1-2. Dai ni aten na Hkristan ni gaw Jaw Jau laika hpe hpa majaw hkaja ging ai kun?

KASA Pawlu gaw, ramma Timohti hpe ndai hku shadum ya ai: “Karai Kasang e shung ya ai Chyum laika shagu gaw, . . . akyu rawng nga ai.” (2 Tm 3:17) Dai hta Jaw Jau laika mung lawm ai. Nang gaw Chyum Laika hpe gara hku mu mada ai kun? Dai laika hta lawm ai tara ni gaw ndai prat a matu akyu n nga sai ngu masha nkau mu mada ma ai. Raitim, jet ai Hkristan ni gaw dai hku n re.

² Jaw jau laika hpe ka wa ai gaw shaning 3,500 daram na wa sai. Raitim, Yehowa gaw “sharin achyin ya na matu” Chyum Laika hta dai laika hpe shalawm da ya ai. (Rom 15:4) Jaw Jau laika hta Yehowa myit mang ai lam hpe mu lu ai majaw, anhte gaw dai laika hpe sharawng awng let hkaja ra ai. Karai Kasang shung ya ai dai laika buk kaw nna, gaja wa mung akyu law law lu la na re. Dai ni kaw na lam 4 hpe hkaja yu ga.

3. Laning mi hta kalang galaw ai Htingrai Htingrat Ya Ai Nhtoi hta hpa majaw shagu hkungga nawng ra ai kun?

³ Langai: Yehowa a myi man lu na matu anhte sak jaw ai shagu hkungga gaw shi hkap la ai hku rai ra ai. Laning mi hta kalang galaw ai Htingrai Htingrat Ya Ai Nhtoi hta, Israela ni gaw dusat hkungga nawng na matu hkinjawng agyi hpang de sa ra ai. Dai shagu hkungga gaw, Israela ni mara raw hkrum na matu ra ai hpe bai shadum ya ai. Dai nhtoi hta hkinjawng agyi gaw Chyoi Pra Htum Ai Shara de shagu hkungga asai hpe garai n la sa shi yang, Israela ni mara raw hkrum na hta grau ahkyak ai lam langai hpe shawng galaw ra ai.

4. Jaw Jau 16:12, 13 hku nga yang Htingrai Htingrat Ya Ai Nhtoi hta Chyoi Pra Htum Ai Shara de shawng nnan shang ai shaloi hkinjawng agyi gaw hpa galaw ai kun? (Makawp sumla hpe yu u.)

 ⁴ Jaw Jau 16:12, 13 hpe hti u. Htingrai Htingrat Ya Ai Nhtoi hta hpa byin ai hpe shingran yu u: Hkinjawng agyi gaw nawku sum kata de shang wa ai. Dai shani hta na, ndai kalang gaw Chyoi Pra Htum Ai Shara de shang ra na 3 lang kaw nna shawng nnan lang re. Shi gaw lawban bang da ai kawk hpe maga mi hta lang da nna, maga mi hta gaw grung ai wan n-ga bang da ai aja wan ban hpe lang da ai. Shi gaw Chyoi Pra Htum Ai Shara de shang ai nba shinggang a shawng hta chyahkring mi tsap ai. Grai hkungga let, Chyoi Pra Htum Ai Shara de shang nna, ga shaka sumpu shawng hta tsap ra ai. Ga shadawn hku nna Yehowa Karai Kasang a shawng hta tsap nga ai re. Ya hkinjawng wa gaw chyoi pra ai lawban hpe grung nga ai wan n-ga ntsa hku sadi let mun dat ai shaloi, gawk ting gaw manam pyaw ai sama hte hpring mat ai. * Dai hpang, shi gaw mara raw ya ai asai hpe hkungga nawng na matu Chyoi Pra Htum Ai Shara de kalang bai shang na re. Mara raw ya ai asai hpe garai n nat nawng shi yang lawban hpe shawng nat nawng ra ai hpe sadi yu u.

