: Tapno awaten ni Jehova ti datontayo, masapul nga anamongannatayo. Iti tinawen nga Aldaw ti Panangabbong, aguummong idi ti nasion ti Israel ket agidatonda kadagiti animal. Impalagip dagita a daton a masapul a madalusan dagiti Israelita kadagiti basolda! Ngem sakbay nga ipan ti nangato a padi ti aniaman a dara a maidaton iti Kasasantuan iti dayta nga aldaw, adda umuna nga aramidenna a napatpateg ngem iti pannakapakawan dagiti basol ti nasion.

4. Kas nadakamat iti Levitico 16:12, 13, ania ti aramiden ti nangato a padi iti umuna nga iseserrekna iti Kasasantuan iti Aldaw ti Panangabbong? (Kitaen ti ladawan iti akkub.)

 ⁴ Basaen ti Levitico 16:12, 13. Iladawam daytoy nga eksena iti Aldaw ti Panangabbong: Sumrek ti nangato a padi iti tabernakulo. Daytoy ti umuna iti tallo a gundaway a sumrek iti Kasasantuan iti dayta nga aldaw. Iggaman ti maysa nga imana ti pagkargaan iti nabanglo nga insienso, sa iggaman met ti sabali nga imana ti balitok a pagkargaan a napno iti beggang. Agsardeng iti sango ti kortina a nangabbong iti pagserkan ti Kasasantuan. Siraraem a sumrek iti Kasasantuan sa agtakder iti sanguanan ti lakasa ti tulag. Arigna nakatakder iti sanguanan ni Jehova a Dios! Kalpasanna, siaannad nga ibukbok ti padi ti nasantuan nga insienso iti beggang, ket mapno ti siled iti makaay-ayo a banglo. * Inton agangay, sumrek manen iti Kasasantuan nga awitna ti dara ti daton gapu iti basol. Paliiwem ta puoranna ti insienso sakbay nga idatagna ti dara ti daton gapu iti basol.

5. Ania ti maadaltayo iti pannakausar ti insienso iti Aldaw ti Panangabbong?

⁵ Ania ti maadaltayo iti pannakausar ti insienso iti Aldaw ti Panangabbong? Ipakita ti Biblia a dagiti awaten ni Jehova a kararag dagiti matalek nga agdaydayaw kenkuana ket mayarig iti insienso. (Sal. 141:2; Apoc. 5:8) Laglagipentayo a siraraem nga ipan ti nangato a padi ti insienso iti sanguanan ni Jehova. Kasta met, no umasidegtayo ken Jehova iti kararag, addaantayo koma iti nauneg a panagraem. Agbutengtayo kenkuana. Naimpusuan nga agyamantayo ta ipalpalubos ti Namarsua iti uniberso nga umasideg ken sumingedtayo kenkuana, kas iti maysa nga ubing nga umasideg iti amana. (Sant. 4:8) Awatennatayo kas gagayyemna! (Sal. 25:14) Apresiarentayo unay daytoy a pribilehio ket saantayo a kayat a paayen ni Jehova.

6. Ania ti maadaltayo iti panangpuor ti nangato a padi iti insienso sakbay nga idatagna dagiti daton?

⁶ Laglagipentayo a masapul a puoran ti nangato a padi ti insienso sakbay nga idatagna dagiti daton. Iti kasta, masiguradona nga anamongan isuna ti Dios inton idatagna dagiti daton. Ania ti maadaltayo? Idi adda ni Jesus ditoy daga, adda napateg a banag a masapul nga aramidenna sakbay a maidatonna ti biagna—napatpateg pay ngem iti panangisalakanna iti sangatauan. Ania dayta? Masapul nga agtulnog ken Jehova iti intero a panagbiagna tapno awaten ni Jehova ti datonna. Iti kasta, mapaneknekan ni Jesus a ti panagtulnog ken Jehova ti kasayaatan a wagas ti panagbiag. Maalangon ni Jesus​—wenno mapaneknekanna nga umiso ken nainkalintegan—​ti kinasoberano, wenno ti pamay-an ti panangituray, ni Amana.