5. Htingrai Htingrat Ya Ai Nhtoi hta lang ai lawban kaw nna anhte hpa sharin la lu ai kun?

⁵ Htingrai Htingrat Ya Ai Nhtoi hta lang ai lawban kaw nna anhte hpa sharin la lu ai kun? Yehowa a sadi dung ai mayam ni a hkap la lu ai akyu hpyi ga ni gaw dai lawban hte bung ai lam Chyum Laika hta tsun da ai. (Shk 141:2; Shr 5:8) Hkinjawng agyi gaw grai hkungga let Yehowa nga ai shara de lawban hpe la sa wa ai. Dai hte maren, anhte mung Yehowa kaw grai hkungga let akyu hpyi sit shang ga ai. Kawa kaw ma langai sa shani ai zawn, ninggawn tawa Hpan Madu gaw shi hpang sit shang na matu, nihtep na matu ahkang jaw da ai majaw anhte grai chyeju dum ga ai. (Yak 4:8) Shi a manang ni zawn, anhte hpe hkap la ai. (Gsh 3:32) Dai ahkaw ahkang hpe anhte grai chyeju dum ai majaw, shi hpe myit daw hkra n kam galaw ga ai.

6. Hkinjawng agyi gaw hkungga garai n nawng shi yang lawban hpe nat nawng ai lam kaw nna anhte hpa sharin la lu ai kun?

⁶ Hkinjawng agyi gaw hkungga garai n nawng shi yang, lawban hpe nat nawng wa ai hpe dum u. Dai lam hku nna, hkungga nawng ai shaloi Karai Kasang hkap la na matu shi galaw ai. Dai kaw nna anhte hpa sharin la lu ai kun? Ginding aga hta nga ai shaloi, Yesu gaw shi a asak hpe shagu hkungga garai n nawng shi yang, shinggyim masha ni hpe hkye la na matu galaw ai lam hta na, grau ahkyak ai lam hpe galaw wa ai. Dai gaw hpa rai na kun? Shi gaw sadi dung kangka let asak hkrung ai hku nna, shi a shagu hkungga hpe Yehowa hkap la na matu hkyen lajang wa ai. Dai hku nna, Yehowa a lam ni hpe galaw ai gaw jaw ai lam re ai hpe Yesu sakse madun wa ai. Shi gaw Kawa a awmdawm ahkang (sh) uphkang ai lam gaw jaw ai, rap ra ai hpe sakse madun wa ai.

7. Yesu gaw ginding aga hta nga ai shaloi shi Kawa hpe hpa majaw myit shapyaw ya ai kun?

⁷ Yesu gaw ginding aga hta nga ai shaloi, Yehowa a ding hpring ai tsang madang ni hpe tsep kawp hkan sa wa ai. Chyam dinglik ai lam ni, yakhkak ai lam ni hkrum nna n ni nkri hkrum let si ra na hpe chye tim pyi, shi Kawa a uphkang ai lam gaw kaja htum re ai hpe sakse madun na matu dawdan da ai. (Hpl 2:8) Yakhkak ai masa ni hte hkrum ai shaloi, Yesu gaw “nsen kaba hte hkrap myiprwi ni hkrat let” akyu hpyi wa ai. (Heb 5:7, JCLB) Myit madung hte hpyi ai shi a akyu hpyi ga ni gaw, Yehowa hpe sadi dung mayu ai lam hte grau nna madat  mara mayu ai lam madun nga ai. Yehowa a matu Yesu a akyu hpyi ga ni gaw grai manam pyaw ai sama hte bung ai. Yesu a prat ting gaw shi Kawa hpe grai myit shapyaw ya nna awmdawm ahkang hpe madi shadaw ya ai.

8. Yesu a aprat kaw nna anhte gara hku kasi la mai ai kun?

⁸ Anhte gaw sadi dung ai aprat hte kaja htum asak hkrung nna Yehowa a lam ni hte tara ni hpe hkan sa ai hku nna Yesu hpe kasi la mai ai. Chyam dinglik lam ni hkrum ai shaloi, Yehowa hpe myit shapyaw ya mayu ai majaw, shi a karum shingtau lam hpe myit rawt let hpyi shawn ai. Dai lam ni hku nna, Yehowa a uphkang ai lam hpe madi shadaw ai lam anhte madun ai. Anhte gaw Yehowa hkum pat da ai lam ni hpe galaw ai nga yang, anhte a akyu hpyi ga ni hpe shi n hkap la sai hpe anhte chye ai. Raitim, shi a tsang madang ni hte maren asak hkrung ai nga yang, myit masin mahkra hte hpyi ai anhte a akyu hpyi ai ga ni gaw Yehowa a matu grai manam pyaw ai lawban hte bung na re. Anhte a sadi dung ai lam, madat mara ai lam gaw Yehowa hpe myit shapyaw ya lu ai.​—Gsh 27:11.

9. Mahku hkungga hpe hpa majaw nawng ai kun?

⁹ Lahkawng: Anhte gaw Yehowa hpe chyeju dum ai majaw shi a magam gun ai re. Dai lam hpe chye na na matu, moi Israela ni a tengman ai nawku daw jau ai lam a ahkyak ai lam langai re ai mahku hkungga a lam hpe myit yu ga. * Jaw Jau laika hta, Israela ni gaw “chyeju dum na matu jaw ai” mahku hkungga hpe nawng mai ai lam chye lu ai. (Jaw 7:11-13, 16-18) Hkungga nawng ai wa gaw dai hkungga hpe nawng ra ai majaw sha nawng ai n re, hkungga nawng mayu ai majaw re. Yehowa  Karai Kasang hpe tsawra ai majaw, ndai lam hpe sharawng awng let galaw ai re. Hkungga nawng ai wa, shi a nta masha ni hte hkinjawng ni gaw dusat hkungga a ashan hpe sha mai ai. Raitim, dusat a daw nkau hpe gaw Yehowa hpe sha jaw ra ai. Gara daw ni rai na kun?

10. Yehowa a magam hpe Yesu gun hpai ai lam hte Jaw Jau 3:6, 12, 14-16 hta tsun da ai mahku hkungga gaw gara hku bung ai kun?

¹⁰ Masum: Anhte gaw Yehowa hpe tsawra ai majaw kaja htum hpe jaw ai re. Yehowa gaw sau dung hpe dusat a kaja htum daw hku nna mu mada ai. Dusat a nhkyun ni hte hpawn, kaga daw ni hpe mung alak mi manu shadan ai. (Jaw Jau 3:6, 12, 14-16 hpe hti u.) Dai majaw, Israela marai langai gaw Yehowa hpe dai zawn daw ni hte sau dung hpe jaw ai shaloi, laksan hku nna shi ra sharawng ai. Dai zawn hkungga hpe nawng ai Israela masha gaw Karai Kasang hpe kaja htum jaw mayu ai myit jasat hpe madun ai re. Dai hte maren, Yesu gaw Yehowa hpe tsawra nna myit masin mahkra hte magam gun ai hku nna, sharawng awng let kaja htum sak jaw wa ai. (Yhn 14:31) Yesu gaw Karai Kasang a myit ra ai hpe galaw ai hta kabu gara nna, Karai a tara ni hpe grai tsawra ai. (Shk 40:8) Sharawng awng let Yesu magam gun ai hpe mu ai shaloi Yehowa grai pyaw ai.

11. Anhte a hkaw tsun magam gaw gara hku nna dai mahku hkungga hte bung ai kun? Dai gaw anhte hpe gara hku shalan shabran ya ai kun?