7. Apay a makaay-ayo ken Jehova ti intero a panagbiag ni Jesus ditoy daga?

⁷ Iti intero a panagbiag ni Jesus ditoy daga, naan-anay a nagtulnog kadagiti nalinteg a pagalagadan ni Jehova. Awan ti sulisog wenno pakasuotan​—uray pay ti nakabutbuteng nga ipapatay—​a nangpakapuy iti tarigagayna a mangidepensa iti panangituray ni Amana. (Fil. 2:8) Idi naipasango ni Jesus kadagiti pannubok, nagkarkararag a “napakuyogan iti napigsa a sangsangit ken lulua.” (Heb. 5:7) Ipakita dagiti napasnek a kararagna a determinado nga agtalinaed a matalek ken Jehova. Para ken Jehova, dagiti kararag ni Jesus ket kasla makaay-ayo a banglo ti insienso. Naragsakan unay ni Amana iti intero a  panagbiagna ket dayta ti nangpaneknek nga umiso ti panangituray ni Amana.

8. Kasano a matuladtayo ti panagbiag ni Jesus?

⁸ Matuladtayo ni Jesus no aramidentayo ti amin a kabaelantayo nga agtulnog ken agtalinaed a matalek ken Jehova. No maipasangotayo kadagiti pannubok, sipapasnek nga ikararagtayo ti tulong ni Jehova gapu ta kayattayo a paragsaken. Iti kasta, ipakpakitatayo ti suportatayo iti pangituray ni Jehova. Ammotayo a saan nga awaten ni Jehova dagiti kararagtayo no adda ar-aramidentayo a kagurana. Ngem no surotentayo dagiti pagalagadan ni Jehova, masiguradotayo nga ibilangna dagiti naimpusuan a kararagtayo kas nabanglo nga insienso. Masiguradotayo pay a maragsakan ti nailangitan nga Amatayo iti kinatulnog ken kinamatalektayo.​—Prov. 27:11.

9. Apay a naidatag dagiti daton a pakikappia?

⁹ Maikadua a leksion: Agserserbitayo ken Jehova gapu ta agyamyamantayo kenkuana. Usigentayo dagiti daton a pakikappia, ti sabali pay a napateg a paset ti pudno a panagdaydayaw ti nagkauna nga Israel. * Iti libro a Levitico, maammuantayo a mabalin a mangidatag ti maysa nga Israelita iti daton a pakikappia “kas panagyaman.” (Lev. 7:11-13, 16-18) Idatagna daytoy a daton saan a gapu ta obligasionna no di ket gapu ta kayatna nga aramiden dayta. Isu a daytoy ket boluntario a daton nga ipaayna gapu ta ay-ayatenna ti Diosna a ni Jehova. Ti agdatdaton, ti pamiliana, ken dagiti papadi kanenda ti karne ti naidaton  nga animal. Ngem dadduma a paset ti animal a naisakripisio ti maidaton laeng ken Jehova. Ania dagita?

10. Ania ti isuro kadatayo dagiti daton a pakikappia a nailadawan iti Levitico 3:6, 12, 14-16 maipapan iti motibo ni Jesus a nangaramid iti pagayatan ni Amana?

¹⁰ Maikatlo a leksion: Ipapaaytayo ken Jehova ti kasayaatan gapu iti ayattayo. Ibilang ni Jehova ti taba kas kasayaatan a paset ti animal. Nakapatpateg met kenkuana ti dadduma a lalaem, a pakairamanan ti bato wenno kidney. (Basaen ti Levitico 3:6, 12, 14-16.) Maragsakan unay ngarud ni Jehova no boluntario nga idaton kenkuana ti maysa nga Israelita dagiti lalaem ken taba. Ti Israelita a nangidatag iti kasta a daton ipakpakitana ti naimpusuan a tarigagayna a mangidaton iti kasayaatan iti Dios. Iti umasping a pamay-an, situtulok nga indaton ni Jesus ti kasayaatan ken Jehova babaen ti amin-kararua a panagserbina gapu iti ayatna. (Juan 14:31) Pagragsakan ni Jesus nga aramiden ti pagayatan ti Dios ken nauneg ti panagayatna iti linteg ti Dios. (Sal. 40:8) Sigurado a naragsakan ni Jehova iti situtulok a panagserbi ni Jesus!