¹¹ Dai mahku hkungga zawn, Yehowa a magam hpe anhte gun hpai ai gaw shi hte seng ai anhte a hkamsha lam hpe madun ai re. Yehowa hpe anhte kaja htum jaw nna myit masin mahkra hte shi hpe tsawra ai majaw anhte magam gun ai re. Sharawng awng let nawku nga ai wan hku law ai masha ni gaw, Yehowa hte shi a lam ni hpe grai tsawra ai majaw magam gun nga ai hpe mu ai shaloi shi grai myit pyaw ai. Yehowa gaw anhte hpa galaw ai lam hpe sha n-ga, hpa majaw galaw ai lam hpe mung mu ai, manu shadan ai hpe anhte chye ai shaloi shalan shabran lam lu la ai. Ga shadawn, nang gaw asak kaba ai majaw, galaw mayu ai daram n lu galaw ai nga yang, Yehowa gaw na a masa hpe chye na ya ai hpe dum u. Nang gaw loi mi sha sak jaw lu ai ngu hkamsha na re. Raitim, nang galaw lu ai hpe tsawra myit hte galaw nga ai lam Yehowa chye ai. Nang kaja htum jaw ai hpe Yehowa gaw sharawng awng let hkap la ai.

12. Mahku hkungga hte seng nna Yehowa gara hku hkamsha ai kun? Dai gaw anhte hpe gara hku n-gun jaw ai kun?

¹² Mahku hkungga kaw nna hpa sharin la lu ai kun? Dusat a kaja htum daw ni wan hkru mat ai shaloi sama gaw ntsa de lung mat nna, dai sama hpe Yehowa lu ai shaloi grai myit pyaw mat ai. Sharawng awng let myit masin mahkra hte nang magam gun ai hpe Yehowa ra sharawng ai. (Kol 3:23-24) Nang hte seng nna shi kade daram pyaw na hpe myit yu u. Yehowa a magam hta tsawra myit hte loi mi (sh) law law shang lawm ai hpe manu dan ai arung arai zawn shi mu mada ai. Dai hpe shi galoi mung myit dum nna manu shadan nga na re.​—Mat 6:20; Heb 6:10.

13. Jaw Jau 9:23, 24 hku nga yang Yehowa gaw hkinjawng hpung nnan hpe hkap la ai lam gara hku madun ai kun?

¹³ Mali: Yehowa gaw ginding aga na shi a uhpung hpe shaman chyeju jaw nga ai. B.C. 1512, Sina Bum lagaw hta nawku sum hpe sharawt ai shaloi hpa byin wa ai hpe myit yu u. (Pru 40:17) Mawshe gaw Arun hte shi a kasha ni hpe hkinjawng ni hku nna aya tang ai poi hpe woi awn wa ai. Hkinjawng ni a shawng nnan galaw ai dusat hkungga nawng ai shaloi, Israela amyu masha ni gaw sa zup hpawng ma ai. (Jaw 9:1-5) Hkinjawng hpung nnan hpe Yehowa hkap la ai lam gara hku madun ai kun? Arun yan Mawshe gaw masha ni hpe shaman chyeju jaw ngut ai hpang, Yehowa  mung tawn hkungri ntsa na shagu hkungga hpe tsep kawp wan jahkru dat ai.​—Jaw Jau 9:23, 24 hpe hti u.

14. Arun a aru arat hkinjawng hpung hpe Yehowa hkap la ai lam anhte hpa majaw myit lawm ging ai kun?

¹⁴ Sumsing lamu kaw nna hkrat wa ai wan gaw hpa hpe madun ai kun? Yehowa gaw Arun a aru arat hkinjawng hpung hpe tsep kawp madi shadaw ai lam, dai lam hku nna madun dan ai. Hkinjawng ni hpe Yehowa madi shadaw ai lam Israela ni dan dan leng leng mu ai shaloi, shanhte mung hkinjawng ni hpe tsep kawp madi shadaw ra ai hpe chye na wa ai. Anhte hte mung seng ai kun? Seng ai. Israela ni a hkinjawng hpung gaw grau htum ai hkinjawng hpung a shingnip shingna sha re. Grau Htum Ai Hkinjawng Agyi re ai Hkristu hta, shi hte arau sumsing lamu hta magam gun na sadi dung ai hkinjawng 144,000 nga ai.​—Heb 4:14; 8:3-5; 10:1.