11. Kasano a mayarig ti panagserbitayo kadagiti daton a pakikappia, ken apay a makaliwliwa dayta kadatayo?

¹¹ Kas kadagidiay a daton a pakikappia, ti panagserbitayo ken Jehova ket boluntario a datontayo ken ebkas ti ayattayo kenkuana. Ipaaytayo ken Jehova ti kasayaatan gapu ta ay-ayatentayo iti amin a pusotayo. Maragsakan la ketdi ni Jehova a makakita iti minilion a situtulok nga agserserbi kenkuana gapu iti nauneg a panagayatda kenkuana ken kadagiti pagalagadanna! Makaliwliwa a maammuan a makitkita ni Jehova ken napateg kenkuana ti ar-aramidentayo kasta met ti motibotayo. Kas pagarigan, no maysakan a nataengan ket saanmon a maaramidan ti dati nga ar-aramidem, masiguradom a matarusan ni Jehova dagiti limitasionmo. Mabalin a mariknam a bassiten ti maipaaymo ken Jehova, ngem makitkitana ti nauneg a panagayatmo a mangtigtignay kenka a mangaramid iti aniaman a kabaelam. Maragsakan a mangawat iti kasayaatan a maipaaymo.

12. Ania ti reaksion ni Jehova kadagiti daton a pakikappia, ken apay a makaparegta dayta kadatayo?

¹² Ania ti maadaltayo kadagiti daton a pakikappia? Bayat nga ib-ibusen ti apuy dagiti kasayaatan a paset ti animal, agpangato ti asuk ket maragsakan ni Jehova. Masiguradom ngarud a maragsakan ni Jehova iti situtulok ken amin-kararua a panagserbim. (Col. 3:23) Panunotem laengen ti ragsakna gapu kenka. Aniaman ti maipaaymo gapu iti ayatmo kenkuana, dakkel man wenno bassit, ibilangna dagita kas gameng a laglagipen ken ipategna iti agnanayon.​—Mat. 6:20; Heb. 6:10.

13. Sigun iti Levitico 9:23, 24, kasano nga impakita ni Jehova ti anamongna kadagiti papadi?

¹³ Maikapat a leksion: Bembendisionan ni Jehova ti naindagaan a paset ti organisasionna. Usigentayo ti napasamak idi 1512 B.C.E. idi naaramid ti tabernakulo iti sakaanan ti Bantay Sinai. (Ex. 40:17) Indauluan ni Moises ti seremonia a panangdutok ken Aaron ken kadagiti annakna kas papadi. Naguummong ti nasion ti Israel tapno makitada dagiti papadi a mangidatdatag kadagiti umuna nga animal a daton. (Lev. 9:1-5) Kasano nga impakita ni Jehova ti anamongna kadagiti kabbaro a nadutokan a papadi? Bayat a bembendisionan da Aaron ken Moises dagiti Israelita, adda apuy manipud ken Jehova a nanguram iti intero a daton iti rabaw ti altar.​—Basaen ti Levitico 9:23, 24.