15-16. “Sadi ai hte myit su ai mayam” hpe hkap la ai lam Yehowa gara hku madun ai kun?

¹⁵ 1919 hta, “sadi ai hte myit su ai mayam” hku nna magam gun na matu namman chya hkrum ai hpunau hpung kaji hpe Yesu aya tang wa ai. Dai mayam gaw hkaw tsun bungli hpe woi awn nna, Hkristu hpang hkan ai ni hpe “aten du jang . . . lusha karan jaw” ma ai. (Mat 24:45) Sadi ai hte myit su ai mayam hpe Karai Kasang hkap la ai lam anhte dan dan leng leng mu nga ai kun?

¹⁶ Satan hte shi hpe madi shadaw ai ni gaw sadi ai hte myit su ai mayam a magam bungli hpe jahkring kau na matu shakut nga ai. Dai mayam gaw Yehowa a karum shingtau lam n nga yang, dai bungli hpe galaw na matu n mai byin ai. Mungkan majan 2 byin ai, zingri zingrat hkrum ai, mungkan ting hta ja gumhpraw mayak mahkak hkrum ai, n tara ai hku kanawn mazum hkrum ai lam ni nga tim, sadi ai hte myit su ai mayam gaw ginding aga na Hkristu  hpang hkan ai ni hpe wenyi lusha matut nna madi shadaw ya ai. Dai ni aten hta, wenyi malu masha law law hpe manu jahpu n jaw ra ai sha, amyu ga 900 jan hte lu la nga ai hpe mung myit yu u. Dai gaw mayam hpe Karai Kasang madi shadaw ya nga ai lam dan dan leng leng sakse madun nga ai. Bai nna, hkaw tsun bungli hpe mung Yehowa shaman chyeju jaw nga ai. Kabu gara shiga hpe “mungkan ting hta” teng sha hkaw dan nga ai. (Mat 24:14) Yehowa gaw dai ni na aten hta shi a uhpung hpe lam matsun ya nga nna awng dang hkra galaw ya nga ai.

17. Yehowa akyu jashawn nga ai uhpung hpe anhte gara hku madi shadaw na kun?

¹⁷ Anhte hkum anhte ndai hku san ging ai: ‘Yehowa a ginding aga uhpung hte arau ginrun lu ai hpe ngai chyeju dum ai kun?’ Mawshe yan Arun aten hta lamu kaw nna wan jahkru dat ai hku nna shi hkap la ai lam madun wa ai zawn, dai ni na aten hta mung shi a uhpung hpe shi madi shadaw ai lam madun nga ai. Dai majaw, anhte grai chyeju dum ga ai. (1 Ht 5:17- 19) Yehowa akyu jashawn nga ai uhpung hpe anhte gara hku madi shadaw na kun? Anhte a laili laika ni, zuphpawng ni, ninghtawn zuphpawng ni hte ginwang zuphpawng ni hta anhte lu la ai Chyum Laika hta madung tawn ai lam matsun ni hpe hkan sa ai hku nna re. Dai sha n-ga, hkaw tsun ai hte sharin achyin ai lam hta dang lu ai daram shang lawm ai hku nna madi shadaw mai ai.​—1 Ko 15:58.

18. Hpa galaw na matu dawdan da ai kun?

¹⁸ Jaw Jau laika kaw nna sharin la lu ai lam ni hpe tatut hkan sa na matu dawdan da ga. Anhte sak jaw ai lam hpe Yehowa hkap la ya u ga. Yehowa hpe chyeju dum ai majaw shi hpe nawku daw jau mat wa ga. Shi hpe myit masin mahkra hte tsawra ai majaw, kaja htum hpe matut nna sak jaw mat wa ga. Dai ni na aten hta, shi shaman chyeju jaw nga ai uhpung hpe myit masin mahkra hte madi shadaw mat wa ga. Dai lam ni galaw ai gaw, shi a Sakse ni hku nna magam gun lu ai ahkaw ahkang hpe manu shadan ai lam anhte madun ai re.