14. Apay nga interesadotayo ita iti pananganamong ni Jehova iti kinapadi ni Aaron ken dagiti annakna?

 ¹⁴ Ania ti ipakita daytoy a nakaskasdaaw a pasamak? Impakita ni Jehova ti naan-anay a suportana iti kinapadi ni Aaron ken dagiti annakna. Idi nakita dagiti Israelita daytoy a nalawag a suporta ni Jehova, naawatanda a masapul a naan-anay a suportaranda ida. Napateg kadi dayta kadatayo? Wen! Ti kinapadi iti nagkauna nga Israel ket anniniwan laeng ti dakdakkel a kinapadi. Ni Kristo ti dakdakkel a Nangato a Padi, ken adda 144,000 nga ar-ari ken papadi a kaduana nga agserbi idiay langit.​—Heb. 4:14; 8:3-5; 10:1.

15-16. Kasano nga impakita ni Jehova ti anamongna iti “matalek ken masirib nga adipen”?

¹⁵ Idi 1919, dinutokan ni Jesus ti bassit a grupo dagiti napulotan a kakabsat kas “matalek ken masirib nga adipen.” Idadauluan dayta nga adipen ti trabaho a panangasaba ken ipapaayanna dagiti pasurot ni Kristo iti “taraonda iti umiso a tiempo.” (Mat. 24:45) Makitkitatayo kadi ti nalawag nga ebidensia ti pananganamong ti Dios iti matalek ken masirib nga adipen?

¹⁶ Adun ti inaramid ni Satanas ken ti lubongna tapno marigatan ken saan pay ketdi a maitungpal dayta a matalek nga adipen ti trabahona. Iti laksid ti dua a sangalubongan a gubat, awan patinggana a panangidadanes, sangalubongan a krisis ti ekonomia, ken di nainkalintegan a pannakatrato, itultuloy latta ti matalek ken masirib nga adipen nga ipaay ti naespirituan a taraon dagiti pasurot ni Kristo ditoy daga. Panunotem ti kaadu ti awan bayadna a naespirituan a taraon ita iti nasurok a 900 a lengguahe! Nalawag nga ebidensia dayta ti suporta ti Dios. Kitaem ti sabali pay a pammaneknek iti pamendision ni Jehova: ti trabaho a panangasaba. Pudno a maikaskasaban  ti naimbag a damag “iti intero a daga.” (Mat. 24:14) Awan duadua nga iwanwanwan ken bembendisionan ni Jehova ti organisasionna ita.

17. Kasano a maipakitatayo ti suportatayo iti organisasion nga us-usaren ni Jehova?

¹⁷ Nasayaat nga isaludsodtayo iti bagitayo, ‘Agyamyamanak kadi ta pasetnak ti naindagaan nga organisasion ni Jehova?’ Kas iti literal nga apuy idi tiempo da Moises ken Aaron, impaayannatayo ni Jehova iti ebidensia nga an-anamonganna ti organisasionna. Talaga nga adu a banag ti pagyamanantayo. (1 Tes. 5:18, 19) Kasano a maipakitatayo ti suporta iti organisasion nga us-usaren ni Jehova? Babaen ti panangsurottayo iti naibatay-Biblia a panangiwanwan manipud kadagiti publikasiontayo ken kadagiti gimong, asamblea, ken kombensiontayo. Maipakitatayo pay ti suportatayo babaen ti naan-anay a pannakiramantayo iti trabaho a panangasaba ken panangisuro.​—1 Cor. 15:58.

18. Ania koma ti determinasiontayo?

¹⁸ Determinadotayo koma a mangyaplikar kadagiti leksion a naadaltayo iti libro a Levitico. Sapay koma ta magun-odtayo ti anamong ni Jehova tapno awatenna dagiti datontayo. Agserbitayo koma ken Jehova gapu iti panagyamantayo kenkuana. Sapay koma ta itultuloytayo nga ipaay ti kasayaatan ken Jehova gapu ta ay-ayatentayo iti amin a pusotayo. Ken sapay koma ta aramidentayo ti amin a kabaelantayo a mangsuporta iti organisasion a bembendisionanna ita. No aramidentayo dagitoy, maipakitatayo ken Jehova nga ipatpategtayo ti pribilehio nga agserbi kas Saksina!